Myanmar Fight Edition

Myanmar Fight Edition တိကျမှန်ကန်တဲ့ အရည်အသွေးမြင့် သတင်းဆောင်းပါးတွေကို ဖတ်ရှုနိုင်တဲ့ Myanmar Fight Edition

ဘောက်ဆင်၊ MMA ၊ ကစ်ဘောက်ဆင်၊ မွေထိုင်း၊ ရိုးရာလက်ဝှေ့နဲ့ ပတ်သက်တဲ့ အရည်အသွေးမြင့် သတင်းဆောင်းပါးတွေကို ဖတ်ရှုနိုင်တဲ့ Myanmar Fight Edition

အရင်ဆောင်းပါးမှာ ဘောက်ဆင်ချန်ပီယံတွေအကြောင်းကို အသေးစိတ်ရှင်းပြခဲ့ပါတယ်။ စိတ်ဝင်စားရင် ဒီမှာ bit.ly/4fqYGjq ဖတ်ပါ။ UFC အ...
23/12/2024

အရင်ဆောင်းပါးမှာ ဘောက်ဆင်ချန်ပီယံတွေအကြောင်းကို အသေးစိတ်ရှင်းပြခဲ့ပါတယ်။ စိတ်ဝင်စားရင် ဒီမှာ bit.ly/4fqYGjq ဖတ်ပါ။ UFC အဖွဲ့အစည်းရဲ့ ခွဲခြားပုံက တစ်မျိုး။ ချန်ပီယံသတ်မှတ်ပုံ မတူပါဘူး။ ချန်ပီယံ (၃) မျိုးပဲ ခွဲထားလိုက်တယ်။ Bellator နဲ့ ONE Championship မှာလည်း အတူတူဆိုတာ သတိချပ်စေချင်ပါတယ်။

(၁) Undisputed Champion

UFC အဖွဲ့အစည်းမှာ Undisputed Champion က အဆင့်မြင့်ဆုံးပါ။ အငြင်းပွားဖွယ်မရှိ ချန်ပီယံလို့ပဲ ဆိုရမယ်။ ကိုယ့်ဝိတ်တန်းမှာ ကိုယ်သာ ချန်ပီယံပါ။ ဂူတစ်ဂူထဲမှာ ခြင်္သေ့နှစ်ကောင်မအောင်းဘူးတဲ့။ တစ်ကောင်တည်း ဒါပေမယ့် ခြင်္သေ့။ ဘောက်ဆင်မှာလို အဓိကခါးပတ် (၄) ခုရထားလို့ အငြင်းပွားဖွယ်မရှိ ချန်ပီယံလို့ ခေါ်တာမဟုတ်ဘူး။ ဧကရာဇ်မင်းလို့ တစ်ပါးတည်းမင်းမူနေလို့သာ အငြင်းပွားဖွယ်မရှိ ချန်ပီယံလို့ ခေါ်တာပါ။ ပုံထဲမှာဆိုရင် Jon Jones နဲ့ Tom Aspinall ကလွဲရင် ကျန်တာတွေက Undisputed Champion တွေပါပဲ။

(၂) Champion

Champion က Undisputed Champion လောက် အဆင့်မမြင့်ဘူး။ ရိုးရိုးချန်ပီယံလို့ပဲ ခေါ်လိုက်ပါမယ်။ ဂူတစ်ဂူထဲမှာ ခြင်္သေ့နှစ်ကောင်အောင်းနေတယ်။ အကောင်ကြီးတဲ့ ခြင်္သေ့မို့လို့ ရိုးရိုးချန်ပီယံလို့ခေါ်တာပါ။ အငယ်ခြင်္သေ့ကို အနိုင်ယူမှ ဂူထဲမှာ တစ်ကောင်တည်းကျန်ပြီး Undisputed Champion ဖြစ်လာပါမယ်။ အလွယ်ပြောရရင် Jon Jones ပါပဲ။ မူလတုန်းက အငြင်းပွားဖွယ်မရှိ ချန်ပီယံဆိုပေမယ့် ဒဏ်ရာပြဿနာကြောင့် နှုတ်ထွက်လို့ ပွဲဝေးသွားတယ်။ အဲဒီအချိန်မှာ Tom Aspinall က ကြားဖြတ်ချန်ပီယံဖြစ်လာတယ်။ ဟဲဗီးