Popular News Journal

10/12/2024

အင်ဒို-မြန်မာပွဲစဉ်အတွင်း အခွင့်အရေးကောင်းများရရှိခဲ့သော်လည်း ဂိုးအဖြစ်မပြောင်းလဲနိုင်သည့်အတွက် ရှူံးနိမ့်ခြင်းဖြစ်ဟု ဦးမျိုးလှိုင်ဝင်းပြော

ASEAN Mitsubishi Electric Cup 2024 ပြိုင်ပွဲ အင်ဒိုနီးရှား-မြန်မာ အဖွင့်ပွဲစဉ်အတွင်း အခွင့်အရေးကောင်းများရရှိခဲ့သော်လည်း ဂိုးအဖြစ်မပြောင်းလဲနိုင်သည့်အတွက် ရှူံးနိမ့်ခြင်းဖြစ်သည်ဟု မြန်မာအသင်းနည်းပြချုပ် ဦးမျိုးလှိုင်ဝင်းက ပွဲပြီး သတင်းစာရှင်းလင်းပွဲအတွင်းပြောကြားခဲ့သည်။

ယမန်နေ့ ညနေပိုင်းက ရန်ကုန်မြို့ ၊သုဝဏ္ဏကွင်းအတွင်း ယှဉ်ပြိုင်ကစားကြသည့် အင်ဒို-မြန်မာပွဲစဉ်အတွင်း ပထမပိုင်းပွဲချိန် ပြီးဆုံးသည်အထိ နှစ်ဖက်အသင်း ဂိုးသွင်းယူနိုင်ခြင်းမရှိကြဘဲ ၊ ဒုတိယပိုင်းပွဲ့ချိန်အတွင်းမှသာ အင်ဒိုနီးရှားအသင်းက တစ်ဂိုးသွင်းယူ၍ ရမှတ် (၃)မှတ် ရရှိခဲ့ခြင်းဖြစ်သည်။

"ပထမပိုင်းမှာလည်း အခွင့်အရေးတွေ အများကြီး ဖန်တီးနိုင်ခဲ့တယ်။ ဒါပေမယ့် ကျွန်တော်တို့ ဂိုးအဖြစ်တော့ မပြောင်းလဲနိုင်ခဲ့ဘူး။ အသင်းအနေနဲ့ ကံမကောင်းခဲ့ဘဲ ရသင့်တဲ့ဂိုးတွေ မရခဲ့ပါဘူး။ဘောလုံးမှာ ဘယ်အသင်းမဆို ရသင့်တဲ့ဂိုးတွေမရရင် မရှုံးသင့်ဘဲ ရှုံးရတဲ့ပွဲတွေ ရှိပါတယ်။ အရန်လူအင်အားပိုင်းမှာ အင်ဒိုနီးရှားက ကျွန်တော်တို့ထက်သာပါတယ်။ အဖွင့်ပွဲမှာ အရေးနိမ့်ခဲ့ပေမယ့် ဖိလစ်ပိုင်အသင်းနဲ့ပွဲအတွက် သေချာလေး ပြင်ဆင်သွားမှာပါ”ဟု ၎င်းက ပြောသည်။

ထို့ကြောင့် ကစားသမားများကို နှစ်ရက်အတွင်း Recovery ဖြစ်အောင်ပြန်လုပ်၍ အုပ်စုအဆင့် တက်ရောက်နိုင်ရေးအတွက် လာမယ့် ဖိလစ်ပိုင်ပွဲစဥ်၌ အမှတ်ရရှိအောင် ကစားသွားမည်ဟုဆိုသည်။

ပြိုင်ပွဲအတွင်း ထိုင်း၊ ဗီယက်နမ်၊ အင်ဒိုနီးရှား၊ မြန်မာ၊ မလေးရှား ၊ စင်ကာပူ၊ ဖိလစ်ပိုင်၊ကမ္ဘော ဒီးယား၊ လာအိုနှင့် တီမောအသင်းတို့ ဝင်ရောက်ယှဉ်ပြိုင်သွားကြမည်ဖြစ်သည်။

10/12/2024

မြဝတီမြို့ လောကချမ်းသာရွှေပြည်ငွေပြည် အောင်တော်မူစေတီတော် ထီးတော်တင်အခမ်းအနားတွင် လူဦးရေ(၅,၅၀၀)အား အခြေခံစားကုန်များ လှူဒါန်းမည်

ကရင်ပြည်နယ် ၊ ထိုင်း-မြန်မာနယ်စပ် မြဝတီမြို့ရှိ လောကချမ်းသာရွှေပြည်ငွေပြည် အောင်တော်မူစေတီတော် ထီးတော်တင်အခမ်းအနားကို ဒီဇင်ဘာ (၁၀)ရက် တွင် ကျင်းပပြုလုပ်မည်ဖြစ်ရာ၊ ယင်းအခမ်းအနားအတွင်း လူဦးရေ(၅,၅၀၀)အတွက် အခြေခံစားကုန်များ ပေးဝေလှူဒါန်းသွားမည်ဖြစ်ကြောင်း သိရသည်။

ထိုသို့ လှူဒါန်းရာတွင် ဆန်၊ ဆီ၊ ဆေး၊ ဆား စသည့် လှူဖွယ်ပစ္စည်းများပေးဝေသွားမည်ဖြစ်ကြောင်း ဒေသခံတစ်ဦးထံက သိရသည်။

အဆိုပါ လောကချမ်းသာရွှေပြည်ငွေပြည် အောင်တော်မူစေတီတော်ကို မြဝတီမြို့ စိမ်းလဲ့မြိုင်ကားဝင်းအနီး သစ်တံခါးကျောင်းတိုက်တွင် တည်ထားကိုးကွယ်ထားခြင်းဖြစ်သည်။

10/12/2024

အဂတိလိုက်စားမှုသည် ဒီမိုကရေစီစနစ်ကိုထိခိုက်စေဟု နစက ဥက္ကဋ္ဌပြော

အဂတိလိုက်စားမှုကြောင့် နိုင်ငံအတွက် ထိခိုက်စေမှုများနှင့်ပတ်သက်၍ ဒီဇင်ဘာ ၉ ရက်နံနက်ပိုင်းကကျင်းပသည့် အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့ အထိမ်းအမှတ်အခမ်းအနားတွင် နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်မှ ထည့်သွင်း ပြောကြားခဲ့သည်။

အဂတိ လိုက်စားမှုများကြောင့် လူ့ဘောင်လောကတွင် တရားမျှတမှုပျောက်ကွယ်ပြီး နိုင်ငံတော်နှင့် အများပြည်သူကိုထိခိုက်စေသည်ဟု နစကဥက္ကဋ္ဌက ပြောသည်။

ထို့ပြင်အကြမ်းဖက်တိုက်ခိုက်မှုများကို အားပေးခြင်းများဖြစ်ပေါ်လာစေနိုင်သည့်အပြင် တရားဥပဒေစိုးမိုးရေးနှင့် ဒီမိုကရေစီစနစ်အား ထိခိုက်စေခြင်းတို့ဖြစ်စေနိုင်သည်ဟု ပြောသည်။

