https://www.facebook.com/132426479960389/

DWRV News & Public Affairs

Home
Philippines
Bayombong
DWRV News & Public Affairs

This is the official News & Public Affairs page of DWRV Radio Veritas Bayombong

16/08/2024

Bahay sa Bagabag, Nueva Vizcaya, Natupok Matapos ang Isang Pagsabog

Walang naisalba mula sa bahay ng isang dating OFW mula Lantap, Bagabag, Nueva Vizcaya matapos na mabilis na nasunog ito pasado alas otso kagabi, August 15.
Ayon sa imbestigasyon ng BFP Bagabag, masayang nag-iinuman ang biktima kasama ang pinsan at pamangkin nang humantong umano ito sa mainit na pag-tatalo.
Ayon kay SFO1 Maricris Zamora, imbestigador ng kaso, narinig na lamang ang malakas na pagsabog mula sa kwarto ng biktima. Mabilis umanong kumalat ang apoy sa buong bahay dahil gawa sa kahoy ang mga poste.
Lubos ang kalungkutan ng biktima lalo na at naisamang nasunog ang lahat ng pera, alahas, passport at mahahalagang dokumento nito. Iniimbestigahan ng BFP kung ano ang pinagmulan ng sunog lalo na at sa kwarto ng biktima ito nagmula. Hindi umano isinasantabi ng BFP ang posibilidad na arson o sinadya ang insidente.
Inaalam din kung magkano ang halaga ng nasunog na tahanan.

Phots: Courtesy of BFP Bagabag

04/03/2024

❤️
29 years on the airwaves and still going strong! Thank you for tuning in and making us a part of your daily routine. From your morning alarm to your late-night lullaby, we've been there every step of the way. Here's to continuing our journey together. Happy 29th Anniversary to us! Cheers🥂

15/01/2024

Update: Claimed na po ang wallet at lubos ang pasasalamat ng pamilya ni Trianna Jimenez na naibalik ito. Hindi umano nila akalain na babalik pa ito subalit laking pasasalamat nila sa tricycle driver na nagsauli sa DWRV upang ianunsiyo ito sa publiko.

Public Service Announcement:

Attention: Trianna Jalilah Jimenez from Union City, California. Pls claim your wallet containing IDs and cash at DWRV National Highway, Luyang, Bayombong, Nueva Vizcaya.This was returned by Rodel Ventura(Right photo)of Roxas.

30/11/2023

Halos 2,000 Magsasaka Nakatanggap ng Tulong Pinansyal sa Dupax del Norte

Tulong sa pangangailangan sa taniman at maagang pamasko ang ipinagkaloob ng lokal na pamahalaan ng Dupax del Norte sa kanilang mga magsasaka kahapon, November 30.
Umabot sa 1,913 na mgasasaka na nagtatanim ng palay, mais at mga gulay ang tumanggap ng Php 1,300 bawat isa mula sa lokal na pondo ng Dupax del Norte o katumbas ng mahigit 2.4 milyong piso.
Ayon kay Mayor Timothy Joseph Cayton, bahagi ito ng programa ng kanilang lokal na pamahalaan upang matulungan ang mga magsasaka sa munting paraan gaano man kalaki o kaliit ang kanilang tinatamnan.
Iba pa umano ito sa ipinagkakaloob na tulong na tig tatlong libong piso kada kektarya o siyam na libong piso na maximum para sa tatlong hektaryang taniman. Kaninang umaga, unang ipinagkaloob ang tulong sa mga magsasaka para sa mga upland farmer at sa hapon ay para sa mga nasa baba naman.

30/11/2023

BHWs na Matagal na sa Serbisyo at Masipag, Huwag Palitan-Safe Motherhood Coordinators

Umapela ang mga coordinator ng safe motherhood program sa probinsiya ng Nueva Vizcaya na huwag palitan o tanggalin ang mga Brgy Health Workers(BHW) na matagal na at mahusay ang serbisyo. Ito ang hiling ng nagretirong Safe Motherhood Coordinator na si Angie Cajucom at Evangeline Hernaez.
Ayon sa dalawa, malaking tulong ang ipinagkakaloob ng mga BHW at dumaan sa masusing training at accreditation sa Department of Health ang mga ito.
“Sana tingnan muna ng mga bagong elected official ang record ng mga BHWs bago sila tanggalin dahil napakalaki na ang naging sakripisyo at dedikasyon nila sa kanilang serbisyo, hindi sila para sa health, minsan taga linis, taga luto sila at kung anu-ano pa at higit sa lahat napakahala ng role nila sa kalusugan lalo na noong pandemic,” saad ni Hernaez.
Idinagdag nito na may joint circular ang DOH at DILG na huwag basta magtatanggal ng BHW lalo na kung Maganda naman ang performance nila.
“Napakaliit lamang ng honorarium nila at mahirap maghanap ng basta ng kanilang kapalit, wala namang kinalaman ang mga yan sa mga politico kundi serbisyo lang ang gustong ibigay sa komunidad,” saad ni Cajucom.
Malaki umanong kawalan sa pamimigay ng tulong at serbisyo kung mawawala ang mga trained at accredited na mga BHWs dahil lamang kinuha sila ng mga dating opisyales. Bagamat tatanggapin naman umano ang bago, mas mainam na huwag palitan ang mga dati na bihasa at makikita ang sipag at tyaga sa serbisyo.

