https://www.facebook.com/107299374226293/

Walal midiyaa, United states of America, Washington D.C., DC (2025)

12/31/2024

Oromo Liberation Front OLF Official Telegram Adda Bilisummaa Oromoo ABO:
Dhaamsa ABO Bara Haaraa 2025
Kabajamaa Ummata Oromoo, mirgi kee sarbamuu irraa roorroon si irratti daraaree jireenya hadhaawaa geggeessuuf dirqamte,
Miseensota ABO biyya keessaa fi biyya alaa kaayyoo keessanitti cichuun qabsoo bilisummaa Oromoo keessatti dirqama keessan bahataa jirtan,
Lammiilee Oromiyaa hundaa,
Akkasumas Deggertootaa fi Firoottan qabsoo bilisummaa Oromoo,
Baga waggaa haaraa 2025niin isin gahe jechuun Addi Bilisummaa Oromoo (ABO)n kabajaan dhaamsa isaa isiniifdabarsa.
Waggaa haaraan bara 2025 waggaa ummatni Oromoo itti jabaatee, hojjetee fi falmatee harqoota gabrummaa jalaa bahee bilisummaa isaa itti gonfatu, bara lammiileen Oromiyaa mirgi isaanii guutuutti kabajamee nagaa fi boqonnaa qananiin itti jiraatan, bara cunqursaa fi saaminsi itti xumura argatu, akkasumas kabajamuun mirga ummatootaa itti mirkaneeffamu akka tahu ABOn hawwa. Hawwiin kunis akka mirkanaawuu fi dhugoomu mul’ata keenya tahuu ibsina.
Mooraa qabsoo bilisummaa Oromoo dabalatee, ummatni Oromoo maal keessa akka turee fi dabarse, haalli Itoophiyaa fi Oromiyaa, darbees mooraan cunqursitootaa aangoo of harkaa qabanii maal fakkaataa akka turan gamaaggamatuun fardii ta’a. Kana gochuun waggaa haaraa keessa kan hojjetamuu qabu irratti hamilee fi murannoon itti seenuutti dabalee gufuulee fi didhaalee mul’atan jabinaan irra aanuuf gargaara.
Addi Bilisummaa Oromoo ifatti ummata isaa keessatti qabsoo karaa sirnaa geggeessuuf waliigaltee mootummaa Itoophiyaa waliin taasisuun sochii siyaasaa erga eegalee waggootni ja’a darbanii jiran. Deemsa waggoota kanneenii keessatti didhaaleen gama sirna mootummaa Itophiyaa aangoo of harkaa qabu irraa ABO fi ummata Oromoo mudatan akkaan hamaa fi ulfaataa ta’uun ummata keenyaa fi ummatoota Itoophiyaa mara jalaa dhokataa miti jennee amanna.
Heddumminaan hidhamuu miseensotaa hanga hoogganootaatti, ajjeefamuu miseensotaa hanga hoogganaatti, cufamuu waajjiraalee hanga saamamuu qabeenyaa dhaabaatti yakkootni mootummaa aangoo karaa hin taaneen dhuunfatee jiruun ABO irratti deemsisame akkaan ulfaataa fi bal’aa dha.
Akkuma waggoottan darbanii bara xumurre 2024 keessas mootummaan sochii siyaasaa ABOn karaa sirnaa geggeessuuf wareegama olaanaa hanga lubbuu kennuutti itti kafalaa jiru gufachiisuuf, moggaatti dhiibuu fi tapha siyaasaan ala gochuuf duullii fi shirri irratti hin geggeessine hin jiru. Duullii fi dhiibbaan kun hanga guyyaa har’aatti itti fufe malee hin xiqqaanne ykn hin dhaabbatne. Haa tahu malee ABO Jarmayaa Siyaasaa ummataa fi dhimmi inni qabatee deemus dhimma ummata Oromoo waan taheef, ABO rakkinoota kana hunda keessummeessaa dirqama isaa dachaa dachaan bahachuun fuulduratti deemaa jira.
Barri 2024 xumurre deemsa qabsoo bilisummaa Oromoo ABOn durfamu keessatti addatti ammoo sochii karaa nagaa dhaabichi waldhaansoo waliin qabaa jiru keessatti taatewwan garagaraa jabina hojii qabsoo mul’isan, rifaatuuleen adda addaa hammeenyummaa mootummaa Itoophiyaa mul’isan kan itti keessummeeffamee dha.
Deemsa qabsoo bilisummaa Oromoo gufachiisuu fi siyaasa Oromiyaa keessaa dhuunfatee akka barbaadee fi waan ofiif fedhe tarkaanfachiisuuf kan yaaduu fi hawwu sirni Itophiyaa, kana milkeessuu kan dandeenyu ABO irratti duuluun diiguu fi dadhabsiisuuni akeeka jedhuun bara 2024 keessas akkuma duraa ABO taargeeta godhatuun guddoo irratti shireera; duuleeras Tahus cichoomina miseeensotaa fi ummatakeenyaan qabsichi imala isaa qofa irratti xiyyeeffachuutti milkaaweera.
Duulota mootummaan kun ABO irratti godhe keessaa inni ijoon ajjechaa suukanneessaa qondaala siyaasaa dhaaba keenyaa Jaal Battee Urgeessaa irratti raawwate osoo hin kaasin bira darbuu hin dandeenyu. Yakki ajjechaa Jaal Battee irratti qaamni mootummaa raawate hangam ABO diinomfatee akka jiru kan agarsiisee dha. Mootummaan kun sochii siyaasaa karaa sinaaf murannoo ABOn qabu gaaffii keessa akka galuuf, tarkaanfii hamaa fi sodaachisaa kamuu fudhatuu irraa kan of duuba hin deebine ta’uu kan itti mul’isee dha.

