Contact information, map and directions, contact form, opening hours, services, ratings, photos, videos and announcements from كشّف - Kashif, Film/Television studio, Khartoum.
قبّال سنتين، نحنا في كشّف جِبنا كُردفاني Mo Kordofani وقعندنا اتونّسنا معاهو عن السينما وصناعة الأفلام. وللمصادفة، سألناهو عن مشاريعو المستقبليّة وكانت الإجابة هي Goodbye Julia Film - فيلم وداعاً جوليا. نحنا مبسوطين أنّو المشروع ده كِبِر وبقى فيلم وفاز في مهرجان كان كمان! Festival de Cannes.
للناس الما شافت كردفاني قبل ده، كشّفوا ونستنا معاهو :)
#كشف
وداعاً جوليا Goodbye Julia Film - فيلم وداعاً جوليا الليلة فاز بجائزة "الحُرِّية" Freedom Prize ضمن منافسة نظرة ما The Un Certain Regard في الدورة ال76 لمهرجان كان السينمائي Festival de Cannes ، وسجّل إسمو في تاريخ السينما كأوّل فيلم سوداني يفوز بجائز في المُنافسة الرسمّية لمهرجان كان.
مافي كلمات ممكن نعبر بيها عن إننا قدر شنو فخورين بالإنجاز التاريخي ده، غير الكلام الكتبو مخرج الفيلم محمد كُردُفاني في لافته رفعها في ساحه اعتصام القيادة العامة أيام ثورة ديسمبر 2018، كُردفاني كتب في اللافتة دي (حُرّية، سَلام، عَدالة وسينما).
#كشف
----
** الصور مأخوذة من الصفحة الرسمّية لي كلوزيوم إستديوز، وصفحة كردفاني الشخصية على الفيسبوك
الليله في منافسة "نظرة ما" The Un Certain Regard حيعلِنوا الفيلم الفائز بي جائزة "كاميرا دور" Caméra d'Or لأفضل فيلم روائي طويل في مهرجان كان السينمائي Festival de Cannes، وطبعًا السودان غازِّي عُودو في المُنافسة الرسمّية لأول مرة في التاريخ بفيلم وداعاً جوليا Goodbye Julia Film - فيلم وداعاً جوليا للمخرج الشِفِت محمد كردفاني.
نحن في كشّف مُتحَمِسين شديد لحفل الجوائز اللي حيكون الليله وحيتم بثو حصرياً على القناة الفِرنسية الثانية France 2، اي نحن وكل السودانيين والسودانيات بنعيش أصعب أيامنا بسبب الحرب والموت والشَتات، بس مُتفائلين بالفيلم والشباب والشابات القاعدين هسي في "كان" عشان يوصّلوا صوت السودان لكل العالم من خلال السينما، ونتمنى إننا بعدين نسمع خبر فوز وداعاً جوليا ونحتفل كلنا، لأنو ده الوقت المفروض يزيد فيهو إيماننا بالفن والفنانين.
#كشف
----
** الصور مأخوذة من الصفحة الرسمّية ل ماد سوليوشنز
الفيلم السوداني وداعاً جوليا Goodbye Julia Film - فيلم وداعاً جوليا ، بيشارك الأيام دي ضمن فعاليات مهرجان كان السينمائي Festival de Cannes في دورته ال76 كأول فيلم سوداني يشارك في المُنافسة الرسمّية للمهرجان، الفيلم بينافس على جائزة "كاميرا دور" Caméra d'Or لأفضل فيلم روائي طويل "عمل أول". الفيلم من إخراج المخرج السوداني الشاب محمد كردفاني، واللي فاز فيلمو القصير "نيركوك" بجائزة الفيل الأسود لأفضل فيلم سوداني، وبرضو فاز بجائزة ناس لأفضل فيلم عَربي من مهرجان قَرطاج السينمائي، وجوائز تانيه عالمية.
الفيلم تم تصويرو في السودان في سنة 2022 بطاقم تمثيل من السودان وجنوب السودان، وهو من إنتاج شركة إستشين فيلمز Station Films واللي قايمين بشغلها Amjad Abu Alala ومحمد العُمده، وبرضو شارك في إنتاج الفيلم اكثر من 8 جهات عالمية تانيه من فرنسا، المانيا، السعودية، السويد ومصر. ومسؤول من توزيع الفيلم عالمياً شركة ماد سوليوشنز MAD Solutions . شارَك في بُطولة الفيلم النجمة وملكة جمال جنوب السودان سيران رياك Siran Riak في دور جوليا، وفي دور مُنى النجمة السودانية الشابة إيمان يوسف.
في 120 دقيقه بتدور أحداث الفيلم ده في الخرطوم في الفترة السبقت إنفصال جنوب السودان، وقصة الفيلم بتجسِّد شكل العلاقة المُعَقدة بين مُجتمعات جنوب السودان وشماله، وده البيحاول يحكيهو لينا الفيلم من خلال العلاقه بين جوليا ومُنى. الفيلم لِقى إشادات كثيرة من الجمهور والنُقاد بعد عرضو الأول في مهرجان كان السينمائي الثلاثاء الفات (16 مايو)، وده ممكن يخليهو مُرشح قوي لأنو يفوز بواحده من جوائز المهرجان.
#كشف
----
** الصور مأخوذة من الصفحة الرسمّية لمهرجان كان السينمائي و ماد سوليوشنز
في نفس الوقت الفيهو مئات الآلاف من السودانيين والسودانيات بيموتوا وبيتشرّدوا بسبب الحرب، الفيلم السوداني Goodbye Julia Film - فيلم وداعاً جوليا للمخرج السوداني محمد كردفاني اتعرض يوم الثلاثاء الفات (16 مايو) في النسخة الـ76 لمهرجان «كان» السينمائي Festival de Cannes ضمن منافسة نظرة ما Un Certain Regard كأول فيلم سوداني يتم عرضو في المهرجان. الفيلم بينافس مع 19 فيلم تانيات من حتات مختلفة في العالم على جائزة «كاميرا دور» Caméra d'Or واللي بيدّوها في كل دورة (من سنة 1978) لأفضل فيلم روائي طويل يتم عرضو لأول مرّة ضمن منافسات المهرجان.
