01/08/2023
KNF dîr mun hi zei asi rawh? an analytical article:
Thu masa: Dunglei zei mawzat hun chu KNF page timi mawh, Va te/Va pi kuki timi page lak ah, mi chelh le cham hen, vo hen, mi țhih hen an post mi atam tuk rawh le, mi â tla cha rîn chu sâng a tlâk lo ti nâk ruang ah kan sâng na lo le, mipi khawm lung fîang dauh na rih seh ti hen kan ngâk na mi chu asi. Tu lam chun mipi tla an lung fîang ta-tak kho lo rih khawmsele, hi hâwi mi lasui nih an lung afîang tir vima lai kan ti le, a rîn kan adawmh mi rawh. Kan rîn vima lai rawh. Au thu rîn leh au thu post; a dik hen a țha, arêl tu nih lairêl na seh.
Thil tum mumal lo: Thawsuak zalên nâk au zawng nih kan duh. KNF lam nih chun thawsuak zalên nâk ta-tak an duh mi hen alang lo. An ruitu sâng chem tla nih, mipi an ‘â’ tir na le, rû hâng a tliang lân ah Tangka sum cherkhet nei ta hen minei si ding hen duh nâk an nei hen alang hen afiang mi rawh. Zei tin hen a fiang kan sût dawmh lai: Hi lasui rêl tu tla nih hi cha hi nan rêl chun hawng sût u. An thil tum amumal lo zia nan theih vima ko lai. An mah hâwi hen Bâwmfa zaw zawng hi ‘â’ hep an ngaih le, a mâwl mi lam chu atam ngamsam khawmsele, mi lungfîm khawm an um bâk ti an theih loh. Mi lungfîm dauh tla kha, pâwl dang support ah an ngaih le, mêlma, thah na ding hep hen thu an zanh k*mza tâwn.
Murui harsat nâk maitawnh ding thu: Pâwl murui hi dirh asi phawt chun, abîk tak hen political party si chun, harsat nâk a pal ngelchel ding asi. Harsat nâk pal hun ah, pâwl nih a ti ding mi tla KNF lak ah alang lo, alang dah lai loh. Hi lasui rîn an rêl tik ah an ațang bâk chun hi lasui rîn hi alawh tling mi kan ti lai. Thil um tla leh um ding mi tla chu hi hâwi asi: Pâwl/murui member au tal damlo zâwtfah atawng kho. Hi damlo zâwtfah atawng hun ah a zohkhenh treatment nâk sum/tangka zawng chu pâwl nih mawh aphurh ding asi. Accident au tal nih (party member) a tawng kho, chu tik khawm ah an murui nih mawh aphurh ding asi. Chun, sorkar lak ah dik hen seh dik lo tak hen seh case (mamla) au tal nih a tawng kho. Chu tik khawm ah pâwl/murui nih case maitawnh nâk zareh zawng leh lawyer (Ukil) zareh leh ahâwl duan dân ding tla pâwl nih mawh a phurh ding asi.
Tu hin, KNF thil tih ruang ah, mi zei khawm pâwilo tla cherkhet chu September `22 thawk hen mi 15 ding nunâu pakhat tel hen; Rangamati Jail ah an tâng rawh le, a dang an tâng ding mi tla cherkhet tleih chia an um vima rih ti thawng theih asi. Chu case tla chu special act `74 k*m mi mang hen case an siam mi asi ti kan theih. Țha tak hen high court tla tiang tleng hen sualpi lo chun, hun sâwt pi jail ah tang ding mi case asi. A hun lo ah lawyer tleih hen tangka salam a vei lai. A hun tak ah ukil tleih ding karei pêk tu au a um. Division hotu p**i tla kha, court varenda ah an san ah veikhat khawm tleng dah lo mi tla nih hi case tla hi an deal kho awt mi ma? Ui sa aisîa taba hen suang mi ei cho an tumh mi tla nih hi hâwi mi case zei tin an deal awt? Ngaihtuah tham atling! Mi tâng tla dawngsung, au nih zoh hen mawh aphurh ding rawh?
