https://www.facebook.com/101598141433596/

Tribuna

Tribuna is a Sorsogon-based newspaper, focused on news and research.
(2)

08/01/2024

BALITA: "Petisyon" para sa ChaCha, umabot na sa Sorsogon

Dumating sa Brgy. Cota na Daco, Gubat, Sorsogon ang tatlong personahe, kabilang dito ay si Atty. Armi Escandor Guansing at si Kagawad Glenda Brin, ng nasabing baranggay, para magpapirma ng petisyon para sa Charter Change (ChaCha), noong ika-7 ng Enero 2024, bansang alas-11 ng umaga, ayon sa isang residente na nakapanayam ng Tribuna.

Nagpakilalang kawani ng probinsyal na gobyerno si Atty. Guansing ngunit nalinaw na tauhan siya ni Congressman Wowo Fortes, batay sa aming source sa nasabing baranggay, nang tawagan mismo ni Cong. Fortes si Atty. Guansing para sabihing nasa parehong lugar na rin ito.

Laman ng dokumento ay ang amyendahan ang Sec. 1 (1), Art. XVII ng Konstitusyong 1987 mula sa orihinal na:

“The Congress, upon a vote of three-fourths of all its Members”

tungong:

“The Congress, upon a vote of three-fourths of all its Members, VOTING JOINTLY, AT THE CALL OF THE SENATE PRESIDENT OR THE SPEAKER OF THE HOUSE OF REPRESENTATIVES”

Laman rin ng dokumento na ipinaliwanag ang laman nito sa mga pumirma gamit ang kanilang diyalekto at/o anumang wika na kanilang ginagamit. Gayundin, ang grupo ng isang Atty. Anthony A. Abad ang magfa-file nito sa Commission on Elections (COMELEC).

Lambino v. COMELEC

Ayon sa Korte Supreme sa desisyon nito noong ika-25 ng Oktubre 2006 sa kasong Raul L. Lambino, et al. v. COMELEC, G.R. No. 174153 may tatlong paraan para baguhin ang Konstitusyong 1987:

1) Constitutional Assembly: Kongreso ang magbabago ng Konstitusyon sa pamamagitan ng botohan ng ¾ ng lahat ng miyembro ng Kongreso (Kamara at Senado);
2) Constitutional Convention; at
3) People’s Initiative.

Dagdag pa ng Korte Supreme, sa paraan ng People’s Initiative kailangang bukod sa dapat nasa pormang petisyon ang mga mungkahing amyenda at dapat personal na makita at mabasa ng taumbayan ang mungkahing amyenda, dapat rin na ang mga pumirma ay napaliwanagan ng katangian at epekto ng mungkahing amyenda. Kung hindi, maaaring masabi na ang pagpapapirma ay mapanlinlang.

Ayon sa Save Gubat Bay Movement (SGBM), kung saan taga-Cota na Daco ang karamihan ng myembro, walang malinaw na paliwanag na inihapag sina Atty. Guansing. Dagdag pa ng aming source, sa wikang Inggles ang paliwanag ni Atty. Guansing. Aniya, hindi makukulong ang mga pumirma, gayundin, itong pagbabago ay para sa konstitusyon. Dagdag pa umano ng abogado, kailangang taumbayan na ang magbago ng pundamental na batas.

------
Sundan ang Tribuna sa website nito: www.tribunaph.net

22/11/2023

BALITA: Bus driver, patay nang pagbabarilin sa Sorsogon

Napatay si Donnie Benitez, 51, bus driver at residente ng Pamplona, Camarines Sur nang pagbabarilin ito ng hindi pa nakikilalang suspek kaninang 2:30 ng umaga ika-22 ng Nobyembre 2023, ayon sa ulat ng Sorsogon City Police Station.

Ayon pa sa ulat, tumamo ng maraming sugat sa katawan ang biktima sanhi ng pamamaril na dahilan ng pagkamatay nito. Sa inisyal na imbestigasyon ng pulisya, nagkaroon umano ng matinding komprontasyon o sagutan ang biktima at suspek na dahilan ng pamamaril ng huling nabanggit. Agad namang tumakas ang suspek matapos ang krimen.

Naglunsad naman ng hot pursuit operation ang pulisya.

------
Sundan ang Tribuna sa website nito: www.tribunaph.net

17/11/2023

BALITA: Trak ng PNP bumangga sa nakaparadang trak sa Castilla, Sorsogon

Tumamo ng pinsala sa katawan si Pat. Claro Celino ng Philippine National Police (PNP) nang bumangga ang kanyang minamanehong trak ng PNP sa isa pang nakaparadang trak sa Brgy. Milagrosa, Castilla, Sorsogon bandang 10:20 ng umaga, ngayong araw, ika-17 ng Nobyembre 2023, ayon sa ulat ng pulisya.

Sa paunang imbestigasyon, nang dumating sa Brgy. Milagrosa ang trak, napunta ito sa kabilang linya dahil sa basang daan at bumangga sa nakaparadang trak sa lugar. Sa ulat ng aming staff, sa uneven road ng nasabing baranggay nangyari ang aksidente.

Papuntang Brgy. Villa Hermosa, Daraga, Albay si Pat. Celino para sunduin ang mga police trainee para mag-field training sa Sorsogon Provincial Police Office.

