Takoto kei te kiingi o te kotahitanga.
MATATINI Tāmaki Makaurau, Te Anawai 23.
Kaiwhakawā me ngā kaimahi o te kaupapa items.
Waiata whakanui Aotea whānui = Patea - Ngoingoi
Haka whakanui Te Arawa
Haka kakapinga mihi ki ngā kapa o Aotea Whānui.
Tēnā mātakitaki mai, ps.hope it makes smile
Whakawātea: he Mana Māori Motuhake
He kupu whakaaraara nā Te Kahautu ki tōna iwi, ki ōna hapū, ki ōna waka kia takatū ake ki te whawhai mō te Tiriti o Waitangi, kia ū kia mau ki te Mana Motuhake, kaua e tukua ahakoa.
Waiata a ringa: Tīaho Mai
He waiata tēnei e whakamoemiti ana ki Te Atua kia tīaho mai he māramatanga ki runga ki te kapa o Ōpōtiki Mai Tawhiti. He waiata e mihi atu ana ki ngā Toherauariki o Ōpōtiki Mai Tawhiti i mate i roto i te tau kua taha ake nei, koia rā ko Ranginui Mitai rātou ko Anaru Rewi, ko Barry Campbell, ko Akuhata Rewi. He waiata e āki ana i te iwi kia kaha te manaaki, kia kaha anō hoki te aroha a tētahi ki tētahi, ka puta ka ora i te maru o Ihowa Atua Ora O Ngā Mano. Mā te tū tahi ka ea ai te wāhi ki a rātou ngā kuru tongarerewa o Ōpōtiki Mai Tawhiti, “Tohenihorautia taku mate, Tohenihorautia taku ora”. He waiata hoki hai whakamihi i a Ngāi Tai me ngā wheinga i waenganui i a Ngā Tai me Te Whakatōhea. He mihi taurangi ki a Mātaatua waka.
Haka: Ranginui Walker
He haka tēnei e whakanui ana i a Tākuta Ranginui Walker, he uri nō Te Whakatōhea, he rangatira o Te Ao Māori. Ko Ranginui i pakeke mai i ngā rekereke o ōna mātua, o ōna tīpuna anō hoki ki roto o Ōpōtiki. Ka tukuna ia ki Tāmaki ki Te Kāreti o Hato Pētera nōna e tamariki ana. Ka eke a Ranginui ki ngā taumata kairangi o te mātauranga, ā, ka noho hei Ahorangi ki Te Whare Wānanga o Tāmaki mō te rōanga o ngā tau.
Nā Ranginui i werowero te ao Pākehā me te Kāwanatanga ki te whakamana i te Tiriti o Waitangi. I kīa a Ranginui he kaikiri, engari ko tāna he whawhai mo te mana motuhake o te iwi Māori. Nāna i tuhi te pukapuka rongonui “Ka whawhai tonu mātou ake, ake.” He pukapuka e whakamārama ana i ngā takahitanga a Te Kāwanatanga i te Tiriti o Waitangi, i ngā tohe a te iwi Māori ki Te Kāwanatanga ki te whakamana i te Tiriti o Waitangi. Nā Ranginui i akiaki Te Kāwanatanga ki te whakamana i te Tiriti o Waitangi, i konā ka ara ake ko Te Rōpū Whakamana i Te Tiriti o Waitangi. Ko Ranginui tērā, ko tōna rite ki a Ranginui te atua e tū iho nei.
Whakawhiti: Ranginui Mitai
Ko tēnei whakawhiti hai poroporoākī i a Richard Ranginui Mitai i mate ohorere i te 20 o Tīhema 2022, e 57 tau te pakeke. Ko ngā kupu i takea mai i ngā mahinga me ngā whakawhitinga kōrero i waenganui i a rāua ko te kaitito a Te Kahautu Maxwell. I pakeke tahi rāua ki runga o Terere Pā, te marae o te hapū o Ngāti Ngahere, Te Whakatōhea. I kura tahi rāua ki Papatewhai, ka rua ki Te Kāreti o Ōpōtiki, ā, i roto hoki i ngā mahi whutupōro me ngā mahi kapa haka i te kura. Ā pakeke noa rāua ka mahi tahi ki te kapa haka nei o Ōpōtiki Mai Tawhiti. He mātanga haka a Ranginui, koia hoki te tohunga pūoro mō Ōpōtiki Mai Tawhiti. Nā rāua ko tana hoa rangatira a Shelley ā rāua tamariki i whakapakeke mai ki roto i te ahurea waiata me te pūoro anō hoki. Ā i ēnei rā kua tū mai ko ā rāua tamariki hai kaihautū mo te kapa o Ōpōtiki Mai Tawhiti. He tangata aroha, he tangata whakapono. Ko tāna ki a mātou; Whakapono! Whakapono! Whakapono!