အလားတူ နိုင်ငံဖွံ့ဖြိုးတိုးတက်ရေးရည်မှန်းချက်ပန်းတိုင်ကိုပျက်စီးစေသည့်အပြင် တရားဥပဒေစိုးမိုးရေးနှင့်တည်ငြိမ်အေးချမ်းမှုကိုလည်း ထိခိုက်စေနိုင်သည်ဟုပြောသည်။

ဖွံ့ဖြိုးပြီးနိုင်ငံများနှင့် ဖွံ့ဖြိုးဆဲနိုင်ငံများ၏ အစိုးရပိုင်းများသာမက ပုဂ္ဂလိကပိုင်းနှင့် အ မြတ်အစွန်းမဟုတ်သည့် အချို့ကုသိုလ်ဖြစ်လှူဒါန်းရေးအဖွဲ့များတွင်ပါ အဂတိလိုက်စားမှုပြဿနာအမြစ်တွယ်လာနေသည်ဟု ပြောသည်။

" ခြိမ်းခြောက်ငွေညှ-စ်ခြင်း၊ လိ-မ်လည်ခြင်း၊ နိုင်ငံတော်ဘဏ္ဍာနဲ့ ပစ္စည်းတွေကို အလွဲသုံးစားလုပ်ခြင်း၊ ပြည်သူပိုင်ပစ္စည်းငွေကြေးတွေကို ကိုယ်ကျိုးအတွက်မသင့်မလျော်သုံးစွဲခြင်း၊ မလျော်ဩဇာသုံးပြီး ကိုယ်ကျိုးအတ္တကိုရယူခြင်းတွေဟာ အဂတိလိုက်စားမှုတွေပဲဖြစ်ပါတယ်"ဟု နစက ဥက္ကဋ္ဌကပြောသည်။

ထို့ကြောင့် နစက အနေဖြင့် နိုင်ငံဖွံ့ဖြိုးတိုးတက်ရေးတွင်အရေးကြီးသည့် အဂတိလိုက်စားမှု လျော့နည်းကျဆင်းလာစေရေး၊ အဂတိကင်းစင်သည့် လူ့အဖွဲ့ အစည်းတစ်ရပ်ဖြစ်စေရေးနှင့် အများပြည်သူတို့၏ အကျိုးစီးပွားကိုကာကွယ်ပေးရေးတို့အတွက် အဂတိလိုက်စားမှု တိုက်ဖျက်ရေးကို ကြိုးပမ်းအကောင်အထည်ဖော်ဆောင်ရွက်လျက်ရှိသည်ဟု နစက ဥက္ကဋ္ဌကပြောကြားခဲ့သည်။

10/12/2024

ငြိမ်းချမ်းရေးသည်သာ အဓိကဖြစ်ခြင်းကြောင့် UWSA အနေဖြင့် ငြိမ်းချမ်းရေးကိုသာ လိုလားဟု အသိပေးထုတ်ပြန်လာ

လက်ရှိ ကမ္ဘာပေါ်တွင် ဖြစ်ပေါ်နေသည့် ပဋိပက္ခများအကြား ငြိမ်းချမ်းရေးသည်သာ အဓိကလမ်းကြောင်းဖြစ်ခြင်းကြောင့် UWSA အနေဖြင့် ငြိမ်းချမ်းရေးကိုသာ လိုလားပြီး သတင်းအမှားများကို သေချာစိစစ်ပြီးမှ ယုံကြည်ကြစေလိုကြောင်း အသိပေးထုတ်ပြန်ထားသည်။

ပြီးခဲ့သည့် နိုဝင်ဘာ (၂၅)ရက်က ထိုင်းစစ်တပ်နှင့် UWSA တို့အကြား ဖြစ်ပွားခဲ့သည့် နယ်မြေအငြင်းပွားမှုအတွင်း UWSA တပ်စခန်းများကို ယခု ဒီဇင်ဘာ (၁၈)ရက်နေ့ နောက်ဆုံးထားပြီး ဖယ်ပေးရန် ဆိုသည့် ဖြစ်ရပ်အပေါ် ရည်ရွယ်ထုတ်ပြန်ခဲ့ခြင်းဖြစ်သည်။

အသိပေးထုတ်ပြန်မှုတွင် UWSA သည်ထိုင်းစစ်တပ်၏ ရန်သူမဟုတ်သကဲ့သို့ တိုက်ပွဲဖြစ်ပွားမည့် စစ်ရေးသတင်းအမှားများကို မဟုတ်မမှန်လုပ်ကြံ ရေးသားသည့်အပေါ် အပြင်းအထန် ကန့်ကွက်ရှုတ်ချကြောင်း ဖော်ပြထားသည်။

ထို့ပြင် "ဝ" ဒေသ ၁၇၁ ဧရိယာအတွင်းက နယ်မြေ (၉) ခုကို ထိုင်းဖက်က ဖယ်ခိုင်းခဲ့ခြင်းသည် အမှန်တကယ်ဖြစ်ကြောင်း၊ နိုင်ငံတော်အချင်းချင်း ဆွေးနွေးရမည့်ကိစ္စရပ်သာဖြစ်ပြီး နိုင်ငံတော် ခေါင်းဆောင်ပိုင်းကိုလည်း သတင်းပေးပို့ပေးထားပြီဖြစ်ကြောင်း၊ ထိုင်း‌တော်ဝင်စစ်တပ်က မြေပြင်တွင် အင်အားတိုးချဲ့ထားပြီး "ဝ" တပ်ဘက်ကတော့ ပုံမှန်အခြေအနေသာရှိကြောင်းကို UWSA ပြင်ပဆက်ဆံရေးရုံး တာဝန်ခံ ဦးညီရန်းက ဒေသအခြေစိုက်မီဒီယာကို ဖြေကြားထားသည်။

ယခုကဲ့သို့ စစ်ရေးတင်းမာသည့် သတင်းများကြောင့် မယ့်ဟောင်ဆန်၊ ဒွိုင်ဟာမာ၊ နောင်လျန်ဒေသ အခြေစိုက်ထားသည့် နှစ်ဖက်တပ်များအကြား ပြည်သူများ အထိတ်တလန့်ဖြစ်ခဲ့ရပြီး၊ ယင်းအပေါ် နှစ်ဖက်တပ်ထိတွေ့ တိုက်ပွဲဖြစ်ပွားသည်အထိ အန္တရာယ်ရှိသည့် အခြေအနေ မဟုတ်ကြောင်း ထိုင်းစစ်တပ် ပြောရေးဆိုခွင့်ရှိသူ ဗိုလ်မှူးကြီး သီရတ်ဆွန်ဘက်ဆရီ ကလည်း ပြောကြားထားသည်။