Murni kun ABO fi dirree siyaasaa bilisaa fi karaa nagaan falammii siyaasaa geggeessuu irraa hagam sodaa guddaa akka qabu yakki ajjechaa Jaal Battee Urgeessaa irratti raawwate agarsiistuu guddaa dha. Jaal Battee Urgeessaa qofa osoo hin taane, ajjechaalee fakkaatoon guutummaa Oromiyaa keessatti miseensotaa fi deggertoota dhaaba keenyaa fi sab-boontota irratti raawwatamu bal’aa dha. Kun hundi ABO dadhabsiisuu fi moggeessuuf qofa osoo hin taane, ummata Oromoo qabsoo isaa irraa ugguruuf yakka shiraan guutamee raawwatamuu dha.
Dirree tapha siyaasaa Itophiyaa keessaa guyyaa irraa guyyaatti dhiphisaa, abdii dhaabota/paartilee siyaasaa ummata isaaniif dhugumaan qabsa’anii dukkanneessaa jira. Murni aangoo afaan qawween tikfatchuuf lola gaggeessaa jiru kun, miseensota ABO hidhuu fi ajjeesuu dabalatee, har’a illee Waajjira Muummee Gullallee dabalatee guutuu Oromiyaa keessaa waajjiroota ABO akkuma cufetti jira. Qabeenya dhaabaa guutummaatti akkuma saametti jira. Kun dhiphachuu dirree siyaasaa biyyattii fi gartuun kun nagaan dhibdee siyaasaa jiru hiikuuf har’a illee fedha, murannoo fi hamilee akka itti hin qabne mirkaneessa. Abbaa irrummaa isaas kan agarsiisuu dha. Isa kana garuu qabsoo miseensota, qabsaawotaa fi gargaarsa ummataan bara 2025 kana akka irra aannu abdii guddaa qabna.
Hidhamuu fi ajjeefamuun, doorsisii fi ariisaan jiraatan illee, didhaalee fi dhiibbaan kamuu mudatanis, ABOn tooftaa qabsoo, obsaa fi murannoo barootaaf kuufatetti amanuudhaan, “Rakkoo qabsoo, qabsoo fi hojii keenyaan irra aanna!” kan jedhu dhaadannoo qabsoon waan masakamuuf, haala jiru keessatti hojii qabsoo itti fufeera. Caasaalee dhaabaa keessaa fi alatti hojii qabsoo jajjabeessuun, hojii ijaarsaa babal’isuun, dabballoota barsiisuu, qaruu, barnoota haala yeroo irratti hunda’anii fi wanneen qabsootti rarra’an adda addaa kennuun sagantaa siyaasaa, akeekaa fi kaayyoo isaa tarkaanfachiisuuf ejjennoo hin daddaaqamneen bara kana keessa sochii hin tuffatamne godhee jira. Bara 2025 keessas hojii qabsoo fi dhimma jaarmaa irratti jabinaan kan hojjetu ta’uun hin falamsiisu.
Dhimmootni dantaa saba Oromoo fi lammiilee Oromoo ilaalanis waltajjii garagaraa irratti, akkasumas caasaa fi mala adda addaa qabuun tiksuu, sagalee tahuu, hammeenya irratti dalagamu addunyaan gahuu irratti guddoo hojjatamee jira. Kunis dachaa dachaan irratti hojjetama. Nagaa dhabuun, dararaa fi rakkinni ummata kanaa xumura akka argatu humna guutuun hojjetama.
Ummatni Oromoo jaarraa tokkoo fi walakkaa oliif harqoota gabrummaa irratti fe’ameen miidhaan dorgomaa hin qabnee fi hacuccaan dhala namaaf hin malle irra gaheera. Waggoota dheeraa bittaaa alagaa fi sirna kolonii jala ture kana keessattis mootummootnii jijjiiraman illee, akeekaa fi galiin isaanii jijjiiramuu dhabuu irraa hacuuccaa fi saaminsi babal’atuu fi jabeeffamuu malee isaanii xiqqaatan hin mul’atne. Maqootni sirnaa hawwatoo ta’an moggaafaman illee, summii dammaan makame, kan ittiin akeeka qaban golgatan tahuu irra dabree ummatoota hin fayyadne. Kan bara bittaa mootummaa ammaa immoo daran hammataa kan ummata Oromoo akka sabaatti salphisee fi duula bifa hundaa irratti geggeessee dha.
Goolessitootni maqaa adda addaa moggaafatan kan akkaFaannoo qaama mootummaa fi murnoota dantaa Itoophiyaa tiksina jedhaniin Oromiyaa keessattii fi Oromiyaa alattiijaaramanii fi hidhatanii daangaalee Oromiyaa cabsuun ummata Oromoo kan weeraran, jumlaan kan ajjeesan, mormakan muran, kumoota dhibbaan kan buqqisan, qabeenyaa kan saaman, lafa isaa kan harkaa fudhatan bara bittaa mootummaa Itoophiyaa ammaa kanatti. Humna goolessaa kanas sochii qabsoo bilisummaa Oromoo fi WBO dura dhaabuuf akka meeshaatti itti gargaaramuuf, darbees qabeenya Oromoo saamuu fi danda’amu lafa Oromoo irraa muratanii dhuunfatuuf jalqaba irraa kaasee kan ijaare, hidhachiisee fi bobbaase qaama mootummaa Itoophiyaa fi dantaa Itophiyaa tiksina warra jedhani.
Sochiin humna goolessaa Faannoo Oromiyaa keessaa mul’atu quba qabeenya caasaa mootummaa ala taha amantaa jedhu hin qabnu. Kanaafis ragaan lafa irraa ifaan deddeebi’ee argamee jira.

