K-12, Isulong para sa Kinabukasan
Ni: Mary Novelle Casipe
Naranasan nyo na ba ang makilahok at gumanap sa isang Panayam? Matatauhan ka talaga kung harap – harapan mong katanungan at kasagutan ng mga eksperto sa topikong tinatalakay at napapanahon ngayon. Maiintindihan mo talaga ang bawat salitang dinidikta at ipinapaliwanag at maaring makakakuha at makakalagap ng mga impormasyong sa inyong pinag-uusapan, lalo na dahil napapaliwanag ito sa mahinhin at klarong pananalita.
Isang topikong pinagkaguluhan at sinaliksik ng lahat, ang K-12 Curriculum na nangunguna sa bawat pamamahayag at panayam sa Division Cluster Training in Journalism.
Tanong ng karamihan, ano nga ba itong K-12 Curriculum na ito? Ayon sa aming pananaliksik sa mga panayam nina Bb. Ruby Therese Palmaira at Dr. Reynaldo Gico ng Dibisyon ng Iloilo, ang kurikulum na K-12 na ito ay magiging daan sa bawat kabataan na magkaroon ng magandang kinabukasan.
Madaling makapagtapos dahil sa tulong ng Senior High School na nag aalok ng apat na tracks, kabilang ang General Academic, Technical Vocational and Livelihood, Arts and Designs at Sports na pwedeng gawing intrumento sa posibleng maging kurso nila sa kolehiyo o maging ang kanilang kabuhayan sa kinabukasan.
Dagdag pa ng mga impormasyong aming pinahayag, aming napagtanto na ang mga benepisyo ng K-12 na “Trabaho, Negosyo at Kolehiyo” ay talagang makakatulong sa bawat isa sa atin. Mula kinder na matututo na ang mga kabataan sa “mother tongue” o mismong lingwaheng ginagamit sa bahay ng iyong mga kapamilya, at magkakaroon din sila ng libreng Junior at Senior High School upang ito ay kanilang napakinabangan sa hinaharap. Isinulong at ipinaglaban ang K-12 para sa kabataan para sa bayan at para sa mamamayan tungo sa magandang kinabukasan.
K-12: Walang Kahirapan
Ni: Queena May Quindipan
Mahirap man o mayaman, hindi ka makakatakas sa K-12. Kinakailangang harapin ito dahil ito ang magiging gabay ng bawat isa upang makamit ang tagumpay na hinahangad. Ang Republic Act 10533 (Basic Education Program Law) o mas kilala sa karamihan bilang K-12 ay nagsasaad na ang kahirapan ay hindi hadlang sa pag-aaral. Paano ito nasabi? Ano nga ba ang mga patunay na hindi hadlang ang kahirapan sa pag-abot ng ating mga pangarap?
Kung iisipin natin ang sandamakmak na problema ng ating bansa, nangunguna ang kahirapan na nagiging sanhi ng mababang edukasyon sa Pilipinas. At sa paglipas ng panahon, hindi pa rin ito nareresolba sa kabila ng mga iba’t-ibang paraan at solusyon upang ito ay malutas.
Isa sa layunin ng K-12 na pag-aralin ang mga kabataan na walang sapat na pantustos ng kanilang pag-aaral. Libre ang edukasyon sa ipinanukalang programa ng DepEd upang matulungan ang mga pamilyang ang pangunahing hinaharap ay kahirapan.
Ang pagpapatupad ng K-12 ay maaaring maging solusyon sa paghihrap ng ating bansa dahil hindi na natin kailangang gumastos ng napakalaking halaga upang makapag-aral sa isang paaralan. Ang tanging proproblemahin na lamang ng ating mga magulang ay ang gastusin pang-araw-araw tulad ng pagkain, baon at pamasahe.
Kung ipagkukumpara ang nakaraang kurikulum sa bagong kurikulum, kahit na nadagdagan ng dalawang taon ang kurikulum ngayon, ito ay libre at mas pinag-iigihan ang pagtuturo upang mas maging kompetibo ang mga Pilipino.
Bawat isa ay nahihirapan sa pagbabagong nagaganap sa ating bansa ngunit ang K-12 ay isang mabuting hakbang ng pamahalaan. Hindi man natin batid ang kahalagahan nito sa nagyon ngunit tayo ay naghahangad ng masaganang kinabukasan, ang pagsulong nito ay isang natatanging paraan upang mapaunlad ang ating pamayanan at mapuksa ang kahirapan.