المخرج كردفاني قال في كلمة سبقت عرض فيلم «وداعاً جوليا» إنو بيشكر إدارة المهرجان على اختيارها للفيلم، وبرضو حابّي يشكر فريق الفيلم كلّو، وتحديدًا المنتظرين في صفوف المعابر حاليًا عشان يتم اعتماد أوراقهم كلاجئين بسبب الحرب البتدور هسي في السودان. وأضاف إنو الفيلم عملوهو ناس شغوفين وملتزمين وهم نفس الناس الكانوا في شوارع السودان في الخمسة سنوات الأخيرة بيطالبوا بالحرية والسلام والعدالة.
إعلان جوائز منافسة «نظرة ما» Un Certain Regard حيكون يوم الجمعة الجاية (26 مايو). نحن في كشِّف بنتمنّى لفريق فيلم وداعاً جوليا التوفيق، ونحنا كلّنا ثقة إنّو زي ما المئات من الجمهور الحِضِر أول عرض للفيلم وقف صفّق لأكتر من عشرة دقائق، تاني حيقيف ويصفّق للسودان والسينما السودانية.
#كشف
--
* الصور مأخوذة من الصفحة الرسمّية لمهرجان كان على الفيسبوك.
** تمّت ترجمة المُجتزأ من كلمة المخرج كردفاني من الإنجليزية الى العربية بواسطة فريق كشّف.
مهرجان «كان» للأفلام Festival de Cannes يعتبر أكبر حدث سينمائي في العالم، وبيهدف إلى لفت الانتباه تجاه الأفلام ورفع مكانتها، وبكده بيساهم في تطوير السينما وصناعة الأفلام عالميًا. كل سنة، ولمدة 12 يوم، بتجذب فعاليّات المهرجان آلاف المتخصّصين والمهتمّين بالأفلام من جميع أنحاء العالم، واللي بيجوا يحتفلوا بالسينما في مكان فريد ومشحون بالطاقة الثقافية والفنّية. وسط الفضاء المتميز ده، والمزيج النابض بالحياة من مختلف الثقافات، بيتم الإعلان عن الفيلم اللي حاز على الاختيار الرسمي واللي بيتوج في الحفل الختامي بمنحه جائزة «البالم دور» كأفضل فيلم.
الأيام دي بتشهد فعاليات النسخة الـ76 من مهرجان كان، واللي بدت فعالياتها في (16 مايو) وحتستمر لحدّي يوم (27 مايو 2023). بتتنافس فيها 21 فيلم على جائزة «البالم دور» Palme d’Or لأفضل فيلم في المهرجان. بيشارك في النسخة دي خارج المنافسة وضمن الإختيار الرسمي للمهرجان، المخرج العظيم مارتن إسكورسيزي بفيلمو Killers of The Flower Moon وهو فيلم من بطولة نجم الأوسكار ليوناردو ديكابريو والنجمة ليلي جلادستون. وبيرجع إسكورسيزي للمشاركة في المهرجان بعد غياب إستمر أكتر من 30 سنة، وبترجع آخر مشاركة ليهو لسنة 1986 واللي فاز فيها فيلمو After Hours بجائزة «البالم دور» لأفضل فيلم في المهرجان. النسخة دي برضو بتشهد مشاركة المخرجة التونسية كوثر بن هنية في المنافسة الرسمّية بفيلمها الروائي الطويل «بنات أُلفه» Four Daughters واللي بتلعب فيهو دور بطلة الفيلم الممثلة التونسية القديرة هند صبري.
طبعًا عايز تعرف ليه نحن بنتكلم عن مهرجان كان، مش كده؟
عشان تعرف تابع المنشورات الجاية!
#كشف
--
*الصور مأخوذة من الصفحة الرسميّة لمهرجان كان للأفلام.
أيام السينما الأفريقية، أو سينما الجيران، حتستمر فيها الفعاليات من يوم 11 الى يوم 18 نوفمبر في أماكن مختلفة وحتتعرض أكتر من أربعة أفلام أفريقية من ضمنها الفيلم الصومالي (زوجة حفار القبور) الحاز على جائزة مهرجان فوسباكو، وبرضو فيلم (الحديث عن الأشجار) للمخرج السوداني صهيب قسم الباري اللي فاز بجائزة أفضل فيلم وثائقي في مهرجان برلين 2019.
كمان في ندوات وجلسات حوارية عن سينما شرق أفريقيا وعن النساء في السينما الأفريقية وغيرها من الموضوعات، لو عاوز نصيحتنا امشي كشّف لسينما الجيران عشان تعرف أكتر عن السينما الافريقية، وأكيد حتستمتع!
#كشف
--
*الصور من صفحة مركز أمدرمان الثقافي.
لمن يسألوك من اسم فيلم أمريكي أو اوروبي أو عربي حتجاوب، لأنو أغلبنا حِضِر الأفلام دي وكانت متاحة كن ما في السينمات (زمان يعني)، حنكون شفنا جزو في التلفزيونات. لكن لو سألناك، بتعرفي شنو عن السينما الأفريقية، وهل حضرتي فيلم افريقي قبل كده ولّا لأ، حتجاوبي بشنو؟
الأسئلة دي هي الخلّتنا نشيل كاميراتنا ونمشي مركز أم درمان الثقافي. قلنا ندردش مع محبي الأفلام في أيّام السينما الأفريقية* احتمال نعرف أكتر.
--
*أيّام السينما الأفريقية هي تظاهرة بتنظمها جماعة الفيلم السوداني ونادي السينما السوداني من 1987 إحتفاءًا باليوم العالمي للسينما الأفريقيّة (12 أكتوبر)، والسنة دي الفعاليات بالشراكة مع مركز أم درمان الثقافي، المركز الثقافي الفرنسي، مركز الجنيد، مؤسسة النيمة شمبات وبدعم من الإتحاد الأوروبي.
