What are the opening hours?

Saturday 6am - 12pm Sunday 6am - 12pm

https://www.facebook.com/106473960992110/

Letio Tonga o Aotearoa, 3/36 hobill Avenue, Auckland (2025)

15/01/2025

Fakamonu'ia 'o e 'Aho.
Saame 36:5-10.
Ko e konga folofola 'o e 'aho ni, 'oku ne talanoa ki he ta'engata e 'ofa 'a e 'Otua, 'a 'ene faimo'oni mo ‘ene ma'oni'oni, pea 'oku toe hanga 'e he Saame 'o fakatatau ia ki he tōnounou 'oku 'i ai e fa'ahinga 'o e tangata.
Ko e 'ofa 'a e 'Otua 'oku 'asi he langi, ko 'ene faimo'oni 'oku 'i he ngaahi 'ao na, pea ko 'ene ma'oni'oni 'oku 'i he ngaahi mo'unga. Ko e ngaahi fakatātā mahu'inga ko 'eni 'oku ne fakamatala'i 'a e lahi mo e ta'eliliu 'a e 'Otua.
'Oku fakamālō'ia 'e he Saame 'a e 'ofa 'a e 'Otua 'oku hufanga mo malu ki ai e kakai. Hange ko hano fakatahataha'i mai 'e ha manupuna hono fanganga ki hono lalo kapakau, 'oku pehe pe hono malu'i 'e he 'Otua 'a kinautolu 'oku nau ha'u kiate Ia. 'Oku tau hola nai 'o toitoi he lalo kapakau 'ofa 'o e 'Otua he ngaahi taimi 'oku tau fetaulaki ai mo e ngaahi veiveiua 'o e mo'ui, pe 'oku tau falala pe ki ho tau ngaahi ivi fakafo'ituitui? Ko e taimi 'oku tau ongo'i ai te tau fūlutamakia he mo'ui, ko e kapakau 'o e 'Otua ko e malu'anga pau, 'oku 'iai e nonga mo e fiemalie pea 'oku tau hao ai.
'Oku 'ilo'i 'e he fatu Saame ko e 'Otua ko e tokotaha fakaafe lelei, he 'oku hulu atu 'ene tokonaki ma'a hono kakai. Pea 'oku nau makona he mahu 'o hono fale pea 'oku nau inu he 'ene ngaahi vaitafe malie. Ko hono talamai ia kia kitautolu ko e fiemalie mo e fiefia mo'oni 'oku ma'u pe ia mei he 'Otua. Ko e hā e me'a 'oku tau fafanga 'aki ho tau laumalie? 'Oku tau inu pe mei he ngaahi vaikeli maha 'o mamani pe 'oku tau inu he fauniteni mo'ui 'a e 'Otua?
Ko e 'Otua 'a e ma'u l'anga 'o e mo'ui ta'engata, pea 'iate Ia 'oku tau ma'u ai e maama mo e 'uhinga 'o e mo'ui. 'I he 'ene maama te tau sio maama. 'Oku faka'osi 'aki 'e he Saame 'a 'ene tautapa ki he 'Otua ke ne 'ange mu'a 'ene 'ofa kia kinautolu 'oku nau 'ilo'i Ia, pea mo 'ene faitotonu kia nautolu 'oku tonu ho nau loto. Ko e fakamanatu mai ia ke tau kumi ma'u pe ki he 'ene 'ia kitautolu pea ke tau laka 'o taau mo hono finangalo.
Ko e 'aho 'eni ke tau fakamālō'ia ai 'a e 'ofa, faimo'oni mo e faitotonu 'a e 'Otua kuo ne fai ma'a kitautolu. Pea ke tau falala ko e 'Otua pe ho tau malu'anga, mo e hao'anga he taimi faingata'a. Ko e 'Otua pe ho tau fe'unga. Kole ki ai 'ene kelesi pea te tau ma'u ai e fiefia he 'ene 'ia kitautolu. Tuku ki he 'ene maama ke ne fai ho tau tataki he 'aho ni.
Ma'u ha 'aho lelei. Ke tapuaki'i mai koe 'e he 'Eiki.

14/01/2025

Fakamonu'ia 'o e 'Aho.
Nomipa 27:1-11.
'Oku talanoa 'a e folofola ni ki he ngaahi 'ofefine 'o Silofehati ko Mahala, Noa, Hōkela, Milika mo Tilisa. Na'a nau lotolahi ke a'u kia Mosese mo 'Eliesa ko e taula'eiki pea pehe mo e kau taki 'o 'Isileli 'o kole ha tofi'a kelekele, he na'e 'ikai ha ngaahi foha 'o 'enau tamai. Ko e tali ne fai 'e he 'Otua kia Mosese he hūhū na'a nau fai, na'ane fakahā 'oku mo'oni 'a e si'i kole 'a e kau fefine, pea ne hoko ai 'a e me'ani ko e konisitutone ki he ma'u kelekele 'i 'Isileli.
Ko e to'onga ne fakahoko 'e he ngaahi 'ofefine ko 'eni he 'enau lotolahi na'e 'ikai ko ha me'a 'oku anga maheni ki ai 'a e hou'eiki fafine 'i ho nau anga fakafonua. Na'a nau pole'i 'a e tukufakaholo 'o 'ikai fai ko ha fakafepaki, ka 'i he 'uhinga lelei ke fea ki he taha kotoa pe. 'Oku 'i ai ha tu'unga 'o e mo'u 'oku tau 'i ai pe ko ha taha kehe 'oku tau fiema'u ke hā ai e fea pea mo e mo'oni? Falala ki he 'Otua ke ne fakalotolahi'i kitautolu ke tau lea 'aki e mo'oni mo e kelesi.
Ne fakahā 'e he 'Otua ko e kole 'a e kau fefine 'oku mo'oni pea ne tala kia Mosese ke foaki kia kinautolu e tofi'a 'o 'enau Tamai. Ko e fakamaau totonu ia 'a e 'Otua, pea mo 'ene tokanga ke 'oua na'a to ha taha.
'Oku 'afio'i 'e he 'Otua 'a e ngaahi tu'unga 'o e mo'ui 'oku fiema'u ke hā ai e fakamaau totonu pea mo e fea ki he taha kotoa pe. 'Oku ke falala ki he 'ene fakamaau totonu mo fea 'i ho'o mo'ui pea mo e mo'ui 'a e kakai kehe? 'E anga fēfē 'a e ha atu e fakamaau totonu mo e fea 'i ho'o mo'ui 'i ho'o feohi mo e kakai kehe?
Ne ngaue 'aki 'e he 'Otua e fakakaukau ko 'eni ko e konisitutone ia ki 'Isileli ke fakapapau'i ko e to'utangata 'o e kaha'u te nau 'inasi pe he me'a kuo fakahoko he lolotonga. 'Ikai ko hono fakapapau'i ia 'oku tokanga e 'Otua ki he tokotaha kotoa pe? Kau ai koe mo au.
Ma'u ha 'aho lelei. Ke tapuaki'i mai koe 'e he 'Eiki.

