22/11/2023
Sidee BULSHO loo BURBURIYAA?!
Qaabka loo burburinayo bay ku xiratahay, haddii la rabo in bulsho meel degan lakala firdhiyo lana kala geeyo, taasi waa fududahay waxaa laga adeejinaya ciidamo ku askaraysan dabbaabaad iyo hubka nuucyadiisa kala geddisan. Waxaana lagu go'doominayaa halka ay deganyihiin jeer ay isaga hayaamaan iyagoo daciif ah kalana firdhisan.
Haddii la doonayo in bulshada caafimaad ahaan loo baabi'iyo, cisbitaalada ayaa laga xirayaa , dhaqaatiirta cilmiga leh baa laga ilaalinayaa, cudurrada faafa ayaa loo soo dusinayaa. Halka cudurrada yaryarna qarash aad u sarreeya lagu dawaynayo.
Kolka la doonayo in bushada dhaqaale ahaan loo liido, waxaa laysku dayayaa naaqusinta waxsoo-saarka dadkaas, sidoo kale waxaa loo soo dhoofinaya wax kasta oo ay ka maarmi kareen ilaa laga dhigo kuwo aanan ka maarmayn, dalaga iyo waxsoo-saarka xiliga ay dadka muruq maalatada ahi guranayaa ayaa la keenaya raashin ka jaban oo ka raqiisisan midka ay soo saareen, amaba bilaash ah si dadaalkooda hal bacaad lagu lisay looga dhigo.
Marka la rabo in ummada xaga aqoonta laga burburiyo; waxaa la liidaya kan waxbarta ama ka waxbaraya(Macalinka), goobaha waxbarashada waxay noqonayaan kuwa ugu hooseeya nadaafad iyo agab ahaanba, waxaa wakhtiga ugu badan lagu bixinaya ardayda in la baro wax aanan dan ugu jirin, sida; taariikhaha quruumo kale, erayo cilmiyeedyo aanan sharaxaad loogu daraynin iyo in lagu dullaysto ardaynimada, si uu ugu hammiyo in uu mar un xabsigaas hooseenta ah ka baxo.
Haddaba kawaran haddii la doonayo in bulsho gabi ahaanba la burburiyo maxaa la samaynayaa?
Tan baa ugu fudud; dhaqankeedii baa lagu sallidayaa, durrida diinta ayaa caado u noqonaysa , culumada iyo waxgaradka bulshada oo noqonaya kuwa hadalkoodu ugu saameynta yaryahay, qaaqlaha iyo warxuma-taashiilahana wuxuu noqonaya ka ugu hadalka saameynta badan looguna dhagaysiga iyo raacista badanyahay, aqoonyahankii oo ka gambanaya in aqoontiisa lagu jaa'ifeeyo, halka kan jaahilka ahina uu ku dhiiranayo in uu bulshada hor yimaado si uu caan u noqdo.
Kuwo talada u haya ayaa looga arriminaya dhulal kale, waxaana ilaalinaya dadkale, waxaa laga biilaya lacag ummado kale laga soo uruuriyay, iyaga dhexdoodana kursiga ayay ku dirirsanyihiin, midka banaanka jooga waxaa uu ka shaqaynaya sida kan xilka haayaahi u fashilmi lahaa, ka xilka hayaana waxaa uu ku fakaraya sida uu meesha usii joogi lahaa ugana takhallusi lahaa wax walba oo ka horyimaada.
Ganacsatada iyo kuwa baayac-mushtarka ku jira ayaa intooda badan soo dhoofinaya dawooyin dhacay, cunno dhacday, qalab iyo hu' aanan la dheefsan karin, sidoo kalena ku tartamaya dhaca iyo wax isbada-marinta si uu jeebkoodu ubuuxsamo.
Fududaysiga fuxshiga iyo cadaalad-darrada ayaana lagu baratamayaa, waxaa kaloo soo muuqanaya faquuq bulshada dhexdeeda ah, midba midka kale ayuu ku far-fiiqaya in uu ka hooseeyo, waxaa caado noqonaysa dilka iyo boobka hantida dulmanayaasha. Ka daalimka ahna waxaa lagu sharfayaa gabood-fallada uu gaystay, abaalmarinta geesimadana wuu ku hantiyayaa! Ummad kala ququban oo midiba midka kale ku taaganyahay oo is wada luggoynaysa ayaa halkaasi ka soo baxaysa
✍ Hassankafi Ashkir, 21-Novomber-2023.