10/12/2024

အဂတိလိုက်စားမှုကြောင့်ရရှိလာသည့် ငွေကြေးနှင့်ပစ္စည်းများကို ပြည်သူ့ဘဏ္ဍာအဖြစ် သိမ်းဆည်းခြင်းအား ဥပဒေနှင့်အညီတိတိကျကျဆောင်ရွက်ရမည်

အဂတိလိုက်စားမှုကြောင့်ရရှိလာသည့် ငွေကြေးနှင့်ပစ္စည်းများကို ပြည်သူ့ဘဏ္ဍာအဖြစ် သိမ်းဆည်းခြင်းအား ဥပဒေနှင့်အညီတိတိကျကျဆောင်ရွက်ရမည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်မှ ဒီဇင်ဘာ ၉ ရက်နံနက်ပိုင်းကကျင်းပသည့် အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့ အထိမ်းအမှတ်အခမ်းအနားတွင် မှာကြားခဲ့ခြင်းဖြစ်သည်။

အဂတိလိုက်စားမှုကြောင့်ရရှိသည့် ငွေကြေးနှင့် ပစ္စည်းများကို ပြည်သူ့ဘဏ္ဍာအဖြစ်သိမ်းဆည်းခြင်းအား အဂတိလိုက်စားမှုတိုက်ဖျက်ရေးဥပဒေတွင် အတိအကျထည့်သွင်းပြဋ္ဌာန်းထားသည်ဟု ပြောသည်။

" ဒါ့ကြောင့် အဂတိလိုက်စားမှုကျုးလွန်သူတွေကို တရားစွဲဆိုအရေးယူရုံသာမက အဂတိလိုက် စားမှုကြောင့်ရရှိလာတဲ့ ငွေကြေးနဲ့ပစ္စည်းတွေကို ပြည်သူ့ဘဏ္ဍာအဖြစ်သိမ်းဆည်းတာကို ဥပဒေနဲ့အညီ တိတိကျကျထိရောက်အောင်ဆောင်ရွက်ကြပါမယ်"ဟု နစက ဥက္ကဋ္ဌကမှာကြားသည်။

ထို့ပြင် အဂတိလိုက်စားမှုကင်းစင်သည့် နိုင်ငံတစ်နိုင်ငံဖြစ်လာစေရန် အစိုးရနှင့်ပြည်သူလူထုတစ်ရပ်လုံးမှ အဂတိလိုက်စားမှုတိုက်ဖျက်ရေးလုပ်ငန်းများကို စိတ်ပါဝင်စားစွာဟန်ချက်ညီညီ ပူးပေါင်းဆောင်ရွက်သွားကြရမည်ဟု ပြောသည်။

မျိုးဆက်သစ်လူငယ်များအား အသိပညာပေးဟောပြောနေမှုများနှင့်ပတ်သက်၍လည်း “ လူငယ်တွေ ကျောင်းသား၊ ကျောင်းသူတွေကို ငယ်ရွယ်စဉ်ကစပြီး အဂတိကင်းရှင်းစေဖို့၊ စိတ် ထားဖြူစင်သန့်ရှင်းစေဖို့အတွက် လူ့ဂုဏ်သိက္ခာနဲ့လူမှုကျင့်ဝတ်တွေကို သွန်သင်ပြသဆုံးမပေးကြရပါမယ်"ဟု နစက ဥက္ကဋ္ဌကမှာကြားသည်။

ထို့ပြင် နစက အနေဖြင့် အဂတိလိုက်စားမှုတိုက်ဖျက်ရေးလုပ်ငန်းများအား ကော်မရှင်နှင့်ပူး ပေါင်းဆောင်ရွက်လျက်ရှိကာ မြန်မာနိုင်ငံတွင် အဂတိလိုက်စားမှုများကင်းရှင်းစေရန် အဂတိ လိုက်စားမှုတိုက်ဖျက်ရေးအား အမျိုးသားရေး တာဝန်တစ်ရပ်အဖြစ် တက်ညီလက်ညီဝိုင်းဝန်းကြိုးပမ်းဆောင်ရွက်ကြရမည်ဟု နစက ဥက္ကဋ္ဌကမှာကြားခဲ့သည်။

09/12/2024

09/12/2024

AFF Mitsubishi Electric Cup 2024
အင်‌ဒို-မြန်မာ ယှဥ်ပြိုင်ကစားမှု အင်ဒို တစ်ဂိုးသွင်းယူ အနိုင်ရလဒ်ထွက်ပေါ်

ယနေ့ ဒီဇင်ဘာ (၉)ရက် ည(၇)နာရီအချိန်၌ AFF Mitsubishi Electric Cup 2024ပြိုင်ပွဲကို အင်‌ဒို-မြန်မာ ယှဥ်ပြိုင်ကစားကြရာ အင်ဒိုနီးရှားအသင်းက တစ်ဂိုးသွင်းယူ၍အနိုင်ရလဒ်ထွက်ပေါ်ခဲ့သည်။

ယနေ့ပွဲစဉ်အတွင်း ပထမပိုင်း ပွဲချိန်အပြီး နှစ်ဘက်အသင်းဂိုးသွင်းယူနိုင်ခြင်းမရှိကြဘဲ ဒုတိယပိုင်း ပွဲချိန်အပြီးတွင် အင်ဒိုက တစ်ဂိုးသွင်းယူခဲ့ခြင်းဖြစ်သည်။

မြန်မာ့လက်ရွေးစင်အသင်း ကစားသမားပွဲထွက်စာရင်းတွင် ဟိန်းဖြိုးဝင်း ၊ သက်ဟိန်းစိုး၊ နန္ဒကျော်၊ လွင်မိုးအောင်၊ သီဟဇော်၊ မောင်မောင်လွင်၊ ဝေလင်းအောင်၊ အောင်ကောင်းမာန်၊ သီဟထက်အောင်၊ ဇော်ဝင်းသိန်း၊ ဇင်ညီညီအောင်တို့ ကစားခဲ့ကြသည်။

AFF Mitsubishi Electric Cup 2024 ပြိုင်ပွဲအတွက် အင်ဒိုနီရှားအသင်း အနေဖြင့် ကမ္ဘာ့ဖလားခြေစစ်ပွဲကစားနေသည့်ဥရောပအခြေစိုက် ကစားသမားတချို့ပါဝင်လာပြီး၊ ယင်းအနက် အင်ဒိုနီးရှားလက်ရွေးစင်အသင်းကြီးရှိ ဝါရင့် ကစားသမား (၇) ဦးအထိပါဝင်နေသည်။

ပြိုင်ပွဲအတွင်းထိုင်း၊ ဗီယက်နမ်၊ အင်ဒိုနီးရှား၊ မြန်မာ၊ မလေးရှား ၊ စင်ကာပူ၊ ဖိလစ်ပိုင်၊ကမ္ဘော ဒီးယား၊ လာအိုနှင့် တီမောအသင်းတို့ ဝင်ရောက်ယှဉ်ပြိုင်သွားကြမည်ဖြစ်သည်။

