https://www.facebook.com/100326669630979/

Ang Liwanag, Pasay City (2025)

20/01/2025

Division Schools' Press Conference and Contests 2025, handa na ba kayo?

Abangan ngayong araw ang tapang at dedikasyon ng group categories habang kanilang isinusulong ang katotohanan, inihahatid ang kuwento ng bawat tinig, at inaabot ang mga pangarap na minsang inasam lamang.

Sa Martes naman, abangan ang pagsabak ng mga batikang mamamahayag sa individual categories—bitbit ang husay, talento, at di-matatawarang determinasyon.

Ating sungkitin ang korona ng DSPC 2025. Mabuhay ang husay ng mga mamamahayag ng PaSci!

16/01/2025

Iisang grupo, iba’t ibang kuwento 🎙️

Sa mundo ng pagsasahimpapawid ng balita, ang grupo ay hindi lamang may iisang layunin. Binubuo ito ng iba’t ibang kuwento at mga pangarap na nais abutin. Sa nalalapit na pag-abot nila sa kanilang mithiin, oras na para atin silang kilalanin.

Mula kay Kris Perez, na ang pagsali ay hindi inaasahan ngunit hindi maitatangging isa ito sa mga patimpalak na lubos niyang naramdaman ang kasiyahan. Sa pagsasahimpapawid ng balitang pampalakasan, may iisang kasiguraduhan: ihahatid niya ito nang may tikas at galing, at walang inuurungan.

Si Sofia Mañacap, na unang naipamalas ang galing sa *Radio Broadcasting – English, ay determinadong muling maranasan ang RSPC sa pangalawang pagkakataon. Bilang tagahatid ng balita, bukod sa nais niyang magbigay ng impormasyon, ay nais din niyang magsilbing inspirasyon.

Si Anikka Factor, na nagpakita ng talento sa iba’t ibang tungkulin sa larangan ng broadcasting—mula pagiging infomercialist, anchor ng TV at Radio Broadcasting, at ngayon bilang Technical Application ng grupo. Sa kaniyang pagsubok sa iba’t ibang responsibilidad, pinatunayan niyang ang kaniyang husay ay isa sa mga susi sa pagkamit ng tagumpay.

Si James Lusuegro, ang infomercialist na nagsimula sa ibang kategorya bilang mamamahayag, ay sa murang edad nagbigay-buhay na sa samahan. Kasama niya rito si May Relyn De Paz, na nasasabik na muling sumubok sa patimpalak ng pamamahayag matapos ang anim na taon.

Si Ayesha Salazar, ang Anchor 2 at tumatayong patnugot ng kategoryang Broadcasting. Nagsimula siya noong elementarya at kaniyang binitbit ang kaniyang pangalan nang manalong Best Anchor sa buong lungsod ng Pasay. Sa unang pagkakataon, nagdala rin siya ng iba’t ibang karangalan sa RSPC. Natakot man sumubok muli pagkalipas ng ilang taon, pinatunayan niyang ang alapaap ay maaabot kung may pagsisikap. Para sa kaniya, una pa lang, NSPC na ang kaniyang pangarap. At sa malayong sulok ng mundo, nakamit na niya ang bituing nakatakda para sa kaniya.

At si Matthew Vitug, ang Anchor 1 at tumatayong direktor ng grupo, ay handa nang iangat ang pangalan ng PaSci Radio Broadcasting – Filipino sa mundo ng RSPC. Mula noon, hindi kumukupas ang kaniyang determinasyon at galing sa larangang ito—sapat upang magkaroon ng puwesto sa DSPC sa loob ng dalawang magkasunod na taon. Ayon sa kaniya, marami man ang nagbago sa grupo, dala pa rin nito ang tapat na balitang magpapatunay na ang korona ay walang iba kundi sa kanila. Bilang Punong Patnugot ng pahayagan, nais niyang makamit ang tagumpay ng buong samahan.

