Myaelatt Athan Broadcasting

31/12/2024

လူငယ်တွေပါဝင်တဲ့ BLDF ရဲ့ အပတ်စဥ် ၃ အခြေခံစစ်သင်တန်းဆင်းပွဲ

စစ်ကိုင်း၊ ဒီဇင်ဘာ ၃၁၊ ၂၀၂၄။

စစ်ကိုင်းတိုင်း၊ စစ်ကိုင်းမြို့နယ်ထဲက တော်လှန်ရေးတပ်ဖွဲ့တွေစိုးမိုးထားတဲ့ နေရာတခုမှာ ဗမာလွတ်မြောက်ရေးဒီမိုကရက်တစ်တပ်ဦး - BLDF ရဲ့ အပတ်စဥ် ၃ အခြေခံစစ်ပညာသင်တန်းဆင်းပွဲကို ဒီဇင်ဘာ ၂၉ ရက်မှာပြုလုပ်ခဲ့တယ်လို့ အဲ့ဒီတပ်ဖွဲ့ဆီကသိရပါတယ်။

အဆိုပါသင်တန်းကို နိုဝင်ဘာ ၁၄ ရက်ကနေ ဒီဇင်ဘာ ၂၉ ရက်အထိ အသက် ၂၀ အရွယ် သင်တန်းသား ၃၀ ဦး တက်ရောက်ခဲ့ကြတယ်လို့ ဗမာလွတ်မြောက်ရေး ဒီမိုကရက်တစ်တပ်ဦး BLDF စစ်ကြောင်းတာဝန်ခံ ကိုဘုန်းက ပြောပါတယ်။

သင်တန်းကာလ ၁ လခွဲမှာ ကချင်လွတ်မြောက်ရေးတပ်မတော် - KIA ဆီကနေ စစ်ပညာသင်လာတဲ့ သင်တန်းဆရာတွေက တိုက်ပွဲတွင်းတိုက်ခိုက်ရေးပိုင်းကို အဓိကသင်ကြားပေးခဲ့တယ်လို့ ဆိုပါတယ်။

သင်တန်းဆင်းပွဲမှာ သင်တန်းသားတွေကို ပစ်ခတ်ထူးချွန်ဆုပေးခဲ့တယ်လို့ အထက်ပါ စစ်‌ကြောင်းတာဝန်ခံက ပြောပါတယ်။

အခြေခံစစ်ပညာ အပတ်စဉ် ၃ သင်တန်းဆင်းပွဲကို ဗမာလွတ်မြောက်ရေးဒီမိုကရက်တစ်တပ်ဦး ဗဟိုကော်မတီဝင်တွေ၊ စစ်ဦးစီးတွေ၊ စစ်ဒေသတာဝန်ခံတွေ၊ ရုံးအဖွဲ့ဝင်တွေနဲ့ ဒေသခံရပ်မိရပ်ဖ ပြည်သူလူထုတွေ တက်ရောက်ခဲ့တယ်လို့ သိရပါတယ်။

သတင်း - ဒိန်းဂျား၊ စာတည်း - လင်း

#မြေလတ်အသံ
#စစ်ကိုင်း #စစ်သင်တန်း #သင်တန်းဆင်းပွဲ

မြေလတ်အသံ page ကို Like ပေးခြင်း၊ YouTube Channel ကို Subscribed ခြင်းဖြင့် မြေလတ်အသံ ရေရှည်ရပ်တည်နိုင်ရေး ဝိုင်းဝန်းကူညီပေးကြပါရန် မေတ္တာရပ်ခံအပ်ပါသည်။
*****************************************
အောက်ပါလင့်တွေမှာလည်း မြေလတ်အသံရဲ့ သတင်းများကို ဖတ်ရှုနိုင်ပါတယ်။
Website - https://myaelattathan.org/
Youtube - https://www.youtube.com/channel/UCJpykv7SLazaVzdurxhURIg
Telegram - https://t.me/myaelattathan
Twitter - https://twitter.com/Myaelatt_Athan
Instagram - https://www.instagram.com/myaelatt_athan/
Tittok - https://www.tiktok.com/.athan

31/12/2024

မြင်းခြံမှာ စစ်ကောင်စီကင်းပုန်းက ပစ်ခတ်လို့ PDF ၂ ဦးကျဆုံး

မြင်းခြံ၊ ဒီဇင်ဘာ ၃၁၊ ၂၀၂၄။

မန္တလေးတိုင်း၊ မြင်းခြံမြို့နယ်၊ မြင်းခြံ-နဘူးအိုင်လမ်းပေါ်မှာ စစ်ကောင်စီကင်းပုန်းနဲ့တိုးပြီး ပစ်ခံရတဲ့အတွက် PDF တပ်ဖွဲ့ဝင် ၂ ဦးကျဆုံးခဲ့တယ်လို့ အညာဒေသတော်လှန်ရေးအင်အားစု ADF တာဝန်ရှိသူဆီက သိရပါတယ်။

ဒီဇင်ဘာ ၃၀ ရက် မနေ့ကမနက် ၉ နာရီခွဲလောက်မှာ လမ်းကြောင်းကိစ္စနဲ့အသွား ကျောက်ကန်ရွာထိပ်အရောက်မှာ အင်အား ၁၅ ဦးခန့်ရှိ စစ်ကောင်စီကင်းပုန်းရဲ့ စောင့်ကြိုပစ်ခတ်တာကို ခံလိုက်ရတယ်လို့ ဆိုပါတယ်။

"သူတို့က ကင်းပုန်းဆိုတော့ အသာစီးရသွားပြီး ပစ်ခံလိုက်ရတာ။ အပြန်အလှန်ပစ်ခတ်မှု ဖြစ်ခဲ့သေးတယ်။ သူတို့ဘက်ထိခိုက်မရှိဘဲ ကိုယ့်ဘက်က ၂ ယောက်ကျသွားတယ်။ PDF တွေအသွားအလာရှိတဲ့နေရာကို ဒီကောင်တွေက လေးငါးဆယ်ယောက်လောက်နဲ့ ကင်းပုန်းဝပ်ပြီး အပိုင်ယူထားတဲ့သဘောပါ။ ခါတိုင်းဆို သတင်းရတယ်။ ဖြစ်တဲ့နေ့က ဘယ်ကနေဘယ်လို ရောက်နေတယ်ဆိုတာ မသိလိုက်ရတာ။"လို့ အညာဒေသတော်လှန်ရေးအင်အားစု ADF တာဝန်ရှိက ပြောပါတယ်။

စစ်ကောင်စီကင်းပုန်းက ပစ်ခတ်လို့ ADF အဖွဲ့က အသက် ၂၂ နှစ်အရွယ်တပ်ဖွဲ့ဝင် စိုးမိုးအောင်နဲ့ မုံရွာခရိုင်တပ်ရင်း ၁၇ က အသက် ၂၅ နှစ်အရွယ် တပ်ဖွဲ့ဝင် ဖိုးချဲတို့ ကျဆုံးခဲ့ပြီး ကျန်တပ်ဖွဲ့ဝင်တွေကတော့ လွတ်မြောက်ခဲ့ကြတယ်လို့ ဆိုပါတယ်။

"သူတို့(စကစ)က မြင်မြင်ချင်းပစ်တာမျိုး မဟုတ်ဘူး။ မလှမ်းမကမ်း မီတာ ၂၀ လောက်အကွာဝေးတော့မှ ပစ်တာမျိုး။ အပိုင်စောင့်ပြီး ပစ်ခံရတယ်။"လို့ သူကဆက်ပြောပါတယ်။

ပစ်ခတ်မှုဖြစ်ပြီးပြီး စစ်ကောင်စီတပ်သားတွေ ပြန်လည်ဆုတ်ခွာသွားမှ အခြေအနေစောင့်ကြည့်ပြီး ကျဆုံးတပ်ဖွဲ့ဝင်တွေရဲ့အလောင်းကို ပြန်ကောက်ယူလာခဲ့တယ်လို့ ဆိုပါတယ်။

ကျဆုံးသူ ၂ ဦးရဲ့ ဈာပနကိုတော့ ဒီဇင်ဘာ ၃၁ ရက် ဒီမနက်ပိုင်း ၉ နာရီကျော်ခန့်မှာ ပြုလုပ်ခဲ့တယ်လို့ သိရပါတယ်။

မြင်းခြံ-နဘူးအိုင် ကားလမ်းပိုင်းမှာ ပြည်သူ့ကာကွယ်ရေးတပ်ဖွဲ့ရဲ့ ရှောင်တခင်စစ်ဆေးမှု လုပ်တာမျိုးတွေရှိသလို စစ်ကောင်စီတပ်နဲ့ ပျူစောထီးအဖွဲ့တွေရဲ့ စစ်ဆေးရေးဂိတ်တွေလည်း ရှိတယ်လို့ ဆိုပါတယ်။

ပြီးခဲ့တဲ့အောက်တိုဘာ ၁၅ ရက်ကလည်း မြင်းခြံမြို့နယ်၊ မကျီးစုကျေးရွာကို စစ်တပ်က လေကြောင်းကနေ ဗုံးကြဲတာကြောင့် ဒေသခံကာကွယ်ရေးတပ်ဖွဲ့ဝင် ၆ ဦးကျဆုံးခဲ့တယ်လို့ သိရပါတယ်။

