Kringkastingsringen

15/12/2024

Kringom nr. 4 er på veg til postkassa di! Hovudintervjuet denne gongen er med Marthe Kilen, som me snart får sjå att som dommar i den nye sesongen av "Bakemesterskapet" på NRK. Ho snakkar m.a. om det særeigne matspråket og om korleis kollegaene overtydde ho om at trøndersk var meir enn brukbart på tv. I tillegg blir du kjend med Bjørn Vatne, journalisten frå Ålesund som enda opp som leiar i Den norske Forfatterforening. Både kryssordet og Reprise-spalta har juletema, og me håpar du får glede av bladet i jula!

12/12/2024

I dag har me hatt det årlege møtet mellom NRK-leiinga og språkorganisasjonane. Me fekk sjå fersk språkstatistikk for dei ulike NRK-flatene, og me snakka om både kvantitet og kvalitet på det nynorske innhaldet hjå NRK. Dessutan fekk me høyra om korleis NRK arbeider for å styrkja både kvensk og dei samiske språka. Mange piler peikar oppover, og det er gledeleg!

Me set stor pris på desse møta, og me har inntrykk av at kringkastingssjefen og dei andre leiarane gjer det òg.

På biletet ser du kringkastingssjef Vibeke Fürst Haugen (nr. 3 frå venstre) omkransa av Aksel Torsnes Mehlum, dagleg leiar i Kringkastingsringen, Sebastian Vinsent Natvik, leiar i Norsk Målungdom, Peder Lofnes Hauge, leiar i Noregs Mållag, Gro Morken Endresen, dagleg leiar i Noregs Mållag, Karoline Riise Kristiansen, språksjef i NRK, Cathinka Rondan, radiosjef i NRK, og Jørgen Heid, strategidirektør i NRK. I tillegg deltok Nina Einem, leiar i NRK-språkstyret, på skjerm.

02/12/2024

Sidan vi nett har heidra Kristi Marie Skrede med kopp og diplom for god formidling av kongehusstoff, kan det vel høve å ta fram att dette intervjuet, henta frå ei tidlegare utgåve av Kringom. God lesnad!
https://www.kringkastingsringen.no/2020/09/perspektiv/

25/11/2024

Kopp, diplom og heider til Kristi Marie Skrede og Katrine Nybø!

Som kjent gjer vi – etter innspel frå medlemmene våre – stas på journalistar for framifrå bruk av nynorsk og/eller dialekt i arbeidet. I dag dukka vi opp på eit redaksjonsmøte for å gje diplom og nynorskkopp til to som vi har lagt særleg merke til denne hausten.

Katrine Nybø og Kristi Marie Skrede har formidla amerikansk politikk og norsk monarkistoff til folket på ein utmerkt måte – på nynorsk – i ei tid som har vore turbulent og handlingsmetta. Det veit medlemmene våre å verdsetje!

29/10/2024

Nytt blad i trykken!

Kringom nr. 3 er straks på veg til postkassa di, og i denne utgåva finn du intervju med Lillian Holden, redaktør i den prislønte avisa Hallingdølen, og med Bjørn Tomren, den allsidige musikaren og humoristen som i haust har dukka opp som skodespelar i beste sendetid på NRK. Dessutan kan du m.a. lesa korleis tre av dei totalt to hundre praktikantane ved Nynorsk mediesenter har opplevd det ein av dei kallar ein journalistisk hestekur.

Vi håpar du får glede av bladet! 🤓😍

11/10/2024

Hurra for Håvard Grønli!

Med ujamne mellomrom gjer vi litt kvardagsstas på journalistar for framifrå bruk av nynorsk og/eller dialekt i arbeidet. I dag tidleg troppa vi opp på Marienlyst med eit gjevt diplom og ein like gjev kopp til Håvard Grønli.

Vi kjenner han som ei trygg nynorskrøyst i NRK-institusjonen «Politisk kvarter», og han var dessutan prosjektleiar for NRKs valomat til lokalvalet i 2023 – med både bokmåls- og nynorskversjon for alle kommunane i landet pluss nordsamisk versjon for elleve kommunar!

