18/11/2023
Sinaksihan mismo ni Pangulong Ferdinand R. Marcos Jr. ang pagpirma ng memorandum of agreement sa pagitan ng AC Health, isang kompanya sa ilalim ng Ayala Corporation, at ng kompanyang Varian Medical Systems mula Amerika upang maitayo ang kauna-unahang cancer hospital sa bansa.
“The initiative is a vital stride in the fight against cancer, and it reflects the Philippines’ growing potential as a leading healthcare destination in Asia,” pahayag ni Pangulong Marcos.
Ayon din sa Pangulo, nagpalitan ng kaalaman ang dalawang kumpanya upang maayos na mailunsad ang kauna-unahang ospital na tututok sa pangangailangan ng mga cancer patients sa bansa.
Base sa pinirmahang kasunduan, itatayo ng AC Health ang Healthway Cancer Care Hospital na magsisilbing network ng mga oncology clinics sa Metro Manila upang makapagbigay ng komprehensibong cancer care gamit ang state-of-the-art at multi-modality cancer care technologies ng Varian Medical Systems.
Kaugnay nito, isinabatas din sa bansa ang Republic Act No. 11215 o ang National Integrated Cancer Control Act upang mapaigting ang cancer control at makatulong sa mga cancer patients.
Nakatakda namang maglunsad ang Department of Health ng 16 na Cancer Care Specialty Centers sa iba’t ibang lugar sa bansa ngayong Nobyembre.