သတင်း - ကျော်ကြီး၊ စာတည်း - လင်း

#မြေလတ်အသံ
#မြင်းခြံ #စစ်တပ် #ကင်းပုန်း #ပစ်ခတ်

31/12/2024

အရပ်ဝတ်နဲ့စစ်သား ၄ ဦးပါလာတဲ့ကား အနီးကပ်စောင့်ကြိုတိုက်ခိုက်ခံရလို့ အားလုံးသေဆုံး

ပခုက္ကူ၊ ဒီဇင်ဘာ ၃၁၊ ၂၀၂၄။

မကွေးတိုင်း၊ ပခုက္ကူမြို့နယ်၊ စက်မှုဇုန်ဂိတ်ကနေ စစ်ကောင်စီတပ်သားတွေလိုက်ပါလာတဲ့ ဟိုက်ဂျက်ကားကို ဒီဇင်ဘာ ၃၀ ရက်ညနေ ၄ နာရီ ၂၀ မိနစ်လောက်မှာ ပစ်ခတ်တိုက်ခိုက်ခဲ့ရာ သေဆုံးမှုတွေရှိပြီး လက်နက်ခဲယမ်းတွေလည်း သိမ်းဆည်းရရှိခဲ့တယ်လို့ Young Force - UG အဖွဲ့ဆီက သိရပါတယ်။

စုစုပေါင်းစစ်သား ၄ ဦးစီးနင်းလိုက်ပါလာတဲ့ အဆိုပါကားကို ပခုက္ကူမြို့တွင်းတနေရာမှာ အနီးကပ်ပစ်ခတ်ပြီးနောက် လက်နက်တွေသိမ်းဆည်းနိုင်ခဲ့တယ်လို့ ဆိုပါတယ်။

“ပစ်ခတ်တိုက်ခိုက်အချိန်က အကြာကြီးမဟုတ်ဘူး၊ မြို့တွင်းလည်းဖြစ်တဲ့အတွက် ၅ မိနစ်ကြာတယ်။ ကားကတော့ အရပ်ကားပဲပြောပါတော့။ ပွိုင့်ကားမဟုတ်ဘဲနဲ့ ဟိုက်ဂျက်အမျိုးအစားကားပါ။ ကားပေါ် မှာတော့ ဒရိုင်ဘာအပါအဝင် စစ်ကောင်စီတပ်သား ၄ ဦးနဲ့ သေနက် ၄ လက်ပါ။ ထိခိုက်သေဆုံးမှုက ၄ ဦးလုံးပါတာ ၄ ဦးလုံးသေတယ်။” လို့ Young Force - UG တာဝန်ခံ ကိုဝိုင်ပီက ပြောပါတယ်။

တိုက်ခိုက်ပြီးနောက် MA 3 ၄ လက်၊ ကျည်ဘောက် ၈ ခု၊ ၅.၅၆ ကျည် ၁၆၈ တောင့်၊ ဖုန်း ၁ လုံးနဲ့ အခြားစစ်အသုံးအဆောင်ပစ္စည်းတွေ သိမ်းဆည်းခဲ့ပြီး ကားနဲ့အလောင်းတွေကိုတော့ ဖြစ်စဉ်ဖြစ်တဲ့နေရာမှာပဲထားခဲ့တယ်လို့ တာဝန်ခံ ကိုဝိုင်ပီက ပြောပါတယ်။

ဟိုက်ဂျက်ကားပေါ်မှာပါလာတဲ့ စစ်‌သား ၄ ဦးဟာ ပခုက္ကူ တပ်မ ၁၀၁ ကဖြစ်ပြီး ဒီတိုက်ခိုက်မှုကို Young Force - UG ၊ Pakokku People Defense Force နဲ့ Pakokku Ranger တို့က ပူးပေါင်းလုပ်ဆောင်ခဲ့တာလို့ သိရပါတယ်။

သတင်း - ဒိန်းဂျား၊ စာတည်း - လင်း

#မြေလတ်အသံ
#မကွေး #ပခုက္ကူ #ဟိုက်ဂျက် #စစ်ကား #ပစ်ခတ်

Myaelatt Athan Broadcasting Page ကို React, Comment , Share လုပ်ပေးခြင်းဖြင့် မြေလတ်အသံ ရေရှည်ရပ်တည်နိုင်ရေးအတွက် ဝိုင်းဝန်းကူညီနိုင်ပါတယ်။

31/12/2024

စစ်ရေးအရှိန်မြှင့်ဖို့ မန္တလေး PDF က စစ်ကိုင်းတပ်မဟာ ဖွဲ့စည်းမယ်လို့ဆို (ရုပ်/သံ)

စစ်ကိုင်း၊ ဒီဇင်ဘာ ၃၁၊ ၂၀၂၄။

ပြည်သူ့ကာကွယ်ရေးတပ်မတော် မန္တလေးက လာမယ့် ၂၀၂၅ ခုနှစ်အတွင်း စစ်ကိုင်းတိုင်းမှာ တပ်မဟာအသစ်တခု ဖွဲ့စည်းဖို့လုပ်ဆောင်နေပြီး စစ်ရေးအရှိန်အဟုန်လည်း တိုးမြှင့်သွားမယ်လို့ ဒီဇင်ဘာ ၃၀ ရက် ညက ထုတ်ပြန်ခဲ့ပါတယ်။

ပြည်သူ့ကာကွယ်ရေးတပ်မတော်-မန္တလေးရဲ့ စစ်ကိုင်းတပ်မဟာမှာ လာရောက်ပူးပေါင်းမယ့် စစ်သည်တော်တွေ၊ မိတ်ဖက်တော်လှန်ရေးတပ်ဖွဲ့တွေကိုလည်း ကြိုဆိုပြီး စစ်ကိုင်းတိုင်းအတွင်းက တော်လှန်ရေးတပ်ဖွဲ့တွေနဲ့ ဟန်ချက်ညီညီ စစ်ဆင်ရေးတွေ ပူးပေါင်းလုပ်ဆောင်ဖို့ အသင့်ရှိတယ်လို့လည်း ထုတ်ပြန်ချက်မှာ ပါရှိပါတယ်။

MDY-PDF ဟာ NUG၊ MOD ရဲ့ တိုက်ရိုက် အမိန့်ပေးကွပ်ကဲမှုအောက်မှာ ဖွဲ့စည်းထားတဲ့ တပ်ဖွဲ့တခုဖြစ်ပြီး မန္တလေးတိုင်းနဲ့ ရှမ်းမြောက်ဒေသဘက်မှာ စစ်ရေးလှုပ်ရှားမှုတွေ ပြုလုပ်နေတာပါ။
၁၀၂၇ တကျော့ပြန်စစ်ဆင်ရေးမှာလည်း မဟာမိတ်အဖွဲ့အစည်းတွေနဲ့ ပူးပေါင်းကာ မိုးကုတ်၊ မိုးမိတ်၊ မတ္တရာ၊ စဉ့်ကူး၊ သပိတ်ကျင်း၊ ကျောက်မဲ၊ နောင်ချို၊ သီပေါ စတဲ့ မြို့နယ်တွေမှာ မြို့သိမ်းတိုက်ပွဲတွေ လုပ်ဆောင်ခဲ့တာပါ။

၂၀၂၄ခုနှစ် တနှစ်တာအတွင်း MDY-PDFနဲ့ မိတ်ဖက်တော်လှန်ရေးတပ်ဖွဲ့တွေ ပူးပေါင်းပြီး စစ်ကောင်စီ အထိနာတဲ့ တိုက်ပွဲတွေ ဖော်ဆောင်နိုင်ခဲ့သလို စိုးမိုးနယ်မြေတွေလည်း ရရှိခဲ့တယ်လို့ ထုတ်ပြန်ချက်မှာ ပါရှိပါတယ်။

ပြီးခဲ့တဲ့ အောက်တိုဘာ ၂၇ ရက်ကလည်း ကရင်ပြည်နယ်မှာ အခြေစိုက်တဲ့ ဗမာပြည်သူ့လွတ်မြောက်ရေးတပ်တော်-BPLAက အညာဒေသမှာအခြေချပြီး စစ်ဆင်ရေးတွေ ဖော်ဆောင်လာနိုင်တော့မယ်လို့ အသိပေး ထုတ်ပြန်ခဲ့ပါသေးတယ်။

#မြေလတ်အသံ
#စစ်ကိုင်း #တပ်မဟာ #စစ်ရေးအရှိန်မြှင့်

Myaelatt Athan Broadcasting Page ကို React, Comment , Share လုပ်ပေးခြင်းဖြင့် မြေလတ်အသံ ရေရှည်ရပ်တည်နိုင်ရေးအတွက် ဝိုင်းဝန်းကူညီနိုင်ပါတယ်။

31/12/2024

လှတောရောက် ဗန်ဂိုး (ခရီးသွားဆောင်းပါး)

လှတောရောက် ဗန်ဂိုး (ခရီးသွားဆောင်းပါး)

မြေလတ်အသံ၊ ဒီဇင်ဘာ ၃၁၊ ၂၀၂၄။

ရေးသားသူ - ဗန်ဂိုး

စစ်ရေးအခြေအနေတွေကြောင့် လမ်းမသလားဖြစ်ဘဲ ရွာမှာသောင်တင်နေတာကြာပြီဖြစ်တဲ့ မောင်ဗန်ဂိုး တယောက် ကိုယ့်မြို့နယ်အတွင်းက နာမည်ကြီး'လှတောရွာ'ကိုသွားဖို့ မနက် ၇ နာရီအချိန်လောက် စောစော ထွက်လာခဲ့ပါသည်။ စီးတော်ယာဉ်မှာ တရုတ်ဆိုင်ကယ်အစုတ်လေးဖြစ်ပြီး မကြာခဏလည်း ထိုးရပ်တတ်သေးသည်။

ဆောင်းရာသီ မနက်ခင်းကို ဆိုင်ကယ်နဲ့သွားရသဖြင့် အအေးဒဏ်ကိုကြံ့ကြံ့ခံနိုင်ဖို့ အနွေးထည်အထူများ ၀တ်ဆင်ထားရပြီး လည်ပင်းပတ်ပုဝါတခုလည်း ခြုံထားရသေးသည်။ ဘေးလွယ်အိတ်ကြီးတကားကား၊ မျက်မှန်ကြီး တ၀င်း၀င်းနှင့် မောင်ဗန်ဂိုး၏ ပုံစံမှာ ကိုးရို့ကားယား။

