https://www.facebook.com/131777010015822/

Boses ng Santiagueño

Home
Philippines
Santiago
Boses ng Santiagueño

Contact information, map and directions, contact form, opening hours, services, ratings, photos, videos and announcements from Boses ng Santiagueño, News & Media Website, Tandang Sora Street Barangay Victory Norte, Santiago.

21/12/2024

𝗠𝗚𝗔 𝗣𝗨𝗟𝗜𝗧𝗜𝗞𝗢, 𝗛𝗜𝗡𝗗𝗜 𝗡𝗔 𝗠𝗔𝗔𝗥𝗜𝗡𝗚 𝗨𝗠𝗘𝗣𝗔𝗟 𝗦𝗔 𝗣𝗔𝗠𝗜𝗠𝗜𝗚𝗔𝗬 𝗡𝗚 𝗖𝗔𝗦𝗛 𝗔𝗜𝗗 𝗠𝗨𝗟𝗔 𝗦𝗔 𝗗𝗦𝗪𝗗

Nagbabala ang Department of Social Welfare and Development (DSWD) sa publiko hinggil sa anumang paglabag sa umiiral na alituntunin kaugnay ng distribusyon ng ayuda, partikular ang Ayuda sa Kapos ang Kita Program (AKAP) at Assistance to Individuals in Crisis Situations (AICS).

Ayon kay DSWD Assistant Secretary Irene Dumlao, hindi pinapayagan ang mga politiko, lalo na ang mga tatakbo sa halalan sa susunod na taon, na mamahagi ng anumang uri ng pinansyal na tulong mula sa ahensya dahil umano hindi naman nila pera ang pinamimigay dito kundi pera ng taumbayan. Kaya wala umanong karapatan ang mga Pulitiko na gamitin ang pera ng taumbayan sa kampanya.

“Batay sa aming mga patakaran, tanging mga tauhan ng DSWD lamang ang maaaring magbigay ng ayuda. Ang aming mga paymaster ang responsable sa pagsasagawa ng dokumentasyon, pagproseso ng mga pondo, at aktwal na pamamahagi ng tulong sa mga benepisyaryo,” paliwanag ni Dumlao sa isang panayam sa programang “Storycon” sa One News noong Miyerkules, Disyembre 18.

Binanggit din ni Dumlao ang isang memorandum circular noong 2021 na nagtatakda ng mga alituntunin sa pakikipagtulungan ng DSWD sa panahon ng eleksyon at hindi eleksyon. Mahigpit na ipinagbabawal nito ang paggamit ng mga programa ng DSWD upang maimpluwensyahan ang boto ng mga tao o ang resulta ng halalan.

“Kasama sa mga bawal ang paglalagay ng election paraphernalia, pamamahagi ng campaign materials, pagpapalabas ng campaign jingles, pangangampanya, at maling pagpapakilala na ang tulong ay mula sa isang kandidato,” dagdag ni Dumlao.

Inamin ng opisyal na may mga pagkakataong naroroon ang ilang politiko sa mga aktibidad ng pamamahagi ng ayuda. Gayunpaman, nilinaw ni Dumlao na ang kanilang presensya ay hindi dapat maiugnay sa distribusyon.

“May ilang mambabatas na naroroon bilang bahagi ng kanilang oversight functions, at may mga lokal na partner din na tumutulong sa logistics. Ngunit lagi naming sinisigurado sa mga benepisyaryo na ang ayuda ay galing sa pambansang gobyerno at walang kinalaman ang mga politikong naroroon,” aniya.

Hinimok ng DSWD ang publiko na iulat ang anumang paglabag sa kanilang mga alituntunin sa pamamagitan ng grievance mechanisms na nakalaan para sa mga reklamo.

“Pinapahalagahan namin ang pakikipag-ugnayan sa aming mga lokal na partner, ngunit tungkulin naming tiyakin na ang mga benepisyaryo ay malinaw na nauunawaan na ang tulong na kanilang natatanggap ay mula sa pamahalaang nasyunal, hindi mula sa anumang politiko,” diin ni Dumlao.

Plano rin ng DSWD na pag-aralan ang kanilang kasalukuyang mga patakaran upang higit pang mapalakas ang internal mechanisms na magtitiyak sa pagiging apolitical ng ahensya.

- John Paul Catata | News Correspondent

21/12/2024

𝗠𝗔𝗚𝗞𝗔𝗦𝗜𝗡𝗧𝗔𝗛𝗔𝗡 𝗛𝗨𝗟𝗜 𝗦𝗔 𝗗𝗥𝗨𝗚 𝗕𝗨𝗬-𝗕𝗨𝗦𝗧

Dalawang magkasintahang live-in partner ang naaresto sa ikinasang drug buybust operation ng mga awtoridad sa Purok 1, Barangay Baluarte, Santiago City, bandang alas-4:30 ng hapon nitong Disyembre 19, 2024.

Kinilala ang mga suspek na sina alyas “Bunso,” 32-anyos, negosyante, at residente ng Barangay Victory Norte, at alyas “Tina,” 38-anyos, may-asawa, residente ng Diadi, Nueva Vizcaya ngunit tubong Laguna.

Narekober mula sa kanila ang isang pakete ng hinihinalang shabu, 1.88 gramo ang bigat, na may standard drug price na ₱12,788.00. Bukod dito, nakumpiska rin ang ₱13,000.00, kung saan isang tunay na ₱1,000 bill ang ginamit bilang buy-bust money, habang 12 pira*o ng pekeng ₱1,000 bill at isang android phone ang nadiskubre.

Depensa ng mga suspek, hindi umano sa kanila nanggaling ang iligal na droga. Gayunpaman, natukoy na 11 buwan nang magkasintahan ang dalawa, at pareho silang itinuturing na Street Level Individuals (SLI) sa talaan ng mga awtoridad.

Ang operasyon ay isinagawa sa pakikipagtulungan ng Santiago City Intelligence Unit, Presinto Tres, at PDEA Quirino. Kasalukuyang nasa kustodiya ng Presinto 3 ang mga suspek at nakatakdang sampahan ng ka*ong paglabag sa RA 9165 (Comprehensive Dangerous Drugs Act of 2002) ngayong Disyembre 20, 2024.

