Daily Manzil -e-Murad Hafizabad

04/11/2025

https://youtu.be/xYGVx04izv0?si=l_ctKqt-BiXW86q_
دیر آئید درست آئید
ویلڈن محترمہ سائرہ افضل تارڑ
کرپشن کے خاتمہ کے لئے اہم قدم
ایک اہم میسج اور ٹرننگ پوائینٹ
بی ٹیم کے حوالے سے اہم فیصلہ
سب کچھ جاننے کے لئے لنک پر کلک کریں۔

05/08/2025

"الحمدللہ میرا 4 اگست یوم شہداء پولیس کے حوالے سے کالم اور اس کی کوریج۔احباب کا بہت شکریہ
۔ُُ۔
وہ جو خاک میں مل کے وفا کا علم اٹھا گئے

تحریر :گلزار حسین چوہان

پولیس کے شعبے کو اگر ریاست کا بازوئے شمشیر زن کہا جائے تو یہ بات ہرگز مبالغہ نہیں ہو گی۔ ریاست کی رِٹ قائم رکھنے، قانون کی بالادستی کو یقینی بنانے، امنِ عامہ برقرار رکھنے اور شہریوں کے جان و مال، عزت و آبرو کے تحفظ کی جو بھاری ذمہ داری ہے، وہ محکمہ پولیس کے سپرد ہے۔ یہ وہ ادارہ ہے جو نہ دن دیکھتا ہے نہ رات، نہ سردی کا لحاظ کرتا ہے نہ گرمی کا گلہ۔ ہر لمحہ، ہر موسم میں فرض کی پکار پر لبیک کہتا ہے۔ جو کام باقی ادارے دفتری اوقات کے اندر انجام دیتے ہیں، وہی کام پولیس ہر پل، ہر قدم پر، جان ہتھیلی پر رکھ کر ادا کرتی ہے۔
ہر سال 4 اگست کو پاکستان بھر میں یومِ شہداء پولیس منایا جاتا ہے تاکہ ان گمنام اور جری سپوتوں کو خراجِ عقیدت پیش کیا جا سکے جنہوں نے قانون و امن کے علم کو تھامے ہوئے اپنی جانوں کا نذرانہ پیش کیا۔ یہ دن تقاریب اور تصویروں تک محدود نہیں ہونا چاہیے بلکہ یہ ہمیں جھنجھوڑنے، یاد دلانے اور ذمہ داری کا احساس دِلانے کا دن ہے۔ یہ صرف ان شہیدوں کا ذکر نہیں بلکہ ان کے مشن کا اعادہ ہے۔ وہ مشن جس کے لیے انہوں نے ہنستے ہوئے کفن پہنا اور مٹی کی چادر اوڑھ لی۔
پولیس ادارے کی افادیت سے انکار ممکن نہیں۔ جب معاشرے میں ظلم بڑھ جائے، قانون شکن دندناتے پھریں، جب عام شہری خوف کے سائے میں سانس لے، تب یہی پولیس ہوتی ہے جو پہلی دیوار بن کر مجرموں کے سامنے کھڑی ہوتی ہے۔ عدالتوں کا دروازہ بعد میں کھلتا ہے، لیکن فریادی سب سے پہلے تھانے کا رخ کرتا ہے۔ اسی لیے پولیس کا ادارہ معاشرتی امن و عدل کا پہلا محافظ ہے۔
اگر ہم اس ادارے کی خوبیوں پر نظر ڈالیں تو بے شمار ایسے افسران و جوان دکھائی دیتے ہیں جنہوں نے دہشت گردوں، ڈاکوؤں، اغوا کاروں اور ملک دشمن عناصر کے خلاف جانیں قربان کر کے وطن کی حفاظت کی۔ پنجاب، سندھ، خیبر پختونخوا، بلوچستان ،گلگت بلتستان اور آزاد کشمیر کے ہر ضلع میں ایسے سپوت موجود ہیں جنہوں نے گولیوں کی بوچھاڑ میں بھی پیچھے ہٹنا گوارا نہ کیا۔ اُن کے سینے چھلنی ہوئے مگر فرض کے قدم نہ لڑکھڑائے۔ وہ آج بھی ناصرف ہمارے دلوں میں زندہ ہیں بلکہ ملک کی غیرت کے ماتھے کا جھومر ہیں۔
