26/03/2024
UNSAON PAGPANGUMPISAL
PART 1
Pag-ampo nga lamdagan ang imong panumduman, sama niining mosunod.
O Maloloy-on nga Amahan, ipadala ang imong Espiritu aron paglamdag sa akong salabutan nga mahinumdum ako sa akong mga sala nga angay kong ikompisal; lig-ona ang akong kabubut-on aron maghinulsol ako sa bug-os kong kasingkasing, hatagi sa kaisug ug pagpaubs sa pagsugid nga walay lipod lipod, pagtapat nga dili na makasala pag-usab ug pagbag-o sa akong kinabuhing Cristinao. Kini akong gipangayo pinaagi ni Cristo akong Ginoo. AMEN.
Susiha pag-ayo ang imong tanlag ug ang imong sala. Han-aya kini daan sa dili ka pa moadto sa kompisalan. Kining ania sa Ubos nga Eksamen sa mga sala motabang kanimo sa pagsusi sa imong tanlag. Timan-i lamang ang mga sala nga imong nabuhat ug sal-angi ang wala nimo mabuhat.
UNANG SUGO:
Wala ako motoo/nagduda nga dunay Dios.
Nagduha-duha ako pagdawat sa mga pagtulon-ang Katoliko
Giuyonan ko ang pagbasa/paminaw/pag-tan-aw sa mga butang batok sa pagtuong katoliko
Nagtuo ako sa mga diwata, anting-anting, sa mga habak (tangkil), sa mga tagna-tagna, sa horoscope, sa baraha ug uban pa
Nibalhin akong laing tinu-ohan niadtong ________ (tuig).
GipakaDios ko ang tawo o butang, sama sa mga artista, salapi ug uban pa
IKADUHANG SUGO:
Nakapanumpa ako sa ngalan sa Dios sa pasipala
Nakapanunglo ako (makapila?)
Nakapamalikas ako (makapila?)
nakatamay ako sa sagradong mga tawo o butang
Wala ko tumana ang panaad sa Dios.
IKATULONG SUGO:
Wala ko mosimba’g Domingo/adlaw iglilihi (makapila?)
Wala nako ayoha ang akong pagsimba/pag-ampo
Nagtrabaho ako sa Dominggo
Wala ako mag-ampo sa dugay’ng panahon
Wala ko hatagig panahon ang pagtuon sa akong pagtoo ug pagsangyaw niini
IKAUPAT NGA SUGO
Wala ako motahod sa akong mga ginikanan/sa mga magtutudlo/ sa mga magulang
Kulang ako sa pagtudlo/pagpitol/pag-atiman sa kabataan
Wala akoy pagtahud sa among dako-dako nga trabaho
Wala ako’y pagtahod sa mga balaod sa nasud / simbahan / sa kapunongan
Nagdumili ako pagbotar sa angay
Nagpasagad ako sa pagtiman sa kalipunan kon sa palibut
IKALIMANG SUGO:
Wala ako makatabang sa nagkinahanglan
Nakig-away akko (kang kinsa?)
Nasuko ako. Nagdumot ako. Wala akoy Pailob
Naahunahuna ako sa pagpatay o pagbun-og sa uban
Nakabun-og ako’g isigkatawo (makapila?)
Nakapatay ako (tinuyu-an ba? Makapila??
Nakadaot akong dungog sa akong isig-katawo
Nasina ako sa dungog sa akong isig-katawo
Nakahatag akong eskandalo sa uban
Nakahunahuna ako sa paghikog (makapila?)
Nakapakuha ako sa bata (abortion) (makapila?)
Nagamit akong mga “Contraceptives” sa panganak (sama sa pills, IUD, withdrawal method and etc.)
Nagpakapon ako (Basectomy, ligate)
Nag-abuse / nagdagmal ako sa mga bata nga walay alamag
Nagpasagad ako pagkaon / pag-inum nga makadaot sa lawas
IKAUNOM UG IKASIYAM NGA SUGO:
Nagpuyo-puyo na kami sulod sa ____ ka (tuig, bulan)
Nakapanghilawas ako sa dili minyo (makapila)
Nakapanapaw ako. (Makapila?)