Matatandaang inirereklamo itong parte ng Marharlika Highway sa Brgy. Milagrosa dahil hindi pantay-pantay ang daan dito na sanhi ng kahirapan sa kontrol ng mga motorista.

------
Sundan ang Tribuna sa website nito: www.tribunaph.net

06/11/2023

BALITA: Pamamaril sa Juban, Casiguran, naitala

Patay sa pamamaril si Ronnel Labitag, 30, mangingisda, residente ng Juban nang pagbabarilin ito ni Noel “Homer” Galvan, 50, mangingisda, nang ilang ulit gamit ang improvised na baril, noong ika-3 ng Nobyembre 2023, bandang 10:30 ng gabi, ayon sa ulat ng Juban Municipal Police Station (MPS).

Agad tumakas ang suspek tungong plantasyon ng niyog, ayon sa ulat ng pulisya.

Samantala, patay din sa pamamaril si Arnel Halum, 42, magsasaka, residente ng Casiguran, nang pagbabarilin ito ng hindi pa nakikilalang suspek noong ika-5 ng Nobyembre 2023 bandang 3:00 ng hapon, sa Barangay San Pascual, Casiguran, ayon sa ulat ng Casiguran MPS.

Ayon sa inisyal na imbestigasyon ng Casiguran MPS, habang nagbubunot ng niyog si Arnel, nilapitan ito ng mga suspek at pinagbabaril ng ilang ulit na sanhi ng kanyang pagkamatay. Tumakas naman ang mga suspek sa hindi pa malamang direksyon.

Gayunman, ayon sa pahayag ni Samuel Guerrero, tagapagsalita ng New People’s Army (NPA) – Sorsogon, noong parehong araw, pinuntahan sa kanilang bahay si Arnel ng mga di nakikilalang dating miyembro ng NPA na nagtatrabaho na bilang mga hitman ng [Armed Forces of the Philippines] bandang 10 ng umaga.

Pagpapaliwanag ni Guerrero, si Arnel ay dating miyembro ng NPA noong 2007-2009 at matagal nang umalis sa kanilang kilusan. Dagdag pa ni Guerrero, “ayon sa kanyang pamilya, ilang buwan nang pinipilit ng militar si [Arnel] na sumurender siya sa ilalim ng E-CLIP at sumali sa grupo ng mga rebel returnee. Tinanggihan niya ang mga pamimilit na ito.”

------

Sundan ang Tribuna sa website nito: www.tribunaph.net

27/10/2023

[TRIGGER WARNING: Violence, Blood, Cadaver]

BALITA: 1 patay, 1 sugatan sa pananaga sa Irosin

Away ang tinitingnang dahilan ng pananaga ng mag-ama sa isang pamilya sa Purok 4, Brgy. Gabao, Irosin, Sorsogon, kagabi, bandang 6:30 ng gabi, ika-26 ng Oktubre 2023, ayon sa ulat ng pulisya.

Patay si Martinito Hay, 55, matapos magtamo ng mga saksak sa likod habang mayroon mga injury sa kanang braso ang kanyang asawa na si Marilyn Hay, 47. Wala namang natamong sugat si Mark Jhon Hay, 21, ayon sa ulat ng pulisya.

Arestado si Roger Dayto, 40, ang isa sa mga suspek ng nasabing insidente, habang nakatakas umano si Ronan Dayto, 21.

-------------------------
Sundan ang Tribuna sa website nito: www.tribunaph.net

20/10/2023

[TRIGGER WARNING: Su***de]

JUST IN: Lalaki, natagpuang patay sa Bulan

Tinatayang nagpatiwakal ang isang lalaki sa Purok 4, Brgy. Fabrica, Bulan, Sorsogon, matapos itong matagpuan kaninang bandang alas-4 ng hapon, ika-20 ng Oktubre 2023, ayon sa ulat ng pulisya.

Nawawala ang 31-anyos na biktima mula pa kahapon, ika-19 ng Oktubre 2023, ayon sa mga kaanak. Tiyuhin at pinsan ang nakadiskubre sa bangkay ng biktima na agad ipinagbigay-alam sa pulisya.

Iniimbestigahan pa ang insidente at maglalabas pa ng spot report ang pulisya.

---------------

Tala: Hindi inilagay sa balita ang detalye ng animo'y pagpapatiwakal sang-ayon sa etikal na pamamahayag.

Sundan ang Tribuna sa website nito: www.tribunaph.net

20/10/2023

BALITA: Dating Juban mayor, sumuko sa kasong graft

Boluntaryong isinuko ng asawa ng Juban mayor na si Antonio Alindogan II, mas kilala bilang "Cama", ang kanyang sarili, ayon sa ulat ng pulisya, bandang alas-7 ng umaga kanina, ika-20 ng Oktubre 2023.

Habang nasa Bicol Access Health Centrum Hospital sa Brgy. Triangulo, Naga City si Cama, nang sumuko siya sa pulisya para sa paglabag sa RA 3019 o Anti-Graft and Corrupt Practices Act, na may 90 libong pisong nirerekomendang piyansa.

