06/12/2024
Cimrigu waa cibra-qaadasho iyo camal hagaajin. Noloshu waa maalmo cammiran iyo kuwa cakiran. Dareenno culus, dabaqad kala duwan iyo dookh mideysan. Guur, geeri, geeddi, gaabis, gacal dhashiyo gogol carfoon. Hadba gooni baar dheh.
06/12/1993 maanta oo kale ayaan kusoo biiray dunidaan middabada badan. Magaceygu waa Farxiya, waxaana ii haddiyeeyay curadkeenna. Kool-koolinta iyo kalsamaanta hooyadeey Kaafisana waxa ay iigu yeertaa Foos-ladan. Farsamada nolosha iyo fallaaraha waayaha ayaa ii bixiyay ama aan ula baxay dheh Lama-filaan, si kale Lama-filaantii jacaylka laasimatay. Kuwa igu faana, u fiicanahay ee qalbigooda ii firaashayna waxey iigu yeeraan, Filsan-kaaba, Fahma-nuura, Farax-deeqa, Fariida-rowda iyo Faaduma-jamaad. Qaar badan oo aan u qalbi hadlay baa igu quruxsada, Qalbi-nuura, Qoys-kaaba, Qiil-daya, Qamar-hooda, Qareen-jacayl iyo Dareen-quuta.
Maahi mishaari maagan xisaabta milkiyaddeeda, se waxaan ku fooganahay badbaadada, barbaarinta, baridda, barwaaqo sheegga jacaylka iyo booga-dhayidda lammaanaha. Waxaan ahay dirane iskeed isku dirtay oon ka daalin daruusta jacaylka iyo dareennada qarsoon. Waxaan ahay qareenka qoysaska dulman iyo qalbiyada dillan. Xil maaha, xayeysiin maaha, xus iyo xasuusin u qaado. Muqdishaan ku dhashay, ku waxbartay, ku xoogeystay, ku xuubsiibtay kuna barbaaray.
Caafimaadka, saxaafadda, suugaanta iyo la socodka bulshada ayaan badi ku bixiyay aqoon-baaristayda, walina aan ka barmoosin.
Waxaan ahay xammaali, qalinku xoogle, xirfadle, xiiseeya nolosha xorta ah iyo xornimada dareenka. Waa necbahay xaqiraadda, xurmo-darrada, ku xad-gudubka xaq aan aanan laheyn iyo xurgufta.
Maahi ceeb ka saliim cuddoon, se cidna ma maago. Caqli iyo curis Caadil baa igu galladay. Ma dheeri, mana gaabni, ma dhuubni, mana dhumminin dheehayga. Waxaa la igu tiriyaa dhex-dhexaad.
Dhulka meesha nabaddda leh oo ay dhirtu ku badan tahay baan ka dhugtaa kuna dhaataa.
Saaxiibbada kuwa san iyo kuwa soo dhaw baan kala socdaa. Barriga, meel baadleh oo buura-dhaadheer, Webi baal maro iyo badda cirifyadeydaa iila cuddoon. Cunnada waxaan xiiseeyaa waxkasta oo waxtar u leh jirkeyga, walow aan dookh aan door bido; Malawaxa, Malaayga, Makaroonida, muufada jilicsan iyo mac-macaanka.
Quud ma daayee, Qudaarta mooska iyo cambahaan ka qaatay oo iyagaa iila qumman. Diin jacaylka, dalxiiska, qalinka dihan, dawada ruuxda, dareen wadaagga iyo doodaha aan muranka laheyn ayaan dacalka haystaa.
Ubaxa, udugga, oon-tirka ereyada macaan iyo ixsaan falku waa ii awood-siin iyo itaal aan ku faani karo. Aamin baan ahay oo waligeey ammaano ma lummin, waxse iintaydu tahay ilowshahoo badan.
Aabi ma aqaan, mana la iga ashtakoodo, waxaanse erey kulul iraahdaa, qofka aan i ammaan galinayn.
Ehelkeyga, asxaabtayda iyo inta ila ayniga ahba waxaan ula dhaqmaa sida aan jeclaan lahaa in ay ii tixgaliyaan, ii taageeraan oo ay ii taban taabaan.
Hillaac saaxiibteed, Hodan hooyadeed, Hiilliya jacayl iyo hooygii naxariista inaan ahay baa uumiyuhu isku raacay.
Xil aan xaasnimo aheyn uma xiiso qabin ilaa xad. Xaakim-baase bixiyee, waxa uu xaq-wadaag iiga yeelay xurmadle Xasan-deeq iyo xaajigii wacnaanta badnaa.
Ubad baa laynagu irsaaqay ildoogsi leh, Hodan oo halsane ku socota iyo Hibooyinkale oo aan rejaynayo. Kuwa san oo saqiran baan Eebbe wayne ugu sacba hoorsaneynaa heliddooda.🤲
Sanado xulan oo aan ku xamdiyay bay ii ahaayeen. Safar cusub oo ganacsiyeed, aqoon saqiran oo heer sare ah, iyo guulo aan saadaalin jiray baan sanadkaan hiigsaday. Alle ayaa markale iyo marar badan ku mahadsan sida uu iiga yeelay milkiile wanaagsan oo nolosheeda maamulata, marwo daacad ah oo ninkeeda maqasha, maamo hagaagsan oo maxabbo badan iyo gabar mu'minad ah, oo aakhiradeeda mooganeyn.
Eebbe cimriga, caafimaadka, cibaadada, camalka, cududda, cirdiga, caqliga, cindiga iyo caashaqaba ha ii barakeeyo, hana igu sugo; iimaan kaamila, insaannimo dhab ah, intifaac adduun iyo aakhiraba leh. Eebbe xilaha wanaagsan, caruur xariir ah iyo nolosha xasilan ha ii bidhaamiyo hana ii barakeeyo. Saadir ha iga yeelo marwo san, walaal suubban, ubad sariigta iyo hooyo soocan. Alle duni hagaagsan, dal nabad ah, dad is jecel iyo dareen asturan dushooda ha innagu nageeyo. Dhib iyo dheefba dhaqanka wanaagsan, dhowrsinada iyo dhaxalkaaga haka tagin oo yuusan ku dhallan rogin dhallanteedka waayaha.
Sanado badan oo samaantooda leh, Eebbe ha igu simo oo hanagu simo.❣🎂🌹 Dhalasho wacan nafteydaay gacalo.💐
