Letio Tonga o Aotearoa

Letio Tonga o Aotearoa Kaveinga ngaue 'ae Letio. Ke lalanga 'ae mo'ui kakato 'ia kalasi. Letio 1593AM Tamaki Makurau, Aotea

19/12/2024

Fakamonu'ia 'o e 'Aho.
'Aisea 42:10-18.
'Oku uki e fakatupu 'a e kelekele, tahi ngaahi motu pea mo e kakai ke nau fai 'a e hiva fo'ou ki he 'Eiki koe'uhi ko 'ene ngaahi ngaue.
'Oku 'omi 'a e fakatātā 'o e lotu fakatahataha. Mei he fonua ki tahi, 'oku fakaafe'i 'a e taha kotoa pe ke kau 'i hono fakafeta'ia 'o e 'Eiki. Ko e fakamanatu 'eni ko e Kikisimasi 'oku 'ikai ko ha fiefia fakafo'ituitui pe, ka 'oku kau ki ai 'a mamani katoa. Ko e 'alo'i 'o Kalaisi 'a e Misaia, ko e ongoongolelei ia ki mamani mo e fakatupu katoa.
'I he 'etau teu ki he Kilisimasi, ke tau fakalaulauloto ki he 'etau lotu 'oku fai. 'Oku tau foaki ki he 'Eiki 'a e fakafeta'i 'oku fo'ou, pe 'oku tau hela'ia mo vaivai ke fai e fakafeta'i? Tuku ke hoko e fiefia 'o e faha'ita'u ke ne fakafo'ou ho tau loto ke tau hiva ha hiva fo'ou ko e fakafeta'i mo e hounga'ia he me'a'ofa 'o e fakamo'ui kuo tau 'inasi ai.
'Oku toe hā pe foki he folofola ni ko e 'Otua ko e helo ko e pate'i 'oku ne ha'u ke fakamaau pea ke fakaake. Ko e fakamanatu ia 'i he hoko mai 'a Sisu 'a 'e 'oku tau teu ke fakamanatua 'oku 'ikai ko e fakamo'ui pe, ka ko e Tu'i 'oku ne ikuna. Ko 'ene misiona ke ikuna'i e angahala, fakapo'uli mo mate. 'I he 'etau fehangahangai mo e ngaahi faingata'a 'o e mo'ui, fakalaumalie, 'atamai mo e sino, ke tau nonga pe he 'etau 'ilo'i ko ho tau 'Otua 'oku ne tau ma'a kitautolu. Ko e Kilisimasi ko hono fakahaa'i mai ia ko e ikuna 'oku 'a tautolu ia makatu'unga 'ia Kalaisi.
'Oku palomesi 'a e 'Otua te ne taki e kui pea liliu e po'uli ke maama pea ke fakatokalelei e tokatamaki. Ko e fakakaukau faka'ofo'ofa ia 'o e fakamo'ui mo e 'amanaki 'oku hoko mai mo e Kalaisi. Ko e 'alo'i mai 'o Kalaisi 'oku ne fakamaama e halanga 'oku fou ai 'a kinautolu 'oku fakapo'uli fakalaumalie 'o ne fai ho nau tataki, fakamo'ui pea mo honau fakaake.
'I he ngaahi 'aho si'i 'oku toe ki he Kilisimasi tau fakaava mu'a ho tau loto 'a e ngaahi 'elia 'oku fiema'u ke ulo ai 'ene maama. Ko e hā feitu'u 'oku tau ongo'i hē ai mo kui? Ko fe feitu'u 'oku tau fiema'u ai 'ene tataki? Falala te ne malava ke tataki mo faimo'oni ma'a kitautolu.
Ko e hā ho'o hiva fo'ou 'oku teu he Kilisimasi ko 'eni? 'Oku ke falala ki he 'Eiki ke ne tau ma'au? Ko e ha e feitu'u 'oku tau fiema'u ke ulo ai 'ene maama he 'etau mo'ui?
Ma'u ha 'aho lelei. Ke tapuaki'i mai koe 'e he 'Eiki.

18/12/2024

Fakamonu'ia 'o e 'Aho.
Saame 80:1-7
'Oku tangi e Saame ni ki ha fakaake, pea 'oku fe'unga pe ia mo 'etau fononga 'i he fa'ahi ta'u 'o e 'Etiveni, he 'oku tau tatali ai ki he hoko mai 'a e Kalaisi, ko Ia 'a e taha totonu 'ke ne ne fakahoko 'a ho tau fakaake.
'Oku tautapa 'a e Saame ki he 'Otua ko e Tauhisipi 'o 'Isileli, ke ulo mai hono fofonga ki hono kakai 'o fai ho nau fakahaofi. 'Oku 'omi 'e he Saame ni e faka'amanaki, ki ha tokoni mei he 'Otua, pea 'oku ne faka'amu ke hoko mai e 'Otua 'o nofo 'i ho nau lotolotonga. 'A ia ko e fakakaukau ia 'o e Kilisimasi 'i he 'etau katoanga'i e hoko mai 'a Kalaisi ko e 'Imanuela, 'Otua 'i ho tau lotolotonga.
'I he 'etau teu ki he Kilisimasi ko e 'Otua ko e Tauhisipi leleii ia mo 'ofa ki hono kakai. Ko Ia na'ane tataki 'a Siosifa 'o hange ko ha fangasipi. Ko e tangi ni 'oku 'ikai ko e ui pe ki ha tokoni, ka ko e kole ke hiki fu'u mai e 'Otua 'o nofo mo kinautolu ke fai ho nau malu'i mo ho nau tataki.
Ko e Kilisimasi ko hono tali ia 'o e tangi 'oku fai ko e foaki mai e me'a'ofa ko hono 'Alo ko Sisu ko e Tauhisipi Lelei ia. Ko e hoko mai 'a Sisu ke toe fakaake e me'a kuo maumau, mo 'omi e maama ki he fakapo'uli, pea mo tataki hono kakai ki he mo'ui.
Ko e faka'amu e Saame ni ke fakaake kinautolu pea ulo mai hono fofonga 'o fai ho nau fakamo'ui. Tuku e Saame ni ke ne teuteu'i ho tau loto he 'etau teu ki he Kilisimasi. Ko e fakamanatu ke tau kumi ki he maama mo e fakaake 'a e 'Otua ma'a 'etau mo'ui, 'o falala ki he fu'u ivi 'o 'ene fai fakamo'ui. Ko e ha ha konga ho'o mo'ui 'oku fiemau ke fakafo'ou he faaha'ita'u 'o e Kikisimasi? 'E anga fēfē ho'o teuteu ho loto ke ma'u e maama 'a Kalaisi he 'Etiveni?
Kole ki he 'Otua ko e Tauhisipi Lelei ke ne fakafo'ou mo fakaake kitautolu he teuteu 'oku tau fai. Pea ke ulo mai 'ene maama kia kitautolu ke tau mo'ui ai, pea ke ne hoko mai foki 'o 'alo'i 'i ho tau loto.
Ma'u ha 'aho lelei. Ke tapuaki'i mai koe 'e he 'Eiki.

