Mialy Ravelomanana
Tonia Mpamorona sy Mpiandraikitra
Tale Jeneraly RanjaSoa Publishing
Hanitra Salomon Tonia Mpandrindra
Hajaina Andrianasolo Tonia Mpitantsoroka
Mainty Kely Tonia Mpanolotsaina
Riambola Mitia Tonia Mpanolotsaina
Tsy Avahana Rahely Tonia Mpanolotsaina
Soamiely Andriamananjara Tonia Mpanatanteraka
Nalisoa Ravalitera Ranitra
Mamy Rakotondraibe Ranitra
Mossieur Njo Ranitra
Johary Ravaloson Ranitra
Jacqueline Randrianjafinimanana Ranitra
Tsara Soratra dia Vatonamelankafatra mirakitra sy mitahiry lahatsoratra voakaly, na sombin-tantara na tantara noforonina na tononkalo na lahatsoratra fanadihadiana hafa.
Tsara Soratra koa dia Ambohipihaonana ho an'ny mpanoratra sy ny mpamaky. Eto no ahafahan'ireo mpanoratra Malagasy, na ireo vao manomboka, na ireo vao misandratra, na ireo efa kalaza, mizara sy mampiranty ny asa-sorany amin'ireo mpankafy izany.
Lojikan’ny Tsara Soratra
Azo lazaina fa vitsy ny asa soratra voatonta amin'ny teny Malagasy taorian’ny taona 1980. Ilay teny Malagasy anefa dia hita miroborobo hatrany, ary tsapa koa fa miha-betsaka ny Malagasy no tia sy mahay manoratra. Raha mijery ny isan’ny fikambanan’ny mpanoratra na poeta eto Madagasikara na ny pejy eo amin’ny Facebook fotsiny ianao dia ho resy lahatra fa maro dia maro tokoa no tena tia manoratra. Ny ankabeazan’ny fotoana anefa dia toa very ao anaty kotaban’ny aterineto ireo tena manan-talenta ka tsy dia afaka misongadina loatra. Aiza ny ED Andriamalala, ny Clarisse Ratsifandriahanana, ny Andry Andraina, ny Randriamiadanarivon’ny Taonarivo faha-telo? Iza no kintan’ny literatiora Malagasin’ny taon-jato faha raika amby roapolo?
Fanamby
Ny fanamby manentana ny orinezaka TSARA SORATRA (izay misy ny Takelaka www.soratra.org sy ny Revio Tsara Soratra) dia ny fampiroboroboana ny asa-soratra sy hailaza Malagasy amin’ny teny Malagasy.
Tanjona
Mila ainga vaovao ny hailaza amin’ny teny Malagasy. Ny tanjon’ito orinezaka ito dia ny fanorenana kianja avo lenta (eo anivon’ny aterineto sy an-taratasy) izay:
• Mampiranty ny hakanton’ny asa-soratra amin’ny teny Malagasy.
• Mampisongadina ny fahaizan’ny mpanoratra Malagasy efa kalaza sy manome tosika ireo vao misandratra ahafahany mamirapiratra eo anivon’izany kianja izany ankehitriny.
• Mandresy lahatra ny mpamaky (sy ny mpanonta boky/mpandaha-dohavy) fa misy ary betsaka ny asa-soratra Malagasy mendrika ho vakiany ankehitriny; ary manentana azy mba hamantatra sy hamaky ary hitia izany asa-soratra vaovao izany.
• Mampirisika ny mpanoratra Malagasy mba hampiasa ny Teny Malagasy ho isan’ny teny anoratany.
Ny orinezaka Tsara Soratra dia mahakasika ny mpiombon'antoka rehetra amin’ny teny Malagasy (na ny mpanoratra, na ny mpamaky, na ny mpampianatra, na ny mpamoaka boky, na ny mpivarotra boky, na ny mpikirakira boky).
Azo lazaina fa mahomby ny orinezaka Tsara Soratra rehefa tsapa fa “Sady mitondra asa soratra raitra ho an’ny mpandala, no manolotra sehatra maro mpamaky ho an’ny mpanoratra sangany sy vao misandratra.” Dia samy ho afa-po daholo na ny mpamaky na ny mpanoratra.
Orinezaky ny RanjaSoa Publishing ny Tsara Soratra. Mpanonta boky amin'ny teny Malagasy na mifandray amin'i Madagasikara. Mitady vakiroaka na drafitra tiana avoaka ho boky izahay, ka manasa ireo mpanoratra Malagasy manana hevitra na fikasana ny hamoaka boky hanantona ny RanjaSoa Publishing ahafahana mikaroka izay fomba azo hifanampiana hahatontosa izany fikasana izany.
