Romblon Sun Online

11/01/2026

Binatang estudyante at dalawa pa, sinaksak ng basag na bote ng security guard sa Romblon, Romblon

ROMBLON, Romblon - Sugatan na dinala sa ospital ang isang estudyante at dalawa pang biktima matapos na saksakin ng basag na bote ng isang nakainom na guwardiya dakong 2:05 ng madaling araw kanina, Enero 11, 2026 sa Barangay I, Poblacion, Romblon, Romblon.

Ang mga biktima ay kinabibilangan ng isang 22 taong gulang na binatang estudyante, 24 taong gulang na panadero at kapwa residente ng Barangay Dona Juana, San Agustin, Romblon at isang 25 taong gulang na babae na residente ng Barangay Cajimos, Romblon, Romblon habang ang itinuturong suspek ay nakilala na si alyas "John" 32 taong gulang, security guard, may kinaksama at residente ng Barangay Capaclan, Romblon, Romblon.

Ayon sa ulat ng Romblon Municipal Police Station, habang ang biktima at ang nakainom na suspek ay nakapila sa comport room sa Freedom Park ay walang dahilan na nagalit umano ang suspek at hinamon ng suntukan ang biktima.

Mamaya ay kumuha ang suspek ng isang bote ng alak at binasag ito. At habang hawak-hawak ang basag na bote ay inundayan nito ng saksak ang biktima na tinamaan sa iba't-ibang bahagi ng katawan.

Sinubukan namang awatin ito ng dalawa pang biktima ngunit sila naman ang binalingan ng saksak ng suspek. Tinamaan sa kanang kamay ang panadero habang nasugatan naman sa kaliwang daliri ang babaeng biktima.

Noong dumating ang nagrespondeng tauhan ng Romblon MPS ay mabilis na tumakas ang suspek.

Agad namang dinala ang mga biktima sa Romblon District Hospital para sa atensyong medikal. Dahil sa hindi naman malubha ang natamong sugat ng biktimang panadero at babaeng biktima ay nakalabas kaagad ang mga ito sa ospital habang ang biktimang estudyante ay isinailalim sa operasyon dahil sa tinamo na maraming sugat sa kanyang leeg.

Napag-alam na boluntaryong sumuko ang suspek dakong 3:20 ng madaling araw, Enero 11, sa Romblon MPS.

Kasalukuyang inihahanda ng Romblon MPS ang kaukulang kaso na isasampa laban sa suspek. (Romblon Sun Staff)

10/01/2026

10/01/2026

MR D.I.Y. Odiongan (Romblon) Branch bukas na...

31/12/2025

Kanyong Kawayan Alternatibong paputok sa pagsalubong ng Bagong Taon

Para maiwasan ang disgrasya sa pagsalubong ng bagong taon gumamit ng kanyong kawayan sa pagpaputok.

Maliban sa nakatipid sa pagbili ng mga mahal na komersyal na paputok ay mas safe itong gamitin ay malakas rin ang buga ng putok.

Sa mga lugar na may maraming kawayan ay pwede rin kayong magbenta ng kanyong kawayan.

Ibalik ang dating nakaugalian, gumamit ng kanyong kawayan katulad ng inyong mga ninuno.

Mag-ingat at Maligayang pagsalubong sa Bagong Taon, 2026!

24/12/2025

24/12/2025

Lalaki sinaksak ng nakasuntukan na kainuman sa Calatrava, Romblon

CALATRAVA, Romblon - Sugatan na dinala sa ospital ang isang 20 gulang na lalaki matapos masaksak ng nakainuman na menor de edad na estudyante dakong 3:00 ng madaling araw ng Disyembre 23, 2025 sa lumang paaralang elementarya ng Calatrava, sa Barangay Poblacion, Calatrava, Romblon.

Ang biktima ay kinilala na isang 20 gulang na binata, walang trabaho at residente ng Barangay Calunacon, San Andres, Romblon habang ang suspek ay isang 16 taong gulang na estudyante ng Alternative Learning System (ALS) at residente ng Barangay Poblacion, Calatrava, Romblon.

Ayon sa Calatrava Municipal Police Station, ang biktima kasama ang limang kaibigan, kabilang sina alyas Alvin, alyas Mario, at ang suspek at dalawa nitong kapatid ay nag iinuman sa dating paaralang elementarya ng Calatrava sa Barangay Poblacion, Calatrava, Romblon.

Pagkaraan na makaubos ng isang bote ng alak ay nagpasya ang biktima na umuwi na sa kanilang bahay sa bayan ng San Andres, Romblon.

Sinabihan umano nito ang kapatid ng suspek na gisingin si "Mario" na natutulog sa oras na yun.