Kana irraa ummatni keenya jaarraa ammaa kana keessa haala kanaan dura argee hin beekne keessatti kufee, akka jireenya gadadoo fi salphinaa jiraatu taasisamee jira. Duula hunda hammataa bulchiinsa mootummaa jalatti irratti banamee jiru kanaanis ummatni keenya kumaantamaan ajjeefameera; hidhameera; miliyoonotaan qe’ee fi qabeenya isaa irraa buqqifamee dirree irratti facaafameera. Bu’aan mootummaa jijjiiramaa jedhamu irraa ummatni Oromoo argate isa kana qofa dha. Salphinnii fi dararamni kun 2025 itti fufuu akka hin qabne amantaa ABO ti. Ummatni keenyas kana ofitti fudhatuun salphina kanatti xumura gochuuf waliin akka hojjatnu waamicha keenya dabarsina.
ABO rakkina wal xaxaa Itoophiyaan qabduu fi aadaa siyaasaa biyya kanaa maraammartoo keessa jiru kan ummata Oromoo fi ummatoota kaanis bara baraan lolaan nageenya dhabsiisee jiru tilmaama keessa galchuun, ummatni Oromoo fi lammiileen Oromiyaa furmaata buqqaasaa argatuu qabuutti amanuun Mootummaa Cehumsaa Biyyoolessa Oromiyaa (MCBO) akka furmaataatti labsuun ni yaadatama. Labsii kana ofitti fudhatuun kanneen socho’an sochii jajjabeessaa godhaniin, hojiin abdachiisaa fi hawwii ummata kanaaf abdii kennan guddoon hojjatamanii jiran. ABO kun milkaawuu qaba jedhee gadi jabeessee itti amana. Kanaaf, ummatni keenyaa fi lammiileen Oromiyaa dhimma kana milkeessuuf akka socho’an waamicha godha. Akka milkaawuu fi dhugoomus amanna.
Akka waliigalaatti biyyattiin rakkinoota ulfaatoo fi walxaxaa adda addaatiin hudhamtee, ummatootni gidiraa fi dhiphuu arganii hin beekne keessatti kufanii jiraachuun ifaa dha. Karaa siyaasaa, lolaa, dinagdee fi hawaasummaan kufaatiin jiru haalaan ummataaf sodaachisaa dha. Dinagdeen kufuun, hammaachuu fi babal’atuun qaala’iinsa jireenyaa lubbuun jiraachuu lammiilee gaaffii keessa galchee jira. Ummata Oromoo fi lammiilee Oromiyaaf furmaatni harka isaanii jira jedhee amana ABOn. Furmaata ABO lafa kaawe ofitti fudhatanii qaama furmaataa tahuun dirqama lammummaa waan taheef, MCBO dhugoomsuu irratti akka hojjetnu gadi jabeessinee hubachiisna.
Addatti ummatni Oromoo roorroo fi gidiraa, darbees nagaa dhabuu nu irra gaha jiruuf tokkummaa fi dandeettii akka sabaatti qabnu walitti qindeessinee hojjechuun biyya keenya irratti nagaan jiraachuuf akka sochoonu irra deebinee hubachiisna.
Maayii irratti miseensotni ABO keessaa fi alatti argamtan, kanneen haalota rakkisoo fi didhaalee adda addaa keessatti kaayyoo, heeraa fi seera dhaaba keessaniif amanamaa ta’uun,waan ittiin waadaa seentan irraa osoo hin maqin hanga har’aatti jabaattanii dhaabbattan, jireenya dhaabaa fi itti fufiinsa hojii isaaf wabii taatanii jirtan, jabinaa fi cichoomina mul’iftan irra dhaabbatuun, isa itti aanutti ammoo daran jabaattanii hojii qabsoo itti fufuuf akka of qopheessitan hiree kanaan ABOn dhaamsa dabarsa.
Barri haaraan 2025 bara nagaa, bara milkii, kan injifannoo, bara ajjechaan, hidhaan, saaminsi, buqqaatiin, gidiraa fi roorroon, boo’ichi haadha Oromoo, salphinni maanguddootaa furmaaata mayii argatu, akka waliigalaatti bara cunqursaa fi gidiraan itti dhaabbatee mirgaa fi bilisummaa keenya mirkaneeffannee Oromiyaa biyyaa fi qe’ee keenya irra nagaan itti jiraannu akka nuu tahu ABO hawwii isaa irra deebiin dabarsa.

Injifannoo Ummata Bal’aaf!
Adda Bilisummaa Oromoo!
Muddee 31, 2024
Finfinnee

12/20/2024

“Qaawwa Sareen Banteen Waraabessi Seena”
Ijoo Dubbii Adda Bilisummaa Oromoo (ABO)

Lammiileen Oromiyaa qe’ee fi qabeenyaa isaanii irraa buqqa’anii baqattuu, rakkattuu, kadhattuu tahanii akka jiraatanii fi Daangaan Oromiyaa weerartootaan sarbamee abbaan qe’ee ummanni Oromoo Qe’ee isaa irraa akka buqqifamu taasisuun kan weerartoota qe’eef qabeenyaa Ummata Oromoo saamuu fi babal’ifannaa lafa Oromoof bobba’aniif haala mijeessaa turee fi jiru maqaa mootummaan daldalu Biltsiginnaa aangoo isaa shiraa fi yakkaaf garmalee dhimmi bahee jireenya lammiilee balaaf saaxilee dha.

Tibba kana gaafa muddee 17, 2024 Lixa Oromiyaa Wallaggatti, “Iizii Wallaggaa” jechuun humni Faannooo ofiin jedhu of ijaare dura taa’aa godhatee nama Nugusee Waaleliny jedhamuun ibsa kennee of labsuu isaa tamsaasa media hawaasaa irratti darbeen dhageenyee argineerra.

Oromiyaa keessatti Faannoo aynaa (quality) fi baay’innaan hidda gadi fageeffatee humna jabaa tahee akka ijaaramuuf bara 2019 irraa kaasee yeroo gara garaatti qondaalonni mootummaa ibsa karaa media kennaa turaniin, sadarkaa Fedeeraalaattis tahee, bulchiinsa Mootummaa Naannoo Amhaaraa fi Bulchiinsa Mootummaa Naannoo Oromiyaatiinis maallaqni guddaan itti bahee deeggarsi jabaan taasifamaafii akka ture ni yaadatama.