محکمہ پولیس میں کئی اصلاحاتی پہلو بھی نمایاں ہوئے ہیں۔ سیف سٹی پراجیکٹس، ڈیجیٹل رپورٹنگ، خواتین پولیس کی شمولیت، کمیونٹی پولیسنگ ،سی سی ڈی کی بنیاد اور جدید ٹیکنالوجی کے استعمال نے پولیس کے کردار کو ایک نیا رنگ دیا ہے۔ بعض اہلکاروں کی جرات و بہادری ، فرض شناسی، نرم گفتاری، انصاف پسندی اور عوام دوستی نے محکمہ کی ساکھ بہتر بنانے میں نمایاں کردار ادا کیا ہے۔
لیکن اس تصویر کا دوسرا رخ بھی ہے جو اصلاح کا تقاضا کرتا ہے۔ محکمہ پولیس میں سیاسی مداخلت ایک خطرناک سرطان بن چکی ہے۔ میرٹ کی پامالی، سفارش، اقربا پروری، بدعنوانی اور بدنام زمانہ تھانہ کلچر عوام کے دلوں میں خوف پیدا کرتا ہے۔ کئی مقامات پر شہری تھانے جانے سے اس لیے گریز کرتے ہیں کہ انصاف کے بجائے مزید ظلم کا شکار نہ ہو جائیں۔ یہ خلیج اب اتنی وسیع ہو چکی ہے کہ اسے مٹانے کے لیے بلند دعوے نہیں بلکہ عملی اقدامات درکار ہیں۔
ایک اور قابلِ غور پہلو پولیس اہلکاروں کی فلاح و بہبود کا ہے۔ کم تنخواہ، طویل ڈیوٹی اوقات، نفسیاتی دباؤ، عدم تحفظ اور صحت کی سہولیات کا فقدان ان کی کارکردگی کو متاثر کرتا ہے۔ شہداء کے خاندان کئی بار حکومتی توجہ سے محروم نظر آتے ہیں۔ ان کے بچوں کی تعلیم، نوکری اور فلاح کے لیے کوئی مستقل پالیسی مرتب نہیں کی گئی۔ جو ادارہ جان کی بازی لگا کر ریاست کا دفاع کرتا ہے، کیا اس کے وارث یوں بے سہارا ہونے چاہئیں؟
یومِ شہداء پولیس محض سالانہ دن نہیں، یہ ایک عہد کی تجدید ہے کہ ہم ان قربانیوں کو یاد رکھیں گے، ان کے مشن کو آگے بڑھائیں گے، اور پولیس ادارے کو بہتر، منصف اور باوقار بنائیں گے۔ عوام اور پولیس کے درمیان اعتماد کی فضا پیدا کی جائے گی تاکہ یہ رشتہ خوف کا نہیں، خدمت کا ہو۔
یہ دن ہمیں جھنجھوڑتا ہے کہ وہ ماں جو اپنے بیٹے کی شہادت پر فخر سے آنکھوں میں آنسو چھپا لیتی ہے، وہ بیوہ جو کفن کو تقدیر مان لیتی ہے، وہ یتیم جو باپ کے نقش قدم پر چلنے کا خواب دیکھتا ہے، وہ سب ہمارے ضمیر کے دربان ہیں۔ ان کا خیال، ان کا حق، ہماری ریاستی اور اجتماعی ذمہ داری ہے۔آخر میں دعا ہے کہ کریم
اللہ ہمارے شہداء کو جنت الفردوس میں اعلی و ارفعی مقام عطا فرمائے، ان کے درجات بلند کرے، ان کے پسماندگان کو صبر، ہمت اور ریاستی تحفظ عطا کرے۔ ہمیں یہ توفیق دے کہ ہم اپنی پولیس کو ایسا ادارہ بنا سکیں جو واقعی "خدمت، تحفظ، انصاف" کا عملی مظہر ہو۔
آمین، ثم آمین۔

