Sangguniang Bayan ng Aparri-Public Information and Communications Unit

08/03/2023

GOB. MAMBA, DISMAYADO SA PNP REGION 2 DAHIL SA MABAGAL NA IMBESTIGASYON SA APARRI 6

Labing walong (18) araw mula nang nangyari ang karumaldumal na pananambang at pagpaslang kina Aparri Vice Mayor Rommel Alameda at sa limang kasamahan nito sa Bagabag, Nueva Vizcaya nitong Pebrero-19, ngunit wala pa ring malinaw at kongkretong lead ang pulisya sa mga pumaslang sa Aparri 6.

Dahil dito, muling nagpahayag ng pagkadismaya si Gob. Manuel N. Mamba sa kapulisan sa rehiyon dahil sa mabagal na usad ng imbestigasyon sa naturang krimen.

“Masakit para sa akin na after 18 days wala pa rin update sa pagpaslang sa Aparri 6. Hindi po pwedeng kalimutan natin ito. Ako po ay nananawagan na naman sa Philippine National Police (PNP), huwag po nating inililihis ang isyung ito. Ang isyu dito ay 'what happened' to the Aparri 6 in Nueva Vizcaya? Bakit blanko pa rin po tayo? Pinagtatakpan niyo po ba ito o naghahanap kayo ng katotohan dahil 18 days na ito?” ani Gob. Mamba.

Matatandaang pinuna ni Gobernador si Police Brigadier General (PBGen) Percival A. Rumbaoa, PRO2 Acting Regional Director sa tila walang ginagawang aksyon ang kanyang pamunuan sa nangyaring pagpasalang kina Vice Mayor Alameda at limang kasamahan nito.

“Gen. Rumbaoa wala ka pa bang maisagot? Wala bang pinapatunguhan ang inyong imbestigasyon o takot ka sa gumawa? O takot ka sa katotohanan o takot ka sa kung sino ang mastermind?” pahayag ng Gobernador.

Nanawagan din si Gob. Mamba sa mga Aparriano at sa mamamayang Cagayano na huwag kalimutan ang ginawang pagpaslang kina Vice Mayor Alameda at limang kasamahan nito upang sila’y mabigyan ng hustisiya.

”Sana po huwag nating kalimutan ang nangyari kay Rommel at sa limang kasamahan niya. Magbilang tayo ng araw na hindi nareresolba ito upang kumilos ang kapulisan para mabigyan ng hustisiya ang Aparri 6,” panawagan ng Gobernador.

SOURCE: Cagayan Provincial Information Office (REDEN L. DELOS SANTOS)

28/02/2023

GOB MAMBA NANINIWALA NA HINDI APARRIANO ANG NASA LIKOD NG PAGPASLANG KAY APARRI VM ALAMEDA AT LIMANG KASAMAHAN NITO

HINILING KAY MAYOR CHAN AT MGA APARRIANO NA HUWAG BIGYANG-PUWANG ANG INTENSIYON NG SALARIN NA HATIIN AT BUWAGIN ANG SAMAHAN NG MGA APARRIANO

Naniniwala si Govenor Manuel Mamba na hindi isang Aparriano ang nasa likod ng pag-ambush at pagpaslang kina Aparri Vice Mayor Rommel Alameda at limang kasamahan nito.

Sa mensahe ng ama ng lalawigan sa necrological service ni VM Alameda, John Duane Alameda, Abraham Ramos, at Ismael Nanay Sr. sa harapan ng Legislative Building, Aparri ngayong araw Pebrero-28, sinabi nito na hindi kailanman magagawa ng isang Aparriano ang pagkitil sa buhay ng kanyang kababayan.

Buo ang loob ng ama ng lalawigan na isang mapagpanggap na Aparriano at Cagayano lamang ang utak sa pagpaslang sa Bise Mayor na walang ibang hangad kundi hatiin at buwagin ang samahan ng mga Aparriano.

Kaugnay nito ay nanawagan ang pinuno kay Mayor Bryan Chan na huwag hayaang manaig ang hangarin ng mga nasa likod ng pagpaslang na magkaroon ng pagkahati-hati ng sambayanang Aparriano dahil sa pangyayari.

"No Aparriano will do this. You can not do this to a friend, but somebody who pretends to be Aparriano, somebody who pretends to be a Cagayano," diin ng Gobernador.

"Idawdawat ku panagkaykaysa kadakayu. Please tell the mayor, never did I suspect the mayor. Somebody did this to divide us so that they can dictate us. So that they can control us. So please, don't let them divide you. Those who did this, you will never succeed," saad pa ng Gobernador.

Libo-libong Aparriano naman ang nakiramay sa mga nasawi at ang kanilang malakas na sigaw ay hustisya sa napaslang na "Aparri 6".
(Bernadeth Heralde)

SOURCE: Cagayan Provincial Information Office

28/02/2023

28/02/2023

Justice for APARRI SIX

27/02/2023

PAMILYA NG TINAGURIANG APARRI SIX HUMINGI NG PARALLEL INVESTIGATION SA NBI

Humingi ng isang parallel investigation sa National Bureau Investigation (NBI) ang pamilya ng napaslang na si Aparri Vice Mayor Rommel Alameda kasama ang lima pang kasama nito upang mabigyan ng linaw at kalutasan ang naganap na krimen laban sa tinaguriang “Aparri 6.”

