Ruushka iyo Mareykanka ayaa Arbacadii isweydaarsaday maxaabiis inkasta oo ay u dhaxeyso xiisad ka dhalatay dagaalka Moscow ay ku qaaday Ukraine, Moscow ayaa Washington ku wareejisay askari horey uga tirsanaa ciidamada Mariiniska Mareykanka, ayada oo ku beddelatay duuliye Mareykanka loogu xiray inuu soo geliyey daroogo.
Trevor Reed, oo ah 30 jir kasoo jeeda gobolka Texas oo lagu xiray Ruushka 2020, ayaa lagu beddeshay Konstantin Yaroshenko oo ah 53 jir Mareykanka ku qaadanayey 20 sano oo xabsi ah oo lagu xukumay 2011.
Afhayeen u hadashay Wasaaradda Arrimaha dibedda Ruushka Maria Zakharova ayaa sheegtay in maxaabiis isweydaarsiga ay dhacday Arbacadii kadib “hanaan wada-xaajood oo muddo socday.” Joey Reed oo ah Aabaha Trevor ayaa CNN u shegay in maxaabiista la isku weydaarsaday dalka Turkiga.
Madaxweynaha Mareykanka Joe Biden ayaa bayaan uu soo saaray ku sheegay in is-dhaafsiga uu u baahnaa “go’aano adag oo aanu si fudud u qaadan.” “Si nabad u soo laabashadiisa waxa ay caddeyn u tahay ahmiyadda uu maamulkeyga siinayo inuu dalkooda kusoo celiyo muwaadiniinta Mareykanka ee sida khladan loogu xabisay dibedda,” ayuu yiri Madaxweyne Biden.
Xoghayaha arrimaha dibedda Mareykanka Antony Blinken ayaa sidoo kale ammaanay maxaabiis is-dhaafsiga, “Waxa aan ku faraxsanahay inaan ku dhowaaqo in lasii daayey muwaadinka Mareykanka ah ee Trevor Reed oo si khaldan loogu xiray Ruushka,” ayuu ku yiri bayaan uu soo saaray.
Reed ayaa maxkamad ku taalla Ruushka waxay ku xukuntay sagaal sano oo xabsi ah bishii July 2020, kadib markii lagu eedeeyey inuu weeraray askari boolis ah isaga oo cabsan. Reed ayaa beeniyey eedeymaha loo jeediyey, wuxuuna sheegay inuusan waxba ka xasuusan dhacdadaas.
Isha: VOA/Mustaqbal
Xili Roobaadkii Somaliland
Daadad Oo Soo Maray Buundada Imaaraatka Carabta Oo Hoos Tagta Biriijka Somaliland.
Imaaraadka Carabta ayaa dhisay Biriijkan adag, kaas oo badbaadin doona dad badan, wax weyna ka tari doona dib u soo noolaynta ganacsigii iyo is-dhaafsiga ganacsi ee Somaliland.
Biriijka Imaaraatka Carabta ee deegaanka Helia oo uu xadhiga ka jaray Madaxweynaha Jamhuuriyadda Somaliland, Mudane Muuse Biixi Cabdi oo uu weheliyo Safiirka dawladda Imaaraadka Carabta u fadhiya Jamhuuriyadda Somaliland, Mudane Abdullah Al-Naqbi, ayaa noqonaysa biriijkii ugu horreeyey ee ay dawladda Imaaraadku dhisto. iyadoo laga duulayo mashruuca Berbera Corridor oo heer gabo-gabo ah maraya, isagoo fulinaya ballan-qaadyadii uu ku taageerayey mashaariicda horumarinta ee Somaliland.
Tiro kale oo Biriijyo ah ayaa sidoo kale wakhtigan la dhisayaa, waxaana Biriijkani uu adkaysi u noqday Roobabka Dabaylaha wata, waxaana Biriijkan uu Imaaraadku ka dhisay Deegaanka Xaliah ee Waddada isku xidha Dekedda Berbera iyo Caasimadda. Hargeysa.
Imaaraadku waxa uu Somaliland ka fuliyey mashaariic badan oo horumarineed oo dhinac walba ah, sida furitaanka warshad koronto oo cadceedda ku shaqaynaysa oo laga hirgeliyey magaalada Berbera, xarumo caafimaad oo dhawr ah oo ay ka hirgeliyeen Berbera iyo Burco iyo qalabayn ay ku caawiyeen xarunta Kelyaha ee caasimadda Hargeysa, ka sokow Mashruuca balaadhinta dekeda Berbera oo la soo gebagebeeyey wejigiisii koowaad iyo mashruuca madaarka Berbera oo lagu qalabeeyey noocii ugu dambeeyey ee caalamiga ah iyo qaar ka mid ah shaqaalaha Taawarrada laga hago Madaarku, ayaa hadda dib u habayn lagu samaynayo machadyada Imaaraatka. Mashruuca Waddada Berbera Corridor ee isku xidhi doonta Dekedda Berbera iyo magaalada Galle oo ku taalla xuduudka Itoobiya, kaas oo Somaliland ka dhigi doona marinka ganacsiga ee Bariga Afrika.
Iyadoo Ruushku uu sii wado duqeymaha ay ku hayaan magaalada labaad ee ugu weyn Ukraine ee Kharkiv, isla markaana ay go’doomiyeen labo dekedood oo istiraatiiji ah ayaa Qaramada Midoobay waxa ay khamiista maanta ah sheegtay in inka badan 1 milyan oo qof ay ka qaxeen Ukraine kadib duullaankii Ruushka.
Tirada guud ee hay’adda qaxootiga ee Qaramada Midoobay oo ay sii deysay wakaaladda wararka ee Associated Press Arbacadii ayaa tilmaameysa in inka badan 2% dadka Ukraine lagu khasbay inay dalka ka baxaan wax ka yar toddobaad.
Qaramada Midoobay ayaa barakaca Ukraine ku tilmaantay qaxootigii ugu dhaqsaha badnaa qarniga. Daadgureyn xowliga ah ayaa ka socota magaalada Kharkiv, halkaas oo dadka deggan ay quus ka taagan yihiin inay ka baxsadaan madaafiicda kusoo dhacaysa iyo duqeymaha buux dhaafiyay saldhigga tareenada ee magaalada.
Khudbad muuqaal ah oo laga duubay, madaxweynaha Ukraine Volodymyr Zelenskyy ayaa wuxuu ugu baaqay dadka reer Ukraine inay sii wadaan iska caabbinta. Wuxuu wacad ku maray in kuwa soo duulay aysan heli doonin “hal daqiiqo oo aamusanaan ah” wuxuuna ku tilmaamay askarta Ruushka inay yihiin “carruur jahawareersan oo lasoo adeegsaday.”
Dagaalka u dhaxeeyay Ukraine iyo Ruushka ayaa galay todobaad kaas oo aan wali xal laga gaarin, Ruushka ayaa guda u soo galay Magaalooyinka Ukraine halkaas uu ka wado duqeymo, waddamada qaar ayaa cunaqabteyn dhanka dhaqaalaha ku soo rogay.
VOA & Mustaqbal
