Pahayagang Bedista

14/01/2025

🎶~ Bubuka ang bulaklak🌷
papasok ang RAINAH👑
Sasayaw ng Cha-Cha💃
ang saya-saya~🥰🎶

Binabati namin ng isang maligayang kaarawan si Rainah Lycah Sibayan, ang patnugot ng kategoryang Pagsulat ng Isports!

Saludo kami sa iyong kahusayan sa larangan ng pampa-LYCAH-san.🫡Nawa’y pasiklabin mo pa lalo ang apoy na nag-aalab sa iyong puso.🔥⚽️

Muli, binabati ka ng pamilyang Pahayagang Bedista!🦁❤️


!

07/01/2025

🎶Ikaw nga ba si NESTER Right?😳
Ikaw nga ba Love of My Life?
Ikaw nga ba ang icing sa ibabaw ng cupcake ko?~🧁😝🎶

Binabati namin ng isang maligayang kaarawan si Nester Delos Reyes mula sa kategorya ng Pag-aanyo ng Pahina!

Nawa’y patuloy kang magpursigi at manatiling dedikado sa pagharap sa panibagong yugto ng iyong buhay.✊

Muli, binabati ka ng pamilyang Pahayagang Bedista!🦁❤️


!

01/01/2025

Maraming bagay ang maaaring mangyari sa loob ng isang taon. Sa bilis ng paglipas ng panahon, madalas ay hindi natin namamalayan na ang susunod na taon ay kumakatok na sa ating mga pintuan. Tuwing Bagong Taon, karaniwan ang paggawa ng “New Year's Resolution,” kung saan inililista natin ang mga bagay na nais nating baguhin sa ating sarili. Subalit, madalas itong hindi natutupad dahil mahirap talikuran ang mga nakasanayang gawi. Kung hindi nasusunod ang ating mga plano, 𝘢𝘯𝘰 𝘱𝘢 𝘢𝘯𝘨 𝘴𝘪𝘭𝘣𝘪 𝘯𝘨 𝘉𝘢𝘨𝘰𝘯𝘨 𝘛𝘢𝘰𝘯?

Ang pagpasok ng 2025 ay maaaring magsilbing taon ng 𝗽𝗮𝗴-𝗮𝘀𝗮 para sa mga nangangarap ng pagbabago—pag-asa ng ikalawang pagkakataon upang baguhin ang kanilang kapalaran at muling matutunan ang kaligayahan sa mga simpleng bagay.

Para sa iba, ang 2025 ay maaaring maging taon ng 𝗽𝗮𝗴𝗴𝗮𝗽𝗮𝗻𝗴, isang taon ng mga pagsubok na hindi maihahalintulad sa mga nagdaang taon—paggapang upang makaraos sa araw-araw, paggapang upang harapin ang bawat bukas.

Sa kabilang banda, ang 2025 ay maaari ring maging taon ng malalim na 𝗽𝗮𝗴𝗻𝗶𝗻𝗶𝗹𝗮𝘆, isang panahon ng walang humpay na pagmumunimuni at pagkilala sa sarili—pagninilay upang maging mas mabuting tao, pagninilay upang maitama ang mga pagkakamali at magpatuloy sa tamang landas.

Anumang tagumpay o pagsubok na ihahatid ng bagong taon, isang bagay ang tiyak: mahalaga ang bawat araw na ating isasabuhay. Sa bawat tagumpay, alalahanin natin ang mga hindi pinalad, at sa bawat pagsubok, tayo’y humingi ng lakas mula sa Maykapal. Ang Bagong Taon ay hindi lamang isang pagkakataon upang tuparin ang ating mga inilista sa “New Year's Resolution,” kundi isa ring pagkakataon upang bigyan ng halaga ang bawat hakbang na tinatahak natin at matutong magbigay ng pagmamahal at malasakit sa ating kapwa.