Sa pagkakahuli ng mga suspek, patuloy ang paalala ng mga otoridad laban sa paggamit at pagbebenta ng iligal na droga, kasabay ng pagpapaigting ng kanilang kampanya para sa mas ligtas na komunidad.

- Pao Reyes | News Correspondent

21/12/2024

𝗠𝗔𝗛𝗔𝗕𝗔𝗡𝗚 𝗣𝗔𝗦𝗘𝗡𝗦𝗬𝗔, 𝗔𝗣𝗘𝗟𝗔 𝗡𝗚 𝗗𝗣𝗢𝗦 𝗦𝗔 𝗠𝗚𝗔 𝗠𝗢𝗧𝗢𝗥𝗜𝗦𝗧𝗔 𝗡𝗚 𝗦𝗔𝗡𝗧𝗜𝗔𝗚𝗢 𝗖𝗜𝗧𝗬

Nagpaalala ang Department of Public Order and Safety (DPOS) sa mga motorista na magbaon ng mahabang pasensya habang patuloy na nararanasan ang matinding daloy ng trapiko sa lungsod ngayong kapaskuhan.

Ayon kay Ginoong Modesto Cabanos, Chief ng DPOS Santiago City, mahalaga ang disiplina at pag-iwas sa init ng ulo upang hindi masangkot sa gulo o away sa lansangan. Aniya, ang pagbibigayan sa kalsada ay susi sa mas maayos na daloy ng trapiko at makakatulong upang maiwasan ang mga posibleng aksidente.

“Magkaroon tayo ng disiplina sa sarili, magbigayan, at sumunod sa mga traffic enforcers. Ang diwa ng Pasko ay pagmamahalan at pagbibigayan, kaya gawin natin itong simbolo ng isang masaya at mapayapang kapaskuhan,” pahayag ni Cabanos.

Hinihikayat din ng DPOS ang mga motorista na huwag maging pasaway sa kalsada at sundin ang mga ipinatutupad na batas-trapiko upang maibsan ang problema sa daloy ng trapiko, lalo na sa mga pangunahing kalsada ng lungsod.

Inaasahan na sa pamamagitan ng kooperasyon ng bawat isa ay mas magiging magaan at maayos ang pagdiriwang ng kapaskuhan sa Santiago City.

- John Paul Catata | News Correspondent

21/12/2024

𝗠𝗚𝗔 𝗡𝗘𝗚𝗢𝗦𝗬𝗢𝗡𝗚 𝗡𝗔𝗔𝗣𝗘𝗞𝗧𝗨𝗛𝗔𝗡 𝗡𝗚 𝗕𝗔𝗚𝗬𝗢, 𝗧𝗜𝗡𝗨𝗟𝗨𝗡𝗚𝗔𝗡 𝗡𝗚 𝗗𝗧𝗜

Upang matulungan ang mga micro, small, and medium enterprises (MSMEs) na naapektuhan ng mga nagdaang bagyo, namahagi ang Department of Trade and Industry (DTI) Santiago City ng Pangkabuhayan sa Pagbangon at Ginhawa (PPG) Livelihood Kits noong Disyembre 15, 2024.

Pinangunahan ni Ms. Shynne Cecille C. Arao, Officer-in-Charge ng Santiago City Satellite Office, ang nasabing distribusyon, katuwang ang mga kawani ng DTI. Ang inisyatibong ito ay bahagi ng programa ng ahensya upang muling maiangat ang kabuhayan ng mga MSMEs at pasiglahin ang lokal na ekonomiya.

Ayon kay Ms. Arao, layunin ng DTI na palakasin ang pagtutulungan sa mga lokal na yunit ng pamahalaan at iba’t ibang stakeholders mula sa pribadong sektor upang mas mapabuti at maging epektibo ang pagpapatupad ng mga programa at inisyatiba para sa mga MSMEs.

Ang distribusyon ng livelihood kits ay inaasahang makatutulong upang maibalik ang sigla ng kabuhayan ng mga negosyanteng naapektuhan ng kalamidad at magsilbing tulay para sa kanilang muling pagbangon.

- J-Lyn Marangga Ovenza | News Correspondent

21/12/2024

𝗧𝗥𝗜𝗖𝗬𝗖𝗟𝗘 𝗗𝗥𝗜𝗩𝗘𝗥, 𝗛𝗨𝗟𝗜 𝗦𝗔 𝗜𝗟𝗜𝗚𝗔𝗟 𝗡𝗔 𝗗𝗥𝗢𝗚𝗔

Isang 38-anyos na tricycle driver ang nahuli sa Santiago City matapos makuhanan ng higit ₱30,000 halaga ng ilegal na droga sa isang buy-bust operation na isinagawa sa Purok Nieto, Barangay Batal, noong Disyembre 15, 2024.

Ayon sa ulat, ang operasyon ay pinangunahan ng Santiago City Police Office (SCPO) Station 4, katuwang ang Criminal Investigation Unit (CIU), Police Station 3, at Regional Intelligence Unit (RIU) ng PRO2, sa pakikipag-ugnayan sa Philippine Drug Enforcement Agency (PDEA) Region 2.

Sa ikinasang operasyon, nahuli ang suspek, residente ng Barangay Villasis, matapos siyang pagbentahan ng isang heat-sealed transparent plastic sachet na naglalaman ng hinihinalang shabu na may bigat na humigit-kumulang 4.8 gramo kapalit ng ₱20,000 marked money.

Bukod sa droga na may tinatayang halaga na ₱32,640, nakumpiska rin sa suspek ang isang Android phone at ang kanyang motorsiklong Honda TMX 125. Isinailalim ang mga nakuhang ebidensya sa imbentaryo sa presensya ng mga awtoridad.

Ang suspek, na nasa talaan bilang Street-Level Individual (SLI), ay kasalukuyang nakakulong sa Santiago City Custodial Facility. Nahaharap siya sa ka*ong paglabag sa Republic Act 9165 o ang Comprehensive Dangerous Drugs Act of 2002.