European Union in Sudan الاتحاد الاوربي في السودان
Omdurman Cultural Centre مركز ام درمان الثقافي
Institut français du Soudan - المعهد الفرنسي بالسودان
مركز الجنيد الثقافي
مؤسسة شمبات الثقافية الاجتماعية النيمة
جماعة الفيلم السوداني Sudanese Film Group
*الصور من صفحة مركز أمدرمان الثقافي.
#كشف
السنة دي، بالتنسيق مع British Council Sudan مشينا حِضِرنا ليكم المهرجان، وعملنا مقابلات مع الجمهور وصنّاع الأفلام ولجنة التحكيم وغيرهم، وكانت تجربة حماسيّة شديد 🙂
#كشف
البداية حتكون الليلة، يوم 16 يونيو، وحتستمر العروض والفعاليات المصاحبة لحدّي يوم 23 يونيو. نحن، طبعًا، حنكون حايمين هناك والمحظوظ حيلاقينا 😎
بدايات مهرجان كان للأفلام كانت في تلاتينيات القرن العشرين عن طريق صنّاع أفلام بريطانيين، أمريكان، وفرنسيين. كانوا زهجانين من تحوّل مهرجان البدنقيّة للأفلام (كان كنتة الزمن داك، ولا زال من العتاولة التلاتة مع مهرجان برلين) لبوق للفاشيّة المنتشرة في إيطاليا الوقت داك. كان -المهرجان- هسّة بقى أكبر وأهم سوق أفلام الناس بتجيهو من العالم كلّو عشان تعرض أفكار أفلام، تبيع وتشتري، وتحضر الكمّية المهولة من الأفلام المتاحة هناك.
ماف أنسب من سوزانا وفيلمها (الست) ومشروع فيلمها الطويل (ملكة القطن) عشان يمشي الحتّة دي: حصد ما يكفي من الجوائز (عادي ممكن يكون أكتر فيلم سوداني ياخد جوائز 😆) واتعرض في مختلف المهرجانات حول العالم. بالنسبة لسوزانا ميرغني، فيلم (الست) عبارة عن اختبار لصلاحيّة الفكرة بس (وفي ده هي نجحت تمامًا 😉)، لكن المشروع الأكبر هو فيلم (ملكة القطن) اللي لسّة في مرحلة التطوير. مشاركتها في مهرجان كان للأفلام في الحتّة دي تحديدًا، وزي ما عوّدتنا، فازت برضو بمنحة من آرت كينو قيمتها 10,000 يورو. نحن بنتوقّع السنة الجاية (ملكة القطن) -إذا الحاجات مشت كويّس🤞- يكون أساسي ضمن الأفلام المنافسة لجائزة «الكاميرا دور». وبرضو حيفوز! 😎😏
--
الصوَر مأخوذة من الصفحة الرسمية لمؤسّسة الدوحة للأفلام Doha Film Institute
لمّا يكون عندنا فيلم سوداني مشارك ضمن فعاليات أكبر حَدَث سينمائي في العالم، ده بيعني إنّو السينما السودانيّة تسير إلى العالميّة بخُطى ثابتة رغم الظروف العصيبة اللي بتمر بيها البلاد.
ضمن عروض «أسبوعَيْ المخرجين» اللي بيتنافس فيها 23 فيلم روائي على جائزة «كاميرا دور»، وده كلّو حاصل على هامش فعاليات مهرجان كان للأفلام Festival de Cannes في نسختو الـ 75. أمبارح، 24 مايو، عرضو فيلم (السد) وهو إنتاج مشترك من السودان، فرنسا، كندا وصربيا، وأوّل فيلم روائي طويل للمخرج اللبناني علي شرّي، وبطولة الممثل السوداني ماهر الخير.
الفيلم بيحكي قصّة عامل في كمينة طوب قريبة من سد مروي في واحدة من ضفاف نهر النيل. بيتسلّل كل يوم بالليل للصحراء عشان يعمل مخلوق غامض كده من الطين، وأثناء ما السودانيين كانوا بيطلعوا للشوارع للمطالبة بالحرية، المخلوق الصنعو ماهر بدا يبقى عندو حياتو الخاصة بيهو.
--
*الصور مأخوذة من الصفحات الرسمية لمهرجان كان للأفلام.
#كشف
مهرجان كان للأفلام Festival de Cannes يعتبر أكبر حدث سينمائي في العالم؛ وبيهدف إلى لفت الانتباه تجاه الأفلام ورفع مكانتها، وبكده بيساهم في تطوير السينما وصناعة الأفلام عالميًا. كل سنة، ولمدة 12 يوم، بتجذب فعاليّات المهرجان آلاف المتخصّصين والمهتمّين بالأفلام من جميع أنحاء العالم، واللي بيجوا يحتفلوا بالسينما في مكان فريد ومشحون بالطاقة الثقافية والفنّية.
وسط الفضاء المتميز ده، والمزيج النابض بالحياة من مختلف الثقافات، بيتم الإعلان عن الفيلم اللي حاز على الاختيار الرسمي واللي بيتوج في الحفل الختامي بمنحه جائزة «البالم دور» كأفضل فيلم.
الأيام دي بتشهد فعاليات النسخة الـ 75 من مهرجان كان، واللي بدت فعالياتها في 17 مايو وحتستمر لحدّي يوم 28 مايو 2022. بتتنافس فيها 21 فيلم على جائزة «البالم دور» لأفضل فيلم في المهرجان.
طبعًا عايز تعرف ليه نحن بنتكلم عن مهرجان كان، مش كده؟!
عشان تعرف، تابع المنشورات الجاية!
--
*الصور مأخوذة من الصفحة الرسميّة لمهرجان كان للأفلام.
