17/11/2024
पंगेन्हाङ् वंशावली दोस्रो संस्करण विमोचन
मेन्छयायेम, २ मंसीर २०८१
पंगेन्हाङ् समूदायको वंशावली पुस्तक बिमोचन भएको छ । पंगेन्हाङ् समाज केन्द्रीय समिति अध्यक्ष लाखबहादुर पंगेन्हाङको अध्यक्षतामा भएको कार्यक्रममा प्रमुख अतिथि मेन्छयायेम गाउँपालिका अध्यक्ष यादव बहादुर खापुङ्गले वंशावली पुस्तक बिमोचन गर्नुभएको हो ।
शनिबार तेह्रथुमस्थित मेन्छयायेम गाउँपालिका-६ सिकिदेममा भएको दोस्रो पुस्तकमा पंगेन्हाङ्हरूको इतिहास, उद्गमस्थल, संस्कार-संस्कृति, रीतिरिवाज, माङगेन्ना यक, मुन्धुम, वंशबृक्ष समावेश रहेको पंगेन्हाङ समाज केन्द्रीय सचिव काजीमान पंगेन्हाङ्ले बताउनुभये । पंगेन्हाङ्को प्रथम संस्करण २०५१ सालमा प्रकाशन भएको थियो । देश तथा बिदेशमा छरिएर रहेका लिम्बू जाति (पंगेन्हाङ समुदाय)लाई एउटै धागोमा उन्ने र आफ्नो इतिहासको खोज अनुसन्धान गरी एक अर्काप्रति पहिचान गराउने उद्देश्यले वंशावली प्रकाशन गरिएको सचिव काजीमानले बताउनुभयो ।
पोक्लाबाङ यकलाई आफ्नो माङगेन्ना यक मान्ने पंगेन्हाङहरू सेङसेङगुम फेदापहाङ, नाम्बो नाम्हाङदिङ, सिदिइङ हुँदै तेनहाङको माइली श्रीमती पट्टीको लाहाङदोखाको सन्तान नै पंगेन्हाङ भन्ने पुस्तकमा उल्लेख छ । पंगेन्हाङहरूको उद्गमस्थल पोक्लाबाङबाट हाल तेह्रथुमको मेन्छ्यायेमको मोराहाङस्थित सिकिदेम स्थानबाट अन्य जिल्लाहरू सुनसरी, मोरङ, झापा, काठमाडौलगायत देश विदेशमा पंगेन्हाङहरूको बसोबास रहेको छ ।
कार्यक्रममा पोक्लाबाङ यक माङगेन्ना लुङधुङ थाम्रुङ फेदाप अध्यक्ष सेसेहाङ हुक्पा चोङबाङ, पंगेन्हाङ समाज संस्थापक अध्यक्ष क्या. शिव कुमार पंगेन्हाङ्, पंगेन्हाङ समाज धरान तराइ उपसमिति सचिब तथा लेखन सम्पादन उपसमिति डिकबहादुर पंगेन्हाङ्लगायतले शुभकामना मन्तव्य राख्नुभएको थियोे । पंगेन्हाङ समाज केन्द्रीय सचिव काजीमान पंगेन्हाङको लेखन सम्पादन रहेको छ ।
कार्यक्रमको स्वागत मन्तव्य पंगेहाङ बंशवाली लेखनका मुख्य सल्लाहकार/तदर्थ समिति उपाध्यक्ष श्रीप्रसाद पंगेन्हाङ र पंगेन्हाङ् समाज धरान-तराई उपसमिति सह सचिव/लेखन सम्पादन उपसमिति सूर्यबहादुर पंगेन्हाङले राख्नुभएको थियो । विमोचन कार्यक्रममा केलाङ, सांस्कृतिक झाकी समेतको प्रस्तुति रहेको थियो ।