28/07/2025

سوچ کا سفر
تحریر: گلزار حسین چوہان

سوچ کا سفر ایک مسلسل عمل ہے، جو انسان کو خودی کی گہرائیوں سے نکال کر حقیقت کے افق تک لے جاتا ہے۔ یہ وہ سفر ہے جو نہ تو کسی راہدار ی کا محتاج ہوتا ہے، نہ ہی کسی سرحد کا پابند۔ یہ سفر ایک خیال سے شروع ہو کر علم، شعور، ادراک، فہم اور آگہی کی منزلیں طے کرتا ہے۔ دنیا کی تمام بڑی تبدیلیاں اور انقلابات، خواہ وہ فکری ہوں یا عملی، کسی نہ کسی سوچ کے بطن سے جنم لیتے ہیں۔
انسان کو اشرف المخلوقات بنانے والی جو بنیادی نعمت ہے، وہ اس کی "سوچنے" کی صلاحیت ہے۔ یہی صلاحیت اسے حیوانی جبلت سے ممتاز کرتی ہے اور یہی وہ جوہر ہے جو اسے وقت کے قالب میں صدیوں سے گفتگو کرنے کے قابل بناتا ہے۔ سوچ اگر شعور کے ساتھ جڑے تو انقلاب بن جاتی ہے، اگر تعصب کے ساتھ جڑے تو زوال کی وجہ بن جاتی ہے۔ لہٰذا سوچ کی سمت، اس کی نیت، اس کا منبع اور اس کا انجام، سب اہم ہوتے ہیں۔
ادب اور صحافت کی دنیا میں سوچ کا سفر ایک عظیم ذمہ داری بھی ہے۔ ایک صحافی یا ادیب کی سوچ نہ صرف اس کے قلم کو قوت بخشتی ہے بلکہ معاشرے میں بیداری کی لہر پیدا کرتی ہے۔ سچ بولنے، حق لکھنے اور باطل سے ٹکرانے کی جرأت اسی وقت پیدا ہوتی ہے جب سوچ آزاد ہو، دلیل سے مزین ہو، اور ضمیر کی گواہی سے روشن ہو۔ صحافت اگر صرف خبر رسانی تک محدود ہو جائے اور ادب صرف جذبات کی عکاسی پر اکتفا کرے، تو یہ سوچ کے سفر سے غداری ہوگی۔ اصل فن یہی ہے کہ ہم الفاظ کے ذریعے ذہنوں کے بند دریچے کھولیں، سوالات اٹھائیں، جواب تلاش کریں اور ایک فکری تحریک کو جنم دیں۔
یہ سفر کبھی تنقید کی کانٹوں بھری وادیوں سے گزرتا ہے، کبھی طنز کے نشتر سہتا ہے، اور کبھی مخالفت کے طوفانوں کا سامنا کرتا ہے۔ لیکن جو سوچ سچی ہو، وہ جھوٹ کے شور میں کبھی نہیں دبتی۔ اسے وقت کی عدالت میں سرخروئی ملتی ہے۔ یہی وجہ ہے کہ تاریخ میں بڑے بڑے مفکر، ادیب، صحافی اور مصلح اپنے وقت میں ناقابل برداشت ٹھہرائے گئے، لیکن وقت نے ان کی فکر کو تسلیم کیا اور ان کے خیالات کو چراغِ راہ بنایا۔