13/01/2025

Fakamonu'ia 'o e 'Aho.
Fakamaau 5:12-21
Ko e konga 'eni 'o e hiva 'a Tepola mo Pēlaki ko e fo'i maau ki hono ikuna'i 'e 'Isileli 'a hono fili. 'Oku fakamatala 'a e konga tohi ni ki he ngaue fakafo'ituitui mo fakaha'a ne nau fakahoko, ka ko e fai fakamo'ui ia 'a e 'Otua ne fakafou mai 'ia kinautolu pea na'a nau ma'u ivi malohi ai ke fakahoko 'aki e fatongia.
'Oku mahino heni 'oku ui 'e he 'Otua hono kakai ke nau tu'u 'o ngaue. Ne ui 'e he 'Otua 'a Tepola ke tu'u hake 'o tataki e kakai. Ko hono fakamanatu mai ia 'oku teuteu'i kitautolu 'e he 'Otua ki he ngaahi ngaue ke tau fakahoko. Ko e taki 'a Tepola mo e talangofua 'a Pēlaki ki he tu'utu'uni 'a e Otua 'oku ne 'omai 'a e fakakaukau ki hono tokonia 'e he 'Otua ha taha 'oku talangofua pea laka atu he tui. 'Oku tau tokanga nai ki he ui 'oku fai mai 'e he 'Otua ki he 'etau mo'ui? 'Oku tau mateuteu nai ke tau tali pea mo ngaue'i?
'Oku to e fakafeta'ia foki 'e he Saame 'a e ngaahi ha'a 'o 'Isileli ko 'enau fakatahataha mai ki he tau. 'Ifalemi, Pen*simani, Sepulone mo 'Isaka na'a nau fakatahataha mai he 'enau talangofua ki he palani 'a e 'Otua. Ko 'enau lototaha ke nau ngaue fakataha 'oku fakahā mai ai 'a e fu'u ivi 'oku malava ke ma'u he ngaue fakataha ke fakahoko 'aki e finangalo 'o e 'Otua. 'Oku tau ngaue fakataha nai ko e sino pe 'o Kalaisi, 'o takitaha ngaue 'aki hono taleniti kuo me'a'ofa mai 'aki 'e he 'Otua ke ne langilangi'ia ai?
Ko e ngaahi matakali hangē ko Lupeni, Kiliati, Tani mo 'Asaeli na'a nau pepe'e mo fakamama'o mei he tau. Pea ko 'enau ta'e fie kau mai, 'oku tu'u fehangahangai ia mo e tu'u fakataha 'a e ngaahi matakali ko 'ē. Ko e 'ata ia 'o e taimi 'oku tau fētōkehekehe 'aki ai he ngaue 'a e 'Eiki pea 'oku mole ai ho tau faingamalie ke tau fakahaa'i 'a e fu'u ivi mo e mafi 'o e 'Otua. 'Oku tau kau kakato ki he misiona 'a e 'Otua, pe 'oku tau tu'u nana'i 'o siosio pe koe'uhi ko 'etau ilifia?
'Oku faka'ilonga'i mai 'e he Saame ko e 'Otua 'oku ne tau ma'a hono kakai. Ne hoko e ngaahi fetu'u mo e vai Kisoni ko e me'a ngaue ia ke fakamaau'i 'aki e fili. Ko hono fakamahino mai ia ko e ikuna 'oku 'a e 'Otua ia. He 'oku ne ngaue 'aki 'a natula mo hono mafi ke fakahoko 'aki ke a'usia ai 'ene faka'amu. 'Oku tau falala nai ki he 'ene tapuhā he 'etau 'ilo'i 'oku ne tau ma'a kitautolu?
'Oku ui kitautolu ke tau 'ā ki he misiona 'oku 'omi 'e he 'Otua ma'a kitautolu? Pe ko e taki, lotu, ngaue pe fakalotolahi, ko kitautolu kotoa pe 'oku 'i ai ho tau fatongia ke tau fakahoko he p**e'anga 'o e 'Otua. Ngaue fakataha mo kinautolu he Siasi ke fakahoko e ngaue 'a e 'Eiki. Ko e taha 'oku ne fakahā e kololia 'o e 'Otua. Tokanga'i 'a e 'ikai fie fai e ngaue 'a e 'Eiki ka e potopoto'i he fakaanga, pea fa'a lea ka e vale he ala he 'oku 'ikai ke ma'u ai ha lelei. Ko e ngaahi 'ahi'ahi mo e fakatanga, ke tau falala pe ki he 'Otua he ko Ia 'e tau ma'a kitautolu. 'Oku ne kei p**e pe, pea ko 'ene ikuna 'oku pau.
Tau fakamālō pe ki he 'Otua ko 'ene fie ui kitautolu ke tau kau he 'ene ngaue. Pea ke tau talangofua kakato kiate Ia.
Ma'u ha 'aho lelei. Ke tapuaki'i mai koe 'e he 'Eiki.

