Lagro PAHATID

19/06/2024

𝑩𝑨𝑳𝑰𝑻𝑨 | 𝐌𝐚𝐤𝐚𝐛𝐚𝐠𝐨𝐧𝐠 𝐏𝐚𝐦𝐚𝐦𝐚𝐡𝐚𝐲𝐚𝐠, 𝐓𝐮𝐥𝐨𝐲 𝐬𝐚 𝐆𝐢𝐭𝐧𝐚 𝐧𝐠 𝐏𝐚𝐧𝐠𝐚𝐧𝐢𝐛
Nina: Juderay Jamena at Christine Garganta

“Sa Bawat Atake sa Midya, Tuloy ang Pagsulat, Tuloy ang Pagmulat!”

Ito ang binigyang diin sa ginanap na online webinar na inorganisa ng Equipping Truth Tellers, isang samahan ng mga kabataang mamamahayag, tungkol sa kahalagahan ng kaligtasan sa Makabagong Pamamahayag na isinagawa sa pamamagitan ng Zoom meeting nitong Hunyo 19 sa ganap na ika-10 ng umaga.

Pinangunahan ang nasabing webinar ni Bb. Prences Jhewan O. Albis, Managing Editor ng Explained PH, bilang tagapanayam na nagbahagi ng ilang pamamaraan sa pagtataguyod ng kaligtasan sa Online Journalism.

Tinalakay ni Bb. Albis ang mga karapatan at kaligtasan ng mga mamamahayag sa pagsisiwalat at pag-uulat para sa bayan, gaya ng digital security, ligtas na komunikasyon, ethical practices at legal considerations, gayundin ang kaligtasan ng isang publikasyon.

Binanggit din ang ilang Ethical Practices tulad ng Verification o Fact Checking na magagamit ng mga mambabasa at mamamahayag upang siguruhing totoo ang mga nababasang impormasyon sa sosyal midya.

Ibinahagi rin ng tagapanayam ang isang kilalang pahayag mula sa isang German politician at philologist tungkol sa mga maling impormasyong naririnig o nababasa na maaari umanong paniwalaang totoo sa katagalan.

“FACTS ARE BORING”, sambit ni Bb. Albis na nagbigay hamon sa mga Campus Journalist na gamitin ang pagiging malikhain upang maging interesado ang mga tao sa ‘boring’ na katotohanan.

Pinagtuunan din ng pansin sa webinar ang talakayan tungkol sa disinformation na lumalaganap sa Pilipinas.

Samantala, ang nasabing webinar ay dinaluhan nina Christine Garganta at Juderay Jamena bilang kinatawan ng Lagro Pahatid upang mas mapagtibay ang kaligtasan sa pamamahayag ng mga bagong manunulat ng Paaralang Sekondarya ng Lagro.

12/06/2024

𝑳𝑨𝑻𝑯𝑨𝑳𝑨𝑰𝑵 | 𝐌𝐚𝐭𝐮𝐭𝐨 𝐬𝐚 𝐊𝐚𝐬𝐚𝐲𝐬𝐚𝐲𝐚𝐧
Ni Paula Jane Sarmiento

Isa sa mga ipinagdiriwang ngayong buwan ng Hunyo ay ang Araw ng Kalayaan o Independence Day. Ang araw na ginugunita ang paglaya ng bansa mula sa mga mananakop at mga bayaning nagbuwis ng buhay upang matamasa ang kalayaang ito. Araw din ito ng pag-alala at pagbibigay-pugay sa buhay, sakripisyo, at pagpapagal ng mga huwarang tao para lamang maiparanas ang kalayaang nararapat sa Pilipinas.

Taong 1898, Hunyo 12 nang opisyal na lumaya ang Pilipinas mula sa kamay ng mga Kastila. Ang kalayaang bumuhay sa pag-asa ng mga Pilipino at nagbigay-daan para sa Pilipinas na makaalpas mula sa matagal at mahigpit na pagkakagapos. Ngayong taon ay ipinagdiriwang ang ika-126 na anibersaryo ng araw ng kasarinlan. Halina't sama-samang balikan ang kasaysayan, matuto, at itama ang nakaraan gamit ang kalayaan para sa inaasam na kinabukasan.

Bukod sa Hunyo 12, itinuturing na araw ng kalayaan ang Hulyo 4, 1946 ngunit napanatili pa rin ito sa orihal nitong petsa bilang opisyal na araw ng kalayaan sa bisa ng lagda ni dating Pangulong Diosdado Macapagal noong Agosto 4, 1964. Ito ay ang Republic Act No. 4166 o ang batas na naglipat sa petsa ng Araw ng Kalayaan at nagdeklara ng Hulyo 4 bilang Araw ng Republika ng Pilipinas.

"Kalayaan. Kinabukasan. Kasaysayan (Freedom, Future, History)" iyan ang tema ng Independence Day ngayong taon. Bagaman hindi maikakailang kung hindi dahil sa mga nangyari sa nakaraan at sa mga bayaning nagpamalas ng kanilang katapangan ay hindi matatamasa itong kasalukuyan na noo'y pangarap lamang ng mga Pilipino. Marami nang nagbago at kailangang matutuhan ito, ngunit ano nga ba ang dapat pang matutuhan? Ano nga ba ang tunay na kahulugan ng Kalayaan at ang kahalagahan ng pagdiriwang nito?

Ang kalayaan ay isang karapatan na ipinaglaban ng mga magigiting na bayani mula sa mapang-api at mapang-abusong pamumuno ng mga Kastila. Ang pagdiriwang nito ay ang nagpapaalala rin sa pagkakaisa ng mga Pilipino noon upang labanan ang suliraning ito ng Pilipinas.

Marahil ang pagbabalik-tanaw na ito ay siyang patuloy na nagdudulot ng lakas at tapang sa mga Pilipino para patuloy na gamutin ang sugat at tuluyan nang maghilom ang sakit ng bayan. Kay sayang pagmasdan na sa pagwagayway ng bandila ng Pilipinas ay kasabay nito ang pagwagayway ng paglaya ng mga Pilipino mula sa kasakiman ng kapangyarihan.