30/11/2023

Magsasaka, Binaril sa Kayapa, Nueva Vizcaya

Nasugatan ang isang magsasaka matapos barilin ito ng di kilalang suspek sa loob ng kanilang tahanan sa Sitio Lucban, Brgy Babadi, Kayapa, Nueva Vizcaya kagabi Nov. 29. Kinilala ang biktima na si Terio Baslagan , 59 taong gulang at residente ng nasabing lugar.
Ayon sa ulat ng Kayapa PNP, ipinaalam sa kanila ng Punong Brgy ng Babadi na si Anson Habiatan na may naganap na pamamaril sa nasabing lugar. Base sa imbestigasyon ng pulisya, kumakain ang biktima kasama ang kanyang misis sa kanilang kusina nang tumayo umano ang misis upang sagutin ang kanilang hand-held radio.
Narinig na lamang umano ng misis ang putok ng baril at nakitang tinamaan ang kanyang mister sa kanang braso. Agad na humingi ito ng tulong mula sa kanilang barangay kagawad at isinugod naman siya sa R2TMC sa tulong ni Kgd. Anson Habiatan.
Ayon kay PCapt Manny Paul Pawid, PIO ng NVPPO, tatlong oras ang byahe ng mga pulis patungo sa nasabing lugar at wala ring signal ng cellphone. Patuloy pa rin ang imbestigasyon kung ano ang motibo at sino ang suspek sa nasabing insidente.

Photos courtesy of NVPPO

30/11/2023

Isa Patay, Isa Kritikal Matapos Sumalpok ang sasakyan sa Trak sa Bambang, Nueva Vizcaya

Agad na namatay ang isang motorista matapos sumalpok ang minamanehong motorsiklo sa nakaparang sasakyan sa kahabaan ng Nat'l Highway Barangay Indiana, Bambang, Nueva Vizcaya alas kwatro y media ng madaling araw kahapon, Nov 29.
Ang mga biktima ay nakasakay sa SMC MICROBIKE EXT na sinakyan ng dalawang di kilalang dalawang kalalakihan. Ayon kay PCapt Marvin Deculing, DeputyChief of Police ng Bambang PNP, tumabi sa gilid ng daan ang Hino trailer trak na minaneho ng isang alyas Martin, 30 y/o, single and a resident of Kamangaan, Sison, Pangasinan upang ayusin ang mga karga nilang sako-sakong mais dahil nalalaglag na ang mga ito. Mabilis naman ang takbo ng mga biktima na biglang sumalpok sa likurang bahagi ng nakaparadang sasakyan. Ayon sa imbestigasyon ng mga pulis, nakaflasher naman umano ang trailer trak. Agad na isinugod ang dalawa sa R2TMC subalit naideklaranf patay ang driver ng motor habang kritikal pa ang backrider.

Photos Courtesy of NVPPO

20/11/2023

Update: Bangkay ng Batang Nalunod sa Bambang, Nueva Vizcaya, Kinilala ng Kapamilya

Kinilala ng kanyang lolo ang batang nakitang lumulutang ang bangkay sa ilog ng San Fernando, Bambang, Nueva Vizcaya noong Biyernes, November 18.
Ito ay si Mark Christian Villarubia, 10 anyos at residente ng Punawa, Calaocan, Bambang na kalapit barangay lamang kung saan nakita ang bangkay ng bata.
Ayon kay PCapt Marvin Deculing, inaalagaan ng kanyang lola ang nasabing bata mula noong ito ay dalawang taon pa lamang at nasanay umano silang hindi umuuwi kung minsan dahil nakikitulog sa ibang kamag-anak.
Gayun pa man, nabanggit umano ng kanilang kapitbahay na may natangpuang bangkay sa nasabing ilog at nang puntahan ito ay positibong kinilala na ito ang kanilang apo.
Base sa imbestigasyon ng PNP Bambang, may nahukay na malalim na bahagi ang nasabing ilog kung saan posibleng nahulog at nalunod ang biktima.

Photo courtesy of NVPPO

20/11/2023

Lolo Patay Matapos Mabangga sa Pagtawid ng Kalsada sa Luyang, Bayombong, Nueva Vizcaya

Yumao ang isang lolo matapos ang ilang oras na panggagamot sa kanya matapos itong mabangga sa Maharlika Highway, Barangay Luyang, Bayombong, Nueva Vizcaya.

Kinilala ang biktima na si David Guimbongan, 86 taon at residente ng Brgy. Julongan, Kiangan, Ifugao.
Ayon kay PCapt Marvin Deculing, nagpunta ang biktima sa Bayombong upang dalawin ang kapatid nitong may sakit. Sinabihan naman umano ito ng mga kapamilya na sasamahan sa pagdalaw subalit tila nainip umano ito at bumiyahe ng mag-isa.
Tatawid sana sa daan ang lolo bandang alas nuwebe bente ng gabi noong November 16 nang mabangga ito ng Mitsubishi Montero. Ang nasabing sasakyan ay minaneho ni alyas Goliath, 30 taong gulang, residente ng Purok Rang-ay, Barangay San Fernando, Bambang.
Sa lakas ng pagkakabangga, tumilapon umano ang lolo sa abot kumulang 12 metro at tuluyang namatay ito tatlong oras matapos ang aksidente.