12/01/2025

Fakamonu'ia 'o e 'Aho.
Saame 106:1-12.
'Oku hiki pe 'a e Saame 'o e 'aho ni he fakafeta'i mo e fakamālō ki he 'Otua he 'oku tolonga 'o ta'engata mo lelei 'ene 'alo'ofa. 'Io 'oku fakamanatu mai ai ko 'ene 'ofa 'oku 'ikai ke ngata pe ke makatu'unga 'i ha me'a, ka 'oku ta'engata pea fai ma'u pe. 'I he taimi 'oku tau femo'emo'ekina ai he mo'ui, ko e taimi lahi 'oku fa'a ngalo 'ia kitautolu ia 'a e mo'oni. Ko e faka'amu 'o e 'aho ni, ke tau ki'i fakama'u hifo 'o fai ha fakamālō ki he 'Otua ki he 'ene 'ofa, 'oku 'ikai ke toe liliu, pea mo e tapuaki 'oku ne foaki ta'e ha totongi. Tuku mu'a ke tau faimo'oni 'o tau fakahoko 'a e me'a 'oku totonu 'i he 'etau mo'ui faka'aho, 'i he ngaahi feohi 'oku tau fai pea ke tau fakakaukaulotoa mu'a 'a e 'ulungaanga 'o e 'Otua kuo 'inasi ai 'etau mo'ui.
'Oku to e fakamahino foki 'e he Saame 'a e angahala 'a 'Isileli 'i hono to e fakamanatu 'a 'enau tō nounou ke falala ki he 'Eiki neongo ne nau 'osi mamata tonu pe ki he ngaahi mana ne fakahoko 'e he 'Otua 'i 'Isipite. 'Oku pehe pe hono fakamanatu mai kia kitautolu 'a e faingofua ke ngalo 'ia kitautolu 'a e faimo'oni 'a e 'Otua he taimi 'oku tau fetaulaki ai mo e ngaahi faingata'a 'o e mo'ui. Ka 'oku kei kole pe 'a e fatu Saame ki he 'Otua ke ope mai mu'a 'ene manako mo 'ene fakamo'ui, 'o 'ikai ke fakatefito 'i ha me'a kuo tau lava 'e kitautolu tangata, ka 'oku 'i he kelesi faifio 'oku lahi 'a e 'Otua. Tau manatua 'a e faimo'oni 'a e 'Otua kuo tau 'osi 'inasi ai he 'etau mo'ui, pea ke pehe foki 'a e hokohoko atu 'etau falala kiate Ia he 'etau mo'ui 'o e lolotonga ni.
Ko e fai fakamo'ui 'a e 'Otua 'oku hā ia he fu'u ivi mo e meesi 'a e 'Otua. Ko e ngaue ne fakahoko 'e he 'Otua he tahi kulokula ko hono fakahaa'i mai ia 'ene fai fakamo'ui. Neongo e talangata'a 'a 'Isileli na'ane kei fai faka'atu'i pe ke fakamo'ui kinautolu pea ke hā ai hono kololia mo hono fu'u ivi. Ko e mavaeua 'a e tahi 'oku 'ikai ko e fakamo'ui pe kinautolu fakakakano ke mo'ui, ka ne to e fakafo'ou ai 'enau tui he na'a nau tui mo fakafeta'i ki he 'Otua 'i he hili e fononga he momoa 'o e tahi kulokula. Ko e hā ha tokoni kuo fai 'e he 'Otua ma'au 'i ha faingata'a na'ake tofanga ai? Ne anga fēfē 'ene tokoni ke fakamalohi ai ho'o tui? 'Oku ke fakamālō mo fakafeta'i ki he 'Otua he 'aho ni?
Ko e ako ma'a kitautolu, neongo pe 'etau ta'etui 'oku kei faimo'oni pe 'a e 'Otua ia. Ko 'ene 'ofa mo 'ene meesi 'oku 'ikai ke tau ngaue'i ke ma'u mai, ka kuo 'osi foaki ta'etotongi mai 'i hono huafa. Ke tau manatua 'a 'ene lelei, pea tau fakatōmala he 'etau tō nounou, ka tau hiva 'a e fakafeta'i he me'a kotoa pe kuo ne fakahoko. Tau ange ke ne fakamolemole'i kitautolu he 'etau veiveiua mo e ta'etui. Ka tau falala pe he me'a kotoa.
Ma'u ha 'aho lelei. Ke tapuaki'i mai koe 'e he 'Eiki.