Mayroon pang ibang kahulugan ang kalayaan. Marami pa ang maaaring maiugnay sa kasarinlan. Marami ring bayani sa kasalukuyang panahon ang patuloy na nagtataguyod para sa ikauunlad ng bayan at kabilang na rito ang mga kabataan. Marami nang nagbago sa mga nagdaang taon at gamitin sana ang mga natutuhan mula sa kasaysayan sa pagtatama ng nakaraan upang hindi na maulit pa sa kasalukuyan. Ang kalayaang natamasa sa mahigit isang siglo nang nakalilipas ay ang nagbigay-daan sa maraming bagay at sa kinabukasan na ating hinahangad.

Sa huli, ang pagdiriwang ng Araw ng Kalayaan ang siyang naging pundasyon ng bansa kung gaano kalakas ang paniniwalang nasyonalismo ng mga mamamayan nito. Ang bakas ng nakaraan ang siyang palatandaan na noon pa man ay may iisang mithiin ang sambayanan na para sa ikabubuti ng kanilang minamahal na bansang sinilingan. Kaya naman, huwag hayaang makuha muli ito ng iba at sama-samang itama (hindi baguhin) ang nakaraan gamit ang kalayaan para sa mas magandang bukas na inaasam.

Inianyo Ni Dynnes Recario

10/06/2024

𝐏𝐀𝐁𝐀𝐓𝐈𝐃 | Tingnan ang iskedyul ng pagpapatala para sa T.P. 2024-2025

03/06/2024

𝐒𝐀𝐋𝐀𝐌𝐀𝐓 𝐒𝐀 𝐏𝐀𝐆𝐇𝐀𝐓𝐈𝐃

Ngayong nagwakas na ang taong pampanuruan 2023-2024, ating bigyang pagkilala ang nagdaang Patnugutan ng ‘Ang Pahatid’ na naglingkod nang buong puso at may determinasyon sa paghahayag ng katotohanan sa halos sampung buwang pagsasama-sama na siyang nagbunga sa pagkamit ng mga karangalan sa iba’t ibang kategoryang kanilang pinanghawakan.

Sa bisa ng kanilang pagtutulungan, naisakatuparan ang mga mithiing dati lamang ay pinapangarap tulad ng pagkapanalo at pagtuklas sa mga panibagong oportunidad at talento sa larangan ng pagiging mamamahayag.

Dahil din sa kanilang kolektibong talino at kakayahan, nabuo ang kasalukuyang edisyon ng ating pahayagang pang-mag-aaral.

Isang mapagpalang taon ang lumipas at tunay na ito'y hindi malilimutan, siyang tatatak sa damdamin ng karamihan.

Salamat sa mga naghatid at nagpabatid para sa Lagro Pahatid.

30/05/2024

𝑩𝑨𝑳𝑰𝑻𝑨 | 𝐀𝐫𝐚𝐰 𝐧𝐠 𝐏𝐚𝐠𝐤𝐢𝐥𝐚𝐥𝐚 𝐚𝐭 𝐏𝐚𝐠𝐭𝐚𝐭𝐚𝐩𝐨𝐬, 𝐈𝐝𝐢𝐧𝐚𝐨𝐬 𝐬𝐚 𝐋𝐇𝐒
nina: Ines Levinne Eco at Juderay Jamena

“𝑨𝒔 𝒘𝒆 𝒈𝒐 𝒇𝒐𝒓𝒘𝒂𝒓𝒅, 𝒍𝒆𝒕 𝒖𝒔 𝒓𝒆𝒎𝒆𝒎𝒃𝒆𝒓 𝒕𝒉𝒂𝒕 𝒐𝒖𝒓 𝑬𝒅𝒖𝒄𝒂𝒕𝒊𝒐𝒏 𝒊𝒔 𝒏𝒐𝒕 𝒋𝒖𝒔𝒕 𝒂 𝒑𝒆𝒓𝒔𝒐𝒏𝒂𝒍 𝒂𝒄𝒉𝒊𝒆𝒗𝒆𝒎𝒆𝒏𝒕, 𝒃𝒖𝒕 𝒂 𝒄𝒐𝒎𝒎𝒊𝒕𝒎𝒆𝒏𝒕 𝒕𝒐 𝒐𝒖𝒓 𝑵𝒂𝒕𝒊𝒐𝒏.”

Ito ang binigyang-diin ni John Andre Alcala, mag-aaral na nagtamo ng pinakamataas na karangalan, sa kaniyang panghuling mensahe na nagsasabing hindi lamang pansariling karangalan ang pag-aaral, kundi isang responsibilidad para sa ating bayan.

Binigyang parangal ng Lagro High School (LHS) ang mga natatanging mag-aaral na nagkamit ng karangalan at ang mga nagsipagtapos sa Taong Panuruan 2023-2024 sa ginanap na seremonya na may temang “Kabataang Pilipino para sa Matatag na Kinabukasan ng Bagong Pilipinas” nitong ika-30 ng Mayo.

Dinaluhan ito ng mga konsehal ng Distrito 5 na sina Kon. Alfred Vargas, Kon. Joseph Joe Visaya, at Kon. Karl Castelo, nagbigay naman ng mensahe si DepEd NCR Regional Director Jocelyn DR. Andaya sa pagbasa ni Dr. Josephine Miranda, Public Shools District Supervisor (PSDS) para sa mga mag-aaral na nagsipagtapos.

Tinatayang may kabuuang 1,291 na mga mag-aaral ng Baitang 12 ang nagsipagtapos ngayong taon.

Samantala, matagumpay ring tinanggap ng mga mag-aaral ng ika-10 baitang ang kanilang mga medalya at katibayan ng pagtatapos sa Junior High nitong Mayo 29.

Nauna na ring binigyang parangal ang mga natatanging mag-aaral sa ika-7, 8, 9, at 11 baitang sa naganap na Araw ng Pagkilala nitong Martes, ika-28 ng Mayo.