Kasalukuyang nasa ospital pa rin si Cama at sinisiguro ng pulisya.

Wala pang nailalabas na pahayag ang kanyang asawang si Juban Mayor Gloria Alindogan hinggil sa isyu.

------

Ang larawan ay mula sa Facebook.

Sundan ang Tribuna sa website nito: www.tribunaph.net

17/10/2023

ABISO: Walang tubig mamayang alas-8 ng gabi hanggang alas-4 ng umaga bukas, ayon sa paskil ng Sorsogon City Water District ngayong umaga. Apektado ang mga sumusunod na barangay:

1. Barangay Bitan-o/Dalipay
2. Barangay Piot
3. Barangay Sirangan, at
4. Barangay Talisay.

Dahilan ng pagkawala ng tubig ay ang pagkakabit ng mga mainline na tubo bandang Rizal St.., at Jimenez St., Brgy. Piot.

Ayon pa sa SCWD, mangyaring mag-imbak na ng tubig. Dadaloy ito muli matapos ang pagkokonekta ng mga tubo sa nasabing lugar.

15/10/2023

BALITA: Philippine Army, kinilala ang 2 lalaking pumatay sa dating rebeldeng si alyas Rigor; Sorsogon Police, kinundena ang pamamaslang

Mariing kinundena ng 9th Infrantry Division (ID) ng Philippine Army (PA) ang pamamaslang kay Rey Esposado alyas “Rigor” ng New People’s Army (NPA) – Sorsogon, noong ika-14 ng Oktrubre 2023. Tinukoy ng 9th IDPA ang mga bumaril kay Rey na sina Ariel Duave alyas “Blackjack” at Carl Mark Berania alyas “Macoy,” ayon sa paskil nito sa kanilang page.

Ayon sa pahayag, lantarang paglabag ang pamamaslang sa Human Rights at International Humanitarian Law dahil inagaw nito ang buhay ng dating rebelde na piniling abandonahin ang armadong pakikibaka at muling makibahagi sa lipunan.

Gayundin, kinundena naman ng Sorsogon Provincial Police Office (SPPO) ang pamamaslang, ayon sa pahayag ni PCol. Dionesio T. Laceda, na ipinaskil sa kanilang page. Ani Laceda: “Ang pangyayaring ito ay isang pagpapatunay na ang CPP-NPA-NDF ay tunay na terroristang berdugo na walang pagpapahalaga sa buhay at karapatang pantao. Isa na namang pamilya ang nawalan ng ama dahil sa kagagawan ng rebeldeng grupo.”

Matatandaan sa pahayag ni Samuel Guerrero, tagapagsalita ng NPA-Sorsogon, hinatulan ng kamatayan ng kanilang Probinsyal na Hukumang Bayan si Rey dahil sa pagtataksil nito. Banggit pa ni Guerrero, nagsilbing pangunahing hitman ng death squad si Rey na pinakikilos ng Armed Forces of the Philippines at Philippine National Police laban sa mga aktibista at mga pinagbibintangang rebolusyonaryo sa probinsya.

Dagdag pa ni Guerrero, napatunayan rin umano nila ang direktang pananagutan ni Rey sa pagpaslang kina Nicasio Ebio at Hermienigildo “Mindo” Domdom, mga aktibistang magsasaka sa Bacon District ng Sorsogon City.

Nakikipagdalamhati naman si Major General Adonis R. Bajao ng 9thIDPA sa pamilya ni Rey at ipinanawagang nakatuon ang kanilang pwersa para bigyang hustisya ang pamamaslang kay Rey.

Kasalukyang naglulunsad ang 9thIDPA ng kumprehensibong pagtukoy ng lokasyon at hulihin sina Ariel at Carl. Gayundin, patuloy ang imbestigasyon ng SPPO sa nasabing pamamaslang.

----------
Sundan ang Tribuna sa website nito: www.tribunaph.net

14/10/2023

BALITA: Buy-bust operation sa Sorsogon City, natakasan ng suspek

Nakatakas si Jelito Merilo, Jr. alyas “Arjay”, residente ng Barangay Cabid-an, Sorsogon City sa buy-bust operation na inilunsad sa parehong lugar bandang 8:10 ng gabi, kahapon, ika-13 ng Oktubre 2023, ng mga personahe ng Sorsogon Provincial Police Office, ayon sa ulat ng nito.

Ayon sa ulat, nang makapagbenta na ang suspek ng hinihinalang ma*****na sa pulisya, napansin nito na siya ay aarestuhin at kumaripas ng takbo sa hindi pa malamang direksyon. Kasalukuyang naglulunsad ng hot pursuit operation ang pulisya.

Ayon pa sa ulat, si Merilo ay nasa listahan ng Regional Recalibrated Database on Illegal Drugs at miyembro ng ESPILOA Drug Group at primaryang target ng pulisya.

------------
Sundan ang Tribuna sa website nito: www.tribunaph.net

14/10/2023

[TRIGGER WARNING: Brutality, Killing, Blood]

BALITA: Rey Esposado alyas “Rigor”, patay sa operasyong partisano ng NPA-Sorsogon

Pagpapatupad ng parusang kamatayan ng Probinsyal na Hukumang Bayan ng New People’s Army (NPA) - Sorsogon sa kasong pagtataksil ang dahilan ng pagpatay kay Rey Esposado alyas “Rigor”, ayon sa pahayag ni Samuel Guerrero, tagapagsalita ng Celso Minguez Command, NPA-Sorsogon.