Mula sa Pahayagang Bedista, buong-puso naming binabati ang bawat isa ng isang masigla, masagana, at manigong Bagong Taon!🦁❤️🎉🎆

Kapsyon ni: Kzee Aymil M. Delos Santos (H12-A)
Likha ni: Alexa E. Borge (H12-A)


!

31/12/2024

🎶~YNIGO kayang tanggapin🙅
Na mawawala ka na sa akin
Napakasakit na marinig
Na ayaw mo na sa akin~😣💔🎶

Binabati namin ng isang maligayang kaarawan si Ynigo Miguel Villa mula sa kategorya ng Pagsulat ng Isports!

Nawa’y patuloy kang magpursigi’t mangarap sa ka-VILLA ng mga hamon ng buhay. Batid namin ang iyong kasiyahan ngayong huling araw ng taon.🎉

Muli, binabati ka ng pamilyang Pahayagang Bedista!🦁❤️


!

31/12/2024

𝗣𝗔𝗠𝗣𝗔𝗟𝗔𝗞𝗔𝗦𝗔𝗡 | SBCA Red Cubs, wagi sa PRISAA Championship

Pinuntirya ng San Beda College Alabang (SBCA) Red Cubs ang hanay ng Lyceum of Alabang, 88-50, sa kanilang salpukan sa Private Schools’ Athletic Association (PRISAA) Championship na ginanap sa PAREF Southridge School nitong ika-8 ng Disyembre 2024.

Agad na nanlata ang Lyceum matapos magpasiklab ng puwersa ang Red Cubs at walang-prenong tinambakan ang kanilang katunggali sa unang bahagi pa lamang ng sagupaan, na naging dahilan din kung bakit mas napalapit ang koponan sa tagumpay at natamo ang inaasam na kampeonato.

Napanatili ng Red Cubs ang kanilang malinis na rekord, 3-0, at winakasan ang ligang ito bilang mga kampeon.

Ang SBCA Red Cubs ay binubuo nina Carlos De Guzman (A10-A), Justin De Belen (H10-A), Arthgian Karunungan (S10-A), Gian Mendoza (A11-A), Josef Calo-oy (A11-C), Jancarl Gadlan (A11-C), Carlitos Abiera (S11-I), Aiden Charron (S11-I), Fil Autor (A12-B), Frenz Ferrolino (A12-D), Jedi Lata (H12-B), at Jdee Alconis (11-D, HE).

Malaking pasasalamat ng buong koponan sa tulong ng kanilang mga magigiting na coach na sina Coach Goy Bagares at Coach James Tolentino.

Samantala, kasabay ng pagwawakas ng PRISAA ay inaabangan naman ang bagsik na ipapakita ng Red Cubs sa nalalapit na PRADA Basketball League.

Isinulat nina:
Rainah Lycah A. Sibayan (S11-A)
Alfonso Vittorio P. Paquiz (A11-A)
Ynigo Miguel Villa (H11-C)

Likha ni:
Alexa E. Borge (H12-A)

31/12/2024

𝗣𝗔𝗠𝗣𝗔𝗟𝗔𝗞𝗔𝗦𝗔𝗡 | SBCA GFT, bumida sa WNCAA Season 55 Championship Game

Ibinigkis ng San Beda College Alabang Girls Futsal Team (SBCA GFT) ang sandatahan ng Miriam College, 2-0, sa kanilang pasiklaban sa larong pang kampeonato ng Women’s National Collegiate Athletic Association (WNCAA) Season 55 na ginanap sa University of Asia and the Pacific nitong ika-8 ng Disyembre 2024.

Pinangunahan ni Charlie Lyn Derrick ang opensa ng SBCA GFT at dinaplisan ang Miriam College sa unang bahagi ng laro, 1-0.

Ikinandado naman ni Feona Maquinay ang pagkakataon ng Miriam College na makahabol sa ikalawang bahagi ng laro, at tuluyan nang napasakamay ng SBCA GFT ang kampeonato, 2-0.