#كشف
كانت سنة مليانة بكشّف وكم إنقلاب فاشل كده 😂
رجال كبار لابسين فنايل كَط 😂
#كشف
أي زول منّنا عندو الحتّة الخاصّة البيهرب ليها من ضغوطات الحياة. إنت يمكن حتّتك محل اقاشي ظابط، أو حفلة لفنّانِك المفضّل، أو إنّك تحضر مباراة لفريقك البتشجعو.
نحن متعتنا في السينما، ومتعتنا إننا نظبط المحتوى البنشاركو معاكم ده. يوم الأربع حننشر الفيديو كامل. خلّيكم قريبين عشان تتعرّفوا علينا من قريب 😁
عادةً، مافي زول قاعد يتكلّم عن لجان التحكيم السينمائيّة سواءً كان في المهرجانات أو المنح الإنتاجيّة. بساط هم العارفين مثلًا إنّو حجّوج كوكا كان جزو من لجنة آفاق AFAC - The Arab Fund for Arts and Culture ولّا إنّو شهاب ساتي كان محكّم في مهرجان أجيال Ajyal Film Festival البينظّموهوا ناس مؤسّسة قطر للأفلام.
حاجات زي دي قد تبدو - من على السطح - عاديّة أو حتّى تافهة، لكن، بالنسبة لينا، ده حدث مهم خصوصًا في مشهد فقير سينمائيًّا زي المشهد السوداني. دي حاجات بتورّي إنّو صنّاع الأفلام السودانيين ما بس واقفين على صناعة أفلامهم الخاصّة وبس وإنّما قاعدين يشاركوا بصورة مهمّة في إنّو أفلام الآخرين تشوف النور وتصل لجمهورها. بعدين خبرات التحكيم دي ما ح تمشي ساي، حيستفيدوا منّها كتير من الشباب السودانيين لمّا يكونوا عايزين يوصّلوا قصصم للعالم (وحجّوج ما قصّر، عمل ورِش وحلقات نقاش مع منظّمي المهرجانات وناس المنح، وكان حريص الناس كلّها تجي وتشارك).
وجود أمجد أبو العلا في مهرجان عالمي ومهم زي مهرحان لوكارنو للأفلام مؤشّر كويّس لإنّو السينما السودانيّة بقت تتنّفس شويّة و«تسير في الطريق الصحيح». ده بالتأكيد حدث ملهم لصنّاع الأفلام ما بس السودانيين، بل وغيرهم من الموجودين في القرن الأفريقي والشرق الأوسط اللي بيتشاركوا معانا واقع مشابه وقصص قريبة لقصصنا.
أمجد أبو العلا بكونو عضو في لجنة مهرجان بتجيب أفلام ملوّنة بلون العالم من سينمائيين واعدين دي أوّل تجارب أفلام طويلة بالنسبة ليهم حيخلّي الناس تبدا تسأل عن السودان وناسو، السينما بتاعتهم بقصصها المفرحة والحزينة، وكل الحاجات دي جد نحنا عايزين نشاركها مع العالم. فشنو، الناس تفرح وتنبسط! وقدّام بس يا Amjad Abu Alala أمجد أبو العلاء !
--
*الصورة مأخوذة من صفحة مهرجان لوكارنو للأفلام.
#كشف
الونسة مع شهاب ساتي ممتعة، والكلام عن الأفلام معاهو ما بيكمل، زول مجتهد وبيفكّر في صناعة الأفلام بشكل من النادر إنو يلاقيك عند مخرج شاب، ولو شفت فيلمو سيروتونين من الصعب إنّك تقول دي أول تجربة ليهو.
في حلقتنا التانية مع شهاب، شوف قلنا شنو عن السينما السودانية وعن المحتوى السوداني على المنصات الرقمية وأحناك تانية دسّيسة😎✌️
خش وشوف الجزو التاني من الحلقة على يوتيوب!
رابط الجزو التاني من الحلقة:
https://youtu.be/vwnQ2DsrXCo
ولو ما حضرت الجزو الأوّل، هاك ده الرابط:
https://youtu.be/GkpqffPrx-k
#كشف
#سيروتونين
--
*الصورة مأخوذة من الصفحة الشخصيّة لشهاب ساتي.
ممكن انت تشوف إنّو الشي البتقدّمو ليك السينما هو المتعة والإثارة، أو إنّها بتناقش مواضيع بتهم المجتمع والفرد، وطبقًا لكده، بتخلق تأثير كبير على المستويين، افكار الفرد وقناعات الجماعة. وممكن برضو تشوف إنّو السينما وسيط بتتعلّم منّو، وبتتعرّف بيهو على ثقافات، وقصص، وأساطير، ومخاوف الآخر البعيد والمختلف.
كلّو، بالتأكيد، ممكن يكون حقيقي وصائب. لكن في حاجة تانية بتعملها السينما والناس قاعدة تغفلها أو ما بتنتبه ليها شديد. السينما عندها دور كبير في توثيق الأمكنة ومعالم المدن في مختلف الفترات التاريخيّة. في سودانّا الدسّيس ده، في أماكن جميلة وفترات تاريخيّة مهمّة اتنست تمامًا، وفي جزو تاني معرّض لانو يتمسح، كليًا، من ذاكرة السودانيين.
في سيروتونين Serotonin شهاب ساتّي كان ساعي للهدف ده، فحاول يوثّق للمكان، تحديدًا الخرطوم. فبنشوف صينيّة القندول مثلًا، ومقر إيزيس القديم قهوة إيزيس (تقريبًا كان في الصحافة، واتنّقل في كم حتّة لحدّي ما استقّر، قبل فترة قصيرة، في بيت التراث في الخرطوم 2 House of Heritage - بيت التراث).
شهاب كمخرج متمكّن، وزول محب للمعمار في نفس الوقت، واعي تمامًا بدور السينما التوثيقي للجمال، ودي كانت نقطة نقاش ممتعة مع فائز في الجزو التاني من ونستنا معاهو. الحلقة ح تنزل الليلة الساعة 9 مسا.
رابط القناة:
https://www.youtube.com/channel/UCp7Dz-ZNqeZXLIVsiDuhfQQ
--
*الصور مأخوذة من الصفحة الشخصية لشهاب ساتي.
#كشف
#سيروتونين
عندك فكرة لكتابة فيلم/مسلسل لكن ما لاقي دعم؟ بديت تصوير فيلم/مسلسل لكن ما قادر تكمّلو أو ما عارف توزّعو كيف؟ شفت منحة مهرجان غوتبيرغ Göteborg Film Festival؟ الموضوع طلع بسيط.
مهرجان غوتبيرغ Göteborg Film Festival بالتعاون مع معهد غوتة Goethe-Institut Sudanوالمعمل المدني Civic Lab عايزين يساعدوا صنّاع الأفلام وكتّاب السيناريو عشان يلقوا تمويل لمشاريعهم. أمس في المعمل المدني شرحوا للشباب المتطلّبات وجاوبوا على كلّ الأسئلة من الحضور.
ناس المهرجان عايزين يسمعوا قصص من السودان ودايرين السودانيين يحكوا ويشوفوا قصصهم بتتعرض لجمهور سوداني. المواهب قاعدة، والقصص كتيرة.
ولو في حاجة غالباك، ممكن تجي للمعمل المدني الليله، يا إما الساعة 2، أو الساعة 5. اختار الزمن البريّحك. المخرج السينمائي الشاب حجّوج كوكا ومعاهو شباب ظابطين عندهم ورشة مستعدّين يساعدوا فيها أيّ زول راغب يقدّم.
بس لازم تعرف كم حاجة أوّل عشان تمشي جاهز:
1- المنحة الأولى لكتابة وتطوير السيناريو، لفيلم أو مسلسل (قيمتها بتصل لحدّي 10٫000 يورو). دي عشان تقدّم ليها لازم يكون عندك ملخّص للفكرة (synopsis) ولو فيلم يكون السيناريو بتاعك ما أقل من 60 دقيقة. ممكن يكون أي حاجة: دراما، كوميدي، وثائقي، تجريبي، أو تحريكيّ (أنيميشن). ولو مسلسل مفروض يكون عندك فكرة الحلقة الأولى (pilot) أيًّا كانت مدّتها.
2- المنحة التانية للأفلام في مرحلة ما بعد الإنتاج (قيمتها بتصل لحدّي 35٫000 يورو). ودي عشان تقدّم ليها لازم يكون عندك مقاطع أوليّة (rough cuts) زي 30 دقيقة كده. وبس.
حقوق النشر كلّها حتكون حقّتك إنت، صانع الفيلم. كلّ العليك تدّيهم إذن العرض الأوّلي في المهرجان بتاعهم في السويد.
الناس تكرّب قصصها وتمشي تقدّم. التقديم كان مفترض يقفل يوم 10/06، بس ناس المهرجان بعد شافوا أمس العددية الكبيره لصناع الأفلام الشباب الشاركوا في الورشه قرروا يمدوا التقديم لحدي يوم 17/06.
منشن الناس المهتمين البتعرفهم. دي فرصة ظريفة لإنّهم يبدوا جدّيًا الشغل على أفكارهم.
__
*البوستر مأخوذ من الصفحة الرسمية للمعمل المدني.
#كشف
عارف كده فيلم (السِت) فاز بكم جائزة لحدّي هسي؟
لو عرفت اكتب لينا تعليق، ظابط؟! 😉
--
*الصورة مأخوذة من صفحة سوزانا ميرغني الشخصيّة.
#كشف
سوزانا مخرجة فيلم (السِت) شاركت في جلسة نقاش رفقة مخرجين تانيين على هامش المهرجان واتكلمت عن الظروف الاتصنع فيها الفيلم وعن القصة الرئيسيّة وحاجات تانية، وفي جزو من كلامها قالت:
«لما قرّرنا نعمل الفيلم، أغلب الناس قالوا لينا لو ماجيتوا السودان، وشفتوا الحاجات في أرض الواقع بتمش كيف، ما حتقدروا تعملو الفيلم، خصوصًا وإنو السودان بلد ما فيها صناعة سينما.
لمن وصلنا السودان، عشان نعمل الفيلم كان في بالنا سؤال إنو السودان ما فيهو صناعة سينما فكيف حنقدر ننجز المهمة دي؟ بس انبسطنا واتفاجأنا في نفس الوقت بالاحترافية غير العادية للفرق القابلناها واللي عادةً بيشتغلوا في مجال الإعلانات التجارية والتلفزيون وما اشتغلوا في السينما أو صناعة الأفلام. لكن، مع ذلك قدرنا نخلق فريق كويس شديد، ونتواصل مع بعض بصورة كويسة، وأنا شايفة إنّنا كنّا محظوظين جدًا من الناحية دي.»
--
*الصورة مأخوذة من الصفحة الرسمية لمهرجان تورنتو للفيلم العربي.
#كشف
متذكر فيلم (السِت) الكان نزلنا عنو كم خبر؟
الفيلم تاني فاز بكم جائزة!
شارك الفيلم في مهرجان (تورنتو للفيلم العربي) Toronto Arab Film اللي تم تنظيمو في مدينة تورنتو بكندا في الفترة ما بين 27 - 30 مايو الفات وفاز بجائزة لجنة التحكيم لأفضل مخرج واعد، وكمان فاز بجائزة اختيار الجمهور بعد ما حاز على أكبر عدد من الأصوات.
ومهرجان تورنتو للفيلم العربي هو نشاط غير ربحي مكرس للأفلام من العالم العربي أو الأفلام إلي بتحكي عنو. المهرجان انطلق بسبب الحاجة لملء الفراغ الموجود في برمجة مهرجان تورنتو خصوصًا شح الأفلام من المنطقه العربية، والمطالبة بإحياء تقليد الخروج لمشاهدة الأفلام اللي افتقدها جمهور السينما في تورنتو.