Ayon sa pahayag, operasyong partisano ang isinagawa ng NPA ngayong araw, bandang 3:30 ng hapon, ika-14 ng Oktubre 2023, sa sabungan sa Barangay Guinlajon, Sorsogon City upang ipatupad ang nasabing hatol.

Si Rey, ayon pa kay Guerrero, ay kabilang sa mga grupo na sumuko sa gobyerno noong 2018. Kasamahan nito sina Antonio Benzon alyas “Hazel” at Michael Donaire alyas “Abe” na pareho ring hinatulan ng kamatayan.

Banggit pa ni Guerrero, “matapos sumuko x x x si [Rey] ay nagsilbing pangunahing hitman ng death squad na pinakikilos ng [Armed Forces of the Philippines] at [Philippine National Police] laban sa mga aktibista at mga pinagbibintangang rebolusyonaryo sa probinsya.”

Sangkot rin umano si Rey sa pananakot at panggigipit sa mga magsasaka ng Hacienda Berenguer at Hacienda Peralta sa Sorsogon City. Napatunayan rin umano ng kanilang hukumang bayan ang direktang pananagutan ni Rey sa pagpaslang kina Nicasio Ebio at Hermienigildo “Mindo” Domdom, mga aktibistang magsasaka sa Bacon District, Sorsogon City, noong 2019.

Samantala, wala pang inilalabas na police report ang City Police Station ng Sorsogon City sa pamamaslang kay Rey.

------------
Sundan ang Tribuna sa website nito: www.tribunaph.net

12/10/2023

[TRIGGER WARNING: Dead body]

TINGNAN: Kalansay ng tao, natagpuan sa lungsod ng Sorsogon

Di-kilalang labi ng tao na nakasilid sa asul na container drum ang nahanap ng mga mangingisda kaninang ala-una ng hapon, ika-12 ng Oktubre 2023, sa Pier Site (Rompoelas), Brgy. Talisay, East District, Sorsogon City, ayon sa ulat ng pulisya.

Humingi ng tulong ang Sorsogon City Police Station sa Sorsogon Provincial Forensic Unit para sa crime scene investigation at pag-identipika sa kalansay.

--------------
Sundan ang Tribuna sa website nito: www.tribunaph.net

10/10/2023

BALITA: Sorsoganon, patay sa aksidente sa Irosin

Dead-on-arrival si Carlo Aguirre, taga-Bulan, Sorsogon, matapos bumangga ang kanyang minamanehong motorsiklo sa isang bus kagabi, ika-10 ng Oktubre 2023, sa Brgy. Salvacion, Irosin, Sorsogon, bandang 10:30 ng gabi.

Nasa kustodiya ng awtoridad ang drayber ng bus na si Carlo Asoque, na taga-Kananga, Leyte, ayon sa pinakahuling ulat ng pulisya.

Galing Matnog port ang bus at nang dumating sa nasabing lugar ng aksidente, nag-swerve ang motorsiklo sa lane ng bus, dahilan upang magbanggan ang dalawang sasakyan.

Agad namang nadala sa Irosin District Hospital ang drayber ng motorsiklo ngunit idineklarang patay na ng doktor.

------------
Sundan ang Tribuna sa website nito: www.tribunaph.net

09/10/2023

OPINYON: Nang binuo ang Saligang Batas noong 1987, ipinagbawal ang dinastiya. Ayon dito, ginarantiya ng Estado ang patas na oportunidad sa serbisyo-publiko at ipinagbabawal ang dinastiya ng ayon sa magiging depinisyon ng batas. Sa Inggles: "Section 26. The State shall guarantee equal access to opportunities for public service and prohibit political dynasties as may be defined by law."

Ang pagmamana ng pamumuno na galing sa isang pamilya o grupo ng mga pamilya na humahawak sa pwesto sa loob ng mahabang panahon, ang kahulugan ng dinastiya. Kung bawal ang ganito, maiintindihan na kung bakit walang sinumang mambabatas, maliban na lang ang mga nasa progresibong grupo, ang nagtatrabaho na maisulong ang isang batas na nagbabawal sa dinastiya. Ito ay dahil karamihan sa kanila'y magkakamag-anak. Sa Sorsogon lang, malinaw na ang mga pangyayaring ito.

Ang interes ng ating mga magulang, ayon sa ating Saligang Batas, ay ipagbawal ang dinastiya subalit ang interes ng mga puilitiko ay ipagpatuloy ito.

Ang iba, sa sobrang yabang, ay naghahambog na sinimulan nila ang pagpasunod ng probisyon ng Saligang Batas na nagbabawal sa dinastiya. Sa ilalim ng batas ng Sangguniang Kabataan, o ang RA 10742 (as amended by RA 11768), ang isa sa mga kwalipikasyon ng SK ay “must not be related within the second civil degree of consanguinity or affinity to any incumbent elected regional, provincial, city, municipal, or barangay official, in the locality where the appointive or elective official seeks to be elected” (Section 10 of RA 10742). Hindi dapat kamag-anak sa loob ng “second degree of consanguinity or affinity”

Ang consanguity ay kadugo. Ang second degree naman ay ang sukat ng relasyon ng dalawang tao: halimbawa, ang relasyon ng Lolo sa Tatay ay isang degree, at ang sa Tatay naman at ang kanyang anak ay pangalawang degree. Ang magkapatid ay second degree of consanguinity.