“Qurxummii Balleessuuf Madda Bishaanii Gogsuu” jechuun akkuma dhaadachaa turan Partiin Biltsiginna ifatti, maqaa Waraana Bilisummaa Oromoo balleesina jedhaniin waraana irraa jalaan ummatatti bananiin boonbii summaawaan osoo hin hafin ummata keenya gaaga’ama hamaaf saaxilanillee Qurxummicha garuu balleessuu hin dandeenye. Ammas ijibbaata Qurxummii balleesuutiif jecha Finxaaleyyiin Faannoo akka Iziin Wallaggatti of ijaartuuf haala kan aanjesseef qaama mootummaa ofiin jedhu Partii Biltsiginnaati jennee amanna.

Biltsiginnaan aangoo siyaasaa afaan qawween dhuunfatan afaan qawween tursiifachuuf jedhanii, Finxaaleyyii Faannoo Amhaaraa Ofiin Jedhu kan Raayyaa Ittisa Biyyaan tumsi gosa hundaa taasifamuuf Oromiyaa daangaa Naannoo Amhaaraan wal daangessu cufa irratti akka ijaaranii loojistkaan gargaaran Addi Bilisummaa Oromoo (ABO)n karaa caasaa isaa mirkaneeffatee yeroo adda addatti ummata hubachiisaa ture. Finxaaleyyiin Faannoo jedhaman kun Oromiyaa naannoolee keessa socho’an cufa bulchiinsa mootummaa Naannoo Oromiyaa jalaa baasanii toohannoo isaanii jala akka galchan ibsa kanaan dura baasaa turreen ifa gochuun keenya ni yaadatama.

Waraana Finxaalessa saamichaaf bobba’e ummata Oromoo irratti ijaaraa, qe’ee fi qabeenyaa Oromoo saamsisaa, ummata Oromoo irraa albeen Shunkurtiin muratuu fi Uleen Horiin tikfatu osoo irraa hin hafne warra dhunfaan of ittisuuf jecha meeshaa hidhates irraa hiiksisaa, qaama saamichaaf dhufe hidhachiisaa aangoo siyaasaa dheereffannee jiraannaan Biltsiginnaa abjuu yoo tahe malee, ummanni Oromoo fi lammiileen Oromiya boqqonnaa jireenyaa dhabanii, nagaan dhoowatamee ganamaa galgala dhaabbataa ibidda waraanaa keessa jiraatan ijibbaata falmachuun dirqama.

“Bishaan Kokkee Gahe Du’aan Gahe” akkuma jedhamu kana booda, ummanni Oromoo roorroo daangaa dabre jala taahee sababa har’arra bortu caala jedhee abdii sobaa ofitti horuuf hin jiru. Fallii fi malli jiru rooristoota qe’ee isaatti isatti roorrisu falmatanii of irraa kaasuu fi gabroomsaa afaan Damma dibatee ummata keenya Harqoota Gabrummaa jalatti ittisu didne diddaan dura dhaabbachuu dha.

Maayii irratti ummata Oromoo dhiibbaa fi dhiittaa yakka waraanaa (War crime) jalatti miidhamaa turee fi jiruuf ummanni keenya biyyoota ollaa fi alaa gara garaa keessa jirtan sagalee tahaafiin dhaamsa keenya. Kanumaan waliin, sabaa fi sab-lammoonni biyyattii, falmattoonni mirga namoomaa, dhaabbileen hawaasummaa gara garaa gaaga’ama Mootummaan Biltsiginnaa waraana ofii qabdu cinatti Finxaalessa saamicha qe’eef qabeenya Oromoo fi babal’ifannaa lafaaf bobba’e maqaa Faannoon ummata Oromoo irratti ijaartee rukuchisiisaa jiru akka dura dhaabbattanii nageenya waaraaf, haqaaf jiraattan waamicha keenya isiniif taasifna.

Injifannoo Ummata Bal’aaf
Adda Bilsummaa Oromoo
Muddee 20, 2024
Finfinnee

12/09/2024

Dargaggoon Oromoo Hummaan Waraana PPn Mana Kireeffatee Jiruu Fuudhamee Ajjee**famuun Dhagahame.

Akka odeessi maddeen Sagalee Bilisummaa Oromoo irraa nu dhaqqabe addeesutti dargaggoon Oromoo Midhaksaa Tashomaa Dhugaasaa(Miidhoo) jedhamu Oromummaa isaan yakkamuun manaa fuudhamee waraana murna PPn ajjee**fame.

Akka maddeen SBO dabaluun addeessanitti, dargaggoon Miidhoon gaafa Muddee 5,2024 magaalaa Naqamtee naannoo Bataskaana Kidaan Mirat fuuldara ykn peepsii boroo bakka jedhamutti halkan saa'atii 2:00/8:00 pm mana jireenyaa isaa bakka kireeffatee jiruu waraana PPn ukkaanfamee waajjira Poolisii Naqamteetti hidhame.

Gaafa Muddee 6, 2024 wajjira poolisii Naqamtee ganda 05(poolisii godinaa) keessa bule keessaa baasuun bariisaa guyyaa naannoo 6:00/12:00 pm tti fuudhanii gara Ona dhalootasaa Waamaa Hagaloo tti geessuuf obboleessaa Baacaa Tashomaa wajjiin deemaniin.

Karaa irratti, ganda bakka laga saddeeqaa jedhu kan ganda wajjiin wal daangessutti konkolaataa irraa buusanii Dargaggoo rasaasaan addasaarra naannoo nyaara ijasaa dhahanii ajjeesanii obboleessaasaa Baacaa fuudhanii gara Ona Waamaa Hagalootti geessanii hidhan jedhu maddeen.