17/12/2024

Fakamonu'ia 'o e 'Aho.
Malakai 4:1-6.
'Oku tapuni 'aki 'e Malakai 'ene tohi 'a e fo'i palofisai ko e tautea mo e faka'amanaki. 'Oku fakahā 'ehe 'Otua 'oku tu'unuku mai e 'aho ko e polepole mo e faikovi 'e fakamaau'i. 'Oku nau hange ha veve he loto ngoto'umu pea 'e 'ikai toe tuku hano va'a pe ha aka.
Ka ko kinautolu 'oku 'apasia ki he huafa 'o e 'Otua, 'oku 'i ai e palomesi mo e langa hake, 'e hopo 'a e la'a 'o e totonu kiate kinautolu he 'oku 'i ai e faito'o 'i hono ngaahi huelo.
Ko e palofisai ko 'eni 'oku tuhu ia kia Sisu Kalaisi, ko e la'a ia 'o e totonu. Ko e Kilisimasi 'oku tau katoanga'i ai 'a 'ene hoko mai, he fakapo'uli 'o e po ne malama ai 'a e maama 'o ne 'i ho tau lotolotonga, ko e 'Otua 'ia kitautolu. Ne 'ikai hoko mai 'a Kalaisi ke fakamaau'i leva 'a mamani, ka ne ha'u ke ne foaki mai 'a e fakamo'ui, faito'o mo 'omi e faka'amanaki ki he mamani kuo maumau.
Hange pe ko e a'u mai e huelo 'o e la'a 'o mafana ai e me'a mo'ui kotoa pe, mo fakafo'ou ai e mamani, 'oku pehe mo e hoko mai 'a Kalaisi mo e faito'o fakalaumalie ki ho tau loto. 'Oku ne fakalelei'i e maumau kuo fakahoko 'e he angahala 'i he 'etau mo'ui fakafo'ituitui, famili mo e komiuniti, 'o ne 'omi e fakalelei ke lelei ai hotau vā mo e 'Otua pea ke ne fakakakato e lea 'a Malakai ke tau fononga ai ki ha kaha'u 'oku lelei.
'Oku fakamanatu 'e Malakai e fatongia 'o Sione Papitaiso mo e 'Ilaisiā ka hoko mai. Teuteu e ha'ele'anga 'o e Misaia. Ko e fekau 'a Sione Papitaiso ko e fakatomala, ko e fakafoki e loto 'o e tangata ki he 'Otua he 'ene talitali kia Kalaisi. Ko ia ko 'etau teuteu ki he Kilisimasi ko 'etau fakalaulauloto, fakatomala pea faka'atā ha loki 'i ho tau loto ki he Tu'i 'o e ngaahi tu'i.
Kuo ke a'usia nai e huelo 'o e fakamo'ui 'a Kalaisi mo 'ene faitotonu 'i ho'o mo'ui? 'I he 'etau katoanga'i 'a e fuofua hoko mai 'a Kalaisi he Kilisimasi, 'e anga fēfē ai 'etau teuteu ki he 'ene toe ha'ele mai ko e fakamaau 'o mamani ko hono tu'o ua? 'Oku 'i ai nai ha maumau 'i ho'o mo'ui 'oku ke fiema'u ai e fakamo'ui 'a Kalaisi he Kikisimasi ko 'eni?
'Oku tau katoanga'i he Kilisimasi 'a e hoko mai 'a e maama 'i he po'uli pea ke ne teuteu'i kitautolu ki he fiefia 'oku ta'engata 'iate Ia.
Ma'u ha 'aho lelei. Ke tapuaki'i mai koe 'e he 'Eiki.

16/12/2024

Fakamonu'ia 'o e 'Aho.
Nomipa 16:20-35.
'I he 'etau teuteu ki he Kilisimasi ko e faha'ita'u ia 'oku tau katoanga'i ai e ofa 'a e 'Otua mo 'ene kelesi fakafou mai 'i he 'alo'i mai hono 'Alo ko Kalaisi. 'Oku fakahā mai he lesoni 'o e 'aho ni 'a e 'ulungaanga 'e taha 'o e 'Otua ko 'ene ma'oni'oni. Ko e fakafepaki ko 'e 'a Kola, Tētani mo 'Apilami kia Mosese mo 'Elone he tu'unga fakataki, ko 'enau fakafepaki ia ki he mafai 'o e 'Otua.
Ko e tali 'a e 'Otua ki he fakafepaki ko 'eni ne vave 'aupito 'ene fakamaau'i mo fakailifia, he na'e folofua mo'ui pe 'a e fu'u kakai ko ia 'e he kelekele. 'I he folofola ni hange 'oku fehangahangai ia moe laumalie 'o e fiefia, mo e melino 'o e Kilisimasi, ka 'oku ne hulu'i mai e 'uhinga 'o e hoko mai 'a Sisu ki mamani.
Ko e tali mo e fakamaau 'a e 'Otua ki he angahala 'oku ne fakahaa'i ai 'a 'ene ma'oni'oni. Ko e angahala 'oku ne vahe'i 'a e tangata mei he 'Otua, pea kuo pau ke fai hono fakamaau'i. Ko e talangata'a 'a Kola, 'oku ne fakamanatu mai ko e angahala 'oku 'ikai ko ha'ate tōnounou fakafo'ituitui pe ka ko e maumau'i 'a e fokotu'utu'u 'a e 'Otua. 'Oku tuhu ai 'a e Kilisimasi ki he tali, ko e hoko mai 'a Sisu ke ne fua ho tau tautea he 'etau fai angahala 'o ne fai ai ho tau fakalelei mo e 'Otua ko e ma'oni'oni.
Hange pe ko hono tala 'e Mosese ki 'Isileli ke nau mavahe mai mei he ngaahi teniti 'o e kau pau'u. 'Oku pehe pe 'etau teu ki he Kilisimasi, 'oku uki ai kitautolu ke tau sivi ho tau loto mo 'etau mo'ui. 'Oku 'i ai nai ha mo'ui fakafepaki ki ho tau kau taki, ha mo'ui polepole ko ha'a tau lava me'a, pe talangata'a ki he finangalo 'o e 'Otuaa, 'oku fiema'u ke tau tukuange atu he 'etau teuteu ke katoanga'i e hoko mai 'a Kalaisi?
Neongo ko e fakamaau 'eni 'a e 'Otua 'oku hā he talanoa ni, ka 'oku toe tuhu pe talanoa ki he fai meesi 'a e 'Otua. He na'e 'ikai ke faka'auha kotoa pe, he ko kinautolu na'a nau fanongo pea talangofua ki he tala mo e fakatokanga 'a Mosese ke nau mavahe mai, na'a nau hao pe 'o mo'ui. 'Io ko e me'a tatau pe ia 'oku hoko 'i he hoko mai 'a Kalaisi, 'oku fakaa'u mai ai 'e he 'Otua 'ene Meesi kia kinautolu te tau tafoki ange kiate Ia 'i he fakatomala mo e tui.
'I he 'etau teuteu ki he Kilisimasi tuku mu'a e folofola 'o Nomipa ke ne fakamanatu mai e nunu'a 'o e angahala pea mo e fu'u me'a'ofa mahu'inga ni 'o e feilaulau kuo fai 'e Kalaisi. Ne 'alo'i mai 'a Sisu ke ne fua 'e Ia ho tau tautea ne tuha mo totonu ma'a kitautolu, ka ne foaki mai e mo'ui mo e 'amanaki ma'a kitautolu. Tuku mu'a e faha'ita'u ke fakafo'ou ai 'etau tukupā ki he 'etau muimui, ke fai e finangalo 'o e 'Otua pea ke tau mavahe mai mei he ngaahi me'a 'oku ne ta'ofi kitautolu mei he 'etau feohi mo e 'Otua.
'I he 'etau teu ki he Kilisimasi, ke tau fakalaulaulotoa mu'a 'a e loloto 'o e 'ofa 'a e 'Otua he 'ene fekau'i mai hono foha ke fakamo'ui kitautolu mei he 'etau angahala. Tuku mu'a ke tau laka 'o talangofua pea ke tau mavahe mai mei he ngaahi feohi 'oku kona ai 'etau mo'ui mo 'ikai hoifua mai ki ai 'a Kalaisi ka tau mo'ui.
Ma'u ha 'aho lelei. Ke tapuaki'i mai koe 'e he 'Eiki.