Ang relasyon ng isang tao sa asawa ng kanyang kapatid (hindi niya kadugo) ay tinatawag na affinity. Kung kaya ang dalawang tao na magkapatid ang kani-kaniyang asawa ay nasa second degree of affinity.

Pansinin ang batas: “must not be related within the second civil degree of consanguinity or affinity to any incumbent elected regional, provincial, city, municipal, or barangay official, in the locality where the appointive or elective official seeks to be elected”. Ibig sabihin wala dapat na relasyon kahit doon sa mga appointed officials tulad ng Barangay Secretary at Barangay Treasurer, mga opisyal na empleyado ng Munisipyo at mga opisyal na empleyado ng kapitolyo.

Kung maipapasunod lang ang anti-dynasty na ito sa mga lokal na mga namamahala, napakaraming mapapalitan sa posisyon. Halimbawa magkakaroon ng problema ang magkapatid na Escudero. Ganon din ang mga Hamor.

Magaling magpasunod na ipagbawal ang dinastiya sa mga kabataan ngunit ayaw nilang ipagbawal sa kanila. Ano pa man, di naman nasusunod. Bigong pagsasanay sa mga kabataan para sa magulong kinabukasan sa nasyunal na pulitika. Mahanap pa nawa ng bansa ang pag-asa ng bayan. # # #

---------------
Abangan sa Tribuna ang artikulong opinyon ni BAZOOKA tuwing Linggo ng gabi. Sundan ang aming website: www.tribunaph.net

07/10/2023

BALITA: Tagumpay na itinuturing ng mga mangingisda at mag-aalimango sa Gubat, Sorsogon, ang anila'y matapang na pagharap nila sa Philippine Coast Guard (PCG) at Department of Public Works and Highways District II (DPWH-2) noong ika-5 ng Oktubr 2023, sa fish port sa tabing dagat ng Cota na Daco.

Sa inilabas na pahayag ng Save Gubat Bay Movement (SGBM), nang umagang yon, ang konsultasyon ay upang talakayin ang isyu hinggil sa Fisheries Administrative Order (FAO) 264 na matagal nang nilalabanan ng Cota na Daco Crablet Workers Association (COTAW), Samahan Alay sa Kalikasan Cooperative (SAAKCO), Kumunidad ng mga Lumalaban na mga Aping Parapadagat ng Gubat (KULAG), at Sorsogon KingCrab Raisers Association Inc. (SKRA).

Basahin ang huling balita ng Tribuna hinggil sa isyu: https://www.tribunaph.net/?p=2683

Gayundin, bandang ala-una ng hapon, muling humarap ang mga grupo sa pampublikong konsultasyon na inorganisa ng DPWH-2 ukol sa mga drainage at road widening sa mga baranggay Balud at Cota. Hindi na maglalagay ng bagong kalsada patungo sa mga baybayin ng mga Barangay Balud, Cota, at Cogon, batay sa paskil ng SGBM.

Nalinaw ng mga grupo sa nasabing konsultasyon na hindi na itutuloy ang konstruksyon ng coastal road. Matatandaang masigasig itong ipinaglaban ng mga grupo noon pang nakaraang taon.

Ani Allan Espallardo, pangulo ng SGBM at SKRA, hindi sila kailanman papayag na ituloy sa kanilang lugar ang pamosong coastal road, lalo na ang hatchery na panibagong suliranin na kanilang kinakaharap. Basahin ang nakaraang ulat ng Tribuna hinggil dito: https://www.tribunaph.net/?p=2660

Samantala, iginigiit ng mga grupo na patuloy silang magiging matapang at matatag sa pagprotekta ng kalikasan hindi lamang sa ngalan ng kanilang kabuhayan, kundi lalo na para sa susunod na henerasyon. # # #

01/10/2023

JUST IN: Kamikazee, di pinatugtog sa Sorsogon dahil umano sa biro, pagiging bastos

"Tiniawan daw na bagang driver si Gov kay pirmi lang daw [naka-puti]. Tapos habo sang Kamikazee magpa-pic sa 16k blue roses, nan habo mag-CR sa public CR..." ani isang trusted source ng Tribuna.

Ito ay matapos makansel ang pagtatanghal ng bandang Kamikazee ngayong gabi, ika-1 ng Oktubre 2023, sa konsyertong nagaganap sa munisipyo ng Casiguran, Sorsogon.

Ayon sa talumpati ni Sorsogon Governor Boboy Hamor, di umano sya papayag na bastusin ang mga taga-Sorsogon. Samantala, wala pang opisyal na pahayag ang gobernador tungkol sa detalye ng pangyayari.

Gayundin, wala pang pahayag ang nasabing banda, ngunit tinanggal na nila sa kanilang page ang paskil tungkol sa naudlot nilang pagtatanghal sa Sorsogon.

