24/11/2023
DNPDML: RÁDIU KOMUNIDADE SANULU RESIN HITU, ASINA KONTRATU FUNDUS TRANFERENSIA PÚBLIKA FTP FAZE DARUAK 2023
Governu liu husi Sekretária Estadu Komunikasaun Sosiál-SEKOMS, kontinua apoiu rádiu komunidade sira ne’ebe eziste iha territorio nasionál ho kontratu ho kontratu Sosiál ou Fundus Tranferensia Publiku, hodi fasilita servisu jornalista sira nian ne’ebe servisu iha radio komunidade sira.
Iha oportunidade ne’e Diretor DNPDML, Adriano Monteiro hateten, serimonia asina akordu liu husi Sekoms ho maluk jestór Rádiu komunidade sira hotu, liu husi fundus tranferensi publika, fundus ida ne’e atu tulun rádiu komunidade sira hodi halo aktvidade iha kada estasaun rádiu komunidade sira, nune’e kada jestór bele dezenvolve, maske fundus ida ne’e ki’ik maibe bele hatutan nafatin no haforsa rádiu komunidade sira nia serbisu.
Diretor Adriano dehan, “Iha IX governu nafatin fo nia importansia ba apoiu rádiu komunidade sira iha territóriu nasionál, hein katak husi apoiu ne’ebe mak governu fo bele ajuda rádiu komunidade sira hodi halo servisu diak liu tan ba programa sira liu-liu bele lori informasaun ba to’o iha komunidade sira”.
Iha serimonia asina kontratu ne’e mos Sekretario Estado Komunikasaun Sosial, SEKOMS, Expedito Loro Dias Ximenes, esplika ba jestór rádiu komunidade sira katak, liafuan jestór ne’e oinsa mak iha kapasidade atu jere, tanba jestór ne’e ema ida ne’ebe atu jere serbisu no funsionamentu hodi garante sustentabilidade.
“Hanesan jestór, liafuan ida jestór ne’e, ne’e bolu dehan oinsa mak ita iha kapasidade atu jere, Jestór ne’e liafuan Português ne’ebe jestór atu hateten dehan katak, jestór ema ida ne’ebe jere buat ida, e por a caso kebetulang kolega sira sai jestór ba rádiu komunidade,” Sekoms esplika.
Governante ne’e akresenta liu tan, IX governu konstituisional iha nia programa tinan lima iha area komunikasaun sosial, IX governu iha programa area komunikasaun sosiál nian ba tinan lima ne’e prioridade ida mos maka oinsa fortifika no hamoris tan rádiu komunidade, agora ita iha rádiu komunidade sanulu resin hitu maibe iha tinan lima ita buka atu fortifika katak atu haforsa tan rádiu komunidade sira ne’ebe iha ona nomós atu hamoris tan rádiu komunidade seluk tan iha Timor.
Entretantu Rádiu, komunidade sanulu resin hitu ne’ebe eziste iha territorio nasional ne’ebe asina ona kontratu fundus tranferensia publiku mak hanesan, Rádiu Komunidade Rai Husar Aileu, Rádiu Komunidade Matebian Baucau, Rádiu Komunidade Sahe Bucoli, Rádiu Komunidade Lian Manu Koko Atauro, Rádiu Komunidade Defisiensia, Rádiu Komunidade Mauloko Maubisse, Rádiu Komunidade Cova Taroman Suai, Rádiu Komunidade Atony Lifau Oecusse, Radio Komunidade Loriku Lian, Rádiu Komunidade Povu Viqueque, Rádiu Komunidade Tokodede Liquiça, Rádiu Komunidade Café Ermera, Rádiu Komunidade Ili Wai Manatuto, Radio Komunidade Lospalos, Rádiu Komunidade Dom Boa Ventura Same Manufahi, Rádiu Komunidade Maliana, no Rádiu Komunidade Comoro.
Totál orsamentu ne'ebé preve ba Rádiu Komunidade -17 iha faze daruak ne'e hamutuk rihun atus ida resin, dólar Amérikanu.