20/11/2023

Bangkay Natagpuan sa Irrigation Canal sa Bambang, Nueva Vizcaya

Natagpuan ang bangkay ng isang laborer na nasa irrigation canal ng Almaguer North, Bambang, Nueva Vizcaya alas tres ng hapon, November 19. Kinilala ang biktima na si Harrison Pascua alyas Duro, construction worker at residente ng Casat, Bayombong.

Ayon kay PSSg Lester Ambrosio, imbestigador ng kaso, unang nag-inuman ang biktima kasama ang kaibigan sa Barat, Bambang at kalaunan ay lumipat sila sa Brgy Almaguer North upang ituloy ang inuman. Bandang alas onse ng gabi, umalis umano ang kanyang kasama na si Celestino Camunayan at nang balikan ang kasama ay wala na ito sa kaniyang pwesto .
Papasok naman sa kanyang trabaho ang amo ng biktima nang aksidenteng mailawan niya ang paa ng biktima na nakaangat mula sa irrigation canal.

Agad itong tumawag ng tulong sa pulisya at nakumpirmang ito ang laborer na si Alyas Duro. Posibleng umanong pauwi na sana ang biktima sa tinutuluyang barracks nang mahulog sa irigasyon at naitama ang noo sa konkretong bahagi ng irigasyon. May sugat umano ang biktima sa taas ng kanyang kilay na posibleng rason ng kanyang pagkakabagok at sumubsob sa irigasyon.

Bago ito ay isa pang insidente ng pagkalunod ang naganap sa Brgy. San Fernando kung saan posibleng nahulog sa malalim na bahagi ng ilog ang di pa biktimang lalaki na edad 10-15 at nakasuot ng pares na blue-green na tshirt at shorts.

Photos courtesy of NVPPO

19/11/2023

Magsasaka, Pinagbabaril sa Diadi, Nueva Vizcaya

Pinagbabaril ang isang magsasaka sa Purok 4, Ampakleng, Diadi, Nueva Vizcaya kaninang pasado alas syete ng gabi, November 19.

Kinilala ang biktima na si
Marcelino Kimmayong, 60 y/o, may asawa, at residente ng P4, Ampakleng, Diadi, Nueva Vizcaya.

Ayon sa inisyal na ulat ng PNP at base sa salaysay ng anak ng biktima, nasa labas ng kanilang bahay si Kimmayong nang dumating ang suspek at pinagbabaril ang biktima.

Matapos nito ay agad tumakas ang suspek sakay ng motorsiklo. Agad namang nagresponde ang mga personnel ng Diadi PS at 2nd MP, 1st NVPMFC sa pamumuno ni PMaj Angelo Dasalla sa lugar ng insidente.

Nagtungo rin doon ang
NV Forensic Team para sa crime scene processing. Patuloy ang hot pursuit operation sa suspek at imbestigasyon sa kaso.

Photos courtesy of NVPPO

18/11/2023

Bangkay, Nakitang Lumulutang sa Ilog ng Bambang, Nueva Vizcaya

Narekober ang di pa kilalang bangkay ng isang lalaki na nakita sa Purok Rang-ay, San Fernando, Bambang, Nueva Vizcaya bangdang ala una ng hapon, November 18.
Ang biktima ay pinaniniwalang teenager na nasa edad 10-15 taon, nakasuot ng blue/green tshirt at short pants na lumulutang sa ilog.
Nakita umano ito ni Rodney Manuel Saweding na maghuhugas sana ng kanyang bisikleta. Agad itong tumawag ng mga otoridad na nagresponde sa nasabing lugar.
Ayon kay Police Capt Marvin Deculing, Deputy Chief of Police ng Bambang PNP, nakita umano ng isang babaeng na may mga taong nagpapana ng isda sa nasabing lugar subalit hindi sila kilala. Posibleng kasamahab umano ng nasabing grupo ang biktima. Posibleng nahulog umano ito sa malalim na bahagi ng ilog at nalunod.
Nagpanawagan naman ang PNP sa mga nawawalan ng kamag-anak na kapareho ng paglalarawan sa biktima na makipag-ugnayan sa PNP Bambang.

Photos Courtesy of NVPPO

18/11/2023

Tingnan: Ang CCTV recording sa pagbaril sa bagong Punong Brgy ng Calitlitan, Aritao na si Rolando Hipolito na nagresulta sa kanyang pagkamatay, kahapon ng gabi, November 17.

