Mohamed Amiin

14/03/2023

Dhalinyarada somalidu ma dareemayaan muhiimada ay leedahay ku xidhnaanta bulshadu (social networking)? Ma yaqaanan shimbirka ay la duulayaan xirfada uu leeyahay iyo waxa uu ku kordhin karo? Marka ay tagaan goobaha shirarka aqoon korodhsiga la isugu yimaado ma isku dayaan inay abuurtaan saxiib ama saxiibad ku saacida xirfada iyo hanaanka nolosha oo hadhaw ka saacida inay u noqdaan tixraax marka ay shaqo dalbanayaan (Reference) ama ku soo xidhaan goobaha lagu kala faa’idaysto.

Samayshasada xidhiidhka togani waxa uu muhiim u yahay koriinka iyo hayaanka qofka. Inaad ku xidhnaato dadka kala duwan, kala dhaqanka, kala luuqada ah, kala aqoonta waxaad ka dheefeysaa aqoon iyo waayo aragnimo, sidoo kale waxaad ka helaysaa niyad dhis iyo yididiilo ku dayasho qofka dedaalka sameeyey ah.

Inaad samaysato xidhiidh togan waxay ku fureysaa albaabo badan iyo fursado badan. Haddaba dhalinyarada waxaan kula dardaaramayaa inaanay mooganaan muhiimada ”networking”. Waa inay sameeyaan talooyinkan:

1-Ka qaybgala xafladaha ama bandhigyada aqooneed iyo ganacsi ee muhiimka ah; la hadal ka soo qaybgalaayasha, isku sheeg oo ka warbixi naftaada sidoo kale weydiiso ilaha lagala xidhiidho haddii aad ku qanacday qofka khibradiisa.

2- Ku xidhnow mareegaha online iyo madalaha la xidhiidha ee ku xiiso gelinaya. Ka qaybqaado doodaha oo taladaada ka dhiibo. FG luuqadaha isku day Inaad si fiican u barato.

3- Baraha bulshada u isticmaal si togan adiga oo wakhtigaa madhxinaya, samayso Linkedin, Twitter iyo adeegyada kale oo isku day Inaad kula saxiibto dadka kula xirfada ah, lana wadaagto xiisahaga lana samaysato xidhiidh wanaagsan oo akhlaaq iyo aqoon ku dhisan.

4- Ka qayb qaado barnaamijyada iska wax u qabsada ah iyo kuwa la midka ah, samee tabaruc wakhtigaaga waayo waa fursad weyn oo aad kula kulmi karto dad ay xirfad iyo xiiso idin kulmayaan wax badana kala faa’idaan.

5- shirarka aad ka qayb gasho ku samee dib u qiimeyn iyo ka daba tag. Dadkii aad ku soo baratay la xidhiidh oo abuur wada sheekeyso iyo xidhiidh joogto ah. U dir fariimo togan, wareyso oo talo weydii lana wadaag fikirkaaga

Xusuusnow in xidhiidh la samaynta bulshadu ay tahay mid aad ku dhisayso kuna abuureyso xidhiidh cusub. Markaa diirada saar Inaad dhistu xidhiidh joogto ah oo midho dhal ah kuna horseeda koriin maskaxeed iyo mid xirfadeed

Ugu dambayn dhalinyarada waxaan kula dardaaramayaa inay ilaaliyaan akhlaaqdooda kordhiyaan xidhiidhadooda, kobciyaana aqoontooda.

Mohamed Shueb

04/09/2022

"IS XASUUSINTA WANAAGA"
___________________________________

Saddex arimood ku dedadaal in aad samayso maalin kasta:

(1)
Walaalkayow/walaashayey yaan cadceedu ku soo bixin, kuuna dhicin adiga oo aan Allah swt u Sujuudin/Tukan Maalintaas, adiga oo aan fulin faralka Allah iyo saladaha oo aanay kugu dhaafin cudur daar ay diintu banaysay.

(2)
Walaal yaan cadceedu kuu soo bixin, kuuna dhicin adiga oo aan ugu yaraan hal mar kala furin oo aan akhriyin Kitaabka Allah swt.
Ugu yaraan akhri (5) aayadood oo ku camalfal.
Way wanaagsan tahay Inta aanad subixii Indhaha ku kala furin (social media iyo waxa lagu baahiyey.

