23/11/2021
އިންސާނާ މަރުވުމުން ލެވޭ ހުދު ފޮތިގަނޑަކީ ތިމާގެ އެންމެ ފަހު ފޭރާމެވެ. ކެލާ އަތަރާއި ބޮކަރަކީ ތިމާ އެންމެ ފަހުން ލާނެ ހުވަނދެވެ. އާނއެކެވެ. މަރުވާނެ ވަގުތެއް ، މަރުވާނެ ތަނެއް ނޭނގުނު ކަމުގައި ވީ ނަމަވެސް ޔަގީންވާ ކަމަކީ މަރަކީ ކުރިމަތިލާން ޖެހޭނެ ކަމެއް ކަމެވެ. ކަށްވަޅަކީ އަޅުގަނޑުމެން އެންމެން ވެސް ދުނިޔޭގެ އަޖަލު ހަމަކޮށް ދާން އޮތް މަންޒިލް ކަމެވެ.
ތިމާ މަރުވުމުން ކަށްވަޅަށް ލެވޭ ދުވަހުން ފެށިގެން މަޑު މަޑުން ތިމާގެ ހަށިގަނޑު ދާނީ ފަނާވަމުންނެވެ. އެގޮތުން ތިމާ ވަޅުލާތާ 3 ވަނަ ދުވަހު ތިމާގެ އިނގިލި ތަކުގެ ނިޔަފަތިތައް އިނގިލިތަކާއި ވަކިވާން ފަށައެވެ. އަދި އޭގެ އަނެއް ދުވަހު، އެހެނީ 4 ވަނަ ދުވަހު ބޮލުގެ އިސްތަށިގަނޑު ހަލާކުވެ ނެތިދާން ފަށައެވެ.
ތިމާ ވަޅުލާ ހިސާބުން ފެށިގެން މަޑުމަޑުން ދާނީ ތިމާގެ ހަށިގަނޑު ފަނާ ވަމުންނެވެ. ނިކަން ވިސްނާލަ ބަލާށެވެ. ތިމާ ވަޅުލާތާ 5 ވަނަ ދުވަހު ތިމާގެ ސިކުނޑި މަޑު މަޑުން ވިރެން ފަށައެވެ. އަދި 6 ވަނަ ދުވަހުން ފެށިގެން ބަނޑު ތެރޭގައިވާ ހުރިހާ ގުނަވަންތަކެއް ވިރި، އަނގައިންނާއި، ކުރިމަތި ފަރާތް އަދި ފުރަގަސް ފަރާތުން ބޭރުވާނެއެވެ.
އަދި ހަމައެއާއެކު ތިމާ ވަޅުލެވޭތާ 60 ވަނަ ދުވަހު ތިމާގެ މަސްގަނޑު ކަށިތަކާއި ވަކިވެ ދެއެވެ. އަދި ދަންނާށެވެ. މިވަގުތުތަކުގައި ޖަނަވާރެއްވެސް ތިމާގެ ކުނިވަމުންދާ ހަށިގަނޑުގެ ވަސް ޖެހޭ ހިސާބުގައި ވެސް ހުންނާކަށް ބޭނުމެއް ނުވާނެއެވެ. ދުވާ ކުނި ވަހުން ކެތް ނުކުރެވޭނެތީއެވެ.
ވީއިރުގައި ތިމާ ދުނިޔެމަތީގައި އުޅޭއިރުގައި، ބޮޑާ ވަނީ ކޮންކަމަކާ ހެއްޔެވެ؟ ރުޅިވެރިކަމާއި ދަހިވެތިކަން އިންތިހާއަށް ބޮޑުވަނީ ކީއްވެގެންތޯއެވެ؟ ދަންނަވަންތޯއެވެ؟ މަރުވުމުން ދޮށްޓެއް ހަގެއް، މުއްސަންޖެއް ފަގީރެއް ނުވަތަ ކަޅެއް ދޮނެއް ނެތެވެ. ކޮންމެ އިންސާނެއް ވެސް މަރުވުމަށްފަހު ދާން އޮތީ އެއް މަންޒިލެކެވެ. ލާން އޮތީ އެއް ފޭރާމެކެވެ. ކުރެވޭނީ އެއް ސުވާލުތަކެވެ
އެހެންކަމުން ދުނިޔޭގައި އުޅޭއިރު ބޮޑާވެ ކިބުރުވެރި ނުވެ، އެކަކު އަނެކަކަށް އިޙުތިރާމް ކޮށް އިޚްލާޞް ތެރި ކަމާއެކު ހެޔޮ ޢަމަލު ކުރުން ގިނަ ކުރާށެވެ. މާތް الله އަޅަމެންނަށް ހެޔޮ ވިސްނުން ދެއްވާ އަދި ހެޔޮ މަގުގައި ސާބިތު ވުމުގެ ހެޔޮ ތައުފީޤު މިންވަރުކޮށް ދެއްވާނދޭވެ! އާމީން