09/12/2024

မြန်မာနိုင်ငံ၏ အားကစားအဆင့်အတန်းပြန်လည်ဦးမော့လာပြီဟု နစက ဥက္ကဋ္ဌပြော

နစက အနေဖြင့် အားကစားကဏ္ဍကို အလေးထားမြှင့်တင်ဆောင်ရွက်ပေးနေသဖြင့် နိုင်ငံ၏ အားကစားအဆင့်အတန်းမှာ ပြန်လည်ဦးမော့လာပြီဖြစ်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ပြောသည်။

၎င်းမှ ယနေ့ ဒီဇင်ဘာ ၉ ရက်ညပိုင်းက နေပြည် တော်၌ကျင်းပသည့် ပဉ္စမအကြိမ် အမျိုးသားအားကစားပွဲတော်ဖွင့်ပွဲအခမ်းအနားတွင် မိန့်ခွန်းပြောကြားရာ၌ထည့်သွင်းပြောကြားခဲ့ခြင်းဖြစ်သည်။

လူငယ်များ၏ ပညာရေးနှင့်ကျန်းမာရေးကို အားကစားကဏ္ဍနှင့်ပေါင်း၍ တိုးမြှင့်ဆောင်ရွက်နိုင်ရန် အားကစားနှင့်လူငယ်ရေးရာဝန်ကြီးဌာနမှ အကောင်အထည်ဖော်ဆောင်ရွက်လျက်ရှိကာ ထူးချွန်သည့် အားကစားသမားများပေါ်ထွက်ရေးအတွက် လူထုအားကစားအဆင့်မှ အဆင့်ဆင့်အကောင်အထည်ဖော်ဆောင်ရွက်လျက်ရှိ၍ ကျောင်းသားလူငယ်များ၊ မသန်စွမ်းသူများအပါအဝင် ပြည်သူတစ်ရပ်လုံးမှ လိုက်ပါဆောင်ရွက်ရန်လိုအပ်သည်ဟု တိုက်တွန်းမှာကြားသည်။

ထို့ပြင် နိုင်ငံတကာပြိုင်ပွဲများ၌ မြန်မာ့အလံအား တိုင်ထိပ်ရောက်ရန် လွှင့်ထူနိုင်စွမ်းရှိသည့် အားကစားအောင်မြင်မှုများသည် နိုင်ငံ့ဂုဏ်သိက္ခာကို အလွန်မြင့်မားစေပြီး နိုင်ငံ၏အဆင့်အတန်းကို မြှင့်တင်ပေးနိုင်သဖြင့် အားကစားကဏ္ဍမြှင့်တင် ဆောင်ရွက်ရေးအား နိုင်ငံသားတိုင်းမှ ဝိုင်းဝန်းပူးပေါင်းဆောင်ရွက်ပေးကြရမည်ဟု တိုက်တွန်းမှာကြားသည်။

" နစက အနေနဲ့ အားကစားကဏ္ဍကိုမြှင့်တင် ဆောင်ရွက်ပေးနေတဲ့အတွက် အခုအချိန်မှာ နိုင်ငံရဲ့အားကစားအဆင့်အတန်းဟာ ပြန်လည်ဦးမော့လာနေပြီဖြစ်သလို တိုးတက်အောင်မြင်မှုတွေလည်း အထိုက်အလျောက်ရရှိနေပြီဖြစ်ပါတယ်"ဟု နစက ဥက္ကဋ္ဌကပြောသည်။

ထိုသို့ အောင်မြင်နေမှုများအား ကျေနပ်နေကြခြင်းမရှိဘဲ ယခုထက်ပိုမို၍ အောင်မြင်မှုများရရှိရန်၊ အတိတ်ကအောင်မြင်မှုမျိုးပြန်လည်ရရှိရန်၊ နိုင်ငံတကာနယ်ပယ်တွင် မြင့်မြင့်မားမားရပ်တည်နိုင်ရန် ဆက်လက်ကြိုးပမ်းဆောက်ရွက်သွားရမည်ဟု တိုက်တွန်းမှာကြားသည်။

ထို့ပြင် နိုင်ငံတကာအဆင့်ပြိုင်ပွဲများ၌ ဆုတံဆိပ်များဆွတ်ခူးရရှိခဲ့ကြသည့် နိုင်ငံ့ဂုဏ်ဆောင်အားကစားသမားများကို ဆုကြေးငွေအပါအဝင် ဂုဏ်ပြုချီးမြှင့်မှုများအား ထိုက်ထိုက်တန်တန်တိုးမြှင့်ဆောင်ရွက်ပေးလျက်ရှိ၍ ယခု အားကစားပြိုင်ပွဲကြီးတွင် ဝင်ရောက်ယှဥ်ပြိုင်ကြသည့် အားကစားသမားများအနေဖြင့် အောင်မြင်မှုရရန်၊ နိုင်ငံ့လက်ရွေးစင်ဖြစ်ရန်၊ နိုင်ငံ့ဂုဏ်ဆောင်နိုင်ရန် ကြိုးစားယှဥ်ပြိုင်ကြရမည်ဟု နစက ဥက္ကဋ္ဌက တိုက်တွန်းမှာကြားခဲ့သည်။

09/12/2024

ပဉ္စမအကြိမ်မြောက် အမျိုးသားအားကစားပွဲ တော်သည် တည်ငြိမ်အေးချမ်းမှုကိုဖော်ထုတ်ပြ သသည့် ပွဲတော်ကြီးဖြစ်ဟု နစက ဥက္ကဋ္ဌပြော

နေပြည်တော်၌ ၂၀၂၄ ခုနှစ် ပဉ္စမအကြိမ်မြောက် အမျိုးသားအားကစားပွဲတော်ကျင်းပနိုင်ခြင်းနှင့်ပတ်သက်၍ နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်မှ ယနေ့ ဒီဇင်ဘာ ၉ ရက်ညနေပိုင်းကကျင်းပသည့် အမျိုးသားအားကစားပွဲတော်ဖွင့်ပွဲအခမ်းအနားတွင် မိန့်ခွန်းပြောကြားရာ၌ထည့်သွင်းပြောကြားခဲ့ခြင်းဖြစ်သည်။

ယခု ကျင်းပသည့် ပဉ္စမအကြိမ်မြောက် အမျိုး သားအားကစားပွဲတော်သည် ဦးတည်ချက်(၅) ရပ်ဖြင့်ချမှတ်ဆောင်ရွက်ခဲ့ခြင်းဖြစ်ကာ နိုင်ငံ တော်၏ ဂုဏ်သိက္ခာနှင့်အမျိုးသားတို့၏ မျိုး ချစ်စိတ်ဓာတ်ထက်သန်မှု၊ တိုင်းချစ်ပြည်ချစ်စိတ်ရှိမှု၊ စည်းလုံးညီညွတ်မှု၊ အမျိုးသားရေးစိတ်ဓာတ်နှင့်ဝိုင်းဝန်းပူးပေါင်းဆောင်ရွက်မှုများနှင့်အတူ တည်ငြိမ်အေးချမ်းမှုကိုဖော်ထုတ်ပြသနိုင်သည့်ပွဲတော်ဖြစ်သည်ဟု ပြောသည်။

