Uganda Eyogera

28/11/2021

POLIISI ETAASIZZA AGAMBIBWA OKUBBA OWA MOBAYIRO MMANE

Abatuuze ku Bishop Wasikye road mu Mbale bakkakkanye ku musajja mukulu atategeerekese mannya gwe balumiriza okubba aba mobayiro mmane ne bamulirika emiggo, agakonde ne nsambaggere ebibuze kata okumujja mu budde, ono bamulumiriza okuba nti abadde agufudde mugano okubba aba mobile money, kigambibwa nti musajja mukulu ono yefuula kkasitoma nga ayagala ssente ennyingi, olwo naalagira owa mobayiro mmane okumusindikira ssente, gye biggweera nga amubbye, kuluno yagenze ku muwala wa mobile money Namono Gloria namubbako emitwaalo 50, yagezezzaako okudduka, Namono naakuba enduulu olwo abatuuze ne bamusimbako nebamukwaata ne bamukuba bubi nnyo, era poliisi yagenze okutuuka okumutaasa nga emagombe asimbyeeyo kitooke, wabula poliisi yasanze akaseera akazibu okumutaasa ku batuuze ababadde bamaliridde okumwookya nga baleese ne bipiira, naye yasobodde okumubajjajo ne mutwaala nga mu kiseera kino akuumirwa ku poliisi e Mbale, akulira poliisi ye Mbale ASP Arafat Kato yagambye nti ababbi ekika kino bayitiridde naddala mu biseera bino era yalabudde abantu okwegendereza ennyo nga bagenda mu nnaku za ssekukkulu.

21/11/2021

POLIISI EKUTTE AGAMBIBWA OKUBBIRA ABANTU MU BBANKA

Poliisi e Mbale ekutte neggalira omubbi agambibwa nti abadde abba abantu mu bbanka ezenjawulo, akwaatiddwa ye Anthony Masolo nga yabadde aliko abantu baagezaako okubba mu Stanbic Bank ku ttabi lye Mbale, kigambibwa nti ono abadde aliimisa abantu mu bbanka ezenjawulo naddala abasuubuzi abajjayo wamu na balina ssente ennyingi, nga atemya ku banne ababeera ebweeru wa bbanka, olumu babafera ate oluusi ne bababbako ssente oluvannyuma lwo kubalondoola.
Ono okukwaatibwa kyavudde ku bakulira bbanka okumwekengera nga bamulabira ku kkamera enkessi nga aliko abasuubuzi babiri be baabadde bagenda okubba ne banne ababadde mu mmotoka wabweeru, nga ono yabadde ayagala kubayingiza bya kubaguza ddoola, baatemezza ku poliisi naye neyanguwa okukakkana nga bamukutte.
Aduumira polisi ye Mbale ASP Arafat Kato nga ye yakulembeddemu basajja be yagambye nti ababbi bano bawera, naye nga ono yabakulira, kyokka yabadde ne banne abaabadde balindidde mu mmotoka wabweeru wa bbanka, kyokka bo baasobodde okudduka oluvannyuma lwo kukwaatibwa kwa munnaabwe eyabadde munda, poliisi erudde nga emunoonya ku misango egye njawulo omuli okubba no bufere, era yatolokako ne mu kaduukulu, Kato bwe yagambye. Ono mu kumwaaza yasangiddwa ne bipapula nga abisibye mu ngeri nga biringa ssente nga abitadde mu buveera byakozesa okubba abantu.
Mukiseera kino akuumirwa ku poliisi e Mbale nga okuyigga abadduse bwe kugenda mu maaso.

Ekifaananyi kiraga nga Masolo atuusibwa ku poliisi e Mbale.