Ang paglapit ng mga kaanak sa NBI ay upang malinawan sila sa mga haka-hakang may mga involved na kapulisan sa naganap na pananambang sa grupo ni Vice Mayor Alameda, at kung bakit sa mga video na naglalabasan ay nakasuot ng uniporme ng pulis at nagawa pang makagamit ng isang pinekeng red plate na sasakyan bilang get-away vehicle.

Ang paglapit ng pamilya ng tinaguriang “Aparri 6” sa NBI ay sinang-ayunan ni Cagayan Governor Manuel Mamba upang mapabilis ang paglutas sa kaso.

Ayon sa Gobernador, hindi dapat mapawalang saysay na lamang ang kasong ito sapagkat makikitang ang krimen ay pinagplanuhan at talagang tinustusan upang maisagawa.

Napaslang si Vice Mayor Alameda, kasama ang lima pang indibidwal noong Pebrero 19, 2023 sa Brgy. Baretbet, Balaban, Nueva Vizcaya habang bumibiyahe ito papunta sa Convention ng Vice Mayors’ League of the Philippines sa Lungsod ng Pasay. (Eugene Carlo C. Tolosa)

SOURCE: Cagayan Provincial Information Office

25/02/2023

| “Sana huwag tayo masanay sa hopelessness sa anumang karahasan na nangyayari.

Manindigan at lumantad tayo sa katotohanan at hustisya para sa mga biktima ng hindi makatarungang pagpatay sa isang Cagayano.”- GOV. MAMBA

(on the killings of Aparri Vice Mayor Rommel Alameda and his company)

Source: Cagayan Provincial Information Office

23/02/2023

TINGNAN: Personal na nakidalamhati si Governor Manuel Mamba at mga department head ng Pamahalaang Panlalawigan ng Cagayan, maging ang ilang opisyal ng lalawigan sa naulilang pamilya at kaanak ni Vice Mayor Rommel G. Alameda at John Duane B. Alameda kung saan nakahimlay ang mag-pinsan sa Barangay Centro 6 sa bahay mismo ng Bise Mayor sa Aparri, Cagayan.

Naging emosyonal si Elizabeth Alameda ang maybahay ni Vice Mayor Alameda. Niyakap ng ama ng lalawigan ang humahagulgol na asawa ng napaslang na lider ng bayan.

Kasunod nito ay nagbigay rin ng tulong pinansiyal ang Provincial Social Welfare and Development Office at Provincial Treasury Office sa iniwang pamilya ni VM Alameda at kanyang limang kasama.

Source: Cagayan Provincial Information Office.

23/02/2023

JUSTICE FOR APARRI SIX!

Let justice prevail!

Walang ibang sigaw ang ating mga kababayang Aparrieño at buong sambayanang Cagayano kundi hustisya!

Hustisya sa pagkamatay ni Aparri Vice Mayor Rommel G. Alameda, at ang kanyang iba pang kasamahan na sina John Duane Banag Alameda, Alexander Agustin Delos Angeles, Alvin Dela Cruz Abel, Abraham Dela Cruz Ramos Jr, at Ismael Tumaru Nanay Sr. Sana'y mabigyan ng katarungan ang walang-awang pagpaslang sa ating minamahal na Bise Mayor at kanyang mga kasamahan.

Ang inyong pamilya sa Pamahalaang Panlalawigan ng Cagayan ay lubos na nakikidalamhati at nakikiramay sa mga kaanak at pamilya ng ating mga yumaong kaibigan. JUSTICE FOR APARRI SIX!

Source: Cagayan Provincial Information Office

22/02/2023

JUSTICE WILL PREVAIL!!!

22/02/2023

INTERIOR SEC. ABALOS, KINONDENA ANG PANANAMBANG SA GRUPO NI VM ALAMEDA; IPINAG-UTOS NA MAS HIGPITAN ANG PAG-ISYU NG LTOPF

Nagpahayag na rin ng pagkondena si Department of the Interior and Local Government (DILG) Secretary Benjamin ‘Benhur’ Abalos sa pananambang at pagpaslang sa grupo ni Aparri Vice Mayor Rommel G. Alameda sa Baretbet, Nueva Viscaya.

Ayon sa kalihim, ipinapaabot nila ang pakikiramay sa naulilang pamilya ng Bise Mayor at limang kasama.

Aasahan aniya ng pamilya ng mga biktima na tututukan ang kaso at mananaig ang hustisya sa pagkamatay nila.

Kaugnay nito ay ipinag-utos na rin ni Abalos sa Pambansang Pulisya na rebisahin o pag-aralan ang polisiya at proseso sa pag-isyu ng armas at maging ang paghihigpit sa pagbibigay ng license to own and possess and to carry fi****ms outside residence.