Reeffa dargaggoo Midhaaksaa gaafa Muddee 7, 2024 ummanni naannoo karaa irraa argee kaasuun maatii isaa itti barbaadanii guyyama kana qe'ee dhalootasaatti waldaa amantoota warra wangeelaa(peenxee) Darabaa jedhamutti akka awwaalame maddeen SBO addeessaniiru.

Kan gabaase Sagalee Bilisummaa Oromoo ti

11/29/2024

Wal yaadachisuuf

Ce’umsi Haqa Qabeessi Furmaata Biyya Kanaati

Maqaa ittiin aangoorra turan jijjiirrachuu fi tooftaa ittiin Oromiyaa cabsanii fi dararan tolfachuu malee sirnoonni hanga ammaa impaayera Itoophiyaa bulchan takkaa Lammiilee Oromiyaaf waan gaarii godhanii hin beekan.
Qabsoo Addi Bilisiummaa Oromoo (ABO)n ummata isaa waliin waggoota hedduuf taasise wareegama akkaan ulfaataa baasuun dammaqiinsa ummataa fi sadarkaa qabsoo ol guddiseera. Haala kanaanis Warraaqsa Qeerrootiin sirni ERDF diigame. Tahullee sirnuma san keessaa ol ka'uun qabsicha butanii bu'aa wareegama Qeerroo fi qabsaawota Oromootiin argame gara dabarsuun boqonnaan qabsoo osoo hin jijjiiramiin hafe. Nageenyii fi tasgabbiin ni dhufa jedhamee eegames dhadhaa ibidda buute tahe. Jijjiirama wareegama ulfaataan dhufeen dirreen dimokiraasii ni bal'ata jedhamee yaadame hafee sirni kan duraarra hammaatuu fi lolaa fi waraana qofatti amanu dhufee, impaayerattiin addatti ammoo Oromiyaan dirree lolaa fi waraanaa taate. Cilaancilli ifaa xiqqoo mul'achuu eegalee tures osoo oolee hin buliin dukkana hamaatti jijjiirame.
Oromoon saba kamuu caalaa nagaa jaallata. Nagaa jaallatuu fi hawwuun isaas lola sodaaf miti. Yoo lolaas meeshaalee waraanaa aadaatiin meeshaalee waraanaa ammayaa mo'atee addunyaattuu agarsiiseera. Akkuma sabni kun nagaa jaalatu, qabsaawonni haqaa hedduun nagaa fi tasgabbii fiduuf falmaa godhanillee sirni waraana malee nagaa hin feene kun hedduu isaanii hidhee baayyees ajjeeseera. Qabsaawota jijjiirama mul'atee ture fidanis hedduu nyaatte.
Sirnoonni dhufaa darbaa impaayera kana bulchan akkuma teessoon isaanii handhuura Oromiyaa Finfinnee tahe, Oromiyaa afaan qawween bitanii qabeenya ishee saamuu fi ummata ishee tohatuun kaayyoo fi fedhii sirnoota kanneen maraati. Sirni kunis xiyyeeffannoon isaa Lammiilee Oromiyaa afaan qawween ukkaamsee bituun Oromiyaa akka fedhetti saamuu fi lammiilee lola bara baraan uumuu keessatti humna waraanaaf dhimma bahuu dha. Waggoota afran darban kana naannolee Impaayerattii keessa jiran hunda caalaa Oromiyaan dirree dhiigaa fi jeequmsaa taate. Qubattoota Oromiyaa keessa jiraatan qofaatti hidhachiisuun Saba Oromoo waliin walitti buusuu akkasumas hidhattoota saba Amaaraa dhaangaa Oromiyaa seensisuun Lammiilee Oromiyaa ajjeesaa, lafaa fi qabeenya isaa saamaa fi mancaasaa jiru.
Sirni amma aangoorra jiru kun ummata beelessuu akka tarsiimootti waan fayyadamuuf Ummanni miiliyoonaan lakkaawamu beelaa fi du'aaf saaxilamee jira, kaan qe'ee fi qabeenya isaa buqqa’ee biyyuma isaa irratti baqataa tahes jiraataa jira.
Sirnoota darban kamuu caalaa sirni amma aangoorra jiru sabaa fi sablammoota, akkasumas ummata amantiidhaan walitti buusuu tooftaa ittiin aangoo dheereffatan godhatee jira. Saba isaaf bitamuu didee fi lolaan jilbeenfachiisuu dadhabe Saboota ollaa isaa jiran waliin walitti buusuun dadhabsiisuu fi Uummatichi nageenya isaatiif wabii malee akka jiraatu godhee jira.
Sirni qabsoo Qeerroo fi ummtaatti fayyadamee aangoorra ba'e kun waggoota afran impaayera kana bulchaa jiru keessatti Oromiyaa fi naannolee baayyee dirree waraanaa fi lolaa godheera. Qabeenyi ummataa ni saamame kaan ni barbadaawe. Uummanni lolaa fi jeequmsaan goolamee hojjetachuu dadhabee hiyyummaa fi beelaaf saaxilameera. Kumaa fi kitilaan kan lakkaa'amanis qe'ee isaanii irraa buqqa'aniiru. Kanaaf Lammiileen Oromiyaa anatu siif beekaa garboonfataa jalaa of baasuun sirna ofii filateen buluu qaba.
Rakkoo qabatamaa amma biyya kana keessatti raawwataa jiru qaamni ofitti fudhatee gara nagaatti ceessisuu fi toora qabsiisu hin jiru taanaan egeree Oromiyaatiif baayyee yaaddessaa taha.
Kanaaf Motummaan Cehumsaa Biyyoolessaa Naannoo Oromiyaa (MCBNO) Rakkoolee walxaxaa amma keessa jiramu keessaa gara nagaatti akka cehuuf gahee olaanaa qabaata.
1. Rakkoo Nageenyaa yeroo ammaa kanatti Lammiilee Oromiyaa irra gahaa jiru akka itti hin fufnee fi gara nagaatti ceessisuuf;
2. Balaa dhibiinsi nageenyaa fi goolamni siyaasaa dhalcheen gaaga'ama dinagdee amma mul’ataa jiru akka itti hin fufneef mala dhawuu;
3. Duguuggaa sanyii, ajjeechaa, saammicha, seer-dhablummaafi sarbama mirga namaa jiru hambisee sabatinsaa fi nagaa fiduuf;
4. Biyya Lammiileen hundi keessatti bilisummaa fi nagaan bahanii galan taasisuuf;
5. Biyya olaantummaa heeraa fi seeraan keessatti kabajamu uumuu;
6. Biyya uummatni mootummaa isaaf tahu dhiibbaa tokko malee nagaa fi bilisaan filatee ittiin bulu uumuuf karaa banuu;
7. Mootummaa uummattoota Oromiyaa keessa jiraatanii fi ollaa Oromiyaa jiranii wajjiin nagaa fi jaalalaan jiraatu uumuuf hojjeta.
Kanaaf MCBNO deggeruu fi utubuun furmaata biyya kanaati.