Inianyo ni: Ines Levinne Eco
Larawang Kuha ng Ang Pahatid at Kagawaran ng Filipino

30/05/2024

𝑳𝑨𝑻𝑯𝑨𝑳𝑨𝑰𝑵 | 𝐒𝐢𝐬𝐢𝐝𝐥𝐚𝐧 𝐧𝐠 𝐊𝐚𝐭𝐢𝐛𝐚𝐲𝐚𝐧
Ni: Trina Jean M. Beo

Isang parte ng memoryang aking ilalaan sa banga ay ang araw ng pagtanggap ko ng katibayan. Katibayang nakapagpapaguhit ng kurbang linya sa labi ng aking mga magulang.

Kasama ng aking mga kamag-aral, g**o, magulang, at lalo na ang mga kaibigan na aking sinasandalan sa lahat ng pagsubok na dumadaan sa aking buhay, dugo at pawis ko ang inilaan upang ito ay makamtan.
Inaamin kong sila rin ang nagbukas ng mga pintuan na hindi ko pa nasisilayan kaya lubos ko itong iingatan sa banga na aking sisidlan.

Sa lahat ng tawanan, damayan, iyakan sa oras ng pagdadalamhati sa mababang markang nakuha, at hiyawan sa bawat parte ng aming sinisintang paaralan kasama ng aking mga kaibigan, lubos ko itong hindi malilimutan.

Dagdag pa ang mga sermon ng g**ong-tagapayo tuwing maingay o kaya'y maraming kulang gawain na nagpapaliwanag sa kung gaano kahalaga ang pag-aaral na nauuwi sa leksyong gabay para sa buhay.

Patuloy ko itong pangangalagaan at sasariwain sa lahat ng oras habambuhay. Sisiguruhing nakatakip nang maayos ang aking sisidlang banga upang ito ay hindi mawala sa aking isipan.

Kung kaya’t iba't iba man ang parangal na natanggap namin sa araw na ito, hindi pa rin matatawaran ang mga naging dahilan upang makamit namin ito.

Walang sasapat na salita sa aking buhay hayskul dahil dito ko nahubog ang aking pagkatao, pangitain, misyon, kahalagahan, at kaalaman.

Higit pa sa mga nahawakang medalya’t dokumento ang tagumpay ko. Dahil sa byahe ng buhay, sapat na sa aking nariyan kayo.

Inianyo ni: Ryan Jake Mationg
Larawang Kuha nina:
John Edward Dedumo
Joni Eliza Cañarejo
K Tamayo
Alejandro Cosme

13/05/2024

𝐅𝐈𝐍𝐀𝐋(𝐒) 𝐍𝐀! 𝐇𝐀𝐍𝐃𝐀 𝐍𝐀 𝐁𝐀 𝐀𝐍𝐆 𝐌𝐆𝐀 𝐋𝐀𝐆𝐑𝐎𝐍𝐈𝐀𝐍𝐒?

"Periodical Exam Week" na uli at ito na ang huling pagkakataon upang bumawi. Simula ngayong araw, Mayo 14 hanggang Mayo 17 ay magaganap ang Ikaapat na Markahang Pagsusulit, sana ay nakapagbasa na rin kayo at handa nang harapin ang mga katanungang susukat sa mga natutuhan sa napag-aralan.

Laban at kaya niyo 'yan, Lagronians! God bless para sa lahat mula sa Lagro Pahatid.


-🗡

12/05/2024

𝑳𝑨𝑻𝑯𝑨𝑳𝑨𝑰𝑵 | 𝐀𝐤𝐨’𝐭 𝐈𝐤𝐚𝐰 𝐬𝐚 𝐏𝐚𝐠𝐥𝐮𝐛𝐨𝐠 𝐧𝐠 𝐀𝐫𝐚𝐰
Ni: Charlene Joyce Manalo

Kung mabibigyan ako ng pagkakataong mamili ng bersyon ng sarili ko at kung alin dito ang pinaka paborito ko, marahil ang sasagi sa aking isipan ay ang sarili ko noong wala pa akong muwang sa mundo.

Dahil lingid sa aking isipan na si Inay ay parating nakaantabay. Sa bawat hakbang, sa bawat bagong karanasan, sa bawat pagkakamali at tagumpay. Isang sulyap ko lamang sa aking likuran ay siguradong sasalubong sa akin ang kaniyang ngiting walang kupas at humpay.

Hindi ko kailanman kinatakutan ang hamon at mga sugat nitong nagdulot sa akin ng peklat. Dahil sa bawat paglubog ng araw, mananatili akong ligtas sa mga banayad na haplos at kalinga ni Inay. Hindi rin ako kailanman nangamba sa dilim sapagkat bitbit ni Nanay ang pinakamaliwanag at makinang na lamparang hindi nabigong ako ay hanapin.

Bilang lamang sa sampung mga daliri ang panahon at oras na tumaas ang balahibo sa pagsubok ng buhay na kakailanganing sisirin ang alon upang lampasan;

𝘋𝘢𝘩𝘪𝘭 𝘴𝘢 𝘩𝘢𝘣𝘢𝘯𝘨 𝘣𝘶𝘩𝘢𝘺 𝘯𝘢 𝘪𝘱𝘪𝘯𝘢𝘨𝘱𝘢𝘭𝘢 𝘴𝘢 𝘢𝘬𝘪𝘯,
𝘔𝘢𝘯𝘢𝘯𝘢𝘵𝘪𝘭𝘪 𝘴𝘢 𝘵𝘢𝘣𝘪 𝘬𝘰 𝘴𝘪 𝘐𝘯𝘢𝘺.
𝘚𝘢 𝘣𝘢𝘸𝘢𝘵 𝘱𝘢𝘨𝘴𝘪𝘬𝘢𝘵 𝘢𝘵 𝘭𝘶𝘣𝘰𝘨 𝘯𝘨 𝘢𝘳𝘢𝘸,
𝘏𝘪𝘯𝘥𝘪 𝘬𝘢𝘪𝘭𝘢𝘯𝘮𝘢𝘯 𝘢𝘬𝘰 𝘮𝘢𝘨-𝘪𝘪𝘴𝘢.

