Karachi Union of Journalists

28/05/2024

کے یو جے کا نجی چینل سے وابستہ حافظ معاذ کی فوری بازیابی کا مطالبہ
چیف جسٹس آف پاکستان نوٹس لیں اور حافظ معاذ کو بازیاب کرائیں، کے یو جے کی اپیل
یہ ملک میں آزادی صحافت اور آزادی اظہار رائے پر حملوں کا تسلسل ہے، فہیم صدیقی صدر کے یو جے
وزیراعظم اور وزیر داخلہ حافظ معاذ کی بازیابی میں اپنا کردار ادا کریں، لیاقت رانا جنرل سیکریٹری کے یو جے

کراچی یونین آف جرنلسٹس نے اے آر وائی ڈیجیٹل سے وابستہ صحافی حافظ معاذ بن خالد کے گھر پر چھاپے اور انہیں حراست میں لے کر نامعلوم مقام پر منتقل کیے جانے کی سخت الفاظ میں شدید مذمت کی ہے اور چیف جسٹس آف پاکستان جسٹس فائز عیسی سے اپیل کی ہے کہ وہ حافظ معاذ کو فوری طور پر بازیاب کرانے کا حکم دیں ۔ کراچی یونین آف جرنلسٹس کے صدر فہیم صدیقی اور جنرل سیکریٹری لیاقت علی رانا سمیت مجلس عاملہ کے تمام اراکین کی جانب سے جاری ایک بیان میں کہا گیا ہے کہ حافظ معاذ کو بفرزون میں واقع ان کے گھر سے آج صبح نامعلوم افراد اپنے ساتھ لے گئے ان کے والد کے مطابق گھر میں گھسنے والے افراد میں بعض پولیس کی وردی میں تھے جبکہ چند سادہ لباس افراد بھی ہمراہ تھے حافظ معاد کے والد کے مطابق ان کے بیٹے کو لے جاتے ہوئے کہا گیا کہ وہ ایک معاملے میں تفتیش کیلئے آدھے گھنٹے کے لیے حافظ معاذ کو لے کر جارہے ہیں انہیں جلد ہی چھوڑ دیا جائے لیکن اب کئی گھنٹے گزر چکے ہیں اور حافظ معاذ کا کچھ پتہ نہیں ہے، کراچی یونین آف جرنلسٹس نے اس واقعے کو ملک میں آزادی صحافت اور آزادی اظہار رائے پر حملوں کا تسلسل قرار دیا ہے اور وزیراعظم پاکستان شہباز شریف، وزیر داخلہ محسن نقوی، وزیراطلاعات عطا تارڑ اور وزیراعلی سندھ سے مطالبہ کیا ہے کہ وہ اس کا نوٹس لیں اور حافظ معاذ کو فی الفور بازیاب کرانے کا حکم دیں۔ کے یو جے کی جانب سے جاری بیان میں کہا گیا ہے کہ ماضی میں اسی طرح کی کارروائیوں میں کراچی سے کئی صحافیوں کو گھروں سے اٹھایا گیا لیکن حکمرانوں اور بالخصوص سیاسی جماعتوں کی جانب سے مسلسل خاموشی کی وجہ سے ان واقعات کا سلسلہ رک نہیں رہا ہے جبکہ تمام سیاسی جماعتوں کے منشور میں ملک میں آزادی صحافت اور اظہار رائے کی آزادی شامل ہے۔ کراچی یونین آف جرنلسٹس نے یہ معاملہ سندھ کمیشن فار جرنلسٹس اینڈ ادر میڈیا پریکٹشنرز کو بھی بھیج دیا ہے اور کمیشن کے چیئرمین جسٹس ریٹائرڈ نظر اکبر سے اس کا فوری نوٹس لینے کی اپیل کی ہے۔

جاری کردہ
لیاقت علی رانا
جنرل سیکریٹری
کراچی یونین آف جرنلسٹس

03/05/2024

آزادی صحافت کے حوالے سے پاکستان کی عالمی درجہ بندی افسوسناک ہے، کے یو جے
پاکستان کا عالمی درجہ بندی میں 150 ویں نمبر پر ہونا حکومتوں اور سیاسی جماعتوں کی ناکامی ہے، فہیم صدیقی
صدر کے یو جے
صحافت ملک کا چوتھا ستون ہے اسے کمزور کرنا ملکی مفاد میں نہیں ہے، لیاقت رانا جنرل سیکریٹری کے یو جے

کراچی یونین آف جرنلسٹسس نے آزادی صحافت کے عالمی دن کے موقع پر پاکستان میں آزادی صحافت کی صورتحال کو تشویشناک قرار دیا ہے اور کہا ہے کہ پاکستان آزادی صحافت کے اعتبار سے عالمی درجہ بندی میں 150 ویں نمبر پر ہے جو ماضی کی حکومتوں اور سیاسی جماعتوں کی سب سے بڑی ناکامی ہے کے یو جے کے صدر فہیم صدیقی اور جنرل سیکریٹری لیاقت علی رانا سمیت مجلس عاملہ کے تمام اراکین کی جانب سے جاری ایک بیان میں کہا گیا ہے کہ ملک میں آزادی اظہار رائے اور آزادی صحافت دونوں پر غیر اعلانیہ سنسر شپ عائد ہے جو معاشرے کیلئے زہر قاتل ہے۔ پاکستان میں صحافیوں کا اغوا، تشدد اور انہیں مختلف طریقوں سے ہراساں کیا جانا معمول بن چکا ہے، ارشد شریف سے لے کر جان محمد مہر تک کے قاتلوں کی عدم گرفتاری بھی ایسے عناصر کی حوصلہ افزائی کے مترادف ہے جو ان کارروائیوں کے پیچھے ہیں بیان میں حکومت سے مطالبہ کیا گیا ہے کہ وہ پاکستان میں آزادی صحافت کی صورتحال کو بہتر بنانے کیلئے کام کرے تاکہ پاکستان کا دنیا بھر میں ایک مثبت امیج اجاگر ہو بیان میں سی پی این ای کی پریس فریڈم اینڈ مانیٹرنگ کمیٹی کی رپورٹ کو بنیاد بناتے ہوئے کہا گیا ہے کہ یکم جنوری 2023 سے 30 اپریل 2024 تک پاکستان میں صحافیوں کے ساتھ تشدد، حملوں، گرفتاریوں اور قتل کے 28 سے زائد واقعات ہوئے 13 صحافیوں کو تشدد کا نشانہ بنایا گیا دو صحافیوں پر حملے ہوئے اور 10 صحافیوں کی گرفتار کرکے ان کے خلاف مقدمات قائم کردیئے گئے ملک میں اس عرصے میں 04 صحافی قتل ہوئے جن کے قاتلوں کو تاحال عدالتوں سے سزائیں نہیں سنائی جاسکی ہیں بیان میں مزید کہا گیا ہے کہ ملک میں آزادی صحافت کی صورتحال کو بہتر بنانے کیلئے حکومت، سیاسی جماعتوں اور صحافی تنظیموں کو ایک پیج پر آنا ہوگا کراچی یونین آف جرنلسٹس اس سلسلے میں وقتا فوقتا اپنی تجاویز حکومتوں اور سیاسی جماعتوں کو بھیجتی رہی ہے اور ایک بار پھر اس کیلئے تیار ہے کیونکہ ملک کی ترقی اور جمہوریت کے فروغ کیلئے آزادی اظہار رائے اور ازادی صحافت انتہائی ضروری ہیں صحافت ملک کا چوتھا ستون ہے اور اس ستون کو کمزور کرنا کسی بھی طرح ملکی مفاد میں نہیں ہوسکتا۔