Sinunod naman ng kapatid ng suspek at biktima at tinulak umano nito ang ulo ni alyas "Mario" upang magising.

Sa puntong ito, nagalit umano ang biktima sa estilo ng pagising kay "Mario" at sinuntok nito ang kapatid ng suspek sa tiyan.

Dahil dito, ay nagkagulo na kung saan ang suspek at ang isa nitong kapatid ay pinagtulungan ang biktima. Bumunot umano ng patalim ang suspek mula sa kanyang baywang at inundayan ng saksak ang biktima na tinamaan sa noo.

Pagkatapos ng insidente ay tumalilis ang suspek papunta sa kanilang bahay at pagkaraan ay boluntaryong sumuko sa pulisya kasama ang kanyang tatay.

Dinala ang suspek sa Municipal Social Welfare Development Office para sa interbensyon at disposisyon habang ang biktima ay isinugod sa San Andres Municipal Hospital sa bayan ng San Andres, Romblon para malapatan ng kaukulang lunas.

Kasong Attempted Homicide ang inihahandang isampa ng Calatrava MPS sa Tanggapan ng Piskalya laban sa suspek. (RSun Staff)

24/12/2025

3 menor de edad na nasa tabi ng kalsada nahagip ng motorsiklo, isa patay

ALCANTARA, Romblon - Magkasabay na dinala sa ospital ang tatlong menor de edad na nabundol ng motorsiklo kasama ang drayber na suspek at angkas nito dakong 8:30 ng gabi ng Disyembre 23, 2025 sa Barangay Bonlao, Alcantara, Romblon.

Kinilala ang mga biktima na dalawang lalaki na 8 taong gulang at isang 11 taong gulang na pawang nakatira sa Barangay Bonlao, Alcantara, Romblon at isang babae na 10 taong gulang at residente ng Barangay Dona Trinidad, San Andres, Romblon, at ang angkas ng suspek na 34 anyos na residente ng Barangay San Roque, Alcantara, Romblon, habang ang suspek ay nakilala na si alyas "Jake", edad 28 anyos, binata, construction worker at residente ng Barangay San Roque, Alcantara, Romblon.

Base sa imbestigasyon ng Alcantara Municipal Police Station (AMPS), sakay ng kanyang motorsiklong Euro 150 ang suspek at angkas nito na binabaybay ang Tablas Circumferential Road ng Barangay Bonlao, Alcantara, Romblon mula sa Barangay San Roque, Alcantara, habang ang tatlong biktima na pawang menor de edad ay nasa tabi ng kalsada.

Pagdating sa lugar ng insidente, dahil sa umano'y mabilis at walang ingat na pagmamaneho ay nawalan ng kontrol ang drayber na suspek sa kanyang sasakyan at aksidenteng nahagip ang mga biktima na nasa tabi ng kalsada sa oras na iyon.

Dahil sa pangyayari ay tumilapon ang mga biktima na nagtamo ng sugat sa ulo at sa iba't-ibang bahagi ng katawan kabilang ang suspek at angkas nito na agad isinugod sa Don Modesto Formilleza Sr. Memorial Hospital sa Barangay Punta, Looc, Romblon.

Kalaunan ay inilipat ang 8 taong gulang na biktimang batang lalaki sa Romblon Provincial Hospital sa bayan ng Odiongan, Romblon, ngunit hindi nagtagal ay binawian ito ng buhay.

Napag-alaman na nasa ilalim umano ng espiritu ng alak ang suspek ganun din ang angkas nito bago naganap ang naturang aksidente.

Dinala sa himpilan ng Alcantara MPS ang sangkot sa aksidente na motorsiklo.

Nahaharap sa kasong Reckless Imprudence Resulting in Homicide and Multiple Physical Injuries ang suspek na isasampa ng Alcantara MPS sa Tanggapan ng Piskalya sa bayan ng Odiongan, Romblon. (RSun Staff)
(Photo: courtesy of Alcantara MPS)

23/12/2025

Lalaki tiklo sa buy-bust operation kontra sa ilegal na droga sa Odiongan, Romblon

ODIONGAN, Romblon - Arestado ang isang 35 anyos na binata sa ikinasang buy-bust operation ng kapulisan laban sa ilegal na droga dakong 9:00 kagabi, Disyembre 22 sa Sitio Torrel Looban, Barangay Dapawan, Odiongan, Romblon.

Sa ulat ng Odiongan Municipal Police Station (OMPS), nagsagawa ng pinagsanib na buy-bust operation ang Odiongan MPS MDEU (lead unit) at Romblon Provincial Mobile Force Company sa koordinasyon ng PDEA MIMAROPA na nagresulta sa pagkahuli sa suspek na si alyas "Joe", 35 taong gulang, binata at residente ng Barangay Liwayway, Odiongan, Romblon.

