23/05/2021
Wan tim blong helt mo National Disaster Management Ofis long Luganville oli deploy long tetei moning i ko long Notwes Santo blong investigatem wan yacht we i bin ko shore long Wunpuko Village.
Chief blong Wunpuko Village, David Molisa, i talem se yacht ia i bin araev long basis long Wunpuko long Sunday moning wetem tu man.
Chief Molisa i talem se yacht ia i kam kolosap longshore mo wan long tufala man ia i swim i ko shore.
“Long taem ia we i swim i kam shore, ol man i stap insaed long jej vinis. Man, ia i kam mo wokbaot stret i ko long Praise and Worship jej. Taem hem i ko insaed long jej, hem i shekhan wetem wan brata. Mo hem i stap insaed long jej kasem taem jej prokram i vinis. Mo ol polis ofisa blong vilij kaonsel oli sendemaot whiteman ia i kobak long yacht blong hem,” Chief Molisa i talem.
Dr Hillary David we i bes long Wunpuko Helt Center i talem se wan tim blong helt mo NDMO long Luganville bae oli stap deploy i ko long Wunpuko long tetei moning blong mekem investigation long situation ia.
Chief Molisa i talem se oli bin harem se yacht ia i bin kam long Spain mo oli ran short long fuel mo kakae mekem se oli kam shore long Wunpuko.
Hem i talem se wetem advaes we oli karem long helt authority long Luganville, hem i bin restrictim muvmen blong ol pipol i ko long ol nara vilij long Notwes Santo mo advaesem ol pipol blong stap kwaet kasem investigation blong helt mo NDMO i komplit.
Chief Molisa i talem se wetem advaes we oli karem hem i bin putumaot ol security ofisa blong hem blong wajem yacht ia blong i no ko aot, kasem tim blong helt mo NDMO i kasem Wunpuko mo mekem investigation.
Photo: Sam Smith