جاری کردہ
لیاقت علی رانا
جنرل سیکریٹری
کراچی یونین آف جرنلسٹس

03/05/2024

سندھ ہائیکورٹ کا بڑا فیصلہ
کراچی یونین آف جرنلسٹس کی مجلس عاملہ کو بحال کردیا
پی ایف یو جے کو کے یو جے کے معاملات میں مداخلت نہ کرنے کا حکم
کے یو جے کے صدرفہیم صدیقی اور جنرل سیکریٹری لیاقت رانا سمیت مجلس عاملہ کو کام جاری رکھنے کی ہدایت
پی ایف یو جے کے سیکریٹری جنرل، ایڈہاک کمیٹی اور الیکشن کمیٹی کے چیئرمین ذاتی حیثیت میں طلب
عدالت نے نام نہاد بلا مقابلہ انتخابات پر بھی حکم امتناع جاری کر دیا
کے یو جے کے صدر فہیم صدیقی اور جنرل سیکریٹری لیاقت رانا نے عدالت عالیہ میں دعوی دائر کیا تھا
مقدمے میں ارشد انصاری، چیئرمین ایڈہاک کمیٹی اور چیئرمین الیکشن کمیٹی سیف خٹک کو فریق بنایا گیا تھا
مقدمے میں کے یو جے کی مجلس عاملہ کو معطل اور ایڈہاک کمیٹی کے قیام کو چیلنج کیا گیا تھا
پی ایف یو جے کا کے یو جے کی مجلس عاملہ کو معطل اور ایڈہاک کمیٹی قائم کرنا غیر آئینی ہے، درخواست میں موقف
پی ایچ یو جے نے اپنے کسی فیصلے سے کے یو جے کی قیادت کو آگاہ نہیں کیا، موقف
ایڈہاک کمیٹی نے غیر آئینی طور پر سیف خٹک کی سربراہی میں الیکشن کمیٹی قائم کی
آئین کے مطابق الیکشن کمیٹی یکم فروری 2023 کو کے یو جے کے پہلے اجلاس میں قائم کردی گئی تھی،موقف
ایڈہاک کمیٹی نے غیر آئینی طور پر ووٹر لسٹ تیار کی، درخواست میں موقف
آئین کے مطابق ووٹر لسٹ دو دسمبر 2023 کو پی ایف یو جے کو بھیج دی گئی تھی، موقف
الیکشن، آئین کے تحت قائم کردہ الیکشن کمیٹی اور پی ایف یو جے کو بھیجی گئی ووٹر لسٹ پر ہی ممکن تھے، موقف
الیکشن کمیٹی نے غیر آئینی طور پر الیکشن شیڈول جاری کیا، درخواست میں موقف
الیکشن شیڈول میں پولنگ کیلئے 4 مئی کی تاریخ مقرر کی گئی، درخواست میں موقف
بدنیتی کا مظاہرہ کرتے ہوئے من پسند امیدواروں کو 4 مئی سے پہلے ہی بلا مقابلہ کامیاب قرار دیدیا گیا، موقف
عدالت نے حکم امتناع جاری کرتے ہوئے مدعا علیہان کو آئُندہ سماعت پر طلب کرلیا
عدالتی حکم حق اور سچ کی فتح ہے، فہیم صدیقی صدر کے یو جے
یوم آزادی صحافت پر عدالتی فیصلہ صحافی برادری کو مبارک ہو، لیاقت رانا جنرل سیکریٹری کے یو جے
صحافیوں کے حقوق کی جدوجہد جاری رہے گی، مجلس عاملہ کے یو جے

16/01/2024

جعلی صحافیوں کو قید و جرمانے کی سزا پر کے یو جے کا اظہار اطمینان
انسداد دہشت گردی کی خصوصی عدالت نے بقا نیوز کے مالک اور نمائندے کو 5/5 سال کی سزا سنادی
ملزمان نے ایک شخص کو بلیک میل کرکے رقم وصول کی تھی، ملزمان کو 10/10 ہزار جرمانہ بھی ادا کرنا ہوگا
عدالتی فیصلہ زرد صحافت کے خاتمے کی جانب ایک قدم ہے، فہیم صدیقی صدر کے یو جے
عام شہری جعلی صحافیوں کے متعلق شکایات کے یو جے کے پاس درج کراسکتے ہیں، لیاقت رانا جنرل سیکریٹری کے یو جے

کراچی یونین آف جرنلسٹس نے صحافت کی آڑ میں بلیک میلنگ کرنے والے دو ملزمان کو انسداد دہشت گردی کی خصوصی عدالت سے قید و جرمانے کی سزا کا خیرمقدم کیا ہے اور عدالتی فیصلے کو سراہتے ہوئے اسے زرد صحافت کے خاتمے کی جانب ایک قدم قرار دیا ہے کراچی یونین آف جرنلسٹس کے صدر فہیم صدیقی اور جنرل سیکریٹری لیاقت علی رانا سمیت مجلس عاملہ کے تمام اراکین کی جانب سے جاری ایک بیان میں کہا گیا ہے کہ انسداد دہشت گردی کی خصوصی عدالت نے یو ٹیوب چینل بقا نیوز کے مالک مزمل اسلم مونگا اور نمائندے وسیم عباس ہاشمی کو بھتہ خوری اور انسداد دہشت گردی ایکٹ کی دفعات کے تحت 5/5 سال قید اور 10/10 ہزار روپے جرمانے کی سزا سنائی ہے ملزمان نے صحافی کا روپ دھار کر ہڈیوں کے امراض کا دیسی علاج کرنے والے شخص کو بلیک میل کرکے اس سے ڈیڑھ لاکھ روپے وصول کیے تھے رقم کی یہ لین دین بقا نیوز کے دفتر میں ہوئی جبکہ مزید رقم ایزی پیسہ کے ذریعے بھی دی گئی عدالت نے تمام شواہد کی روشنی میں ملزمان کو سزا سنائی ہے کے یو جے نے عدالتی فیصلے پر اطمینان کا اظہار کرتے ہوئے اس عزم کو دہرایا ہے کہ کراچی یونین آف جرنلسٹس زرد صحافت کے خاتمے کے لیے اپنا کردار ادا کرتی رہے گی اور صحافت کے روپ میں بلیک میلرز کو عامل صحافیوں کی صفوں میں برداشت نہیں کیا جائے گا کے یو جے نے عام شہریوں سے بھی اپیل کی ہے کہ وہ صحافی بن کر بلیک میلنگ کرنے والے افراد سے متعلق شکایات کراچی یونین آف جرنلسٹس کو فراہم کریں کے یو جے ایسی شکایات پر فوری کارروائی کرتی ہے ایسے افراد کیخلاف مقدمات کے اندراج کیلئے کے یو جے خود متعلقہ فورمز سے رجوع کرے گی۔