15/12/2024

Fakamonu'ia 'o e 'Aho.
'Aisea 11:1-9.
Ko e palofisai 'o e faka'amanaki ka ko hono tā mai 'o e fakatātā 'o e hoko mai 'a e Misaia, ko Sisu Kalaisi 'o ne 'omi 'a e melino mo e fakafo'ou ki he mamani kuo maumau.
Ko e huli mei he aka 'o Sese, ko e taipe ia 'o e fakafo'ou mo e 'amanaki hange ko 'etau fehangahangai mo e faingata'a. Ko Sese ko e Tamai ia 'a Tu'i Tevita 'io 'oku ne fakafofonga'i mai 'a e laine 'o Tevita. Pea ko e palomesi ia 'a e 'Otua 'oku 'ikai ke ta'e hoko. Na'a mo e hange 'oku mate pea mo 'ikai ha 'amanaki ''i mamani 'oku kei hoko pe ai 'ene palomesi. 'Oku 'omi 'e he 'Otua e fakamo'ui mo hono fakakakato 'ia Kalaisi.
'Oku fakamatala ko e Misaia 'oku ne fonu he laumalie 'o e 'Eiki, 'oku ne 'ilome'a, laumalie 'o e fale'i mo e 'ilo'i 'o Sihova mo e 'apasia ki ai. Ko e naunau ia 'o Kalaisi, ko e p**e pea 'oku ne tataki 'i he poto mo'oni mo e fakamaau totonu. Ko kitautolu 'oku kau he muimui 'o Kalaisi 'oku tau ma'u laumalie ma'oni'oni. Ko e pole ke tau falala ki he laumalie mo 'ene tataki he 'etau ngaahi faitu'utu'uni mo 'etau ngaahi ngaue 'o tuku ki he 'Otua ke ne tataki kitautolu ke tau poto he 'ofa mo e mo'ui faitotonu.
'Oku fakamatala ki ha mamani 'oku fekaukau'aki e me'a kotoa pe, he 'e kai fakataha 'a e kau mo e pea fefine pea 'oku nau fe'ofo'ofa ni pea 'e 'ilo'i 'e mamani 'a e 'Eiki. Ko e visone ia 'o e nofo melino mo e fakafo'ou 'oku hoko mai mo Kalaisi 'i hono p**e'anga.
Neongo hange 'oku tau nofo 'i ha mamani 'oku mama'o 'aupito mei he visone, ka 'oku ui 'ai kitautolu ke tau hoko atu ko e kau fakafofonga 'o e melino 'o hā atu 'a e p**e'anga 'o e 'Otua 'i he 'etau ngaahi feohi, 'i he Komiuniti mo etau ngaue.
Ma'u ha 'aho lelei. Ke tapuaki'i mai koe 'e he 'Eiki.

12/12/2024

Fakamonu'ia 'o e 'Aho.
'Emosi 8:4-12.
'Oku kei ui ai pe kitautolu ke tau teuteu fakalaumalie ki he Kilisimasi. Ko e faha'ita'u 'o e katoanga mo e manatua 'e 'alo'i mai 'o Kalaisi. 'Oku fakamanatu mai 'e 'Emosi 'a e mahu'inga 'o e mateuteu fakalaumalie. Pea 'oku hanga 'e he folofola ko 'eni 'o pole'i kitautolu ke tau sivi'i ho tau loto mo 'etau ngaue he maama 'o e ma'oni'oni 'a e 'Otua.
'Oku fakatokanga 'e he palofita 'Emosi 'a e tautea 'e hoko ki 'Isileli he 'enau manumanu, ta'efaimo'oni mo e ta'etokanga ki he masiva. Kuo nau tafoki mei he kovinanite 'a e 'Otua 'o nau tokanga ange ki he ngaahi me'a 'o e matelie kae 'ikai tokanga ki he fakamaau totonu mo e haohaoa. Pea kuo nau tokanga ange ke nau tu'umalie pea kuo nau kui fakalaumalie 'o fakatupunga ai 'a e honge, 'o 'ikai 'i he mā mo e vai, ka ko e honge he 'ikai ke nau toe fanongo ki he le'o 'a e 'Eiki.
Ko e honge ko e fakamamahi lahi ia he 'oku ne fakahā ko e sosaieti ko 'eni kuo nau mama'o mei he 'Otua, pea 'ikai ke nau kei 'ilo'i e le'o 'o e 'Otua pea mo 'ene tataki.
'Oku fiema'u ke tau ki'i tu'u hifo 'o fakafanongo ki he le'o 'o e 'Otua. 'I he lotolotonga 'o e longoa'a 'o e teuteu ki he Kilisimasi, pea 'oku faingofua ke tau mo'umo'ua he teu he kumi e ngaahi me'a'ofa he sopingi, pea mo hono ngaahi fakafiefia mo e katoanga. Hange ko e kakai 'Isileli, 'oku tau tokanga ange ki he ngaahi me'a 'o e matelie kae 'ikai tokanga ki he ngaahi me'a fakalaumalie. Tuku ki he folofola 'o e 'aho ni ke ne fakamanatu mai kia kitautolu ke tau ki'i tu'u hifo 'o fakakaukau. 'Oku tau faka'atā nai ha konga he 'etau mo'ui ke tau fanongo ai ki he folofola 'a e 'Otua he 'etau teuteu 'oku fai?
'I he 'etau teu ki he Kilisimasi mo e hoko mai 'a Kalaisi 'oku fakamanatu mai ne 'alo'i 'a Sisu he 'ai'angakai 'o ne kau fakataha ai mo e masiva, ka 'oku ne ha'u foki mo e ongoongolelei ki he popula. 'E anga fēfē 'etau fakahaa'i atu 'a e 'ofa 'a Kalaisi kia kinautolu 'oku nau fiema'u ia?
'I he 'Etiveni 'oku tau tatali mo teuteu. Hange pe ko hono tala 'e 'Emosi 'e hoko mai e honge fakalaumalie, ko ia 'oku ui ai kitautoku ke teuteu ho tau loto ke 'oua na'a tau he mama'o pea 'ikai ongona e le'o 'o e Otua. Fai e lotu lilo, lau e folofola pea kau he ngaahi ma'unga kelesi ke tau 'ilo'i e 'uhinga totonu 'o e Kilisimasi. Ko 'Imanuela ko e 'Otua 'ia kitautolu.
Ma'u ha 'aho lelei. Ke tapuaki'i mai koe 'e he 'Eiki.