(3)
Walaal yaan cadceedu kuu soo bixin, kuuna dhicin adiga oo aan waalidka farxad gelin, haba ahaato erey qalbigooda ka farxiya ama ficil wanaagsan oo aad samayso. Haddii waalidka nool yahay walaalo rabi swt u mahadnaq oo baari u noqo waalidka, haddii xaqu helayna ha ilaabin Inaad u duceyso mar walba.

Intan waxa laga yaaba inay ku horseedo wanaag iyo farxad, walaal joogtee wanaaaga oo gaadhsii dadka umadii wanaaga is fareysay xumahana iska reebaysay baynu nahee.

*Allah ha ina wanaafajiyo joogteynta wanaaga iyo suubinta camalka wanaagsan ee rabi swt raalida ka yahay.

18/08/2022

Waa hooyo!!
Waa damal hadhweyn, waa la hadhiyaa oo la hadhsadaa..!!

Ilahay swt waxaan uga baryayaa wadhatada, saboolka ah ee adduunka ku ciilan in rabi swt tacabkooda iyo tarantoodaba barakeeyo. Kuwu dalkaygana waxaan Allah u weydiinayaa inuu u xulo kuwo u dabran oo la dedaala oo la dareen ah. Maruun keen Allahayow.

16/06/2022

Ereyga wanaagsani waa sadaqo

Nabi Mohamed NNKH

Adiga oo qof u noqon kara hage wanaagsan (mentor), siin kara erey taageero ah oo noloshiisa waxtara, maxaad u noqon mid nolosha walaalkii ama walaashii ku soo kordhiya hagardaamo ama dhibaato.

Ha noqon mid dhiba qof dhiban, ee noqo mid dhawra qofka dhibaatada dareemaya, ha ka faa’idaysan baahida walaalka, walaasha astur ceebaha umada sidaad u jeceshahay in ceebtaadu u asturnaato. Noloshu way fursado badan tahay ee dadka kuu dhawdhaw xasuusi fursadaha nolosha iyo ku xidhnaanta ilahay swt.

Erey wanaag ah oo aad qof fartaa ama aad la wadaagta waxa laga yaaba inuu nolosha qofkaa ku hanuuniyo dariiqa wanaagsan, weligaa ogow ereyga wanaagsan markaad dadka la hadlayso, qiime erayada afkaaga ka soo baxaya oo ka dhig kuwo khair leh oo umada waxtara, waano iyo wax sheegna u noqda.

Shaqsiyan marka qof si naseexo ah wax ii dan ah iigu sheego ina xasuusiyo, walaahi waan xishooda oo aan jidhidhicooda si dareen lehna u dhugtaa fariinta ama waanada qofkaasi i farayo.

Waayo waxaan xasuusta maahmaahda somaliyeed ee tidhaa qof wax ku siiya ma weydid, qof wax kuu sheegase ma heshid. Ogow lexo jeclo laga qabo iyo wanaag lagula rabo ayaa qofka wanaagaga jeceli kula wadaagay talada. Haddaba si aanad u waayin wax sheega wanaagsan noloshaada ku xeer dadka tayada leh (only quality people) ee aad ag-joogooda wax ka dheefeyso, noloshaadana u noqon kara kuwo ku soo kordhiya wanaag iyo farxad.

Wakhtigaaga xisaabi oo ku bixi meel aanad ka qoomamayn, isbedel kaagama h**eeyo go’aanka aad noloshaada iyo h**e u socodkeeda ka gaadho, noqo qof naftiisa ku hogaamiya jidka h**e u socodka iyo yidiidalada, ha noqon qof naftiisa dhiba kana gala dulmi, ha noqon mid umaduna karahsato oo lagu tilmaansado xumo oo dhan.

Noqo kii loo riyaaqo ee ag-joogiisa la soo raadiyo, kii ama tii wanaag iyo farxad lagu soo hirto laga dheefo. Noqo mid ka mid ah iftiinka nolosha oo ogow in Allah swt kaa dhigay adame sharfan. Allaha weyn ee nafta iyo garashadaba ina siiyey ka bari inaad noqoto mid uu raali ka yahay, mid samada iyo aradkaba laga jecel yahay.

Alif waa derejee qof wal oo talo noloshaada ku darsaday beerka ka ogsoonow, oo ku qoro bogaga xusuusaha wanaagsan ee aan tirmin. Waa muhiim in dadku inoo kala soocnaadaan ka maalinta adag wanaag kula garab taagnaa iyo kii dhib kuu waday labadaba aad kala taqaano.