Ayon sa Odiongan MPS, nakabili umano ang isa nilang tauhan ng isang pirasong sachet na naglalaman ng pinaghihinalaang ilegal na droga sa suspek kapalit ng limang daang piso (P500.00).

Nakumpiska rin sa suspek ang dalawa pang piraso na heat-sealed transparent plastic sachet na naglalaman ng pinaghihinalaang "shabu", isang piraso ng aluminum foil na pinambalot ng nakumpiskang ilegal na droga at pera na halagang P500.00 na "marked money" ginamit sa buy-bust operation.

Ang pag-imbentaryo, pagkuha ng litrato at mga ebidensya ay isinagawa sa harapan ng suspek na sinaksihan ng representante mula sa piskalya, opisyal ng barangay at kinatawan ng media.

Ang suspek ay dinala at isinailalim sa kustodiya ng Odiongan MPS para sa kaukulang disposisyon.

Mahaharap ang suspek sa kasong paglabag sa Section 5 and 11 Article II of RA 9165 (The Comprehensive Dangerous Drugs Act of 2002) na inihahandang isampa ng Odiongan MPS sa pamamagitan ng Inquest Proceeding sa Provincial Prosecutor's Office sa Odiongan, Romblon.

Tumanggi naman ang suspek na lumagda sa dokumento ng imbentaryo at pinabulaanan ang paratang laban sa kanya. (RSun Staff)

09/12/2025

DOST, May Hatid na Tulong Para sa mga Negosyo! Palaguin ang Iyong Negosyo sa Tulong ng Teknolohiya!

Ikaw ba ay isang business owner na naghahangad mapabilis ang produksyon, mapataas ang kalidad ng produkto, o mapalawak ang operasyon ng iyong negosyo? Baka ikaw na ang susunod na makakatanggap ng suporta mula sa DOST-SETUP!

Ano ang SETUP? Ang Small Enterprise Technology Upgrading Program (SETUP) ay isa sa mga pangunahing programa ng Department of Science and Technology (DOST) na naglalayong tulungan ang mga Micro, Small, and Medium Enterprises (MSMEs) na maging mas produktibo at mas mapalakas ang posisyon sa merkado sa pamamagitan ng teknolohiya at inobasyon.

Sa ilalim ng SETUP, maaaring makatanggap ang mga negosyo ng iba’t ibang uri ng tulong, kabilang ang:

1. Tulong Pinansyal (Zero Interest at Walang Collateral) para sa: a. Pagbili ng modernong kagamitan at teknolohiya upang mapahusay ang proseso at serbisyo b. Pagpapagawa ng angkop na packaging at labeling c. Pagsasagawa ng laboratory testing upang masiguro ang kaligtasan at mataas na kalidad ng produkto

2. Mga Pagsasanay upang mapaunlad ang kasanayan at kakayahan ng mga manggagawa

3. Konsultasyon para sa mas mahusay na pagpapalakad ng negosyo at pagpapatibay ng kabuuang sistema ng operasyon
Sino ang maaaring mag-apply? Bukas ang SETUP para sa mga negosyong kabilang sa sumusunod na industriya:

a.) Crop and animal production, hunting, and related services
b.) Forestry and logging c. Fishing and aquaculture
d. Food processing
e.) Beverage manufacturing
f.) Textile manufacturing
g.) Wearing apparel manufacturing
h.) Leather and related products manufacturing
i.) Wood and cork products manufacturing
j.) Paper and paper products manufacturing
k.) Chemicals and chemical products manufacturing
l.) Basic pharmaceutical products and pharmaceutical preparations manufacturing
m.) Rubber and plastic products manufacturing
n.) Non-metallic mineral products manufacturing
o.) Machinery and equipment (NEC)
p.) Other transport equipment manufacturing
q.) Furniture manufacturing r.) Information and Communication

Kung ang iyong negosyo ay kabilang dito, baka ito na ang tamang panahon upang umangat at umunlad sa tulong ng teknolohiya!

Para sa karagdagang impormasyon, makipag-ugnayan sa aming SETUP Coordinator, Ms. Lyn F. Fruelda, sa 0998-984-4385. Maaari ring bumisita sa aming tanggapan sa JP Laurel St., Brgy. Tabing-Dagat, Odiongan, Romblon.

I-like at i-follow ang aming official page, DOST-PSTO Romblon, upang maging updated sa mga programang hatid ng DOST para sa mas progresibong komunidad at mas maunlad na negosyo.