Pâwl lak ah asung alêng minung aherh: Political pâwl lak ah minung zât tam ual mi tla tel a herh le, KNF ti mi pawl ni chun, a ‘â’ mi tla zât khat ko a nei hen a lang. Chu khawm chu, aisîa taba nam vang hen suang mi uisa ei cho an tumh mi hep fâwn. Abîk hen underground (mangtang) um mi pâwl lamchang chu, overground ah hun cherkhet issue tla theih fîang ding hen rian țuan ta ding mi asi. KNF chu overground ah rian țuan ta lo hen, mipi tla rang ah rû hâng hen an chiah na le, an lung fîang manh lân ah tangka poisa lâk re-reh ding an a nam khim le, ram an râwk hep. Tu ah case a maitawnh hen jail ah an tâng mi tla leh an tâng vima ding mi tla au nih a sanh na awt mi rawh? Pâwl dang leh murui dang tla chu mângtang an um mi tla leh overground um tu tla rian țuan ding an ațhen le, mailei hun sâupi kal ding strategy an siam, mailei an fûk. Chain of command an nei. KNF chu ngaksia lung fîang lo hep, an hotu lian chem tla khawm an ngaksia ual rih. An pâwl lak ah mi lung fîang, mi fing dauh tla leh politics lak ah an atel rawh mi au khawm an um lo, telh na ding kharua an duh lo, tangka an tawng nâk apûang chun, țhenh na ding le bang a suak lai an ti le, a thup hen an a thup. Tu ah an mah khawm hâwl hen tawng na ding silo rawh. A tek le athup nâk khawm an vai rawh liau asi.
KNF hi Bawm phun leh ram melma an si: Politics um dân zei khawm theih fîang lo hen, laichuk meithal hen sorkar kawrsen tla chu neh dep kah na hen, tharum hen ram tawng zek ding thu an sim le, mipi tla chu duh khawm duh lo khawm an trih na le, duh hâwi hep hen an lang le, sorkar kawrsen tla mit muh ah misual dir mun ah kan dir hep rawh. Kan k*t suak thil zuar ding leh kan thil herh tla bazar thawk hen chawk ding thu lak ah thliardang nâk kan amaitawnh rawh. Kan Bâwm phun pumpi nih economic dirmun sia kan a maitawnh rawh, Chu cho sim lo hen, kan mah kar lak ah kan social value a tlâu vei vima. Kan a zumh kho lo rawh. Lung duh thu pakhat le pakhat kan a ruah ngam lo rawh. Kan a zumhmaih hep. Zei ridek hi hâwi hun kan pal awt, asim ahar thlo. Kan pi-pu thlân ram khua , kan in mun, kan lo ram, kan dûm leh kan tisik an nah tlanh nâk ram kal tak hen, kan tek rawh. Kan mah duh leh kan mah remchâng hen țiau mi sele zei khawm a pawi lo kan ti chiau lai. “Camp kan kah awt, nan tuar kho lai loh, tek u” ti hen KNF tla nih an fuih na le, an tek tir na. Zangrah hen rânkhat kan minung tla chu Mizoram ah an lût kho le, khua 4/5 lak ah an țhen na. A rân 2 nâk le arân 3 nâk chu boarder vêng tu tla nih an hawng khirh na le, hamh tinkir tuar hen a dawngh nâk ah Pastor Sawmkhup chu buh ngei bu hen lam lailak lawh ah thih nâk a maitawnh rawh. Thungai arâpthlâk. Lampi kan siam ziar mi rawh an ti piak na mi tla chu awrawl hep ti a lang fîang rawh. Mipi nih tu khawm ah an theih fîang ver lo rih baa ti nâk kan nei.
Refugee status thu: Mi cherkhet Mizoram ah refugee hen mipi kan tek tir na kho chun kan KNF pâwl khawm, international support kan tawng kho lai ti nâk an nei le, India sorkar laipi ministry thawk hen an thusuah tla kan mipi mimâwl tla nih chun an theih phak lo da ngai ah, an zumh nget na ko hen alang ko rih, thungai a pawi. Cha thiamlo leh excess nei lo tla chu hi hâwi ding ko rawh silai. Unau, Sûlkhat suak fa sinâk ruang ah, Mizoram mipi, sorkar leh NGO cherkhet tla nih lungkham nâk hen râltlân tla rang ah an țangpi na mi chu thungai lawmh akâi mi asi. Kan theih ding pakhat chu humanitarian ground hen hi hâwi thil hi an ti mi asi.