Pahayag ng isa sa mga coach ng SBCA GFT na si Coach Rocky Seto, “Malaki ang kasiyahan at pagmamalaki ko sa mga manlalaro. Matapos ang lahat ng pagsasanay, sakripisyo, at mga pagsubok, naramdaman ko ang saya ng tagumpay. Hindi ko po inasahan na mangyayari ito agad, pero naniniwala akong may potensyal ang team.”

“Ang titulong ito ay resulta ng pagsusumikap at dedikasyon ng bawat isa. Malaking achievement ito hindi lamang para sa team kundi pati na rin sa buong coaching staff at mga sumusuporta sa amin,” dagdag niya pa.

Isinulat ni: Rainah Lycah Sibayan (S11-A)
Likha ni: Alexa E. Borge (H12-A)

30/12/2024

Ang pagsapit ng ika-30 araw ng huling buwan ay hindi lamang hudyat na may bagong taon na magsisimula. Higit dito, ang araw na ito ay ginugunita ng milyon-milyong Pilipino bilang anibersaryo ng pagkamatay ng ating pambansang bayaning si G*t José Protasio Rizal Mercado y Alonso Realonda o mas kilala bilang si G*t Jose Rizal.

Ipinanganak si Rizal noong ika-19 ng Hunyo 1861, at nang lumaki’y kinakitaan na agad siya ng dunong at husay dahil sa kaniyang kagustuhang matuto. Sa kaniyang pagtanda, patuloy siyang nagsumikap hanggang sa naging isang mahusay na doktor, manunulat, at nobelista. Ginamit niya ang kaniyang galing sa literatura at isinulat ang mga nobelang “Noli Me Tangere” at “El Filibusterismo” upang isiwalat ang pang-aapi ng mga Kastila sa mga Pilipino.

Sa edad lamang na 35 taong-gulang, siya’y walang-awang pinaslang ng mga Kastilang kaniyang hinarap nang walang takot. Kahit ang tanging naging sandata niya lamang ay ang kaniyang panulat, ipinaglaban niya ang Pilipinas nang buong-puso hanggang sa kaniyang makakaya. Ang pagpaslang kay Rizal noong ika-30 ng Disyembre 1896 ay isa sa mga nagmitsa ng rebolusyon ng mga Pilipino para sa kalayaan laban sa mga mananakop. Siya ang patunay na ang pakikibaka para sa bayan ay isang kolektibong responsibilidad at karangalan na maipapakita sa iba't ibang paraan.

Ngayong ika-128 anibersaryo ng pagkamatay G*t Jose Rizal, atin muling isapuso’t alalahanin ang kaniyang mga sakripisyong inalay para sa Inang Bayan na siyang nagsisilbi at magsisilbing inspirasyon ng susunod na mga henerasyon na mahalin, ipaglaban, at pagsilbihan ang ating bansa.✊🇵🇭

Kapsyon ni: Stefani Marie S. Inovero (S12-C)
Likha ni: Aliyah Czarina O. Digal (S12-H)

29/12/2024

Ngayong ika-29 ng Disyembre 2024, buong-galak nating ipinagdiriwang ang kaarawan ni Rev. Fr. Gerardo Ma. De Villa, OSB, ang masigasig at mapagkumbabang Rector-President ng San Beda College Alabang (SBCA)! 🎊🎂

Sa kaniyang pamumuno, patuloy niyang isinasabuhay ang diwa ng “Ora et Labora” — ang pag-iisa ng taimtim na panalangin at masikhay na paggawa upang maglingkod sa Diyos at sa kapwa. Ang kaniyang dedikasyon sa pagpapalago ng komunidad, pati na rin sa pagpapalaganap ng mga Bedistang pagpapahalaga, ay tunay na nagsisilbing inspirasyon sa lahat.