- John Paul Catata | News Correspondent

21/12/2024

𝟯 𝗧𝗥𝗬𝗦𝗜𝗞𝗘𝗟 𝗔𝗧 𝗠𝗣𝗩, 𝗡𝗔𝗚𝗞𝗔𝗥𝗔𝗠𝗕𝗢𝗟𝗔 𝗦𝗔 𝗕𝗥𝗚𝗬. 𝗥𝗜𝗭𝗔𝗟

Isang karambola ng apat na sasakyan, kabilang ang tatlong traysikel at isang Mitsubishi Xpander GLS MPV, ang naganap sa Santiago-Tuguegarao Road, Purok-3, Barangay Rizal, Santiago City, pasado ala-1:00 ng madaling araw ngayong Disyembre 15, 2024.

Ayon sa ulat, ang Mitsubishi Xpander, na minamaneho ng isang 29-anyos na government employee na residente ng Barangay Rizal, ay binabaybay ang daan patungo sa Barangay Mabini nang mahagip nito ang nakaparadang traysikel na minamaneho ni Orlando, 48-anyos.

Dahil sa insidente, nadamay ang dalawang iba pang traysikel — isa na minamaneho ni Francis, 26-anyos, at ang isa pa na nasa pagmamaneho ni Efren, 45-anyos. Ang pagkakahagip ng MPV sa traysikel ni Orlando ay nagtulak dito upang mabangga ang traysikel ni Francis, na siya namang tumama sa traysikel ni Efren.

Ayon kay Orlando, nakaparada ang kanyang traysikel sa gitna ng kalsada matapos masangkot sa isang naunang aksidente. Sugatan si Francis at agad dinala sa Santiago Medical Center sa Barangay Rosario para gamutin. Samantala, nasira ang mga sasakyan na sangkot sa aksidente.

Patuloy ang imbestigasyon ng mga otoridad, at inaasahan ang pag-aayos sa pagitan ng mga sangkot upang maresolba ang insidente. Sa kabila ng tindi ng karambola, masasabing masuwerte ang ibang mga sangkot na walang malalang pinsala ang kanilang natamo.

- John Paul Catata | News Correspondent

21/12/2024

𝟮 𝗟𝗔𝗟𝗔𝗞𝗜𝗡𝗚 𝗕𝗜𝗚𝗢 𝗦𝗔 𝗣𝗔𝗚-𝗜𝗕𝗜𝗚, 𝗡𝗔𝗚𝗣𝗔𝗧𝗜𝗪𝗔𝗞𝗔𝗟

Dalawang magkasunod na insidente ng pagpapatiwakal ang naganap sa lungsod ng Santiago, na nag-iwan ng matinding lungkot sa pamilya ng mga biktima ngayong panahon ng kapaskuhan.

Ang unang insidente ay naganap sa Barangay Patul kung saan natagpuan ng sariling ina ang 37-anyos na pintor na wala nang buhay at nakabitin sa kisame ng kanilang sala gamit ang lubid. Ayon sa imbestigasyon, huling nakita ang biktima na bumibili ng alak sa isang tindahan habang nasa ilalim ng impluwensiya ng nakalalasing na inumin.

Bago nito, sinasabing nagtungo pa ang biktima sa Nueva Ecija upang bisitahin ang kaniyang kapatid, kung saan napagsabihan umano itong maghanap ng trabaho. Ayon sa pamilya, nagsimula ang madalas na paglalasing ng biktima matapos siyang iwan ng kaniyang live-in partner, na nakikitang posibleng dahilan ng kaniyang desisyon.

Samantala, isa pang insidente ang naitala sa Barangay Villa Gonzaga, kung saan natagpuan namang nakabitin sa kisame gamit ang extension wire ang isang 37-anyos na construction worker. Ang biktima, na may asawa, ay nakita ring lasing bago ang insidente at naghabilin pa ng paghahanap ng kaniyang pamilya sa kaniyang ina.

Ayon sa pamilya ng biktima, madalas umanong nagtatalo ang lalaki at ang kaniyang asawa, dahilan upang siya ay iwan ng misis. Ang mga alitang ito ay itinuturing na posibleng nagtulak sa biktima upang wakasan ang kaniyang sariling buhay.

Parehong pinroseso ng Santiago City Forensic Unit ang mga lugar ng insidente, ngunit nagpasya ang mga pamilya na huwag nang ipa-autopsy ang mga bangkay.

Ang mga trahedyang ito ay muling nagbigay-diin sa kahalagahan ng suporta sa mental health at emosyonal na kalagayan ng mga indibidwal, lalo na sa panahon ng mga personal na krisis.

- Pao Reyes | News Correspondent

21/12/2024

𝗖𝗢𝗔, 𝗞𝗜𝗡𝗨𝗪𝗘𝗦𝗧𝗬𝗢𝗡 𝗔𝗡𝗚 𝗣𝟭.𝟳𝟱 𝗕𝗜𝗟𝗬𝗢𝗡𝗚 𝗣𝗜𝗦𝗢𝗡𝗚 𝗥𝗢𝗔𝗗 𝗡𝗘𝗧𝗪𝗢𝗥𝗞 𝗡𝗜 𝗠𝗔𝗬𝗢𝗥 𝗦𝗛𝗘𝗘𝗡𝗔 𝗧𝗔𝗡

Sa inilabas na Annual Audit Observation ng Commission on Audit (COA), natuklasan ang kawalan ng katiyakan at pagiging hindi maaasahan ng Road Network Account ng Lokal na Pamahalaan ng Santiago City, na umaabot sa kabuuang halagang ₱1,751,244,227.37. Ayon sa ulat, hindi nasunod ng administrasyon ni Mayor Sheena Tan ang mga alituntunin sa accounting at reporting na nakapaloob sa Local Roads Asset Management System ng COA Circular No. 2015-008 na ipinalabas noong Nobyembre 23, 2015.

Dahil sa mga kakulangan sa pagsunod sa tamang proseso, kinuwestiyon ng COA ang pagiging tama at maaasahan ng naturang halaga, na naglalagay sa integridad ng pamamahala ng pondo para sa mga kalsadang lokal sa alanganin.

Marami ang nababahala kung paano napangasiwaan ang malaking pondong ito, lalo na’t direktang nakaaapekto ito sa mga imprastraktura at serbisyo na dapat sana’y nagbebenepisyo sa mga residente ng Santiago City.