ပုံမှန်ဆို ၀က်လက်မြို့အထိရောက်‌အောင်သွားပြီးမှ လှတောဘက်ကို သွားရပေမယ့် ၀က်လက်-လှတောကား လမ်းမှာ ပီဒီအက်ဖ်တွေဘက်က ပိတ်ထားတာကြာပြီဖြစ်သည်။ ၀က်လက်နှင့် မန်ကျီးတုံကြားကားလမ်းကိုသာ ပိတ်ထားခြင်းဖြစ်ပြီး မန်ကျီးတုံရောက်လျှင် လှတောအထိ ပုံမှန်အတိုင်းသွားလာနိုင်သည်။ သို့ဖြစ်၍ ၀က်လက်အထိ ရောက်အောင်မသွားတော့ဘဲ အခြားရွာများကြားမှ ဖြတ်သွားရမည်။

နွားလှည်းသာသာအမြန်နှုန်းဖြင့် ၁၀ မိနစ်လောက်ဆိုင်ကယ်မောင်းပြီးတဲ့အခါ လမ်းကွေ့ရမည့် ကြားရွာတခုသို့ ရောက်သည်။ ထိုနေရာမှနေ၍ ချစ်လှစွာသော၀က်လက်မြို့မှ ဖုန်းတာဝါတိုင်ကို လှမ်းမြင်နေရသည်။ ဤတာဝါတိုင်အနီးရှိ ဘောလုံးကွင်းကြီးမှာ မောင်ဗန်ဂိုး၏ အသည်းနှလုံးပင်။ ချက်ချင်းပင် ပြေး၍သွားလိုက် ချင်မိသည်။ အိမ်ပြန်ချင်သည့် ခံစားချက်အစစ်အမှန်ကို အိမ်ပြန်ခွင့်မရှိသူတွေသာ နားလည်နိုင်ပါလိမ့်မည်။

ဒီလိုငေးရင်း ဆွေးရင်းဖြင့်ပင် ဆက်သွားရမည့်ရွာကို ခရီးဆက်ခဲ့ပါသည်။ ဤရွာမှာ ၂၀၂၂ အတွင်းက စစ်ကောင်စီတပ်သားတွေ ရွာလုံးကျွတ်မီးရှို့ခြင်းကို ခံထားရသောရွာဖြစ်သည်။ အခုတော့ ရွာရှိအိမ်များမှာ မီးမလောင်နိုင်ဘဲ ကျန်ခဲ့သော နီညို‌ရောင်သွပ်ချပ်များဖြင့်သာ အမိုးအကာပြုလုပ်ပြီး ဆောက်လုပ်ထားကြသည်။

ဤသွပ်ချပ်တဲလေးများမှာနေပြီး အညာ၏ အအေးဒဏ်၊ အပူဒဏ်တွေကို မည်သို့များခံနိုင်ကြသနည်းဟုတွေးရင်း စိတ်မကောင်းဖြစ်မိသည်။ အချို့ထန်းရွက်တဲများကိုလည်း တွေ့ရသည်။ အိမ်ကြီးအိမ်ကောင်းများကို သိပ်မတွေ့ရတော့။ အချို့ မီးထဲမပါသောအိမ်များသာ အကောင်းအတိုင်းကျန်တော့သည်။ ရွာသူရွာသားများ သွားလာ‌နေကြသည်ကို တွေ့ရပေမယ့် ရွာရှိကလေးများ ကျောင်းသွားသည်ကို မတွေ့ရပါ။ စောသေး၍ ဖြစ်မည်။

ဤရွာမှအထွက် မန်ကျီးတုံကိုရောက်မည့် မြေကြီးလမ်းပေါ်သို့ရောက်ပြီး လမ်းအတိုင်းခရီးဆက်ခဲ့ပါသည်။ ထိုလမ်းမှာ လှတောသားစကားဖြင့်ပြောရလျှင် "ကျောက်ခဲ စားသွားရင်တောင် အစာကြေမည်" ဖြစ်သည်။ လမ်းမှာ အင်မတန်မှ ဆိုးရွားလှသောလမ်းဖြစ်သည်။ ချိုင့်ကွက်များကို မကြာခဏတွေ့ရပြီး နွားလှည်း အမြန်နှုန်းဖြင့် သွားနေသည့် ဆိုင်ကယ်အစုတ်လေးနှင့် လူမှာလည်း သုံးလက်မလောက် မကြာခဏ မြောက်မြောက်တက်သွားသည်။ ဒီလမ်းအသုံးပြုရသည်မှာ "မင်းကုသ" ၏ မျက်ခွက်ပေါ် ဆိုင်ကယ်တက်‌မောင်း နေရသလားဟူ၍ပင် တွေးမိသည်။

လမ်းအတိုင်းဆက်လာပြီးနောက် ဂိတ်တခုနှင့် ငွေဖလားများကိုင်ထားသည့် လူအနည်းငယ်ကိုတွေ့ရပါသည်။

"လမ်းပြုပြင်ရန်အတွက် ကားများကို အလှူငွေကောက်ခံခြင်းဖြစ်သည်" ဟူသောဆိုင်းဘုတ်ကိုတွေ့ရပြီး ‌လမ်းပြုပြင်တော့မည်ဟုသိရသဖြင့် ၀မ်းသာသွားသည်။ မောင်ဗန်ဂိုးမှာ သဒ္ဓါတရားထက်သန်လှသူဖြစ် သော်လည်း ဆိုင်ကယ်များကို မရပ်ခိုင်းသဖြင့် အလှူငွေ မထည့်ခဲ့ရပေ။

ခရီးကြမ်းကြီးကို ၃ မိုင်လောက်ကျော်ဖြတ်ပြီးနောက် မန်ကျီးတုံရွာကို ရောက်သည်။ ယခုရွာသည်လည်း စစ်ကောင်စီတပ်၏ မီးရှို့ခြင်းကို ခံထားရသောရွာဖြစ်သည်။ ယခုနေရာမှစ၍ ကတ္တရာလမ်းမပေါ် မောင်းရတော့မည်ဖြစ်သည်။ လမ်းကောင်းသဖြင့် ရွာအ၀င်အထွက်၌ပင် ၄ လက်မခန့်အမြင့်ရှိသည့် Slow down များရှိသည်။ Slow down များဘေးတွင် မိုင်းများလည်း တွဲထောင်ထားသေးသည်။ ထို့ကြောင့် မောင်ဗန်ဂိုး တယောက် ဆိုင်ကယ်ကို လီဗာကုန်မဖြဲရဲဘဲ ခပ်နှေးနှေးသာ ခရီးဆက်ခဲ့ရသည်။

ယခင်က လှတော-၀က်လက်ကားလမ်းမှာ ခရီးသည်တင်ယာဉ်များ၊ ကုန်တင်ယာဉ်များ၊ ဈေးသည်များ၊ ခရီးသွားပြည်သူအပေါင်းနှင့် အလွန်စည်ကားသောလမ်းဖြစ်သော်လည်း ယခုအခါ ခြောက်ကပ်လှသည်။

၀က်လက်မြို့တွင်းမှ အ၀င်အထွက်မရှိတော့ခြင်းကြောင့် ဖြစ်သည်။ မောင်ဗန်ဂိုးမှာ လမ်းတလျှောက် အထီးကျန်စွာဆိုင်ကယ်စီးလာရင်း အရင်က လမ်းတလျှောက်စည်ကားခဲ့သောအချိန်တွေကို တမ်းတနေမိသည်။ ထိုလမ်းကိုအသုံးပြုပြီး နယ်လှည့် ဘောလုံးအတူကန်ခဲ့သော ရဲဘော်များကိုလည်း သတိရနေမိပါသည်။ စစ်ရေးဗျူဟာ‌မြောက် အမြော်အမြင်ကြီးမားစွာဖြင့် ၀က်လက်မြို့ အ၀င်အထွက်လမ်းကို ပိတ်ထားသော သဗ္ဗူရိသသူတော်ကောင်းအပေါင်းကိုလည်း မေတ္တာပို့ မိနေပါသေးသည်။

လမ်းတလျှောက်တွင် ရွှေဘိုပေါ်ဆန်းမွှေးစပါးစိုက်ခင်းများ ရိတ်သိမ်းနေကြသည်ကို တွေ့ရသည်။ စပါးရိတ်စက်များ၊ ရိုးရာလက်ရိတ်အဖွဲ့များဖြင့် အပြိုင်အဆိုင်ရိတ်သိမ်းနေကြသည်ကို တွေ့ရသည်မှာ ကြည်နူးဖွယ် ကောင်းလှပါသည်။ တခုသတိထားမိသည်မှာ စပါးရိတ်စက်များမှာ အများစုဖြစ်ပြီး လက်ရိတ်အဖွဲ့များမှာ တဖွဲ့ နှစ်ဖွဲ့သာ တွေ့ရသည်။

စပါးလက်ရိတ်နေသော အဖွဲ့တခုအနားသို့ရောက်လျှင် စပါးရိတ်နေသူအမျိုးသမီးများ သီဆိုနေကြသော သံပြိုင်တေးတခုကို ကြားရသည်။

"သင်္ဘောသားလည်း မကြိုက်ပါ၊ သူဌေးသားလည်း မကြိုက်ပါ ပီဒီအက်ဖ်ပဲ တို့ယူမည်" ဟူ၍ပင်။

ထိုစဉ် ပီဒီအက်ဖ်ရဲဘော်‌တွေ ဆိုင်ကယ်များနှင့် ဘေးမှဖြတ်သွားသည်။ ရဲဘော်များမှာ သီချင်းသံကိုကြားပြီး ကျေနပ်ကာ ပြုံးရွှင်နေကြပြီး ပြန်လည်နှုတ်ဆက်နေကြသည်။ စပါးရိတ်သူ အမျိုးသမီးများကလည်း ပြန်လည် အော်ဟစ်နှုတ်ဆက်သည်။ အပြန်အလှန်အော်ဟစ်သံများဖြင့် ဆူညံသွားသည်။ ဤကဲ့သို့မြင်တွေ့နေရသည်မှာ ပျော်စရာကောင်းလှပါသည်။ မကောင်းသည်မှာ မောင်‌ဗန်ဂိုးအား မည်သူမျှ အဖက်မလုပ်ခြင်းပင်။

"ပီဒီအက်ဖ် မဟုတ်လို့ အဖက်မလုပ်တာလား ညီမလေးတို့ရယ်" ဟု စိတ်ထဲမှ ၀မ်းနည်းပက်လက်ဖြင့် ရေရွတ် လိုက်သည်။ ထိုစဉ်...