Maligayang Kaarawan, Father Gerard! 🎉🙌 Nawa'y patuloy kang pagpalain ng Diyos habang iyong isinasakatuparan ang mga misyon ng paglilingkod at pagpapalaganap ng Kaniyang pag-ibig sa buong SBCA at sa iyong komunidad. 🦁✨❤️

25/12/2024

𝘔𝘢𝘨𝘬𝘢𝘬𝘢𝘪𝘣𝘢𝘯𝘨 𝘭𝘪𝘸𝘢𝘯𝘢𝘨 𝘢𝘯𝘨 𝘮𝘢𝘺𝘳𝘰𝘰𝘯 𝘴𝘢 𝘣𝘢𝘸𝘢𝘵 𝘣𝘢𝘩𝘢𝘺 𝘵𝘶𝘸𝘪𝘯𝘨 𝘗𝘢𝘴𝘬𝘰. Kung tatanawin mo isa-isa, may makikita kang mga bahay na punong-puno ng mga pailaw at dekorasyon. Sila ‘yung mga bahay na kakikitaan mo ng samu’t saring ilaw na tipong pagkurap ay mag-iiba na ang kulay.

Samantala, mayroon din namang mga bahay na kahit isang pirasong parol lamang ang nakapaskil ay sapat na. Hindi nito kayang palibutan ang buong bahay tulad ng mga ilaw na tipikal mong nakikita. May mga bahay ring bumbilya lang ang pampaliwanag. 𝘚𝘢 𝘬𝘢𝘯𝘪𝘭𝘢, 𝘵𝘢𝘯𝘨𝘪𝘯𝘨 𝘱𝘶𝘵𝘪 𝘭𝘢𝘮𝘢𝘯𝘨 𝘢𝘯𝘨 𝘬𝘶𝘭𝘢𝘺 𝘯𝘨 𝘗𝘢𝘴𝘬𝘰.

Ngunit, iba-ibang uri man ng liwanag ang makita sa mga bahay ay pare-pareho pa rin itong nagniningning. Hindi ito kompetisyon ng kung kanino ang mas maliwanag o mas makulay——dahil ang Pasko ay hindi nakabatay sa dami ng ilaw na nakapalibot sa isang bahay. Ang Pasko ay isang espesyal na okasyon para sa lahat, may parol man o wala. Ang Pasko ay isang pagkakataon upang sama-sama nating buhayin ang liwanag na hindi nangangailangan ng kuryente. Ito ay ang nag-iisang liwanag na nagmumula sa puso at hindi sa anumang ilaw o bumbilya. Ito ay ang liwanag na hindi magastos ngunit makapangyarihan, liwanag na hindi nakasisilaw sa mata ngunit nakasisilaw sa damdamin: 𝘢𝘯𝘨 𝘭𝘪𝘸𝘢𝘯𝘢𝘨 𝘯𝘨 𝘱𝘢𝘨-𝘪𝘣𝘪𝘨.

Sa lahat ng magpapaskong buo ang pamilya, maraming nakahain sa lamesa, o masaya ang tahanan——at sa lahat ng mga magpapaskong mag-isa, walang noche buena, o tahimik ang kapaligiran——anumang paraan ninyo ng pagdaraos ng Pasko, simple man o magarbo, nawa’y magningning ang pag-ibig sa inyong mga puso.

Mula sa puso ng pamilyang Pahayagang Bedista papunta sa inyo, batid namin ang isang maligaya, masagana, at maliwanag na Pasko!🎄❤️✨

Kapsyon ni: Alexa E. Borge (H12-A)
Likha ni: Alexa E. Borge (H12-A)


!

20/12/2024

20/12/2024

🎶 Kasabay ng puso at tugtugan,
Pag-indak ng ating katawan💃
Mana-NATHALIE, hindi tiyak ang bukas natin,
Ngunit itong gabi ay atin!~🌠🎶

Binabati namin ng isang maligayang kaarawan ang aming manunulat mula sa kategorya ng Malikhaing Pagsulat, si Jude Nathalie Argana ng S11-D!