--
*الصورة مأخوذة من الصفحة الرسميّة لمهرجان تورنتو للفيلم العربي.
#كشف
اتعرض أمس، الإثنين 17 مايو، على الحساب الرسمي لكردفاني فيلمز Kordofani Films على السوشيال ميديا فيلم (ديل انحنا.. ودا السودان)، وهو فيلم تعريفي لجانب من موارد السودان وثقافاتو المتنوعة. الفيلم تم تصويرو خلال شهر وفي أكتر من 50 منطقة جوّة السودان.
الفيلم عرضوهو في الجلسة الافتتاحية لمؤتمر باريس لدعم التحول الديمقراطي في السودان، ولقى تفاعل كبير من المشاهدين.
نحن في كشّف بنهنّي كردفاني والتيم المعاهو على الشغل الظابط ده، وبنقول ليهم انتوا اشتغلوا شغلكم ونحن بنشتغل شغلنا عشان السينما والفنون عموماً ترجع تاخد دورها الطبيعي وتساهم في نهضة وتطور البلد دي.
لو ما بتعرف المخرج وصانع الأفلام محمد كرفاني، خش على الرابط تحت في نهاية البوست بتلقى لقاء عملناهو قبل شهرين مع كردفاني على قناتنا في اليوتيوب. ممكن تشوفو هنا في صفحتنا في فيسبوك. حتلقى الرابط في الكومنتات.
رابط اللقاء:
https://youtu.be/dj78i5Scyjc
--
+ الصورة من صفحة كردفاني فيلمز
#كشف
دي حلقة الليلة من كشّف في يوتيوب، وفيها ونسة ظريفة كده مع المخرج واليوتيوبر شهاب ساتي 😎
#كشف
--
رابط الحلقة:
https://youtu.be/GkpqffPrx-k
رابط قناة كشِّف:
https://www.youtube.com/channel/UCp7Dz-ZNqeZXLIVsiDuhfQQ
برومو 📽️
حتشوف أحناك ظابطة في اللقاء ده عن السينما، وصناعة المحتوى، وحتعرف ليه الناس شايفين شهاب سوبرمان!
- ده منو ده المعاكم في كشّف ده؟ 👀
- ده ربّ التجريب في البلد دي! 😎
#كشف
في الفيلم ده، شهاب ساتّي حاول يتناول الاكتئاب كاضطراب نفسي بتعاني منّو الشخصيّة الرئيسية للفيلم وأثر الاضطراب ده على علاقاتو بالشخصيّات التانية في القصّة. ولعكس الحالة دي، وظّف الألوان، والموسيقى، وحركة الكاميرا، وبحسب كلامو، نجح تمامًا في إنّو يوصّل الحاجة العايز يقولها.
Serotonin
#كشف
"روح العمل السينمائي هو مشاركة العمل مع الجمهور"
إيلاف الكنزي، المدير التنفيذي، Sudan Film Factory
--
"دايرين السينما تكبر، العرض بتاعها يزيد؟ لازم ننوّع في طريقة عرضها"
مهنّد منير، مُعِد ومنتج، Sky News Arabia سكاي نيوز عربية
دي المدنيّة الدايرنّها! 😎
British Council Sudan
Brahim Ahmad Snoopy
فاز مشروع فيلم (وداعًا جوليا) بمنحة تطوير مهرجان مالمو للفيلم العربي ضمن فئة الأفلام الروائية الطويلة.
الفيلم من إخراج محمد (مو) كردفاني، وإنتاج الفيلم مشترك بين السودان والسويد، ويشارك في الإنتاج أمجد أبو العلاء Station Films وإسراء الكوقلي.
نحن في كشّف بنهنّي المخرج محمد كردفاني Kordofani Films وكل المشاركين في إنتاج الفيلم، وبنتمنّى نشوف الفيلم قريب في منصّات الجوائز العالمية ودور العرض.
نزّلنا ليك رابط لڤيديو إعلان الجائزة في أول تعليق 😁
*الصورة من الصفحة الشخصية للمخرج كردفاني.
#كشف
سنوبي يفوز بجائزة التحكيم بمهرجان الفيلم السوداني-الأوروبي
ابراهيم أحمد والمعروف بلقبو "سنوبي" فاز بجايزة لجنة التحكيم في المهرجان الأخير بتاع السينما السودانية-الأروبيّة (واللي نحنا غطّينا جانب منّو).
سنوبي زول كوول ودسّيس، اتونّسنا معاهو يوم عرض الفيلم بتاعو (ح ننزّل المقابلة قريب فخلّيك متابع) والفيلم الوثائقي الأخرجو (رحلة إلى كينيا) جميل، وممتع، وبيستحق الجائزة بكل جدارة.
نحنا في كشّف مبسوطين بفوزو ده وبنتمنّى ليهو التوفيق في مشروع فيلمو الجاي!
--
* الصورة من صفحة البريتيش كونسيل.
إنطباعات الناس عن أول تجربة لسينما السيّارت في السودان..
"الجمهور السوداني متعطّش لفكرة مشاهدة الأفلام – خاصّةً الأفلام السودانيّة" 😏
"أنا أوّل ما سمعت بالحاجة دي قلت إنّو لازم نمشي!" 😃
"أنا أوّل مرّة أشوف فيلم سوداني كان هسّة" 😳
"عايزة اشوف قصص بتعبّر عن مجتمعنا وثقافتو" 🙃
--
#كشف
فيلم الست لسوزانا ميرغني يحصد جائزة أروبيّة جديدة! 🤩💥
مبروك تاني لسوزانا ميرغني بفوز فيلمها (الست) بالجائزة الكبرى بمهرجان تامبير للأفلام القصيرة Tampere Film Festival . المهرجان ده طبعًا واحد من أهم مهرجانات الفيلم القصير مع كليرمونت-فيراند Festival du court métrage de Clermont-Ferrand وأوبرهاوسنت Internationale Kurzfilmtage Oberhausen. تامبير مهرجان فنلندي وماخد اسم المدينة اللي بيتم فيها الاحتفال ده.