11/12/2024

Fakamonu'ia 'o e 'Aho.
'Aisea 12:2-6.
Ko e himi 'eni 'o e fakafeta'i mo e fakamālō ki he faimo'oni mo e fai fakamo'ui 'a e 'Otua. Ko hono fakahaa'i 'eni 'a e falala mo e fiefia 'i he 'Eik, he 'ene palomesi, he te ne toe fakafo'ou hono kakai. 'Oku fakaafe'i mai kitautolu 'e he folofola ni ke tau manatua ko hai 'a e 'Otua, pea ko e hā 'etau mahu'inga 'ia he ngaue 'oku ne fai 'i he 'etau mo'ui.
Ko e 'Otua ko ho tau fakamo'ui ia. Ko ho tau fakamo'ui 'oku 'ikai ko ha me'a 'oku tau ngaue'i pe fakatau mai, ka ko e me'ofa 'a e 'Otua ma'a kitautolu fakafou mai he 'ene kelesi. Ko e falala ki he mo'oni ko 'eni, 'oku 'osi ai e ilifia ka 'oku ma'u ai e lotolahi. 'Oku 'i ai ha konga 'o 'etau mo'ui 'oku puke tu'ua 'e he ilifia? 'Oku fakalotolahi mai 'a 'Aisea ke 'ave 'etau tokanga ki he tokotaha 'oku ne lava 'o fai ho tau fakamo'ui mo ho tau malu'i.
Mou touvai mei he ngaahi matavai 'o e mo'ui. Ko e fakamahino ia 'o e fo'ou 'o e mo'ui 'oku ma'u mei he 'Eiki. Hange pe ko e mahu'inga 'o e vai ki he mo'ui, 'oku pehe pe mo e mahu'inga 'a e fakamo'ui 'a e 'Otua ki he 'etau mo'ui. 'Oku tau 'utu faka'aho mei he Vai 'o e Mo'ui he 'etau lotu lilo, lau e folofola mo e fakafeta'i?
'Oku ui kitautolu 'e he folofola ke tau tali 'a e lelei 'o e 'Otua, mo fakahā atu hono huafa ke 'ilo 'e he taha kotoa pe. Ko e fakafeta'i 'oku 'ikai ke fai fakafo'ituitui pe ka 'oku toe kau atu foki mo e kakai kotoa pe. 'I he 'etau a'usia e fakamo'ui 'a e 'Otua 'oku 'otometiki pe 'ene tafe atu 'a e tapuaki ko ia 'i he 'etau talaloto ki he taha kotoa pe. Ko hai ia ha taha 'i ho'o mo'ui 'oku ke 'ilo'i 'oku ne fiema'u ke fanongo ki he nonga mo e fiefia 'oku ke ma'u 'i ho'o 'ia Kalaisi?
'Oku fakamulituku 'aki 'e he Saame 'a 'ene fakaafe ke tau hiva kailavaki, tā ha'ape, fakaulu mo mavava he 'oku 'ia kitautolu 'a e 'Otua ko e taha lahi, ko e tapuhā ia 'o 'Isileli. Ko e fakamanatu ia 'o e 'Imanuela, ko e 'Otua 'ia kitautolu. Ko ia 'oku tau teu ke fakamanatu. 'Oku aka 'etau fiefia he 'etau 'ilo'i e ngaue 'oku fai 'e he 'Otua he 'etau mo'ui pea pehe foki ki he 'etau 'ilo'i 'oku ne 'i ho tau lotolotonga. 'Oku tau fakakaukau pehe nai mo 'ilo'i 'oku ne 'ia kitautolu? Tau falala ki he 'Otua 'o 'osi ai e manavāhē, kumi e fakafo'ou mei he 'ene folofola, fakahaa'i atu hono huafa ki he taha kotoa pe, pea tau fiefia he 'ene 'ia kitautolu. Ko e teuteu ia 'oku tau fai he faha'ita'u 'o e 'Etiveni ki he 'aho fakamanatu e hifo 'a e 'Otua 'o tangata he Kilisimasi.
Ma'u ha 'aho lelei. Ke tapuaki'i mai koe 'e he 'Eiki.