18/09/2024

Den nye spelefilmen Biru Unjárga – Føkkings Nesseby er Noregs første samiske ungdomsfilm. Han hadde verdspremiere på Toronto International Film Festival (TIFF) tidlegare i månaden. Magasinet Top Film gjev filmen strålande omtale.

Vi gratulerer og gler oss til filmen kjem på norske kinoar om kort tid!
https://www.topfilmmagazine.com/reviews/my-fathers-daughter-is-a-delightful-debut-feature-tiff-review-2024?fbclid=IwY2xjawFQwwlleHRuA2FlbQIxMAABHf_nm14iE6Bz7lbcW-gH6J4p334ldgEIu4jspX_K2F_gHw5CXwzU1OPQXw_aem_jbxKA8F_czmz0TBMOmQa-Q

Our review of TIFF's Norwegian film ‘My Fathers' Daughter’

28/08/2024

Ei ny utgåve av Kringom er på veg i posten til medlemmene våre! I bladet kan du mellom anna lese meir om korleis kringkastingsprisvinnaren blir heidra av kollegaene, kva redaktørane trur om framtida for nynorsk som avisspråk, og kva tida i NRK har gjort med språkmedvitet til P3-Arian. Og som alltid kan du bryne deg på både kviss og kryssord og hyggje deg med nokre faste spalter.

Er du ikkje medlem, seier du? Då vipsar du berre 300 kr (eller 150 kr om du er under 30 år) til 515993 og fyller ut skjemaet på www.kringkastingsringen.no/medlem, og med eitt er du ein av oss og får både blad og kopp i posten!

10/07/2024

Vi slepper ikkje den ferske kringkastingsprisvinnaren Eivind Molde heilt enno. For nye lesarar og følgjarar publiserer vi dette intervjuet med han på nytt, frå den gongen han fekk ein annan pris, nemleg Kulturdepartementets nynorskpris for journalistar.
https://www.kringkastingsringen.no/2020/09/verdsklasse/

28/06/2024

Kringkastingsprisen går til Eivind Molde!

På fredagsmøtet på Marienlyst i dag dukka Kringkastingsringen opp med ei hyggjeleg overrasking. Styreleiar Jógvan Helge Gardar (t.h.) og dagleg leiar Aksel Torsnes Mehlum (t.v.) kunne overrekkje kunstverk og diplom til ein glad prisvinnar, og det mangla ikkje på lovord frå kollegaene i salen.

Foto: Karoline Riise Kristiansen / NRK.

---

Heile grunngjevinga kan du lese her:

Etter 6000 Dagsnytt-bulletengar vart prisvinnaren ein av pionerane i nettsatsinga i NRK, og gjennom 35 år har han levert stoff i alle sjangrar og på alle plattformer. Han er ein av dei fremste nyheitsjournalistane på sitt felt, utanriks, og utmerkjer seg som ein framifrå formidlar av tungt fagstoff, til dømes på klimaområdet – eit komplisert fagfelt som prisvinnaren presenterer på ein enkel og forståeleg måte.

Prisvinnaren har gjort ein særs verdfull innsats for god journalistikk på nynorsk – utan å stikke seg fram. For han er det sjølve journalistikken og formidlinga av bodskapen som er viktig. Han er kjend for eit kortfatta og enkelt språk og er ein av få journalistar som legg vekt på å bruke nynorsk normaltalemål. I ei tid der dialektene har fått god plass i NRK, er det viktig at normert nynorsk òg skal høyrast, slik ein av dei som nominerte prisvinnaren, skriv.

Ikkje minst har prisvinnaren vore ein viktig bidragsytar til at NRK har oppfylt kravet om 25 prosent nynorsk dei siste åra, både gjennom eigen journalistikk og ved å vere ein kunnskapsrik og verdsett rettleiar for kollegaene.

Prisvinnaren har sjølv sagt at om NRK skal levere innhald i verdsklasse, må òg språket vere i verdsklasse. Han har dessutan understreka at nynorskarbeidet må prioriterast i heile organisasjonen. Det er ei glede og ei ære for styret i Kringkastingsringen å få gje prisen til Eivind Molde!