ထို့ပြင် အားကစားမြှင့်တင်ရေးဆောင်ရွက်ခြင်းအား မွန်မြတ်သည့်လုပ်ငန်းစဥ်တစ်ရပ်၊ နိုင်ငံ တော်အတွက်အရေးပါသည့် အမျိုးသားရေးတာဝန်တစ်ရပ်ဟုတန်ဖိုးထားဆောင်ရွက်ပါက နိုင်ငံအတွက် စိတ်ဓာတ်စည်းကမ်းကောင်းမွန်ပြီး ကျန်းမာကြံ့ခိုင်ကာ စည်းလုံးညီညွတ်စွာဖြင့် နိုင်ငံကိုအကျိုးပြုနိုင်မည့် လူ့စွမ်းအားအရင်းအမြစ်များကိုပြုစုပျိုးထောင်နိုင်မည်ဟု ပြောသည်။

" နိုင်ငံတော်ကို အကျိုးပြုနိုင်မယ့် လူ့စွမ်းအားအရင်းအမြစ်တွေရရှိဖို့ဆိုရင် နိုင်ငံတော်ကချမှတ်ထားတဲ့ ဦးတည်ချက်(၉)ရပ်ထဲက လူမှုရေးဦးတည်ချက်ကို အလေးထားဆောင်ရွက်သွားရပါမယ်"ဟု နစက ဥက္ကဋ္ဌကပြောသည်။

ထို့ပြင် နစက ဥက္ကဋ္ဌမှ မြန်မာနိုင်ငံတွင် အမျိုးသားအားကစားပွဲတော်များအား ၁၉၉၂ ခုနှစ်၊ ၁၉၉၄ ခုနှစ်၊ ၁၉၉၇ ခုနှစ်နှင့် ၂၀၁၅ ခုနှစ်တို့တွင် (၄)ကြိမ်ကျင်းပခဲ့ပြီးဖြစ်ကာ ယခု ကျင်းပသည့် ပဉ္စမအကြိမ်မြောက် အမျိုးသားအားကစားပွဲတော်အား ၁၀ နှစ်နီးပါးကြမှသာပြန်လည်ကျင်းပနိုင်ခြင်းဖြစ်သည်ဟုလည်း ပြောကြားခဲ့သည်။

09/12/2024

ရှမ်း/မြောက် မြို့နယ်(၃)မြို့နယ်တွင် ငလျင်လှုပ်ခတ်မှုဖြစ်ပွား

ရှမ်း/မြောက် မူဆယ် ၊ နမ့်ခမ်းနှင့် ကွတ်ခိုင်မြို့တို့တွင် ယနေ့ ဒီဇင်ဘာ (၉)ရက် နံနက် အစောပိုင်းချိန်မှစတင်၍ ငလျင် လှုပ်ခတ်မှု ဖြစ်ပွားခဲ့ကြောင်း သိရသည်။

ယနေ့ နံနက် (၃) နာရီခွဲဝန်းကျင်မှ (၄)နာရီအထိကို (၆)ကြိမ်၊ (၈)နာရီခွဲဝန်းကျင်အချိန်၌ (၁)ကြိမ် စုစုပေါင်း (၇)ကြိမ်လှုပ်ခတ်ခဲ့ခြင်းဖြစ်ကြောင်း ဒေသခံ သတင်းရင်းမြစ်များထံက သိရသည်။

" ငလျင်လှုပ်သွားတာ အရမ်းသိသာတယ်။ အိမ်က ထွန်းထားတဲ့ မီးချောင်းတွေ ခါသွားပြီး၊ လူလည်း မိုက်ခနဲ့ဖြစ်သွားတယ်။"ဟု မူဆယ်ဒေသခံတစ်ဦးက ဆိုသည်။

အလားတူ နမ့်ခမ်း နှင့် ကွတ်ခိုင်မြို့နယ်တို့တွင်လည်း ငလျင်ပြင်းထန်စွာလှုပ်ခတ်ခြင်းကြောင့် နေအိမ်အချို့ ပျက်စီးသွားရပြီးဒေသခံများစိုးရိမ်ထိတ်လန့်ခဲ့ကြရကြောင်း သိရသည်။

မြေငလျင်လှုပ်ခတ်မှုနှင့်ပတ်သက်၍ ဒီဇင်ဘာလ ၉ ရက်နေ့၊ မြန်မာစံတော်ချိန် (၃)နာရီ၊ (၂၈)မိနစ်၊ (၃)စက္ကန့် အချိန်တွင် သီပေါမြေငလျင်စခန်းမှ အရှေ့မြောက်ဘက် (၆၉)မိုင်ခန့် ကွာဝေးသော မြန်မာနိုင်ငံ ပြည်တွင်း (သိန္နီမြို့၏ အရှေ့မြောက်ဘက် (၇) မိုင်ခန့်အကွာ)၊ မြောက်လတ္တီတွဒ် (၂၃.၃၈) ဒီဂရီ၊ အရှေ့လောင်ဂျီတွဒ် (၉၈.၀၃) ဒီဂရီ၊ အနက်(၁၀)ကီလိုမီတာကို ဗဟိုပြု၍ အင်အားရစ်(ခ်)တာစကေး (၄.၅) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားသည်ဟု မိုး/ဇလက အသိပေး သတင်းထုတ်ပြန်ထားသည်။

ဓာတ်ပုံ-CJ

09/12/2024

ချန်ပီယံ ရှမ်းယူနိုက်တက်အသင်း၏ စုဖွဲ့လေ့ကျင့်မှုများ ယနေ့ စတင်

Myanmar National League ချန်ပီယံ အသင်း တစ်သင်းဖြစ်သည့် ရှမ်းယူနိုက်တက်အသင်း၏ စုဖွဲ့လေ့ကျင့်မှုများ ကို ယနေ့ ဒီဇင်ဘာ (၉)ရက်၌ စတင်ပြီဖြစ်ကြောင်း သိရသည်။

ယနေ့ စုဖွဲ့လေ့ကျင့်မှုတွင် မြန်မာ့လက်ရွေးစင်အသင်းနှင့် သွားရောက်ပူးပေါင်းနေသည့် ကစားသမားများနှင့် ဒဏ်ရာရနေသူများမှလွဲပြီး ကျန်ကစားသမားအားလုံး လာရောက်ပူးပေါင်းပြီဖြစ်ကြောင်း ဆိုသည်။

ယခုနှစ် မြန်မာနိုင်ငံဘောလုံးအဖွဲ့ချုပ်၊ မြန်မာနေရှင်နယ်လိဂ်ကော်မတီက ကြီးမှူးကျင်းပသည့် MNL (U-20) Youth League 2024 ရာသီပိတ် နောက်ဆုံးပွဲစဉ်ကို နိုဝင်ဘာ (၃၀) ရက်၌ ကျင်းပပြီးစီးခဲ့ပြီဖြစ်ပြီး ရှမ်းယူနိုက်တက်အသင်းက ရမှတ်ပေါင်း (၅၂)မှတ်ဖြင့် ချန်ပီယံဆုကို ရရှိထားသည်။

