08/05/2021
Madaxweyne ku xigeenka dowlad goboleedka Hirshabeelle Yuusuf Axmed Hagar, maamulka gobolka Hiiraan, kan degmada Baladweyne iyo saraakiil ka tirsan ciidamada qalabka sida ayaa ciidamo geeyay deegannada Hara cadeey iyo Baladul Nuur oo qiyaastii 6 KM dhanka galbeed ka xiga magaalada Baladweyne halkaasoo maalmihii la soo dhaafay ay ku dagaalameen labada maleeshiyo beeleed.
Ciidamada qalabka sida ayaa la dajiyay meel u dhaxeysa goobaha ay ku dagaalameen labada maleeshiyo beeled iyadoo waxgaradka labada dhinac lagu amray inay kala qaada maleeshiyaadkan.
Madaxweyne ku xigeenka Hirshabeelle Yuusuf Axmed Hagar ayaa sheegay in deegannada dirirtu ka dhacday la keenay ciidamada qalabka sida islamarkana ay sugi doonaan amaanka.
“ Halkan maanta waxaan u nimid dagaalkii labada maalmood halkan ka socday, xabad joojin ayaa shalay lagu heshiiyay waana fushay, maantana waxaan keenay ciidamada qalabka sida qeybahooda kala duwan, waxaan rabnaa inay ilaaliyaan shacabka, maleeshiyaadkii labada dhinac min shan KM ayaa laga fogeeyay deegaanka, wixii soo kordha waxaa wadaagaya saraakiisha ciidamada iyo odayaasha labada dhinac, labada beelood odayaashooda waa naga ogoladeen inay nala qaatan nabadda, odayaasha kale ee reer Hiiraan ee juhdiga galinaya waa u mahad celineyna.”ayuu yiri madaxweyne ku xigeenka Hirshabeelle Yuusuf Axmed Hagar.
Waxgaradka labada beelood iyo odayaasha dhaqanka gobolka Hiiraan ayaa isku afgartay shalay in xabada la joojiyo, in ciidamada la kala qaado, in gudi labada dhinac ah la saaro si ay uga shaqeeyaan nabadda iyo in cidii jabisa xabad joojinta lagu ganaaxo lacag dhan saddex kun oo dollar.