09/11/2021

ABASOMA OBUSAWO BABANGUDDWA OBUKUGU NE MPISA

Abayizi abasoma obusawo mu zi University ezisangibwa mu buvanjuba bwa Uganda babanguddwa mu bukodyo bwe kisawo ssaako empisa mu ddwaaliro ssinga babeera bamalirizza okusoma ne batandika obuweereza.
Bino bibadde ku ssettendekero wa Islamic University In Uganda (IUIU) nga amatendekero ageetabye mu kubangulwa kuno kukiko, Jinja School Of Nursing an Midwifery, Kamuli School Of Nursing and Midwifery, Soroti School Of Nursing and Midwifery, Elgon Nursing School, Kaabong School Of Nursing and Midwifery ne abategese aba Islamic University In Uganda ne Bujiri School Of Nursing and Midwifery. Muno mwaabaddemu na basajja abasomye obukodyo bwo buzaalisa.
Abayizi era baamaze ne basindana mu bukugu bwe kisawo ssaako empisa mu balwadde, nga empaka zino zaawanguddwa abe Soroti School of nursing and Midwifery nga abasinze baweereddwa amabaluwa agabakakasa.
Amyuuka akulira ssettendekero wa IUIU Dr.Jamiiru Sserwanga yategeezezza nti minisitule ye byo bulamu yalonda eñkola eno okwongera okubangula abayizi abasoma obusawo ne ngeri gye balina okukuuma omutindo gwe mpisa ze kisawo,.
Akulira eddwaliro lye Mbale Dr Emmanuel Tugaineyo kino ekikolebwa kyongedde obukodyo mu bye nzijanjaba nga ekigendelerwa ekikulu kufulumya basawo abali ku mutindo gwe nsi yonna, bagenda kweyongerayo mu mambuka ga Uganda, ne bugwanjuba mpozzi ne mu Buganda ne ku bizinga.
Abamu ku bayizi abetabye mu kubangulwa kuno bategeezezza nti mu kiseera kino embeera ye byo bulamu yetaaga gavumenti eyongeremu amaanyi ne mbeera za basawo mwe bakolera zijjudde okusomoozebwa naddala mu bye nsasulwa, nga basaba gavumenti eyongeremu amaanyi, kisobozese abasoma obusawo obutaddukira mitala wa mayanja okunoonya emirimu.

Ekifaananyi kiraga nga abamu kubayizi abaakoze obulungi bakwaasibwa amabaluwa
gaabwe

03/11/2021

Brig. Ali Faduru Allah amujjuludde, afiiridde Naguru mu ddwaaliro. Ajjukirwa nga omujaasi eyakuba akabinja ka FRONASA akaalumba Uganda mu 1972 nga kakulemberwa Yoweri Museveni mu kiseera ekyo nga muyeekera.
Ali Faduru ye yali omuduumizi wa Simba Batallion e Mbarara.

01/11/2021

ABADDE YEEYITA AZIMBA EMIZIKITI MU OFIISI YA M***I, POLIISI EMUYODDE LWA KUBBA BANTU

Musajja mukulu abadde nga yeyita omuzimbi we muziki okuva mu ofiisi ya m***i poliisi emukutte nemuggalira ku bigambibwa nti aludde nga abba bantu. Eyakwaatiddwa ye Wafula Kulaira Ibrahim naye nga abadde akyuusa kyuusa amannya okusinziira ku kitundu gyaba agenze okubba, wabula azaalibwa Kachonga mu district ye Butaleja, ono okusinga asinze kubba mu Basiraàmu era babbye nnyo nga yefuula azimba emizikiti na masomero okuva mu ofiisi ya m***i sheikh Shaban Ramadan Mubajje, ono era yasangiddwa ne warrant ya poliisi nga olumu yeeyita omuserikale wa poliisi, kyokka ssi muserikale. Abadde nga no lumu emizikiti gyasanga mu mbeera embi asooka ku gimenya olwo nagamba abatuuze nti bakamaabe tebanna muweereza ssente, bwe waba waliwo eziriwo mu ggwanika lyo muzikiti basooke bakozeseeko ezo okugula ebizimbisibwa ebitandika, nga oluzimukwaasa taddamu kulabika.
Kigambibwa nti ono mu bufere bwe abadde nga abba abasiraamu nga abalimba okubazimbira emizikiti na masomero, nga abategeeza nga bwalina ebintongole ebigabi byo buyambi okuva mu Saudi Arabia ne Oman nga oluusi yeeyita omukozi mu State House, naye gye biggweera nga omugabi wo buyambi ate awunzika ababbyeeko ne bwe baatereka mu ggwanika. Ono obubbi buno abadde abukolera mu district okuli Kibuku, Pallisa, Budaka, Namisindwa, Busia ne Manafa.
Ono okukwaatibwa kyavudde ku kugenda e Lwakhaka mu district ye Namisindwa no bukodyo bwe bumu najja ku Basiraàmu ssente Akadde 1 ne mutwaalo 80 nga abasuubizza okubayamba okubazimbira omuzikiti ne ssomero nga ensimbi zino zakuyamba ku sseminti agenda okutandika okuzimba, era yapangisizza emmotoka ku Hassan omuvuzi wa sipesulo e Lwakhaka, kyokka olwatuuse e Mbale naayagala okugitunda kyokka gwe yabadde agiguza nga amanyi nnyiniyo kwe kumukubira akakase oba agitunda, olwagambye nti nedda, ono kwe kutemya ku poliisi eyasitukiddemu ne muyoola.
Omwogezi wa poliisi mu bitundu bya Elgon Rogers Tayitika yakakasizza okukwaatibwa kwa Wafula Kulaira, era yagambye nti poliisi erudde nga emunoonya ku misango egye njawulo era agenda kuvunaanibwa obubbi, obufere, okujja ssente ku bantu mu lukujjukujju ssaako okujingilira warranty ya poliisi, era agenda kuyamba ku poliisi okuzuula ani abadde nga amuwa ebyambalo bya poliisi. Ono kiteberezebwa nti aliko banne bwe babba era nga poliisi bagenda kumufunamu amawulire ga babbi abalala.