تعلیم، تربیت اور تجربہ سوچ کے اہم زادِ راہ ہیں۔ جو معاشرہ اپنی نسلوں کو سوچنے کی آزادی اور سوال اٹھانے کی اجازت نہیں دیتا، وہ تقلید کی زنجیروں میں جکڑا رہتا ہے۔ جہاں سوچ کو دبایا جاتا ہے، وہاں تخلیق مر جاتی ہے۔ یہی وجہ ہے کہ آمریت میں سب سے پہلے قلم کو زنجیر پہنائی جاتی ہے اور زبان کو تالے لگائے جاتے ہیں۔ کیونکہ وہ جانتے ہیں کہ سوچ آزاد ہو تو غلامی کا خاتمہ ہوتا ہے، اور اگر سوچ بیدار ہو جائے تو تخت و تاج لرزنے لگتے ہیں۔
دینی حوالہ سے بھی سوچنے کی ترغیب بار بار ملتی ہے۔ قرآن بارہا "کیا تم غور نہیں کرتے؟"، "کیا تم عقل سے کام نہیں لیتے؟"، "کیا تم تدبر نہیں کرتے؟" جیسے سوالات اٹھاتا ہے۔ یہ اس بات کی دلیل ہے کہ اسلام صرف عبادات کا دین نہیں، بلکہ غور و فکر، تدبر اور فہم و فراست کا دین بھی ہے۔ علم و حکمت اس کا بنیادی جوہر ہے اور یہی علم سوچ کو جلا بخشتا ہے۔
آج کا انسان ایک ایسے دور میں جی رہا ہے جہاں معلومات کا سیلاب ہے، لیکن فکر کی پیاس بڑھتی جا رہی ہے۔ ہم ہر لمحہ ڈیجیٹل مواد سے لبریز ہو رہے ہیں، لیکن وہ "سوچ" جو ہماری روح کو جھنجھوڑ دے، وہ کم ہوتی جا رہی ہے۔ ہمیں دوبارہ "سوچنے" کی طرف لوٹنا ہوگا۔ ہمیں اپنے نوجوان کو رٹے سے نکال کر فکر، تنقید اور تجزیہ کی جانب لانا ہوگا۔ کیونکہ جو قومیں سوچتی نہیں، وہ صرف تاریخ میں لکھی جاتی ہیں، تاریخ بناتی نہیں۔
سوچ کا سفر تنہائی سے شروع ہوتا ہے لیکن معاشرے میں روشنی بکھیرتا ہے۔ یہ وہ مشعل ہے جو ہر عہد کے اندھیروں کو چیر کر آگے بڑھتی ہے۔ یہ وہ چراغ ہے جو بھڑکتا بھی ہے، جلتا بھی ہے، لیکن بجھتا نہیں۔ بس شرط یہ ہے کہ ہم سوچنے سے نہ گھبرائیں، سوال اٹھانے سے نہ ہچکچائیں، اور اختلاف کو دشمنی نہ سمجھیں۔
سوچ کے اس طویل سفر میں اگر آپ سچائی، علم، ادب، دلیل اور انصاف کو ہمسفر بنا لیں تو نہ صرف آپ اپنی ذات میں ایک انقلاب برپا کر سکتے ہیں، بلکہ اپنے قلم، زبان اور عمل سے معاشرے کی کایا بھی پلٹ سکتے ہیں۔ قارئین اسی عنوان کے تحت میرا کالم ہوا کرے گا۔ میری کوشش ہوا کرے گی کہ مثبت سوچ کے تحت لکھوں اور توقع رکھتا ہوں کہ اگر کہیں بھی میری سوچ منتشر ہوئی آپ نے محسوس کیا کہ پٹڑی سے اتر رہا ہوں تو امید ہے کہ آپ ضرور راہنمائی فرمائیں گے تا کہ یہ سوچ کا سفر جاری رہے ۔اللہ کریم ہم سب کا حامی و ناصر ہو