Bukod dito, tinuligsa ng ilang kritiko si Mayor Sheena Tan, na siya umanong dapat manguna sa pagtiyak na maayos ang lahat ng proseso sa pananalapi ng lungsod.

Nananawagan ang publiko para sa masusing imbestigasyon at pagpapaliwanag mula sa lokal na pamahalaan upang masiguro ang tamang paggamit ng pondo at mapanagot ang sinumang responsable sa mga pagkukulang na ito.

- J-Lyn Marangga Ovenza | News Correspondent

06/12/2024

𝗣𝗔𝗠𝗔𝗦𝗞𝗢𝗡𝗚 𝗛𝗔𝗡𝗗𝗢𝗚 𝗡𝗚 𝗣𝗔𝗠𝗔𝗛𝗔𝗟𝗔𝗔𝗡𝗚 𝗟𝗨𝗡𝗚𝗦𝗢𝗗 𝗡𝗚 𝗦𝗔𝗡𝗧𝗜𝗔𝗚𝗢, 𝗨𝗠𝗔𝗡𝗜 𝗡𝗚 𝗕𝗔𝗧𝗜𝗞𝗢𝗦 𝗠𝗨𝗟𝗔 𝗦𝗔 𝗣𝗨𝗕𝗟𝗜𝗞𝗢

Isinusulong ng Pamahalaang Lungsod ng Santiago sa pangunguna ni Mayor Sheena Tan ang taunang "Pamaskong Handog" para sa iba't ibang Barangay na nasasakupan ng lungsod. Ngunit sa kabila ng layunin nitong magbigay ng tulong sa panahon ng Kapaskuhan, umani ito ng batikos mula sa netizens at mga Santiaguenong hindi nakalista dahil sa umano'y diskriminasyon sa pamamahagi.

Ayon sa anunsyo na ipinadala sa amin ng isang residente ng Santiago na ayaw magpakilala, tanging ang mga rehistradong botante lamang ng Brgy. Buenavista ang makatatanggap ng nasabing handog sa sa darating na December 8 sa Multi-Purpose Hall ng nasabing barangay. Maraming residente tuloy ang nagtanong kung bakit hindi kasali ang mga hindi botante kabilang na ang mga bagong lipat na residente at mga residenteng hindi umabot sa voter registration. Bakit hindi raw sila mabibigyan ng pamasko gayong pareho naman silang nagbabayad ng buwis na pinanggagalingan ng pondo ng lungsod.

“Hindi ba’t ang pondo ng lungsod ay mula rin sa buwis na binabayaran ng bawat isa, botante man o hindi? Bakit ganito ang pamantayan? Ang Pasko ay para sa lahat, hindi lang sa mga rehistradong botante,” ani ng isang residente na tumangging magpakilala.

Sa social media, maraming netizens ang nagpahayag ng pagkadismaya sa desisyon ng administrasyon ni Mayor Tan. “Napaka-unfair! Lahat tayo ay may kontribusyon sa lungsod na ito, bakit parang inuuna lang ang botante? Pera ng bayan ito!” komento ng isang netizen.

Samantala, ilang residente rin ang nag-akusa na tila ginagamit ang programa upang magpakitang-gilas sa mga botante at para sa layuning pampulitika. “Kung ang tunay na layunin ay makatulong, dapat lahat ay kasama. Mukhang may halong pulitika ang Pasko rito,” dagdag pa ng isa.

Habang nananatiling tahimik si Mayor Sheena Tan ukol sa mga reklamo, umaasa ang publiko na magiging patas ang pamamahagi ng tulong sa mga darating pang programa ng lungsod, lalo na’t ang ganitong mga isyu ay nagdudulot ng pagkakahiwa-hiwalay sa komunidad.

- J-Lyn Marangga Ovenza | News Correspondent

30/11/2024

Maligayang araw ng paggunita kay G*t Andres Bonifacio, ang Ama ng Katipunan at simbolo ng tapang at pagmamahal sa bayan! 🇵🇭

Sa diwa ng kanyang kabayanihan, ang Boses ng Santiagueño ay nananatiling tapat sa pagbibigay ng makabuluhan at patas na balita para sa ating mga kababayan. Sama-sama nating ipaglaban ang katotohanan at tumindig para sa kapakanan ng lahat, dito sa loob at labas ng ating mahal na Lungsod ng Santiago. 💙❤️💛

29/11/2024

𝗧𝗥𝗔𝗬𝗦𝗜𝗞𝗘𝗟 𝗡𝗔 𝗡𝗔𝗪𝗔𝗟𝗔, 𝗡𝗔𝗞𝗨𝗛𝗔 𝗦𝗔 𝗤𝗨𝗜𝗥𝗜𝗡𝗢

Nabawi sa bayan ng Aglipay, Quirino ang isang asul na traysikel na napaulat na nawawala sa Santiago City, na may plakang UZ 8741 at Body Number 5191. Ayon sa impormasyong nakalap nitong Nobyembre 27, 2024, ang traysikel ay natagpuang ibinebenta ng isang suspek sa halagang ₱15,000.

Naging kahina-hinala ang transaksyon nang magduda ang lalaki na kinakausap ng suspek dahil sa napakababang presyo. Agad siyang nakipag-ugnayan sa mga himpilan ng pulisya sa Quirino at kalapit na mga lalawigan upang beripikahin ang kalagayan ng traysikel. Sa tulong ng imbestigasyon, napag-alamang ito ay naiulat na nawawala sa Police Station 1 ng Santiago City Police Office (SCPO).

Ang traysikel ay pag-aari ni Mr. Jefferson Martin, 42-anyos, residente ng Brgy. Centro East, Santiago City, na unang nagbalita ng pagkawala nito sa 104.9 XFM Santiago. Ayon kay Martin, nawawala ang traysikel pasado alas-9:00 ng gabi noong Martes habang nakaparada ito sa harap ng kanilang bahay na nasa gilid ng kalsada.

