Spirit Of Islam - CPS

20/11/2025

لوگ جہنمی انگاروں میں کودتے ہیں اور سمجھتے ہیں کہ وہ خوبصورت پھولوں سے کھیل رہے ہیں۔ وہ دوزخ کے راستوں میں دوڑ رہے ہیں اور خوش ہیں کہ بہت جلد وہ جنت کے باغوں میں پہنچنے والے ہیں۔ آہ! وہ قافلہ جس کے پاس جھوٹی خوش فہمیوں کے سوا اور کوئی سرمایہ نہیں ۔آہ! وہ لوگ جو خدا کی دنیا میں اپنے لئے ایک ایسی دنیا بنانا چاہتے ہیں جس کی خدا نے انھیں اجازت نہیں دی۔

نار جہنم
مولانا وحیدالدین خان

20/11/2025

*دوسرے کے لیے دعاء*

ایک روایت حدیث کی مختلف کتابوں میں آئی ہے۔ صحیح مسلم کے الفاظ یہ ہیں: دعوۃ المرء المسلم لأخیہ بظہر الغیب مستجابۃ، عند رأسہ ملک موکَّل، کلّما دعا لأخیہ بخیر، قال الملک الموکّل بہ آمین ولک بمثل (کتاب الذکر والدعاء، باب فضل الدعاء للمسلمین بظہر الغیب) یعنی آدمی جب اپنے بھائی کی غیر موجودگی میں اُس کے لیے دعاء کرتا ہے تو ایسی دعاء قبول ہوتی ہے۔ اس کے پاس ایک فرشتہ موجود رہتا ہے۔ جب بھی وہ اپنے بھائی کے لیے خیر کی دعاء کرتا ہے تو فرشتہ کہتا ہے کہ تمھاری دعاء قبول ہو اور اسی کے مثل تمھارے لیے بھی۔
دوسرے کی غیر موجودگی میں اس کی بھلائی کے لیے دعا کرنا ، ہمیشہ انسانی خیر خواہی کے جذبے سے ہوتا ہے۔ انسان کے لیے سچی خیر خواہی ایک عظیم عبادت ہے۔
جب بھی کسی آدمی کے اندر دوسرے انسان کے لیے سچی خیر خواہی کاجذبہ ابھرے اور وہ اُس انسان کی غیر موجودگی میں اس کے لیے اللہ سے دعاء کرے، تو وہ ضرور قبول ہوتی ہے۔ ایسی دعا کبھی ضائع نہیں جاتی۔
لیکن کوئی بھی دعاء سنت اللہ کو منسوخ کرنے والی نہیں بن سکتی۔ دعاء کی قبولیت ہمیشہ سنت اللہ کے مطابق ہوتی ہے۔ جہاں تک دعاء کرنے والے کی ذات کا تعلق ہے، اس کو اپنے جذبۂ خیر خواہی کی بنا پر ضرور ثواب ملے گا۔لیکن جس شخص کے لیے دعاء کی گئی ہے، اُس کے لیے دعاء کی قبولیت اِس پر منحصر ہے کہ وہ شخص واقعۃً خود اپنے اندر اِس کا کتنا زیادہ استحقاق رکھتا ہے۔
اللہ کی سنت کے مطابق ایسا نہیں ہوسکتا کہ دوسرا شخص خود اپنی ذات میں قبولیت کا استحقاق نہ رکھتا ہو، اِس کے باوجود اس کو دعاء کا فائدہ حاصل ہوجائے۔ کسی کے لیے دعاء کرنا بلاشبہہ ایک عبادت ہے۔ لیکن کسی کے حق میں دعاء کا قبول ہونا خالص ایک خدائی معاملہ ہے۔ یہ صرف اللہ کو معلوم ہے کہ ذاتی استحقاق کے اعتبار سے کون اِس کا اہل ہے اور کون اِس کا اہل نہیں۔