Hiling namin na huwag sana maglaho ang iyong determinasyon sa pagsusulat upang patuloy na mapalawak ang imahinasyon ng mga mambabasa at magdala ka ng ka-LIE-gayahan sa kanila.🙌

Muli, binabati ka ng Pamilyang Pahayagang Bedista!🦁❤️


!

18/12/2024

The countdown begins! Only 30 DAYS to go until the much-awaited Pista ng Sto. Niño sa San Beda College Alabang 2025! 🎊

Get ready for a grand celebration of faith, unity, and tradition filled with vibrant colors, music, and joy with the theme “Ang Gabay sa Paglalakbay.” ✨

Start marking your calendars and join us in this festive journey. 🗓️

Viva Sto. Niño! Viva San Beda! ❤️

16/12/2024

🎶~Minsa’y natuwa ang may likha😍
Pitong-libong PAOLO🏝️
ang ginawa~🤲🎶

Binabati namin ng isang maligayang kaarawan ang isa sa aming mga tagakuha ng larawan, si Paolo Joaquin Lopez mula sa H12-A!

Sa bawat pagpitik ng iyong kamera, nawa’y pala-JOAQUIN mo pa lalo ang iyong mga karanasan at talentong nakapagpapangiti sa iyong mga kapwa.📸😉

Muli, binabati ka ng iyong pamilyang Pahayagang Bedista!🦁❤️


!

15/12/2024

𝗔𝗹𝗽𝗮𝘀—lumaya mula sa takot; alisin ang pagdududa. Sa ibang salita, 𝘩𝘢𝘳𝘢𝘱𝘪𝘯 𝘢𝘯𝘨 𝘧𝘪𝘯𝘢𝘭𝘴 𝘯𝘢𝘯𝘨 𝘮𝘢𝘺 𝘵𝘢𝘱𝘢𝘯𝘨 𝘢𝘵 𝘵𝘪𝘸𝘢𝘭𝘢!🌟📚

Sa darating na Final Term Examination at Mastery Test ngayong ika-16 hanggang 17 ng Disyembre, sama-sama nating harapin ang labang ito nang may tapang at tiwala sa sarili. Tayo’y umalpas mula sa anumang pangamba, dahil sa bawat paghihirap at pagtitiwala, ang tagumpay ay tiyak nating makakamtan.

Nawa’y pagpalain ang bawat isa ng karunungan. Laban lamang, mga Bedista, para sa kinabukasan!✊✨

Kapsyon ni:
Von Timothy C. Juan (S11-D)

Likha nina:
Summer Valeen S. Tan-Gana (H11-A)
Alexa E. Borge (H12-A)

14/12/2024

𝗧𝗜𝗡𝗚𝗡𝗔𝗡 | Bilang maagang selebrasyon sa papalapit na kapaskuhan, hinarana ng mga musikerong Bedista ang kanilang mga kapwa-mag-aaral sa “Festive Jamming Session” na pinangunahan ng High School Student Council (HSSC) ng San Beda College Alabang (SBCA). Ginanap ito kahapon, ika-13 ng Disyembre, sa Integrated Basic Education Department (IBED) Activity Center, mula 12:20 N.H. hanggang 1:20 N.H. Tampok sa pagtatanghal ang mga kahanga-hangang talento nina Timothy Sario (S11-I), Johann Nisnisan (A12-B), at ng bandang 9volt.

Kapsyon ni:
Summer Valeen S. Tan-Gana (H11-A)

Mga kuha nina:
Gheloo Isaac C. Priagola (A12-B)
Lorenzo Eugenio D. Vito Cruz (S11-B)

13/12/2024

𝗧𝗜𝗡𝗧𝗔 𝗡𝗚 𝗟𝗔𝗧𝗛𝗔𝗟𝗔 | Nang Umawit ang Langit

𝘏𝘪𝘯𝘥𝘪 𝘮𝘢𝘥𝘢𝘭𝘪𝘯𝘨 𝘮𝘢𝘯𝘨𝘢𝘳𝘰𝘭𝘪𝘯𝘨 𝘵𝘶𝘸𝘪𝘯𝘨 𝘗𝘢𝘴𝘬𝘰. Ang tuwa’t pananabik ng mga batang nangangatok at umaawit sa harapan ng pinto at tarangkahan ng mga hile-hilerang bahay ay agad na napapawi marinig lamang ang salitang “pasong” o di kaya nama’y ang paghiyaw ng “Walang tao rito!” kahit mayroon naman talaga.