"**ဖြိုး မဟုတ်လား...သား" ဟု စပါးရိတ်အဖွဲ့ထဲမှခေါ်သံကိုကြားရသဖြင့် လှည့်ကြည့်လိုက်မိသည်။ မောင်ဗန်ဂိုး အထက်တန်းတုန်းက ကျောင်းဆရာမဖြစ်သည်။ နှုတ်ဆက်စကားပြောပြီးတဲ့အခါ CDM လုပ်ပြီး ဘ၀ခက်ခဲနေသဖြင့် စပါးရိတ်လိုက်နေခြင်းဖြစ်သည်ဟု သိရသည်။

ရင်ထဲမှာ ဆို့နင့်သွားသည်။ ဒီလိုဘ၀မျိုးတွေ တနိုင်ငံလုံးမှာ ဘယ်လောက်တောင်များရှိနေမလဲဟု တွေးမိသည်။ CDM လုပ်ခဲ့ရသည့်အတွက် နောင်တမရ‌ကြောင်းလည်း သူက ပြောသေးသည်။ အချိန်အတော်အကြာ စကားပြောပြီးနောက် " အားတင်းထား ဆရာမ တော်လှန်ရေးကြီးက ခရီးပေါက်နေပါပြီ။ အမေရိကအထိ ရောက်နေပြီ။" ဟု ခပ်တည်တည်နှင့်ပြောကာ ထွက်ခဲ့လိုက်သည်။ ဆရာမကား နားမလည်ဟန်ဖြင့် ကျန်ခဲ့လေသည်။

လမ်းအတိုင်းဆက်ပြီး ခရီးဆက်ခဲ့ရာ ကျေးရွာတခုအရောက် ပြည်သူ့အခြေပြုစာသင်ကျောင်းတခုကို တွေ့ရ သည်။ ကျောင်းအတွင်း ဒီဇင်ဘာ အားကစားပွဲကျင်းပနေကြသည့်အချိန် ဖြစ်သည်။ အားကစားနည်းမျိုးစုံကို ကလေးများယှဉ်ပြိုင်ကစားနေကြသည်ကို မြင်ရသည်မှာ ပျော်စရာကောင်းလှပါသည်။

ထူးခြားချက်မှာ ကျောင်းသူ/ကျောင်းသားများ၏ ယူနီဖောင်းဖြစ်သည်။ အဖြူနဲ့အစိမ်း၀တ်စုံကို သပိတ်မှောက် လိုက်ကြပြီဖြစ်ပြီး အခြားယူနီဖောင်းကို တူညီစွာ၀တ်ဆင်ထားကြသည်မှာလည်း အမြင်တမျိုးနှင့် ဆန်းသစ်လှသည်။

"ယူနီဖောင်းပြောင်းလိုက်သလို သင်ကြားရေးစနစ်တွေပါ ပြောင်းလိုက်ပြီလား" ဟု တယောက်တည်း မေးခွန်း ထုတ်နေမိသည်။ အဆိုပါ ကျောင်းအားကစားပွဲကို ခေတ္တခဏ ကြည့်ပြီးနောက် ဆက်လက်ခရီးနှင်ခဲ့ပါသည်။

ထို့နောက် လှတောကျေးရွာကို ရောက်ရှိခဲ့ပြီး လူစည်ကားရာ ကားလမ်းဆုံအထိ မောင်းနှင်လာခဲ့သည်။ လှတောရွာမှာ ရွာသူရွာသားများ၊ ခရီးသွားပြည်သူများ၊ အနီးအနားကျေးရွာများမှ ဈေး၀ယ်သူများနှင့် ယခင်ကကဲ့သို့ပင် ပိုမိုစည်ကားလျက်ရှိနေပါသည်။ လမ်းပေါ်တွင်လည်း ဆိုင်ကယ်မျိုးစုံ လူ‌ပေါင်းစုံနှင့် ပြည့်နှက်လျက်ရှိသည်။

လမ်းဆုံတ‌နေရာတွင် မော်တော်ယာဉ်များကို စစ်‌ဆေးနေသော ပီဒီအက်ဖ်ရဲ‌ဘော်များလည်း ရှိသည်။ ရွှေဘို-မန္တလေးကားလမ်းပေါ်တွင် တည်ရှိသောရွာဖြစ်သဖြင့် မော်တော်ယာဉ် ကြီး/ငယ် များကိုလည်း အဆက်မပြတ် မြင်တွေ့နေရပါသည်။ လှတော-၀က်လက် ကားလမ်းဆုံရှိ "စိန်ငါးပွင့်" ဆန်စက်ကြီးမှာလည်း ဆက်လက် လည်ပတ်နေဆဲလို့ သိရသည်။

ထူးခြားသည်မှာ လှတောရဲစခန်းဖြစ်သည်။ လှတောရဲစခန်းမှာ ပီဒီအက်ဖ်ရဲဘော်များ ရှိနေရာနှင့် မလှမ်းမကမ်းတွင်ရှိပြီး လှမ်းမြင်နေရသည်။ တဖက်နှင့် တဖက်ပစ်ခတ်ခြင်းမရှိဘဲ ငြိမ်းချမ်းရေး ယူထားကြဟန်ရှိသည်။ ရဲစခန်းအကြောင်း ရွာခံတယောက်ကိုမေးမြန်းကြည့်ရာ-

"သူတို့က သူတို့ဘာသာနေတာ၊ အထဲက မထွက်ဘူး။ ဒီဘက်ကလည်း သွားမတိုက်ဘူး။" ဟု ပြောသည်။

ထို့နောက် လမ်းတလျှောက် ဗမာ့ရိုးရာအလှူပွဲများတွင် ပါ၀င်လှည့်လည်သော ရွှေလှည်းယဉ် အများအပြားကိုလည်း ‌တွေ့ရသည်။ ဘေးရွာတခုတွင် အလှူရှိသဖြင့် သွားကြဟန်တူသည်။ ယခုနှစ် စစ်ရေးငြိမ်သက်ချိန် အညာတွင် အလှူပွဲများ တရွာနှင့်တရွာ အပြိုင်အဆိုင်ကျင်းပကြသည်။ တချိန်တည်းတွင် အညာရှိစစ်ရှောင် များမှာလည်း အခက်အခဲအမျိုးမျိုးနှင့် ကြုံတွေ့နေကြရသည်။

ထို့နောက် နာမည်ကြီးလှတောသားများ စကားကြွယ်မှုကို အရှင်လတ်လတ်နားဆင်ရန် လက်ဖက်ရည်ဆိုင်တခုသို့ ဝင်လိုက်သည်။ ဆိုင်ထဲမှ ထွက်လာသော လှတောသားဖြစ်ဟန်ရှိသူတယောက်က လှမ်းပြောသည်။

" ဆီးချိုရှိရင် ၀င်မသောက်နဲ့"

မောင်ဗန်ဂိုး နားမလည်ဘဲ လှတောသားဟုထင်ရသော ဘဲကြီးများဝိုင်းဖွဲ့ရာအနီးတွင် ၀င်ထိုင်ပြီး ပုံမှန်တခွက်မှာသည်။ စိတ်ထဲတွင်လည်း စကားအလင်္ကာများကြားရန် မျှော်လင့်နေမိသည်။ လူနှစ်ဦး တယောက်နှင့် တယောက် မေးနေကြသည်။

"စပါးရောင်းပြီးသွားပြီဆို"

"အေး ဒါပေမဲ့ ကျော်ဟိန်း" ဟု ပြောပြီး ရယ်နေကြသည်။ (ကျော်ဟိန်းရိုက်ကူးထားသော "အကြွေး" ဇာတ်ကား ကို ရည်ညွှန်းဟန်တူသည်။)

ပုံမှန်တခွက် ရောက်လာလေပြီ။ လှတော တီး၏ အရသာကို မြည်းစမ်းကြည့်သည်။ တငုံလောက် လျှာပေါ်တွင် တင်လိုက်သည်နှင့်ပင် ညင်သာစွာ အရသာခံလိုက်ပြီး-

"လခွမ်း...စုတ်ပြတ်သတ်နေတာပဲကွာ"

နို့ဆီဘူး ပလိန်းကြီး ထိုင်သောက်နေရသလိုပင် ချိုလွန်းနေသည်။ မောင်ဗန်ဂိုးဒေါပွသွားသည်ကို ဘေးမှ လူတဦးက သတိထားမိပြီး "တီးဆရာ မရှိလို့ စားပွဲထိုးမလေးက ၀င်ဖျော်နေတာ" ဟုပြောသည်။

စားပွဲထိုးမလေးကို လှမ်းရှိုးပြီး ခွင့်လွှတ်ချင်စရာ မျက်နှာထားကလေးအား မြင်သည်နှင့်ပင် အရသာဆိုးမှုကို နားလည်ပေးလိုက်သည်။ မောင်ဗန်ဂိုးမှာ သည်းခံခွင့်လွှတ်ခြင်းတရားနှင့် ပြည့်စုံသူပင်။ ဆိုင်အ၀င်က ပြောသွားသူ၏စကားကိုလည်း ယခုမှပင် သဘောပေါက်သည်။

ထို့နောက် စကားဝိုင်းကို ဆက်လက်နားစွင့်နေသည်။ အသက်ကြီးကြီး ဘဲကြီးတပွေကို လူငယ်တဦးက-