الرسالہ جون 2009
مولانا وحید الدین خان

20/11/2025

19/11/2025

۲۳ مئی ۱۹۹۱

قرآن میں ہے کہ بچہ والی عورتیں اپنے بچوں کو دو برس کامل دودھ پلائیں( البقرہ ۲۳۳) دوسری جگہ قرآن میں ہے کہ ماں کا اپنے بچہ کو دودھ چھڑانا دو برس میں ہوتا ہے۔
( لقمان ۱۴) اسی طرح حدیث میں ہے کہ لارضاع الاماكان في الحولين ،رضاعت صرف وہ ہے جو دو سال میں ہو، الجامع لاحکام القرآن ۳/ ۱۶۲ قرآن و حدیث میں دو سال کی واضح صراحت کی بنا پر جمہور کے نزدیک رضاعت کی مدت دو سال ہے ۔ مگر امام ابو حنیفہ اس کی مدت ڈھائی سال بتاتے ہیں، اور امام زفر نے اس کی مدت تین سال بتائی ہے ۔ وقال ابو حنيفة : ثلاثون شهر ا وقال زفر ثلاثة سنين) التفسير المظهري ۳۲۳/۱
قدماء کے یہاں اس طرح کا اختلاف رائے کثرت سے پایا جاتا ہے۔ مگر اس قسم کے اختلافات کی بنیاد پر وہ لوگ ایک دوسرے کو مطعون نہیں کرتے تھے۔ بلکہ وہ تاویل سے کام لیتے تھے۔ موجو زمانہ میں اگر کوئی شخص اس طرح اپنی مختلف رائے ظاہر کرے تو فوراً اس کی تنقیص و تفسیق کی مہم شروع کر دی جاتی ہے۔ اس کی وجہ یہ ہے کہ قدماء زندہ لوگ تھے اور آجکل کے لکھنے اور بولنے والے مردہ لوگ۔

ڈائری مولاناوحیدالدین خان

19/11/2025

دین کا کام

دومسلم نوجوان ملاقات کے لیے آۓ ۔ انھوں نے کہا کہ ہم دونوں دین کا کام کرنا چاہتے ہیں ۔ کیوں کہ آج ساری دنیا میں اسلام کے خلاف سازشیں ہورہی ہیں ، اسلام کو بد نام کیا جا رہا ہے، الحاد زور پکڑ تا جارہا ہے۔ایسے ماحول میں دین کا کام کیسے کیا جاۓ ۔
میں نے کہا کہ حدیث میں آیا ہے : ابدأ بنفسك (صحیح مسلم ، حدیث نمبر 997) ۔ یعنی اپنے آپ سے شروع کرو۔ اس حدیث رسول کے مطابق ، آپ کو یہ کرنا ہے کہ سب سے پہلے خود اپنا محاسبہ کر میں۔ اپنی غلطیوں کو دریافت کر میں۔ اپنی اصلاح کر کے اپنے آپ کو اسلام پر قائم کر یں جب آپ ایسا کر لیں ،تب آپ اس قابل ہو جائیں گے کہ آپ دوسروں کی اصلاح کے لیے اٹھیں ۔
ابھی آپ کی سوچ یہ ہے کہ ساری دنیا اسلام کی دشمن ہے ۔لوگ اسلام کے خلاف سازشیں کرر ہے ہیں۔ اسلام کو جڑ سے اکھاڑنے کے لیے منصوبے بناۓ جار ہے ہیں ۔ اس سوچ کے تحت آپ یہ سمجھتے ہیں کہ آج اسلام کی خدمت یہ ہے کہ اس کے دشمنوں کوختم کیا جاۓ ۔ جب تک اسلام کے دشمنوں کو ختم نہ کیا جاۓ ، اسلام اور مسلمانوں کے لیے عمل کا راستہ نہیں کھلے گا۔
اس کا مطلب یہ ہے کہ ابھی آپ کا دل دوسروں کی نفرت سے بھرا ہوا ہے ۔ایسی حالت میں آپ کا پہلا کام یہ ہے کہ آپ اپنے دل کو دوسروں کی دشمنی سے پاک وصاف کریں، اپنے آپ کواسلام کی خدمت کے قابل بنائیں ۔ یہ داخلی اصلاح کا کام ہے۔ جب داخلی اصلاح ہوجاۓ ، تب خارجی اصلاح کا کام ہوگا۔
جب آپ اپنے آپ کو انسان سے محبت کرنے والا بنائیں گے تو فطری طور پر یہ ہوگا کہ آپ سوچیں گے کہ دین کا کام کس طرح انجام دیا جائے کہ وہ لوگوں کے لیے زیادہ مؤثر ثابت ہو ۔اس کے بعد آپ اپنا مطالعہ بڑھائیں گے، دوسروں کےبارے میں ضروری معلومات جمع کریں گے اور دعوت کے کام کی پلاننگ کریں گے تا کہ وہ زیادہ مفید ثابت ہو۔
الرسالہ، فروری 2019