23/07/2025

*وردی کے پیچھے چھپا جرم*

تحریر: گلزار حسین چوہان

کبھی ہم نے غور کیا ہے کہ اگر وہی لوگ جنہیں محافظ کہا گیا، جن کے کندھوں پر قانون کی پاسداری اور عوام کی حفاظت کی ذمہ داری رکھی گئی، وہی جرائم کے محافظ اور مجرموں کے سہولت کار بن جائیں، تو انصاف کہاں سے تلاش کریں گے؟ اگر تھانے، جنہیں عوامی فریاد سننے کے لیے بنایا گیا، خود ظلم کا گڑھ بن جائیں، تو فریادی کہاں جائے؟
سیالکوٹ میں پولیس کے 24 اہلکاروں کو ملازمت سے برطرف کیے جانے کی خبر نے دل دہلا دیا۔ ان پر الزام ہے کہ انہوں نے جرائم پیشہ افراد سے روابط قائم کیے، ان کے لیے سہولتیں فراہم کیں، اور اپنے فرائض کو مجرموں کے اشاروں پر قربان کر دیا۔ مگر سوال یہ ہے کہ کیا صرف برطرفی کافی ہے؟ کیا یہ قصہ یہیں ختم ہو جائے گا؟ یا یہ محض ایک اور خبر بن کر فائلوں میں دفن ہو جائے گی؟
یہ واقعہ ایک لمحہ فکریہ ہے، ایک ایسا آئینہ جس میں ہمارا پورا نظام اپنا بوسیدہ چہرہ دیکھ سکتا ہے۔ یہ صرف 24 اہلکاروں کا معاملہ نہیں، بلکہ ایک پورے کلچر کی نمائندگی ہے جو برسوں سے وردی کی آڑ میں پنپتا رہا ہے۔ جس معاشرے میں انصاف فروخت ہو، وہاں ظلم صرف پاؤں نہیں پھیلاتا، بلکہ بنیادوں کو چاٹ جاتا ہے۔
یہ نظام کب سے بیمار ہے، ہم سب جانتے ہیں، مگر علاج کی نیت نہ ہونے کے برابر ہے۔ جب تھانے دار کے دفتر میں جرم کی قیمت طے ہو، جب ایک کانسٹیبل کی پوسٹنگ سفارش، رشوت یا سیاسی وفاداری پر ہو، جب ایس ایچ او کے ذاتی مفادات عوامی خدمت پر غالب آ جائیں ،جب تھانوں میں ایس ایچ اوز کی تعیناتی کا معیار اہلیت کی بجائے کچھ اور ہی ہو تو وہاں امن محض ایک خواب بن جاتا ہے۔ سوال یہ نہیں کہ چند اہلکار کیوں بگڑ گئے، سوال یہ ہے کہ وہ بگڑنے دیے کیوں گئے؟
جرائم پیشہ افراد کے ساتھ پولیس کا گٹھ جوڑ کوئی نیا انکشاف نہیں۔ منشیات فروشوں کی پشت پناہی، قبضہ گروپوں کی سرپرستی، اور بے گناہوں پر جھوٹے مقدمات قائم کرنا اب ایک معمول کی بات بن چکی ہے۔ مگر ہر معمول کی پیچھے ایک المیہ چھپا ہوتا ہے۔ جب عوام پولیس پر اعتماد کھو بیٹھے، تو پھر وہ فریاد کہاں لے کر جائیں گے؟ اور اگر مظلوم خود قانون شکن بن جائے، تو اس کی اصل وجہ یہی ادارہ بنتا ہے۔
ضرورت اس امر کی ہے کہ صرف چہروں کی تبدیلی سے آگے بڑھا جائے۔ اصلاحات محض تقرری اور تبادلوں تک محدود نہ ہوں۔ ہر اہلکار کی نہ صرف مالی نگرانی ہو، بلکہ اس کی سماجی سرگرمیوں اور رشتہ داریوں پر بھی نظر رکھی جائے۔ تربیت کے دوران صرف جسمانی مشقیں نہ ہوں، بلکہ کردار سازی، اخلاقیات، اور خدمت خلق کو بنیادی جزو بنایا جائے۔
اگر ہم پولیس کو واقعی ایک باوقار اور عوام دوست ادارہ بنانا چاہتے ہیں تو ہمیں اس کے ڈھانچے میں روح پھونکنی ہوگی۔ یہ روح قانون کی بالادستی، عوامی خدمت، دیانت داری اور قربانی سے جڑی ہو۔ یہ بات سمجھنا ہوگی کہ پولیس محض ایک محکمے کا نام نہیں، یہ ریاست کی رٹ کی علامت ہے۔ اگر پولیس کمزور، کرپٹ اور غیر منصف ہو تو ریاست کا وقار مٹی میں مل جاتا ہے۔
یہ فہرست جس میں 24 اہلکاروں کے نام ہیں، دراصل عوامی اعتماد کی وہ بنیادیں ہیں جو لرز چکی ہیں۔ آج اگر ہم نے اصلاحات کی ٹھوس بنیاد نہ رکھی، تو کل کا مورخ ہمیں صرف کوتاہ بین، بے حس اور نالائق قوم کے طور پر یاد رکھے گا۔ ہمیں یہ طے کرنا ہے کہ ہم کیسی پولیس چاہتے ہیں؟ وہ جو مجرموں کی آلہ کار ہو، یا وہ جو عوام کی خدمت گزار ہو؟
یہ کالم محض تنقید نہیں، ایک مطالبہ ہے، ایک صدا ہے — کہ ہمیں اپنے محافظوں کے چہروں سے نقاب ہٹانا ہے۔ ہمیں ان چہروں میں وہ شبیہ تلاش کرنی ہے جو عدل، رحم، دیانت اور امن کی ضامن ہو۔ ہمیں حضرت عمرؓ جیسا نظام چاہیے، جس میں ایک کتا بھی بھوکا مر جائے تو خلیفہ کو جواب دینا پڑے۔
اگر ہم نے آج اس لمحے کو سنجیدگی سے نہ لیا، تو کل یہ دھبہ صرف وردی پر نہیں، پوری قوم کے ماتھے پر ہوگا۔