Nakabuhat ako’g malaw-ay sa akong kaugalingon. (Makapila)
Akong gikalipay ang pagtan-aw sa mga malaw-ayong mga larawan o salida o handurawan
Gikalipay ko ang paminaw sa mga malaw-ay. Nakasugilon ako’g mga malaw-ay
Gikalipay / giuyunan ko ang mga malaw-ay
Gikalipay / Giuyunan ko ang mga malaw-ay nga hunahuna
IKAPITO UG IKANAPULONG SUGO:
Nanlimbong/nanglupig ako (dako bang kantidad)
Nakapangawat ako. (pilay kantidad)
Nagdumili ako pagbayad sa akong utang
Nagdumili ako pagbayad sa hustong buhis
Nagdumili ako sa pag-uli sa akong nadawat/gihulaman
Nagdumili ako sa pag-uli sa butang nga akong nadaut
Wala ako nakatuman sa akong kontrato
Nagligoy-ligoy / nagtinapulan ako sa akong trabaho
Wala ako maghatag sa saktong suhol nga gikasabutan
Naibog ako sa butang sa akong isig-katawo
Miuyon ako sa hunahuna sa pagpangawat
Nanugal ako (pilay kantidad)
IKAWALONG SUGO:
Nakapamakak ako. Nakabutang-butang ako
Nakabutyag ako’g mga sekreto nga angay respetohan
Nakabutyag ako’g sala sa isigkatawo sa way kinahanglan
Nakasaksi ako’g bakak
Nagpataka ako’g hukom sa isig katawo
SA MGA SUGO SA SIMBAHAN
Nakalapas ako sa pagtuman sa tinuig nga kompisal (pero kada bulan nga kompisal is nindot kaayo, paglimpyo sa kalag kanunay)
Mikalawat ako nga may sala nga mortal
Naghimo akong pagkompisal nga dili maayo
Wala ako magpuasa sa adalaw nga gitakda
Wala ako magpuasa ug usa ka oras sa dili pa mokalawat
Wala ako makatabang sa mga kinahanglanon sa Simbahan
Nagpakasal akong Silil (civil)/ o sa laing tinuohan
Wala ko manumbalikng sa mga balaod sa mga parokya
Kon unsa pay naghasol sa imong tanlag, iapil pagkompisal aron makabaton kag kalinaw. Human sa imong pag eksamen, paghimo ug akto sa paghinulsol sa niining musunod:
AKTO SA PAGHINULSOL:
O Dios Ko, nagbasol ako sa tibuok kong kasingkasing kay nakasala ako kanimo, ug gidumtan ko na ang tanan kong mga sala, tungod kay nahadlok ako nga mapildi ko ang langit ug mahiagom sa impyerno. Apan labaw sa tanan, tungod kay nakasala ako Kanimo, nga labing maayo ug angay nga higugmaon labi sa nga tanan. Nagtapat ako malig-on nga, tinabangan sa imong grasya, magkompisal ako sa akong mga sala, maghimog penetensya ug magbag-o sa akong kinabuhi. AMEN.
Kon Andam kana, modool ka sa pari ug moingon:
Bendisyoni ako padre, kay nakasala ako, Sukad sa akong maayong pagkompisal (o sukad sa akong pagkabata) _____ karon ka (adlaw, semana, bulan, tuig.) Ang akong mga Sala, mao kini……..
Imong isugid dayon ang imong mga sala nga imong gihan-ay. Mag-una ang mga dagko ug makapla mabuhat kini. human ka manugid, moingon ka….
Kutob ra Dinhi ang nahinumduman ko, Padre.
Hulata nga mahuman ang masolusyon, ug unya ang tubag
Amen…. Salamat Padre
Tindug dayon aron paghatag higayon sa uban. Lakat ngadto sa imong ludhanan sa simbahan ug tumana ang imong penetensya. Ug human niini paghimo akto sa pasalamat, Sama niini.
AKTO SA PASALAMAT
Nagpasalamat ako kanimo, Ginoo, sa mga grays nga nadawat ko gikan sa imong kaayo, ilabi niniing higayon sa paghimog maayong pagkompisal. Hinaot unta, magpadayon sa pagtuman sa akong katungdanan sa pagkamaaong Cristinao ug, pinaagi sa maayong panig-ingnan, makatampo ako sa paglambo sa imong Gingharian dinhi sa yuta. AMEN
PAHIMANGNO:
Ang penetensya nga gihatag kanimo sa pari wala magpasabot nga mao ra kadto ang imong buhaton agig bayad sa sala. Ang simbahan nag-awhag kanato niining pipila ka balansayon:
Pagpuasa
Ang pag abstiensya
Ang paglimos ug ang mga BUHAT sa KALOOY
Ang pagtuman sa hingpit sa katungdanan sumana sa tagsa-tagsa ka kahimtang
Ang pagdawat sa kabubut-on sa Dios bisan unsay mahitabo
