11/18/2022
كان عندي واحد صاحبي نعيطوله حروز الديك ، سي حروز الديك هذا عنده لعبة اسمها أتاري كانت كيما توة عبارة بلايستيشن 5 او ps5 , هو الحقيقة صاحبي اما ملي انا نقلت و وليت نسكن في حي النصر ما عادش على بالي بيه ما عادش من مستواي . و نسمع بيه من بعيد لبعيد كل مرة يجي بحذاه واحد من اولاد الحومة يلعب هو وياه بالأتاري و ساعة ساعة يتجبد علي حديث كيفاه فكيتلهم الكورة في مرة من المرات و مرة أخرى نلعب معاهم في دار الثقافة تنابزت معاهم يخي جبتلهم ولد عمي يخدم ضابط إيقاع يسموه الغول و جاء معاه وقتها واحد يقولوله الوكواك كان يخدم بائع ملابس داخلية . عاد جاو وقتها هججوهم من دار الثقافة و سكرها ولد عمي ضابط الإيقاع . عاد نهار من نهارات عرضني واحد يقولوله الواو سألني على طهور في دار خالتي العكري و بحكم اني انا حشمت باش نقلو راهو طهوري خاطر عارفه في باله بيا مطهر من قبل ما لقيت ما نجاوبه الحق متاع ربي .يخي شريتهاله قتلو برا امشي لحروز الديك تو ينفعك و قلو راك يا حروزالديك تقعد طول عمرك قالك الضّب مادام تجيب بحذاك في الجماعة متاع دار الثقافة الي يسبو فيا ما عادش نكلمك و كان ماشي في بالك الواو باش يعديها عليا و يحصلني نحب نقلك لا انت ولا الي باعثه باش ينفعوك خاطر موش وحدي برك في الطهور و الجماعة الكل مطهرين كيفي و اي واحد باش يقابل خالتي العكري راهو لازم يكون مطهرينله كيفي من قبل ما يلبس الجبة و كان ماشي في بالك كل حد حر باش يطهر ولا لا نقلك راهو قبل التطهير لازم التكعبير . حاصيلو من كثر ما سي الواو ما فهم شي و انا كيفه ما فهمت شي هو مشى على روحه و خلاني و انا قعدت نغني يا دين الضب يا دين الضب جوني العكارة وين باش نشب