نحنا في كشّف مبسوطين بالجائزة دي شديد ونتمنّى لسوزانا إنّها تقدر تمشي بالفيلم ده لقدّام وتوصّلو لإنّو يبقى الفيلم الروائي الطويل اللي هي عاوزاهو (ملكة القطن).
أكيد ناس سودان فيلم فاكتوري Sudan Film Factory وناس الدوحة Doha Film Institute ح يكونو مبسوطين زيّنا 😁
ما معروف، احتمال نعمل عنّو ريڤيو، ونجيب ليك سوزانا والشباب المعاها ونتونس معاهم 😉 😎
--
*الصورة من الصفحة الشخصيّة لمهاد مرتضى.
#كشف
متحمّس تشوف تغطيتنا لمهرجان الفيلم السوداني-الأوروبي؟
نحن كمان متحمّسين جدًا، وعاوزين نمّتعك بيها.
الشغل ده قرّرررب ينزل 😎 بس إنت خلّيك قريب وتابع! 😁
--
*الصورة من صفحة البريتش كونسل.
#كشف
ما قدرت تحضر عروض الأفلام في مهرجان الفيلم السوداني-الأوروبي؟
كشّف غطّت ليك جزء من الفعاليات دي وحتدّيك الزيت، بس شنو، إنت خلّيك قريب وتابع الصفحة والقناة.
الليلة حيكون في عرض حماسي ودسّيس للأفلام السودانية، حيتعرض فيلم (رحلة إلى كينيا) وهو من إخراج إبراهيم أحمد "سنوبي". الفيلم فاز بجائزة لجنة التحكيم في مهرجان السودان للسينما المستقلة في دورتو السادسة، وكمان شارك في العديد من العروض العالمية في نيجيريا ومصر وغيرهم.
الفيلم التاني هو (نوم الديك) للمخرج سيف عبد الله واللي شارك في عدد من المهرجانات العربية والعالميّة واترشّح للفوز بكم جائزة.
--
*الصورة من صفحة البريتيش كونسيل.
#كشف
البريتيش كونسيل (British Council Sudan) بالتعاون مع يونيك سودان (EUNIC Sudan) قايمين بشغل دسّيس!
لو انت زيّنا كده بتحب السينما حتنبسط بمهرجان السينما السوادنيّة-الأوروبيّة العاملينّوا ناس البريتيش كونسيل يوم الجمعة الجاي ده (26/02/2021، في معرض الخرطوم الدولي) واللي ح يعرضو فيهو أفلام قصيرة وطويلة، وثائقيّة وروائيّة، لصنّاع أفلام سودانيين وأوروبيين.
من الأسماء السودانيّة المميّزة المشاركة بواحد من أفلامها، شهاب ساتّي (مخرج الفليم بتاع سيروتنين) وابراهيم سنوبي (مخرج الفيلم الوثائقي بتاع رحلة إلى كينيا).
يلا شنو، منشن الفِرَد العندهم عربات؛ عشان تلحق وتحضر الحاجات الدسّيسة دي؛ المفترض تحجز من بدري وبعربيتك كمان (العرض ببدا سبعة مِسَا). ايوة، الحنك ده عاملنّو نظام سينما عربات وكده 😁. شغل خوّاجات وبتاع 😎. جخننة شديدة 🌚👀😂.
كدي مُر على الجدول ده، ورابط الحجز حتلقاهو في التعليقات تحت.
#كشف
مش قبل كده وعدناك إنّنا حنعرّفك على سوزانا ميرغني من قريب، ونخلّيك تسمع منّها هي ذاتها؟
الليلة جبنا ليك كلامها القالتو عن نفسها، وعن فيلم (السّت)، وعن مشاريعها الجاية، وكل ده في حوار اتعمل معاها ضمن فعاليات مهرجان (كليرمونت-فيراند) واتنشر فيديو الحوار على الموقع الرسمي للمهرجان. نزلنا ليك الرابط بتاعو تحت (في أوّل تعليق).
يلّا نتعرف سوا على سوزانا 😉
--
"أنا سوزانا ميرغني صانعة أفلام سودانية، ومخرجة فيلم (السّت). الفيلم هو قصة زواج بيتم ترتيبو لبنت عمرها 15 سنة، في واحدة من قرى السودان البيتزرع فيها القطن. البت دي بتحب ليها ولد من القرية، بس أمها وأبوها بيدبّروا ليها عِرس مع رجل أعمال شاب من برّا القرية. لكن في الوقت ده، وقبل يحصل أي شي، الحبوبّة "السّت" واللهي الزولة البتمتلك القوة، وكلمتها مسموعة، بتدّي البت بركاتها وبتحتويها، وكل أحداث الفيلم بتدور في الحتّة دي.
"في الحقيقة، القصّة دي إلهامها جاني من ذاكرة الطفولة الأتشكّلت بسبب نشأتي في السودان، لأنّو ده الوضع الطبيعي في معظم الأسُر السودانية. وفي الواقع، أنا كنت دايمًا مفتونة بحقيقة إنّو كلّ الأسُر دي عاوزة تسمع راي المَرَة الواحدة العجوز دي، واللهي بتمثّل الحبّوبة وزعيم الأسرة، وهي أكبر زول في العمر. لكن أكتر حاجة أنا حاولت أتكلّم عنّها على وجه الخصوص، هو إنّو في إمرأة جسدها صغير للدرجة دي، بس مع ذلك، لسّة أي زول بيسمع كلامها البتقولوا، وما بيقدر يكسِر كلمتها، خصوصًا في كل ما يتعلّق بالزواج.