"ခင်ဗျား ပွဲစား(စပါးပွဲစား) လုပ်တာ ဘယ်လောက်ကြာပြီမို့လဲ" ဟုမေးသည်။

"အစိုးရ ၀န်ထမ်းသာဆို ပင်စင်ပေးသင့်တယ်၊ ဦးနေ၀င်းက ငါ့ကို" ဟု ထိုဘဲကြီးမှ ပြန်ဖြေလိုက်ပြီး ပွဲကျနေကြသည်။

မောင်ဗန်ဂိုးသဘောကျသွားသည်။ စကားအလင်္ကာများကို ဆက်လက်မျှော်လင့်နေမိသည်။ ထိုစဉ် လူငယ် ပီဒီအက်ဖ်ရဲဘော်တဦးနှင့် လူတယောက် စကားဝိုင်းအတွင်း ၀င်ရောက်လာသည်။

လူတဦးမှစပြီး "မင်းတို့ မြန်မြန်နိုင်အောင် တိုက်ကြ၊ မဟုတ်ရင် ၁၂ လက်မ ၁ ပေ၊ ၃ ပေ ၁ ဂိတ်နဲ့ ဂိတ်တွေ စိပ်နေပြီ" ဟု ဆီးကြိုမိတ်ဆက်လိုက်သည်။

လူငယ်ရဲဘော်မှ စိတ်တိုသွားဟန်ရှိပြီး " ခင်ဗျားတို့ လူကြီးတွေက ဘယ်လောက်ထောက်ပံ့လို့လဲ" ဟု ပြန်ပြောလိုက်သည်။

ထို့နောက် တော်လှန်ရေး ဒဿနများကို အာဘောင်းအာရင်းသန်သန်ဖြင့် ပြောကြားလေသည်။ သူတဦးတည်းပြောနေသဖြင့် အခြားသူများ၏ စကားအလင်္ကာများကိုလည်း မကြားရတော့ချေ။

၂ နာရီနီးပါးကြာသည် အထိပြောကြားနေလေသည်။ မောင်ဗန်ဂိုး သည်းခံနိုင်စွမ်းကုန်ဆုံးသွားကာ-

"တော်လှန်ရေးက လက်နက်တွေနဲ့တိုက်ရတာ စစ်ကောင်စီ ကံကောင်းတယ်၊ လေနဲ့သာတိုက်ရရင် ဒီရဲဘော်နဲ့ကို မလွယ်ဘူး။" ဟု စိတ်ထဲမှပြောပြီး ဆိုင်ကထွက်ကာ လှတောရွာအတွင်းပိုင်းသို့ ၀င်လာခဲ့သည်။

ရွာအတွင်း လူတစု လက်တောက်ခုံ တောက်နေကြသည်ကိုတွေ့ရပြီး ထိုလူများနှင့် ၀င်ကစားကာ စကားပြော ကြည့်သည်။ တနာရီမျှကြာသည်အထိ သာမာန်စကားများသာ ကြားရသည်။

စကားအလင်္ကာများ မကြားရသည့်အပြင် ကစားပွဲတွင်လည်း ရှုံးနိမ့်ခဲ့ရသေးသည်။ ထို့နောက် သည်းမခံနိုင် တော့ဘဲ စကားအလင်္ကာတွေ ကြားချင်ကြောင်း၊ မည်သူနှင့်တွေ့လျှင် ကြားနိုင်ကြောင်း မေးလိုက်သည်။
လူတဦးက " ဒီတိုင်းကြီးမေးရင် မပြောတတ်ကြဘူး၊ စကားပြောရင်းကြုံမှသာ ပင်းဇင်းက မိုင်းလိုမျိုး ထထ ပေါက်တာ" ဟု ပြောသည်။

ထို့နောက် စကားအလင်္ကာ ပြောတတ်သူများမှာ စပါးရိတ်သိမ်းချိန်ဖြစ်သဖြင့် မအားကြကြောင်း၊ နောက်မှ တခေါက်ပြန်လာသင့်‌ကြောင်း၊ ရှေးယခင်ကလို လူတိုင်းနီးပါးလည်း မပြောတတ်တော့ကြောင်း ပြောပြသည်။

လှတောရွာသည်လည်း စစ်ကြောင်းမထိုးသဖြင့် မပြေးရတာကြာပြီဖြစ်ကြောင်း၊ ပုံမှန်အတိုင်းလည်ပတ်နေ ကြောင်း သိရသည်။

မောင်ဗန်ဂိုး ဇွဲမလျှော့ဘဲ တရွာလုံးလျှောက်ပတ် စကားလိုက်ပြောကြည့်သည်။ သာမာန်စကားများသာ ပြောဆို သုံးနှုန်းကြသည်ကို တွေ့ရသည်။ လူစိမ်းဖြစ်၍ မပြောကြသည်လားတော့ မသိ။ ထို့နောက် ညနေစောင်းပြီဖြစ်သဖြင့် ပြန်ရတော့မည်ဖြစ်သည်။ မောင်ဗန်ဂိုး စိတ်ပျက်လက်ပျက်ဖြင့် ဆိုင်ကယ်စုတ်လေးအားစက်နှိုးကာ လာလမ်းအတိုင်း ပြန်ခဲ့ရသည်။ စိတ်ထဲတွင် စကားအလင်္ကာများ ကြားရန် လှတောရွာအား ထပ်မံလာဦးမည်ဟု တွေးနေမိတော့သည်။

#မြေလတ်အသံ
#လှတော #ဝက်လက် #စစ်ကိုင်း #ခရီးသွားဆောင်းပါး

မြေလတ်အသံ page ကို Like ပေးခြင်း၊ YouTube Channel ကို Subscribed ခြင်းဖြင့် မြေလတ်အသံ ရေရှည်ရပ်တည်နိုင်ရေး ဝိုင်းဝန်းကူညီပေးကြပါရန် မေတ္တာရပ်ခံအပ်ပါသည်။
*****************************************
အောက်ပါလင့်တွေမှာလည်း မြေလတ်အသံရဲ့ သတင်းများကို ဖတ်ရှုနိုင်ပါတယ်။
Website - https://myaelattathan.org/
Youtube - https://www.youtube.com/channel/UCJpykv7SLazaVzdurxhURIg
Telegram - https://t.me/myaelattathan
Twitter - https://twitter.com/Myaelatt_Athan
Instagram - https://www.instagram.com/myaelatt_athan/
Tittok - https://www.tiktok.com/.athan

31/12/2024

တောင်သာက ပျူစောထီးခေါင်ဆောင်နေအိမ်ကို ပကဖ ဝင်တိုက်ပြီး လက်နက်ခဲယမ်းတွေသိမ်းဆည်း

တောင်သာ၊ ဒီဇင်ဘာ ၃၁၊ ၂၀၂၄။

မန္တလေးတိုင်း၊ မြင်းခြံခရိုင်၊ တောင်သာမြို့နယ်၊ မြင်းခြံ-ညောင်ဦးလမ်းဘေးရှိ ဆင်ဖြူရွာက ပျူစောထီးခေါင်းဆောင် ဝင်းကို ရဲ့ နေအိမ်ကို ဝင်ရောက်တိုက်ခိုက်ပြီး လက်နက်ခဲယမ်းတွေ သိမ်းဆည်းခဲ့တယ်လို့ တောင်သာမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

ဒီဇင်ဘာ ၃၀ ရက် မနေ့ကမနက် ၅ နာရီခွဲလောက်မှာ ကာကွယ်ရေးတပ်ဖွဲ့ဝင်တွေ ဝင်ရောက်တိုက်ခိုက်ရာ နာရီဝက်ဝန်းကျင်ပစ်ခတ်မှုဖြစ်ပြီးနောက် ပျူစောထီးခေါင်းဆောင် ဝင်းကိုနဲ့အဖွဲ့ဟာ ထွက်ပြေးသွားကြတယ်လို့ ဆိုပါတယ်။

“ကျနော်တို့ စီးနင်းတိုက်ခိုက်တော့ သူတို့လည်း ထွက်ပြေးလွတ်မြောက်သွားတယ်၊ သူတို့ကိုင်ဆောင်တဲ့ လက်နက်တွေတော့ ကျန်ခဲ့တယ်။”လို့ တောင်သာမြို့နယ်ပြည်သူ့ကာကွယ်ရေးအဖွဲ့ တာဝန်ရှိသူတဦးက ပြောပါတယ်။

ဝင်ရောက်တိုက်ခိုက်ချိန်မှာ ပျူစောထီးခေါင်းဆောင် ဝင်းကိုအပါအဝင် ပျူစောထီး ၁၀ ဦးဝန်းကျင်သာ ရှိနေပြီး တိုက်ခိုက်ပြီးနောက် ပြောင်းချောသေနတ် ၂ လက်၊ တူမီး ၁ လက်၊ .22 (ပွိုင့်တူးတူး) လက်လုပ် ၁ လက်၊ ပါရီ ၁ လက်နဲ့ ကျည်တချို့တို့ကို သိမ်းဆည်းရခဲ့တယ်လို့ သိရပါတယ်။

ဒီဇင်ဘာ ၃၁ ရက် ဒီမနက်ပိုင်းအထိတော့ အဲ့ပျူစောထီးတွေဟာ ရွာထဲကိုပြန်မဝင်လာကြသေးဘူးလို့ ဆိုပါတယ်။

အဲ့ဒီပျူစောထီးအဖွဲ့ဟာ ဆင်ဖြူရွာအနီး မြင်းခြံ- ညောင်ဦးလမ်းပေါ်မှာ ဂိတ်ဖွင့်ပြီး ခရီးသွားကားတွေဆီကနေ ပိုက်ဆံကောက်တာတွေလည်းလုပ်တယ်လို့ သိရပါတယ်။

