01/08/2022
Монголд цөлжилт хэр их байна вэ?🤔
Нэгдсэн Үндэстний Байгууллагын судалгаагаар Монгол улс дахь бэлчээрийн 90% нь цөлжилтөд өртөх эрсдэлтэй гэж дүгнэжээ. Үүний 76% нь аль хэдийн цөлжиж эхэлсэн гэж үздэг байна. Хэрэв цөлжилт энэ эрчээрээ явагдвал, 2080 он гэхэд Хэнтий, Хөвсгөл аймгуудаас бусад Монгол орны бүх газар нутаг цөлжинө гэсэн тооцоолол гарчээ. Монгол улсын засгийн газар ойн түймэр, тогтворгүй ойн аж ахуй болон уул уурхайн үйл ажиллагааг цөлжилтөд хүргэх хамгийн том шалтгаанууд гэж дүгнэсэн. Саяхан хийгдсэн судалгаагаар бэлчээрийн даац хэтэрсэн нь цөлжилтөд нөлөөлөх бас нэгэн томоохон шалтгаан болж байна гэсэн үр дүн гарсан. Энэхүү судалгаа нь цаашлаад гадаадад экспортлох ноолуурын эрэлт хэрэгцээ нэмэгдэхийн хэрээр ямаа түлхүү тэжээх болсон тухай онцолжээ. Манай улсын 70 сая гаруй таван хошуу малын 29.3 сая нь ямаа бөгөөд ямаа нь өвс ногоог үндэстэй нь хамт иддэгээрээ бэлчээрийг хамгийн их сүйтгэдэг амьтан билээ. Үүний хажуугаар, Монголын өмнөд хэсэгт байдаг говь цөлийн бүс улам тэлсээр байна.
Бид хэрхэн цөлжилттэй тэмцэж чадах вэ?🌏
Цөлжилтийг бууруулах хамгийн чухал аргуудын нэг бол мод тарих юм. Ой моджуулснаар хөрсний элэгдэл багасан цөлийг тэлэхээс сэргийлдэг. 1996 онд Нэгдсэн Үндэстний Байгууллага цөлжилттэй тэмцэх конвенцийг баталж, 2030 он гэхэд Африк тивийн 20 гаруй оронд 100 сая га газрыг дахин сэргээх “Ногоон Хэрэм” төслийг санаачилжээ. Харин 1996 онд Монгол улсын засгийн газар бэлчээр ба ой модны тогтвортой үйл ажиллагааг дэмжсэн цөлжилттэй тэмцэх үндэсний хөтөлбөрийг зарласан. 2010 онд мөн үндэсний мод тарих өдрийг тэмдэглэх ерөнхийлөгчийн зарлиг гарснаас хойш одоогоор 16 сая гаруй мод, бут сөөг тариад байна. Гэвч эдгээр модны ургалтын хувийг тооцоогүй бөгөөд мод тарих нь цөлжилтийг багасгах шийдлүүдийн зөвхөн нэг хэсэг юм. Ой мод тарихаас гадна усны зохистой хэрэглээ, хөрсний үржил шимийг нэмэгдүүлэх, салхины хаалт, ойн зурвасын тусламжтайгаар хөрсийг нягтаршуулах зэрэг нь цөлжилтөөс сэргийлэх боломжит аргууд билээ.
/ ЭХ СУРВАЛЖ: Breathe Mongolia - Clean Air Coalition /
We are a group of young people dedicating to give necessary information on earth-friendly lifestyle.