Ngunit kapag dumating ang oras at pagkakataon na kailangan ko nang lakbayin ang madidilim na bahagi at sulok ng mundo nang walang kasama, nawa ay tanawin niya pa rin ako sa malayo.

Dahil kahit na kaya ko nang kumaripas ng takbo nang hindi niya pinupunasan ang likod ko, kahit na kaya ko nang sisirin ang pinakamalalim na dagat nang wala siya sa tabi ko, at kahit na kaya ko nang harapin ang mundo nang walang saklay at alalay ng kahit na sino…

𝗣𝗮𝘁𝘂𝗹𝗼𝘆 𝗽𝗮 𝗿𝗶𝗻 𝗸𝗶𝘁𝗮𝗻𝗴 𝗸𝗮𝗸𝗮𝗶𝗹𝗮𝗻𝗴𝗮𝗻𝗶𝗻, 𝗠𝗮.

𝘈𝘵 𝘬𝘶𝘯𝘨 𝘴𝘢𝘬𝘢𝘭𝘪𝘯𝘨 𝘮𝘢𝘱𝘢𝘨𝘣𝘪𝘣𝘪𝘨𝘺𝘢𝘯 𝘢𝘬𝘰 𝘯𝘨 𝘵𝘢𝘥𝘩𝘢𝘯𝘢 𝘢𝘵 𝘩𝘢𝘩𝘢𝘺𝘢𝘢𝘯 𝘯𝘪𝘺𝘢 𝘢𝘬𝘰𝘯𝘨 𝘮𝘢𝘨𝘪𝘯𝘨 𝘮𝘢𝘭𝘢𝘺𝘢 𝘶𝘱𝘢𝘯𝘨 𝘮𝘢𝘨𝘩𝘢𝘯𝘨𝘢𝘥,

𝘔𝘢𝘯𝘢𝘯𝘢𝘵𝘪𝘭𝘪 𝘢𝘬𝘰 𝘴𝘢 𝘰𝘳𝘢𝘴 𝘢𝘵 𝘱𝘢𝘯𝘢𝘩𝘰𝘯 𝘯𝘢 𝘬𝘢𝘴𝘺𝘢 𝘱𝘢 𝘢𝘬𝘰 𝘴𝘢 𝘮𝘨𝘢 𝘣𝘳𝘢𝘴𝘰 𝘯𝘨 𝘶𝘯𝘢𝘯𝘨 𝘵𝘢𝘰𝘯𝘨 𝘵𝘶𝘮𝘢𝘯𝘨𝘨𝘢𝘱 𝘴𝘢 𝘢𝘬𝘪𝘯𝘨 𝘱𝘢𝘨𝘬𝘢𝘵𝘢𝘰– 𝘴𝘪 𝘐𝘯𝘢𝘺. 𝘋𝘰𝘰𝘯 𝘢𝘬𝘰 𝘮𝘢𝘯𝘢𝘯𝘢𝘵𝘪𝘭𝘪 𝘢𝘵 𝘩𝘢𝘩𝘢𝘺𝘢𝘢𝘯 𝘢𝘯𝘨 𝘴𝘢𝘳𝘪𝘭𝘪𝘯𝘨 𝘮𝘢𝘸𝘢𝘭𝘢𝘯 𝘯𝘨 𝘮𝘢𝘭𝘢𝘺. 𝘋𝘢𝘩𝘪𝘭 𝘱𝘢𝘵𝘶𝘭𝘰𝘺 𝘢𝘵 𝘩𝘢𝘣𝘢𝘯𝘨 𝘱𝘢𝘯𝘢𝘩𝘰𝘯 𝘬𝘰𝘯𝘨 𝘬𝘢𝘬𝘢𝘪𝘭𝘢𝘯𝘨𝘢𝘯𝘪𝘯 𝘢𝘯𝘨 𝘬𝘢𝘯𝘪𝘺𝘢𝘯𝘨 𝘱𝘢𝘨-𝘢𝘭𝘢𝘭𝘢𝘺.

𝑯𝒊𝒏𝒅𝒊 𝒃𝒂𝒍𝒆 𝒏𝒂𝒏𝒈 𝒘𝒂𝒍𝒂𝒏𝒈 𝒑𝒂𝒈-𝒊𝒊𝒔𝒊𝒑 𝒂𝒕 𝒎𝒂𝒍𝒂𝒚, 𝘬𝘢𝘳𝘨𝘰 𝘢𝘵 𝘣𝘪𝘵𝘣𝘪𝘵 𝘯𝘢𝘮𝘢𝘯 𝘢𝘬𝘰 𝘴𝘢 𝘩𝘢𝘣𝘢𝘯𝘨 𝘣𝘶𝘩𝘢𝘺 𝘯𝘪 𝘕𝘢𝘯𝘢𝘺.

Inianyo ni Restee Sibayan


-🗡

28/04/2024

𝗗𝗨𝗠𝗔𝗧𝗜𝗡𝗚 𝗡𝗔 𝗔𝗡𝗚 𝗣𝗜𝗡𝗔𝗞𝗔 𝗜𝗡𝗔𝗔𝗕𝗔𝗡𝗚𝗔𝗡!

Simula bukas, April 29, gaganapin ang pagbubukas ng NCR Regional Schools Press Conference (RSPC) sa Cuneta Astrodome, Pasay City, kasabay nito ang pagsisimula ng patimpalak para sa individual category. Samantala, sa April 30 naman ang para sa group category.

Matatandaan noong Pebrero 16, 2024, nakapasok sina Lei Chantal Macanlalay at Mark Jerald Adaro sa Regional Level kung kaya't God bless para sa inyong dalawa mula sa Pahatid.

09/04/2024

Sa pagdiriwang ng ika-82 taong anibersaryo ng 𝑨𝒓𝒂𝒘 𝒏𝒈 𝑲𝒂𝒈𝒊𝒕𝒊𝒏𝒈𝒂𝒏, ating sariwain ang katapangan na ipinamalas ng mga Pilipino na nag-alay ng buhay upang mabawi ang Perlas ng Silangan mula sa mga manlulupig na nagtangkang umangkin dito.