09/12/2024

ချမ်းမြသာစည်မြို့နယ်တွင် လူနေအိမ် မီးလောင်မှုဖြစ်ပွား

မန္တလေးတိုင်းဒေသကြီး၊ ချမ်းမြသာစည်မြို့နယ်၊ ကံသာရပ်ကွက်၊ (၅၈) လမ်း၊ (၁၀၄)လမ်းနှင့် (၁၀၅)လမ်းကြားရှိ လူနေတိုက်ခန်း ပထမထပ်တွင် ယနေ့ည(၇) နာရီဝန်းကျင်က မီးလောင်မှုဖြစ်ပွားခဲ့ကြောင်း နယ်မြေခံ မီးသတ်တပ်ဖွဲ့ သတင်းများအရ သိရသည်။

ယနေ့ ဒီဇင်ဘာ (၉)ရက်၊ ည (၇)နာရီအချိန်ခန့်က လူနေတိုက်ခန်း ပထမထပ်တွင် မီးလောင်မှု ဖြစ်ပွားကြောင်း သတင်းအရ ချမ်းမြသာစည်မြို့နယ် မီးသတ်စခန်းမှ မီးသတ်ယာဉ်အုပ်စု ထွက်ခွာငြှိမ်းသတ်ခဲ့ကြောင်း သိရသည်။

ထိုသို့ ထွက်ခွာငြှိမ်းသတ်ရာ ည (၇)နာရီ (၉)မိနစ်အချိန်တွင် မီးငြှိမ်းသတ်နိုင်ခဲ့ပြီး အဆိုပါ မီးလောင်မှုဖြစ်စဉ်နှင့် ပတ်သက်၍ မီးသတ်တပ်ဖွဲ့မှ လိုအပ်သည်များ ဆက်လက်လုပ်သွားမည်ဖြစ်ကြောင်း သိရသည်။

09/12/2024

တိုက်ကြီးမြို့ရှိ နေအိမ်လိုင်းခန်းမီးလောင်မှု Level 1 အဆင့်ဖြင့်ငြှိမ်းသတ်ခဲ့ရ

ရန်ကုန်တိုင်း၊ တိုက်ကြီးမြို့ရှိ နေအိမ်လိုင်းခန်းတွင် ယနေ့ ဒီဇင်ဘာ ၉ ရက်မွန်းလွဲ ၂ နာရီ ၁၁ မိနစ်ခန့်က မီးလောင်မှုဖြစ်ပွားခဲ့ကြောင်း မီးသတ်တပ်ဖွဲ့နှင့်ဒေသခံများထံမှ သိရသည်။

တိုက်ကြီးမြို့၊ ဘူတာရပ်ကွက်၊ ရထားလမ်းဘေးရှိ နေအိမ်လိုင်းခန်းတွင် မီးလောင်မှုဖြစ်ပွား၍ တိုက်ကြီးမြို့နယ်မီးသတ်စခန်းမှတပ်ဖွဲ့ဝင်များနှင့် လူမှုကူညီရေးအသင်းဝင်များ၊ အနီးဝန်းကျင်နေသူများက Level 1 အဆင့်ဖြင့်ငြှိမ်းသတ်ခဲ့ကြကြောင်း သိရသည်။

ထို့ကြောင့် မွန်းလွဲ ၂ နာရီ ၁၆ မိနစ်တွင် မီးထိန်းနိုင်ခဲ့ပြီး မွန်းလွဲ ၂ နာရီ ၂၂ မိနစ်၌ မီးငြိမ်းသွားခဲ့ကာ နေအိမ်လိုင်းခန်းမှာလည်း မီးလောင်မှုကြောင့် ပျက်စီးဆုံးရှုံးခဲ့သဖြင့် မီးသတ်တပ်ဖွဲ့တာဝန်ရှိသူများက စစ်ဆေးလျက်ရှိကြောင်း သိရသည်။

09/12/2024

မြန်မာ-တရုတ်၊ မြန်မာ-ယူနန်တို့ကြား ပူးပေါင်းဆောင်ရွက်မှုများတိုးမြှင့်မည့် ဖိုရမ်တက်ရောက်ရန် နိုင်ငံခြားရေး ဒု-ဝန်ကြီးထွက်ခွာ

မြန်မာ-တရုတ်၊ မြန်မာ-ယူနန်တို့ကြား ပူးပေါင်းဆောင်ရွက်မှုများတိုးမြှင့်မည့် ဖိုရမ်တက်ရောက်ရန် နိုင်ငံခြားရေးဝန်ကြီးဌာန ဒု-ဝန်ကြီး ဦးလွင်ဦးသည် ယနေ့ ဒီဇင်ဘာ ၉ ရက်မွန်းလွဲပိုင်းက ကူမင်းမြို့သို့ ရန်ကုန်လေဆိပ်မှတစ်ဆင့်ထွက်ခွာသွားခဲ့သည်။

အဆိုပါ သတ္တမအကြိမ်မြောက် မြန်မာ-တရုတ် (ယူနန်)ပူးပေါင်းဆောင်ရွက်မှုဖိုရမ်အား တရုတ်နိုင်ငံ၊ ယူနန်ပြည်နယ်၊ ကူမင်းမြို့၌ကျင်းပသွားမည်ဖြစ်သည်။

ဖိုရမ်အား မြန်မာ-တရုတ် နှစ်နိုင်ငံကြားနှင့် မြန်မာ-ယူနန် နှစ်ဖက်ကြား ကုန်သွယ်ရေးနှင့်ရင်းနှီးမြှုပ်နှံရေး၊ နယ်စပ်ဒေသတည်ငြိမ်အေးချမ်းရေး၊ ပြည်သူများကြား အပြန်အလှန်ဖလှယ်မှုမြှင့်တင်ရေးတို့တွင် ပူးပေါင်းဆောင်ရွက်မှုများတိုးမြှင့်နိုင်ရန် ရည်ရွယ်ကျင်းပခြင်းဖြစ်သည်။

ယင်း ဖိုရမ်ကို ၂၀၁၃ ခုနှစ်မှစတင်၍ မြန်မာနိုင်ငံဘက်နှင့် ယူနန်ပြည်နယ်၊ ပြည်သူ့အစိုးရတို့ကြား အလှည့်ကျအိမ်ရှင်အဖြစ် လက်ခံကျင်းပခဲ့ကြပြီး ယခုနှစ် ဖိုရမ်သို့ နိုင်ငံခြားရေး ဒု-ဝန်ကြီးနှင့်အတူ ဝန်ကြီးဌာန(၁၂)ခုမှ ကိုယ်စားလှယ်(၁၅)ဦး ၊ UMFCCI မှကိုယ်စားလှယ်များလိုက်ပါသွားခဲ့သည်။