جاری کردہ
لیاقت علی رانا
جنرل سیکریٹری
کراچی یونین آف جرنلسٹس

31/12/2023

27/11/2023

کے یو جے کا سینئر صحافی فیاض یونس کو ایف آئی اے کے نوٹس پر اظہار تشویش
فیاض یونس کو نوٹس آزادی صحافت پر حملہ اور عدالتی احکامات کی خلاف ورزی ہے، فہیم صدیقی صدر کے یو جے
اسلام آباد ہائیکورٹ واضح کرچکی ہے کہ تنقیدی رپورٹنگ پر ایف آئی اے کو اختیارات کے استعمال کی اجازت نہیں دی جاسکتی، لیاقت علی رنا جنرل سیکریٹری کے یو جےے
وفاقی وزیر داخلہ اور چیف جسٹس پاکستان سینئر صحافی کو ہراساں کرنے کا نوٹس لیں، کے یو جے

کراچی یونین آف جرنلسٹس نے سینئر صحافی اور کے یو جے کے رکن فیاض یونس کو ایف آئی اے کی جانب سے نوٹس جاری کیے جانے پر تشویش کا اظہار کیا ہے اور نگراں وفاقی وزیر داخلہ سرفراز بگٹی سے مطالبہ کیا ہے کہ وہ اسلام آباد ہائیکورٹ کے واضح فیصلے کے باوجود ایف آئی اے کی جانب سے صحافیوں کو ہراساں کرنے کی مسلسل کاررائیوں کو فی الفور روکیں کے یو جے کے صدر فہیم صدیقی اور جنرل سیکریٹری لیاقت علی رانا سمیت مجلس عاملہ کے تمام اراکین کی جانب سے جاری ایک بیان میں کہا گیا ہے کہ فیاض یونس کو ایف آئی اے سائبر کرائم کے انکوائری افسر فرہاد علی کی جانب سے نوٹس جاری کیا گیا ہے جو انہیں ہراساں کرنے کی کوشش ہے جبکہ اسلام آباد ہائیکورٹ صحافی رانا محمد ارشد کے کیس میں اپنے فیصلے میں واضح طور پر قرار دے چکی ہے کہ آزادی صحافت کو روکنا یا اسے محدود کرنا ناقابل قبول ہے ریاست اور اس کے نمائندوں کو اپنے اختیارات تنقیدی رپورٹنگ کو دبانے یا اختلاف رائے پر انتقامی کارروائی کے لیے استعمال کرنے کی اجازت نہیں دی جاسکتی عدالت نے اپنے فیصلے میں قرار دیا تھا کہ ایف آئی اے کے بے پناہ اختیارات کا غلط استعمال صحافتی ذمہ داریاں انجام دینے والوں سے انتقام کے تاثر کو تقویت دیتا ہے ایف آئی اے حکام اس بات کو یقینی بنائیں کہ ان کی کارروائی بدنیتی پر مبنی یا اختیارات سے متجاوز نہ ہو بیان میں کہا گیا ہے عدالت نے اپنے فیصلے میں یہ بھی قرار دیا تھا کہ عوام کو اطلاعات پہنچانے والے رپورٹرز کو انتقامی کارروائی کا خوف یا خدشہ ناقابل برداشت ہے لیکن ایف آئی اے مسلسل عدالتی احکامات کی خلاف ورزی کررہی ہے بیان میں کہا گیا ہے کہ ماضی میں بھی کراچی کے کئی صحافیوں کو ایف آئی اے سائبر کرائم کی جانب سے اسی طرح نوٹسز جاری کیے گئے تھے جو کے یو جے کے احتجاج پر واپس لے لیے گئے تھے۔ کے یو جے نے وفاقی وزیر داخلہ سرفراز بگٹی سے مطالبہ کیا ہے کہ وہ ناصرف صحافیوں کو مسلسل ہراساں کرنے کا نوٹس لیں بلکہ ایف آئی اے کے ایسے افسران کیخلاف کارروائی بھی کریں جو اپنے اختیارات سے تجاوز کررہے ہیں ان کا یہ عمل ایک طرف آزادی صحافت اور آزادی اظہار رائے پر حملہ ہے تو دوسری طرف توہین عدالت بھی ہے۔ کے یو جے نے چیف جسٹس پاکستان جناب فائز عیسی سے بھی اپیل کی ہے کہ وہ ایف آئی اے کی جانب سے عدالتی فیصلے کی خلاف ورزیوں کا نوٹس لیں اور ایف آئی اے کے متعلقہ حکام کے خلاف توہین عدالت کی کارروائی کی جائے

جاری کردہ
لیاقت علی رانا
جنرل سیکریٹری
کراچی یونین آف جرنلسٹس

07/11/2023

رضیہ فرید کیلئے دعائے صحت کی اپیل

کراچی یونین آف جرنلسٹس کی رکن،سینئر جرنلسٹ اور روزنامہ جنگ کی میگزین ایڈیٹر رضیہ فرید کا آج کراچی کے مقامی اسپتال میں بائی پاس آپریشن ہے کراچی یونین آف جرنلسٹس نے کراچی سمیت ملک بھر کی صحافی برادری سے رضیہ فرید کیلئے دعائے صحت کی اپیل کی ہے کے یو جے کی جانب سے جاری دعائیہ بیان میں کہا گیا ہے کہ رضیہ فرید دنیائے صحافت کا ایک عظیم سرمایہ ہیں اللّہ تعالیٰ سے دعا ہے کہ ان کا آپریشن کامیاب ہو اور اللّہ تعالی انہیں صحت کاملہ عاجلہ نصیب فرمائے آمین
جاری کردہ
لیاقت علی رانا
جنرل سیکریٹری
کراچی یونین آف جرنلسٹس

05/11/2023

ایئر سیال کے چینل ٹیلن نیوز سے جبری برطرفیوں پر لائسنس معطلی کا مطالبہ
وفاقی اور صوبائی نگراں حکومتیں ٹیلن نیوز کو بلیک لسٹ کریں کسی قسم کا اشتہار جاری نہ کیا جائے، صدر کے یو جے فہیم صدیقی
آزادی صحافت اور میڈیا ورکرز کے حقوق کی بات کرنے والی سیاسی جماعتیں ٹیلن نیوز پر اپنی انتخابی مہم سے گریز کریں، جنرل سیکریٹری لیاقت رانا

