08/12/2024
من شو خايف ؟
على شو متوتر و خايف ! انت متوقع يصير معك شي أكتر من اللي صار ؟
١٥ سنة و انت عايش بالعتم ، عايش مقضى حياتك على دور الخبز و دور البينزين و ناطر جرة الغاز .
١٥ سنة و انت شايف ولادك عم يتكتكو بالبرد قدامك و ما قادر تعمل شي ، لا و إذا عملت وحكيت رح تشوف حالك بفرع أمن عم تعتذر و تكتب تعهد أنك بحياتك ماتكتب شي و إلا !!!!
و لما تطورت سقفها كان تنطر الرسالة بدل ما توقف عالدور لحتى تستلم جرة غاز . هاد اسمو تطور طبعا
يعني باختصار قضيت نص حياتك وانت مجرد رقم عايش لتاكل و تشرب فقط . بدون أحلام بدون أمنيات . لأنك بتعرف حتى الحلم صعب .
جرب غيّر ، جدّد ، جرب شي جديد . مارح تخسر شي بالحياة .
موبايلك جاييك هدية بدك تدفع حق جمركة اللي هو حق الموبايل نفسو ؟ ليش ؟ و لمين هالمصاري عم تروح ؟ ما سألت حالك لمين رايحة هالمصاري و مين عم يكدسها !
هلا اجا الوقت لحتى تحرر عقلك . تحرر فكرك . اللي دارس و تعبان بحياتو ياخد مكانو الطبيعي . لما شي يكون غلط تحكيه و انت مانك خايف .
اجا وقت اللي معو سادس مايمسك صفحات و يبهدل العالم و يذلها لانو بيعرف شي مدير فرع امن
ما تكون عبد لشخص ، لأن الشخص مهما قلك انا معك رح يتركك بالنهاية و يروح . رح يتخلى عنك فورا لأنك بالاساس كنت ورقة عم تحترق منشانو . و لما احترقت عالأخير باعك .
هالمنشور مو لأن عم يتغير الحكم . واللي متابع صفحتنا بيعرف انو طول عمرنا (منتمسخر) عكل شي بيصير . و رح نبقى هيك مع الكل .
الغلط رح نكتب الغلط بعينو و على شكل أكبر كمان لأن غالبا رح يكون في مساحة من الحرية أنو نشير للخطأ بالصورة و الفيديو كمان .
سوريا طول عمرها وحدة ، بكل طوائفها و مكوناتها عايشين مع بعض . و رح تضل .
اي نعم رح تضل ..
لا تلتفتو للصفحات المدفوعة اللي بتكتب كل شي بيبعتولها ياه لحتى يزرعو بعقولكم عبارات متل (شوفو فطايسكم من قبل الطيران الحربي - شوفو هالخبر الحلو صارو كباب الشباب) و غيرها من هالعبارات اللي كلها اجرام و دم و بتغذيلك عقلك عالكراهية و الحقد و لكل الاعمار ، كوّنوا شخصيتكم الخاصة .
مافي شي اسمو عالموت معك . مافي شي اسمو يا أنا يا هو .
في شي إسمو أنا و هو .
حان وقت الأمن و الأمان .
حماكي الله سوريا .