Nawa ang inspirasyong ibinigay ng ating magigiting na beterano ng digmaan ay ipagpatuloy natin sa pamamagitan ng pagkakaisa sa pagharap sa hamon ng kasalukuyan at sa digma ng buhay.

18/08/2023

𝗠𝗔𝗟𝗜𝗚𝗔𝗬𝗔𝗡𝗚 𝗞𝗔𝗔𝗥𝗔𝗪𝗔𝗡, 𝗗𝗥. 𝗔𝗚𝗔𝗣𝗜𝗧𝗢 𝗧. 𝗟𝗘𝗥𝗔! 🥳

Sa pinakamamahal na Punongg**o ng Paaralang Sekondarya ng Lagro, ang aming pahayagan ay taos pusong nagpapabatid at bumabati ng isang maligayang kaarawan sa iyo, Ginoong Lera. Nais naming magpasalamat sa walang sawang paglilingkod, paggabay, at pagbibigay ng iyong buong suporta para sa mga gawain at programa na makatutulong upang mapagbuti at mapaganda ang sinisintang paaralan. Wala kaming ibang hinihiling kundi ang iyong kabutihan, malusog na pangangatawan at kaligayahan. Nawa ay matupad anuman ang iyong naisin ngayon at sa hinaharap. Nandito lang po kami para sa iyo tulad ng kung paano mo iniingatan ang Lagro High School at Lagronians.

𝙆𝙖𝙨𝙖𝙢𝙖 𝙢𝙤 𝙥𝙤 𝙠𝙖𝙢𝙞 𝙨𝙖 𝙥𝙖𝙜𝙙𝙞𝙧𝙞𝙬𝙖𝙣𝙜 𝙣𝙜 𝙞𝙮𝙤𝙣𝙜 𝙥𝙞𝙣𝙖𝙠𝙖 𝙚𝙨𝙥𝙚𝙨𝙮𝙖𝙡 𝙣𝙖 𝙖𝙧𝙖𝙬. 💚

14/08/2023

26/07/2023

Isang makabuluhang paglalayag para sa panuruan 2022-2023 sa ilalim ng patnugutan ng mga magigiting at masisipag na tagapamahayag na walang sawang naghatid ng mga balitang totoo sa loob at labas ng Paaralang Sekondarya ng Lagro. Isang maligayang pagbati para sa bawat isang nagpamalas ng kanilang mga talento sa Sining ng Komunikasyon na nagsilbing boses para sa publikasyon ng Lagro Pahatid. Lugod kaming nagpapasalamat sa inyong dedikasyon sa larangan nang pamamahayag at tagumpay sa bawat panalo at pagsubok na ating nalagpasan, nawa'y patuloy kayong mangalap ng mga impormasyong pawang katotohanan na magmumulat sa tunay na kaganapan sa loob at labas ng paaralan.

Bilang Utak, Puso at Boses ng pamamahayag,
Isang matagumpay na pasasalamat para sa Patnugutan 2022-2023 ng LAGRO PAHATID.

18/06/2023

Pahimakas
Isinulat Nina: Cleolyn Maderazo at Paula Sarmiento

Sa tuwing sumasapit ang tatlumpung minuto makalipas ang alas dose ng tanghali sa orasan kasabay ng mensaheng “Bumaba na po kayo at mag-ingat,” sabay-sabay na ang bawat hakbang ng mga paang may iisang destinasyong nais puntahan. Habang ang bawat isa’y dinala na ng kanilang mga paa sa lugar na itinakda, ikaw ang sa amin ay naghihintay. Dala-dala ang iyong striktong tindig at ang hindi nawawalang tinging nangangahulugang “Huli na naman kayo.” Kung maaari lamang naming balikan ang bawat alas dose y medya sa orasan ay amin nang ginawa subalit sa pagkakataong ito, tanging mga ala-ala na lamang ang maaari naming balikan.

Sa katunayan, hindi ako naniniwala sa pagpapaalam sapagkat naninindigan akong hindi lahat ng bagay ay nagtatapos sa tuldok, matapos man ang isang pangungusap ay magkakaroon at magkakaroon pa rin ng espasyo para sa susunod. Noong una’y patuloy akong nanindigang kailama’y hindi ko matutuhan ang tunay na dahilan ng pagpapaalam hanggang sa narinig ko ang balita. Sa oras na iyon ay tila ba’y ninakawan na ako ng lahat ng salitang maaaring sabihin, pilitin ko mang isiping marahil nilalaro na naman ako ng tadhana ngunit saang parte man pagmasdan, hindi na mababago ang katotohanan. Iyon na sig**o ang unang pagkakataon na mas ninais kong maniwala na lamang sa kasinungalingan.

Noong una pa lamang na kami’y pinapili mula sa dalawang silid, hindi ko na mabigyan ng makatwirang dahilan kung bakit ang berdeng kwadrado ang pinili kong tahakin. Tunay na iba ang atmospera, marahil ang iba’y gaya ko na kinakain na rin ng kaba lalo na’t ikaw ang nasa aming harapan. Aking pang naalala ang naging kauna-unahang pagkakataon na kami’y iyong pinasulat ng artikulo kung saan iyong inisa-isang pinuna ang bawat sulat, talata, pangungusap, at salitang laman ng papel na iyong hawak-hawak. Sa pagkakataong iyon, siguradong hindi na napigilan ng ilan sa amin ang kwestyunin ang kanilang desisyong pinili. Subalit ngayon ay akin ng napagtantong sa kabila ng iyong mga nakasusugat na tingin, sa una pa lamang ay hinangad mo na ang mas ikabubuti namin.