کراچی یونین آف جرنلسٹس نے نجی ایئر لائن ایئر سیال کے نام نہاد مالکان کی جانب سے لائے گئے نیوز چینل ٹیلن نیوز سے دو ماہ میں ہی بڑے پیمانے پر جبری برطرفیوں پر شدید احتجاج کرتے ہوئے چیئرمین پیمرا سے ٹیلن نیوز کے لائسنس کی فوری طور پر معطلی کا مطالبہ کیا ہے اور اس وقت تک وفاقی اور صوبائی نگراں حکومتوں سے ٹیلن نیوز کو فوری طور پر بلیک لسٹ کرتے ہوئے اسے کسی قسم کی اشتہارات نہ دینے کی اپیل کی ہے کے یو جے نے اپنے انتخابی منشور میں آزادی صحافت اور میڈیا ورکرز کے حقوق کی بات کرنے والی تمام سیاسی جماعتوں سے بھی مطالبہ کیا ہے کہ وہ ٹیلن نیوز پر اپنی الیکشن مہم سے لازمی گریز کریں۔ کراچی یونین آف جرنلسٹس کے صدر فہیم صدیقی اور جنرل سیکریٹری لیاقت علی رانا سمیت مجلس عاملہ کے تمام اراکین کی جانب سے جاری ایک احتجاجی بیان میں کہا گیا کہ سیالکوٹ کی سیاسی و کاروباری شخصیات چوہدری سلیم بریار اور چوہدری قیصر بریار نے اپنے سیاسی اور کاروباری مفادات کے لیے میڈیا انڈسٹری میں قدم رکھا تھا لیکن دو ہی ماہ میں ہوا کا رخ مخالف سمت میں دیکھ کر انہوں نے ٹیلن نیوز میں کراچی لاہور اور اسلام آباد سے بڑے پیمانے پر جبری برطرفیاں کی ہیں، برطرف کیے گئے ملازمین کو سادے کاغذ پر برطرفی کے پروانے دیئے گئے جبکہ ان کے بقایا جات بھی انہیں ادا نہیں کیے جارہے۔ کے یو جے کی جانب سے جاری بیان میں کہا گیا ہے کہ چیف جسٹس آف پاکستان مسٹر جسٹس فائز عیسی کو پی ٹی آئی حکومت کے آخری دور میں ٹیلن نیوز کا لائسنس جاری کیے جانے کی تحقیقات کرانی چاہئیں۔ بیان میں چیئرمین پیمرا محمد سلیم سے مطالبہ کیا گیا ہے کہ وہ ٹیلن نیوز کے لائسنس کے اجرا میں بے قاعدگیوں کی تحقیقات کرائیں اور پیمرا قوانین کے تحت ٹیلن نیوز سے جبری برطرف کیے گئے تمام ملازمین کے واجبات کی ادائیگی کو یقینی بنائیں کے یو جے نے ملک بھر میں ٹیلن نیوز سے برطرف کیے گئے ملازمین سے اظہار یکجہتی کرتے ہوئے کہا ہے کہ کے یو جے انہیں اس مشکل وقت میں تنہا نہیں چھوڑے گی اور ان کے حقوق کی جدوجہد جاری رکھے گی۔

جاری کردہ
لیاقت علی رانا
جنرل سیکریٹری
کراچی یونین آف جرنلسٹس

27/10/2023

کے یو جے کی چیف جسٹس آف پاکستان سے میڈیا ہاوسز کا فارنزک آڈٹ کرانے کی اپیل
نگراں وزیراعظم کے بیان اور اے پی این ایس کے ردعمل پر غور، دونوں مل بیٹھ کر مسئلہ حل کریں ، کے یو جے
نئے میڈیا مالکان اپنے دیگر کاروبار کو شیلٹر دینے کے لیے میڈیا انڈسٹری میں آرہے ہیں، صدر کے یو جے
میڈیا ہاوسز میں لیبر لاز کی سنگین خلاف ورزیوں کو بھی نوٹس لیا جائے، جنرل سیکریٹری لیاقت رانا،
کے یو جے کے اجلاس میں ارکان کو یونین کارڈز کا اجرا جاری رکھنے کا بھی اصولی فیصلہ

کراچی یونین آف جرنلسٹس نے مختلف میڈیا ہاوسز میں تنخواہوں کی عدم ادائیگی اور تاخیر سے ادائیگی سمیت ایک نئے آنے والے نیوز چینل میں ممکنہ برطرفیوں کی اطلاعات اور ایک نیوز چینل کی فروخت کے بعد نئی انتظامیہ کی جانب سے ملازمین سے روا رکھے جانے والے رویے پر تشویش کا اظہار کیا ہے اور میڈیا مالکان کو متنبہ کیا ہے کہ وہ اپنی روش بدلیں بصورت دیگر کراچی یونین آف جرنلسٹس ناصرف ان میڈیا ہاوسز بلکہ ان کے مالکان کے گھروں کا بھی گھیراو کرے گی کراچی یونین آف جرنلسٹس نے چیف جسٹس آف پاکستان جسٹس فائز عیسی سے بھی اپیل کی ہے کہ وہ ماہانہ کروڑوں روپے کمانے والے میڈیا مالکان کے فارنزک آڈٹ کا حکم دیں اور ساتھ ہی اس بات کا بھی نوٹس لیں کہ میڈیا مالکان کس طرح اپنے میڈیا ہاوسز میں لیبر لاز کی سنگین خلاف ورزیاں کررہے ہیں کراچی یونین آف جرنلسٹس کی مجلس عاملہ کا ایک اجلاس صدر فہیم صدیقی کی صدارت میں کراچی پریس کلب میں ہوا جس میں جنرل سیکریٹری لیاقت علی رانا نے میڈیا ہاوسز کی مجموعی صورتحال پر اجلاس کو بریفنگ دی اجلاس میں مختلف پرنٹ اور الیکٹرانک میڈیا ہاوسز میں تںخواہوں کی عدم ادائیگی اور تاخیر سے ادائیگی کے معاملات زیر بحث آئے جبکہ نگراں وزیراعظم کے میڈیا ہاوسز سے متعلق بیان اور اس پر اے پی این ایس کے ردعمل پر بھی غور کیا گیا اجلاس میں لاہور سے ایک نئے نیوز چینل میں ممکنہ جبری برطرفیوں کی اطلاعات اور بول نیوز کی نئی انتظامیہ کی جانب سے ملازمین سے روا رکھے جانے والے رویے پر تشویش کا اظہار کیا گیا اجلاس میں کہا گیا کہ میڈیا انڈسٹری میں نئے آنے والے غیرپیشہ ور مالکان اس انڈسٹری کو مزید تباہی کی طرف لے جارہے ہیں وہ اپنے دیگر کاروبار کو شیلٹر دینے کے لیے اس انڈسٹری میں آتے ہیں اور بلند بانگ دعوے کرنے کے بعد چند روز میں ہی بجٹ کا رونا رونا شروع کردیتے ہیں۔ چیف جسٹس آف پاکستان اور خاص طور پر پیمرا کو اس کا نوٹس لینا چاہیے کراچی یونین آف جرنلسٹس کے اجلاس میں آئی ٹی این ای کے چیئرمین کے رویے پر بھی غم و غصے کا اظہار کیا گیا اور نگراں وزیراعظم سے مطالبہ کیا گیا کہ وہ روزنامہ ڈان کے مقدمات کئی ماہ سے سماعت کے لیے مقرر نہ کرنے اور مالکان کی طرف واضح جھکاو کا نوٹس لیتے ہوئے چیئرمین آئی ٹی این ای کے خلاف کارروائی کریں اجلاس میں نگراں وزیراعظم کے میڈیا ہاوسز خاص طور پر اخبارات کے بزنس ماڈل سے متعلق بیان اور اس پر اے پی این ایس کے ردعمل پر بھی غور کیا گیا اور حکومت اور اے پی این ایس دونوں سے مطالبہ کیا گیا کہ وہ اس معاملے کا مل بیٹھ کر حل نکالیں اجلاس میں کہا گیا کہ وزیراعظم کے بیان کا یہ حصہ درست ہے کہ اخبارات صرف سرکاری اشتہارات کے دم پر نہیں چلتے لیکن اس کے باوجود حکومت کی جانب سے سرکاری اشتہارات کی مد میں اخبارات کے 2 ارب روپے کے واجبات ادا نہ کرنا بھی ایک زیادتی ہے کراچی یونین آف جرنلسٹس نے اے پی این ایس سے بھی مطالبہ کیا کہ وہ بھی اس بات کو تسلیم کریں کہ ان کی اصل آمدنی پرائیویٹ اشتہارات سے ہے اور اخبارات کے پاس پرائیویٹ اشتہارات کی کوئی کمی نہیں ہے جبکہ ماضی کی حکومتوں پر سرکاری اشتہارات کی مد میں واجب الادا اربوں روپے پی ڈی ایم کی 16 ماہ کی حکومت میں اخباری مالکان کو ادا کیے گئے ہیں اس صورتحال میں اخبارات میں ملازمین کی تنخواہوں کی عدم ادائیگی یا تاخیر سے ادائیگی غیرمنصفانہ عمل ہے۔ کے یو جے نے نگراں وزیراعظم سے یہ مطالبہ بھی کیا ہے کہ جہاں انہوں نے اتنی ہمت کرتے ہوئے میڈیا مالکان کو آئینہ دکھانے کی کوشش کی ہے وہیں وہ میڈیا مالکان سے اس بات پر بھی عمل کرائیں کہ وہ اپنے ملازمین کو ناصرف وقت پر تںخواہ ادا کریں بلکہ رکی ہوئی تںخواہیں بھی یکمشت ادا کریں اور اگر کوئی میڈیا ہاوس ایسا نہیں کرتا تو اس کا ڈیکلیریشن فوری طور پر ختم کردیا جائے۔ اجلاس میں کے یو جے کے ارکان کو کارڈز کے اجرا کے معاملے کا بھی جائزہ لیا گیا اور طے پایا کہ ارکان کو کارڈز کے اجرا کا سلسلہ جاری رکھا جائے گا۔