10/12/2024

Fakamonu'ia 'o e 'Aho.
'Aisea 35:3-7.
'Oku 'omi 'e he folofola 'o e 'aho ni ha faka'amanaki mo ha fiefia ki he fononga 'oku tau fai he 'Etiveni ki he Kilisimasi. He 'oku ne 'omi 'a e fakatātā 'o e ivi fakamo'ui 'o e 'Otua he 'oku ne liliu 'a e toafa pakukā ko e ngoue mo'ui pea fakalotolahi'i 'a e ilifia mo e vaivai ke lotolahi. 'Oku fakaafe'i ai kitautolu ke tau sio ki he hoko mai 'a Kalaisi te ne fakakakato 'a e ngaahi palomesi 'a e 'Otua. Ko e taimi ia 'e fiefia ai e fakatupu pea a'usia ai 'e he fa'ahinga 'o e tangata 'a e fakamo'ui mo e fakafo'ou.
'Oku ne fakalotolahi'i e lotosi'i, 'a e nima vaivai mo e tui 'oku tete 'oku ne pukepuke ia. Pea ko 'ene lea ke fakama'u hifo, 'oua 'e manavahē he vakai ko ho mou 'Otua 'ena 'oku ha'u. 'Io ko e 'Etiveni ia 'oku fakamanatu mai 'oku 'ikai ke ngalo 'i he 'Otua 'a hono kakai. 'I he tatali 'oku tau fai, 'oku fakalotolahi mai e 'Otua ke tau fefaka'ai'ai 'aki tautautefito kia kinautolu 'oku vaivai mo lotosi'i. Ko e Kilisimasi ko e fekau 'o 'Imanuela, ko e 'Otua 'ia kitautolu, 'oku ne hoko mai mo e fakamo'ui 'o 'ikai ko ha 'Otua pe 'i he mama'o, ka 'oku ne laka 'i ho tau lotolotonga he ngaahi faingata'a 'oku tau mo'ua ai.
Ko e fakamo'ui ia, mo ho tau fakakakato, he te ne faka'ā e mata 'oku kui pea fakaava mo e telinga 'oku tuli, pea hopo 'a e heke hange ka tia pea 'e kalanga mo e noa 'i he fu'u fiefia. Ko e 'ata 'eni 'o e ngaue 'e fakahoko 'e Sisu he 'ene 'i he 'ene 'i mamani. He ko e hoko mai 'a Sisu 'oku ne ha'u mo e fakamo'ui 'o 'ikai ki he sino pe ka mo e laumalie foki. Ko e 'Etiveni ko e taimi 'o e fehu'i hifo pe kia kitautolu fakafo'ituitui, ko fe konga he 'eku mo'ui 'oku fiema'u ai e nima fakamo'ui 'o e 'Eiki? 'I he 'etau teuteu ki he Kilisimasi tau ha'u mo ho tau ngaahi faingata'a'ia kia Sisu mo e loto 'oku falala kakato kiate Ia, 'i he 'ilo pau ko Ia te ne fai ho tau fakakakato.
Te tau ma'u ha liliu 'oku fiefia. 'E pā 'a e vai he lala mo e 'Alapā. Ko e 'imisi 'eni 'o e hoko e fu'u toafa 'o mo'ui ka ko e taipe ia 'o e fakafo'ou 'e fai 'e Sisu ki ho tau loto. Hange pe ko e fiefia 'a e kelekele pakukā he 'uha, 'oku pehe pe 'a e fiefia mo e fakafo'ou ho tau loto he 'ia kitautolu 'a Kalaisi. 'Oku fakamanatu mai heni 'oku 'ikai ha tu'unga ia 'e faingata'a 'i he 'etau mo'ui ki he 'Otua mo hono fu'u malohi.
Ko ia tau teuteu ho tau loto, he 'oku hange pe ko e fiema'u 'e he toafa 'a e vai, 'oku pehe 'a e fiema'u ke tau faka'atā ho tau loto ki he vai 'o e mo'ui ko Kalaisi. 'I he femo'emo'ekina 'o e teu e Kilisimasi foaki ha tau taimi ke tokonia mo hiki hake e mo'ui 'a kinautolu 'oku nau fiema'u e tokoni. Pea ke tau fiefia 'i ho tau fakamo'ui. Tuku e 'amanaki 'o e palofisai 'a 'Aisea ke ne fakafonu mo fakalotolahi'i kitautolu he 'etau nofo 'aki tali ki he teu e 'alo'i mai 'a Sisu.
Ma'u ha 'aho lelei. Ke tapuaki'i mai koe 'e he 'Eiki.

09/12/2024

Fakamonu'ia 'o e 'Aho.
Saame 126.
Ko e Saame 'eni 'o e 'alu hake, ko e hiva ne ta'anga 'aki 'e he kau pilikimi he 'enau fononga ki Selusalema. 'Oku ne talanoa ki he hounga'ia mo e fiefia 'a e kakai he 'enau manatu ki ho nau fakahaofi mo hono toe fokotu'u hake kinautolu 'e he 'Otua. 'Oku kamata pe Saame mo 'ene manatu melie ki hono liliu 'e he 'Eiki 'a e popula 'o Saione ne hange ko ha'anau misi pe. He na'a nau fakatumutumu pe ko e mo'oni ko ā, ka kuo mo'oni 'enau misi, pea kuo nau mo'u kata pe mo hiva 'i he fiefia.
'I he 'etau fononga he vaa'ihala 'o e 'Etiveni 'o teu ki he Kilisimasi, 'oku lea mai e Saame ni ki he fai fakamo'ui 'a e 'Otua fakafou mai 'i hono 'Alo ko Sisu Kalaisi. Ko e 'Etiveni ko e faha'ita'u 'o e tatali mo e unaloto, ko e taimi 'o 'etau fakalaulauloto ki he maumau kuo hoko 'i he mamani, pea mo 'etau fiema'u ha fakamo'ui. Hange pe ko e fiema'u 'e 'Isileli ke fakamo'ui kinautolu, 'oku pehe tofu pe 'etau faka'amu ke kau mai e 'Otua 'i he 'etau mo'ui pea mo ho tau mamani.
Ko e fiefia 'oku hā he Saame ni 'oku ho'ata mei ai 'a e fiefia ne tala he 'aho 'alo'i 'o Kalaisi. He ne tala 'e he angelo ki he kau tauhisipi, ‘oua ‘e manavahē; he ko eni kuo u ha‘u mo au ha talanoa mālie, ko e me‘a fakafiefia ‘aupito, ko e me‘a ma‘a e kakai ‘Isileli kātoa. He na‘e ‘alo‘i kiate kimoutolu ‘anenai ‘i he Kolo ‘o Tēvita ha Fakamo‘ui, ‘a ia KO E ‘EIKI MĪSAIA. Ko e ngaue lahi ia ne fai 'e he 'Eiki ma'a kitautolu, ko 'ene 'omi e fakamo'ui, melino, mo e faka'amanaki ki he 'etau mo'ui.
'Oku fakamo'oni e Saame ki he fefusiaki e mo'ui 'o e lolotonga ni mo e kaha'u. He neongo 'oku kamata fiefia e Saame ka 'oku ne liliu he 'ene lotu, Liliu ‘emau pōpula, ‘e Sihova, Hangē ko e ngaahi tafenga vai ‘i he feitu‘u ko Tonga. Ko 'etau katoanga fiefia he 'alo'i mai 'o Kalaisi 'oku tau teu ke fakamanatu, ka 'oku 'oku 'ikai ke puli ai 'etau tatali foki ki he 'ene toe ha'ele mai ko hono tu'o ua ke fakafo'ou 'ene fakatupu. Ko 'ene mata ua pehe 'a e sio ki he Kilisimasi 'oku mahu'inga ia he 'Etiveni he 'oku tau katoanga'i 'a e hifo mai 'a Kalaisi, lolotonga ia 'oku tau hohoi ki he 'aho 'e fakakakato ai 'ene ngaue fakamo'ui.
'I he 'Etiveni, ke tau fakalaulauloto ki he faimo'oni 'a e 'Otua, he ngaahi ngaue lelei kuo ne fakahoko ma'a kitautolu. Pea tuku ke hoko 'etau manatu ko ia ke fai ai 'etau fiefia mo e fakafeta'i. Fakapapau'i e ngaahi 'elia he 'etau mo'ui 'oku tau fiema'u ke fakalelei'i 'o 'ave ia ki he 'Eiki 'i he lotu. Pea ke tau vahevahe atu 'etau fiefia 'o hange ko e Saame ni he 'ene fiefia ke vahevahe 'a e fakamo'ui kuo fai 'e he 'Otua ma'a 'Isileli. 'Io ke tau vahevahe atu 'etau fiefia he Kilisimasi ko 'eni mo ho tau kaungā fononga.
Ma'u ha 'aho lelei. Ke tapuaki'i mai koe 'e he 'Eiki.