18/11/2023

Bagong Kapitan ng Calitlitan, Aritao, Nueva Vizcaya Patay Matapos Pagbabarilin

Dead-on-arrival ang bagong Punong Brgy ng Calitlitan, Aritao, Nueva Vizcaya matapos ang turn-over ceremony ng mga opisyal ng barangay kahapon, Nov. 17, 2023 6:45 ng gabi.
Kinilala ang biktima na si Rolando Serapon, 76 anyos at residente ng Purok 3, Brgy Calitlitan.
Ayon kay PCapt Manny Paul Pawid, PIO ng NVPPO, nakaupo ang biktima sa kanilang bahay ng lapitan siya ng isang lalaki at pinaputukan ng anim na beses. Tinamaan sa iba’t ibang bahagi ng katawan ang biktima at idineklara na itong DOA sa Nueva Vizcaya Provincial Hospital sa bayan ng Bambang.
Narekober mula sa lugar ng insidente ang tatlong fired cartridges at tatlong bala. Base sa imbestigasyon, nakasuot ang suspek ng black short pants na may putting stripes, itim na tshirt, green na face mask at katamtaman ang pangangatawan.
Agad na sumakay ito ng motorsiklo matapos barilin ang Punong Barangay. Agad na nagkasa ng dragnet operation ang PNP para sa posibleng pagkakaresto ng suspek. Bumuo rin ng Special Investigation Task Group sa PNP upang tumutok sa kaso.

(Photos by: NVPPO)

06/11/2023

Construction Worker, Patay Matapos Matumbok ang Nakaparadang Sasakyan sa Bayombong, Nueva Vizcaya

Dead-on-arrival ang isang construction worker matapos tumbukin ang nakaparadang sports utility vehicle sa Provincial Road, P2, Barangay Paitan, Bayombong, Nueva Vizcaya alas syete y media ng gabi, November 5.
Kinilala ang biktima na si Edgar Lizardo, 44 taon, binata, construction worker at reisdente ng Paitan, Bayombong at nakasakay noon ng black Skygo 125 at may plate No. 972 BOO.
Samantala, ang nabangga nito ay ang nakaparadang black Toyota Innova na may plate number AAL 6808 na minaneho at pagmamay-ari ni alyas Francis, 33 years old, empleyado ng Cale commercial at residente ng Barangay Salvacion, Bayombong.
Sa ulat ng Bayombong PNP, naglalakbay ang motor patungong southern direction nang mabangga nito ang SUV na nasa gilid ng daan at nakaharap sa hilagang direksyon.
Matindi ang naging tama ng biktima na DOA na sa pagamutan.

photos courtesy of NVPPO

06/11/2023

Gov. Gambito, Sinig**o ang Suporta sa mga Bagong Halal na Brgy at SK official ng Nueva Vizcaya

Sinigurado ni Gov. Jose Gambito ang pakikipagtulungan sa mga bagong halal na opisyales ng barangay at kabataan sa Nueva Vizcaya. Ito ang tinuran ng Gobernador matapos maiproklama ang mga bagong halal na opisyales sa nakaraang eleksyon.
Aniya, marami ang bagong nanalong opisyal kung kaya't pinayuhan ang mga ito sa kanilang responsibilidad.
"Kung may mga orientation na ipapatawag ang DILG, sana mag-attend kayo at iwanan ang personal na interes, nasa public office na kayo kaya please, palitan ang mind set, dapat priority ang public service because that is the best way to serve the public," saad ni Gov. Gambito.
Sinigurado rin nito ang suporta sa mga barangay at sanguniang kabataan.
"Alam naman nating kulang ang pondo ng mga barangay kaya makakaasa sila ng suporta, lets support each other, support me and I will support you and together, we will support the people of Nueva Vizcaya," dagdag ni Gov. Gambito.

06/11/2023

Tingnan:

Si Lolo Maximo Santiago, 98 anyos, mula Bascaran, Solano, Nueva Vizcaya ay isa sa siyam na lamang na nabubuhay na World War II Veteran sa Nueva Vizcaya.
Taas-noong dumalo ito pagbibigay-pugay sa mga yumaong sundalo na hindi na nakilala at naiuwi ng kanilang mga pamilya sa 'Tomb of Fallen Soldiers' sa Heritage Memorial Park sa bayan ng Solano noong Nov 1.
Binasbasan ni Fr. Christian Dumangeng ang nasabing puntod na ayon sa Phil. Veterans Affairs Office Nueva Vizcaya ay sumisimbolo sa mahigit-kumulang 30,000 nagsakripisyo ng kanilang buhay sa Balete Pass sa Santa Fe, Nueva Vizcaya.

05/11/2023

84 Anyos na Lolo, Patay Matapos Mabangga ng Ambulansiya sa Bayombong, Nueva Vizcaya

Dead-on-arrival ang isang lolo matapos mabangga ng ambulansiya sa kahabaan ng Purok 1, Buenavista, Bayombong pasado alas 10 ng umaga, Nov 4. Kinilala ang biktima na si Melicio Egoy Buen, 84 anyos at residente ng nasabing barangay
Ayon sa ulat ng Bayombong PNP, naglalakbay ang ambulansiya na Nissan Urvan na minaneho ng kinilalang si Mig, 29 anyos at nakarehistro sa Barangay Mapulang Lupa, Valenzuela city, nang maganap ang aksidente.
Patungong sentro ng Bayombong ang ambulansiya nang tumawid umano ang biktima na nakasakay sa kanyang bisikleta.
Agad isinugod ng driver ng ambulansiya ang biktima sa hospital subalit idineklara na itong dead-on-arrival.