Antabay sa Tribuna para sa updates. Sundan kami sa aming website: www.tribunaph.net

30/09/2023

BALITA: Drug den sa Irosin, Sorsogon, timbog - pulisya

Arestado ang apat na lalaki sa Brgy. Bacolod, Irosin, Sorsogon kaninang alas-10 ng umaga, ika-30 ng Setyembre 2023, ayon sa ulat ng pulisya.

Kinilala ang mga suspek bilang John Eric Baloloy, 31, drug den maintainer; Jaypee Baloloy, 30, tauhan sa drug den; Napoleon Gallanosa, 49, at Darwin Glumar, 27, mga customer ng drug den, ayon sa inisyal na ulat ng pulisya.

Nahuli ang mga suspek nang magsagawa ng buy-bust operation ang Philippine Drug Enforcement Agency (PDEA)-Sorsogon, katuwang ang Philippine Drug Enforcement Group at Municipal Police Station (MPS) ng Irosin sa nasabing drug den.

Nakuha sa mga suspek ang 14 piraso ng maliit na heat-sealed sachet na may lamang pinaghihinalaang shabu. Nagkakahalaga umano ito ng 102 libong piso.

-------
Sundan ang Tribuna sa website nito: www.tribunaph.net

29/09/2023

BALITA: Trak, motorsiklo, nagbanggan sa Matnog, Sorsogon

Isang wing van na trak at motorsiklo ang nagbanggaan sa kahabaan ng Maharlika Highway, Brgy. Sulangan, Matnog, Sorsogon, kagabi, bandang alas-9, ika-28 ng Setyembre 2023, ayon sa ulat ng pulisya.

Nagtamo ng head injury si Jhosel Garbin, taga-Brgy. Sta. Isabel ng nasabing munisipyo matapos bumangga ang minamaneho nyang motorsiklo sa trak na minamaneho ni Richard Encinares, taga- Caloocan City.

Sa inisyal na imbestigasyon, nasa impluwensya ng alak si Garbin nang mag-counterflow ang kanyang motorsiklo at bumangga sa trak.

Nasa kustodiya ng pulisya si Encinares, habang isinugod sa Matnog Medicare Hospital si Garbin, at saka inilipat sa Sorsogon Provincial Hospital para sa karagdagang medikal na ebalwasyon.

------
Sundan ang Tribuna sa website nito: www.tribunaph.net

28/09/2023

BALITA: Sorsoganong magsasaka, inaresto sanhi ng dala-dalang coconut lumbers sa Magallanes

Arestado si Joey Camo, 38, dahil sa hila-hilang mga coconut lumber, bandang 6:40 ng hapon, ika-27 ng Setyembre 2023 sa Brgy. Magsaysay, Magallanes, Sorsogon, ayon sa ulat ng pulisya.

Gayunman, kung babasahin ang RA 8048 o Coconut Preservation Act, walang probisyon dito na nagbabawal sa posesyon ng coconut lumbers. Ngunit, ito ang kinakaharap na kaso ni Camo, ayon sa ulat ng pulisya.

Samantala, si Camo umano ay hinuli nang wala itong maipakitang mga dokumentong nag-ootorisa sa kanya para magkaroon ng mga lumber.

Ayon pa sa report, nasa pagsasagawa ng intelligence monitoring ang mga awtoridad nang mamataan nila si Camo. Nakuha sa kanya ang nasa 15 coconut lumbers.

Kasalukuyan siyang nasa kustodiya ng Magallanes Municipal Police Station.

-----
Sundan ang Tribuna sa website nito: www.tribunaph.net

25/09/2023

BALITA: Pananaga ng isang Bulaleño, naitala sa Managa-naga

Nasaksak sa kaliwang tagiliran si Carlos Gobis, 22, ni Steward Hugo, pasado 10:30 ng gabi, ika-24 ng Setyembre 2023, sa Brgy. Managa-naga, Bulan, Sorsogon, ayon sa ulat ng Bulan Municipal Police Station (MPS).

Mag-aalas dose na ng hatinggabi nang makatanggap ang Bulan MPS ng tawag mula sa chairman ng nasabing baranggay na nagsasabing mayroong nangyaring pananaksak sa kanyang nasasakupan.

Hindi tukoy ang rason ng pananaksak, ayon sa ulat ng pulisya. Nakatakas naman ang suspek at at-large pa rin hanggang ngayon.

Isinugod sa Bulan Medicare Hospital ang biktima para sa agarang lunas.

------
Sundan ang Tribuna sa website nito: www.tribunaph.net

24/09/2023

OPINYON: Ayon sa kanilang ipinangako, aayusin ni Sorsogon Governor Boboy Hamor ang kapaligiran. Sa tono ng pananalita, tila hindi inayos ng mga nakaraang administrayon? Ang unang makikita natin ay ang paglilinis sa mga tabing kalsada, ano ang kasunod?

Ang paglilinis nga ba sa mga tabi ng kalsada ang siyang solusyon sa problema ng ating kapaligiran? Sa ngayon, ang mga taong naglilinis sa kalsada ay binabayaran sa kanilang pagod, at sa susunod na eleksyon ay mga taga-kampanya na rin sila dahil nabigyan sila ng trabaho. Sabagay, ang isa sa mga problema sa kapaligiran ay pulitika.