KMCBNO
Onkoloolessa 2022
Injifannoon Uummata Cunqurfamaaf!

11/27/2024

UN Security Council
UN Human Rights Council
USA Secretary of State
European Union Human Rights Commissioner
Office of the UN High Commissioner for Human Rights
Subject: Urgent Appeal to Address Genocidal Violence and Atrocities by the
Ethiopian Government and the group called themselves Fanno against the Oromo
people and others.
Dear All,
I am writing this letter with heavy heart and urgent plea for your immediate intervention
to stop the ongoing genocide and atrocities being committed against innocent civilians in
Oromia, Ethiopia on behalf of the International Oromo Women’s Organization (IOWO),
a Non-Profit Organization established to promote gender equality and be the voice for the
voiceless Oromo women/people and all other oppressed people in Ethiopia.
The current situation is dire, with countless young people, mothers, and elders being
slaughtered, displaced, or subjected to unspeakable cruelty. Entire villages have been
razed, leaving survivors in desperate need of humanitarian assistance. These actions
constitute clear violations of International human rights laws and principles.
Example: The current situation in Northern part of Oromia/ Salale Darra per BBC
report that shows few parts of it.
https://www.bbc.com/afaanoromoo/articles/ce9gpd1d73po

Targeted killings that the ex*****on of unarmed civilians, including women and children, which is ethnically motivated violence, mass displacement, destruction of villages.
We request the urgent action of the International Community, particularly the United Nations, All Human Rights Organizations, The USA and European Governments to Condemn the violence of the Ethiopian government and it's allied groups for their action; to conduct thorough investigations and hold perpetrators accountable through international legal mechanisms; enforce targeted sanctions against individuals and entities responsible for these crimes and provide urgent humanitarian aids for the evicted people in north Oromia/Salale zone, East Wellega/ Horro Guduruu Amuru, Jardaga Jarte etc. districts.
The Oromo people the largest ethnic group in Ethiopia, have suffered state terrorism for the last six (6) years more than ever and have long been subjected to systematic marginalization and repression. This genocidal move of the government and its allies represents the culmination of decades of unresolved injustices.
The global community cannot remain silent while an entire population faces extermination.

We call upon the moral and legal obligation of the International Community to act decisively before it is too late. The world's response to this crisis will define our commitment to justice, human rights, and protecting vulnerable populations.
We implore you all to prioritize this issue and take meaningful actions to end Oromia's suffering.
Sincerely,
I/dinknesh//
Dinknesh D Kitila For IOWO Board

11/23/2024

Dhiiga Uummataa Dhangaalaasuun Hatattamaan Dhaabbachuu Qaba
******
Ajjeechaa fi Buqqaatii Godina Salaalee Aanaa Dharraatti Uummatarratti Raawwate Balaaleffachuun
Ibsa Waajjira Kongiresii Federaalawaa Oromoo (KFO) Irraa Kenname
======
Seenaa qabsoo mirgaa fi bilisummaa kabachifachuu keessatti adda taee kan beekamu fi burqaa qabsaa’otaa uummata Oromoo, Salaaleerratti miidhaan suukkanneessaan yeroo garaa garaatti yoo raawwate waan ta’eef kan tibbanaa kun isa jalqabaa miti. Yakka akkana jedhanii jechaan ibsuu hindandeenye sirnoota mootummaa dhufee darbaadhaan raawwataa turaaniru.

Hundeensaanii Naannoo Amaaraa kan ta’ee fi Gareen Finxaaleyyii Faannoo jedhamuun beekaman, tibba waraana Tigiraayi Mootummaa Federaalaa waliin ta’uun, Naannoo Tigiraayi kan bu’uureffatan hidhattoota Adda Bilisa Baasaa Uummata Tigiraayi/Wayyaaneetti duuluun meeshaalee waraanaa ammayyaa’oo lubbuu namaa nyaatan hidhachuu dabalatee mootummaadhaan “Gootota” jedhamanii jajamaniiru. Meeshaa waraanaa carrichatti fayyadamuun hidhatan kan hin hiikkannee fi galtee siyaasaa olaanaa kaayyeffachuun, Mootummaa Federaalaammoo “Abbaa Dabaree Mootummaa Oroomoo” jedhanii mooggaasuun, Oromiyaa fi Naannoo Amaraaa iddoo garaa garaatti dhalattota Oromoorratti tarkaanfilee sukkanneessoo ta’an fudhataniiru.

Tibbanammoo Naannoo Oromiyaa Godina Salaalee Aanaa Dharraa ganda Salaalkullaatti qabeenya uummataa saamuu dabalatee dardarran guddattoota ta’an Darajjee Amaaree Asfaawu fi Dagguu Nugusee jedhamanirratti yakka suukkanneessaa akka raawwatan miidiyaalee hawaasaa garaa garaarraa arguu dandeenyeerra. Gareen riphee loltootaa mootummaa irratti, mootummaanimmoo garee riphee loltootaa irratti qabachuun hammeenya biraa ta’us, miidhaan qaqqabuusaa qaamoleen mootummaallee mirkaneessaniiru.