Photos courtesy of NVPPO

05/11/2023

Kliyente sa isang Hotel and Resort, Tinangay ng 3OK sa Bagabag, Nueva Vizcaya

Tinangay ng di pa kilalang suspek ang bag na naglalaman ng kanilang pera habang naka check-in sa isang resort sa Quirino, Bagabag, Nueva Vizcaya.
Kinilala ang nga biktima na sina Delba 64 y/o, may asawa at Nelson, 69 y/o, retired pastor at kapwa residente ng San Juan St., Pasay City
Ayon sa imbestigasyon ng PNP Bagabag, November 4 bandang 7:30 ng gabi nagcheck-in ang mga biktima sa hotel ng nasabing resort. Kaninang umaga, November 5, 2023 napansin ng mga biktima na nasira ang bintana ng kanilang banyo at nang tingnan, nawawala na ang kanilang kagamitan.
Nakuha ang bag na naglalaman nf Php 30,000 at 300 dollars. Narekober ang bag sa likod ng kanilang kwarto subalit wala na ang pera.
Patuloy ang imbesrigasyon ng pulisya sa nasabing insidente.

photos courtesy of NVPPO

05/11/2023

Bangkay ng Lalaking Nalunod, Natagpuan sa Aritao, Nueva Vizcaya

Natagpuang bangkay ng 51 anyos na lalaki na nalunod sa Purok Rang-ay, Comon Aritao, Nueva Vizcaya kaninang unaga, Nov 5.
Kinilala ang biktima na si Edmund Dayag, 51 anyos, laborer at residente ng Sinayung, Abulog, Cagayan.
Nakita ng kanyang employer na si Larry Paringit ang biktima na wala ng buhay sa gilid ng ilog. Sa imbestigasyon ng pulisya, nakipag-inuman ang biktima noong Nov. 3 kasama ang kaibigan subalit bago mag-alas otso ng gabi, umuwi ito sa Purok Rang-ay at tumawid sa ilog. Idineklara siyang patay ni Dr. Van Bautista MHI at wala naman umanong indikasyon na may foul play.
Hindi na rin hiniling ng pamilya na ipaautopsy ang bangkay nito dahil naniniwala ailang aksidente ang nangyari.

photo courtesy of NVPPO

03/11/2023

Mga G**o na Nagsilbi sa Eleksyon, Nangunguha na ng Honorarium sa Nueva Vizcaya

Kanya-kanyang sumite na ng dokumento ang mga g**o na nagsilbi sa nakaraang BSKE. Sa bayan ng Solano, halos 500 g**o ang nagsibli bilang Electoral Board Chairman, Poll Clerk at third member.
Ayon kay Atty. Jeoffrey Noscal, Election Officer ng Solano, 10,000 piso ang tatanggapin ng
electoral board chair at tig 9,000 ang poll clerk
at third member. Maliban dito, may limang araw na leave credits para sa mga nanilbihan na g**o.
Pinasalamatan din nito ang mga g**o sa kanilang serbisyo dahil sa dami ng trabaho noong eleksyon.

03/11/2023

4,000 College Students ng Nueva Vizcaya, Pagkakalooban ng tig 3K piso Educational Assistance mula kay Sen. Imee Marcos

Pinagkalooban ng tig 3,000 piso bawat isa ang apat na libong college students mula sa Nueva Vizcaya ngayong araw, Nov. 3 sa Nueva Vizcaya Convention Center. Ang pondo ay mula sa tanggapan ni Sen. Imee Marcos na idinaan sa DWSD.
Ayon kay Efren Quiben, Political Officer ni Sen. Imee dito sa Nueva Vizcaya, 12 milyong piso ang nai-allocate para sa probinsiya, tatlong milyon para sa mga estudyante mula Bambang at tatlong milyon para sa bayan ng Solano.
"Not necessarily poor ang mga estudyante dahil ang gusto ni Sen. Imee ay matulungan sana lahat ang mga mag-aaral basta kailangang naka enroll, 18 years old at nag-aaral dito sa probinsiya," saad ni Quiben.
Pinasalamatan naman ni Gov. Jose Gambito si Sen. Marcos sa pagkakaloob ng nasabing pondo. Unang hiniling nito ang 20 milyong piso para sa probinsiya subalit natutuwa na rin ang gobernador dahil malaki na rin umano ang 12 milyon na ipamimigay.
"Makakatulong ito para sa pag-aaral ng nga estudyante bagamat hindi ito sapat para sa lahat ng kanilang pangangailan, di magkakaroon na rin ang pondo ang provincial government para sa iba pang hindi nakasali na benepisaryo," paliwanag bi Gov. Gambito.
Nagpasalamat din si Jennifer Leroso isang estudyante mula Dupax del Sur kay Sen. Marcos, sa PLGU at DSWD sa tulong na ibinigay sa kanila.
"Malaking tulong po ito sa amin at sa aming mga magulang, maraming salamat po Sen. Imee" saad nito.

