10/01/2024
[የእናትና የልጅ ፍቅር በቅዱስ ኤፍሬም ሶርያዊ]
✍️ በመጋቤ ሐዲስ ዶክተር ሮዳስ ታደሰ (መስከረም ፳፩| በእመቤታችን በዓል በረከቷን በመሻት የተለጠፈ)
💥 ጌታ ሆይ ከንፈሮችኽ የሕይወትን በጎ መዐዛ ይመግባሉ (ያስገኛሉ) (መሓ ፬፥፲፩)፤ ከጣቶችኽ ጫፍ በጎ መዐዛ ያለው ከርቤ ይንጠባጠባል (መሓ ፭፥፭)፤ ዐይኖችኽ የአንተን ዕይታ በተራበችው በእናትኽ በቅድስት ድንግል ማርያም ላይ በፍቅር ተተክለዋል፤ የቤተ ክርስቲያን የጸጋ ልጆች (ምእመናን) በአንተ ፍቅር የተራቡ ናቸው፡፡
💥 ሱራፌልም “ቅዱስ ቅዱስ ቅዱስ” ብለው ጮኹ፤ ኪሩቤልና ሰራዊቱ ፍጹም ምስጋናን ለባሕርይ አምላክ ለአንተ ምስጋናቸውን አቀረቡ፤ በረቂቅ አካላቸውም ግርግሙን ሸፈኑ፤ ከሱራፌልም አስፈሪ ክንፎች እና ከግርማ ሞገሳዊ ነጐድጓዳዊ ድምፆቻቸው የተነሣ እመቤታችን ማርያምና ዮሴፍ በረአድ ቆሙ (ሉቃ ፪፥፲፫-፲፰)
💥 አንተን የሚወስን ማን ነው? ማንስ ሊይዝኽ ይችላል? አንተን ማን ሊመረምርኽ ይችላል? ያንተን ልደት ምስጢር ለማውጣጣት ማንስ ሊደፍር ይችላል? ... ብሉየ መዋዕል ቀዳማዊዉን ርሱም ተሸክማ ወተትን የምትሰጠው ድንግል እነኋት፤ ኹለቱንም እረኛም ጠቦትም የኾነውም እነሆ (ዮሐ ፲፥፲፩፤ ራእ ፯፥፲፬)። ካህንም መሥዋዕትም ኹለቱንም የኾነው እነሆ (ዕብ ፱፥፲፩-፲፪)፤ ሐሊበ ድንግልናን የሚጠባ ጠቦት ሆይ በባሕርይኽ ክቡር ነኽ!፡፡
💥 ጌታ ሆይ እናትኽ በደስታ ተመልታለች፣ ዮሴፍም በደስታ ተመልቷል፤ አንተም ወኃቤ ፍሥሐ ነኽ፤ የፋሲካ ደስታ ጠቦት የኾንኽ ሆይ! (፩ኛ ቆሮ ፭፥፯) አንተን የወለደች ድንግል ማርያም አንተን ስትስምኽ ደስ ይላታል!
💥 ቀበሮ የተባለ ሰነፍ ንጉሥ የነበረው ሄሮድስ በድምፁ የሚርበተበትበት የአንበሳ ደቦል ነኽ (ዘፍ ፵፱፥፱፤ ማቴ ፪፥፫) አገዛዙን አበቃኽለት በርሱ ቁጥጥር ሥር የነበረው የራስኽን አገዛዝ ተረከብኽ (ማቴ ፪፥፳)፤ አንተ ንጉሥና የነገሥታት ኹሉ ንጉሥ ነኽ (ራእ ፲፯፥፲፬)፡፡
💥 አዳምን ከዐቧራ ፈጥረኸዋል (ዘፍ ፪፥፯) የራስኽንም እናት ፈጥረኻል (ሉቃ ፩፥፴፰)፤ ቀዳማዊ ልደትኽ ከአብ የኾነ ሆይ የአንተ ፈቃድ የአንተን ኲለንታ ትስብዕት በማሕፀነ ድንግል ቀረጸ፤ መለኮታዊ አኗኗርኽ ሊታወቅ አይቻልም አንተ ጥንት የለኽምና (ዮሐ ፩፥፩)፤ አንተ ስለፈቀድኽ ራስኽን በማሕፀነ ማርያም ውስጥ አኖርኽ፡፡