Ang suspek, isang 26-anyos na residente ng San Agustin, Isabela, ay kasalukuyang nasa kustodiya ng Criminal Investigation and Detection Group (CIDG) Quirino. Iniimbestigahan pa rin ang ka*o habang inihahanda ang mga legal na aksyon laban sa kanya.

Patuloy naman ang mga otoridad sa paggalugad kung may iba pang insidente ng nakawan na may kaugnayan sa suspek. Inaasahan din na bibigyan ng masusing pansin ang seguridad sa mga pampublikong lugar upang maiwasan ang mga ganitong uri ng insidente.

- Pao Reyes | News Correspondent

28/11/2024

𝗚𝗥𝗔𝗗𝗘 𝟭𝟭 𝗘𝗦𝗧𝗨𝗗𝗬𝗔𝗡𝗧𝗘, 𝗔𝗥𝗘𝗦𝗧𝗔𝗗𝗢 𝗦𝗔 𝗣𝗔𝗚𝗕𝗘𝗕𝗘𝗡𝗧𝗔 𝗡𝗚 𝗠𝗔𝗥𝗜𝗝𝗨𝗔𝗡𝗔

Naaresto ng Santiago City Police Office (SCPO) Station 2 ang isang Grade 11 na estudyante sa Barangay Plaridel, Santiago City matapos mahuling nagbebenta umano ng ma*****na pasado 12:20 ng madaling araw nitong Nobyembre 27, 2024.

Ang suspek, itinago sa pangalang “Joseph,” 16-anyos at residente ng Barangay Rosario, ay naaktuhang nakikipagtransaksyon sa isang undercover police officer na nagkunwaring buyer. Kapalit ng ₱1,500, naibenta umano nito ang isang folded paper na naglalaman ng ma*****na. Matapos ang operasyon, narekober ang marked money at isang Android phone na agad isinailalim sa imbentaryo ng mga otoridad.

Dahil menor de edad, ang suspek ay ipinasakamay sa Department of Social Welfare and Development (DSWD) habang inihahanda ang ka*ong paglabag sa Republic Act 9165 o Comprehensive Dangerous Drugs Act of 2002.

Patuloy na napupuna ang nakakaalarmang trend sa Santiago City kung saan pabata na ng pabata ang mga nalululong at nasasangkot sa iligal na droga. Ang pag-aresto kay "Joseph" ay isa lamang sa maraming ka*o ng pagkakasangkot ng kabataan sa ganitong gawain.

Sa kabila ng sunod-sunod na insidente, nananatiling tahimik ang administrasyon ni Mayor Sheena Tan sa kung ano ang mga konkretong hakbang na ginagawa nito upang masugpo ang droga, lalo na sa mga kabataan. Tila nagkukulang ang lokal na pamahalaan sa pagpapatupad ng programa kontra droga at sa pagpapalakas ng edukasyon para sa mga kabataan.

Dahil dito, nananawagan ang mga mamamayan ng mas agresibong aksyon mula kay Mayor Tan. Hindi sapat ang paalala at pangako—kailangan ng malinaw at epektibong solusyon upang maprotektahan ang kinabukasan ng mga kabataan laban sa paglaganap ng droga sa lungsod.

- J-Lyn Marangga Ovenza | News Correspondent

28/11/2024

𝗔𝗦𝗢𝗡𝗚 𝗧𝗨𝗠𝗔𝗪𝗜𝗗, 𝗡𝗔𝗚𝗜𝗡𝗚 𝗗𝗔𝗛𝗜𝗟𝗔𝗡 𝗡𝗚 𝗔𝗞𝗦𝗜𝗗𝗘𝗡𝗧𝗘

Sugatan ang isang rider ng NMax habang galos lamang ang tinamo ng driver ng itim na MG Crossover SUV sa aksidenteng naganap sa Maharlika Highway, Barangay Dubinan West, pasado 11:30 ng gabi noong Nobyembre 26, 2024.

Ayon sa mga ulat, ang insidente ay nag-ugat sa biglaang pagtawid ng isang a*o sa kalsada. Sa pag-iwas ng rider ng NMax, nahagip nito ang SUV na nasa kabilang linya. Ang SUV, na noo’y patungo sa sentro poblacion ng Santiago, ay siya namang nakasagasa sa a*ong tumawid.

Ang NMax ay patungo sana sa bayan ng Cordon, Isabela nang mangyari ang insidente. Dahil sa lakas ng salpukan, nagtamo ng malubhang sugat ang rider ng motor, na agad isinugod sa pinakamalapit na ospital. Samantala, ang driver ng SUV ay nagtamo lamang ng gasgas at nanatili sa lugar ng insidente para magbigay ng pahayag sa mga awtoridad.

Ayon sa mga saksi, posibleng naiwasan ang aksidente kung mayroong sapat na ilaw sa bahagi ng highway at kung mayroong mas maigting na pagpapatupad ng mga batas hinggil sa pag-aalaga ng mga alagang hayop upang hindi ito basta-bastang tumawid sa kalsada.

Nagpaalala naman ang mga otoridad sa mga motorista na magdoble-ingat lalo na sa mga highway na madalas gamitin ng mga sasakyan sa mataas na bilis, at pinaalalahanan din ang mga may-ari ng hayop na tiyaking nakatali o nasa ligtas na lugar ang kanilang mga alaga upang maiwasan ang ganitong insidente.

- J-Lyn Marangga Ovenza | News Correspondent

28/11/2024

𝟰 𝗦𝗨𝗚𝗔𝗧𝗔𝗡 𝗦𝗔 𝗦𝗔𝗚𝗨𝗣𝗔𝗔𝗡 𝗡𝗚 𝗧𝗥𝗔𝗬𝗦𝗜𝗞𝗘𝗟 𝗔𝗧 𝗞𝗢𝗧𝗦𝗘 𝗦𝗔 𝗦𝗔𝗡𝗧𝗜𝗔𝗚𝗢 𝗖𝗜𝗧𝗬

Apat na indibidwal, kabilang ang isang bata, ang sugatan matapos mabangga ang sinasakyan nilang traysikel ng isang Toyota Camry Sedan sa kahabaan ng Santiago-Tuguegarao Road, Barangay Mabini, Santiago City.

