05/11/2024
ကရင်နီကို ကယားဟု မှားယွင်းပြောဆိုမိခဲ့သဖြင့် KNPPကို NUGဝန်ကြီး ပြန်လည်တောင်းပန်
5 Nov 2024 By FM
ကရင်နီအမျိုးသားတိုးတက်ရေးပါတီ(KNPP)ကို ကယားအမျိုးသားတိုးတက်ရေးပါတီဟု မှားယွင်းပြောဆိုခဲ့မှုအပေါ် NUG၊နိုင်ငံခြားရေးဝန်ကြီးဒေါ်ဇင်မာအောင်က တောင်းပန်လိုက်သည်။
ယနေ့(နိုဝင်ဘာငါးရက်) မွန်းလွဲ ၃နာရီခွဲတွင် ကျင်းပသည့် အမျိုးသားညီညွတ်ရေးအစိုးရ (NUG) ၊ကရင်အမျိုးသားအစည်းအရုံး(KNU) ၊ကရင်နီအမျိုးသားတိုးတက်ရေးပါတီ(KNPP)နှင့် ချင်းအမျိုးသားတပ်ဦး(CNF) တို့၏ ပူးတွဲသတင်းစာရှင်းလင်းပွဲတွင် ဒေါ်ဇင်မာအောင်က မှားယွင်းပြောဆိုခဲ့ခြင်းဖြစ်သည်။
"ကျမ opening မှာ ကျွန်မတို့ဒီ ကရင်နီအမျိုးသားတိုးတက်ရေးပါတီပေါ့။ KNPP ကို ကျမက ကယားဆိုပြီးတော့ ဒီလိုစာလုံးအမှားအယွင်းနဲ့ပြောဆိုခဲ့တဲ့အတွက် အမှားပြင်ဆင်ချက် လည်းလုပ်ပါတယ်။တောင်းလည်းတောင်းပန်ပါတယ်"ဟု ဒေါ်ဇင်မာအောင်ကပြောသည်။
စစ်ကောင်စီတပ်က မတရားပြောင်းလဲခေါ်ဆို အသုံးပြုခဲ့သည့် “ကယားပြည်နယ်” ဟူသော အသုံးအနှုန်းကို လက်မခံ နိုင်ကြောင်းနှင့် သတင်းမီဒီယာများ၊ သက်ဆိုင်ရာ အင်အားစုများ အနေဖြင့် “ကရင်နီပြည်နယ်”ဟု ပြောင်းလဲ ခေါ်ဆိုရန် ကရင်နီပြည်နယ်အတိုင်ပင်ခံကောင်စီ (Karenni State Consultative Council-KSCC) က ၂၀၂၃ ခုနှစ်၊နိုဝင်ဘာလ၂၃ရက်တွင် ကြေညာချက် ထုတ်ပြန်ခဲ့ပြီးဖြစ်သည်။
ကရင်နီပြည်နယ်ဟူသော အခေါ်အဝေါ်သည် ကရင်နီအမျိုးသားများအတွက် လွတ်လပ်သည့် သမိုင်း အထောက်အထား ဖြစ်သောကြောင့် စစ်အာဏာရှင်ကို လက်မခံသည့် ကရင်နီအမျိုးသားများအနေဖြင့် ခုခံတော် လှန်ရေးတစ်ရပ် ဆင်နွှဲအသုံးပြုနိုင်ရန် ကရင်နီဆိုသည့် ဝေါဟာရ အသုံးအနှုန်းအား ယနေ့ထိ ကျင့်သုံးခဲ့ကြောင်းလည်း ထုတ်ပြန်ထားသည်။
၁၉၅၁ ခုနှစ် ပါလီမန်တွင် ယခင်ကရင်နီပြည်နယ်အမည်မှ ကယားပြည်နယ်အဖြစ် ပြောင်းလဲသတ်မှတ်ခဲ့ပြီး ၁၉၅၂ခုနှစ်၊ ဇန်နဝါရီ ၁၅ရက်တွင် ကယားပြည်နယ်နေ့ စတင်ဖြစ်ပေါ်လာခဲ့ကြောင်း ကရင်နီပြည်နယ်အတိုင်ပင်ခံကောင်စီ (KSCC) ထံက သိရသည်။
FM