ဒီပစ်ခတ်မှုကို တောင်သာမြို့နယ်ပြည်သူ့ကာကွယ်ရေးအဖွဲ့၊ Burmese Guerrilla Force-Myingyan (BGF)၊ ညောင်ဦးပကဖနဲ့ ညောင်ခရိုင်အမှတ် ၅ တပ်ရင်းတို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ ဒီဇင်ဘာ ၁၆ ရက်ကလည်း ရန်ကုန်ရဲတပ်ရင်း ၅ ကနေ တောင်သာမြို့နယ်ကို တာဝန်ကျနေတဲ့ ရဲတပ်သား ၁ ဦး တောင်သာမြို့နယ်ပြည်သူ့ကာကွယ်ရေးအဖွဲ့ဆီ အလင်းဝင်လာတဲ့ဖြစ်စဉ်ရှိခဲ့ပါတယ်။

သတင်း - ဒိန်းဂျား၊ စာတည်း - လင်း

#မြေလတ်အသံ
#တောင်သာ #ပျူစောထီး #တိုက်ခိုက် #လက်နက်ခဲယမ်း

Myaelatt Athan Broadcasting Page ကို React, Comment , Share လုပ်ပေးခြင်းဖြင့် မြေလတ်အသံ ရေရှည်ရပ်တည်နိုင်ရေးအတွက် ဝိုင်းဝန်းကူညီနိုင်ပါတယ်။

31/12/2024

စစ်ရေးအရှိန်မြှင့်ဖို့ မန္တလေး PDF က စစ်ကိုင်းတပ်မဟာ ဖွဲ့စည်းမယ်လို့ဆို

စစ်ကိုင်း၊ ဒီဇင်ဘာ ၃၁၊ ၂၀၂၄။

ပြည်သူ့ကာကွယ်ရေးတပ်မတော် မန္တလေးက လာမယ့် ၂၀၂၅ ခုနှစ်အတွင်း စစ်ကိုင်းတိုင်းမှာ တပ်မဟာအသစ်တခု ဖွဲ့စည်းဖို့လုပ်ဆောင်နေပြီး စစ်ရေးအရှိန်အဟုန်လည်း တိုးမြှင့်သွားမယ်လို့ ဒီဇင်ဘာ ၃၀ ရက် ညက ထုတ်ပြန်ခဲ့ပါတယ်။

ပြည်သူ့ကာကွယ်ရေးတပ်မတော်-မန္တလေးရဲ့ စစ်ကိုင်းတပ်မဟာမှာ လာရောက်ပူးပေါင်းမယ့် စစ်သည်တော်တွေ၊ မိတ်ဖက်တော်လှန်ရေးတပ်ဖွဲ့တွေကိုလည်း ကြိုဆိုပြီး စစ်ကိုင်းတိုင်းအတွင်းက တော်လှန်ရေးတပ်ဖွဲ့တွေနဲ့ ဟန်ချက်ညီညီ စစ်ဆင်ရေးတွေ ပူးပေါင်းလုပ်ဆောင်ဖို့ အသင့်ရှိတယ်လို့လည်း ထုတ်ပြန်ချက်မှာ ပါရှိပါတယ်။

MDY-PDF ဟာ NUG၊ MOD ရဲ့ တိုက်ရိုက် အမိန့်ပေးကွပ်ကဲမှုအောက်မှာ ဖွဲ့စည်းထားတဲ့ တပ်ဖွဲ့တခုဖြစ်ပြီး မန္တလေးတိုင်းနဲ့ ရှမ်းမြောက်ဒေသဘက်မှာ စစ်ရေးလှုပ်ရှားမှုတွေ ပြုလုပ်နေတာပါ။

၁၀၂၇ တကျော့ပြန်စစ်ဆင်ရေးမှာလည်း မဟာမိတ်အဖွဲ့အစည်းတွေနဲ့ ပူးပေါင်းကာ မိုးကုတ်၊ မိုးမိတ်၊ မတ္တရာ၊ စဉ့်ကူး၊ သပိတ်ကျင်း၊ ကျောက်မဲ၊ နောင်ချို၊ သီပေါ စတဲ့ မြို့နယ်တွေမှာ မြို့သိမ်းတိုက်ပွဲတွေ လုပ်ဆောင်ခဲ့တာပါ။

၂၀၂၄ခုနှစ် တနှစ်တာအတွင်း MDY-PDFနဲ့ မိတ်ဖက်တော်လှန်ရေးတပ်ဖွဲ့တွေ ပူးပေါင်းပြီး စစ်ကောင်စီ အထိနာတဲ့ တိုက်ပွဲတွေ ဖော်ဆောင်နိုင်ခဲ့သလို စိုးမိုးနယ်မြေတွေလည်း ရရှိခဲ့တယ်လို့ ထုတ်ပြန်ချက်မှာ ပါရှိပါတယ်။

ပြီးခဲ့တဲ့ အောက်တိုဘာ ၂၇ ရက်ကလည်း ကရင်ပြည်နယ်မှာ အခြေစိုက်တဲ့ ဗမာပြည်သူ့လွတ်မြောက်ရေးတပ်တော်-BPLAက အညာဒေသမှာအခြေချပြီး စစ်ဆင်ရေးတွေ ဖော်ဆောင်လာနိုင်တော့မယ်လို့ အသိပေး ထုတ်ပြန်ခဲ့ပါသေးတယ်။

ပုံစာ - ယခုနှစ် ဇူလိုင်လအတွင်းက စဉ့်ကူးမြို့သိမ်းတိုက်ပွဲအပြီး တွေ့ရသည့် MDYPDF တပ်ဖွဲ့ဝင်အချို့။

#မြေလတ်အသံ
#စစ်ကိုင်း #တပ်မဟာ #စစ်ရေးအရှိန်မြှင့်

မြေလတ်အသံ page ကို Like ပေးခြင်း၊ YouTube Channel ကို Subscribed ခြင်းဖြင့် မြေလတ်အသံ ရေရှည်ရပ်တည်နိုင်ရေး ဝိုင်းဝန်းကူညီပေးကြပါရန် မေတ္တာရပ်ခံအပ်ပါသည်။

30/12/2024

မြင်းခြံမှာ စစ်သားနဲ့ ပျူစောထီးတွေ ကြားဖြတ်တိုက်ခိုက်ခံရပြီး ၂ ဦးသေ ၃ ဦးဒဏ်ရာရ (ရုပ်/သံ)

မြင်းခြံ၊ ဒီဇင်ဘာ ၃၀၊ ၂၀၂၄။

မန္တလေးတိုင်း၊ မြင်းခြံမြို့နယ်၊ လယ်သစ်ရွာကနေ စစ်ကြောင်းဖြန့်ထွက်လာတဲ့ စစ်သားနဲ့ ပျူစောထီးတွေကို ဒီဇင်ဘာ ၂၉ ရက်မှာ ကြားဖြတ်တိုက်ခိုက်ခဲ့တယ်လို့ Freedom Fighter Guerrilla Force ဆီက သိရပါတယ်။

လယ်သစ်ရွာကနေ စစ်ကြောင်းဖြန့်ထွက်လာတဲ့ ခမရ ၁၅ က စစ်သားတွေနဲ့ လယ်သစ်ရွာက ပျူစောထီး အင်အား ၅၀ ခန့်ကို မနက် ၉ နာရီခွဲမှာ လယ်သစ်ရွာအရှေ့ဘက် မီတာ ၄၀၀ အကွာလောက်ကနေ ကြားဖြတ်ပစ်ခတ်ခဲ့တာဖြစ်ပြီး ပျူစောထီး ၂ ဦးသေပြီး၂ ဦး ဒဏ်ရာရသွားတယ်လို့ Freedom Fighter Guerrilla Force မိုင်းတာဝန်ခံက ပြောပါတယ်။

"ဒီတိုက်ခိုက်မှုမှာ ကျနော်တို့ကလည်း အင်အားအလုံးအရင်းနဲ့ပါ။ ပထမတော့ ပြောက်ကျားနည်းနဲ့ ကျနော်တို့က နေရာယူထားတယ်။ ဒီကောင်တွေ အင်အားအလုံးအရင်းနဲ့ တက်လာတယ်။ ကျနော်တို့က ဦးအောင်အရင်ဆုံးပစ်တဲ့အတွက် အထိနာသွားတယ်။ အပြန်အလှန်ပစ်ခတ်တာ မိနစ် ၃၀ ကြာတယ်။ မျက်မြင်ကတော့ ၅ ကောင်ထိတယ်၊ ၅ ကောင်ထိတာကို ၂ ကောင်ကတော့ သေတယ်၊ ၃ ကောင်ကတော့ ဒဏ်ရာတွေနဲ့ လယ်သစ်ရွာထဲကို ပြန်ခေါ်သွားတယ်။"လို့Freedom Fighter Guerrilla Force မိုင်းတာဝန်ခံက ဆိုပါတယ်။

တိုက်ပွဲဖြစ်နေချန်မှာ ခမရ ၁၅ ထဲကို လက်နက်ကြီးပစ်ကူပေးခိုင်းပြီး အဲ့ဒီစစ်ကြောင်းက လယ်သစ်ရွာထဲကို ပြန်လည်ဆုတ်ခွာသွားတယ်လို့ သူကဆက်ပြောပါတယ်။

ဒီတိုက်ခိုက်မှုကို Freedom Fighter Guerrilla Force ၊ LACR ၊ 8 Stars နဲ့ တော်လှန်ရေးမဟာမိတ် တို့က ပူးပေါင်းလုပ်ဆောင်ခဲ့တာဖြစ်ပါတယ်။

သတင်း - ဒိန်းဂျား၊ တည်းဖြတ် - HP

#မြေလတ်အသံ
#မန္တလေး #မြင်းခြံ #စစ်ကြောင်း #တိုက်ခိုက်

Myaelatt Athan Broadcasting Page ကို React, Comment , Share လုပ်ပေးခြင်းဖြင့် မြေလတ်အသံ ရေရှည်ရပ်တည်နိုင်ရေးအတွက် ဝိုင်းဝန်းကူညီနိုင်ပါတယ်။