Ayon sa imbestigasyon, minamaneho ng isang 50-anyos na manggagawa sa perya ang traysikel, sakay ang tatlong pasahero na may edad 27, 51, at 5 taon. Lahat sila ay residente ng Barangay Naggasican. Ang nakabangga namang Sedan ay minamaneho ng isang 47-anyos na online freelancer mula Barangay Centro East.

Batay sa ulat ng mga otoridad, parehong patungo sa Mabini Circle ang traysikel at Sedan nang mangyari ang insidente malapit sa National Food Authority (NFA). Hindi umano napansin ng tsuper ng kotse ang traysikel, dahilan upang mabangga nito ang likurang bahagi ng nasabing sasakyan.

Dahil sa lakas ng pagkakabangga, wasak ang likod ng traysikel at nayupi ang gulong ng sidecar. Nagdulot ito ng mga sugat sa drayber at mga pasahero ng traysikel.

Bagamat tumakas ang drayber ng Sedan matapos ang aksidente, kusa rin itong sumuko sa Traffic Enforcement Unit (TEU) ng Santiago City Police Office. Sa huli, nagkasundo ang magkabilang panig matapos magdesisyon ang drayber ng kotse na sagutin ang gastos sa pagpapagamot ng mga biktima at ipagawa ang nasirang traysikel.

Muling nagpaalala ang mga otoridad sa mga motorista na maging maingat sa pagmamaneho upang maiwasan ang ganitong uri ng aksidente.

- Pao Reyes | News Correspondent

28/11/2024

𝟯𝟱 𝗔𝗡𝗬𝗢𝗦 𝗡𝗔 𝗠𝗔𝗚𝗦𝗔𝗦𝗔𝗞𝗔, 𝗧𝗜𝗡𝗔𝗚𝗔 𝗗𝗔𝗛𝗜𝗟 𝗦𝗔 𝗔𝗪𝗔𝗬 𝗦𝗔 𝗜𝗡𝗨𝗠𝗔𝗡

Patuloy na nagpapagaling ang isang 35-anyos na magsasaka matapos pagtatagain ng isang 53-anyos na kasamahan sa trabaho dahil sa alitan habang nag-iinuman sa Purok 2, Barangay San Andres, Santiago City.

Ayon sa ulat ng mga otoridad, ang biktima ay residente ng Barangay San Andres, samantalang ang suspek ay nakatira sa Barangay Rizal, parehong magsasaka.

Base sa imbestigasyon ng Santiago City Police Station 2, nagsimula ang insidente matapos makatanggap ng ulat ang Santiago City Tactical Operations Center (SCPO TOC) tungkol sa kaguluhan sa lugar. Napag-alaman na bago ang insidente, nagkayayaan ang biktima, suspek, at kanilang mga kasamahan na mag-inuman matapos ang trabaho.

Habang nasa kasagsagan ng inuman, nagkaroon umano ng mainit na pagtatalo ang biktima at suspek na nauwi sa suntukan. Sa kalagitnaan ng gulo, nakakuha umano ng bolo ang suspek at ginamit ito upang pagtatagain ang biktima, na nagtamo ng sugat sa ulo.

Agad namang inaresto ng mga awtoridad ang suspek, na ngayon ay nahaharap sa ka*ong Frustrated Homicide at nasa kustodiya ng Santiago City Custodial Facility.

Samantala, ang biktima ay kasalukuyang nagpapagaling mula sa tinamong sugat na kinakailangang tahiin. Patuloy itong iniinda habang nagpapagaling.

Pinapaalalahanan ng mga awtoridad ang publiko na iwasan ang pag-inom ng alak kung may sigalot o hindi pagkakaunawaan upang maiwasan ang ganitong mga insidente.

- John Paul Catata | News Correspondent

24/11/2024

𝗞𝗢𝗡𝗧𝗥𝗢𝗕𝗘𝗥𝗦𝗬𝗔𝗟 𝗡𝗔 𝗣𝟯𝟴 𝗠𝗜𝗟𝗬𝗢𝗡𝗚 𝗖𝗢𝗡𝗙𝗜𝗗𝗘𝗡𝗧𝗜𝗔𝗟 𝗙𝗨𝗡𝗗 𝗔𝗧 𝗣𝟮𝟮𝟱 𝗠𝗜𝗟𝗬𝗢𝗡𝗚 𝗗𝗢𝗡𝗔𝗧𝗜𝗢𝗡 𝗙𝗨𝗡𝗗 𝗡𝗚 𝗣𝗔𝗠𝗔𝗛𝗔𝗟𝗔𝗔𝗡𝗚 𝗟𝗨𝗡𝗚𝗦𝗢𝗗, 𝗕𝗜𝗡𝗔𝗧𝗜𝗞𝗢𝗦!

Umani ng batikos ang administrasyon ni Mayor Sheena Tan matapos talakayin ni Konsehal Arlene Jane Reyes ang kwestyonableng ₱38 milyong Confidential Fund na nais ipasa ng pamahalaang lungsod para sa taong 2025. Sa kanyang privileged speech sa sesyon ng Sangguniang Panlungsod, binigyang-diin ni Reyes ang kawalan ng transparency at ang posibilidad ng maling paggamit ng nasabing pondo.

Ang Confidential Fund ay madalas ginagamit para sa mga programang may kaugnayan sa seguridad at intelihensya, ngunit sa ilalim ng batas, hindi ito saklaw ng auditing ng Commission on Audit (COA). Ayon kay Reyes, ito ang dahilan kung bakit mapanganib ang pondong ito. "Kapag walang auditing at malinaw na dokumentasyon, malaki ang posibilidad ng korapsyon at maling paggamit ng pondo," ani Reyes.

Idinagdag pa niya na ang ₱38 milyong pondo ay tila hindi maipaliwanag nang malinaw ng administrasyon. "Ano ang mga programang balak gastusan nito? Saan ito gagamitin? Bakit hindi idaan sa mga nararapat na ahensya na may mandato sa usaping seguridad?" tanong ni Reyes sa kanyang talumpati.

Ang isyung ito ay nag-ugat sa kontrobersyal na Confidential Fund ng Pangalawang Pangulo Sara Duterte, na kasalukuyang iniimbestigahan sa Kongreso. Marami ang nangangamba na maaaring maulit ang parehong isyu sa lokal na antas.