Sa buong mundo, ang pinakamabigat na isyu ng kapaligiran ay ang pagkalat ng mga plastik, mga supot, bote, pambalot, at minsan kahit mukha at pag-uugali ng mga tao ay plastik na rin. Ang mga ginawang pambalot na mga plastik ay nakakain ng mga hayop, na kinakain din ng tao. May mga pag-aaral pang ginawa na ang mga plastik na ito ay hindi naman natutunaw ngunit napupulbos lang nang maliliit na nakakain ng mga hayop at ng mga tao.

Dahil dito, ang isa sa pangunahing ginagawa ng mga pamahalaan at kahit ng mga cause-oriented groups ay ang paglilinis at pag-aalis sa mga plastik lalo na yong mga nasa tabing dagat. May mga kampanya din para sa paggawa ng mga makabagong bagay gamit ang mga basurang plastik dahil mas makakasira ng kapaligiran kung susunugin ang mga ito dahil masisira daw ang ozone layer.

Kaya ba nating gawin ang kampanyang ito? May mga gumawa ng batas at ordinansa laban sa paggamit ng plastik subalit ang karamihan sa mga ito ay pagbabawal na gumamit ng plastik sa mga palengke. Sa mga department store nga minsan ay may konting katangahan. Dahil bawal ang plastik, ang ginagamit nila na pambalot ay mga papel pero ang laman ng kanilang mga binabalot at binibili ng mga tao ay naka-plastik. Halimbawa, lahat ng mga chichiriya ay nakabalot sa plastik. Kahit nga mga bote ng inumin ay nasa plastik.

Wala namang masama kung magsimula tayo sa maliit na bagay, hakutin natin ang mga basurang plastik sa tabing dagat man o sa tabing kalsada at ilagay natin sa iisang lalagyan. Kaya lang, marapat nating tanawin ang pangmatagalang solusyon na magbabasura sa taal na suliranin sa kalikasan–ang bulok na pulitika at pulitiko.

Mula pa noong maisabatas ang Republic Act 9003 o ang batas tungkol sa maayos na pagkuha at pagtapon ng basura ay wala pang lokal na pamahalaan sa Sorsogon ang nakasunod ng batas na ito. Ang iba nagsunod sa papel lang pero sa gawa, wala.

Balik na tayo ngayon sa ipingakong pag-aayos ng kapaligiran: kung ang pagkuha at pagtapon ng basura ay hindi maisaayos, kapaligiran pa kaya? # # #

---------------
Abangan sa Tribuna ang artikulong opinyon ni BAZOOKA tuwing Linggo ng gabi. Basahin din ang artikulo sa aming website: https://www.tribunaph.net/?p=2706

24/09/2023

BALITA: Labis na ikinababahala ng Cota na Daco Crablet Workers (COTAW) ang anila'y pagkuha ng kanilang “duyan-duyan” o ang panghuli ng crab seedlings ng mahigit 15 kawani ng Philippine Coast Guard (PCG) at nasa 10 armadong pulisya, noong ika-21 ng Setyembre 2023, bandang 6:30 ng umaga.

Pasado alas-11 ng gabi nang nasabing araw nang magpaskil sa page ang Save Gubat Bay Movement (SGBM) ng bidyo, lakip ang pahayag tungkol sa insidente. Samantala, wala pang naiuulat na tugon o pahayag ang PCG at pulisya.

Tinatayang sampung myembro ng COTAW ang kinuhanan ng duyan-duyan at kasama rin sa mga nangumpiska ang mga taga-Gubat Municipal Fisheries and Agriculture Office, ayon sa pahayag.

"Sa kabila ng aming pagsusumikap at pagpapahalaga sa yamang dagat at sabi ng ng Bureau of Fisheries and Aquatic Resources (BFAR), na hindi ito nakasasama sa ibang mga nilalang, nakalulungkot na ganyan ang trato na ibinibigay nila sa amin [...] Parang kriminal ang pagtrato nila sa mga taong [nasa] dagat [ang] kabuhayan," ani Claudio "Boboy" Fajardo, isa sa mga mangingisda na nawalan ng kagamitan.

Sinubukang kuhanan ng bidyo ng isang myembro ng COTAW ang pangungumpiska ngunit pasigaw na sinaway umano ito ng pulis.

Samantala, ayon kay Allan Espallardo ng SGBM, walang ipinakitang search warrant o ano mang ligal na papeles ang mga awtoridad nang kumpiskahin ang nasabing kagamitan.

Gayundin, ani Espallardo, may opisyal na ulat ang BFAR-National Office na kumikilala sa sustinableng industriya ng pag-aalimango sa Gubat, Sorsogon sa pangunguna ng COTAW at mga kapatid nitong organisasyon. Ang ulat na ito ay ginawa ng mga taga-BFAR noong Agosto 2023.