08/12/2024

Fakamonu'ia 'o e 'Aho.
'Aisea 40:1-11.
'Oku tuhu 'a e folofola ni ki he fakafiemalie, fakafo'ou mo e a'u mai 'a e fakamo'ui 'a e 'Otua. 'I he 'etau teuteu ki he Kilisimasi 'oku hoko 'a e folofola ko 'eni ko e makatu'unga lelei ki he 'etau fakalaulauloto ki he 'amanaki mo e palomesi 'o e 'aho 'alo'i 'o Kalaisi.
'Oku lea fakafiemalie 'a e 'Otua ki hono kakai 'o fakamanatu kia kinautolu kuo fakamolemole 'enau angahala pea kuo 'osi mo honau tautea. Ko e fekau 'o e faka'amanaki mo e fakafo'ou.
'I he fa'ahita'u 'o e 'Etiveni, 'oku fai ai ho tau fakamanatu ki he fiemalie 'oku 'omi 'e Kalaisi ki he 'etau ngaahi faingata'a'ia. Ko 'ene hoko mai 'oku ne fakapapau'i ai 'etau melino mo e 'Otua pea mo e fakamolemole ki he 'etau angahala.
'Oku 'i ai e le'o 'oku kalanga he toafa ke teuteu e ha'ele'anga 'o e 'Eiki, pea fakatonutonu hono 'alunga. Ko e palofisai 'eni ne fakakakato 'ia Sione Papitaiso he na'ane teuteu'i e kakai ki he hoko mai 'a Sisu.
Ko e Kilisimasi ko e taimi 'o 'etau teuteu ho tau loto ki he hoko mai 'a Kalaisi. Ko e ha e 'elia he 'etau mo'ui 'oku fiema'u ke fakatokalelei, mo fakatonutonu koe'uhi ke tau lava ai 'o talitali 'a 'ene hoko mai?
Ko 'etau mo'ui 'oku fakhoa ia ki he musie 'oku mae, ka ko e folofola 'a e 'Otua 'e tu'uloa 'o ta'engata. 'Oku sio 'eni ki he pau e ngaahi palomesi 'a e 'Otua, 'oku fakakakato 'ia Kalaisi. 'Oku fakamanatu mai 'e he Kilisimasi 'a e mo'oni ta'engata 'o e folofola 'a e 'Otua. He kuo hoko 'a folofola 'o kakano, ko e 'amanaki ta'eliliu ia 'oku tau 'amanaki ki ai pea ke tau puke ma'u ki ai.
'Oku fakaafe'i kitautolu 'e 'Aisea ke tau talaki e ongoongo lelei, he ko ho mou 'Otua e! Ko e 'Otua 'oku ne hoko mai mo e mafai ka 'oku ne toe tauhi 'ene kakai hange ha tauhisipi. Ko e Kilisimasi ko e taimi 'o e fakaafe ke tau 'ilo'i ko ho tau 'Otua e 'ia Kalaisi. 'Oku ne malohi pea 'oku ne toe angavaivai, ke fakamaau pea ne toe 'omi kelesi pe ki hono kakai.
Tau ma'u mu'a ha nonga he palomesi 'a e 'Otua, pea teuteu ho tau loto kia Kalaisi, 'o falala ki he 'ene folofola 'o puke ki he langilangi mo e ngeia 'o e 'Otua 'ia Kalaisi. 'I he faha'ita'u 'o e 'Etiveni ko 'eni, tuku 'ene mo'oni ke me tataki kitautolu pea ke fai 'aki 'etau talitali ki he hoko mai 'a e 'Eiki fakamo'ui.
Ma'u ha 'aho lelei. Ke tapuaki'i mai koe 'e he 'Eiki.

07/12/2024

Talitali lelei kimoutolu ki he'etau polokalama he 'aho ni.
Kaveinga: Lalanga 'a e Mo'ui Kakato 'ia Kalaisi