09/12/2024

အမျိုးသား အားကစားပွဲတော် ပြိုင်ပွဲအတွင်း ကျန်းမာရေးဝန်ထမ်း (၂၅၀)ကျော် ကျန်းမာရေး စောင့်ရှောက်မှုပေးနေ

ပဉ္စမအကြိမ် အမျိုးသားအားကစားပွဲတော်အတွင်း ကျန်းမာရေးဝန်ထမ်း (၂၅၀) ကျော်ဖြင့် အားကစားပြိုင်ပွဲများ အပါအဝင် ဖွင့်ပွဲ/ပိတ်ပွဲအခမ်းအနား၊ ဖျော်ဖြေရေးအဖွဲ့များကိုလည်း ကျန်းမာရေးစောင့်ရှောက်မှုပေးလျက်ရှိသည်ဟု သိရသည်။

ကျန်းမာရေးဝန်ကြီးဌာနအနေဖြင့် ဆေးအဖွဲ့ (၃၈) ဖွဲ့ခွဲကာ ကျန်းမာရေးစောင့်ရှောက်မှုလုပ်ငန်းများ လစ်ဟင်းမှုမရှိစေရေး ဆေးကုသရေးလုပ်ငန်းအဖွဲ့၊ ရေကောင်းရေသန့် သုံးစွဲရေးနှင့် အစားအစာကြီးကြပ်မှုလုပ်ငန်းအဖွဲ့၊ ကူးစက်ရောဂါနှိမ်နင်းရေးနှင့် ပတ်ဝန်းကျင်သန့်ရှင်းရေးလုပ်ငန်းအဖွဲ့များ ဖွဲ့စည်းကာ အလေးထားဆောင်ရွက်လျက်ရှိနေခြင်း ဖြစ်သ ည်။

ထို့ပြင် ရွာတော်တည်းခိုရေးစခန်းတွင်လည်း (၂၄)နာရီဆေး ခန်းဖွင့်လှစ်ထားရှိကာ ဆေးပညာ၊ အရိုးနှင့် အကြောအဆစ်အထူးကုဆေးခန်းအချိန်ပိုင်းဖွင့်လှစ်ထားရှိပြီး သက်ဆိုင်ရာ အထူးကု ဆရာဝန်များဦးဆောင်၍ လာရောက်ပြသသည့်လူနာများကို ကြည့်ရှုကုသစောင့်ရှောက်မှုများ ဆောင်ရွက်ပေးလျက်ရှိသည့်အပြင် တိုင်းရင်းဆေးခန်းလည်း ဖွင့်လှစ်၍ ကျန်းမာရေးစောင့်ရှောက်မှုပေးလျက်ရှိသည်ဟု သိရသည်။

ထိုနည်းတူ စည်ပင်ရိပ်သာနှင့် အားကစားရွာ (Gold Camp) တို့တွင်လည်း (၂၄) နာရီ ဆေးခန်းဖွင့်လှစ်ဆောင်ရွက်လျက်ရှိပြီး လယ်ဝေးသင်တန်းကျောင်း၌ တည်းခိုနေထိုင်ကြသော မသန်စွမ်းအားကစားသမားများအတွက် (၂၄) နာရီဆေးခန်းဖွင့်လှစ်ကာ ကျန်းမာရေးစောင့်ရှောက်မှုလုပ်ငန်းများ ဆောင်ရွက်ပေးလျက်ရှိကြောင်း သိရသည်။

ပဉ္စမအကြိမ် အမျိုးသားအားကစားပွဲတော် ဖွင့်ပွဲအခမ်းအနား ကို ယနေ့ ဒီဇင်ဘာ (၉) ရက် ၊ ညနေ (၅) နာရီတွင် နေပြည်တော် ဝဏ္ဏသိဒ္ဓိအားကစားကွင်း၌ ပြုလုပ်မည် ဖြစ်ပြီး ဖွင့်ပွဲအခမ်းအနားမစတင်မီ နာမည်ကျော်အနုပညာရှင်များနှင့် တေးသံရှင်များ၏ ဖျော်ဖြေတင်ဆက်မှုများလည်း ပါဝင်မည် ဖြစ်သည်။

ထို့ပြင် ပဉ္စမအကြိမ်အမျိုးသားအားကစားပွဲတော် အားကစားပြိုင်ပွဲများတွင် အားကစားဝါသနာရှင်များ အခမဲ့ဝင်ရောက်ကြည့်ရှုနိုင်ပြီး ပြိုင်ပွဲကွင်း/ရုံအသီးသီး ဝင်ပေါက်ဂိတ်များ၌ လည်းကောင်း နိုင်ငံသားစိစစ်ရေးကတ် (သို့မဟုတ်) ယာဉ်မောင်း လိုင်စင်ဖြင့် ယာယီဝင်ထွက်ကတ်ပြားများကိုလဲလှယ်၍ အခမဲ့ဝင်ရောက်ကြည့်ရှုနိုင်ကြောင်း သိရသည်။

09/12/2024

နေပြည်တော် ရေပန်းဥယျာဉ်ကို Royal Garden အဖြစ် အဆင့်မြှင့်တင်ဆောင်ရွက်နေ

နေပြည်တော် ရေပန်းဥယျာဉ်ကို ပန်းပွဲတော်များ ကျင်းပဆောင်ရွက်နိုင်ရေး Royal Garden အဖြစ် အဆင့်မြှင့်တင် ဆောင်ရွက်လျက်ရှိကြောင်း နေပြည်တော်စည်ပင်သာယာရေးကော်မတီမှ သိရသည်။

ဇမ္ဗူသီရိမြို့နယ်ရှိ နေပြည်တော်ရေပန်းဥယျာဉ်အတွင်းရှိ ခေတ်မီကလေးကစားကွင်းများ အဆင့်မြှင့်တင်ခြင်း၊ ကြိုးတံတားပြန်လည် ပြုပြင်ထိန်းသိမ်းခြင်း၊ Sky Garden တွင် ရှားပါးအပင်များ စိုက်ပျိုးထားရှိမှု၊ အလှပြငါးများနှင့် ရှားပါးတိရစ္ဆာန်များ မွေးမြူထားရှိမှု၊ ဥယျာဉ်အတွင်း စိမ်းလန်းစိုပြည်ရေးနှင့် သန့်ရှင်း သာယာလှပရေးလုပ်ငန်း ဆောင်ရွက်နေကြောင်း သိရသည်။

ထို့ပြင် ရာသီအလိုက်ပွဲတော်များ၊ ပန်းပွဲတော်များကျင်းပဆောင်ရွက်နိုင်စေရေးကို လျာထားစီမံ ဆောင်ရွက်သွားမည်ဖြစ်ကြောင်း သိရသည်။