Subalit, paano kung langit na mismo ang mangaroling sa’yo? Isasara mo pa ba ang iyong pinto? Ngayong araw, tiyak na hindi mo matatanggihan ang pag-awit at pagtugtog ng mga anghel na mistulang ipinadala ng langit upang buhayin ang diwa at ipadama ang simoy ng kapaskuhan.

Bilang buong-pusong paghahandog ng Integrated Basic Education Department (IBED) ng San Beda College Alabang (SBCA) para sa paparating na Pasko, idinaos ang I-BEDan Christmas Concert ngayong ika-13 ng Disyembre na pinamagatang “Sounds of the Season,” kung saan ipinamalas ng mga Bedista ang kanilang namumukod-tanging talento sa musika. Dahil sa kanilang presensiya mula 6:00 N.G. hanggang 7:40 N.G. ay pansamantalang binalutan ng hiraya ang bawat espasyo’t haligi ng Activity Center ng Alabang Town Center (ATC), lungsod ng Muntinlupa.

Matapos ang limang taong paghihintay, muling ibinalik ang konsiyertong ito na huli pang nasaksihan noong taong 2019. Naging malaking bahagi ng programa ang mga tagapangasiwa ng SBCA, kabilang na ang Rector-President ng SBCA na si Rev. Fr. Gerardo Ma. De Villa, OSB, at ang Punongguro ng IBED K-12 na si Gng. Vilma Clerigo. Higit sa lahat, naging bida ang anim na pangkat na binubuo ng mga musikerong Bedista, IBED alumni, at guest performers: ang I-BEDan String and Wind Ensemble, Middle School (MS) at High School (HS) Percussion Ensemble, MS String Ensemble, Angeli Dei Chorus, at HiSVoces Beda. Kasama rin dito ang apat na musikerong konduktor na nagsilbing tanglaw ng bawat grupong sina G. Ralph Randel Balbin, Bb. Julian Veronica Garcia, Bb. Antonette Marie Jingco, at Bb. Maita Lualhati.

Sisikat pa lamang ang buwan, ngunit tila sa loob ng gusali nagningning ang liwanag dahil sa mga mistulang anghel sa pulang kasuotan. Agad na naantig ang madla sa ipinarinig na “Sanctus” ng anim na grupo bilang panimulang panalangin ng programa. Matapos ang kanilang sabayang pagtatanghal ay opisyal na nagsimula ang konsiyerto sa pamamagitan ng pambungad na pananalita ni Dr. Andres Ignacio San Mateo Jr., ang SBCA Vice President for Academic Affairs.

Nang nagsimula ang isa-isang pagtatanghal ay tila pinakanta ng I-BEDan String and Wind Ensemble ang mga tagapakinig sa kanilang pagtugtog ng “Snowman” ni Sia at “Night Changes” ng One Direction, na pinangunahan ni G. Balbin. Hindi naman nagpahuli si Atty. John Jacome, ang Human Resource Manager ng SBCA, sa kaniyang solong pag-awit ng “White Christmas.”

Dumagundong naman hindi lamang ang mga haligi, kundi pati ang puso ng mga tagapakinig sa bawat palo ng MS Percussion Ensemble sa kanilang mga instrumento. Kanilang itinanghal ang mga pampaskong awiting “Oye Como Va,” “A Boomwhacker Christmas,” at “Where No One Goes” sa pagkukumpas ni Bb. Garcia.