Bukod sa Confidential Fund, kinuwestyon din ni Reyes ang ₱225 milyong donation account na umano'y gagamitin sa pagtulong sa mga mamamayan ng lungsod. Subalit, ayon sa mga netizens at ilang eksperto, bakit kailangang sa Office of the Mayor idaan ang pondong ito? May mga ahensya sa city hall tulad ng Social Welfare and Development Office (SWDO) na may mandato sa ganitong gawain.

"Ang opisina ng alkalde ay dapat nakatuon sa polisiya at administrasyon, hindi sa direktang pamamahagi ng tulong na pondo. Ito ay malinaw na conflict of interest at maaaring magamit sa pulitikal na layunin," ayon sa isang netizen.

Puno ng tanong ang social media tungkol sa intensyon ng administrasyon ni Mayor Sheena Tan. "Kung walang COA audit, paano tayo makakatiyak na hindi ginagamit ang pondong ito para sa pansariling interes?" ani ng isang residente.

Hinikayat ng mga Netizens ang pamahalaang lungsod na gawing mas bukas ang usapin sa pondo. "Ang pera ng bayan ay pera ng bawat mamamayan. Ang bawat sentimo ay dapat mapunta sa nararapat at tiyak na programa, hindi sa mga kaduda-dudang alokasyon"

Ang ganitong kontrobersya ay nagsilbing babala sa mga mamamayan ng Santiago City upang mas maging mapanuri sa pamumuno ni Mayor Sheena Tan at ang paggamit ng pondo ng bayan.

- Pao Reyes | News Correspondent

17/11/2024

𝗦𝗜𝗚𝗡𝗔𝗟 𝗡𝗢. 𝟯 𝗜𝗧𝗜𝗡𝗔𝗔𝗦 𝗦𝗔 𝗦𝗔𝗡𝗧𝗜𝗔𝗚𝗢 𝗖𝗜𝗧𝗬: 𝗕𝗔𝗚𝗬𝗢 𝗡𝗔𝗚𝗕𝗔𝗕𝗔𝗡𝗧𝗔 𝗡𝗚 𝗠𝗔𝗟𝗔𝗞𝗜𝗡𝗚 𝗣𝗜𝗡𝗦𝗔𝗟𝗔

Itinaas ng PAGASA ang Signal Number 3 sa buong lungsod ng Santiago City dahil sa paparating na bagyo. Inaasahan ang lakas ng hangin na higit sa 89 kilometro kada oras at maaaring umabot hanggang 117 kilometro kada oras sa loob ng susunod na 18 oras. Ang sitwasyon ay nagbabanta ng malubhang pinsala sa mga kabahayan, pananim, at imprastruktura.

Ayon sa PAGASA, maaaring makaranas ng:

- Matinding pinsala sa mga istrukturang may mataas na panganib.
- Katamtamang pinsala sa mga istrukturang katamtaman ang tibay.
- Bahagyang pinsala sa mga istrukturang mababa ang panganib.
Ang mga bahay na gawa sa magagaan at luma nang materyales, tulad ng nipa at kogon, ay inaasahang mawawasak o mawawalan ng bubong. Ang mga gusaling gawa sa kahoy o pinaghalong timber at concrete hollow blocks (CHB) ay maaari ring masira.

Bukod dito, posibleng mawalan ng suplay ng kuryente at komunikasyon sa malaking bahagi ng lungsod. Ang mga pananim tulad ng saging, niyog, palay, at mais ay inaasahan ding magkakaroon ng matinding pagkalugi.

Pinapayuhan ang mga residente na gawin ang sumusunod:

- Lumikas sa mas matibay na gusali kung ang inyong bahay ay hindi sapat na matibay.
- Manatili sa ligtas na lugar hanggang sa humupa ang bagyo.
- Iwasan ang pagpunta sa mabababang lugar, pampang ng ilog, at baybayin upang makaiwas sa pagbaha at storm surge.
- Kanselahin ang lahat ng biyahe at aktibidad sa labas.

Kung mararanasan ang biglaang magandang panahon, ito ay senyales ng pagdaan ng "mata" ng bagyo. Huwag mag-atubiling lumabas ng ligtas na kanlungan dahil posibleng bumalik ang mas malalakas na hangin sa loob ng isa hanggang dalawang oras.

Nakahanda na ang mga ahensya ng disaster preparedness at response upang tugunan ang mga pangangailangan ng mga residente sa oras ng emerhensya.

Manatiling alerto at patuloy na subaybayan ang mga opisyal na anunsyo mula sa PAGASA at lokal na pamahalaan. Ang kooperasyon ng lahat ay mahalaga upang maiwasan ang mas maraming pinsala at masiguro ang kaligtasan ng bawat isa.

- J-Lyn Marangga Ovenza | News Correspondent

14/11/2024

𝗣𝗔𝗚𝗗𝗘𝗗𝗘𝗞𝗟𝗔𝗥𝗔 𝗡𝗚 𝗦𝗧𝗔𝗧𝗘 𝗢𝗙 𝗖𝗔𝗟𝗔𝗠𝗜𝗧𝗬 𝗦𝗔 𝗟𝗨𝗡𝗚𝗦𝗢𝗗 𝗡𝗚 𝗦𝗔𝗡𝗧𝗜𝗔𝗚𝗢, 𝗛𝗜𝗡𝗗𝗜 𝗗𝗜𝗡𝗔𝗟𝗨𝗛𝗔𝗡 𝗡𝗚 𝗠𝗚𝗔 𝗞𝗢𝗡𝗦𝗘𝗛𝗔𝗟

Isang napakahalagang sesyon ang naantala matapos hindi dumating ang mga konsehal na kaalyado ni Mayor Sheena Tan sa itinakdang oras para pag-usapan ang pagdedeklara ng State of Calamity sa lungsod. Sa live video na inilabas ni Konsehal Arlene Jane Alvarez-Reyes, kanyang binigyang-diin na ang deklarasyong ito ay kinakailangan upang mailabas ang Calamity Fund na magagamit para matulungan ang mga naapektuhang residente.