22/07/2025

دوستی یا جذباتی خود کشی

تحریر :گلزار حسین چوہان

ٹوبہ ٹیک سنگھ کے قصبہ رجانہ میں پیش آنے والا یہ واقعہ صرف ایک خبر نہیں، ایک سانحہ ہے، ایک زخم ہے، جو پوری قوم کے ضمیر کو جھنجھوڑنے کے لیے کافی ہے۔ تین نوجوان دوست، جن کے چہروں پر جوانی کی روشنی اور آنکھوں میں زندگی کے خواب جھلکتے تھے، اچانک ایسی غیر فطری، غیر ضروری اور بھیانک شرط میں بندھ گئے، جس کا انجام دو گھروں کی ماتم سرائی اور ایک کی خاموش گمشدگی بن گیا۔
گندم میں رکھنے والی زہریلی گولی جو کیڑے مکوڑوں کو ختم کرنے کے لیے استعمال کی جاتی ہے، انسانوں کی زندگی کے چراغ بجھا دے گی، یہ کس نے سوچا تھا؟ لیکن ان نوجوانوں نے سوچا۔ انہوں نے شرط لگائی کہ جو گولی کھائے گا وہی اصل، سچا، وفادار دوست ہوگا۔ اور پھر دو نوجوان وہ زہریلی گولی کھا گئے، شاید دوستی کے نام پر، شاید اپنی بےوقوفی پر، شاید اس لیے کہ وہ اس جھوٹے امتحان میں خود کو سچا ثابت کرنا چاہتے تھے۔
ان دونوں کو قریبی ہسپتال منتقل کیا گیا، لیکن ڈاکٹروں کی پوری کوشش کے باوجود ان کی زندگیاں بچائی نہ جا سکیں۔ ان میں سے ایک نوجوان شادی شدہ تھا۔ محض تین ماہ پہلے اس نے اپنی نئی زندگی کا آغاز کیا تھا۔ کیا وہ جانتا تھا کہ اس کا انجام یوں ایک جذباتی لمحے میں طے ہو جائے گا؟ اس کی ماں، اس کی بیوی، اس کے باپ، اس کے خاندان کے آنسو کون پونچھے گا؟
یہ واقعہ صرف ان تین نوجوانوں کی کہانی نہیں، یہ ہماری مجموعی بےحسی، تربیت کی کمی، اور سوشل میڈیا کی جھوٹی دنیا میں گم ہوتی نوجوان نسل کی دردناک داستان ہے۔ آج کا نوجوان اپنے آپ کو منوانے کے لیے کچھ بھی کر سکتا ہے، خود پر زہر انڈیل سکتا ہے، صرف اس لیے کہ وہ کسی کی نظر میں ’سچا‘ بن جائے۔ کسی کا ’ہیرو‘ بن جائے۔ چند لمحوں کی توجہ کے لیے پوری زندگی قربان کر دینا، یہ پاگل پن نہیں تو اور کیا ہے؟