09/01/2025

Fakamonu'ia 'o e 'Aho.
Koheleti 2:1-11.
Ko e tuli matangi 'oku lea ki ai e tohi 'a Koheleti ko hono fakama'opo'opo ia 'e Solomone 'a 'ene kumi ki he ngaahi malie, ngaahi me'a kehekehe 'oku ma'u 'e hono nima pea mo e ngaahi ikuna kehekehe 'o e mo'ui. 'Oku ne femo'ekina he ngaahi me'a kehekehe 'oku 'omai 'e he mamani, 'a e kata, uaine, langa e ngaahi fale, tanaki e ngaahi koloa, tō e ngaahi ngoue, fakatau tangata mo e fefine, fangapulu tokolahi pea mo lahi 'ene ngaahi me'a he kakai kotoa pe 'o Selusalema. Neongo kotoa 'eni 'i he faka'osinga e fononga 'a Solomone ko 'ene fakama'opo'opo tā ko e muna pe hono kotoa, ko e kai matangi pe.
Ne kamata 'aki 'e Solomone he 'ene pehe kiate ia, ha'u te u sivi koe 'aki e ngaahi fiefia, ke ke 'ilo mu'a ha koto fiefia mo ha koto lelei, pea tā ko e muna pe mo ia foki. Neongo na'ane fiefia pea ne mo'ui 'aki ka na'e 'ikai te ne ma'u 'a e fiemalie kakato ai. 'Ikai 'oku tau hangē tofu pe ko Solomone he 'etau kumi e fiefia he ngaahi me'a fakataimi 'o mamani, ngaahi fakafiefia, ngaahi me'a maheni 'oku tau lelei'ia ai, ngaahi koloa 'o e matelie ka 'oku tau ongo'i maha pe.
Kainga ko e fiefia mo'oni 'oku 'ikai ke ma'u ia he ngaahi me'a 'oku foaki mai 'e mamani, ka 'oku ma'u e fiefia 'i he 'ia kitautolu 'a e 'Otua. 'I he 'ene 'ia kitautolu 'oku kakato ai 'etau fiefia, 'i ho tau nima to'omata'u 'oku 'i ai e malie ta'engata.
'Oku loki e mo'ui 'a Solomone 'e he ngaahi me'a kehekehe kuo ne ma'u he mamani ko 'eni, ka neongo ia 'oku hala 'atā ke nau lava 'o 'omai kiate ia 'a hono 'uhinga pea mo ha fiemalie 'oku tolonga. Pea ne toki fehu'i leva 'e Tevita 'a e ngaahi me'a 'oku ne ma'u 'i hono nima, ko e hā leva 'eku me'a 'oku ma'u ai mei he ngaue kuo u fakahoko he lalo la'ani?
Tā ko ā ko e ngaahi ikuna mo e koloa 'oku fakataimi pe. Ko e tala pe ia ne fai 'e Sisu ke fa'oaki koloa ki Hevani 'o 'oua 'e tanaki koloa 'i mamani, he ko e koloa 'i mamani 'e kai 'e he ane pea 'e 'auha, ka ko e koloa 'o Hevani 'e tolonga ia 'o ta'engata.
'Oku fakakoloa e fakama'opo'op 'a Solomone, he neongo 'ene ngaahi feinga, 'oku 'ikai ke ne ma'u ai ha nonga 'oku fuoloa. Ka 'oku ne fakamatala'i 'ene ngaahi ngaue ko e tuli matangi pe. Ko e matangi 'oku angi noa'ia pe pea 'oku 'ikai 'osi vave 'o 'ikai lava hano puke, 'oku tatau tofu pe ia mo e ngaahi malie 'o mamani kapau 'oku 'ikai ke kau ai 'a e 'Eiki.
Ki he kakai tui ko e 'uhinga 'o 'etau mo'ui 'oku 'ikai ko e hā e lahi 'o e ngaue 'oku tau fakahoko mo e me'a 'oku tau tanaki he mo'ui ni, ka 'oku fakatefito 'i he 'etau tauhi ho tau vā mo e 'Otua. Tau tokanga ki he ngaahi me'a 'o 'olunga 'o 'ikai ki he ngaahi me'a 'o mamani. Ko e taimi pe 'oku 'ave ai 'etau tokanga kakato ki he 'Otua, 'oku tau 'inasi leva he 'uhinga 'oku mo'oni pea 'oku tau ma'u ai 'a e fiemalie kakato.
'Oku fēfē 'etau mo'ui, 'oku tau kau he tuli matangi? Pea 'oku tau kumi e fakanonga mo e fiemalie he ngaahi me'a fakangatangata 'o mamani? 'E anga fēfē 'etau feinga ke liliu ho tau loto ke tau ma'u e fiefia mo e 'uhinga 'o e mo'ui 'i he 'Otua ka 'oku 'ikai ko e ngaahi malie 'o mamani? 'E lava fēfē ke tau fakahū koloa ki Hevani he 'aho ni? Tau ange ke fakamolemole'i kitautolu 'e he 'Otua he 'etau kumi e mo'oni mo e fiefia he ngaahi me'a 'osi 'o mamani. Kae tuku mu'a ke tau 'ilo'i ko e fiemalie mo'oni 'oku hūfataha pe ia mei he 'Otua. Pea tauange ke hā atu e mo'oni ko ia he 'etau mo'ui.
Ma'u ha 'aho lelei. Ke tapuaki'i mai koe 'e he 'Eiki.

08/01/2025

Fakamonu'ia 'o e 'Aho.
Saame 29.
Ko e le'o 'o e 'Eiki 'oku ha he Saame 'o e fakafeta'i ko 'eni 'oku ne uki kitautolu ke tau puke ki he malohi mo e tapuhā 'o e 'Eiki.
'Oku ngaue 'aki 'e Tevita e ngaahi 'imisi ke ne fakamatala'i 'a e le'o 'o e 'Eiki ko e fu'u malohi pea 'oku ongo'i katoa pe 'e he fakatupu, 'o ne 'omai ai 'a e mamalu mo e faka'apa'apa. 'Oku 'ikai ke ngata pe 'i hono hanga 'e he Saame ni 'o hulu'i mai e malohi 'o e 'Otua, ka 'oku ne toe fakaafe'i kitautolu ke tau hū kiate Ia 'i he naunau hono toputapu.
'Oku talanoa 'a Tevita ki he malohi 'a e le'o 'o e 'Otua, he 'oku ne fesi e sita, lulu e toafa, pea 'oku ne 'i he lomaki. Ko hono fakapapau'i ia ko e le'o 'o Sihova 'oku fakaongoongo ki ai e fakatupu.
'Oku lava nai ke tau fa'a fakalaulauloto ki he fu'u malohi 'o e folofola 'a e 'Otua? Ko hono le'o 'oku kei tatau pe he 'aho ni, he 'oku ongo mai he folofola, ongo mai he Laumalie Ma'oni'oni pea ongo mai he faka'ofo'ofa 'o e fakatupu.
'I he taimi 'oku tau ongo'i faingata'a'ia ai he ngaahi matangi 'o e mo'ui, 'oku tau tui falala pe he ko e le'o 'o Sihova 'oku ma'olunga ange ia he vai. 'Oku ne lea ke nonga mo fiemalie e ngaahi palopalema pea ne fai tu'utu'uni ki he ngaahi 'elemeniti 'o e mamani, pea 'oku fakamanatu mai ai kia kitautolu 'oku 'ikai ha me'a te ne ta'e lava ke p**e ki ai.
Talamai 'e Tevita ke tau hū ki he 'Otua koe 'Otua lahi. Pea 'oku 'ikai ko e lotu ko etau fakamālo'ia pe 'a e ngaue 'oku fai 'e he 'Otua ma'a kitautolu, ka ko 'etau 'ilo'i ko hai Ia. 'Oku fēfē nai 'etau lotu faka'aho ki he 'Otua? Ko e lotu 'oku 'ikai koe hiva pe ka ko e fesi e loto 'o luva kakato ki he tokotaha 'oku ne puke 'a e malohi kotoa pe mo e kololia.
'Oku faka'osi 'aki 'e he Saame 'a e fo'i palomesi fakakoloa ko 'eni, “Ko Sihova te ne foaki ivi ki hono kakai; Ko Sihova te ne ‘atu ki hono kakai ‘a e melino moonau tāpuaki." Neongo e ngaahi imisi faingata'a ne talanoa ki ai e Saame he konga ki mu'a 'o e Saame ni, ka ko e finangalo 'o e 'Otua ke tapuaki'i hono kakai 'aki e melino. Ko hono ivi 'oku ne tokonia 'aki kitautolu pea 'oku ne tapuaki kitautolu 'aki 'ene melino. 'Oku ke kumi ki he melino he 'aho ni? Tuku mu'a ki he mo'oni 'o e Saame ni ke ne fakamanatu mai kia kitautolu ko e 'Otua 'oku ne lahi 'i hono ivi, ka 'oku ne faimo'oni he 'ofa.
Tau ki’i tu'u si'i hifo mu'a 'o sio ki langi 'o hū ki he 'Otua, he ko hono le'o 'oku ongo ko e mana he funga vai. Falala ki hono fu'u ivi pea malōlō he 'ene melino. Ko e le'o 'o e 'Otua 'oku malohi, ko ia tuku mu'a ke tau fakaongo ki ai.
Ma'u ha 'aho lelei. Ke tapuaki'i mai koe 'e he 'Eiki.

