31/10/2023
काभ्रे, कार्तिक १४ ।
काभ्रेको पनौती नगरपालिका-२ स्थित सिलाभन्ज्याङमा मिनी ट्रक दुर्घटना हुँदा २ जनाको ज्यान गएको छ । दुर्घटनामा अर्का १ जना घाइते भएका छन् ।
आज दिउँसो पनौतीको कुशादेवीबाट नयाँगाउँतर्फ जाँदै गरेको बा ४ ख ६७२३ नम्बरको पराल बोकेको ट्रक ब्रेक फेल भई सडकबाट करिब ६ सय मिटर तल खस्दा त्यसमा सवार २ जनाको मृत्यु भएको जिल्ला प्रहरी कार्यालय काभ्रेले जनाएको छ ।
ज्यान गुमाउनेमा सवारी चालक पनौती-२ कुशादेवी बस्ने ४० वर्षीय रबिन आचार्य र बेथानचोक गाउँपालिका-२ बस्ने ५० वर्षीय शिवविक्रम केसी रहेको जिल्ला प्रहरी कार्यालय काभ्रेका सूचना अधिकारी डीएसपी राजकुमार श्रेष्ठले जानकारी दिए । उनका अनुसार दुर्घटनामा सख्त घाइते भएका आचार्य र केसीलाई बनेपामा रहेको शिर मेमोरियल अस्पतालमा उपचारका क्रममा ज्यान गएको हो ।
यस्तै, दुर्घटनमा बेथानचोक-२ की ४५ वर्षीया शारदा तिमल्सिना गम्भीर घाइते भएको डीएसपी श्रेष्ठले बताए । तिमल्सिनाको शिर मेमोरियल अस्पतालमै उपचार भइरहेको छ ।
-Jugal Digital
