10/18/2024
#رسائلكم
حنا الدزيريين ولّا العرب بصفة عامة عندنا عقلية تع الطمع في كل المجالات ، و كي يكون عندو produit و يفتح عليه ربي و ينجح فيه راح يدير 2 أمور ..
إما يبقى يزيد السعر تدريجيا …
ولّا ينقص الجودة تاعو تدريجيا ثان …
مثلا شيكولة تع moment بندق و اللي حقيقةً عندها ذوق خيالي و كأنك تاكل شيكولا سويسرية .. هاذ الشيكولا لي تابعة لمجمع palmary و اللي معروفين أنهم يخدمو منتوجات مليحة ما قدروش ينقصو من الجودة تع هاذ المنتج ، ايا بداو يزيدو السعر تدريجيا من 120 لـ 160 و دك راهي 180 و اليوم شريتها 190 دينار … يعني دك تزيد تغفل عليها تلقاها تخطّات السعر تع milka عادي …
يعني نتا يا صاحب هذا الشركة راه رزقك ربي و رجع المنتج تاعك محبوب و مطلوب فالسوق ، استحفظ عالسعر و ما تبروفيتيش فالشعب ..
للأسف قع عندهم نفس العقلية و تلقاهم كامل يزيدو فالأسعار مور ما يكثر الطلب و الضحية دايمن هو المستهلك …