Walaalkayow, walaashayey beerka ka ogsoonow kuwa wanaagaaga jecel.

Ogow in nabi muxamed scw ina yidhi ”Qofka ka furdaamiya qof muslim ah dhibaato haysata, Ilaahay ayaa maalinta qiyaame isna ka dulqaada dhiibaatooyinka yaalla.

Markaa miyaanay mudnayn inaad xasuusnaato kuwii ku soo garab istaagay maalintaa adag.

Ilahay swt miisaanka xasanaadka uga bari inuu ugu daro if iyo akhiraba qof wal oo wanaageena ka taliyey waalidkeena ugu h**eeyaan, waayo tiirka ugu weyn ee nolosheena ee rabi inagu arsaaqey waa waalidkeen waa macalimiintii nolosheena waa kuwa ugu dhaw ee wanaageena iyo farxadeena qalbiga ka dareema, iyaga aad u weynee oo xurmee.

Wixii intaa ka dambeeyana waxaan idin leeyahay ”Nin hadaafey lama odhan, haybta noloshu kaa xidhan. Nolosha halka ugu sareysa ka haybso waad gaadhi Haddii aad Allah swt talo saarato.

Wabilaahi tawfiiq

Mohamed Amiin

15/06/2022

Qofka ka furdaamiya qof muslim ah dhibaato haysata, Ilaahay ayaa maalinta qiyaame isna ka dulqaada dhiibaatooyinka yaalla.

-Nebi Maxamed NNKH

08/04/2022

أَلْهَاكُمُ التَّكَاثُرُ, حَتَّىٰ زُرْتُمُ الْمَقَابِرَ

Laba reerood oo carabtii ahaa ayaa isugu faanay annaga badan iyo annaga badan, faankoodii wuxuu gaadhsiiyey in ay xabaalaha isla tagaan oo dadkoodii dhintay qubuuraha isku soo tiriyaan. Sidaas darteed ayuu Alle SWT, aayadan ugu xusay ayaandarrooda. Afar iyo toban qarni ka dib ayeynu aafooyinka isku tirsanaynaa.

Xusuusin Sheikh Xasan Rakuub

27/03/2022

Faqrigu waa mid ka mid ah dhibaatooyinka ugu weyn ee maanta adamuhu waajaho. Faqriga waxa ugu weyn ee keena waa sinaan la’aanta iyo cadaalad darada waana waxaan umadayda uga baqanayo maanta.

Haddii qofka ama umadu fuqaro noqoto, diintiisa iyo gobanimadiisaba inuu duunyo ku iibsado waa ay dhici kartaa! Caqiidadii, sharafkii iyo wax wal oo qofnimadaada muujinayeyba wuu ka khalkhali karaa Haddii aad ku sugan tahay marxalada adag oo aanad ahayn qof iimaan weyn una adkaysan kara faqriga.

Islaamku waxa uu faqriga u tixgeliyey ”belaayo” sidoo kale xumaan bulsho. Waa xumaan bulsheed waayo waxay hoos u dhigtaa maqaamkii bulshada ee ku xidhnaansha Alle, swt waxayna dhalisaa dhibaatooyin badan oo bulsheed, waxayna ummadda danyarta ah gelisaa xaalad liidata oo ka jirta bulshada caalamka inta badan maanta siiba bulshada somalida.

Nebigeenii (NNKH) Allah swt ayuu ka nabadgaley, faqriga waxaanu ku duceysan jiray “Ilaahow waxaan kaa nabadgaley faqriga iyo gaalnimada. Bal eeg sida rasuulkeenii suubana Allah weyn ee loo noqonayo uga magangaley imtaxaanka, ilahaw magantaa baanu nahay mar walba.

Faqrigu keliya caqiiqada iyo diinta uun ma dhaawacee wuxuu waxyeela cafimaadka iyo halabuurka qofka, waxa uu qofka ku sababaa inuu is dhiibo, dhibo maskaxeedna ku dhacaan (psychological poverty of trauma) Qofku wuxu aamina inaanu marxaladan ka bixi karin, marka uu ku garaadsado jiil ka jiil inuu qaada ma dharge noloshu ku adag tahay ahaa, niyad jabkaasina wuxu qofka geyeysiiya xanuuno kale oo halis ah sida nafaqo daro, wadno xanuun iyo xalado kale.