Itoophiyaa keessatti hanqinni bulchiinsa gaarii, dhiittaan mirgoota namoomaa babl’achuun, sirni diimokiraasii dagaaguu dhabuufi mootummaan gaafatamummaafi aantummaa uummataa qabu dhabamuun kan ka’e, barnoonniifi misoomni babal’achuu dhabuufi rakkoolee kanneeniin walfakkaataniin kutaaleen hawaasaa mufataniifi gareen adda addaa uummata keessa ta’anii mootummaarratti qabsa’uun beekamaadha. Mootummaan immoo maqaa seera kabachiisuutiin “riphee loltootaaf da’oo ta’an” jedhee lammiilee nagaarratti tarkaanfii gara-jabinaa fudhata. Riphee loltootas ta’ee mootummaan akka feeteedhaan tarkaanfiin jiraattota nagaarratti fudhatan ulaagaa kamiinuu fudhatama hinqabu.

Waan gaarii tokko hojjattanii jireenya uummataa fooyyessuun yoo dadhabbamellee, akkuma barametti akka jiraataniif, qaamni tokko isa biraa sababeeffachuun wal harkaa fuudhanii lammiilee nagaa miidhuun, yoo xiqqaate gaaftama seenaa jalaa ba’uun akka hindanda’amne deddeebinee ibsineerra.

Karaa biraatiin Seenaa Siyaasaa Itoophiyaa keessatti waan barame ta’uu baatus, garaa garummaa yaadaafi ejjannoo siyaasaa mariidhaan furuun waan waqtiinsaa dirqamsiisu ta’uu dhaabni keenya KFOn yaadachiisaafi akeekkchiisaa tureera. Haa ta’u malee, yaadni furmaataa dhiyeessine raawwatamuu dhabee uummata keenya dhumaatiif, biyyattiimmoo diigumsaaf akka saaxilaa jiru argaa jirra.

Yeroo dheeraaf Itoophiyaa keessatti haadhoo rakkinoota hundaa kan ta’e, mootummaan diimokiraatawaa aantummaa qabuufi itti gaafatamummaan itti dhaga’amu hundeeffamuu dhabuusaa wayita ta’u, kanaafimmoo mootummaan kayyoo kanaaf kutannoofi fedhiin paartilee siyaasaa haqaaf dhaabbatan waliin marii iftoomaafi haqa-qabeessa ta’e akka gaggeessuuf irra deddeebinee gaafanneerra. Haala amma jiru kanaan lammiileen gama kamirraayyuu miidhamaa jiraachuu waan hubannuuf, dhiiga uummataa tasa lolaasuun hatattamaan dhaabbachuu akka qabu cimsinee yaadachiifna.

Kanaafuu, humni Fenxaaleyyii Faannoo mootummaattin qabsaa’a ofiin jedhus ta’ee, humni mootummaa maqaa seera kabachiisuutiin, tarkaanfii suukkanneessaa uummatarratti fudhachaa jirtan, akka dhaabdaniif KFOn cimsee akeekkachiisa. Michuuwwaniifi lammiileen keenya Itoophiyaafi guutuu addunyaatti argamtan, nagaa-leellistootni hawwasa addunyaa hundi, KFO cinaa dhaabbachuudhaan gochaa hammeenyaa kana akka balalleeffattaniif, miidhaa walfakkaataan akka hinraawwatamneefi yakkamtootni seeratti akka dhiyaataniif uummata keenya waliin akka taataniif waamicha dhiyeessina.

Waajjira Kongirasii Federaalaa Oromoo (KFO)
Finfinnee; Sadaasa 13, 2017

11/21/2024

Barattoonni Yuunivarsiitii Kotobee ajjeechaa ummata Salaalee irratti raawwatamaa jiru mormuun diddaa nyaataa taasisan.

Mootummaan ajjeechaa ummata Salaalee irratti raawwatamaa jiru dhaabsisuu akka qabuu fi humna Finxaaleessa Faannoo Oromiyaa keessaa akka baasu gaafatani jiru.

11/21/2024

Waajjira ABO Damee Finfinnee:
Ajjeechaa Suukaneessaan Hidhattoota Faannoo fi Mootummaa Dr. Abiyyii Ahmadiin Ummata Nagaa Irratti Raawwatamaa Jiru Yakka Waraanaa Ulfaataa fi Hammaataa dha.

Ibsa Adda Bilisummaa Oromoo (ABO)

Ajjeechaa suukaneessaan Giddu gala Oromiyaa Godina Salaalee Ona Dharraatti ummata Oromoo irratti tahe, duula qinda'aa Finxaaleyiin Faannoo Amhaaraa babal’ifannaa lafaa, qe’ee fi qabeenya Oromoo saamuuf bobba’anii fi mootummaa Dr.Abiyyii Ahmad Waraana Bilisummaa Oromoo (WBO) ittiin loluuf Faannoo ijaaree ummatatti bobbaaseen akka raawatame Addi Bilisummaa Oromoo (ABO)n ni amana. Yakka waraanaa fi gocha suukanneessaa ifatti ummata keenya irratti tahe kana Addi Bilisummaa Oromoo gadi jabeessee balaaleffata; duras dhaabbata.

Golee Oromiyaa cufa keessatti, addatti bakkoota naannoo Amhaaraan wal daangessan keessatti yakki waraanaa ulfaataa fi hammaataan Faannoo fi Waraana mootummaa bulchiinsa murna Biltsiginnaa Dr. Abiyyii Ahmadiin durfamu jalatti ganna 6n darbaniif ummata Oromoo irratti akka deemaa ture yeroo gara garaatti ibsaa turreerra.