Mula sa bawat “Ayusin pa” hanggang sa “Mahusay, pagbutihin pa,” ang lahat ng iyong payo’t suporta ay kailanman hindi magiging salitang sinulat sa buhangin sapagkat sisiguraduhin naming ang lahat ng ito’y sa bato’y uukitin. Sa mga oras na ating ginugol, mabuo lamang ang labing anim na pahinang inalayan ng pagod, pagsusumikap, at mga matang pinagkaitan ng tulog, sa wakas ay maaari na nating sabihing nagtagumpay tayo ngayong taon. Malawak pa ang hinaharap na sa inyo’y naghihintay, mga bagong kamay na nais sumulat, mga bibig na nais magsalita, mga tengang nais makinig, at mga indibidwal na puno ng pagsusumikap na ipaglaban ang katotohanang matagal mo nang sinimulang ihatid. Marahil dumating na ang huling pangungusap sa kabanatang iyong sinimulan, subalit hindi ito nangangahulagang wala ng espasyo sa susunod na pahina.

Tunay na walang papantay sa iyong dedikasyon, umabot man sa puntong ipilit mo na ang iyong sarili kahit pagod na ang umiiral sa iyong sistema, hindi ka pa rin nagdalawang isip na kami’y unahin. Mula sa inyong bawat, “Magpahinga muna kayo,” hayaan niyong kami naman ang magsabi nito. Magpahinga kayo ng mabuti, Ma’am. ‘Wag kayong mag-alala dahil ngayo’y malaya na kayong makapagpapahinga, wala ng mga artikulong irerebisa, wala ng makukulit na estudyanteng hindi nagpapasa, at wala ng mga patnugot sa alas tres ng hapon ang sa inyo’y gagambala. Minsan ma’y nakasasakit na kami ng ulo, maraming salamat dahil hindi kayo nagsawa. Kayo ang aming dahilan at mananatiling dahilan kung bakit kami nanatili sa mundo ng pagsulat.

Kailanma’y hindi na magiging tulad ng dati ang pasilyo ng Mathay 1, patuloy naming hahanap-hanapin ang iyong imaheng palapit ng palapit dala-dala ang iyong mga nakatutuwang kwento o mabuting balitang patuloy naming babalikan. Hindi kami magsasawang sariwain ang ating bawat pagkikita, hindi man naging perpekto, nangingibabaw pa rin ang masasayang ala-ala. Sa huli nating pagkikita, sa inyo’y wala kaming narinig na paalam kaya’t patuloy naming pagkakapitan ang inyong “Magkita-kita tayo bukas.” At kung dumating man ang pagkakataong tayo’y magkita muli, pangakong handa na ang aming mga artikulo upang inyong basahin at siguradong hinding hindi na kami mahuhuli.

Naging maaga man ang iyong paglisan, kailanma’y hindi maaalis ang iyong mga iniwan. Ito man ay maging isang paalam, hindi ito magiging pagkalimot sapagkat hangga’t ang mga bolpen ay mayroong tinta at nariyan ang mga kamay ng mga batang mamamahayag ay hindi mawawala ang iyong sarkoseng nakatanim sa aming mga puso. Papadayon man ang araw, bukas, at ang susunod na mga buwan, ikaw pa rin ang mananatili naming haligi, ilaw, suporta, taga-payo, at ina. Kailanma’y hindi magiging Pahatid ang Pahatid ng wala kayo. Pangakong sa bawat salita, pangungusap, talata, at akdang isusulat ng aming mga kamay ay ikaw ang dala-dala. Sa pamamagitan mo’y patuloy naming ihahatid ang katotohanang sinisid at opinyong ‘di makitid. Mula sa Lagro Pahatid, maraming salamat sa iyong tiwala’t paniniwala. Hindi ito ang magiging huli sapagkat gaya ng iyong sinabi, magkikita-kita pa tayo sa susunod na bukas. Hanggang sa muli, Ma’am.

30/05/2023

Sa pagtatapos ng Taong Panuruan 2022-2023, malugod naming inihahandog ang Lagro PAHATID, Opisyal na Pahayagan sa Filipino ng Paaralang Sekondarya ng Lagro.

Sa ngalan ng patuloy na pagpapahayag sa boses ng kabataan, narito ang iba't ibang isyung panlipunan na aming tinutukan, at mga balitang lokal at nasyonal na tunay na pinag-usapan sa loob at labas ng paaralan.

Maaari niyong makita ang aming pahayagan sa tulong ng link sa ibaba.

https://lagropahatid.wixsite.com/lagropahatid

PDF File Link:
https://drive.google.com/file/d/1Ka3yjeLDGbkbrkTyjvUGVj0dlkgeSY87/view?usp=drivesdk

17/03/2023

PAHATID.BALITA📰

Gurong Aktor-Direktor, muling ginawaran ng Ani ng Dangal Award

ni John Edward Dedumo

Muling pinarangalan ang Dalubg**o II sa asignaturang Filipino mula sa Paaralang Sekondarya ng Lagro na si G. Geraldo "Jek" Jumawan, matapos nitong maging kabilang sa 11 International Award-Winning Filipino sa larangan ng sinema na ginawaran sa 15th Ani ng Dangal 2023 sa palasyo ng Malacañang nitong Pebrero 22.

Matatandaang nakatanggap din si G. Jumawan ng Ani ng Dangal Award noong 2021 mula sa National Commission for Culture and Arts (NCCA) at ngayong taon matapos nitong magwagi bilang Best Actor sa Short Film na “The Glance” sa 10th Lake City International Film Festival sa India noong 2022.

Ayon kay G. Jumawan, sobrang saya niya noong matanggap niya ang parangal na iyon dahil isa itong mataas na karangalan na iginagawad ng NCCA para sa mga artists, at nagpapatunay lamang ito na ang mga pilipinong nakatatanggap nito ay nagsisikap upang maiangat ang ating kultura at tradisyon sa pamamagitan ng sinema sa iba't-ibang bansa.

Lubos naman ang naging pasasalamat niya sa National Commission for Culture and Arts sa pagkilala sa kaniya pati na rin sa lahat ng sumusuporta kabilang na ang kaniyang pamilya, ang kasalukuyang Punongg**o ng Lagro High School (LHS) na si Dr. Agapito T. Lera, dating Punongg**o ng LHS na si Dr. Maria Noemi Moncada at ang Panginoon.