Ekifaananyi kiraga Wafula Kulaira nga ali ku mpingu ku poliisi e Mbale

27/10/2021

MUNNA MATEEKA AKULIDDE OKUMENYA AMAKA GEYAALI OWA TULAFIKI POLIISI EMUYODDE

Poliisi ekubye ttiyagaasi na masasi mu bbanga bwe babadde bakwaata munna mateeka Hamiis Magona eyakulidde ba wannyondo okumenya amaka geyali owa ttulafiki Anthony Anyolitho, bino bibadde Namatala mu City ye Mbale.
Enkaayana ku ttaka lino zirudde era omusango guli mu kkooti ejulirwaamu Anyolitho gye yaddukira oluvannyuma lwa kkooti ye Mbale no mulamuzi Namundi Geoffrey okusala omusango gwa gamba nti teyagusala mu bwesimbu nga amulumiriza okulya enguzi naagwa olubege mu nsalawo ye eyo musango.

BALIKO OMUGAGGA GWE BALUMIRIZA OKUGULA ETTAKA LINO

Eyali omuserikale wa ttulafiki Anthony Anyolitho alumiriza eyali omukozi we Rose Mutonyi okumwefuulira ne yekobaana no mugagga Nathan Guloba era amulumiriza okuba emabega wa buli mivuyo egigenda mu maaso, naye yekweeka era talabika.
Anyolitho agamba nti yagula ekifo kino mu 1977 nga akyaali muserikale era azze akolerako ebintu ebye njawulo omuli no kupangisaako aba Warid nga 30/11/ 2007, kyokka agamba nti Rose Mutonyi yagingilira endagaano nga agamba nti Anyolitho yamuguza ettaka lino nga 30/04/1986, kyokka naasigala nga akozesa ettaka lino okutuuka ssaawa ya leero. Kisoboka kitya okuba nga nnamuguza ettaka mu 1986 ate ne nsigala nga ndikozesa era ne ndipangisa ekitundu ne ndipangisa aba Warid mu 2007?? Anyolitho bwe yebuuza.
Mu kadde kano Anyolitho na baana be bibasobedde nga tebamanyi kya kuzzaako oluvannyuma lwa maka gaabwe okukoonebwa, ono awaka aliwo ne bawalabe oluvannyuma lwa mukyaalawe okufa mu 2018 naye nga kigambibwa yaga ppuleesa, naye nga kyaava ku mulamuzi Namundi Geoffrey okusala omusango nti basingiddwa.

Poliisi ekubye ttiyagaasi na masasi mu bbanga okugumbulula abatuuze ababadde baagala okugajambula munna mateeka Hamiis Magona eyakulidde ba wannyondo ababadde bamenya amayumba ga mutuuze munnaabwe, era mu kaseera kano akuumirwa ku poliisi e Mbale. Era ne Rose Mutonyi naye akwaatiddwa natwaalibwa ku poliisi.

Abatuuze bavumiridde ebikolwa bino ebya bantu be bayise abayaaye okukkira amaka go muntu gakoleredde obulamu bwe bwonna ne bagonoona omulundi gumu, nga ate pulezidenti Museveni yayimiriza okusengula ne nsonga ze ttaka. Ekilala bagamba nti emisango bwe giba giri mu kkooti ejulirwaamu, ate bayinza batya okufulumya ekiwandiiko ekisengula omutuuze nga kkooti ejulirwaamu tennasalawo.
Omwogezi wa poliisi agaanyi okubaako kyayogera ku nsonga eno kubanga ziri mu kkooti.

24/10/2021

24/10/2021

MINISITA MUTUUZO AYINGIDDE MU NKAAYANA ZOBWA IKUMBANIA BWA BUGWERE

Minisita omubeezi owe kikula kya bantu Peace Mutuuzo asanze akaseera akazibu okutawulula enkaayana mu bakulu be bika mu bwa Ikumbania bwa Bugwere, enkaayana zino zabalukawo oluvannyuma lwa kufa kwa Ikumbania wa Bugwere John Chrysostom Wayabire.
Bino bizze mu kiseera nga ebika bya Bugwere 108 bategeka kulonda Ikumbania anaddira omugenzi mu bigere

Bino bikoleddwa mu byo kwerinda ebibadde ebinyweevu, kubanga poliisi na magye biyiiriddwa mu bungi okutangira akakyankalano akabadde kabaluseewo okuva mu bakulu be bika.