Faqrigu wuxuu waxyeela amniga iyo wada noolaansha umada waayo, marka umadu kala korto, dabaqado noqoto waxa dhacda in la is boobo oo ka baahani, ka wax haysta boobo ama dhaca iyo xatooyaduba badato.

Faqrigu waa masiibo ay tahay in Allah laga magan galo aniga iyo adiga iyo inta fariintaydu gaadhi doontaba walaalayaal aynu ka duceysano oo wixii faqri nololeed oo akhiradeena galafanayana aynu Allah swt ka magan galno.

Salaad subax baa noo joogta naftayda iyo nafihiinaba Waxaan Allah uga magan geleyaa inuu masiibada ka hayo. Allah xaqa ha inagu sugo yaa Allah. Walaalayaal is caawiya oo kiina wax haysta hoos ha u eego walaalkiisa jilicdasan. Ilaahay SW quraankiisa innoogu sheegay aayadahan, “wax ka bixiya, wixii Ilaahay swt idin siiyey, daarta aakhiro iyo jannada ku raadso, wixii Rabi swt ku siiyey.

Ilahaw wanaag baan naftayda iyo ta dadkaygaba la jeclee Ilahaw noo aqbal oo na garansii wadadii loo mari lahaa wanaaga.

Walaalkiin Mohamed

27/03/2022

Imisaad cuntaa maalintii !

Gabadh qurux u dhalatay ayaan ahay, markastana ku shukrida nimcadda Illaahay, baryo aan fogay ayuu Illaahay calaf iskugu kaayo daray wiil muddo aan badnayd aanu hadhuubka caashaqa wadda wandaafinaynay.

Nin daggan ayuu iila eekaa, qofna ma garan karo halka uu ku danbayn karo, si kasta oo aad ninka aad rabto u doorato, haddana qoraalka Illaahay marna lama dhaafayo, taas niyadda ku haya.

Muddo markaanu is qabnay ninkii waanu is fahmi waynay, fahan oo kaliya maaha, waxaanu ku kala duwanaanay qaabka noloshayadu ay u socon doonto.

Ninka Soomaliga ahi wuxuu jecel yahay gabadh aanu waxba ka waydiin noloshooda, gabadh uu iska wad wato oo tiisa oo qudha uun u yeesha.

Marka lamaane la yahay waxyaabaha aasaaska u ah nolosha lamaanuhu waa wadda tashi iyo is wax is waydiin.

Maalintii uu go’aanku ku adkaaday Nabbi Maxamed ( CSW ) cidda taladii ugu wanaagsanayd siisay waxay ahayd xaaskiisii oo u sheegtay, inuu isagu timaha xiirto, ka dibna ay asxaabtu ku dayan doonaan, sidii ayaanay u dhacday.

Mar kasta wadda tashigu waa wax fiican, waana mid guul u ah lamaanaha is qaba ee is calfaday, Illaahay ayaana quraankiisa inoogu sheegay wadda tashiga.

Aan u soo noqdo mawduucaygee, ninkii muddo ayaanu is haysanay, ugu danbayn go’aan isaga ka yimid ayuu iigu sheegay inuu rabbo inaanu kala dhamaano, aniguna waaban soo dhaweeyay wacad Alle.

Imika muddo waxoogaa ah ina rag shaqo kuma lihi, nolol maalmeedkayga anaa ka adag, k**a adki oo kaliya, waxaan wax taraa ehelkayga iyo qaraabada cidii aan awoodo, farxad iyo badhaadhe adduun ayaan ku jiraa, markastana Illaahay ugu mahad naqaa.

Gabadh wax baratay ayaan ahay oo aan cidna ka baryin bariiskeeda, diinteeda iyo dhaqankeedana ku adag .

Hadda telefoonkayga gacanta ayaa dhawr jeer soo dhacay, lambar aanan garanayn ayaa i soo garaacaya.

Dhawr jeer oo isku xiga ayuu dhacay, ma jecli dadka telefoonka ku soo cel-celiya dadka, waayo dabkay kaa ridayaan, telefoonkii oo ka bilaabmayay 441….. hadda ayaan ka qabtay .

Waa nin cod wayn,codkiisuna xabeeb yar leeyahay ah oo aad moodo inaanu igu cusbayn, salaan guud ka bacdi ayuu waraysigani na dhex maray .