18/11/2025

جس آدمی کے اندر اللہ کا ڈر پیدا ہوجائے اس کے دل سے ایک اللہ کے سوا ہر دوسری چیز کی اہمیت نکل جاتی ہے۔ وہ صرف ایک اللہ کو ساری اہمیت دینے لگتا ہے۔ حدیبیہ کا موقع صحابہ کے لیے اسی قسم کا ایک شدید امتحان تھا جس میں وہ پورے اترے۔ اس موقع پر فریق ِثانی نے جاہلانہ ضد اور اور قومی عصبیت کا زبردست مظاہرہ کیا۔ مگر صحابہ ہر چیز کو خدا کے خانہ میں ڈالتے چلے گئے۔ ان کے متقیانہ مزاج نے ان کو اس سخت امتحان میں جوابی ضد اور جوابی عصبیت سے بچایا۔ وہ مسلسل اشتعال انگیزی کے باوجود آخر وقت تک مشتعل نہیں ہوئے۔

تذکیر القرآن سورہ الفتح آیت 26

18/11/2025

دینی زوال میں کیا ہوتا ہے

ھل تدری ای العلم یرفع،قال قلت لا ادری۔قال الخشوع حتی لا یری خاشعًا (ابن عبد البر،جامع بیان العلم وفضلہ ،جزراوّل ،صفحہ 300)۔
کیا تم جانتے ہو ، کون سا علم اٹھالیا جائے گا ۔ انھوں نے کہا نہیں ، فرمایا خشوع اٹھالیا جائے گا۔ یہاں تک کہ کوئی خاشع دکھائی نہ دے گا ۔
جس گروہ کے پاس خدا کی کتاب ہو ، اس پر جب دینی زوال آتا ہے تو ایسا نہیں ہوتا کہ دین داری کی صورتیں مٹ جاتی یا اس کا چرچا باقی نہیں رہتا ۔ایسا تاریخ میں کبھی نہیں ہوا ۔ان کا زوال دراصل یہ ہے کہ دین ان کے یہاں قساوت کی سطح پر باقی ہو ، خشوع کی سطح پر وہ ختم ہوجائے (الحدید،57:16)۔ خشوع والی دین داری قلب میں اتری ہوئی ہوتی ہے ۔جب کہ قساوت والی دین داری صرف اعضاء وجوارح کو چھوتی ہے ، وہ شعور کا حصہ نہیں ہوتی ، وہ آدمی کے اندرونی وجود میں آگ نہیں لگا تی ۔

تجدید دین
مولانا وحیدالدین خان

17/11/2025

اللہ کے کتنے بندے اور بندیاں سچائی کی تلاش میں ہیں مگر کوئی ان کو سچائی کی بات بتانے والا نہیں ۔ کوئی شخص نبوت کا دعویٰ کرے تو تمام مسلمان اس سے لڑنے کے لیے کھڑے ھو جائیں گے ۔ مگر کار نبوت سے عملا وہ اس طرح غافل ہیں جیسے انہیں انتظار ھو کہ دوبارہ کوئی نبی آئے اور ان کی طرف سے یہ کام کر دے ۔ یہ صورت حال اس وقت ھے جبکہ مسلمان ساری دنیا میں تقریباً ایک سو کروڑ ہیں ۔ہجوم کے درمیان سناٹا کی اس سے زیادہ عجیب مثال کوئی دوسری نہیں ملے گی ۔

دعوت اسلام
مولانا وحیدالدین خان