Aniya, "Nais kong pasalamatan ang Panginoon na nagkaloob ng blessings na ito dahil hiniling ko talaga na magkaroon ako ng parangal na kagaya nito — sa National Commission for Culture and Arts na hindi tumitigil sa pagbibigay ng inspirasyon na nagmomotivate sa aming nga artists na magsikap sa sining na aming napili".

"Ganun din sa pamilya ko, mga kaibigan na sumusuporta hanggang ngayon at sa aming Punongg**o sa kasalukyan, Dr. Agapito Lera, gayundin kay Ma'am Moncada na dating principal namin sa Lagro na sobra ang tiwala sa akin", dagdag pa niya.

Higit 10 parangal na ang naiuwi ni G. Jek Jumawan sa larangan ng sinema kabilang dito ang Best Actor at Best Supporting Actor sa International Awards mula sa India, France, Venezuela, USA, Bhutan, at Singapore.

Mensahe naman ni G. Jumawan sa mga kabataang nais gumawa ng pelikula at maging aktor, "Sa panahon ngayon na madali nalang gumawa ng isang pelikula sa pamamagitan ng mga gadyet, gamitin niyo ang mga ito sa makabuluhang bagay, ang pangarap niyo, kultura at tradisyon natin, sipatin niyo sa mga lente ng camera, ang mga gustong niyong mangyari".

17/03/2023

PAHATID.OPINYON📰

14/03/2023

Ang pagkilala sa kanilang husay at galing sa katatapos na Division Secondary Schools Press Conference 2023 ay magbubunga ng higit na tiwala sa kanilang sariling kakayahan, patuloy na pagpupursige at inspirasyon.

Maraming Salamat sa aming punongg**o, Dr. Agapito T. Lera, sa mainit na pagbati, suporta at pagmamahal sa aming mga batang mamamahayag.

Salamat din sa Puno ng Kagawaran ng Filipino, Dr. Julieta C. Bellen, sa patuloy na paggabay, gayundin sa lahat ng g**o ng mga campus journalists na buong pusong umuunawa sa oras na inilalaan ng mga bata sa isinasagawang training.

Pasasalamat din ang nais ipaabot ng Lagro PAHATID sa Brgy. Greater Lagro Chairman, Hon. Leo Garra, sa bukas palad na pagtulong sa aming mga C'Js.

Sa mga magulang na walang sawang sumusuporta at umuunawa sa simula pa ng aming paglalakbay. Thank you po sa inyo.

Ang inyong suporta, palakpak at mga pagbati ay magsisilbing hamon upang subukin pang umani ng tropeyo at gintong medalya sa mga susunod na pakikipagtunggali, para sa sariling pag-unlad at para sa paaralan.

Hanggang sa muli.

05/03/2023

PAHATID.BALITA📰
'Top 2 Overall Performing School', nasungkit ng LHS sa DSSPC;
15 mamamahayag, sasabak sa regionals
ni John Edward Dedumo

📸Nina: Lei Chantal Bianca Macanlalay & Leia Amrose Amba

Nakuha ng Paaralang Sekondarya ng Lagro ang ikalawang pwesto mula sa pinagsamang puntos ng dalawang midyum kung saan 'Top 2 Performing School' ang Lagro sa English at 'Top 3 Performing School' naman sa Filipino category sa isinigawang Division Secondary Schools Press Conference 2023 sa San Francisco High School nitong Marso 4.

Nagwagi ang 10 manununulat sa kategoryang indibidwal at 3 grupo naman sa group category na binubuo ng limang mag-aaral bawat pangkat, kung saan nakapasok dito ang 15 campus journalists na lalaban sa Regional School Press Conference.

Ikinatuwa naman ng School Paper Adviser ng Lagro Pahatid na si Gng. Merlyn Becauco at LHS Courier na si Gng. Josephine Bonsol ang naging resulta ng naturang patimpalak at lubos ang pasasalamat nila pati na rin ng mga mamamahayag sa ipinakitang suporta ni Filipino Department Head Dr. Julieta Bellen, Lagro High School Principal Dr. Agapito T. Lera at Brgy. Greater Lagro Chairman Leo Garra Jr.

"Sobrang saya ko sa another achievement na natamo ng LHS campus journalists. Ipinagpapasalamat ko ang lahat nang ito sa Panginoon na nagbigay ng talino sa mga batang ito at syempre sa kanilang mga magulang. Ito 'yung first time na naging champion ang Radio Broadcasting ng PAHATID sa Division Presscon.

Napakahigpit ng laban kasi lahat ng kalahok ay talagang napakahuhusay kaya hinahangaan ko rin talaga ang husay at galing ng aking radio Broadcasting team", ani Gng Becauco.

"Sa individual category naman nakita ko 'yung determinasyon ng bawat isa na magwagi, wala akong itulak kabigin dahil napakahuhusay nilang lahat, nakita ko yung pagmamahal nila sa pagsulat at ang kagustuhang magwagi. Hindi man lahat nakasungkit ng medalya, super proud ako sa kanilang lahat sobra" dagdag pa nito.

Nagkamit ng Unang Puwesto sa pangkalahatang awtput at 'Best Script' ang Radio Broadcasting Filipino na kinabibilangan ni John Carlo Manalo na kinilala bilang 'Best News Anchor', Kimberly Ancheta bilang '2nd Best News Anchor', Dexter Dela Cruz na nakuha ang 'Best News Presenter', Billy Raye Fazon bilang '2nd Best News Presenter' at Mike Luigi Mario bilang 'Best Technical Application'.

Kinilala naman bilang '3rd Overall Best Output' ang 'Collaborative Desktop Publishing' na binubuo nina Brent Gamueda, Joachim Ulang, Maurice Isabelle Gimena, Francine Mikhaela Valmores at Allohra Layne Rubinos kung saan nakuha rin nila ang '1st Best Editorial Page', '4th Best Layout Design' at '5th Best Sports Page'.