"بالنسبة للفيلم ده، وبقيّة أفلامي التانية، فهي جاية من القصص اللي بنسمعها لأوّل مرّة ونحن أطفال صغار، زي حكايات الجنّيات والخرافات التانية، دي كانت طريقتنا البنفسّر بيها العالم وبنقدر نتعرف بيها على الواقع من خلال الحكايات الخياليّة دي. أنا دايمًا كنت مهتمّة بالسينما البتدّينا لمحة سحريّة، مع كامل الإحترام "لسينما الواقع". برضو مهتمة دايمًا بأيّ شي مهما كان صغير وممكن يسوقنا خارج حياتنا الواقعية. طبعًا، انا ما بتكلّم عن إنّنا نتجاوز هوليوود ولا أيّ حاجة بالشكل ده، لكن بتكلم عن أيّ شي حتى لو كان صغير بس يكون مختلف عن الواقع.
"(السّت) هو في الحقيقة إثبات لجدوى فكرة الفيلم؛ عشان كده أنا لمّا بديت كتابة الفيلم كنت عاوزة أخلق ميزة، لأنّها قصّة طويلة جدًا، ولسّة في منّها بقيّة، وأنا كنت عاوزة أدّي مثال بسيط بس عشان اثبت إنّو الفيلم ده ممكن يبقى. و(السّت) هو مجرّد خدوش بس على سطح القضايا دي، قضايا النسويّة، قضايا الإستعمار، وقضايا الرأسماليّة في السودان. نحن شايفين لمحات صغيرة من القضايا دي في (السّت)، لكن في الحقيقة أنا عاوزة ألحمها مع بعض في فيلم حيكون اسمو (ملكة القطن).
"جائحة كورونا أثّرتْ على عملي الإبداعي، وده ممكن يكون حسن حظ أو سوء حظ لأنّها دي الطريقة الوحيدة الخلّتني أكمّل (السّت) في السنة دي، لأنو الجائحة حصلتْ بعد خلّصنا إنتاج الفيلم عشان كده قضّينا آخر ثمانية أو تسعة شهور بنمنتج، وما طلعنا من البيت على الإطلاق، ولأنّنا ما عتّبنا باب البيت طيلة الفترة دي كلّها قِدِرنا في الحقيقة ننجز الفيلم."
#كشف
--
قام فريق كشّف بترجمة الحوار من الإنجليزيّة.
الصورة مأخوذة من صفحة سوزانا ميرغني الشخصيّة.
حصل مرّة شفت فيلم دسّيس وسألت روحك الفيلم ده اتكتب كيف؟ او حصل فكّرت إنّك تكتب فيلم؟
سيناريو الفيلم لا هو مسرحية ولا هو رواية، وان كان بيتشارك معاهم في عناصر اساسيّة متعلّقة بالسرد عمومًا. الصورة في الفيلم هي حجر اساس الحكيّ وايّ حاجة تانية، مهما كانت مهمّة ومؤثّرة، بتجي عشان تساعد الصورة في تحريك القصّة لنهايتها.
صنّاع الأفلام وكتّاب السيناريو بيقولو إنّو احسن طريقة تبدا بيها التعرّف على الشكل الفنّي ده هو أنّك تقرا سيناريوهات كتيرة لأفلام تمّ إنتاجها. القراية دي، واللي ممكن تكون صعبة للبعض في البداية، (حأورّيك ليه بعدين) حتخلّيك تفهم نمط وتنسيق كتابة السيناريو اوّلًا، واساليب الكتّاب المختلفة في وصف الحركة (الآكشن) والشخصيّات، وفي كتابة المشهد اللي يشدّك كمشاهد/قاريء. يعني اختلاف كتّاب السيناريو ما بس في الحوارات بل في عناصر أكتر جوهريّة في الحرفة دي.
يلّا شنو، عشان تقدر تقرا السيناريوهات دي وما تحس إنّك معسّم، انتظر معاي لحدّي البوست الجاي عشان ح نبدا نفكفك فيهو السيناريو حتّة حتّة، ونفهم ليه هو بيتكتب بالطريقة الغريبة دي.
ممكن لو حابّي تستكشف من هسّة تمشي تقرا سيناريو فيلم (قبل الغروب 2004) للمخرج ريتشارد لينكليتر. ونحنا اخترنا الفيلم عن قصد؛ لأنّو بسيط واغلبو حوارات، وما فيهو موجّهات مونتاج معقّدة، بالإضافة لكونو واحد من اعظم الأفلام الرومانسيّة بالنسبة لينا.
لينك السيناريو:
https://drive.google.com/file/d/15fE_fey52QsNlURNJPe1p8ohAEf_7NOb/view?usp=drivesdk
#كشف
Khartoum
Be the first to know and let us send you an email when كشّف - Kashif posts news and promotions. Your email address will not be used for any other purpose, and you can unsubscribe at any time.
Send a message to كشّف - Kashif:
دي المدنيّة الدايرنّها! 😎 British Council Sudan Brahim Ahmad Snoopy
إنطباعات الناس عن أول تجربة لسينما السيّارت في السودان..
"الجمهور السوداني متعطّش لفكرة مشاهدة الأفلام – خاصّةً الأفلام السودانيّة" 😏 "أنا أوّل ما سمعت بالحاجة دي قلت إنّو لازم نمشي!" 😃 "أنا أوّل مرّة أشوف فيلم سوداني كان هسّة" 😳 "عايزة اشوف قصص بتعبّر عن مجتمعنا وثقافتو" 🙃 -- #كشف #عندنا_سينما
حضرتو حلقة امبارح؟👀 لو اجابتك نعم، اها كيف كانت؟😁 لو لأ، انت قاعد تعمل شنو؟🙄 امشي كشّف الحوار كامل في قناتنا في يوتيوب. كشّف وورّينا رايك شنو؟😊 رابط قناة كشِّف: https://www.youtube.com/channel/UCp7Dz-ZNqeZXLIVsiDuhfQQ
للناس الما حضرتْ الفيديو في يوتيوب، ده عرضنا لفيلم نيركوك (2016) وهو كتابة واخراج محمد كردفاني واتناولنا فيهو السيناريو، أداء الشخصيّات، السينماتوغرافي، وبقيّة العناصر الرئيسيّة في صناعة الفيلم.