Ang mga nagmamay-ari ng iba’t ibang kuwentong ito ay magsasanib-puwersa upang maghatid ng makabuluhang balitang nagpapakita ng tunay na kalagayan ng ating lipunan. Ang grupong ito ay hindi lang basta samahan kundi boses din ng mga mamamayan. Ang bawat hakbang ng Radio Broadcasting – Filipino ay isang paalala na ang pamamahayag ay may kakayahang magbukas ng mga mata, magbigay-lakas sa mga mahihina, at magbigay-liwanag sa bawat bukas.

Ipakita ang lakas ng kolektibong tinig at magsilbing boses sa mga hindi naririnig.

16/01/2025

Karamihan man sa kanila’y baguhan, buong-puso at may tapang silang lalaban✨

Sila ay nagsisimula pa lamang, ngunit ang kanilang mga mata ay puno ng determinasyong matutuhan ang iba’t ibang aspeto ng larangang kanilang sinalihan.

Para kay Althea Loro, ang pagiging bahagi ng DSPC ay hindi inaasahan. Hindi kailanman naging madali ang pagsulat ng lathalain para sa kaniya. Ngunit dahil sa kaniyang determinasyong magsanay, kasama na ang pagtitiwala ng ibang tao, naipakita niya ang kaniyang galing kung kaya’t nagbunga ang kaniyang paghihirap. Kaya’t ngayong muling nagbukas ang pinto ng DSPC para sa kaniya, ang magiging karanasan niya ay nasa gitna ng pagkapanalo, pagkatuto, at pareho.

Ayon naman kay Recca Imperial, ang bawat sulat ay daan patungo sa makabuluhang pagpapahayag. Nagsimulang magsulat ng Balitang Pampalakasan noong elementarya, ngayon ay patuloy na hinuhubog ang kaniyang karunungan sa pagsusulat. Para sa kaniya, ito na ang pagkakataon upang mas mapalawak pa ang kaniyang kaalaman.

Si Gab Nicolas, ang tagasulat ng balita at tagakuha ng larawan ng grupo, ay naniniwalang ito ang simula ng kaniyang paglalakbay tungo sa kahusayan at tapat na paglilingkod sa katotohanan. Sa kabila ng pagiging baguhan, puno pa rin siya ng determinasyong gamitin ang kaniyang mga natututuhan.

Dahil kay Carl Victoria, nailalahad ang mga makatarungang opinyon sa pamamagitan ng kumpas ng kaniyang kamay. Naniniwala siyang ang pagguhit ay isa sa mga elementong makakapagbukas ng isipan ng tao. Dahil sa kaniyang nag-aalab na determinasyon, alam niyang ang paglalarawan ay gagamitin niya bilang sagwan sa dagat ng pagsubok na maaaring dumating ngayong DSPC.

Para naman kay Shan Galura, DSPC ang naging daan upang makabuo siya ng mga bagong ugnayan. Ito rin ang nagpabukas sa kaniyang isipan at nagpalalim sa kaniyang kakayahang umunawa. Dahil dito, natutuhan niyang ang tagumpay ay hindi lamang nasusukat sa mga medalya, kundi sa mga aral at karanasang naipon. Kaya’t ngayong DSPC 2025, ituturing niya ito hindi lamang bilang isang kompetisyon, kundi isang pagkakataon upang maipakita ang kahalagahan ng pagiging isang mamamahayag.

Ang kanilang pagsisimula ay hindi lamang tanda ng bagong paglalakbay kundi ng isang pangako na maglilingkod nang may katapatan at integridad para sa kapakanan ng bayan.