07/01/2025

Fakamonu'ia 'o e 'Aho.
Taniela 2:24-49.
Ko e 'Otua 'oku ne tatala 'a e misiteli. 'Oku 'ikai ke ngata pe he 'ene p**e ki he ngaahi p**e'anga ka 'oku ne toe lava foki ke tala 'a e ngaahi me'a 'oku fūfū pea mo misiteli. Ko e misi ne faingata'a'ia ai 'a Nepukanesa, na'a ne fiema'u lahi ke fai hano tali pea ke faka'uhinga'i, ka na'e 'ikai lava 'e ha taha 'i hono kau fale'i ke fakamatala'i. Ka ko Taniela na'ane falala ki he 'Otua, 'o 'ikai ke ngata pe hono fakamatala'i 'a e misi, ka ne toe talaloto ki he malohi mo e poto 'o e 'Otua.
'Oku fakamahino mai he talanoa 'o e 'aho ni 'oku ne fakamanatu mai 'a e fakangatangata 'a e poto 'o e tangata ka ko e poto 'o e 'Otua 'oku ta'engata. Ha ia hono fakahā 'e Taniela ki he tu'i 'oku 'ikai ha taha poto pe fai mana te ne lava ke fakamatala e misi 'a e tu'i, ka ko e 'Otua tokotaha pe 'i Hevani 'oku ne lava ke fakahā 'a e me'a 'oku misiteli.
Ko e misi ki ha fu'u 'imisi malohi ka ne holoki pe 'e ha maka, 'a ia ne 'ikai tā 'e ha nima 'o ha tangata. 'Oku fakamatala ia ki he hopo hake mo e tō e ngaahi p**e'anga 'o mamani pea mo e p**e 'a e p**e'anga 'o e 'Otua. Ko e fakalotolahi ia ki he kakai tui, neongo 'e hopo hake mo tō e ngaahi p**e 'i mamani, ka ko e p**e'anga 'o e 'Otua ia 'e tu'u pe 'o ta'engata.
Ko e misi ni 'oku ne fakafofonga'i e emipaea 'a e tangata, ka 'oku fakafofonga'i 'e he maka 'a Kalaisi mo hono p**e'anga ta'engata. Ko e fakamanatu mai ia neongo e malohi e ngaahi fokotu'utu'u 'a mamani, ko e p**e'anga pe 'o e 'Otua 'e tu'uloa.
Ko e lotu 'a Taniela mo hono ngaahi kaume'a 'oku ne talamai ko e poto mo e 'ilo 'oku hoko mai pe ia mei he 'Otua tokotaha pe. Ko ho tau tala ia, ke tau foki ki he 'Otua ke ne tataki kitautolu he taimi 'oku tau faingata'a'ia ai pea 'ikai ke toe lava fai ha me'a pe ma'u ha ola. 'Io ko e lava 'e Taniela ke fakamatala'i e misi 'a e tu'i, 'oku hā mai ai 'a e faimo'oni 'a e 'Otua 'i he 'ene tokonia e kakai ke ne langilangi'ia ai. Ko e taimi 'oku tau laka atu ai he tui mo e talangofua, 'oku toki tokonia kitautolu 'e he 'Otua ke tau lava'i e ngaahi me'a 'o e fononga.
'I he misi ni, 'oku ne fakamanatu mai ko e ngaahi p**e'anga 'o mamani 'oku fakataimi pe, ka ko e p**e'anga 'o e 'Otua 'oku ta'engata. Ki he kau muimui 'o Kalaisi ko ho tau 'amanaki 'anga 'oku fakama'u he 'ene p**e 'oku 'ikai toe ue'i'a.
Falala ki he 'Otua mo 'ene tapuhā pea puke ma'u ki he 'ene poto 'o hange ko Taniela, ke fakamanatu mai ai pe kia kitautolu ko 'etau 'amanaki 'oku tu'u 'ia Kalaisi mo 'ene p**e 'oku ta'engata.
Ma'u ha 'aho lelei. Ke tapuaki'i mai koe 'e he 'Eiki.