02/11/2023

Hustisya, Panawagan ng Kapamilya ng Pinatay na Dalagita sa Bayombong, Nueva Vizcaya

Puno ng hinagpis ang mga kapamilya at kaibigan ng labing-isang taong gulang na dalagita na natagpuang bangkay sa Masoc, Bayombong, Nueva Vizcaya noong ika-27 ng Oktubre, 2023.
Kaninang umaga ay inihatid na sa huling hantungan ang dalagita. Matatandaang natagpuang walang saplot pantaas ang bata nang matagpuan ito sa isang liblib na bahagi ng Brgy Masoc, Bayombong na may sugat sa kanyang ulo.
Hustisya ang panawagan ng mga kamag-anak nito at umaasang maresolba ng pulisya kung ano ang tunay na motibo at kung sino ang may kagagawan sa pagpatay sa bata.
Nag-aaral ang biktima sa ika-6 na baitang sa La Torre South, Bayombong. Ayon sa kanyang ina na si Gema Rose Coning, Martes, October 24 nang makausap nito ang g**o ng bata na madalas itong hindi maayos ang pagpasok sa paaralan. Pinagsabihan umano nito ang anak at sumagot naman umano ng maayos ang bata. Gayun pa man, hindi na ito nakauwi hanggang sa matagpuan ang kanyang bangkay noong Oct 27.

01/11/2023

Babaeng Banyaga, Arestado dahil sa Pagshoplift Umano ng Carpet, Bra atbp Gamit

Arestado ang isang babaeng Indian National matapos tangkaing ipuslit ang iba't ibang paninda mula sa isang shopping center sa Roxas, Solano noong ika-29 ng Oktubre.
Kinilala ng PNP Solano ang suspek na si alyas Mahle, 21 taong gulang, Indian national at residente ng Maharastra, India.
Ayon sa report, isinilid ng suspek ang dalawang bra, dalawang light ABC, tatlong puzzle mats, apat na curtain tassel at carpet sa isang bag at inilagay ito malapit sa kahera.
Ayon kay Pol. Major Anthony Ayungo, saglit na lumabas sa establishmento ang suspek bago ito bumalik at kinuha ang bag na hindi binayaran ang mga kinuha na nagkakahalaga ng 4,215 na piso. Gayun pa man, napansin umano ito ng mga kawani ang ginawa kung kaya't agad siyang hinarang.
Bukas daw sana ang shopping center na patawarin ang suspek kung babayaran ang kinuha subalit nagmamatigas daw ito. Sa panuntunan ng establishimento, 10 beses ang halagang babayaran kung nahuling nagpuslit ng paninda. Ipinaalam na rin ng pulisya sa embahada ng India ang insidente at nalamang nasa bansa ang suspek upang iproseso ang kanyang dokumento upang mag-aral sana sa bansa.
Dahil tumatangging aminin ang pagkakasala, sasampahan ng kasong theft ng panunuan ng shopping center ang suspek.

Photo courtesy of NVPPO

01/11/2023

Mister, Patay sa Pananaksak ng Tiyo na Sumabat sa Away ng Mag-asawa

Patay matapos masaksak ng tiyuhin ng kanyang misis ang isang mister mula sa Purok Talna, Brgy. Mangayang, Dupax del Sur, Nueva Vizcaya, Oct 31, pasado ala-una ng madaling araw.
Kinilala ng Dulax del Sur PNP ang biktima na si Carlos Esporo, 45, anyos, magsasaka at naninirahan din sa nasabing lugar. Ayon kay Police Major Ferdinand Corpuz, Hepe ng PNP Aritao, nagkakasagutan umano ang biktima at misis nito nang pumasok sa eksena ang tiyo ng misis.
Ginising umano ang suspek ng nanay ng misis upang sawayin ang mag-asawa subalit laking gulat nila nang saksakin bigla ng suspek ang asawa ng kanyang pamangkin.
Dalawang tama ng saksak sa tagiliran ang tumama sa biktima at idineklarang dead-on-arrival na sa hospital.

Photo courtesy of NVPPO

01/11/2023

Tingnan:
Ang drawlots sa pagitan ng kandidato bilang SK Chairperson ng Don Domingo Maddela, Bayombong na sina Krizia Chariz Yango at Frenz Tugab na parehong nagtabla sa 48 votes. Ipinaliwanag ni Atty. Wilma Binbinon ang regulasyon at proseso sa ganitong sitwasyon.
Sa huli, naipanalo ito ni Yango.

01/11/2023

Siyam na Katao Arestado Dahil sa Paglabag ng Liquor Ban sa Nueva Vizcaya

Umabot sa siyam na kalalakihan ang arestado dahil sa paglabas sa COMELEC Resolution tungkol sa liquor ban na ipinatupad mula Oct 29 ng hatinggabi hanggang Oct 30 rin ng hatinggabi.
Ayon kay Police Capt. Manny Paul Pawid, PIO Ng NVPPO unang nahuli sa akto na nag-iinuman ang apat na magkakamag-anak sa Aritao sa pwesto ng kanilang pamangkin pasado alas nuwebe ng gabi noong Oct. 29. Masayang nagvivideoke pa umano ang mga ito ng madatnan ng mga tauhan ng PNP Aritao sa pamumuno ni PMajor Roderick Rabago. Ayon umano sa mga suspek, hindi nila alam na bawal uminom ng alak nang araw na iyon.
Dalawang lalaki naman ang nahuli sa Alfonso Castaneda. Ang una ay nakitang hindi maayos ang kilos at tila lasing kung kayat isinumbong ito sa pulisya samatalang arestado rin ang isa pang lasing matapos manapak ng PWD.
Huli naman ang magboardmate matapos magsumbong ang isa sa kanila na sinaktan siya ng kanyang nakainuman. Kapwa nahuli ang nagsumbong at kanyang isinumbong na kainuman dahil parehong nag-inuman ang mga ito mula sa bayan ng Bagabag. Nadatnan pa ng mga pulis ang ikalawang suspek na nag-aayos ng mesa at boteng pinag-inuman ng alak.