16/01/2025

Lakas at Galing ng isang PaScian 🌟

Ang bawat mamamahayag ay may kani-kaniyang kuwento ng pagsusumikap, tagumpay, at pangarap. Sa PaSci Desktop Publishing Team ng DSPC 2025, lumalabas ang tunay na esensya ng sama-sama at walang iwanan. Narito ang kanilang mga kuwento:

Para kay John Mark Lagman, ang DSPC ay isang landas patungo sa patuloy na pag-angat. Mula sa ikaapat na pwesto noong Grade 10, naging ikalawa siya sa Grade 11. Ngayon, ang layunin niya ay masungkit ang unang pwesto. Ito ay isang hakbang patungo sa mas mataas na tagumpay. Ang kanilang grupo, na hangad ang pitong medalya at pag-abot sa RSPC, ang nagsisilbing inspirasyon sa kanyang walang sawang pag-eensayo.

Si Ana Celso, na dati’y nakipaglaban bilang manunulat ng lathalain noong elementarya, ay muling nagbabalik ngayon bilang taga-anyo ng pahina. Sa kabila ng kawalan ng karanasan sa high school competitions, itinuturing niya ang pagkakataong ito bilang kanyang unang laban at huli. Ang hangarin niya ay hindi lamang para sa sariling tagumpay kundi para sa buong grupo.

Hindi madaling ilarawan ang nararamdaman ni Alaiza Cruz tuwing sumasali sa DSPC. Matapos ang limang taong paghinto sa indibidwal na kategorya, siya ay muling nagbabalik, bitbit ang determinasyong makamit ang unang pwesto. Sa kabila ng hirap at pagod, nananatili ang kanyang layunin: ang maghatid ng balitang makatotohanan, walang pinapanigan, at maipakita ang kakayahan ng bawat PaScian.

“Nerve-wracking yet fulfilling,” wika ni Claire Domenden. Dati, mag-isa niyang hinaharap ang entablado ng DSPC. Ngunit ngayon, kasama niya ang grupo sa bawat hakbang. Ang kanyang layunin ay hindi lamang manalo kundi makabuo rin ng matatag na pagkakaibigan sa mga kasama.

Bilang pinakabatang miyembro ng grupo, puno ng hamon at emosyon ang karanasan ni Leigh Ann Prado sa DSPC. Sa kanyang unang laban, nakamit nila ang ikatlong pwesto kahit hindi kumpleto ang kanilang pahayagan. Ang tagumpay na iyon ang nagbigay sa kanya ng lakas ng loob at determinasyon na ngayon ay maabot ang mas mataas na antas—walang iba kundi ang RSPC.

Para kay Jensen Lee, ang DSPC ay hindi lamang kompetisyon; ito rin ay pagkakataon upang ipahayag ang kanyang pananaw sa mundo gamit ang lente ng camera. Sa loob ng tatlong taon bilang feature writer, sports editorial writer, at photojournalist, natutunan niya ang kahalagahan ng tiyaga at dedikasyon. Ngayong taon, nais niyang makamit muli ang tagumpay at ituloy ang laban patungo sa NSPC 2025.

Para kay Alicia Venus, ang DSPC ay simbolo ng sakripisyo, tiyaga, at pagkakaisa. Noong nakaraang taon, kinailangan niyang gampanan ang dalawang tungkulin bilang manunulat ng editoryal at kartunista. Sa kabila nito, nakamit nila ang ikalawang pwesto at tatlong espesyal na parangal. Sa kanyang huling taon bilang pinuno ng Filipino Desktop Publishing, naniniwala siya sa kakayahan ng bawat miyembro. Anuman ang resulta, ipinagmamalaki niya ang talento at dedikasyon ng grupo.

Ang bawat miyembro ng Desktop Publishing Group ay may natatanging kuwento—mga karanasan na nagbubuklod sa kanilang layunin na magtagumpay. Ang kanilang kuwento ay hindi lamang tungkol sa tagumpay kundi tungkol sa pagkakaisa, dedikasyon, at pagmamahal sa sining ng pamamahayag.

Sa DSPC 2025, handa silang ipakita ang lakas at galing ng isang PaScian.

11/01/2025

TINGNAN: Pasay City National Science High School, pasok sa Final Round ng Junior at Senior High School Categories sa 2025 Brainiac Clash of the Sci-Tech Champs!