جاری کردہ
لیاقت علی رانا
جنرل سیکرٹری
کراچی یونین آف جرنلسٹس

23/09/2023

نگراں وزیراعلی سندھ کی میڈیا ورکرز کے مسائل حل کرنے کی یقین دہانی
دنیا اخبار سمیت میڈیا ہاوسز سے جبری برطرفیوں، تنخواہوں کی تاخیر اور عدم ادائیگی پر رپورٹ طلب کرلی
کراچی یونین یونین آف جرنلسٹس کے صدر سے ملاقات میں فہیم صدیقی نے قلم اور کیمرے کے مزدوروں کے مسائل سے آگاہ کیا

نگراں وزیراعلی سندھ مقبول باقر نے میڈیا ورکرز کے مسائل حل کرنے کی یقین دہانی کرائی ہے اور میڈیا ہاوسز سے جبری برطرفیوں، تنخواہوں کی عدم ادائیگی اور تاخیر سے ادائیگی کے معاملات پر متعلقہ حکام سے رپورٹ طلب کرلی ہے۔ کراچی یونین آف جرنلسٹس سمیت دیگر مزدور تنظیموں کے نمائندہ وفد نے جمعے کو وزیراعلی سندھ سے وزیراعلی ہاوس میں ملاقات کی جس میں کے یو جے کے صدر فہیم صدیقی نے قلم اور کیمرے کے مزدوروں کے مسائل سے نگراں وزیراعلی کو تفصیل سے آگاہ کیا۔ کے یو جے کی جانب سے صرف ایک روز قبل دنیا گروپ کی جانب سے کراچی میں دنیا اخبار بند کرنے اور بڑے پیمانے پر جبری برطرفیوں جیسے غیرقانونی اقدام سے آگاہ کیا گیا صدر کے یو جے فہیم صدیقی نے وزیراعلی سندھ سے مطالبہ کیا کہ چونکہ اطلاعات و نشریات کا قلمدان تاحال خود ان کے پاس ہے تو وہ فوری طور پر دنیا گروپ کے ناصرف اشتہارات بند کرنے کا حکم دیں بلکہ اگر ان کے کوئی واجبات سندھ گورنمنٹ پر ہیں تو وہ بھی روکے جائیں۔ کے یو جے کے صدر کی جانب سے وزیراعلی سندھ کو نیوز ون، بول نیوز اور آج ٹی وی سمیت مختلف میڈیا ہاوسز تنخواہوں کی عدم ادائیگی اور تاخیر سے ادائیگی کی تفصیلات سے آگاہ کیا گیا جبکہ جنگ گروپ سمیت مختلف میڈیا ہاوسز میں 8 سالوں سے مہنگائی کے تناسب سے کوئی اضافہ نہ کیے جانے کا بھی بتایا گیا وزیراعلی سندھ نے اس موقع پر استفسار کیا کہ کیا میڈیا ہاوسز اداروں منافع میں نہیں ہیں جس پر انہیں بتایا گیا کہ میڈیا ہاوسز تاریخ کا بہترین بزنس کررہے ہیں اور اسی وجہ سے اب نئے لوگ بھی میڈیا انڈسٹری میں آرہے ہیں جیسا کہ ڈائیو گروپ نے بول نیوز اور الکبیر گروپ نے نیوز ون خرید لیا ہے وزیراعلی سندھ کو میڈیا ہاوسز میں مختلف لیبر لاز کی سنگین خلاف ورزیوں پر بریفنگ دی گئی انہیں بتایا گیا کہ میڈیا ہاوسز کیمروں سمیت اپنے تمام سامان کی تو انشورنس کرالیتے ہیں لیکن اسی کیمرے کے پیچھے کھڑے کیمرہ مین کو انشورڈ نہیں کراتے اور یہی وجہ ہے کہ جب کوئی صحافی کسی واقعے میں زخمی یا جاں بحق ہوتا ہے تو اسے کچھ نہیں ملتا۔ نگراں وزیراعلی سندھ نے یقین دہانی کرائی کہ وہ اپنے مختصر سے عرصے میں میڈیا ورکرز کے مسائل کے حل کیلئے اپنا کردار ادا کرنے کی بھرپور کوشش کریں گے انہوں نے متعلقہ حکام سے میڈیا ورکرز کے ایشوز پر رپورٹ طلب کرلی ہے۔