---

Kringkastingsprisen blir delt ut av Kringkastingsringen kvart år. Prisen går til ei røyst som utmerkjer seg med godt språk i radio eller fjernsyn, og som på ein framifrå måte brukar nynorsk eller dialekt i det daglege arbeidet. Styret i Kringkastingsringen er jury for prisen, og prisen har vore delt ut sidan 1978. Prisvinnaren får eit diplom og eit kunstverk, i år laga av biletkunstnaren Erlend Wiggen Bliksrud.

12/05/2024

Nynorskdagen blir markert 12. mai kvart år, til minne om at Stortinget på denne dagen i 1885 jamstilte dei to språka som etter kvart skulle få namna nynorsk og bokmål. I år er det litt ekstra grunn til å feire dagen, for i dag lanserer Vipps endeleg ein nynorskversjon av tenesta.

Gratulerer med dagen!

Vips, ... so skal Vipps kome på nynorsk. Og dette skjer i dag på sjølvaste nynorskdagen. Mållaget jublar og Språkrådet rosar leiinga i Vipps.

11/05/2024

For første gong på 18 år sende Noreg eit norskspråkleg bidrag til Eurovision Song Contest, og sjølvsagt gav det finaleplass – for vi veit jo at alt blir betre med (og på) nynorsk!

Vi ønskjer Gåte lykke til i den store finalen i kveld! 🐺🏆🇳🇴

Foto: Sarah Louise Bennett / EBU.

07/05/2024

Sist fredag kom kunngjeringa om at NRK-nestor Ingvild Bryn hadde fått Kultur- og likestillingsdepartementets nynorskpris for journalistar. Kringkastingsringen gratulerer med ein særs velfortent pris!

Ingvild Bryn i NRK er tildelt Kultur- og likestillingsdepartementets nynorskpris for journalistar.

02/05/2024

I 20 år har NRK Nynorsk mediesenter utdanna nynorskpraktikantar, og no er kullet for hausten 2024 klart. Vi ønskjer lykke til!

Dei kjem frå Svolvær, Vinje, Ulsteinvik, Sandane og Jølster. I august går dei inn dørene i Nynorskhuset i Førde for å starte opp som kull 41 ved NRK Nynorsk mediesenter.

08/04/2024

Det vart eit vellykka årsmøte i Kringkastingsringen i kveld. Victor Okpe frå Språkrådet innleidde til ordskifte om språkpolitikk på mediefeltet, og Jógvan Helge Gardar vart attvald som styreleiar. Takk til alle som kom og bidrog med engasjement og innspel!

Det nyvalde styret:

Leiar
Jógvan Helge Gardar (26)

Styrefolk
Hannah Kolås (31)
Elise Kvien (27)
Erlend Blaalid Oldeide (39)
Olav Wixøe Svela (24)

Varafolk
1. Kristin Mork (44)
2. Hans-Olav Rise (32)
3. Beate Marie Dahl Eide (42)
4. Arne Henning Årskaug (38)

07/04/2024

I morgon (måndag 8. april) kl. 18 er det tid for årsmøte! Vi har lånt møterom hjå Språkrådet, og adressa er Observatoriegata 1 B (ved Solli plass i Oslo). Hugs å sende ein e-post til [email protected] om du har tenkt å ta turen, slik at vi får kjøpt inn nok biteti. Du finn alle årsmøtedokumenta her:

25/03/2024

Kringkastingsprisen for 2023 – nominasjonsfrist i dag!

Kringkastingsprisen går til ei røyst i eteren som utmerkjer seg med godt språk i radio eller fjernsyn, og som på ein framifrå måte brukar nynorsk eller dialekt i det daglege arbeidet. Alle medlemmer av Kringkastingsringen kan føreslå kandidatar.

Har du ein favoritt? Send namn og grunngjeving til [email protected] i dag!

På biletet ser vi Arill Riise få prisen for 2016 frå dåverande styreleiar Vegard T. Foseide.