05/12/2024

Fakamonu'ia 'o e 'Aho.
Malakai 3:13-18.
'Oku valoki'i 'e he 'Otua hono kakai koe'uhi ko 'enau ta'etui mo 'enau launga. He kuo nau fehu'ia 'a e 'uhinga 'o 'enau ngaue ma'ae 'Otua pe 'oku kei 'aonga ko ā, koe'uhi ki he 'enau sio hange 'oku lelei ange 'a e mo'ui ia 'a e kau faikovi, ka ko kinautolu ia 'oku tauhi ki he 'Otua, hange 'oku nau faingata'a'ia mo mo'ui mamahi. Ko e fa'ahinga fakakaukau 'eni 'oku kei fekuki pe mo e tokolahi 'o kitautolu he ngaahi 'aho ni, he 'oku tau pehe pe, ko e ha 'oku lelei ange ai e me'a ia 'a e kau faikovi ka e muna mo faingata'a'ia e kau haohaoa ia?
Fakafeta'i 'i he folofola 'o e 'aho ni 'oku fakapapau'i mai ai 'e he 'Otua 'oku ne fakafanongo mai ki he talanoa 'a kinautolu 'oku 'apasia kiate Ia, pea 'oku ne tohi ho nau hingoa 'i he 'ene tohi manatu. 'Io ko e mo'oni ia 'o 'ene 'ilo'i 'a kinautolu 'oku faimo'oni mo 'apasia ange kiate Ia he 'oku ne toka'i 'enau tauhi ange pea 'oku ne fakapale'i 'enau ngaahi ngaue.
'Oku fanongoa 'e he 'Otua 'a e kau faimo'oni, neongo 'a e luma mo e ta'emahino 'a e mamani 'oku tau 'i ai. Ko kinautolu 'oku manavāhē ki he 'Otua 'oku ne tokanga kia kinautolu. Ko 'etau faimo'oni he tokolahi mo 'ete tokotaha 'oku 'ikai ke puli mo unga ia ki he 'afio mai 'a e 'Otua 'o e fakatupu.
'Oku ui 'e he 'Otua 'ene kakai ko e koloa kānokato. Ko hono fakamanatu mai ia 'ene mahu'inga'ia 'i he'ene kakai 'a kinautolu 'oku tauhi ange kiate Ia neongo 'enau fekuki mo e faingata'a. 'Oku fakamanatu mai 'e he fokofola ni 'e 'i ai e 'aho ko e 'aho 'o e fakahā ngaue pea 'e toki fakamahino ai e fai kehekehe 'a e faikovi moe failelei. He ko e mohu tu'umalie 'a e faikovi he 'aho ni 'oku fakataimi pe, ka ko e pale 'o e fai'apasia ki he 'Otua 'oku ta'engata.
Kuo 'i ai nai ha taimi kuo tau hange ai ko e kakai he kuonga 'o Malakai, 'o tau fehu'ia pe 'oku kei 'aonga ko a 'etau fai e ngaue ma'ae 'Otua? 'E anga fēfē 'etau fakahā'i atu he 'etau talanoa mo 'etau ngaue 'oku tau tui mo'oni ki he 'Otua? 'Oku tau falala nai ki he taimi mo e fakamaau 'a e 'Otua neongo hange 'oku kehe e me'a 'oku tau sio ki ai he mamani 'oku tau 'i ai? Tuku mu'a ke tau faimo'oni mo 'apasia 'Otua neongo hange kuo lelei mo tu'umalie ange e kau faikovi ia. Tau tui pe mo falala ki he 'ene palani he 'oku ne 'afio'i 'etau talangofua kotoa pe. Fakafeta'i mu'a ko 'ene lau kitautolu ko 'ene koloa kānokato ko e siueli pea 'oku ne ma'ema'ekina'i kitautolu. Tuku ke hā atu hono langilangi mo 'ene kololia 'ia kitautolu.
Ma'u ha 'aho lelei. Ke tapuaki'i mai koe 'e he 'Eiki.

04/12/2024

Fakamonu'ia 'o e 'Aho.
Luke 1:68-79.
Ko e hiva 'eni 'a Sakalaia ko e himi fakafeta'i faka'ofo'ofa mo e palofisai na'ane fakahoko 'i he hili e fanau'i hono foha ko Sione Papitaiso. 'Oku ha mahino mai pe heni 'a e faimo'oni, faimeesi mo e faifakamo'ui 'a e 'Otua.
'Oku fakamālō'ia'i 'e Sakalaia 'a e 'Otua he 'ene 'a'ahi mai 'o huhu'i 'a hono kakai. Ko e 'a'ahi mai ko hono fakamanatu mai ia 'oku 'ikai ke ngalo 'i he 'Otua 'a 'ene ngaahi palomesi. 'Ia Sisu ne hoko mai ai e fakamo'ui. 'Oku fakakakato 'e he 'Otua 'ene kovinanite mo 'Epalahame he 'ene fakahaofi hono kakai mei ho nau ngaahi fili pea ne fakafaingamalie'i kinautolu ke nau ngaue ma'ana he toputapu mo e haohaoa. 'Oku tauhi ma'u pe 'e he 'Otua ia 'ene ngaahi palomesi neongo hange 'oku tau tali he taimi loloa. 'Oku fēfē nai 'a e tauhi mai 'e he 'Otua 'ene mo'oni ki he 'etau mo'ui?
'Oku palofisai 'a Sakalaia ko hono foha 'a Sione te ne teuteu 'a e ha'ele 'anga 'o e 'Eiki 'i he 'ene foaki mai 'a e 'ilo 'o e fakamo'ui ko e fou he fakamolemole angahala. Ko e misiona ia 'a Sione 'oku ne tuhu ki he hoko mai 'a e Misaia mo hono uki e kakai ke nau fakatomala mo mateuteu. Hange pe ko hono ui 'o Sione, 'oku pehe pe ho tau ui. 'Oku tau teuteu nai e hala 'anga 'o e 'Eiki he 'etau ngaahi feohi 'oku fakahoko faka'aho?
'Oku faka'osi 'aki 'e Sakalaia 'a e folofola ni 'a e fakakaukau 'o e maama 'oku ne hulu e nofo he po'uli ka ko e fakatātā 'o e hoko mai 'a e Misaia. Ko Sisu ko e la'a kuo hopo 'oku ne tataki kitautolu he fiemalie, pea 'oku to'o atu ai e fakapo'uli 'o e angahala mo e mate. Ko ia ko e taimi 'oku tau ongo'i ai 'oku fakapo'uli tu'u 'etau mo'ui, manatu'i ko Kalaisi ko e maama 'oku ne ulo 'i he fakapo'uli 'o ne 'omi faka'amanaki pea te ne tataki ai kitautolu.
'I he 'etau teu ki he fakamanatu e hifo mai 'a Kalaisi he mahina ni, fakakaukau loto ange pe 'e anga fēfē ha'a tau teuteu e ha'ele 'anga 'o e 'Eiki 'i he kakai 'oku tau feohi mo ia. Vahevahe atu e faka'amanaki mo e fiemalie 'o 'ene maama mo e taha kotoa pe 'oku ne fu'u fiema'u.
Ma'u ha 'aho lelei. Ke tapuaki'i mai koe 'e he 'Eiki.