جاری کردہ
لیاقت علی رانا
جنرل سیکریٹری
کراچی یونین آف جرنلسٹس

09/07/2023

‎سندھ جرنلسٹس پروٹیکشن کمیشن نے ایس ایم عسکری کو بازیاب کرنے کا حکم دیدیا
‎واقعے سے متعلق رپورٹ 36 گھنٹوں میں کمیشن میں پیش کی جائے، چیئرمین جسٹس (ر) رشید اے رضوی کی ہدایت
‎ایس ایم عسکری کا اغوا آئین کے آرٹیکل 9 اور 10 کی سنگین خلاف ورزی ہے، ایگزیکٹو کمیٹی

‎سندھ جرنلسٹس اینڈ ادر میڈیا پریکٹشنرز کمیشن کی ایگزیکٹو کمیٹی کا ہنگامی اجلاس کمیشن کے چیئرمین جسٹس ریٹائرڈ رشید اے رضوی کی صدرات میں ہوا اجلاس روزنامہ جنگ کے سینئر رپورٹر ایس ایم عسکری کو نامعلوم افراد کی جانب سے اغوا کرکے لاپتہ کیے جانے کے واقعے پر کراچی یونین آف جرنلسٹس کی درخواست پر ایک نکاتی ایجنڈے پر طلب کیا گیا تھا اجلاس میں کمیشن کے رکن، کراچی یونین آف جرنلسٹس کے صدر فہیم صدیقی، ییومن رائٹس کمیشن آف پاکستان کے پروفیسر ڈاکٹر توصیف احمد خان اور سی پی این ای کے ڈاکٹر جبار خٹک نے شرکت کی اجلاس میں تواتر سے صحافیوں کے اغوا کے واقعات پر برہمی اور تشویش کا اظہار کیا گیا کمیشن کے چیئرمین جسٹس رشید اے رضوی کا کہنا تھا کہ چونکہ ایس ایم عسکری کسی مقدمے میں مطلوب نہیں تھے اس لیے یہ واضح طور پر اغوا کا واقعہ ہے اور یہ ریاست کی ذمے داری ہے کہ وہ اپنے شہریوں کی جان و مال اور آزادی کا تحفظ کرے ایگزیکٹیو کمیٹی کے اجلاس میں کہا گیا کہ ایس ایم عسکری کا اغوا اور لاپتہ کیا جانا آئین کے آرٹیکل 9 اور 10 کی بھی سنگین خلاف ورزی ہے۔ کمیشن کے چیئرمین نے سیکریٹری داخلہ سندھ اور انسپکٹر جنرل آف پولیس سندھ کو 24 گھنٹے میں ایس ایم عسکری کو بازیاب کرانے کا حکم دیا ہے اور ہدایت کی ہے کہ واقعے سے متعلق رپورٹ 36 گھنٹوں میں کمیشن میں پیش کی جائے

09/07/2023

‎روزنامہ جنگ کے سینئر رپورٹر ایس ایم عسکری کو فوری طور پر بازیاب کرایا جائے، کے یو جے
‎غیراعلانیہ سینسر شپ کے دور میں ایس ایم عسکری کا اغوا بدترین صورتحال ہے ، صدر کے یو جے فہیم صدیقی
‎ایس ایم عسکری کبھی کسی غیرقانونی سرگرمی میں ملوث نہیں رہے چیف جسٹس نوٹس لیں، جنرل سیکریٹری لیاقت علی رانا

‎کراچی یونین آف جرنلسٹس نے روزنامہ جنگ کے سینئر رپورٹر ایس ایم عسکری کو نامعلوم سادہ لباس اہلکاروں کی جانب سے ساتھ لے جانے کی سخت الفاظ میں شدید مذمت کی ہے اور چیف جسٹس آف پاکستان سے مطالبہ کیا ہے کہ وہ ملک میں صحافیوں کے اس طرح اغوا اور پھر لاپتہ کردینے کے واقعات کا نوٹس لیں اور ایس ایم عسکری کو فوری طور پر بازیاب کراکر گھر پہنچانے کا حکم دیں کراچی یونین آف جرنلسٹس کے صدر فہیم صدیقی اور جنرل سیکریٹری لیاقت علی رانا سمیت مجلس عاملہ کے تمام اراکین کی جانب سے جاری ایک بیان میں کہا گیا ہے کہ روزنامہ جنگ سے وابستہ سینئر صحافی ایس ایم عسکری کا ماضی گواہ ہے کہ وہ کبھی کسی غیرقانونی سرگرمی میں ملوث نہیں رہے لیکن ہفتہ اور اتوار کی درمیانی شب سادہ لباس میں ملبوس نامعلوم مسلح افراد انہیں زبردستی اپنے ساتھ لے گئے بیان میں کہا گیا ہے کہ ملک میں آزادی اظہار رائے اور آزادی صحافت پر پہلے ہی غیراعلانیہ سنسر شپ عائد ہے ایسے میں صحافیوں کا اغوا ایک بدترین صورتحال ہے ملک کی عدالتوں کو اس کا فوری نوٹس لینا چاہئے بیان میں چیف جسٹس آف پاکستان سمیت، چیف آف آرمی اسٹاف، وزیراعظم پاکستان اور وزیراعلی سندھ سے مطالبہ کیا گیا ہے کہ وہ فوری طور پر اس واقعے کا نوٹس لیں اور ایس ایم عسکری کی بحفاظت گھر واپسی کو یقینی بنائیں بیان میں کہا گیا ہے کہ اگر ایسا نہیں ہوتا تو کراچی یونین آف جرنلسٹس اس واقعے پر اپنا شدید ردعمل دے گی۔

‎جاری کردہ
‎لیاقت علی رانا
‎جنرل سیکریٹری
‎کراچی یونین آف جرنلسٹس

04/07/2023

جدوجہد جاری رہے گی ، فہیم صدیقی

06/06/2023

سندھ جرنلسٹس پروٹیکشن کمیشن نے زبیر انجم کو بازیاب کرنے کا حکم دیدیا
واقعے سے متعلق رپورٹ 36 گھنٹوں میں کمیشن میں پیش کی جائے، چیئرمین جسٹس (ر) رشید اے رضوی کی ہدایت
زبیر انجم کا اغوا آئین کے آرٹیکل 9 اور 10 کی سنگین خلاف ورزی ہے، ایگزیکٹو کمیٹی