Mizoram leh Burma ah Bâwmfa tla ngaihdân thu: Group dang dang lak ah KNF sanh hen Bangla chu kah sek ding huam hen cherkhet tla nih an cha rîn an post le, an duh nâk tla chu lawmhpi akai. Khawmsele, atak hi zei asi ti sût thiam aherh kan ti. Hi KNF hi aram sung ah Bâwm upa lungfiang murui, mi theihthiam tla ngaih nâk le support a um tak ma? Hi thu tla hi an sût phanh lo mawh; awrawl hen hep thu an thanh na ruang ah hi hâwi thinlung an put mi baa kan ti. Mizoram leh Burma ah Bâwmfa tla an um mi tla khawm hi Bangla thawk hen an țîau mi hep asi le, hun sâwtpi asi lo rih ruang ah, mimal leh afang deh hen kan atheih hep ko rih le! An fingh nâk le an theih nâk tla khawm kan tah kho ko kan ti.
Thil pakhat a example rang ah kan tarlang duh chu: hun sâwt chiam silo rih; Pu.Sanngam rui nâk hen, India sorkar lak ah intelligent murui wing pakhat tla nih Bangladesh ram nawk tir ding hen an fuih na mi an theih kho lo le, Sea Win ti hen pawl an dirh le, Cox`s Bazar tiang lâk zek hen ram zalên ding an ti le, hun cherkhet an mang. Chu murui tla lak khawm ah, mi thiam, mifing an tlâksam ruang ah, tam sâwt lo hen an vei hep. Chu pâwl lak ah um tu a dam rih mi tla khawm an um ngelchel lai rih. Chu tla ngaihdân theih kho sele, thu dang hen cha rîn ding a um lai rih kan ti. Bâwmfa tla lak ah, mithiam, mifing, mi nei leh mi thil tikho, sorkar lak ah officers, clerks men um lo hen ram khel hen zalên nâk tawng ding chuh, ‘thling azâ’ lo ma? Ngaihtuah nâk fim nei seng kho sele ațha lai baa!
Thu dawngh nak: KNF lukhai chem Nathan kha, mithiam mifing hen ngaih tu cherkhet an um kho. Dhaka University thawk hen Fine Art (Ruk tuah) subject hen a pass mi asi le, a lût awt liau ah, a qualify lo le, Hill Students Council (P*P) murui ruitu tla nih zângrâm hen an luh mi asi. Post graduate ding hen k*mpi k*m 10 nûn ah a suak kho cho mi asi. Chittagong Hill Tracts Accord nûn ah development agency UNDP leh Asian Development Bank tla lak job (rian țuan nâk) deih hen vei tam a interview le atawng kho lo, a qualify kho lo le, aneh nûn ah kawrsen tla țangpi nâk hen, pcjss tla do ding hen KNDO ti mi min put hen development organization a dirh le, phun le ram lak ah sim tlâk ding hen țhangso nâk (development) rian pakhat khawm a țuan mi muh ding a um loh. A nehnu nehpa ah, Khamul Kawrpa Jongi murui hen agreement an siam le, tangka cherkhet a tawng rawh chun, Ruma Nalnengva kap ah Lung in (building) asak. A tangka tawng nâk khawm tlangvâl lungfîang lo tla atarh na le, azuar na le in asak mi asi. An mah dâwngsung, a u le fa tla khawm hen; hi in sak ruang ah an anawk awt le, “nan mah chu Lung In nan sak, kan nih chu mângtang ah kan a hamh mi kan thi awt rawh” ti hen an a vo ti thu tla khawm theih asi. Chu rawh chun mawhsareh hen mângtang ah um sawm ding hen thu an thlûk le, KNDO thawk hen KNF ti min an vuah sawm le, tu hin an dirpi mi chu asi. Nathan hâwipa Vanchunglian chu pry. School mastaw asi. School kai lo hen hun cherkhet a mang le, kawrsen tla hen athup tlai nâk ruang ah lawh tla alâk vima mi asi.
Khawmsele, tu ah lam chun a lawh tla khawm an khâr rawh ti hen an sim. Primary sîn tir tu pakhat nih zei tiang politic thu a theih awt? Sût tu tla ni chun nan sût kho lai kan ti. Tu ah lam chun Mizoram ah an athup veve le, nikhat nikhat chu an athup châwk lai lo le, tleih an tawng ngelchel lai. Hawng zoh ziar na ko u rih.