03/12/2024

Fakamonu'ia 'o e 'Aho.
'Aisea 1:24-31.
'Oku talanoa 'a e konga tohi ko 'eni ki he fai fakamaau 'a e 'Otua, ki he 'ene fakama'a pea mo 'ene toe langa. Ko e puipuitu'a, ko hono fakamaau'i 'o Siuta koe'uhi ko 'enau angatu'u pea mo 'enau ngaahi faihala. Neongo ne fakahā 'e he 'Otua 'ene houhau, ka na'ane toe foaki 'amanaki pe 'o fou 'i hono fakama'a pea mo hono fakafo'ou.
'Oku fakahā 'ehe 'Otua ko e Mafi ia 'o 'Isileli 'oku ne p**e, 'oku fakamaaau pea mo fakatonutonu. Ko e fakatalatala ho'o tolosia mo lave kotoa he efe ko e fakatātā ia ki hono sivi 'o e siliva he 'e to'o kotoa e 'uli kae 'ai ke ma'a. 'Oku fakamanatu heni 'a e tautea 'a e 'Otua neongo 'ene mamahi, ka ko e taumu'a ke toe fakafo'ou e toputapu hono kakai. 'Oku 'i ai nai ha konga he 'etau mo'ui 'oku tau ongo'i 'oku fai ai ho tau fakama'a? Tau falala ki he nima 'o e 'Otua neongo 'a 'ene malohi ka tau 'ilo'i 'oku ne mohu kelesi.
Ko e palomesi 'a e 'Otua te ne toe fokotu'u e kau taki pea mo e ngaahi kolo ki ho nau tu'unga ne nau anga maheni ki ai, pea 'e ui 'a Selusalema ko e kolo ia 'o e kau ma'oni'oni. Vakai ange heni ki he finangalo 'o e 'Otua ki fai ha fakamo'ui. 'Oku 'ikai te ne li'aki ai pe hono kakai, ka 'oku ne kumi ke fakafoki mai kinautolu kiate Ia. Neongo 'etau tō mo humu he fononga 'o mamani, manatu'i ko e taumu'a 'a e 'Otua ia ke toe fakafo'ou pe kitautolu kiate Ia. Ko hono finangalo 'oku 'ikai ko e faka'auha ka ko e fakafo'ou. 'Oku tau tali nai 'a 'ene fakafo'ou 'oku fai he 'etau mo'ui?
'Oku faka'osi 'aki 'e he lesoni 'a e fakatokanga, ko kinautolu ko ia he 'ikai te nau tali 'a e 'Eiki ka nau kei muimui pe ki he ngaahi 'aitoli 'o e mo'ui 'e keina kinautolu 'e he afi hange ha lau'i 'akau momoa kuo pakukā pea 'ikai lava ke matāmate'i. Ko e fakatokanga ia ki he tautea 'e fakahoko ki he ta'etokanga ki he fai meesi 'a e 'Otua. Vakai'i ange 'etau mo'ui na'a 'oku tau tokanga ange kitautolu ki he ngaahi 'aitoli 'o e mo'ui, 'a e ngaahi me'a 'oku ne fakapepaki'i mo tokohaki'i kitautolu ke 'alu ai 'etau tokanga kae 'ikai ke tau tauhi ki he 'Otua. Tukuange ia ka e toe fai ha fakafo'ou 'etau tauhi ki he 'Otua. Ko e pole ia, ke tau falala ki he 'Otua mo 'ene fakafo'ou 'oku fai he 'etau mo'ui 'o 'amanaki ai ki ha kamata fo'ou. Tuku ke tau laka ai 'i he ma'oni'oni 'o 'ilo'i ko e taumu'a 'a e 'Otua ke ne toho kitautolu ke tau ofi ange kiate Ia. 'Io 'Oku ne fonu 'i he fai meesi mo e 'alo'ofa.
Ma'u ha 'aho lelei. Ke tapuaki'i mai koe 'e he 'Eiki.

Address

3/36 Hobill Avenue
Auckland
2104

Opening Hours

Saturday 6am - 12pm
Sunday 6am - 12pm

Telephone

+6493771593

Website

Alerts

Be the first to know and let us send you an email when Letio Tonga o Aotearoa posts news and promotions. Your email address will not be used for any other purpose, and you can unsubscribe at any time.

Videos

Radio Tonga

Sapate 'aho 8 Tisema, 2024
Sapate 'aho 8 Tisema, 2024

Talitali lelei kimoutolu ki he'etau polokalama he 'aho ni. Kaveinga: Lalanga 'a e Mo'ui Kakato 'ia Kalaisi

Letio Tonga 'o Aotearoa,
Letio Tonga 'o Aotearoa,

Fakaafe'i atu kimoutolu ki he polokalama moe Letio Tonga 'o Aotearoa kihe pongipongi ni.

Sapate 'aho 3 Novema 2024
Sapate 'aho 3 Novema 2024

Talitali lelei kimoutolu ki he 'etau polokalama. Kaveinga: Lalanga 'a e Mo'ui Kakato 'ia Kalaisi

Ta’u 25 e BreastScreen Aotearoa
Ta’u 25 e BreastScreen Aotearoa

Ko e uike tokangaekina eni ‘o e kanisā huhu! Ko hono toutou fakahoko ‘o e sivi mammograms ‘e ‘ilo vave ange ai e Kanisā Huhú mo fakahaofi ha ngaahi mo’ui. ‘Oku fakalele ‘e he BreastScreen Aotearoa e sivi kanisā huhu ta’etotongi ma’ae kakai fefine ta’u 45-69. Fakalahi ho’o ‘ilo ki ai: www.timetobreastscreen.nz

Letio Tonga
Letio Tonga

Talitali lelei kimoutolu ki heetau polokalama. Ke Tapuaki mai kimoutolu e Sihova.

Ta’u 25 e BreastScreen Aotearoa
Ta’u 25 e BreastScreen Aotearoa

Ko e uike tokangaekina eni ‘o e kanisā huhu! Ko hono toutou fakahoko ‘o e sivi mammograms ‘e ‘ilo vave ange ai e Kanisā Huhú mo fakahaofi ha ngaahi mo’ui. ‘Oku fakalele ‘e he BreastScreen Aotearoa e sivi kanisā huhu ta’etotongi ma’ae kakai fefine ta’u 45-69. Fakalahi ho’o ‘ilo ki ai: www.timetobreastscreen.nz

Ta’u 25 e BreastScreen Aotearoa
Ta’u 25 e BreastScreen Aotearoa

Ko e uike tokangaekina eni ‘o e kanisā huhu! Ko hono toutou fakahoko ‘o e sivi mammograms ‘e ‘ilo vave ange ai e Kanisā Huhú mo fakahaofi ha ngaahi mo’ui. ‘Oku fakalele ‘e he BreastScreen Aotearoa e sivi kanisā huhu ta’etotongi ma’ae kakai fefine ta’u 45-69. Fakalahi ho’o ‘ilo ki ai: www.timetobreastscreen.nz

Ta’u 25 e BreastScreen Aotearoa
Ta’u 25 e BreastScreen Aotearoa

Ko e uike tokangaekina eni ‘o e kanisā huhu! Ko hono toutou fakahoko ‘o e sivi mammograms ‘e ‘ilo vave ange ai e Kanisā Huhú mo fakahaofi ha ngaahi mo’ui. ‘Oku fakalele ‘e he BreastScreen Aotearoa e sivi kanisā huhu ta’etotongi ma’ae kakai fefine ta’u 45-69. Fakalahi ho’o ‘ilo ki ai: www.timetobreastscreen.nz

KE LALANGA 'A E MO'UI KAKATO 'IA KALAISI
KE LALANGA 'A E MO'UI KAKATO 'IA KALAISI

Talitali lelei kimoutolu ki he polokalama 'o e pongipongi ni. Ke tapuaki mai kitautolu 'e Sihova.

Polokalama Letio Tonga Aotearoa
Polokalama Letio Tonga Aotearoa

Fakaafe'i kimoutolu ke tau kau fakataha 'i he ngaahi polokalama kuo teuteu'i mei he faleni.

Shortcuts

Share

Category