Bagaman nakatakdang magsimula ang sesyon ng alas-4:30 ng hapon, hindi nagpakita ang karamihan ng mga konsehal, karamihan sa kanila ay kaalyado ni Mayor Tan. Alas-5:15 na ng hapon, at tanging sina Konsehal Jigs Miranda, Konsehal Atty. Jun Cabucana, at Alvarez-Reyes lamang ang nasa tamang oras sa sesyon. Dahil dito, walang naging quorum at hindi pa rin naidedeklara ang State of Calamity sa lungsod hanggang ngayon.

Ayon kay Konsehal Alvarez-Reyes, tila walang malasakit ang mga konsehal sa kalagayan ng kanilang mga kababayan sa kabila ng napakahalagang sesyon na sana’y magbibigay ng agarang tulong sa mga apektadong residente. Ang kawalan ng aksyon ng mga kaalyado ni Mayor Tan ay nagdudulot ng pagkaantala sa pondo na sana’y magagamit na para sa pangangailangan ng mga mamamayan ng Santiago City.

- Pao Reyes | News Correspondent

Address

Tandang Sora Street Barangay Victory Norte
Santiago
3311

Website

facebook.com

Alerts

Be the first to know and let us send you an email when Boses ng Santiagueño posts news and promotions. Your email address will not be used for any other purpose, and you can unsubscribe at any time.

Videos

𝗜𝗟𝗔𝗡𝗚 𝗞𝗔𝗧𝗔𝗢, 𝗡𝗔𝗦𝗨𝗚𝗔𝗧𝗔𝗡 𝗦𝗔 𝗣𝗔𝗚𝗦𝗜𝗞𝗟𝗔𝗕 𝗡𝗚 𝗦𝗨𝗡𝗢𝗚 𝗦𝗔 𝗜𝗦𝗔𝗡𝗚 𝗧𝗔𝗛𝗔𝗡𝗔𝗡 Tatlong katao ang kaagad na dinala sa pagamutan matapos masugatan sa naganap na sunog sa isang bahay sa Brgy. Victory Norte, Santiago City. Ang nasabing bahay ay pag-aari ng isang 59-anyos na ginang, may-asawa, at residente ng lugar. Ayon sa mga awtoridad, gawa sa pinagsamang kahoy at semento ang bahay na tinupok ng apoy na sinasabing nagmula sa isang naiwang kandila, ayon na rin sa salaysay ng may-ari. Ang sunog ay idineklarang kontrolado o "fireout" dakong 5:39 ng umaga. Tatlong katao ang nasaktan sa insidente: isang 62-anyos na lolo, at dalawa pang lalaki na edad 32 at 29, na pawang magkakamag-anak. Patuloy pa ang ginagawang imbestigasyon upang matukoy ang eksaktong sanhi ng sunog at ang kabuuang halaga ng pinsalang iniwan nito. - Pao Reyes | News Correspondent

Mayor Sheena Tan, Nagalit pa sa ating mga kababayan!

𝗠𝗔𝗬𝗢𝗥 𝗦𝗛𝗘𝗘𝗡𝗔 𝗧𝗔𝗡, 𝗦𝗜𝗡𝗜𝗦𝗜 𝗣𝗔 𝗔𝗡𝗚 𝗜𝗟𝗔𝗡𝗚 𝗠𝗚𝗔 𝗥𝗘𝗦𝗜𝗗𝗘𝗡𝗧𝗘 𝗜𝗠𝗕𝗘𝗦 𝗡𝗔 𝗚𝗨𝗠𝗔𝗪𝗔 𝗡𝗚 𝗔𝗞𝗦𝗬𝗢𝗡! Umani ng matinding batikos ang Pamahalaang Lungsod ng Santiago sa pangunguna ni Mayor Sheena Tan matapos ang umano'y kakulangan ng aksyon at malinaw na plano para sa pagdating ng bagyong Nika. Marami ang nagtanong sa tila huli at magulong tugon ng pamahalaan sa kabila ng inaasahang hagupit ng bagyo. Kahapon ng gabi, bandang alas-8:30, nag-live broadcast si Mayor Tan at sinisi pa ang mga residente, sinasabing matitigas umano ang kanilang ulo dahil hindi agad lumikas. Ngunit ayon sa mga apektadong residente, huli na ang utos ng alkalde para sa force evacuation ng mga barangay. Nang dumating sila sa ilang mga evacuation center, ang ilan ay nakapadlock pa noong umaga at tsaka lamang binuksan nang nagsimula nang tumaas ang tubig baha. Bukod pa rito, lumabas na ang mga evacuation center ay kulang sa kagamitan at hindi handa para sa pagdagsa ng evacuees. Marumi umano ang mga silid na pinaglalagakan ng mga tao, at walang malinis na tubig na maaaring gamitin para sa kalinisan at sa mga palikuran. Ang ganitong sitwasyon ay lalo pang nagdulot ng pangamba at pagkadismaya sa mga residente na umaasang makakatanggap ng mabilis na ayuda mula sa pamahalaang lokal. Sa social media, maraming netizens ang nagpahayag ng pagkadismaya sa naging tugon ng alkalde. "Bakit niya sinisisi ang mga residente? Siya ang may responsibilidad na magbigay ng maagap at maayos na plano, lalo na’t may banta ng bagyo," ani ng isang netizen. Ayon sa mga residente, ang ganitong klaseng kakulangan ng tugon at preparasyon mula sa pamahalaang lokal ay nagpapakita ng hindi pagkalinga sa mga pangunahing pangangailangan ng kanilang mga mamamayan sa oras ng sakuna. Ang tanong ngayon ng marami: Nasaan ang maagap na aksyon na inaasahan mula sa isa

Boses ng Santiagueño

21/12/2024

21/12/2024

21/12/2024

21/12/2024

21/12/2024

21/12/2024

21/12/2024

21/12/2024

06/12/2024

30/11/2024

29/11/2024

28/11/2024

28/11/2024

28/11/2024

28/11/2024

24/11/2024

17/11/2024

14/11/2024

Address

Website

Alerts

Videos

Mayor Sheena Tan, Nagalit pa sa ating mga kababayan!

Shortcuts

Share

Category