Nasungkit naman ng The Courier ang 'Top 2 Overall Best Output', '1st Best Feature Page', '2nd Best Layout Page', '4th Best News Page' at '4th Best Sports Page' sa Online Publication na kinabibilangan nina Isaac Red Amba, Jethro Gonzales, Jamil Caira Figues, Jhana Casandra Celebrado at Honey Dela Cruz.

Samantalang sa kategoryang indibidwal ng Lagro Pahatid, Ikalawang Puwesto naman ang nakuha ni Euan Joseph Garcia sa Pagsulat ng Editoryal, Ikalawang Puwesto rin si John Carlo Manalo sa 'Mobile Journalism', Ikaapat na Puwesto naman si Josel Mari Sapitan sa Pagsulat ng Sports at Ikaanim na Puwesto si Lei Chantal Macalanlalay sa Pagkuha ng Larawan.

Para sa individual category ng The Courier, Ikaunang Parangal ay nakuha ni Francine Mikhaela Valmores sa News Writing, Ikatlong Parangal naman ang nakamit ni Jilliana Victorio sa Sports Writing, Ikaapat na Parangal ay nakuha ni Reese Leighann Rabulan sa Editorial Writing, Ikaapat na Parangal din ang nakuha ni Maurice Isabelle Gimena sa Editorial Cartooning, Ikalimang Parangal ay nasungkit ni Isaac Red Amba sa Feature Writing, at Ikapitong Parangal ay nakuha naman ni Juliana Luise Olleres sa Mobile Journalism.

Inaasahan namang muling magpapamalas ng kahusayan ang mga mamamahayag ng Lagro High School sa darating na Regional Press Conference upang makaabot sa National Press Conference at maipakita ang galing ng Lagronians.

05/03/2023

Dangal ng Lagro PAHATID
Pagbati John Carlo Manalo👏👏👏

28/02/2023

25/02/2023

PAHATID.LATHALAIN📰

BAKAS NG KAHAPON
ni Cleolyn Nigel Maderazo
10 Goodall

Habang naglalakad sa isang eskinita, hindi ko napigilang balikan ang panahon kung saan puno ang bawat bakanteng pader na aking dinadaanan ng mga papel na nakapaskil, laman ang mga naglalakihang mga mukha at mga apelyidong nanligaw sa mga tintadong kuko. Hindi ko lubos mawari na sa maikling panahong iyon, kay laking pagbabago ang nangyari.

Nang nagpatuloy ako sa paglalakad, nasilayan ko si Mang Canor na nagwawalis sa gilid. Siya ay isang street sweeper. Simula pa lamang noong ako’y bata pa, parati ko na siyang nakikita. Sabi-sabi nga dito sa amin na sobra na sa tatlong pung taon ang kanyang paghahanapbuhay dito.

Noong siya’y aking nakita, hindi na ako nagdalawang isip pa na siya’y lapitan at batiin. “Magandang umaga po,” bati ko sa kanya. Agad naman siyang bumati pabalik kasabay ng kanyang munting ngiti. Akin siyang tinanong kung siya’y nag-almusal na, nang siya’y umiling hindi na ako nag-atubiling siya’y yayain at hindi naman siya tumanggi.

Nagtungo kami sa malapit na panaderya at bumili ng tinapay bilang almusal. Habang ako’y nagbabayad, bigla kong napansin ang pulang nasa kalendaryo na nakasabit sa gilid. “Tatlumpu’t pitong taon na pala,” mahina kong sambit. Pinili naming umupo sa may bangketa at sabay na kumain. Hindi ko pa man nakakagatan ang aking tinapay, agad akong napatigil sa mga salitang binanggit ni Mang Canor, “Tama ka, tatlumpu’t pitong taon na nga”.

Tumawa siya nang marahan iyon ang mas nagpagulat sa akin. At ang mga sumunod na pahayag ni Mang Canor ang tuluyang saki’y gumising, “Ang haba na ng mga taong lumipas pero parang walang bago, ganito pa rin tayo”. Marahil ako nga ay nagkamali, tila ba ang pagbabagong aking nasilayan ay isang ilusyon lamang na tinakpan ang bulok na nakaraang nagbabalik muli sa kasalukuyan.

Tunay nga ang kanyang sinabi. Walang nabago, ganito pa rin tayo. Hindi ko lubos mawari kung papaanong nanliit ang isa sa mga pinakamalaking kaganapan sa ating kasaysayan. Ang panahon kung saan ang bawat isa’y may iisang hangarin, ang makatakas mula sa mahigpit na kapit ng gamahan sa kapangyarihan, ang nagbunsod sa rebolusyong hindi dapat kalimutan, ang nagbigay daan sa People’s Power. Subalit tila ba’y muli na naman tayong nakandado mula sa pinaglabang kasarinlan.

Narito pa rin ang bakas ng kahapon ngunit ang bakas na ito ay hindi na lamang isang bakas na pilit nating tinakasan bagkus ay muli na namang nasa taas.

Ngunit sabi nga nila, laging dalawa ang mukha ng barya. Si Mang Canor ay hindi nag-iisa, ikaw ay hindi nag-iisa, at tayo ay hindi nag-iisa sapagkat tunay na mas malakas ang kabilang mukha ng barya, ang tunay na mukha ng bukas at kahapon. Hindi ko malilimutan ang mga salitang iniwan sa akin ni Mang Canor. “Nakakatakot at madilim ang gabi subalit natutulog ka pa rin, pinili mong kainin ang tinapay kahit hindi mo alam kung masarap dahil batid mo sa iyong kaloob-looban na may liwanag na naghihintay sa susunod na bukas at sadyang masarap lang talaga ang tinapay na ‘yan”.

Hindi madali piliin ang tumayo at tumindig sa gitna ng walang kasiguraduhang ating kinalalagyan subalit sabi nga ni Mang Canor, may liwanag na naghihintay sa susunod na bukas sapagkat ang totoong liwanag ay sa salamin nakaharap. Tatlumpu’t pitong taong laman ang mga pangarap, kwento, dugo, pawis, luha, at dala-dala ang susi sa kandado at tunay na bakas ng kahapon.