♥ እዚያም እናትኽ፣ ምርጥኽ፣ የእጅኽ ሥራና አገልጋይኽ ድንግል ማርያም ተንበርክካ አንተን ወልዳለች (ሉቃ ፪፥፯)፤ አንተን ስትወልድኽ፣ ዕቅፍ አድርጋ ስትስምኽ በምስጋናና በጸሎት ታመሰግንኻለች፤ አንተን ስታቅፍኽ ወተቷን ታጠባኻለች ለአንተ በመዘመርና በሕፃንነትኽ መንገድ ፈገግ በማለት፣ አንተ ወተቷን እየጠባኽ በደስታ ስትመላ፣ አንተን የወለደችኽ ለአንተ ወተት ያጠባችኽ በአድናቆት ትዋጣለች፤ አንተ የፈጠርኻት ድንግል ማርያም እጅግ ተደንቃለች።
💥 ወልድ ሆይ በአንተም አማካይነት የእናትኽ አእምሮ በአንክሮ በአርምሞ ይኹን፤ የእናቱ አስተማሪ፣ የእናቱ አምላክ፣ የእናቱ ጌታ፣ ከእናቱ ብላቴናም አረጋዊም የኾነ፣ እስከአኹንም ድረስ በአድናቆት የመላኸኝ አንተ ነኽ (ሉቃ ፪፥፲፱)፤ የአንተ ጥበብ ያስጨንቀኛል፤ በአንተ ላይ ዐይኑን ሊያሳርፍና በአንተ መዐዛ ሊተነፍስ የማይችል ማን አለ? በሕፃንነትኽ ድክ ድክ ስትል ተመልካቾች ኹሉ ይደነቃሉ (ሉቃ ፪፥፵፮-፶፩)።
💥 የአንተ መገለጽ ኹናቴ ዐዋቂዎችን ፍጥረታትን ያስገርማል፤ ታስደንቃለኽም፣ በሕፃንነትኽ ታናናሾች እጆችኽ ያጨበጭባሉ፣ እግሮችም ይመታሉ፤ በማንኛውም መንገድ እንዴት ተፈቃሪ ነኽ፤ የአንደበትኽ ጒርምርምታ እንኳን ስለአባትኽ ይናገራል (ሉቃ ፪፥፵፱)፡፡
💥 ውበትኽ ምን ያኽል ታላቅ ነው (መዝ ፵፬፥፪)፤ ብላቴና የኾንኸው እግዚአብሔር ሆይ፣ አፍኽ እንደ ማር ወለላ በጣም ጣፋጭ ነው! ከአፍኽ የሚወጣው ኀይል የሰማያት አካላት እንዲርዱ ያደርጋል፤ በአንተ አንድ ድምፅ ይኽ ኹሉ ፍጥረት እንዴት ይሸበራልን? ብላ ድንግል ማርያም ተደንቃ ትቆማለች (ሉቃ ፪፥፲፲፱)፤ አንተ ጸጋኽን ለኹለቱም ዓለማት የምትሰጥ ስትኾን ከፈጠርካት እናትኽ ግን ወተቷን ትጠባለኽ፡፡
💥 ያንተን ልደት በመዝሙር እንድናገር ላበቃኸኝ አንተ የእግዚአብሔር ልጅ ሆይ ምስጋና ይግባኽ፤ ለእኔ ጒድለት ራራ ይቅር በል፤ ለአንተ ለጌታዬ ምስጋና ላቀርብና ላመስግንኽ። በአንተ ስጦታ የተነሣ ምስጋናኽን እዘምራለኊ፤ በተወለድኽበት ቀን ኀጢአታችንን ይቅር በል፣ እናም በቸርነትኽ ለተበላሸው ሕይወታችን ፈውስን አምጣልን፤ ሰላም ይኹን ጌታዬ፤ በሕዝብኽና በቤተ ክርስቲያንኽ ላይ ግዛ፤ በጣም ክቡር የባሕርይ አምላክ ለኾንኸው አምላክ በአንተ የበዓል ቀን ጌታ ምስጋና ይግባኽ!)”
[ሙሉውን ከነገረ ማርያም በሊቃውንት መጽሐፌ አንብቡ]
✍ከመጋቤ ሐዲስ ዶክተር ሮዳስ ታደሰ
(የእመቤታችን በረከቷ ረድኤቷ ፍቅሯ ጣዕመ ፍቅሯ ይደርብን)