سندھ جرنلسٹس اینڈ ادر میڈیا پریکٹشنرز کمیشن کی ایگزیکٹو کمیٹی کا ہنگامی اجلاس کمیشن کے چیئرمین جسٹس ریٹائرڈ رشید اے رضوی کی صدرات میں ہوا اجلاس جیو نیوز کے سینئر پروڈیوسر زبیر انجم کو نامعلوم افراد کی جانب سے اغوا کرکے لاپتہ کیے جانے کے واقعے پر کراچی یونین آف جرنلسٹس کی درخواست پر ایک نکاتی ایجنڈے پر طلب کیا گیا تھا اجلاس میں کمیشن کے رکن، کراچی یونین آف جرنلسٹس کے صدر فہیم صدیقی، ییومن رائٹس کمیشن آف پاکستان کے پروفیسر ڈاکٹر توصیف احمد خان، سی پی این ای کے ڈاکٹر جبار خٹک، وزارت انسانی حقوق کے ایگزیکٹو کوآرڈینیٹر جمیل جونیجو نے شرکت کی اجلاس میں زبیر انجم کے واقعے پر برہمی اور تشویش کا اظہار کیا گیا کمیشن کے چیئرمین جسٹس رشید اے رضوی کا کہنا تھا کہ چونکہ زبیر انجم کسی مقدمے میں مطلوب نہیں تھے اس لیے یہ واضح طور پر اغوا کا واقعہ ہے اور یہ ریاست کی ذمے داری ہے کہ وہ اپنے شہریوں کی جان و مال اور آزادی کا تحفظ کرے ایگزیکٹیو کمیٹی کے اجلاس میں کہا گیا کہ زبیر انجم کا اغوا اور لاپتہ کیا جانا آئین کے آرٹیکل 9 اور 10 کی بھی سنگین خلاف ورزی ہے۔ کمیشن کے چیئرمین نے سیکریٹری داخلہ سندھ اور انسپکٹر جنرل آف پولیس سندھ کو 24 گھنٹے میں زبیر انجم کو بازیاب کرانے کا حکم دیا ہے اور ہدایت کی ہے کہ واقعے سے متعلق رپورٹ 36 گھنٹوں میں کمیشن میں پیش کی جائے کمیشن کے چیئرمین نے سیکریٹری داخلہ اور آئی جی سندھ کو اس سلسلے میں تحریری ہدایات جاری کردی ہیں۔

06/06/2023

جیو نیوز کے سینئر پروڈیوسر زبیر انجم کو فوری طور پر بازیاب کرایا جائے، کے یو جے
غیراعلانیہ سینسر شپ کے دور میں زبیر انجم کا اغوا بدترین صورتحال ہے ، صدر کے یو جے فہیم صدیقی
زبیر انجم کا ماضی گواہ ہے وہ کبھی کسی غیرقانونی سرگرمی میں ملوث نہیں رہے چیف جسٹس نوٹس لیں، جنرل سیکریٹری لیاقت علی رانا

کراچی یونین آف جرنلسٹس نے جیو نیوز کے سینئر پرڈویوسر زبیر انجم کو نامعلوم سادہ لباس اہلکاروں کی جانب سے گھر سے ساتھ لے جانے کی سخت الفاظ میں شدید مذمت کی ہے اور چیف جسٹس آف پاکستان سے مطالبہ کیا ہے کہ وہ ملک میں صحافیوں کے اس طرح اغوا اور پھر لاپتہ کردینے کے واقعات کا نوٹس لیں اور زبیر انجم کو فوری طور پر بازیاب کراکر گھر پہنچانے کا حکم دیں کراچی یونین آف جرنلسٹس کے صدر فہیم صدیقی اور جنرل سیکریٹری لیاقت علی رانا سمیت مجلس عاملہ کے تمام اراکین کی جانب سے جاری ایک بیان میں کہا گیا ہے کہ جیو نیوز ملک کا صف اول کا میڈیا ہاوس ہے اور زبیر انجم جیو نیوز میں سینئر پروڈیوسر کے طور پر اپنے صحافتی فرائض انجام دے رہے ہیں ان کا ماضی گواہ ہے کہ وہ کبھی کسی غیرقانونی سرگرمی میں ملوث نہیں رہے لیکن پیر اور منگل کی درمیانی شب سادہ لباس میں ملبوس نامعلوم مسلح افراد رات گئے ماڈل کالونی میں واقع زبیر انجم کے گھر میں داخل ہوئے اور انہیں زبردستی اپنے ساتھ لے گئے زبیر انجم کے بھائی کے مطابق سادہ لباس اہلکاروں نے زبیر انجم کے گھر والوں کو زدوکوب بھی کیا اور جاتے ہوئے زبیر انجم کا موبائل فون اور پڑوس میں لگے سی سی ٹی وی کیمروں کے ڈی وی آر بھی ہمراہ لے گئے۔ بیان میں کہا گیا ہے کہ ملک میں آزادی اظہار رائے اور آزادی صحافت پر پہلے ہی غیراعلانیہ سنسر شپ عائد ہے ایسے میں صحافیوں کا گھروں سے اغوا ایک بدترین صورتحال ہے ملک کی عدالتوں کا اس کا فوری نوٹس لینا چاہئے بیان میں چیف جسٹس آف پاکستان سمیت، چیف آف آرمی اسٹاف، وزیراعظم پاکستان اور وزیراعلی سندھ سے مطالبہ کیا گیا ہے کہ وہ فوری طور پر اس واقعے کا نوٹس لیں اور زبیر انجم کی بحفاظت گھر واپسی کو یقینی بنائیں بیان میں کہا گیا ہے کہ اگر ایسا نہیں ہوتا تو کراچی یونین آف جرنلسٹس اس واقعے پر اپنا شدید ردعمل دے گی۔

جاری کردہ
لیاقت علی رانا
جنرل سیکریٹری
کراچی یونین آف جرنلسٹس

20/05/2023

کراچی یونین آف جرنلسٹس کا صدر کےیوجے فہیم صدیقی اور مدثر سعید کی جبری برطرفی کےخلاف جنگ جیو بلڈنگ کے سامنے مظاہرہ صحافیوں کی بڑی تعداد کی شرکت۔مظاہرین نے جیوانتظامیہ کے ظالمانہ اقدامات کے خلاف شدید نعرے بازی کی۔

کراچی یونین آف جرنلسٹس نےصدر کےیوجے فہیم صدیقی اور بیورو چیف جیو اسلام آباد مدثرسعید کی جبری برطرفی کے خلاف ہفتے کی شام جیوجنگ بلڈنگ کے سامنے احتجاجی مظاہرہ کیا مظاہرے میں بڑی تعداد میں صحافی شریک ہوٸے۔وکلا رہنماٶں نے مظاہرے میں شریک ہوکر صحافی برادری کے ساتھ اظہار یکجہتی کیا۔مظاہرے سےکراچی یونین آف جرنلسٹس کے جنرل سیکرٹری لیاقت علی رانا۔خازن جاوید قریشی۔سابق صدر پریس کلب امتیاز فاران۔کراچی بار ایسوسی ایشن کے سابق جنرل سیکرٹری خالد ممتاز ایڈووکیٹ۔طاہرقریشی ایڈووکیٹ اور یونس آفریدی نے بھی خطاب کیا۔ مقررین نے فہیم صدیقی اور مدثرسعیدکی جبری برطرفی کی شدید مذمت کی اور مطالبہ کیاکہ صدر کےیوجے فہیم صدیقی اور مدثر سعیدکو فوری طور پر بحال کیا جاٸے۔۔مقررین کاکہناتھاکہ
فہیم صدیقی نے ہمیشہ قلم اور کیمرے کے مزدور سمیت ہر صحافی کے لئے جدوجہد کی ہے۔
انھوں میرشکیل کی گرفتاری کے خلاف بھی بھرپور احتجاجی تحریک چلاٸی لیکن جیو انتظامیہ نے جس بےحسی اور ظالمانہ طریقےسے انھیں ملازمت سے برطرف کیاہے وہ بہت قابل افسوس اور قابل مذمت ہے۔مقررین نےکہاکہ صدر کےیوجے اور دیگر برطرف صحافیوں کی بحالی تک جدوجہدکاسلسلہ جاری رہےگا۔۔
جاری کردہ