Akka kanaan, Lixa Oromiyaa Walaggaa Bahaa Ona Giddaa Ayyaanaatti ilmaan Oromoo jumlaan konkolaataa irraa buusee kan ajjeese tumsa Raayyaan Ittisa Biyyaa godheefiin Faannoo Amhaara ti, Bureetti nama Oromoo Faannoon morma muranii mukatti fannisanii ittiin geeraraa turan gargaarsa Raayyaan Ittisa Biyyaa godheefiini. Wallotti Barsiisota konkolaataa irraa buusuun Faannoon fixxe osoo Raayyaan Ittisa Biyyaa naannootti argamuu ti. Ammas tibbana Kaaba Shaggar, Godina Salaalee, Ona Dharraa magaalaa Sararkullaa jedhamutti ajjeechaa suukaneessaan dargaggoo Darajjee Amaaree dabalatee ilmaan Oromoo hedduu irratti Faannoon raawwatame. Kunis bulchiinsi mootummaa fi waraanni isaa osoo jiruu ti.

Ajjechaa suukaneessaa ummata meesha maleeyyii irratti tahaa jiruun ragaalee suur-sagalee ifatti mul’atan caalaa ummata Faannoon ajjeefte akka hin awwaalanneef Raayyaan Ittisa Biyyaa humnaan gara lagaa fi gaaraatti ummata reeffa irraa ittisee waraabessi dirreetti nyaataa jira.
Ifatti qaamoleen mootummaa Ona Dharraatti hidhattoota Faannoo fi Raayyaa Ittisa Biyya akka waltumsan gochuun ajjechaa suukaneessaa ummata Oromoo irratti raawwachiisan:
1. Bulchaa Ona Dharraa Obbo Shibashii Ayaalow fi
2. Gaafatamaa waajjira bulchiinsaa fi nageenyaa Ona Dharraa Obbo Allebbaachew Haylamaariyaam akka tahan mirkaneeffaneerra.
Kanumaan waliin, hoogganaan Biiroo Kominikeeshinii mootummaa naannoo Oromiyaa Obbo Haayluu Addunyaas yaada miidiyaaleef kennaniin, “haleellaan raawwatamaa jiru finxaaleyyii Afaan Oromoo fi Afaan Amaaraa dubbataniin raawwatamaa jira” jedhanii ifatti dhiiga ummataa akka lolaatti dhangala’aa jirutti qoosanii gaafatama fudhachuu irraa baqatan.

Ragaa ummata irraa argameen akka Adda Bilisummaa Oromootti kan mirkaneeffanne, akka Obbo Haayluun faa waakkatan osoo hin taane, Ummata Oromoo Godina Salaalee kan ajjeesisiisaa jiru caasaa mootummaa, bulchiinsa sadarkaan gubbaa irraa hanga godaatti ijaaramee jiruu dha.

Akka odeessa jiruutti, yeroo ammaa kana weerara babl’ifannaa lafaan gandoonni Faannoon dhuunfatanii qe’ee fi qabeenya ummataa daaressan keessatti daa’imman reef dhalatan irraa qabee hanga jaarolee biyyaatti ifatti ajjechaa suukanneessaa irratti raawwataa jiran, Lafoota Deenyuu Wabeensoo, Tuutii, Iluu Goodaa Caffee, Baabbuu Dirree, Sararkullaa, Saalaash, Maakaftaa Mannayyoo, Warree Mannayyoo, Baayitii, Mana Lagoo, Gabroo, Barreessaa fi Hoomaa Bonnayyaa faa akka fakkeenyaatti kaasuun ni danda'ama.

Lola qindawaa ummata meesha maleeyyii irratti bananiin, qe’ee Oromoo saamsisee ona taasisee, nama Oromoo Oromummaa isaan yakkisiisee akka ajjechaan suukaneessaan irratti tahu kan haala aanjessee fi ajjeesuu keessaas harka kan qabu, maqaa WBOn ummata nagaa qe'ee isaa keessatti dhumataa jiruuf kan itti gaafatamu mootummaa Dr. Abiyyii Ahmadiin durfamu Biltsiginnaa dha.

Waan taheef, ummanni keenya Oromiyaa, addatti daangaa naannoo Amhaaraan wal daangessu keessa jirtan lola lakkuu waggoota 6n kanneen guutuu mootummaa aangoo isaa tikfachuuf ummataan loluu fi Finxaaleyyii babal’ifannaa lafaa fi saamicha qabeenyaaf ummata keenyaan lolu jalaa baatanii qe’ee keessan irratti abbaa tahuuf, nagaa fi bilisummaan jiraatuuf falli jiru mirga keessaniif falmachuu duwwaa dha.

Kanuma waliin ilmaan Oromoo biyyoota ollaa fi alaa garagaraa keessa jirtan ummata keessan sagalee dhabee ganna 6 guutuuf walitti fufiinsaan bulchiinsa murna Biltsiginnaa jalatti roorroon daangaa darbe irra gahee wabii jireenyaa dhabeef sagalee tahaan dhaamsa keeya.

Maayii irratti, sabaa fi sab-lammoonni biyya kanaa, hawaasni dippilomaasii magaalaa Finfinnee keessa jirtan, hawaasni iddil-addunyaa, dhaabbileen mirga namoomaaf falmitan, jaarmiyaaleen siiviilii fi jaarmiyaaleen siyaasaa ajjeechaa suukaneessaa fi dhumaatii garmalee ilmaan Oromoo irratti tahaa jiru kana akka dura dhaabbattaniif yaamicha keeya taasifna.

Injifannoo Ummata Bal’aaf!
Adda Bilisummaa Oromoo
Sadaasa 21, 2024
Finfinnee

Walal midiyaa

12/31/2024

12/20/2024

12/09/2024

11/29/2024

11/27/2024

11/23/2024

11/21/2024

11/21/2024

Address

Website

Alerts

Contact The Business

Shortcuts

Share

Category