07/01/2025

Fakamonu'ia 'o e 'Aho.
Taniela 2:1-19.
'Oku faingata'a'ia lahi 'a e tu'i Nepukanesa 'i he 'ene misi, ka na'e 'ikai lava 'e ha taha he 'ene kau fale'i ke fai hano fakamatala'i. Pea ne tupu ai 'ene tuputamaki 'o ne tu'utu'uni ke tamate'i kotoa kinautolu.
Ko Taniela ne kau he fakahē ki Papilone, na'ane kau he fo'i tu'utu'uni ko 'eni mo faingata'a fau 'i hono solova 'a e misi 'a e tu'i. Neongo ia ko e founga ne fakahoko 'e Taniela ko e motolo ia ki he 'etau tui, poto pea mo e fakafalala ki he 'Otua.
Ko e lesoni 'oku tau ako he talanoa 'o e 'aho ni ko hono 'ilo'i 'a e tapuhā e 'Otua. Ko e misi 'a e tu'i 'oku ne fakahaa'i 'a 'ene fakangatangata, neongo hono fu'u malohi. Pea 'oku 'ikai lava 'e he poto 'o e tangata ke ne solova e hoko mai 'a e faingata'a, ka ki he tapuhā 'oku 'i ai e tali ki he misiteli 'o e mo'ui. Ko e lotolahi mo lototo'a 'a Taniela 'oku 'ikai ko e me'a 'oku ne lava pea mo hono poto, ka ko e 'Otua 'oku ne malava ke fakahā e me'a 'oku fūfū.
Na'e kumi 'e Taniela 'a e meesi 'a e 'Otua he 'ene lotu. Na'ane fakaafe'i foki hono ngaahi kaume'a ke kaungā lotu moia. Ko e ako ia ma'a kitautolu 'a e mahu'inga 'o 'etau kaungā lotu mo e falala ki he 'Otua he ngaahi taimi faingata'a.
Ne makatu'unga heni 'a e lotolahi 'a Taniela ke hā atu he taloni 'o e tu'i 'o kole ha faingamalie ke fai ai ha hūhū ki he fakahā mai 'a e 'Otua. He na'e tui 'a Taniela 'e talilotu mai 'a e 'Otua he 'ene taimi. 'Oku fakahā mai he 'e tui 'a Taniela ko e taimi 'oku fiema'u fakavavevave ai ha me'a ke tau falala pe ki he taimi mo e tokonaki 'a e 'Otua.
Ne fakahā 'e he 'Otua 'a e misiteli 'o e misi 'a Nepukanesa kia Taniela. Ko e fakamahino mai ia 'a e faimo'oni 'a e 'Otua kia kinautolu 'oku nau kumi fakamatoato kiate Ia, pea fakamanatu mai ko e 'Otua 'oku 'i ai e ma'u'anga poto mo e 'ilo mo'oni.
'Oku fēfē nai e taimi 'oku tau fehangahangai ai mo e ngaahi tu'unga faingata'a 'o e mo'ui? 'Oku tau hanga ki he 'Otua he 'etau lotu? 'Oku tau fakakau fefe'i mai e kakai ke kaungā lotu mo kitautolu he taimi 'o e faingata'a? 'Oku tau falala nai ki he taimi 'a e 'Otua, neongo hangē 'oku ngali faingata'a?
Ke tau hangē mu'a ko Taniela 'o falala kakato ki he 'Otua, lotu ta'etuku, pea tu'u ma'u he tui, neongo e ngaahi faingata'a kotoa pe.
Ma'u ha 'aho lelei. Ke tapuaki'i mai koe 'e he 'Eiki.

05/01/2025

Fakamonu'ia 'o e 'Aho.
'Aisea 60:1-6.
Ko e tohi 'Aisea 'oku fa'a tokanga ki he 'amanaki mo e fakafo'ou. Pea 'oku kau ai e folofola 'o e 'aho ni. He 'oku hā he lesoni 'o e 'aho ni hono uki e kakai ke nau tu'u 'o ulo, he kuo 'ia kinautolu e kololia 'o e 'Otua. Ko hono fakahā 'o e fakafo'ou kuo nau 'inasi ai he palomesi 'a e 'Otua.
Ko e tu'u 'o ulo he maama ni 'oku fakapūlou 'e he fakapo'uli, pe ko e faingata'a fakafo'ituitui, pole fakasosaieti pe ko e ngaai palopalema fakamamani lahi, 'oku fakamanatu mai 'e he folofola ni, ko ho tau ui ke fakaulo atu 'a e maama 'a e 'Eiki he 'etau mo'ui. 'Oku 'ikai ko ha maama 'a kitautolu, ka ko hono kololia 'oku ne fakamalohi'i kitautolu. Hange pe ko e tapa atu he mahina 'a e maama 'o e la'a, 'oku pehe pe foki 'a e tapa atu 'a e maama 'a Sisu Kalaisi 'ia kitautolu.
Ko ia 'i he 'etau mo'ui fakafo'ituitui 'e lava fēfē nai ke tau tu'u hake 'o ulo he ngaahi 'aho ni? Ko e hā e konga he 'etau mo'ui 'oku tau fiema'u ai e maama 'a e 'Otua mo hono kololia ke ne fakamaama e fakapō'uli ko ia?
'Oku 'i ai e fu'u ivi malohi he 'ia kitautolu e 'Otua. 'Oku fakamo'oni'i 'e he folofola 'oku mo'oni e fakapo'uli, ka 'oku ne toe fakahā mai pe 'oku tu'u 'a e 'Eiki he lotolotonga hono kakai. He 'oku hoko hono kololia ke ne fai e liliu pea 'oku tokanga ki ai e fonua mo e tu'i, 'o ne fakamahino 'a e mahu'inga 'o e 'i ai 'a e 'Otua. Kia kitautolu ko e kau tui 'oku fakamanatu mai ko e 'ia kitautolu e 'Otua he 'etau mo'ui 'oku 'i ai e fu'u ivi mo e mafai 'e lava ke ne tohoaki mai 'aki e kakai ki he 'Otua. Fēfē nai 'etau mo'ui mo 'etau ngaue, 'oku tau tohoaki e kakai ki he 'Otua pe 'oku tau ta'ofi 'e kitautolu e kakai mei he 'enau a'u ki he 'Otua? Ka pehe 'etau mo'ui pea tā 'oku 'ikai 'ia kitautolu e 'Otua.
'Oku hā he folofola ni 'a e visone 'o e 'amanaki mo e fakafo'ou. He 'oku fakatahataha mai e ngaahi p**e'anga, mo e mahu 'o tahi, 'oku nau fetuku koula mai mo e laipeno 'a ia ko hono fakahaa'i mai ia 'a hono fakakakato e palomesi 'a e 'Otua ma'a hono kakai. Ko e fakamanatu ia ko ho tau 'amanaki 'anga 'oku 'ia Kalaisi, 'e hoko mai hono p**e'anga 'o kakato. 'E anga fēfē 'etau 'amanaki he taimi 'o e faingata'a? Pea 'e anga fēfē 'etau vahevahe atu 'a e 'amanaki ko ia mo ho tau kaungā fononga 'oku nau faingata'a'ia?
Kumi ha founga 'e lava ai ke ulo atu ai e maama 'a Kalaisi 'i ho tau ngaahi komiuniti, fakafou 'i ha'a tau fai ha ki'i ngaue lelei, pe ko ha lea fakalotolahi, pe ko ha'a tau talaloto mo'ui. Tuku hono kololia kuo tau 'inasi ai ke hā atu meiate kitautolu. Ko ia 'i he ta'ufo'ou ko 'eni tu'u 'o ulo atu, he kuo hoko mai ho'o maama. He kuo hopo kia kitautolu 'a e kololia 'o e 'Otua. Fakafeta'i. Ko ho tau malohinga ia pea fakahoko ai 'etau ngaue.
Ma'u ha 'aho lelei. Ke tapuaki'i mai koe 'e he 'Eiki.