لیاقت علی رانا
جنرل سیکرٹری
کراچی یونین آف جرنلسٹس

15/05/2023

14/05/2023

یوم عزم پر جیو اور جنگ کیخلاف ملک بھر میں صحافیوں کا احتجاج، کے یو جے کے تحت جیو جنگ بلڈنگ کےباہر مظاہرہ
جیو سے برطرف ملازمین کو فوری بحال اور لیبر قوانین کی سنگین خلاف ورزیاں روکنے کا مطالبہ
آزادی اظہار رائے کی بات کرنے والے جیو نیوز میں ملازمین پر آزادی اظہار کی پابندی ہے، مقررین کاخطاب

جنگ بلڈنگ کے باہر مظاہرے میں صحافیوں، وکلا، مزدور رہنماٶں اور سول سوسائٹی کے اراکین کی بڑی تعداد میں شرکت،
کے یو جے نے احتجاجی تحریک کے اگلے مرحلے میں جیو کے مائیک پر پابندی کا اعلان کردیا

کراچی کے صحافیوں، وکلا، مزدور رہنماٶں اور سول سوسائٹی نے جیو نیوز سے جبری برطرفیوں اور لیبر قوانین کی سنگین خلاف ورزیوں پر سخت ردعمل دیتے ہوئے جیو نیوز کی انتظامیہ سے مطالبہ کیا ہے کہ وہ فوری طور پر برطرف کیے گئے ملازمین کو ملازمتوں پر بحال کرے اور ادارے میں لیبر قوانین پر عملدرآمد کرتے ہوئے وقت پر تنخواہ اداکرنےکےساتھ تنخواہوں میں مہنگاٸی کےحساب سے اضافہ، گریجویٹی اور پراویڈنٹ فنڈ جیسے لازمی قوانین پر عمل کرے ہفتے کو پاکستان فیڈرل یونین آف جرنلسٹس کی کال پر پورے ملک کی طرح کراچی میں بھی جیو نیوز کے دفتر کے باہر زبردست احتجاجی مظاہرہ کیا گیا جس میں صحافیوں، مزدوروں، وکلا اور سول سوسائٹی کے ارکان کی بڑی تعداد نے شرکت کی پاکستان میں 13 مئی کا دن 1978 میں ضیا دور میں کوڑوں کی سزا کھانے والے آزادی صحافت کے ہیروز کی یاد میں یوم عزم کے طور پر منایا جاتا ہے پاکستان فیڈرل یونین آف جرنلسٹس نے اس دن کے موقع پر جیو نیوز سے جبری برطرفیوں کے خلاف جیو نیوز کے باہر احتجاج کی کال دی تھی کراچی یونین آف جرنلسٹس کے تحت ہونے والے مظاہرے سے خطاب کرتے ہوئے مقررین کا کہنا تھا کہ جنگ اور جیو ملک میں آزادی اظہار رائے اور آزادی صحافت کی بات کرتے ہیں لیکن عملی طور پر ان کے اقدامات اس کی نفی ہیں ادارے میں ملازمین کے اظہار رائے پر مکمل پابندی ہے کوئی اپنے حقوق کے لیے آواز بلند نہیں کرسکتا اور اگر کوئی ایسا کرنے کی کوشش کرے تو اسے عدالتوں سے نوٹس بھجوائے جاتے ہیں یا پھر ملازمت سے برطرف کردیا جاتا ہے یہ وہ ملازمین ہیں جنہوں نے ہمیشہ اس ادارے کا برے سے برے وقت میں ساتھ دیا چاہے پرویز مشرف کا دور ہو جب چینل پر پابندی لگادی گئی یا حامد میر پر حملے کے بعد لگنے والی پابندیاں یہ ملازمین ادارے کی ڈھال بنے رہے عمران خان کے دور حکومت میں میر شکیل الرحمن کی نیب کے ہاتھوں گرفتاری کے وقت بھی یہی ملازمین تھے جو احتجاجی تحریک چلا رہے تھے مقررین نے جیو کی انتظامیہ کے رویے کی سخت الفاظ میں مذمت کی اور کہا کہ عدالت سے جن ملازمین کو نوٹسز بھجوائے گئے تھے اب انہیں نوکری سے نکالنے کی دھمکیاں دے کر ان سے معافی ناموں پر دستخط کرائے جارہے ہیں ملک کی عدلیہ کو اس کا نوٹس لینا چاہیے اس موقع پر کے یو جے کی جانب سے احتجاجی تحریک کے اگلے مرحلے میں سرکاری اور نیم سرکاری تقریبات سمیت تمام تقریبات میں جیو کے مائیک پر پابندی کا بھی اعلان کیا گیا سخت گرم موسم میں ہونے والے مظاہرے میں مظاہرین نے جنگ اور جیو کی انتظامیہ کے خلاف سخت نعرے بازی کی جبکہ وہ اپنے ہاتھوں میں مختلف بینرز اور پلے کارڈز بھی اٹھائے ہوئے تھے جن پر مطالبات کے حق میں نعرے درج تھے مظاہرے سے انسانی حقوق کمیشن آف پاکستان کے پروفیسر توصیف احمد خان، انسانی حقوق کے رہنما ضیا اعوان ایڈووکیٹ، پائلر کے کرامت علی، ہوم بیسڈ وومن ورکرز فیڈریشن کی جنرل سیکریٹری زہرہ خان، نیشنل ٹریڈ یونین فیڈریشن کے محمد عاطف، پورٹ ورکرز یونین کے صدر اور پیپلز لیبر بیورو کے رہنما حسین بادشاہ، معروف مزدور رہنما اخلاق احمد، سندھ بار کونسل کی ایگریکٹو کمیٹی کے چیئرمین ممتاز قانون دان نعیم قریشی، کراچی بار ایسوسی ایشن کے جنرل سیکریٹری وقار عالم عباسی ایڈووکیٹ، پاکستان فیڈرل یونین آف جرنلسٹس کے خازن لالہ اسد پٹھان، کراچی یونین آف جرنلسٹس کے صدر فہیم صدیقی، جنرل سیکریٹری لیاقت علی رانا، کے یو جے دستور کے دستور گروپ کے رہنما محمد عارف خان، کراچی یونین آف جرنلسٹس کے سابق صدر شاہد اقبال انجمن فلاح وبہبودکی براٸےخواتین کی چیٸرپرسن بابرہ اسماعیل اوردیگر نے خطاب کیا

جاری کردہ
لیاقت علی رانا
جنرل سیکریٹری
کراچی یونین آف جرنلسٹس