02/09/2025
मिति: २०८२/०५/१५
प्रेस विज्ञप्ति : संघ संस्था ऐन, २०८२ को मस्यौदा प्रति गम्भीर ध्यानाकर्षण
नेपाल सरकार गृह मन्त्रालयद्वारा राष्ट्रिय निर्देशन ऐन, २०१८, संस्था दर्ता ऐन, २०३४ र समाज कल्याण ऐन, २०४९ लाई एकीकृत गरी तयार गरिएको संघ संस्था ऐन, २०८२ को मस्यौदामाथि राय–सुझाव माग गरिएको विषयमा महासंघको गम्भीर ध्यानाकर्षण भएको छ ।
हामी स्पष्ट पार्न चाहन्छौं कि नागरिक संघ–संस्थालाई प्रवर्द्धन, सहजीकरण र सबलीकरण गर्न उपयुक्त कानूनी संरचना आवश्यक छ। तर, नागरिक संघ–संस्था तथा सरोकारवाला निकायसँग कुनै परामर्श नगरी, विगतका सहमतिहरू बेवास्ता गर्दै ल्याइएको मस्यौदाप्रति हामी गम्भीर असहमति प्रकट गर्दछौं ।
यस मस्यौदाका प्रावधानहरूले
• संघ–संस्थालाई सहज र सबल बनाउनुभन्दा नियन्त्रणमुखी बनाउने,
• नागरिक स्वतन्त्रता, समावेशिता र पारदर्शितामाथि प्रहार गर्ने,
• नागरिक सहभागिताको भूमिकालाई संकुचन गर्ने खालका उद्देश्य बोकेको देखिन्छ ।
त्यसैगरी, मस्यौदाले अनावश्यक प्रशासनिक झन्झट सिर्जना गर्ने र विभिन्न सरकारी निकाय धाउनुपर्ने बाध्यता थप्ने खालका प्रावधानहरू प्रस्ताव गरेको छ, जसले गर्दा यो कानुन अग्रगामी भन्दा बढी पश्चगामी र झन्झटिलो बन्ने आशंका प्रष्ट देखिन्छ ।
नेपालको लोकतान्त्रिक मूल्य–मान्यता, संवैधानिक अधिकार र नागरिक स्वतन्त्रतालाई संकुचन गर्ने यो कदमप्रति हामी दृढ असहमति प्रकट गर्दछौं ।
यसकारण, नेपाल युवा परिषद गृह मन्त्रालयसँग जोडदार माग गर्दछः
• प्रस्तावित मस्यौदालाई संघ–संस्थामैत्री बनाउन,
• सरोकारवालासँग विस्तृत छलफल गर्ने प्रक्रिया सुनिश्चित गर्न,
• मौलिक हक तथा अधिकारको सम्मान गर्दै संघ–संस्थाका लागि कार्यमूलक, सहज र सबलीकरणमुखी वातावरण निर्माण गर्न
नेपाल युवा परिषद परिवार