Gayunman, batay sa mga probisyon ng Fisheries Administrative Order No. 264, s. 2020 (FAO 264), walang ipinagbabawal na mga kagamitan sa pag-aalimango. Sa katotohanan, ayon pa sa ulat ng BFAR, muling sinusuri ang mga probisyon ng FAO 264 para baguhin. Sa katunayan, gagamiting basehan nitong pagsusuri ang sustinableng industriya ng pag-aalimango sa Gubat, Sorsogon.

“Paano na kami ngayon na wala na kaming panghuli ng alimango? Ano na ang aming kabuhayan? Mamamalimos na lang ba kami sa kanila?” ani Ar'ar Doncillo, isa sa mga kababaihang pinuno ng COTAW.

Ang insidenteng ito ay patunay sa kahabag-habag na sitwasyon ng mga mangingisda na naghihirap na tuparin ang kanilang pang-araw-araw na pangaingailangan, ayon sa SGBM.

Samantala, sa hiwalay na ulat ng COTAW at SGBM, matapos ang pwersahang pagkumpiska sa kanilang mga kagamitan, dumiretso ang ibang mga awtoridad para mag-inuman. # # #

----------------
Tala: Bukas ang Tribuna sa pahayag ng mga awtoridad. Mangyaring magpadala lang ng mensahe sa aming page, email, at website.

Basahin din ang buong balita rito: https://www.tribunaph.net/?p=2697

23/09/2023

BALITA: Most wanted sa Sorsogon City, petty violators sa iba pang bayan, arestado

Kasong frustrated murder, iligal na pagsusugal, at iligal na droga, ang mga sanhi ng mga isinagawang pag-aresto sa Sorsogon noong ika-21 ng Setyembre 2023.

Arestado si Jobert Lacdang, 21, sa Purok 4, Brgy. Guinlajon, Sorsogon City. Kumakaharap siya sa kasong frustrated murder, ayon sa ulat ng pulisya.

Samantala, sa isang buy-bust operation naman nahuli ng pulisya si Jonald Empig, 26, sa Brgy. Cumadcad, Castilla. Nakuhanan si Empig ng limang gramo ng tinatayang ma*****na na nagkakahalaga ng 600 piso.

Iligal na pagsusugal naman ang kinakaharap ng inarestong si Romeo Atienza sa Brgy. San Bartolome, Sta. Magdalena.

Ang lahat ay nasa kustodiya ng pulisya sa kani-kaniyang munisipyo.

---------
Sundan ang Tribuna sa website nito: www.tribunaph.net

Address

Phase 2, Block 16, Lot 18, Seabreeze Homes
Sorsogon

Website

facebook.com

Alerts

Be the first to know and let us send you an email when Tribuna posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Tribuna:

Videos

Panawagan ng mga Sorsoganong empleyado na natanggal sanhi ng right-sizing program

Sa pagkapanalo ng mga manggagawa sa kanilang apela, nakuha na ba nila ang kaukulang sahod, at naibalik na ba sila sa trabaho? Panoorin:

Pizza place in Sorsogon offers Insta-worthy food and Nordic look

EVERYDAY IS PIZZA DAY 🍕 This pizza place in Sorsogon offers a wide variety of affordable yet quality selections of pizza, pasta, and chicken! #EldonPizza

Tribuna 2022 Election Coverage Teaser

Konting kembot na lang, eleksyon na. Higit pa sa mga jingle ng pulitiko, mas pakinggan natin ang ating boses bilang mamamayan, bilang Sorsoganon! Asahan ang update ng aming pahayagan mula sa iba't ibang munisipyo sa Sorsogon. Tumambay lang dito sa aming page sa Mayo 9! Para sa ibang detalye, alamin ang ilang datos na nakalap ng Tribuna tungkol sa gaganaping eleksyon partikular sa probinsya: https://bit.ly/39L2zDN Ang bidyo ay likha ni John Kenneth Zapata #BanwaangSorsoganonPilion

TINGNAN: Bahagi ng kalsada sa may San Roque, Bacon District, Sorsogon City, baha. Ang bidyo ay kuha kaninang bandang 11AM. Samantala, narito ang huling update tungkol sa #AgatonPH: https://bit.ly/3LVtZV0 Batay naman sa mga ulat kahapon, umapaw na ang baha sa spillway sa San Ramon, Bulan, Sorsogon, dulot ng tuluy-tuloy na pag-ulan. Manatiling ligtas! Sundan din ang Tribuna sa website nito: www.tribunaph.net Ang bidyo ay mula kay N.J. Diesta

Sorsogon City Water Situation (07/15/2021)

Nakapagkape ka na ba, Sorsoganon? O mamaya na lang kapag may lumabas na sa gripo? 🤢🤪 Ang video ay kuha ni Jona Jane Laura-Berina kagabi, bandang 9PM, sa East District, Sorsogon City. Sa mga latest na post ng Sorsogon City Water District (SCWD), nagkaroon umano kagabi ng pagfa-flush ng fire hydrant sa Seabreeze Homes sa Brgy. Cabid-an. Ang isinagawang engineering intervention ay iniimplementa kada tatlong buwan para sa pag-comply anila sa "water quality" na bahagi ng SCWD PrimeWater Joint Venture Agreement. Basahin ang mga nakaraang balita ng Tribuna tungkol sa isyu: https://bit.ly/3eoke3q https://bit.ly/2U93jv6