02/01/2025

Fakamonu'ia 'o e 'Aho.
Saame 72.
Ko e lotu 'eni ma'ae Tu'i 'o kole ki he 'Otua ke tapuaki'i mai 'aki e fai fakamaau totonu, poto mo e melino. Ko ho tau fakamanatu ia he kamata 'anga 'o e ta'ufo'ou ni ke tau lotu ma'a ho tau kau taki ke hā atu ai e to'onga fakaOtua, ke ma'u 'ehe kau taki 'a e fakamaau totonu, 'ofa'i e masiva pea ke nau fakatupu melino foki.
'I he kamata 'o e ta'ufo'ou ni, tau lotua ho tau kau taki 'i he fonua, komiuniti pea mo e lotu ke nau taki fakapotopoto, fai 'ofa, pea 'oua 'e filifilimanako. Tau kole ki he 'Otua ke ne tataki kinautolu ke nau malu'i mo 'ofa'i e masiva mo e ma'ulalo.
'Oku lea foki e Saame ni ki ha taimi 'e 'ufi'ufi ai e mamani 'aki e melino. Ko hono fakamanatu mai ia ko e p**e 'a e 'Otua te tau ma'u ai e nonga mo e fiemalie, ko e 'amanaki ia ke tau puke ki ai he ta'ufo'ou ni, ko e ta'u 'o e taha, mo e tupu he 'etau mo'ui fakafo'ituitui mo e mo'ui 'a mamani.
'Oku tala ki he Tu'i ke ne fakahaofi e masiva mo e tangi pea fakapapau'i 'oku nau ma'u e me'a 'oku nau fiema'u. Ko e pole foki ia kia kitautolu ke tau fakatokanga'i 'a kinautolu 'oku nau fiema'u 'etau tokoni pea ke tau falala foki ki he 'Otua te ne tokonaki ma'a kitautolu he ta'ufo'ou ni.
Neongo 'etau lotu ki he melino mo e fakamaau totonu, ka 'oku tau 'ilo'i ko e p**e'anga pe 'o e 'Otua 'oku ta'engata pea ko ia pe te ne 'omai 'a e fakafo'ou lelei taha ki he mamani. Neongo pe ko e ha faingata'a te tau fepaki mo ia he ta'u ni, 'oku kei tu'u pe 'etau 'amanaki he palomesi 'a e 'Otua ki he kaha'u.
Ko ia 'i he 'etau kamata he ta'ufo'ou ko 'eni, mahu'inga ke tau kole ha poto ma'a ho tau kau taki, pea ke toka foki e melino 'i he ngaahi feohi'anga pea mo toka'i foki e masiva.
Ma'u ha 'aho lelei. Ke tapuaki'i mai koe 'e he 'Eiki.

