14/01/2025
Agusan del Norte 1st class na nga probinsya
Epektibo Enero 1, 2025, usa na ka 1st class nga probinsya ang Agusan del Norte.
Ubos sa Provincial Resolution No. 590-2024 nga gipangamahanan ni Bise-Gobernador Enrico R. Corvera, opisyal nang giadaptar ang bag-ong income classification sa probinsya gikan 3rd class ngadto na sa 1st class basi sa Department Order No. 074-2024 sa Department of Finance (DOF).
Ang maong order sa DOF, gipetsahan November 5, 2024, nagpamatuod sa maong reclassification sa probinsya basi sa R.A. 11964 o ang Automatic Income Classification of Local Government Units (LGUs) Act diin nagtumong nga maghatag ug mas responsive nga pamaagi sa pagpromotar sa lokal nga awtonomiya sa matag LGUs ug aron matagamtaman niini ang bug-os nga potensyal sa ilang ekonomiya.
Kini sigon pa nahimong go-signal sa probinsya nga mosaka na ang estado niini sa ekonomiya nga siguradong makabenepisyo ang katawhan tungod kay modako naman ang pundo alang sa mga gikinahanglan sa matag Agusanon nga mga programa ug proyekto ilabi na sa basic services.
Subay sa guidelines sa DOF, ang usa ka 1st class nga probinsya nagbaton og average annual income nga One Billion Five Hundred Thousand Pesos (P/1.5 B) o dako pa basi sa annual regular income niini sulod sa tulo (3) ka tuig diin ang Agusan del Norte matod pa mipasar niini nga kwalipikasyon.
Kini nagpakita sa dakong pag-uswag sa probinsya sa pagpaningkamot niini nga makab-ot ang gitinguhang kita, dugang pa ang economic development ug fiscal management nga maoy hinungdan nga nahimo kining modelo nga LGU sa tibook rehiyong Caraga.
Kung mahinumduman, sa tuig 2024, duha ka dagkong kadaogan ang natagamtaman sa probinsya. Una na niini ang pagbaton og award gikan sa Department of Local Government nga Seal of Good Local Governance (SGLG) sa ikatulo na nga higayon tungod sa exemplary performance niini sa panggobyerno. Ug siyempre kini nga pag-reclassify sa income niini ngadto na sa 1st class nga probinsya.
Kini nga mga kalampusan tungod matod pa sa kolektibo nga paningkamot sa mga lideres, lakip na ang mga ahensya sa gobyerno, mga trabahante sa panggamhanang probinsyal, pribadong stakeholders ug ang katawhan sa tibook probinsya.
Sigon pa, ang maayong panggobyerno maoy nahimong yawe nga makab-ot sa probinsya ang damgo niini alang sa katawhang Agusanon nga magbaton og dakong kausaban sa ilang pagpamuyo.
Kini nga kakab-otan alang sa probinsya usa matod pa sa legasiya nga ibilin sa kasamtangang mga lideres sa pagpanguna ni Gob. Ma. Angelica Rosedell Amante kauban si Bise-Gobernador Enrico Corvera ug ang mga miyembro sa Sangguniang Panlalawian dili lang sa kasamtangan apan hangtod na sa mga sunod nga henerasyon. (JVDemain)
By AgNor Bulletin
Photo by Reuben Don Sanchez