အဆိုပါ နေပြည်တော်ရေပန်းဥယျာဉ်ကို မြို့တော်အဆင့်နှင့် လျော်ညီသည့် ခေတ်မီဥယျာဉ်ကြီးတစ်ခုအဖြစ် ပုဂ္ဂလိက ကုမ္ပဏီတစ်ခုကို နှစ်ရှည်လုပ်ကိုင်ခွင့်ဖြင့် ငှားရမ်းလုပ်ကိုင်ခွင့်ပြုထားကြောင်း သိရသည်။

09/12/2024

အမေရိကတွင်တရားမဝင်နေသူအာလုံးကို ပြည်နှင်ရန် ထရမ့်ပ် ရည်ရွယ်

အမေရိကန် ရွေးကောက်ခံသမ္မတ ဒေါ်နယ်ထရမ့်ပ်က သူ၏ ရာထူးသက်တမ်း လေးနှစ်တာအတွင်း အမေရိကသို့ တရားမဝင်ရောက်ရှိနေထိုင်နေသူအားလုံးကို ပြည်နှင်ဒဏ်ပေးရန် ရည်ရွယ်ထားကြောင်း သို့ရာတွင် “Dreamer” ဟု ခေါ်တွင်သည့် ရွှေ့ပြောင်းနေထိုင်သူများကိုမူ အကာအကွယ်ပေးရေး သဘောတူညီချက်တစ်ခုလိုလားကြောင်း တနင်္ဂနွေနေ့တွင် NBC News သတင်းဌာနက ထုတ်လွှင့်ခဲ့သော “Meet the Press with Kristen Welker” အင်တာဗျူးအစီအစဉ်တွင် သူက ထိုကဲ့သို့ပြောကြားခဲ့ခြင်းဖြစ်သည်။

ထို့အပြင် မိဘများ၏ ရွှေ့ပြောင်းနေထိုင်မှုဆိုင်ရာ အဆင့်သတ်မှတ်ချက် မည်သို့ပင်ရှိစေကာမူ အမေရိကတွင် မွေးဖွားသူတိုင်းကို နိုင်ငံသားဖြစ်ခွင့်ပေးသည့် မွေးရာပါနိုင်ငံသားဖြစ်ခွင့်နှင့်ပတ်သက်၍လည်း သူရာထူးစယူသည့် ပထမနေ့တွင်ပင် သမ္မတအခွင့်အာဏာဖြင့် အဆုံးသတ်ရန် စီစဉ်နေကြောင်းလည်း ထရမ့်ပ်က ပြောဆိုခဲ့သည်။

အိမ်ဖြူတော်အတွက် ဒုတိယ အကြိမ် သမ္မတသက်တမ်းကို ရရှိထားသော ရီပတ်ဘလီကန်ပါတီဝင် ထရမ့်ပ်သည် အစုလိုက်အပြုံလိုက် ပြည်နှင်ဒဏ်ပေးရေးကို ကတိပြုထားသည်။ ဇန်နဝါရီ ၂၀ ရက် သူ ရာထူးတာဝန်စယူချိန်တွင် တရားမဝင် ဝင်ရောက်မှုများအတွက် နိုင်ငံလုံးဆိုင်ရာ အရေးပေါ်အခြေအနေကြေညာဖွယ်ရှိပြီး ကျယ်ပြန့်သော ဖြိုခွင်းမှုအစီအမံကို အထောက်အကူပြုရန်အတွက် ပြည်ထောင်စုအစိုးရတစ်ဝန်းမှ အရင်းအမြစ်များကို စုစည်းရဖွယ်ရှိသည်။

၂၀၂၂ ခုနှစ် ဇန်နဝါရီလအထိ အမေရိကတွင် တရားမဝင် ရွှေ့ပြောင်းနေထိုင်သူ ၁၁ သန်းခန့်ရှိမည်ဟု အမေရိကန်ပြည်တွင်းလုံခြုံရေးဌာနက ခန့်မှန်းထားသော်လည်း လက်ရှိအချိန်တွင်မူ ယင်းကိန်းဂဏန်းထက် ပိုမိုမြင့်မားဖွယ်ရှိသည်။

ထရမ့်ပ်သည် ၂၀၁၇-၂၀၂၁ ခုနှစ်အထိ သူ၏ ပထမသမ္မတသက်တမ်းအတွင်းက ရွှေ့ပြောင်းနေထိုင်သူများ ပြည်နှင်မှု လျှော့ချရေးနှင့် အလုပ်အကိုင်ပါမစ်ပေးအပ်ခြင်း အစီအစဉ်ကို အဆုံးသတ်ရန်ကြိုးစားခဲ့ သော်လည်း တရားရုံးချုပ်က ပယ်ချခဲ့သည်။

မွေးရာပါနိုင်ငံသားဖြစ်ခွင့်ကို အဆုံးသတ်ရန် ကြိုးစားမည့် ထရမ့်ပ်၏ အစီအစဉ်သည် ဥပဒေကြောင်းအရ စိန်ခေါ်မှုများနှင့် ရင်ဆိုင်ရဖွယ်ရှိသည်။ အဆိုပါ အခွင့်အရေးသည် အမေရိကန်ဖွဲ့စည်းပုံအခြေခံဥပဒေပြင်ဆင်ချက်မှ အရင်းခံလာပြီး ၁၈၉၈ ခုနှစ် တရားရုံးချုပ်ဖြတ်ထုံးကလည်း ထောက်ခံထားသည်။

Ref: ယူအက်စ်နူးစ်

09/12/2024

တရားမဝင်နေထိုင်နေသည့်နိုင်ငံခြားသားများကိုဒါကာအစိုးရသတိပေး

ဒါကာ၊ဒီဇင်ဘာ ၉

ဘင်္ဂလားဒေ့ရှ်ကြားဖြတ်အစိုးရသည် ၎င်းတို့၏နိုင်ငံတွင်းရှိ နိုင်ငံခြားသားများကို နိုင်ငံအတွင်း တရားမဝင် နေထိုင်ခြင်း၊ အလုပ်လုပ်ကိုင်ခြင်း တို့ကို ခွင့်မပြုကြောင်းသတိပေးချက်ထုတ်ပြန်ထားသည်။

အဆိုပါ သတင်း‌ကြေငြာချက်ကို ဘင်္ဂလားဒေ့ရှ် ပြည်ထဲရေးဝန်ကြီးဌာနအကြံပေး Jahangir Alam က တနင်္ဂနွေနေ့တွင် ထုတ်ပြန်ခဲ့ခြင်းလည်းဖြစ်သည်။

ဘင်္ဂလားဒေ့ရှ်နိုင်ငံ၌ တရားမဝင်နေထိုင်ကာ အလုပ်လုပ်ကိုင်နေကြသော နိုင်ငံခြားသားများကို တရားဝင်နေထိုင်ခွင့်ရရှိရေးအတွက်တတ်နိုင်သမျှအမြန်ဆုံး ဆောင်ရွက်ကြရန် တိုက်တွန်းလိုကြောင်း ကို လည်း တနင်္ဂနွေနေ့နှောင်းပိုင်းတွင်သတင်း ထုတ်ပြန်ကြေငြာခဲ့သည်။

Source : ရှင်းဟွာ