22/01/2022
January 14, 2022
LAND TRANSPORTATION OFFICE
LTO: Pagbabawal sa mga hindi bakunadong indibiduwal sa pagsakay sa mga PUV sisimulan na sa NCR sa Lunes, maliban sa mga taong may medical condition at mga kumukuha ng “essential goods and services”
Sisimulan na ng Land Transportation Office (LTO) sa darating na Lunes, 17 Enero 2022, ang pagpigil sa mga pasaherong hindi pa nababakunahan sa pagsakay sa mga public utility vehicles (PUV) sa National Capital Region (NCR), sa ilalim ng utos ng Department of Transportation (DOTr).
Ang may eksempsyon sa panukalang ito ay mga indibiduwal na mayroong medical certificate na nagpapatunay na sila ay may medical condition na nagbabawal sa kanila na mabakunahan, at mga taong kumukuha o magdadala ng mga “essential goods and services” ang papayagan sa mga PUV dito sa NCR, ayon sa LTO Memorandum Circular na inilabas ngayong araw (13 Enero) para maisatupad ang DOTr Department Order No. 2022-001.
Ang kautusang ito ay sakop ang lahat ng uri ng PUV na nangangailangan ng Certificate of Public Conveyance (CPC) mula sa LTO, kabilang ang mga bus, jeepney, taxi, at iba pang uri ng pampasaherong sasakyan.
Maliban dito, ang mga tricycle naman ay kailangang maregula base sa mga polisiya ng mga Local Government Units (LGU) patungkol sa “No Vaccination, No Ride Policy”.
Ayon sa kautusang inilahad ng LTO, ang mga driver, operator, at iba pang tauhan ng mga PUV sa loob ng NCR, maging mga mula sa ibang rehiyon na papasok sa NCR, ay maaari lamang na magsakay ng mga pasaherong makakapagpakita na sila ay “fully vaccinated” na para sa COVID-19, at ang kanilang huling dose na nakasaad ay may dalawang linggo na ang nakalipas. Mabibigyan ng ticket ang mga lalabag sa kautusang ito mula sa mga tauhan ng LTO.
Ang mga tatanggaping katibayan ay orihinal o digital na kopya ng LGU-issued vaccination card o booster card, DOH-issued vaccine certification, o anumang dokumento na aprubado ng Inter-Agency Task Force against COVID-19 (IATF). Kailangan din na magpresenta ng valid IDs ng mga pasahero bilang pagkakakilanlan.
Samantala, ang mga mayroong medical condition na nagbabawal sa kanila na mabakunahan para sa COVID-19 ay kailangang may medical certificate na mayroong pirma at contact information ng doktor na gumawa nito.
Ang mga indibiduwal na kukuha at magdadala ng mga essential goods gaya ng pagkain, tubig, gamot, mga kagamitang medikal, public utilities, at iba pang kailangan sa pang araw-araw ay kailangang magpakita ng barangay health pass o iba pang patunay para sa pagbiyaheng isasagawa.
Kabilang sa utos ng LTO na dapat ay unipormado at mayroong pagkakakilanlan ang mga enforcers na magpapatupad nito. Ang lahat ng pasahero ay dapat tratuhin ng may kurtesiya, habang dapat ay mayroon nang basehan sa paglabag bago ang pagsita sa isang PUV.
Ang mga pasaherong may sintomas ng COVID-19 ay i-eendorso sa mga awtoridad at healthcare services para sa karampatang aksyon.
# # #
👀🧠👌