01/01/2025

Fakamonu'ia 'o e 'Aho.
Saame 147:12-20.
'Oku tau tu'u 'i he kamata'anga 'o e ta'ufo'ou ni, pea 'oku fakaafe mai e Saame 147:12-20 ke tau fakalaulaulotoa 'a e tapuhā mo e faimo'oni 'a e 'Otua. 'Oku fakamanatu mai 'e he folofola ni ko hai 'a e 'Otua pea mo 'ene founga ngaue, he 'ene 'omi fakalotolahi ki he 'etau hikilā fononga he ta'u ko 'eni.
Ko e tapuhā 'o e 'Otua ko ho tau malu'anga ia pea mo ho tau nonga 'anga. He 'oku fai fakafeta'i 'a e Saame ni ki he 'Otua he 'ene fakama'u e mgaahi matapā 'o e kolo pea ne tapuekina e kakai 'i lotoā. Ko e kamata 'o e ta'ufo'ou ko 'eni 'oku fakamanatu mai ko ho tau 'Otua ko ho tau malu'anga mo ho tau tokonia. Tatau ai pe neongo pe ko e hā ha ngaahi pole te tau fetaulaki mo ia he ta'u ni. He ko 'ene malohi 'oku ne loki kitautolu pea fai ho tau fakatolonga he ngaahi tapuaki 'oku tau 'inasi ai.
'Oku talamai ko Sihova 'oku ne p**e ki he fakatupu. Ko e 'Otua tatau pe 'oku ne fokotu'utu'u ho tau ngaahi faha'i ta'u, ko Ia pe 'oku ne puke 'etau mo'ui 'i hono nima. Hange pe ko 'ene liliu e 'aisi ke vai pea ne 'omi 'a e 'ea mafana, 'oku pehe 'ene lava ke fai ho tau liliu mo ho tau fakafo'ou. Ko e ta'ufo'ou ni ko e faingamalie ia ke tau falala ki he taukei 'a e 'Otua he 'ene lava ke fakatupu mo liliu 'a e ngaahi mokosia mo e pakūkā 'i ho tau loto.
'Oku 'ikai ko 'ene fakahaa'i mai pe hono fu'u ivi ka 'oku ne 'omi 'ene folofola 'a ia ko ho tau fakahinohino 'anga pea 'oku ne fiema'u ke tau tauhi ange ho tau vā pea mo tau talangofua ange kiate Ia. 'I he 'etau kamata he ta'ufo'ou ni, tuku mu'a ke tau fakamahu'inga'i e folofola ko ho tau fakahinohino 'anga pea ko e ma'u'anga ia 'o e poto he mamani feliuliuaki ni. Ko e mo'oni ta'eliliu 'a e 'Otua 'oku ne lava ke teuteu'i kitautolu ki he 'etau laka atu.
'E anga fēfē 'etau fakafeta'ia e 'Otua he 'ene faimo'oni ma'a kitautolu he ta'u kuo maliu atu? Ko e hā e konga he 'etau mo'ui 'oku fiema'u ke tau luva kakato ia ki he 'Otua he kamata'anga 'o e ta'u ni? Ko e hā 'etau me'a 'e fai 'i he 'etau kumi ke talangofua ki he folofola 'a e 'Otua he ngaahi mahina ka hoko mai?
Ke hoko mu'a 'a e ta'u ko 'eni ko e ta'u 'o 'etau tupu fakalaumalie, pea falala mo fai fakafeta'i ki ho tau 'Otua lahi mo faimo'oni.
Ma'u ha 'aho lelei. Ke tapuaki'i mai koe 'e he 'Eiki.

31/12/2024

Fakamonu'ia 'o e 'Aho.
Koheleti 3:1-13.
'Oku fakamatala 'a e folofola ni ki he mo'ui 'a e tangata 'oku fakafaha'ita'u, pea 'oku fakatapui ia 'e he 'Otua. 'Oku kamata e folofola mo e mo'oni ko 'eni, ko e me'a kotoa pe 'oku 'i ai hono taimi, taimi ke tō pea ke ta'aki, ko e 'aho ke tangi mo e 'aho ke kata, ko e 'aho ke tengihia mo e 'aho ke me'e.
Ko e ngaahi fakatauhoa ko 'eni 'oku ne fakamatala'i 'a e ngaahi a'usia 'oku 'i ai e fa'ahinga 'o e tangata pea 'oku ne toe fakamahino'i mai pe, ko e 'Otua 'oku ne p**e ki ai kotoa. 'I he 'etau fononga he mo'ui ko 'eni 'oku tau fa'a fifili ke mahino'i 'a e ngaahi me'a lahi 'oku hoko 'i ho tau ngaahi faha'ita'u. He taimi 'o e mavae mo ho tau ngaahi 'ofa'anga, taimi 'oku tau tatali ai ki ha me'a, taimi 'oku ta'eta'epau mo veiveiua ai e fononga, 'oku tau fa'a ongo'i faingata'a'ia. Ka neongo ia 'oku fakapapau'i mai pe 'e he folofola ko e faha'ita'u kotoa pe 'oku 'i ai hono 'uhinga. Ko e taimi 'a e 'Otua 'oku tonu ma'u pe, neongo 'oku 'ikai fa'a hoa ia mo 'etau fakakaukau pea mo 'etau mahino.
'Oku pole'i pe foki kitautolu 'e he folofola ke tau mo'ui pe 'i he lolotonga. “Kuo u ‘ilo ‘oku ‘ikai ha lelei ‘i he nofo, ka ke te fiefia mo fai lelei lolotonga ‘ete mo‘ui. Ka ko eni foki, ko e kai mo inu ‘a e tangata kotoa pē, mo ‘ene ‘ilo lelei ‘i he‘ene ngaahi ngāue kehekehe, ko e me‘a foaki ia ‘a e ‘Otua.” Ko 'etau mo'ui 'oku 'ikai ko 'etau kataki pe he ngaahi faha'ita'u, ka ko 'etau fononga'i mo e loto hounga'ia pea mo tui, 'o 'ilo'i pau 'a e tapuaki 'a e 'Otua 'i he 'aho kotoa pe.
Ko ia ke tau falala ki he taimi 'a e 'Otua. Ko e taimi 'oku 'ikai malava ai 'e ho tau 'atamai ke makupusi e ngaahi pole 'oku tau fetaulaki mo ia, manatu'i ko e 'Otua 'oku ne 'afio'i 'e ia e me'a kotoa pe. Tuku kiate Ia 'etau palani mo ho tau ngaahi palopalema pea falala kakato te ne 'omai ha fu'u faka'ofo'ofa ma'a kitautolu 'i he 'ene taimi. Ke tau fiefia pe he faha'ita'u 'oku tau lolotonga 'i ai, 'o 'oua leva 'e holi ia ke hoko mai ha faha'ita'u fo'ou. Kole ki he 'Otua ke ne fakahā mai e lesoni mo e tapuaki 'oku totonu ke ke 'inasi ai he mo'ui lolotonga. Fai lelei he taimi kotoa pe ke langilangi'ia ai e 'Eiki 'i he 'etau tokoni ki he kakai kotoa pe, pea fakahaa'i atu e 'ofa mo e maama 'a e 'Otua ki mamani.
Tuku mu'a ha ki'i faingamalie he kamata 'o e ta'ufo'ou ni ke ke fakalaulauloto ai he faha'ita'u 'oku 'i ai ho'o mo'ui. Hiki hifo ange ha tapuaki mo ha lesoni kuo ke 'inasi mo ako ai he ta'u ni, pea fai ha fakamālō'ia 'a e 'Otua 'i he 'ene mgaahi ngaue 'oku fai ki ho'o mo'ui.
Ma'u ha 'aho lelei. Ke tapuaki'i mai koe 'e he 'Eiki.
Happy Blessed New Year.