Poi: Te Huikau
He poi tēnei i titoa ki te whakanui i a Blythe Te Huikau Rogers i mate i te hūrae o te tau 2021. Koia rā tēnei ko te whakaara anō i ōna kura, i ōna kupu tohutohu ki ana tamariki, mokopuna wāhine o tana kapa o Ōpōtiki Mai Tawhiti. Ko Blythe tētahi o ngā kaiako o te kapa haka o Ōpōtiki Mai Tawhiti i roto i ngā tau 2015-2019. He tohu aroha tēnei waiata nā tōna kapa haka a Ōpōtiki Mai Tawhiti me tana tungāne, hoa pūmau a Te Kahautu Maxwell ki a ia.
Mōteatea: Tērā te haeata
He pitopito kōrero te whai ake nei;
Ko te mōteatea nei i titoa e Te Kooti i te wā i tūtaki ā kanohi tonu nei rāua ko te rangatira nei o Ngāi Tai, te tangata Kāwana a Wiremu Kīngi (Te Kawau) i te tau 1887. I konā ka aukatia a Te Kooti e Wiremu Kingi i a ia e haere atu ana ki te tā i te kawa o te whare o Te Poho o Apanui ki Maraenui. Kīhai rawa a Wiremu Kīngi i te mōhio ko Te Kooti tonu tērā, te ito o tana aukati. Ka kupu whakaaritia e Te Kooti te whakapono a te rangatira o Te Whānau a Apanui a Paora Ngāmoki. Ahakoa he Ringatū a Paora Ngāmoki ka motu i a ia tana whakapono, ka ngākau rua ōna uri ka huri hai Katorika, anā kei te pērā tonu.
Ko tā te kōkā a Blythe rāua ko Kui Ema Rogers hiahia ki te whakaara ake.
Anā i te tau i mua tonu i te matenga o Blythe ka whakatinanatia te manako o Ema ka waihangatia e Te Kahautu rāua ko Blythe he rangi. Ko te tīmatanga tērā o te whakaara ake i te mōteatea nei. Kātahi ka kawea mai ki te kapa o Ōpōtiki Mai Tawhiti, ki te Hāhī Ringatū, ki tana iwi ki Te Whakatōhea anō hoki
Whakaeke: Pinepine te kura
I titoa tēnei e Te Kahautu Maxwell hai whakaeke mō Ōpōtiki Mai Tawhiti. He kupu whakamihi ki ngā tīpuna, ngā whakapapa, me ngā tūtohu whenua e tuitui nei i ō mātou herenga o Te Whakatōhea ki a Ngāi Tai. Ka whakamihia a te Tawhiro Maxwell, i Tohenihorau kia ora tonu ai te reo mā ēnei whakatipuranga, ā, koia ka tīkina atu te kupu whakataukī o Te Kāreti o Ōpōtiki kōrero “Ko te hinengaro te tohu” hai kupu māna. He kura māhita tawhito o te kāreti, uri o Ngāi Tai, uri o Te Whakatōhea. Ka whakaarahia ake tō mātou tamaiti, parata hoki a Akuhata Rewi kua mate nei i riro i te 11 o Huitanguru o tērā tau he wiki tonu i mua i te whakaeke atu a Ōpōtiki Mai Tawhiti ki te papa tū waewae o Te Matatini i tū ki Te Anawai, Tāmaki Makaurau. Ko tā te kapa nei he tangi tangi ki ōna mate, he mihi ki ōna uri.
Waiata Tira: Aroha
He waiata tēnei i titoa e Te Kahautu mā te kapa o Ōpōtiki Mai Tawhiti ki te hiki i te wairua o te iwi Māori katoa. Nō reira ko tēnei waiata, e whakaara ana i te nui o te aroha o Te Kapa Haka o Ōpōtiki Mai Tawhiti ki te tangata ahakoa ko wai, ahakoa nō wai, ahakoa nō hea. Ko ngā kupu kei roto i ngā karaipiture e mea ana; me aroha koe ki te tangata ānō ko koe; me utu te kino ki te pai. Nō reira kia ū ki te aroha, arohatia te tangata anō nei ko koe tonu.