ماہرین نفسیات عرصہ دراز سے خبردار کر رہے ہیں کہ ہماری نئی نسل شدید ذہنی دباؤ کا شکار ہے۔ انہیں نہ تو زندگی کے فیصلے کرنا آتے ہیں، نہ جذبات کا بوجھ اٹھانا۔ نہ اپنی ذات کو سمجھنے کا موقع ملتا ہے اور نہ ہی کسی ہم درد کی سننے والی آغوش۔ والدین مصروف ہیں، اساتذہ خشک روٹین کے اسیر ہیں، تعلیمی ادارے صرف امتحانات کی تیاری کرا رہے ہیں، اور سوشل میڈیا دن رات یہ پیغام دے رہا ہے کہ تمہیں تب ہی کوئی جانے گا، جب تم کچھ ہٹ کے کرو گے۔
ہماری تعلیم محض رٹا سسٹم ہے، جو کردار نہیں بناتی، انسان نہیں تراشتی، روح کی پیاس نہیں بجھاتی۔ ہماری تربیت صرف نصابی کتابوں کی حد تک محدود ہو چکی ہے۔ نتیجہ؟ ایسی ہی ہولناک کہانیاں، ایسی ہی اندوہناک اموات، ایسی ہی عبرتناک خاموشیاں۔
قصور صرف ان نوجوانوں کا نہیں تھا۔ قصور ہمارا بھی ہے۔ ہم نے ان کو زندگی کے مطلب نہیں سکھائے۔ ہم نے ان کے دل کی باتیں سننے کی فرصت نہیں نکالی۔ ہم نے انہیں صرف کامیاب ہونے کے لیے دوڑنے پر لگا دیا، لیکن یہ نہ بتایا کہ کامیابی سے زیادہ اہم زندگی ہے، اور زندگی میں سب سے قیمتی شے انسان کی اپنی ذات ہے، اس کا وجود، اس کا شعور۔
اگر اب بھی ہم نے ہوش نہ کیا، اگر اب بھی ہم نے اپنے بچوں کو صرف موبائل اور ٹک ٹاک کے رحم و کرم پر چھوڑے رکھا، اگر اب بھی ہم نے تعلیم کے ساتھ تربیت، نصاب کے ساتھ شعور اور ڈگری کے ساتھ احساس نہ دیا، تو کل کو ہر محلے میں رجانہ جیسا واقعہ ہوگا، اور ہم صرف ماتم کرتے رہیں گے۔
اب وقت ہے کہ ہم جاگیں، صرف آنکھیں نہیں، ضمیر کھولیں۔ ہمیں اپنے بچوں کو سننا ہوگا، سمجھنا ہوگا، اپنانا ہوگا۔ انہیں احساس دینا ہوگا کہ دوستی کا مطلب جان دینا نہیں، زندگی کو بہتر جینا ہے۔ وفاداری کا مطلب زہر کھانا نہیں، مشکل وقت میں ساتھ دینا ہے۔ اور بہادری کا مطلب خود کو مارنا نہیں، خود کو سنوارنا ہے۔
یہ واقعہ ایک لمحہ فکریہ ہے، ایک اجتماعی صدائے احتجاج ہے، ایک چیخ ہے جو کہہ رہی ہے: اب بھی وقت ہے، ہوش میں آ جاؤ۔

06/05/2025