30/12/2024

ကံမက စစ်ကောင်စီခန့် အုပ်ချုပ်ရေးမှူး ပစ်သတ်ခံရ

သရက်၊ ဒီဇင်ဘာ ၃၀၊ ၂၀၂၄။

မကွေးတိုင်း၊ သရက်ခရိုင်၊ ကံမမြို့နယ်၊ ညောင်ပင်ကွင်းကျေးရွာ အုပ်ချုပ်ရေးမှူးကို ရွာပြင်မှာပစ်ခတ်ရာ သေဆုံးခဲ့တယ်လို့ သရက်ခရိုင်တပ်ရင်း ၄ က ဒီဇင်ဘာလ ၃၀ ရက်မှာ သတင်းထုတ်ပြန်လာပါတယ်။

သေဆုံးသူဟာ ညောင်ပင်ကွင်းကျေးရွာအုပ်ချုပ်ရေးမှုး အသက် ၅၆ နှစ်အရွယ် ဦးစိန်ဝင်းမောင်ဖြစ်ပြီး သူ့ကို ဒီဇင်ဘာ ၂၇ ရက် ည ၇ နာရီ မိနစ် ၄၀ ခန့်မှာ ပစ်ခတ်ခဲ့တာလို့ဆိုပါတယ်။

"တချက်ပဲ ရင်ဘတ်ကိုပစ်ခတ်ခဲ့တယ်။ သူနေအိမ်မှာ သွားခေါ်ချိန်ကတော့ အသာတကြည်တော့ လိုက်လာတယ်။ အချိုသတ်ပြီး ခေါ်ထုတ်လာတာ။ ရွာပြင်ရောက်မှ ပစ်ခတ်ခဲ့တာ။"လို့ သရက်ခရိုင်တပ်ရင်း ၄ ပြန်ကြားရေးတာဝန်ခံ ကိုမြတ်က ပြောပါတယ်။

အုပ်ချုပ်ရေးမှူး ဦးစိန်ဝင်းမောင်က ရင်ဘတ်ကျည်ထိဒဏ်ရာနဲ့ ပစ်ခတ်တဲ့နေရာမှာတင်သေဆုံးခဲ့ပြီး အလောင်းကို ဒီဇင်ဘာ ၂၈ ရက်မနက်ပိုင်းမှာမှ ဒေသခံတွေက ကံမဆေးရုံကို ပို့ဆောင်ပေးခဲ့တယ်လို့ ဆိုပါတယ်။

အုပ်ချုပ်ရေးမှူးပစ်သတ်ခံရပြီးနောက် စစ်ကောင်စီတပ်သားတွေနဲ့ ရဲတွေက ညောင်ပင်ကွင်းရွာထိ လာရောက်စစ်ဆေးတာမျိုး မရှိဘူးလို့ ကိုမြတ်က ဆက်ပြောပါတယ်။

အုပ်ချုပ်ရေးမှူး ဦးစိန်ဝင်းမောင်ဟာ စစ်ကောင်စီတပ်သားတွေအလိုကျ စစ်မှုထမ်းဖို့ ပေါ်တာဆွဲရာတွေမှာ လိုက်လံကူညီပေးတာ၊ ကံမမြို့နယ်အတွင်း စစ်မှုထမ်းဖို့ လူမပေးနိုင်တဲ့အခြားကျေးရွာများကို သူ့ထံမှာ ငွေကျပ်သိန်း ၁၀၀ ပေးပြီး လူပြန်ဝယ်စေတာ၊ ရရှိလာတဲ့ ငွေကြေးတွေကို စစ်ကောင်စီအဖွဲ့ဝင်တွေနဲ့ အချိုးကျ ခွဲဝေယူတာ၊ ညောင်ပင်ကွင်းရွာမှာလည်း ၁ အိမ်ထောင် ၁ သိန်းကျပ်နှုန်းနဲ့ ၂ လ ၁ ကြိမ် ကောက်ခံတာတွေကြောင့် ခုလိုပစ်ခတ်ခဲ့တာလို့ ထုတ်ပြန်ချက်မှာဖော်ပြထားပါတယ်။

အဲဒီပစ်ခတ်မှုကို ပြည်သူ့ကာကွယ်ရေးတပ်မတော် အမှတ် ၁ စစ်ဒေသ၊ မကွေးတိုင်း သရက်ခရိုင်အမှတ် ၄ တပ်ရင်း၊ တပ်ခွဲ ၂ တပ်ဖွဲ့၀င်တွေက ပြုလုပ်ခဲ့တာလို့ သိရပါတယ်။

ဖေဖော်ဝါရီ ၁၅ ရက်ကလည်း ကံမမြို့နယ်၊ ကျောက်မဲရွာက ပျူစောထီးခေါင်းဆောင် မျိုးမြင့်အောင်နဲ့ ငမဲကျေးရွာအုပ်ချုပ်ရေးမှူး အေးဇော်တို့ကို တရက်တည်းမှာပဲ တော်လှန်ရေးအဖွဲ့တွေဘက်က ပစ်ခတ်ရှင်းလင်းခဲ့တယ်လို့ သိရပါတယ်။

သတင်း - ကျော်ကြီး၊ စာတည်း - လင်း

#မြေလတ်အသံ
#မကွေး #သရက် #ကံမ #အုပ်ချုပ်ရေးမှူး

Myaelatt Athan Broadcasting Page ကို React, Comment , Share လုပ်ပေးခြင်းဖြင့် မြေလတ်အသံ ရေရှည်ရပ်တည်နိုင်ရေးအတွက် ဝိုင်းဝန်းကူညီနိုင်ပါတယ်။

30/12/2024

သဲသောင်ပြင်မှာ တဲထိုးနေရတဲ့ ငါန်းဇွန်နယ်က စစ်ရှောင်တွေ အမိုးအကာနဲ့ စားနပ်ရိက္ခာလိုအပ်နေ (ရုပ်/သံ)

ငါန်းဇွန်၊ ဒီဇင်ဘာ ၃၀၊ ၂၀၂၄။

မန္တလေးတိုင်း၊ ငါန်းဇွန်မြို့နယ်ထဲက စစ်ဘေးရှောင် ၁၅၀ ကျော်ဟာ ဧရာဝတီမြစ်ဘေး သဲသောင်ခုံပေါ်မှာ ယာယီတဲထိုးကာ စစ်ရှောင်နေရတာ ၃ လနီးပါးရှိနေပါပြီ။

ပြီးခဲ့တဲ့ သြဂုတ်လ ပထမအပတ်မှာ မြင်းခြံမြို့နယ်၊ ဆုံရွာက စစ်ကောင်စီတပ်နဲ့ ပျူစောထီးတွေက စစ်ကြောင်းထိုးဝင်လာလို့ ငါန်းဇွန်မြို့နယ်ထဲက ရပ်ကွက်နဲ့ ရွာတွေက လူဦးရေ စုစုပေါင်း ၁,၇၀၀ ကျော်လောက် စစ်ဘေးရှောင်ခဲ့ရတာပါ။

စစ်ရှောင် ၁,၇၀၀ ကျော်လောက်ထဲမှာ အများစုက ရွှေပေါက်ပင်အောက်ကျွန်းလိုခေါ်တဲ့ ကျွန်းပေါ်မှာနေထိုင်နေကြပြီး ငါန်းမြာကြီးနဲ့ မိုးထောင်အုပ်စုထဲပါတဲ့ သဖန်းသာကျေးရွာက စစ်ရှောင် ၁၅၀ ကျော်လောက်ကတော့ ဧရာဝတီမြစ်ရဲ့သောင်ခုံပေါ်တွေမှာ ယာယီတဲထိုးနေထိုင်နေကြတာ ဖြစ်ပါတယ်။

စစ်ကြောင်းထိုးလာလို့ အဝတ်တတည်ကိုယ်တခုနဲ့ ထွက်ပြေးလာခဲ့ရတဲ့ စစ်ဘေးရှောင်တွေထဲက သဲသောင်ခုံပေါ် ယာယီတဲထိုးနေကြတဲ့ လူဦးရေ ၁၅၀ ကျော်မှာ စားနပ်ရိက္ခာအပြင် အမိုးအကာနဲ့ ဆေးဝါးတွေလည်း လိုအပ်နေကြပါတယ်။

စစ်ရှောင်ကာလ ၃လနီးပါးအတွင်းမှာ လူငယ်တွေကတော့ တောင်ယာလုပ်ငန်းအငှားလိုက်ပြီး မြစ်အတွင်းတံငါအလုပ် လုပ်ကိုင် စားသောက်နေခဲ့ကြတာလို့ ဆိုပါတယ်။

သဲသောင်ခုံပေါ်မှာ စစ်ရှောင်နေတဲ့ကာလအတွင်းမှာ အသက် ၇၀ နဲ့ ၉၀ ကြား သက်ကြီးပိုင်း ၁၂ ဦး အအေးမိပြီး သေဆုံးခဲ့ရဖူးတယ်လို့ ပြောပါတယ်။

စစ်ဘေးရှောင်နေရတဲ့ ၃ လနီးပါးအတွင်းမှာ ဆေးဝါးစောင့်ရှောက်မှု၊ စားနပ်ရိက္ခာနဲ့ ငွေကြေးထောက်ပံ့သူတွေ ၂ ကြိမ် လာရောက်ကူညီပေးဖူးတယ်လို့ သိရပါတယ်။

စစ်ရှောင်တွေက နေရပ်ပြန်ချင်နေကြပေမယ့် ရွာတွေကို ဖြတ်ပြန်ရမယ့် ငါန်းမြာကြီးတိုက်နယ်ဆေးရုံမှာ စစ်ကောင်စီက အထိုင်ချတပ်စွဲထားပြီး ကင်းပတ်တာတွေရှိလို့ မပြန်ရဲသူတွေရှိသလို ရွာနားပြန်ကပ်ရင် ပစ်ခတ်တာတွေလည်းရှိလို့ အခုအချိန်အထိ နေရပ်မပြန်နိုင်ကြသေးတာလို့ ဆိုပါတယ်။

