Holiday Times Newspaper

06/12/2024

05/12/2024

سی ڈی اے، سابق ڈی جی سرور سندھو کا گرین بیلٹ پر قائم کیفے مسمار، 5 ہاکر پاسز بھی کینسل

تجاوزات مافیا کے خلاف جاری گرینڈ آپریشن کے دوران کئی سنسنی خیز انکشافات، سی ڈی اے کے اپنے سابق و حاضر سروس افسران و ملازمین ملوث نکلے

سی ڈی اے کے سابق ڈائریکٹر جنرل غلام سرور سندھو کے صاحبزازے کا جناح سپر مارکیٹ میں گرین بیلٹ پر قبضہ کرکے بنائے گئے کیفے کو گرا دیا گیا

سابق ڈی جی نے اپنے بیٹے جنید سرور سندھو کے نام اسلام آباد کے پوش ترین سیکٹرز میں غیرقانونی طور پر پانچ ہاکر پاسز بھی جاری کرا رکھے تھے

سابق اسسٹنٹ گل شیر نے ہزاروں جعلی ٹریڈ لائسنس جاری کئے،سینئر اسپیشل مجسٹریٹ کی عدالت میں ڈی ایم اے کی طرف سے دی گئی رپورٹ میں انکشافات


اسلام آباد( شبیرسہام سے )
وفاقی دارالحکومت اسلام آباد میں تجاوزات مافیا کے خلاف جاری گرینڈ آپریشن کے دوران کئی سنسنی خیز انکشافات ہوئے ہیں۔ شہر کے گرین بیلٹ پر قبضہ کرکے کاروبار چمکانے والوں میں سی ڈی اے کے اپنے سابق و حاضر سروس افسران و ملازمین ملوث پائے گئے۔ وفاقی ترقیاتی ادارہ( سی ڈی اے ) کے سابق ڈائریکٹر جنرل(ڈی جی) غلام سرور سندھو کے صاحبزازے کی طرف سے اسلام آباد کے پوش سیکٹر جناح سپر مارکیٹ میں گرین بیلٹ پر قبضہ کرکے بنائے گئے غیرقانونی کیفے کے خلاف ڈائریکٹوریٹ آف میونسپل ایڈمنسٹریشن(ڈی ایم اے) کی اینٹی انفورسمنٹ ٹیم نے کارروائی کرتے ہوئے تمام سامان ضبط کیا تو آپریشن ٹیم کو سی ڈی اے کے سابق ڈی جی غلام سرور سندھو کی طرف سے شدید مزاحمت کا بھی سامنا کرنا پڑا۔ تاہم ٹیم نے قانون کے تحت اپنی کارروائی جاری رکھی اور گرین بیلٹ کو تجاوزات سے واگزار کرا لیا۔ بعدازاں ڈی ایم اے کی جانب سے اس آپریشن کے بعد سینئر اسپیشل مجسٹریٹ کی عدالت میں سرور سندھو کی کارستانیوں سے متعلق کئی ہوشرباء انکشافات پر مبنی اپنی رپورٹ بھی جمع کروائی گئی۔"ھالیڈے ٹائمز" کو موصول ہونے والی معلومات کے مطابق ڈی ایم اے کی طرف سے سینئر اسپیشل مجسٹریٹ کی عدالت میں جمع کرائی گئی رپورٹ میں انکشاف کیا گیا ہے کہ جناح سپر مارکیٹ ایف سیون مرکز میں گرین بیلٹ پر واقع غیرقانونی کیفے "مسٹری کافی" سی ڈی اے کے سابق ڈائریکٹر جنرل غلام سرور سندھو کے صاحب زادے جنید سرور سندھو کی ملکیتی تھا۔ اس کیفے کے خلاف جب آپریشن کیا گیا تو سابق ڈی جی غلام سرور سندھو موقع پر آئے اور ٹیم کو قانونی کارروائی سے روکنے کی کوشش کی گئی اور سنگین نتائج کی دھمکیاں بھی دی گئیں۔ لیکن آپریشن ٹیم نے شدید مزاحمت کے باوجود اپنا کام جاری رکھا اور تمام سامان ضبط کرتے ہوئے سرکاری سٹور میں منتقل کر دیا ہے۔ رپورٹ میں مزید انکشاف کیا گیا ہے کہ سابق ڈی جی سی ڈی اے غلام سرور سندھو نے اپنے بیٹے جنید سرور سندھو کے نام اسلام آباد کے پوش ترین سیکٹرز ایف سکس، ایف سیون، ای سیون اور ایف ٹین میں پانچ ہاکر پاسز بھی حاصل کر رکھے تھے۔ جن کے سیریل نمبرز 115 سے 119 تک ہیں۔ یہ ہاکر پاسز غریب ریڑھی بانوں کا حق ہے لیکن سابق ڈی جی نے اپنے بیٹے کو نواز رکھا تھا۔ یہ تمام ہاکر پاسز سابق اسسٹنٹ گل شیر جوکہ ڈی ایم اے میں اسسٹنٹ ڈائریکٹر کے اختیارات کے مزے بھی لوٹتا رہا نے غیرقانونی طور پر اور ملی بھگت سے جاری کئے تھے۔ سابق اسسٹنٹ گل شیر اپنی تعیناتی کے دوران ہزاروں غیرقانونی اور جعلی ٹریڈ لائسنس کے اجراء میں بھی ملوث رہا اور کروڑوں روپے کمائے۔ رپورٹ میں مزید بتایا گیا ہے کہ کیفے کے خلاف آپریشن کے دوران کیفے مالکان نے ٹیم کو اوپن سپیس کا آفر لیٹر دکھایا۔ نہ تو وہ گرانٹ لیٹر دکھا سکے اور نہ ہی لائسنس کے لئے اپلائی کر رکھا تھا۔ رپورٹ میں بتایا گیا کہ اوپن سپیس بھی خاص ایس او پیز کے تحت ہی دی جاتی ہیں۔ فوڈ بزنس کا فرنٹ حصہ اوپن سپیس کے طور پر استعمال کرنے کی اجازت ملتی ہے۔ جبکہ یہاں تو معاملہ ہی الٹ تھا۔ یہ تجاوزات مافیا ایک گفٹ شاپ "منی سو" کے سامنے گرین بیلٹ پر اپنا کاروبار سجاکر اوپن سپیس کا آفر لیٹر بیٹھے تھے۔ دوسری اہم بات یہ ہے کہ اوپن سپیس صرف اور صرف کرسیاں اور ٹیبلز رکھنے کی حد تک دی جاتی ہیں۔ جبکہ کیفے مالکان گرین بیلٹ پر کھانے پینے کی اشیاء بنانے اور پکانے میں بھی مصروف تھے۔ رپورٹ میں یہ بھی بتایا گیا کہ سابق ڈی جی سی ڈی اے سرور سندھو نے سیکٹر ایف ایٹ ون اللہ والی مارکیٹ کے گرین بیلٹ پر بھی اسی طرح قبضہ کر رکھا ہے جہاں ایک غیرقانونی کیفے موجود ہے۔ جس کے خلاف بھی آپریشن کرنے کی ضرورت ہے۔ ذرائع کا کہنا ہے کہ اسی طرح اسلام آباد کے دیگر اہم پوش سیکٹرز اور تجارتی مراکز میں قائم غیرقانونی کھوکھے، کیفے، ہوٹلز اور یہاں تک کے ریڑھیاں لگانے میں سی ڈی اے اور ڈی ایم اے کے اپنے چند کرپٹ افسران و ملازمین براہ راست ملوث ہیں۔

07/11/2024

( Friday, November 08, 2024 )

07/11/2024

( Thursday, November 07, 2024 )