Aniga : Waayo

Isagga : Ina ma garanaysaa codkan ?

Aniga : Codkani iguma cusba, ma se soo saarayo

Isagga : Waa Mustafe, waa wiilkii aad jaarka ahaydeen ee Aw-Cali uu dhalay.

Aniga: Mustafe , salaan sarre walaalo

Isagga : Xageed joogtaa ?

Aniga : Xaafadda walaalo

Isagga: Imisaad cuntaa oo kugu filan !

Aniga : Maan fahmin

Isagga:Waxba ha iga dhicine, imisaan kuu soo qaadaa anigaa kharashka bixinayee

Aniga : Maxaad ka wadaa , imisaa kugu filan ?

Isagga:Miyaanad qayilin, dumarka la soo furo oo dhanba waa kuwa wadda qayilee, maanad iga dhacaysaa !

Aniga: Telefoonkii aan gacanta ku hayay ayaa iga dhacay, madaxdaygii ayaa mijo isku baddalay, dhidid waawayn ayaa iga soo booday, dhulkaa ila wareegay, waxaan ku sigtay inaan koomo galo ama wadnuhu uu iskay taago.

Hooyaday oo ii dhawayd ayaa i dareentay inay wax iga khaldan yihiin, ku dhawaad saacad ayaan si kale ahaa, bal qiyaas qof aad jaar ahaydeen oo aydaan salaanta isku dhaafi jirin oo hadaladaa khadka telefoonka kaaga soo odhanaya, saw waali cas maaha.

Maalintii ilaa maanta ereyadaasi waa qaar igu soo noq-noqda, ninkii walow aan Illaahay dartii u cafiyay, haddana indho adkaantiisa ayaan la yaabay ilaa imikadan aan kuu waramayo.

Ragga Soomaliyeed baddankoodu gabadha la soo furay ama ay ninkii kala dhamaadeen, waxay u haystaan inay tahay gabadh ka kac ah oo noloshii quus ka joogta, gabadh balwad leh oo nolosha ka dhacday iyo gabadh is dhiibtay oo sidii la doono laga yeeli karo !

Aniga iyo kumanaan ila mid ah oo hammi iyo hiigsi nolosha ka leh ayaa buuxna, marka gabadha uu guurku ka xumaado ama ay sifo kale nin u kala tagaan, maaha micnaheedu inaanu nahay dumar xun.

Haddaad fikirkaa aaminsan tahay, waa mid adiga kugu gaara , gabadh kasta oo ay nin kala tageen iyo gabadh kasta oo guurku si uun uga xumaaday, waxaan leeyahay nacasnimo baddan iyo haddalo aad dhibsataan ayaa bulshada idiinka iman doona.

Ogow mid, lax walba halka ay is dhigto ayaa lagu qalaa, ha u nuglaan cadaawaha, dhulka ha is dhigin, xikmad carabiya ayaa tidhaahda, ‘’ Noloshaadu gacantaada ayay ku jirtaa.’’ Haa , waa runtay, noloshaadu adiga ayay gacantaada ku jirtaa .

Hadba sida aad rabto ayaad nolosha ka dhigan kartaa, gabadh faraxsan ayaan maanta ahay, noloshayda anaa gacantayda ku samaystay, samayso nolol, hadduu guurka kaa xumaaday ama calafkiinu dhamaaday ogow inaad ninka hortii noolayd nolol qurux baddan, imikana aad noolaad kartid mid ka sii qurux baddan tii h**e .

Si kasta oo ay nolol adag kuu soo marto, ogow inaad ka gudbi kartid, Saynab Cigana waa tii ku heestay ;

Dhibta laguma waaro

Dhaxal looma yeeshee

Waa laga dhamaadaa.

Guul ayaan u rajaynayaa hablaha Soomaaliyeed guud ahaantood, gaar ahaana inta guurku ka xumaaday sidayda, u noolaada sida aad rabtaan, noloshiina idinka ayaa isku haya .

One ❤️

Fiiro Gaara:Waa sheeko ay ila wadaagtay inantaasi, ana aan qoraal ahaan idiinku soo gudbiyay

Qore: Cabdifatax Sheikh Nuux

Fallow my page please - Guji linkiga hoose si aad ugu soo biirto page-kaygan 🙏

✅Suldaanka Dhalinyaradda Somaliland

13/03/2022

13/03/2022

13/03/2022