သတင်း - အောင်ကောင်းလင်း၊ စာတည်း - ဈာန်မြင့်၊ တည်းဖြတ် - ငြိမ်းဇော်

#မြေလတ်အသံ
#ငါန်းဇွန် #ဧရာဝတီမြစ် #သဲသောင်ခုံ #စစ်ရှောင်

Myaelatt Athan Broadcasting Page ကို React, Comment , Share လုပ်ပေးခြင်းဖြင့် မြေလတ်အသံ ရေရှည်ရပ်တည်နိုင်ရေးအတွက် ဝိုင်းဝန်းကူညီနိုင်ပါတယ်။

29/12/2024

လက်ဖက်ရည်သောက်နေချိန် ပစ်ခတ်ခံရလို့ လေတပ်ဗိုလ်ကြီးနဲ့ ဒုအရာခံဗိုလ်သေဆုံး

တောင်သာ၊ ဒီဇင်ဘာ ၂၉၊ ၂၀၂၄။

မန္တလေးတိုင်း၊ တောင်သာမြို့ အနောက်တောင်ဘက်၊ ကျေးရွာတခုမှာရှိတဲ့ လက်ဖက်ရည်ဆိုင်မှာ လေတပ်ဗိုလ်ကြီးနဲ့ ဒုအရာခံဗိုလ်တို့ကိုပစ်ခတ်ရမှာ သေဆုံးခဲ့တယ်လို့ ပြည်သူ့လွတ်မြောက်ရေးတပ်မတော် PLA ရဲ့ အမှတ် ၈၁၅ တပ်ဖွဲ့ (အနောက်မြောက်စစ်ဒေသ)ကတဆင့် သိရပါတယ်။

ဒီဇင်ဘာ ၂၉ ရက် ဒီကနေ့မနက် ၇ နာရိီခွဲခန့်က ဝင်ရောက်ပစ်ခတ်ခဲ့တာဖြစ်ပြီး ပစ်ခတ်မှုအတွင်း မိတ္ထီလာလေတပ်က ဗိုလ်ကြီး ကြည်ဖေလင်းနဲ့ ဒုအရာခံဗိုလ်ပြည့်ဖြိုးအောင်တို့ သေဆုံးခဲ့တယ်လို့ ဆိုပါတယ်။

“အရှင်ဖမ်းဖို့ စီစဥ်တယ်၊ ဒါပေမယ့် ကျနော်တို့ဝင်တဲ့အချိန်မှာ သူတို့က ထွက်ပြေးသွားတာပေါ့နော်၊ ထွက်ပြေးတဲ့အတွက် ကျနော်တို့ကပစ်ခတ်ပြီးတော့ ရှင်းလင်းလိုက်ရတာ၊ အဲ့နေရာမှာတင်ပဲ သူတို့ ၂ ယောက်လုံးက ပွဲချင်းပြီးသေသွားတယ်။”လို့ အမှတ် ၈၁၅ တပ်ဖွဲ့(အနောက်မြောက်စစ်ဒေသ) တပ်ဖွဲ့ဝင် ကိုမြင့်နိုင်က ပြောပါတယ်။

ဒါ့အပြင် လေတပ်ဗိုလ်ကြီး ကိုင်ဆောင်တဲ့ MA 5 MK ၁ လက်၊ ကျည် ၂၉ တောင့်၊ ကျည်ဘောက် ၂ ခု၊ ဖုန်း ၂ လုံးနဲ့ ဆက်စပ်ပစ္စည်းတွေ သိမ်းနိုင်ခဲ့တယ်လို့ ဆိုပါတယ်။

အလောင်းတွေကိုတော့ မိတ္ထီလာလေတပ်က လာရောက်သယ်ဆောင်သွားတယ်လို့ သိရပါတယ်။

တောင်သာမြို့နယ်ဟာ မိတ္ထီလာလေတပ်နဲ့ မိုင် ၃၀ ကျော်ကွာဝေးပြီး ကြားမှာ မလှိုင်မြို့တမြို့သာ ခြားတာဖြစ်ပါတယ်။

ပစ်ခတ်မှုဖြစ်ပြီးနောက် စစ်ကောင်စီက စစ်ကြောင်းထိုးဖို့ပြင်ဆင်နေပြီး တောင်သာနဲ့ ကျောက်ပန်းတောင်းမြို့နယ်အစပ်က မြင်သာတောင်ရွာဘက်မှာလည်း အစစ်အဆေး တင်းကျပ်နေတယ်လို့ တပ်ဖွဲ့ဝင် ကိုမြင့်နိုင်က ပြောပါတယ်။

ပြီးခဲ့တဲ့ နိုဝင်ဘာ ၁၉ ရက်ကလည်း ပျူစောထီးအားကောင်းတဲ့ တလိုင်းရပ်(ရွာသစ်)ရွာက ကင်းပတ်ထွက်လာတဲ့ ပျူစောထီးတပ်ဖွဲ့ဝင်တွေကို အမှတ် ၈၁၅ တပ်ဖွဲ့(အနောက်မြောက်စစ်ဒေသ)က ပစ်ခတ်တိုက်ခိုက်ခဲ့တာကြောင့် ပျူစောထီးခေါင်းဆောင်အပါအဝင် ၂ ဦးသေဆုံးကာ သေနတ် ၂ လက် ရခဲ့သေးတယ်လို့ သိရပါတယ်။

သတင်း - ချယ်ရီ၊ စာတည်း - လင်း

#မြေလတ်အသံ
#မန္တလေး #တောင်သာ #လေတပ်ဗိုလ်ကြီး #ဒုအရာခံဗိုလ် #သေဆုံး

Myaelatt Athan Broadcasting Page ကို React, Comment , Share လုပ်ပေးခြင်းဖြင့် မြေလတ်အသံ ရေရှည်ရပ်တည်နိုင်ရေးအတွက် ဝိုင်းဝန်းကူညီနိုင်ပါတယ်။

29/12/2024

ကင်းပတ်ထွက်လာတဲ့ စစ်ကောင်စီတပ်သားတွေ ပစ်ခတ်ခံရပြီး ၅ ဦးဒဏ်ရာရ (ရုပ်/သံ)

ရေစကြို၊ ဒီဇင်ဘာ ၂၉၊ ၂၀၂၄။

မကွေးတိုင်း၊ ရေစကြိုမြို့နယ် မြို့မရဲစခန်းကနေ ကင်းပတ်ဖို့ထွက်လာတဲ့ စစ်ကောင်စီတပ်သားတွေကို ဒီဇင်ဘာ ၂၈ ရက် မနက်ပိုင်းမှာ အသင့်စောင့်ကြိုတိုက်ခိုက်ခဲ့တယ်လို့ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်ဆီက သိရပါတယ်။

ရေစကြိုမြို့မရဲစခန်းကနေ ကင်းပတ်ဖို့ထွက်လာတဲ့ စစ်ကောင်စီတပ်သား ၁၅ ဦးခန့်ကို မနက် ၉ နာရီလောက်မှာ ရေစကြိုမြို့အထွက် ဘက်စုံခြံအနီးကနေ အသင့်စောင့်ဆိုင်းပစ်ခတ်ခဲ့တာဖြစ်ပြီး စစ်ကောင်စီတပ်သား ၅ ဦး သေနိုင်တဲ့ဒဏ်ရာတွေရခဲ့တယ်လို့ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် သတင်းနှင့်ပြန်ကြားရေးတာဝန်ခံက ပြောပါတယ်။

"ဘက်စုံခြံအကွေ့နားလောက်မှာ အသင့်စောင့်ဆိုင်းပြီးတော့ တိုက်ခိုက်ခဲ့တာ။ နှစ်ဖက်အပြန်အလှန် ၁၅ မိနစ်လောက် တိုက်ခိုက်ခဲ့တာ။ **တွေက ကတ္တရာလမ်းပေါ်က ခြေလျင်လျှောက်သွားတာ။ ၅ ဦးကတော့ အပြင်းအထန် ဒဏ်ရာရတယ်၊ သေနိုင်လောက်တဲ့ ဒဏ်ရာတွေအထိရသွားတာ။" လို့ ရေစကြို ပကဖ တာဝန်ခံက ဆိုပါတယ်။

ဒါ့အပြင် စစ်ကောင်စီတပ်သားတွေရဲ့ လက်နက်တွေကို ကောက်ယူဖို့ကြိုးစားခဲ့ပေမယ့် စစ်ကောင်စီနောက်ကျန်တပ်သားတွေနဲ့ ရေစကြို ရဲစခန်းကနေပစ်ကူပေးတာကြောင့် လက်နက်မကောက်နိုင်ခဲ့ဘဲ ပြန်လည်ဆုတ်ခွာခဲ့ရတယ်လို့ သူကဆက်ပြောပါတယ်။

ပစ်ခတ်တိုက်ခိုက်ခံရပြီးနောက် စစ်ကောင်စီတပ်သားတွေဟာ ရေစကြိုမြို့ထဲက မြို့မရဲစခန်းကို ပြန်သွားတယ်လို့ သိရပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်နဲ့ ပခုက္ကူခရိုင်တပ်ရင်းအမှတ် ၉ တို့က ပူးပေါင်းလုပ်ဆောင်ခဲ့တာဖြစ်ပါတယ်။

သတင်း - ဒိန်းဂျား၊ တည်းဖြတ် - HP

#မြေလတ်အသံ
#မကွေး #ရေစကြို #မြို့နယ်ရဲစခန်း #ပစ်ခတ်

Myaelatt Athan Broadcasting Page ကို React, Comment , Share လုပ်ပေးခြင်းဖြင့် မြေလတ်အသံ ရေရှည်ရပ်တည်နိုင်ရေးအတွက် ဝိုင်းဝန်းကူညီနိုင်ပါတယ်။