Photos courtesy of NVPPO

01/11/2023

'Tomb of the Fallen Soldiers' sa Nueva Vizcaya Binasbasan Kasabay ng All Saint's Day

Nag-alay ng isang misa at binasbasan ang dambana na nagsisimbolo para sa lahat ng mga sundalong yumao sa mga nakalipas na mga digmaan lalo na sa World War II.
Matatagpuan ito sa loob ng Heritage Memorial Park sa bayan ng Solano at nakarehistro sa Phil. Veterans Affairs Office(PVAO) na simbolo ng pagkilala sa mga sundalo na nagsakripisyo ng kanilang buhay.
"Sa pagtaya, nasa 30,000 sundalo ang namatay para idepensa ang ating bayan dyan lamang sa Balete Pass sa Santa Fe, hindi pa kasama diyan ang mga ibang namatay tulad sa Salacsac Pass at iba pang lugar," saad ni Len Tolentino, Chief ng PVAO Nueva Vizcaya.
Pinangunahan ni Fr. Christian Dumangeng ang misa at pagbasbas sa dambana kasabay ng pagdarasal para sa kaluluwa ng lahat ng yumaong sundalo.
"Awan iti freedom tayo kas iti masagsagrap tayo ita nu awan dagiti immuna a suldado kanyami and we sustained this freedom from different revolutions," paglalahad naman ni Ret. Col. Marcelino Tacadena, Pangulo ng mga retiradong sundalo sa probinsiya.
Matapos ang pagkanta ng Lupang Hinirang, naghandog ng bulaklak ang grupo sa dambana at sumaludo ang mga retiradong sundalo.
Inihayag naman ni Mun. Councilor Regina Valdez na siya ring namamahala sa Heritage Memorial Park na bilang pagkilala ay nakahanda na ang loteng magsisilbing Libingan ng mga Bayani. 10 Lote ang popondohan ng Provincial Government at susunod naman ang 500 lote na popondohan ng PVAO at iba pang ahensiya. Magsisilbi ito para sa mga namatay o yayao pa lamang na sundalo upang tuloy-tuloy na mabigyan sila ng tamang pagkilala sa kanilang serbisyo kahit yumao na sila.

27/10/2023

1.7M pisong Halaga ng Shabu Nasamsam sa Buy-Bust Operation sa Aritao, Nueva Vizcaya

Arestado ang maglive-in partners kung saan nakuha sa kanila ang 260.30 gramo ng hinihinalang shabu sa buy bust operation na isinagawa kagabi Oct 26, alas syete ng gabi sa Purok Linglingay, Poblacion, Aritao, Nueva Vizcaya.
Kinilala ang mga suspek na sina alyas LITO, 42 y/o, may asawa at residente ng Mangandingay, Cabaroguis, Quirino at MAY, 25 y/o, dalaga at residente ng Centro, Santiago City, Isabela, kapwa nakalista bilang mga high value individual targets ng PNP.
Umaabot sa 1,768,000 piso ang halaga ng droga sa operasyon na isinagawa ng PDEU(lead unit), PIU NVPPO, Aritao PS, RDEU, PDEG-SOU2, 2nd NVPMFC at Sta.Fe PS.
Nabili mula sa mga suspek ang isang piraso ng medium sized heat sealed transparent plastic sachet na may white crystalline substance na hinihinalang shabu.
Nakuha naman sa posesyon nila ang isang bottled water na may white crystalline substance na hinihinalang shabu; isang zip lock na may tubig at hinihinalang residue ng shabu; Isang large sized heat sealed transparent plastic sachet na may white crystalline residue; Mga medium size transparent plastic sachet na may white crystalline substance na pinaniniwalaang shabu.
Nagkalat din ang hinihinalang shabu sa loob ng sasakyan na inipon ng otoridad at inilagay sa ziplock.
Maliban sa hinihinalang droga, narekober din ang pera na isanlibong piso at 16 boodle money, cellphone, timbangan, lighters, aluminum foils, syringe, isang unit G***k Cal.40 may magazine at 13 ammunition at may serial number, glass tube water pipe, One(1) unit Samsung cellphoneat ang Mitsubishi Estrada Triton bearing plate number BAE1381 na ginamit sa transaksyon.
Nasa kustodiya ng pulisya ngayon ang mga suspek para sa dokumentasyon at pagsasampa ng kaukulang kaso.

