05/05/2024
“GAMENG”
Wen, Nanang sika’t gameng ko! Bulan ti Mayo naisangsangayan nga bulan para kenka Nanang, Inang, Mamang ken amin nga Inna. Ipeksak man ti ragsak nga aglaplaposanan ken iyebkas ti napalaos a panagyaman kenka Nanang ko.
Binitbit nak iti syam a bulan,kinawesan nak,pinasuso,inlele,sinurwan a nagna,ken tinarabay nak agpatingga nga addaan nak iti panunut. Sika ti raniag ti biagko ken dagiti kakabsat ko. Nu innak lagipen iti rigrigat mo kasla mapirsa-pirsa’y toy pusok ti asik kenka.
Nanang, ti panagayat mo ket awanan maris ken panagdudwa, nagmula ka iti ayat a sipupudno ket lima a bukel ti inka pinadakkel sinalwadan bayat ti inkam panagbalin a kas kayo a sanggir mo. Inton kaano bainte kwatro oras man ket saan nga umanay a binsa-binsaen ti kinasayaat ken kinaimbag mo.
Sinangom amin a karit ti biag, saan pulos a simmuko linabanam ni patay gapo ti ayat nga insagot mo, kunam a dimo kayat a mawatak ti pamilyam isu pinanunut nakam nga annak mo anyan Nanang nga ibtor mo a dika manla pulos sinamir ti rigat uray pinanday nakan ti ado a pannubok.
Sipapanunutak amin dagita a rigat ken sakripisyom ket innak garud pinadas ti immadayo. Tapnu laeng innak malitupan ti dadduma ken maksayan ti obligasyon mo ta ammok a marigrigatan ka iti sidong ni Tatang. Padasek ti biag abroad a kunada ken padasen ti gasat ken innak tinalikodan ti bukod a pagragsakan.
Ditoy ko napadasan dagiti rigat nga hanko ammo a kastoy gayam ti biag,nga han mo iggem ti oras mo ket dita kon Nanang a malagip ti rigat mo. Inaywanak ti saan ko a bukod nga annak,bainte kwatro oras ti innak inwayat kadakwada ket ditakon a marikna ti leddaang ko ngem inanusak ti iliw ken rigat.
Inkarik toy bagik nga maysa nga aldaw makita kanton a saan a mangmangged iti taltalon ta adun iti rigat ken sakripisyom kadakami ayat mo laeng nga inka maipaay amin a kasapulan mi, anyan a kinaanus Nanang! A dika manla nagrekreklamo.
Saan nga angaw ti rigat mo,ammok a dika perpekto nga Ina ngem para kaniak sikan tay perpekto a nagtaudak. Inton kaano diakto pulos isukat ni Nanang ko, Ina a nadunggo ken pudpudno iti panagayat na. Saan nakto met a mauma nga agsupapak kenka.
Saan laeng nga ita a bulan ti Mayo iti intay panagyaman ti Inna tayo nu diketdi iti agnanayun. Subadan iti respeto,liwliwaen ida,ikkan nam-ay,ibilang nga masya a GAMENG iti Ina ta narigat a masarakan iti pudno nga ayat ti maysa nga Ina.
Dakayo padak nga annak ditayto pulos gandaten a pagsangiten ti Ina tayo tapnu ti ballaigui ket maipaima kadatayo, kasanu ngata ti lubong nu awan raniag ket nagbalin a nasipnget ti dalan tayo. Ket Nanang sinilawam ti dalan ko, natikleb nak binangon nak, nagbalin ka a sanggir ko saan ko pulos nanggeg ti nadagsen a sasao sika tay besfren ko.
Saan mo nga urayen nga inton saan naka a malasin wennu damagen na nu siasino ka iti panangipariknam iti ayat mo,tattan kabsat!Tatta marikna na pay,iparikna mon!
Tatta maramanan na pay,pakanemon!
Tatta ammo na pay ibaga ti napintas!sagotamon!
Awanin serserbi ti amin nu ti Ina tayo ket napanen iti sabali a biag, ta awan umuna a babawi, nu di ketdi adda ti ud-udi. Lubong a nagkaywara iti babbai ngem maymaysa laeng iti nagbalin a Nanangko. Maysa a gameng ti pamilya ket inton kaano saan to masupapakan iti ania man a banbanag. Nagmula ka ti ayat isu daytoy BIAG mi tapnu namatmatan lawag toy lubong.
Dayawek ti kinabaknang pusom Nanang ken panunot mo ket dadtoy kami nga armas ken sanngir a kas sukat dagiti kinaanus mo ket dikamto mauma agpatinnga madanon panagbaket mo. Saan ka pulos nagkurang ta supsupado nga ayat ti inburay mo.
Kas maysa nga anak kayat ko a sukatan ti ragsak daguiti lulwam babaen ti panagayat ko kenka bitbitem dayta a ragsak agpatingga makitkita daka paylaeng toy rabaw ti daga ta isu dayta ti kangrunaan nga arapaap ti anak a kas subad ti biag nga insagot mo kaniak.
Ay-ayaten ka Nanang♥️