Okusinziira ku ssemateeka wo bwa Ikumbania bwa Bugwere abakulu be bika bino be balonda Ikumbania, wabula vvulugu wajjidde nga abakulu be bika bangi okusinga omuwendo, ate nga ku lukalala kuliko abakulu be bika abasukka ku omu, ate nga na mannya ga bafu galabikidde ku lukalala nga waliwo ne bika ebye mpewo 10 ebitamanyiddwa mu bika bya Bugwere, ate ebika 19 bino bisangiddwa nga birina abakulu be bika abasukka ku omu, wano waliwo ebika ebigobeddwa mu bika bya Bugwere.

ABAWADDE ENNAKU 21 BETEREEZE

Minisita Peace Mutuuzo bano yabalagidde baddeyo mu bika byaabwe baddemu balonde obukulembeze bwe bika obutuufu obutaliimu njawukana.
Era wano kizuuliddwa nga obwa Ikumbania bwa Bugwere bulina ba katikkiro babiri ne ba ssipiika babiri, kyokka nga omugenzi Ikumbania John Chrysestom Wayabire yalekawo katikkiro omu ne ssipiika omu. Bano yabawadde amagezi palamenti ya Bugwere okutuula balonde omukulebeze omu anatongozebwa minisitule ye kikula kya bantu.
Era yabalagidde okulonda abakulembeze be bika mu ssabbiti 3 ze nnaku 21 nga abanaaba balondeddwa be bagenda okulonda Ikumbania era mu kaseera katono bajja kuba nga bategeka okulonda Ikumbania.

Ku mukolo gwe gumu minisita Mutuuzo yasazizzaamu Mubbala Kintu eyabadde yelangiridde nga Ikumbania ku bwa Ikumbania bwa Bugwere, wabula yamuwadde amagezi okwesimbawo mu kulonda okugenda okutegekebwa. Era entebe yagize agikuumisizza ssipiika Maiso Jacob eyali yalondebwa omugenzi.

Ekifaananyi kiraga nga minisita Peace Mutuuzo ayogera eri abakulembeze be bika mu bwa Ikumbania bwa Bugwere ebirimu enjawukana.

23/10/2021

ABATUUZE BALAJJANA, OLUTINDO LWAABWE BUKYA LUSANYIZIBWAAWO BAKOZESA BWAATO

Abatuuze be Kasodo mu district ye Pallisa wamu na be Sakka mu district ye Kaliro abaali bakozesa olutindo okusala omugga Mpologoma nga lwaali kugatta district zino zombi mu bye ntambula balajjanidde gavumenti okubayambako okubaddizaawo olutindo lwaabwe kubanga kati ebye ntambula byaakaluba nga kati abavubuka baayiiyawo obwaato okusomosa abantu.
Olutindo luno lwasanyizibwaawo amazzi mu 2019 okuva olwo no kutuusa kati baakoma ku kubasuubiza naye teri kyaali kikoleddwa, kwe kusalawo ne bakola obwaato okusomosa abantu, okusinziira ku batuuze aba district zombi bagamba nti ekizibu kye basanze ge mazzi bwegayitilira gakuba obwaato buno ne buyiikamu nga mu bbanga lya wiiki 2 bafiiriddwa abantu 10 nga kyaava ku mazzi agabooga nga gaddukira ku misinde miyitirivu, ekyagaviirako okukuba obwaato ne bumenyeka abantu ne bafa nga abamu emirambo gyaabula.

Nalongo Jenifer ne Anna Muloni abatuuze be Sakka mu district ye Kaliro bagambye nti basanga obuzibu okugenda mu ddwaaliro eliri okumpi erya Kasodo Healthy center lll okufuna obujjanjabi naddala abakyaala abalumwa kubanga kiba kizibu okufuna akaato okukusaabaza obudde bwe kiro.
Ssentebe wa LC1 ku kyaalo Sakka Jude Mugoda yagambye nti mu 2019 bafiirwa abaana abasomi 13 abafiira mu kaato bwe baali basaabala okugenda ku ssomero, kino kyaviirako abaana bangi okulekayo okusoma ne badda ku kulima

Anthony Katuuli kkansala we ggombolola ye Kasodo ku district e Pallisa yagambye nti bukya lutindo luno lutwaalibwa amazzi, bagezezzaako okuwandiikira aba UNRA, ba MP na bakulu mu bitongole bye nguudo wabula na buli kati teri kanyego okutuusa kati emyaaka kati 2 tuli mu kudaaga ssaako okufiirwa abantu baffe.

23/10/2021

23/10/2021

23/10/2021

Mugyebaleko ba mikwaano, omukutu guno gugenda kubaweereza ebifa mu ggwanga mu lulimi Oluganda. Mbasaba muguwagire era mugwaagale gujja kubatuusaako buli kimu obutabajuza.