Matagumpay na nakamit ng Junior High School team na sina Xhian Alsola, Stephen Gabor, at Rhian Franco ang ikapitong puwesto. Pumwesto naman sa ikaanim ang Senior High School team na binubuo nina Carl Carasco, Maxine Reyes, at Ronan Castro sa kani-kanilang kategorya.

Abangan ang pagpapatuloy ng kanilang laban sa darating na ika-15 ng Pebrero sa Philippine Science High School.

11/01/2025

"Isang larawan, isang kuwento, isang layuning magpahayag ng katotohanan." 📸

Unang sabak man sa kompetisyon noong nakaraang DSPC, napatunayan ni Mervyn Valdez ang kaniyang husay bilang isang tagakuha ng larawan; Kaniyang nasungkit ang ikatlong puwesto na siyang naging susi niya para makapasok ng RSPC. Ngayon, sa kaniyang huling taon sa kompetisyon, mas determinado siyang abutin ang unang puwesto at magbigay ng mga kuwento mula sa iba’t ibang tao—mga kwentong kailangang makita at maipahayag.

Sa bawat pitik ng kaniyang kamera ay alay para sa makatotohanang pamamahayag. Suportahan natin si Mervyn sa DSPC 2025!

11/01/2025

"Tatlong taong kinumander ang unang puwesto, patungo na sa ikaapat!" 🏆

Sa kabila ng mga balakid na naranasan nitong nakaraang DSPC, si Carl Chua ay nananatiling determinado. Layunin niyang masungkit ang unang puwesto at gawing four-peat ang kaniyang korona sa balitang pampalakasan.

Ating suportahan ang panibagong laban na handang ipanalo ng ating tunay na MVP!

11/01/2025

"Ang bawat tagumpay ay hakbang patungo sa mas mataas na pangarap." ✍️

Simula noong ika-5 baitang, si Joebbie Gaugano ay nagpamalas na ng husay sa larangan ng Pagwawasto at Pag-uulo ng Balita, na nagbigay sa kaniya ng ikalawang puwesto sa DSPC 2019 at pagkakataong sumabak sa RSPC sa parehong taon. Sa darating na DSPC 2025, dala niya ang dedikasyon at layuning makuha ang unang puwesto.

Suportahan natin si Joebbie Gaugano at ang iba pang delegado ng Ang Liwanag habang tinatahak nila ang tagumpay! 🌟🖋️

11/01/2025

"Ang bunga ng limang taong dedikasyon at pagsusumikap." ✍️

Para kay Jacqui De Gueño, ang DSPC ay hindi lamang isang kompetisyon kundi isang misyon—ang magsilbing modelo ng paghahatid ng balitang agham at teknolohiya. Sa loob ng limang taon niyang pagsali, dala niya ang tapang at aral mula sa mga nakaraang tagumpay at pagkatalo. Sa muli niyang pagsabak, nagsisilbi siyang inspirasyon sa ibang mga mamamahayag na lagpasan ang kanilang mga limitasyon.

"Ngunit hindi ko ito gagawing hadlang upang hindi na muli maka-pwesto. Hindi ako susuko na maibalik ang korona ko ngayong DSPC 2025," ani niya.

Suportahan natin si Jacqui De Gueño at ang iba pang delegado ng Ang Liwanag habang binibigyang-liwanag ang mundo ng pamamahayag! 🌟🖋️

11/01/2025

"Ang bawat karanasan ay kuwentong dala-dala habang buhay." ✍️

Para kay Leurlee Sicat, ang DSPC ay hindi lamang isang patimpalak, kundi isang oportunidad upang maunawaan ang kahalagahan ng pamamahayag, pagkamalikhain, at pagkakaibigan. Mula sa pagkamit ng ikalimang pwesto noong 2022-2023, hinahangad niya ngayong taon na maitala muli sa nangungunang lima at patuloy na matuto mula sa iba’t ibang kuwento ng kapuwa kalahok.