Inatasan rin ng opisyal ang PNP na sikapin pa ang pagsasagawa ng “Oplan Katok” o pagbisita sa mga bahay para sa pagsuko ng mga expired at unlicensed na baril.

Source: Cagayan Provincial Information Office

22/02/2023

PRO2 REGIONAL DIRECTOR, PINATUTUTUKAN ANG KASO NG PAGPATAY KAY VICE MAYOR ALAMEDA NG APARRI CAGAYAN

Pinulong ni PBGen. Percival Rumbaoa, Regional Director ng Police Regional Office 2 (PRO2) ang bumubuo ng itinatag na Special Investigation Task Group (SITG) Alameda upang ipag-utos ang maingat at masusing imbestigasyon sa kasong pananambang kay Aparri, Cagayan Vice Mayor Rommel Alameda at mga kasama nito.

Sa panayam ng CPIO kay PLtCol. Saturnino Soriano, tagapagsalita ng PRO 2, sinabi nitong personal na nagpatawag ng pagpupulong si Gen. Rumbaoa upang ipag-utos ang masusing imbestigasyon sa naganap na pagpaslang kay VM Alameda at sa lima nitong kasama noong nakaraang Linggo, Pebrero-19 sa Brgy. Baretbet, Bagabag, Nueva Vizcaya.

Ayon pa kay LtCol. Soriano, sa ngayon ay patuloy ang ginagawang pagkalap ng SITG-Alameda ng mga impormasyon na maaaring makakatulong sa pagresolba ng kaso.

Idinagdag pa ng opisyal na masusi rin nilang inaaral ang mga bakas ng ebidensiya sa pinangyarihan ng krimen at sinusuri pa ang lugar para sa mga bakas na maaaring naiwan ng mga salarin.

Isa sa tinitingnan ng kapulisan ay ang natukoy na getaway vehicle ng mga suspek na isang puting Mitsubishi Adventure na nakitang sinakyan ng mga salarin matapos isagawa ang krimen.

Tinitiyak din ng kanilang hanay na ang nasabing sasakyan ay ang sasakyang natagpuang sunog sa bayan naman ng Solano, Nueva Vizcaya.

Bagamat sunog na ang sasakyan ay inaalam ng Task Group at HPG kung kanino huling nakarehistro ang sasakyan.

Pinaalalahanan naman ni Gen. Rumbaoa ang hanay ng kapulisan sa rehiyon na dapat ay maging agresibo sa paglutas ng kaso at hindi lang reaktibo.

Ibinigay na halimbawa ni Rumbaoa ang kaso ng panloloob ng anim na indibidwal sa isang malaking grocery sa Lungsod ng Tuguegarao na dahil sa maagap at agresibong galaw ng PNP ay nadakip ang lahat ng suspek sa kaso.

Nanawagan naman ang kapulisan sa sinumang may nalalaman sa kasong pagpatay kina VM Alameda na makipagtulungan sa kanila upang agarang malutas ang kaso at mabigyan ng hustisya ang pagkamatay ng mga biktima. (Eugene Carlo C. Tolosa)

*Note:

This article is originally written in Filipino. Hence, please expect translation mistakes if your phone is on “automatic google translate.

Source:Cagayan Provincial Information Office

22/02/2023

PANAWAGAN SA PUBLIKO:

PARA SA AGARANG PAGLUTAS SA KASO NG NAGANAP NA PANANAMBANG SA BISE ALKALDE NG APARRI CAGAYAN AT LIMANG IBA PA, KAMI AY NANANAWAGAN SA ATING MGA KABABAYAN NA KUNG MAYROON KAYONG KAUGNAY NA IMPORMASYON AY HUWAG MATAKOT NA ITO’Y INYONG IPARATING SA PINAKAMALAPIT NA HIMPILAN NG PULISYA PARA MAKATULONG SA ISINASAGAWANG IMBESTIGASYON.
ANG SASAKYAN NG MGA SALARIN AY TUMAKAS MULA BARANGAY BARETBET, BAGABAG AT HINIHINALANG ITO RIN ANG NATAGPUANG SUNOG NA SASAKYAN SA UDIAWAN, SOLANO.
SA MGA NAGMAMAY- ARI NG MGA CCTV CAMERAS NA MAAARING NADAANAN NG NATURANG SASAKYAN, MANGYARING IPAGBIGAY-ALAM PO NINYO ITO SA ATING KAPULISAN PARA SA AMING AGARANG AKSIYON.

SOLANO POLICE STATION : 0927 400 8033
BAGABAG POLICE STATION : O997 700 8181

Source: NVPPO

21/02/2023

PBGen Rumbaoa, kinumpirmang hindi miyembro ng PNP ang mga sangkot sa pamamaril sa Bagabag, NV; mga suspek, patuloy na tinutugis ng PNP

Source: PRO2 Regional Public Information Office