Photos: Courtesy of NVPPO

25/10/2023

200K Reward Money, Alok Ni Gov. Gambito para sa Alameda Case

Magbibigay ng 200,000 pesos si Gov. Jose Gambito sa sinumang makakapagbigay ng mahalagang impormasyon para sa pagkakaresolba ng pagpatay kay Aparri Vice Mayor Rommel Alameda at limang ibang kasamahab dito sa Nueva Vizcaya.
Ayon kay PCapt Manny Paul Pawid, PIO ng NVPPO, umaasa silang may tutugon sa kanilang panawagan na tumulong para sa pagresolba ng kaso sa pamamagitan ng pagbibigay ng mahalagang impormasyon ukol dito lalo na at may gantimpala.
Matatandaang tinambangan ng di pa kilalang suspek ang Bise-Mayor noong ika-19 ng Pebrero, 2023 lulan ng kanyang van at limang iba pa, sa kahabaan ng Baretbet, Bagabag.
Tinadtad ng bala ng baril ang sasakyan nila mula sa mga suspek na nakasuot ng uniporme ng pulis at gumawa pa ng pekeng checkpoint.
Pinangungunahan ng mismong Regional Director ng PNP ang Task Force Alameda na nag-iimbestiga sa kaso subalit hanggang ngayon ay patuloy pa ring naghahanap ng konkretong ebidensiya at testigo para sa nasabing kaso.
"Kung may makakapagbigay ng mahalang impormasyon tilungkol dito, sinisig**o po namin ang confidentiality ar seguridad ninyo basta lumapit lang kayo sa pulisya," saad ni PCapt Pawid. Dadaan naman umano sa masusing pag-aaral ang anumang impormasyon na makakarating sa kanila. Makatutulong umano ang alok na salapi upang mahikayat ang mga testigo na mabigyan ng hustisya ang mga biktima at kanilang mga pamilya.

(File Photo)

Address

Maharlika Highway Luyang
Bayombong
3700

Website

facebook.com

Alerts

Be the first to know and let us send you an email when DWRV News & Public Affairs posts news and promotions. Your email address will not be used for any other purpose, and you can unsubscribe at any time.

Contact The Business

Send a message to DWRV News & Public Affairs:

Videos

Lolo Patay Matapos Mabangga sa Pagtawid ng Kalsada sa Luyang, Bayombong, Nueva Vizcaya Yumao ang isang lolo matapos ang ilang oras na panggagamot sa kanya matapos itong mabangga sa Maharlika Highway, Barangay Luyang, Bayombong, Nueva Vizcaya. Kinilala ang biktima na si David Guimbongan, 86 taon at residente ng Brgy. Julongan, Kiangan, Ifugao. Ayon kay PCapt Marvin Deculing, nagpunta ang biktima sa Bayombong upang dalawin ang kapatid nitong may sakit. Sinabihan naman umano ito ng mga kapamilya na sasamahan sa pagdalaw subalit tila nainip umano ito at bumiyahe ng mag-isa. Tatawid sana sa daan ang lolo bandang alas nuwebe bente ng gabi noong November 16 nang mabangga ito ng Mitsubishi Montero. Ang nasabing sasakyan ay minaneho ni alyas Goliath, 30 taong gulang, residente ng Purok Rang-ay, Barangay San Fernando, Bambang. Sa lakas ng pagkakabangga, tumilapon umano ang lolo sa abot kumulang 12 metro at tuluyang namatay ito tatlong oras matapos ang aksidente.

Tingnan: Ang CCTV recording sa pagbaril sa bagong Punong Brgy ng Calitlitan, Aritao na si Rolando Hipolito na nagresulta sa kanyang pagkamatay, kahapon ng gabi, November 17.

Hustisya, Panawagan ng Kapamilya ng Pinatay na Dalagita sa Bayombong, Nueva Vizcaya Puno ng hinagpis ang mga kapamilya at kaibigan ng labing-isang taong gulang na dalagita na natagpuang bangkay sa Masoc, Bayombong, Nueva Vizcaya noong ika-27 ng Oktubre, 2023. Kaninang umaga ay inihatid na sa huling hantungan ang dalagita. Matatandaang natagpuang walang saplot pantaas ang bata nang matagpuan ito sa isang liblib na bahagi ng Brgy Masoc, Bayombong na may sugat sa kanyang ulo. Hustisya ang panawagan ng mga kamag-anak nito at umaasang maresolba ng pulisya kung ano ang tunay na motibo at kung sino ang may kagagawan sa pagpatay sa bata. Nag-aaral ang biktima sa ika-6 na baitang sa La Torre South, Bayombong. Ayon sa kanyang ina na si Gema Rose Coning, Martes, October 24 nang makausap nito ang guro ng bata na madalas itong hindi maayos ang pagpasok sa paaralan. Pinagsabihan umano nito ang anak at sumagot naman umano ng maayos ang bata. Gayun pa man, hindi na ito nakauwi hanggang sa matagpuan ang kanyang bangkay noong Oct 27.

Tingnan: Ang drawlots sa pagitan ng kandidato bilang SK Chairperson ng Don Domingo Maddela, Bayombong na sina Krizia Chariz Yango at Frenz Tugab na parehong nagtabla sa 48 votes. Ipinaliwanag ni Atty. Wilma Binbinon ang regulasyon at proseso sa ganitong sitwasyon. Sa huli, naipanalo ito ni Yango.