Ating suportahan si Leurlee Sicat sa kaniyang layunin at ang buong koponan ng Ang Liwanag sa DSPC 2025! 🌟🖋️

11/01/2025

"Ang pagsusulat ay isang paglalakbay—hindi lang ng salita, kundi pati ng tapang at pananampalataya." 🖋️

Mula sa kaniyang unang hakbang sa journalism noong ikaapat na baitang hanggang sa mga pagsubok na hinarap sa Division Schools' Press Conference, si Zacharie Macalalad ay isa ng mahusay na manunulat ng balita ng Ang Liwanag. Patuloy siyang nagsisikap upang kasing talim ng kaniyang lapis ang kaniyang kakayahang maghatid ng katotohanan. Sa kabila ng mga balakid tulad ng kawalan koneksyon lalo na sa panahon ng pandemya, hindi siya tumigil sa kaniyang layunin.

"Sa tulong ng Panginoon at masusing pagsasanay, inaasam ko na magtagumpay at manalo," ani niya.

Suportahan natin si Zacharie at ang buong koponan ng Ang Liwanag habang ipinapamalas nila ang tapang at husay sa paparating na DSPC 2025! 🌟

11/01/2025

"Ang pagsulat ay hindi lang talento, kundi simbolo ng dedikasyon." ✍️

Para kay Jhoana Muega, ang pagsulat ng lathalain ay hindi lamang tungkol sa malikhaing pagsulat, kundi pati na rin sa pagsisikap at pagiging tulay ng katotohanan. Sa kabila ng pagsubok na dala ng pagbabago sa kanilang grupo noong DSPC 2024, nananatili siyang inspirasyon sa kaniyang hangaring maghatid ng kuwento na may lalim at layunin.

"Sa tulong ng gabay ng mga tagapagsanay at suporta mula sa aking mga kakilala, pagsisikapan ko na ipagpatuloy ang pagsusulat upang maging sulit ang paghihirap ng aking mga kapwa manunulat," ani niya.

Suportahan natin si Jhoana Muega at ang mga mamamahayag ng Ang Liwanag sa DSPC 2025! 🌟🖋️

11/01/2025

"Bagong hamon, bagong aral, ngunit magiging boses ng katotohanan." ✍️

Para kay Pauline Bocago, ang unang pagsabak sa Division Schools' Press Conference ay isang makabuluhang hamon. Mula sa pagsusulat ng editoryal patungo sa kolum, hatid niya ang kaniyang personal na opinyon at estilo upang mamulat ang mga pananaw ng mga mambabasa.

"Sa DSPC, ang pangunahing layunin ko ay hindi lamang manalo kundi mas mapalawak ang aking kakayahan sa pagsulat at mas mapabuti ang aking sarili bilang isang manunulat," ani niya.

Suportahan natin si Pauline Bocago at ang buong koponan ng Ang Liwanag sa kanilang hangaring magdulot ng inspirasyon at positibong pagbabago sa mundo ng pamamahayag! 🌟🖋️

11/01/2025

"Nakakakaba, nakakaexcite, ngunit higit sa lahat, nakaka-inspire."🌟

Sa nalalapit na Division Schools' Press Conference 2025, ating kilalanin si Dahlia Aganan, isang patunay na ang tagumpay ay bunga ng dedikasyon. Mula sa kaniyang unang karanasan noong DSPC 2019 kung saan nakamit niya ang ikatlong puwesto sa Pagsulat ng Pangulong Tudling at ang ikalimang puwesto sa RSPC. Hanggang ngayon, dala niya ang aral at inspirasyong nakuha niya bilang batang mamamahayag.

"Hinahangad ko na magsilbi itong inspirasyon at oportunidad sa bawat isa upang hubugin ang ating kakayahan sa makatotohanan at makatarungang pamamahayag," ani niya.