Sa paglalim ng gabi, kumalma at naging banayad ang paligid sa presensya ng Angeli Dei Chorus nang kanilang kinanta ang “Here We Come A-Caroling,” “Payapang Daigdig,” at “Somewhere in My Memory.” Sa pangunguna nina Bb. Lualhati bilang konduktor at G. Dom Eugenio Labrague, OSB bilang assisting artist ng grupo ay nahumaling ang mga madla sa harmonisasyon ng kanilang nakatitindig-balahibong boses.

Maya-maya pa’y payapang gabi muli ang ihinatid ng MS String Ensemble dahil sa kanilang pagtipa ng “Silent Night,” na pinangunahan ni Bb. Jingco. Patuloy nilang pinahimbing ang diwa ng mga manonood at tagapakinig sa kanilang pagtatanghal ng “Hark the Herald.”

Ngunit, sa pag-akyat ng HS Percussion Ensemble sa entablado ay agarang napalitan ng sigla ang kapayapaan. Sadyang napapadyak ang paa ng madla sa kanilang bersiyon ng “Sleigh Ride” at “Trinidad Tidings” sa gabay ni Bb. Garcia.

Patuloy namang nanatiling gising ang diwa ng madla sa nakahuhumaling na harmonisasyon ng HiSVocesBeda dahil sa kanilang “Jingle Bells Calypso” sa pangunguna muli ni Bb. Lualhati. Hindi rin sila tinulugan ng madla sa kanilang “Ilang Tulog Pa Ba,” na naipadama sa bawat isa ang simoy ng papalapit na kapaskuhan.

Hindi naglaho ang pagkislap ng mga talento ng I-BEDan String and Wind Ensemble sa kanilang pagbabalik sa entablado at pagtugtog ng Christmas Medley na binubuo ng mga pampaskong kanta tulad ng “Rudolf the Red-nosed Reindeer” at “All I Want for Christmas is You.” Bago magtapos, nagsikantahan at nakisabay ang madla sa kanilang bersiyon ng patok na patok na awiting “APT” nina Rosè at Bruno Mars.

Kung sa una’y magkakasama ang bawat grupo, sa dulo’y muli silang nagtipon-tipon sa entablado. Ipinarinig nila ang mga kantang kinasasabikan at kabisadong-kabisado ng lahat: ang “Joy to the World” at “Ang Pasko ay Sumapit.” Sa kanilang presensya, mistulang pag-awit ng langit ang nasaksihan at nadama ng bawat isa.

𝘖𝘰, 𝘵𝘶𝘯𝘢𝘺 𝘯𝘢 𝘩𝘪𝘯𝘥𝘪 𝘮𝘢𝘥𝘢𝘭𝘪𝘯𝘨 𝘮𝘢𝘯𝘨𝘢𝘳𝘰𝘭𝘪𝘯𝘨 𝘵𝘶𝘸𝘪𝘯𝘨 𝘗𝘢𝘴𝘬𝘰. Ang karamiha’y hilig ang tumanggi, ngunit kung hahayaan nating dumaloy ang musika sa ating mga tainga hanggang sa kaibuturan ng ating kaluluwa, magiging madali na lamang itong yakapin nang higit pa sa anumang bagay sa mundo. Mahirap magbigay, ngunit mahirap ding tanggihan ang mga batang musikerong patuloy na minamahal ang kanilang talento.

Paparating na ang Pasko, at langit na mismo ang umaawit para sa’yo. Kumakatok-katok na ito sa iyong puso. 𝘏𝘢𝘯𝘥𝘢 𝘬𝘢 𝘯𝘢 𝘣𝘢𝘯𝘨 𝘣𝘶𝘬𝘴𝘢𝘯 𝘢𝘯𝘨 𝘱𝘪𝘯𝘵𝘰?

Isinulat ni:
Alexa E. Borge (H12-A)

Mga kuha nina:
Kzee Aymil M. Delos Santos (H12-A)
Gheloo Isaac C. Priagola (A12-B)