Suportahan natin si Dahlia Aganan at ang mga mamamahayag ng Ang Liwanag sa kanilang hangaring magtagumpay at magdala ng liwanag sa mundo ng pamamahayag! ✨🖋️

10/01/2025

TINGNAN: Malacañang, inanunsyo ang suspensyon ng trabaho sa mga tanggapan ng gobyerno at klase sa lahat ng antas sa Maynila at Pasay sa Enero 13, 2025, upang bigyang-daan ang maayos na pagsasagawa ng "National Rally for Peace" ng Iglesia Ni Cristo.

12/12/2024

Pag-asa sa Bawat Aklat

Isinulat nina Reiana Ross H. Belchez at Ma. Jhoana Mae Muega
Iwinasto ni Joebbie Krizel Gaugano
Sinuri nina Gng. Myra R. Jaime at Jacqui De Gueño
Patnugot ni Reisha Rhysse Uy at Jacqui De Gueno

Isang bagay na madalas nating kinatatamaran, ang pagbabasa, ang nagiging susi sa paghubog ng ating kinabukasan. Sa bawat pahina ng aklat na ating nililipat, nabubuksan ang mga gabay at aral na makatutulong sa ating paglalakbay sa buhay. Hindi natin madalas mapansin, ngunit sa mga libro, natututo tayo sa pamamagitan ng mata at isipan, natutuklasan natin ang mga aral na sumasalamin sa ating pang-araw-araw na buhay.

Ang pagbabasa ay hindi lamang simpleng paglipat ng mga pahina. Sa bawat kwento, binubuksan ang mga pinto sa mga mundo na nagdadala ng aliw, karunungan, at gabay. Naroon ang mga tauhan at kuwento na nagbibigay ng mga leksyon na bihira nating natututunan sa tunay na buhay, nag-aanyaya ng isang paglalakbay sa mga landas na puno ng posibilidad. Kaya’t kahit ang aklat na kinatatamaran, sa bawat salitang nakalathala, ay may kakayahang ituro sa atin ang landas tungo sa mas maliwanag na kinabukasan.

Sa makabagong panahon ng teknolohiya at impormasyon, mahalaga na ang bawat Pilipino ay maging mapanuri. Ang mga aklat ang nagsisilbing sandata laban sa panlilinlang at maling impormasyon. Sa pamamagitan ng pagbabasa, natututo tayong suriin at unawain ang bawat datos, kaya nagiging mas matatag tayo sa pagbubuo ng sariling pananaw at mga desisyon. Ang bawat aklat ay naglalaman ng mga lihim na katotohanang tahimik na naghihintay na mabunyag, nagpapalalim sa ating pang-unawa at pananampalataya sa mga tamang prinsipyo.

Ang mga storytelling sessions na hatid ng mga g**o at estudyante ay nagsisilbing ilaw na nagpapaliwanag sa madilim na bahagi ng ating imahinasyon. Isang pagkakataon ang pagdiriwang na ito upang tuklasin ang bawat aklat na gumagabay sa atin sa pagbuo ng sariling pananaw at opinyon.

Sa pagtatapos ng Buwan ng Pagbasa, nawa’y maunawaan natin na ang pagbabasa ay hindi natatapos sa buwan ng Nobyembre. Ito ay isang patuloy na proseso na dapat nating yakapin araw-araw. Sa bawat pahinang binubuksan natin, naglalakbay tayo patungo sa mas maliwanag na kinabukasan. Ang pagmamahal sa pagbabasa ay hindi lamang para sa ating sarili kundi para sa susunod na henerasyon, upang sila rin ay makakita ng pag-asa sa bawat aklat.

Ang Liwanag

20/01/2025

16/01/2025

16/01/2025

16/01/2025

11/01/2025

11/01/2025

11/01/2025

11/01/2025

11/01/2025

11/01/2025

11/01/2025

11/01/2025

11/01/2025

11/01/2025

10/01/2025

12/12/2024

Address

Website

Alerts

Videos

Shortcuts

Share

Category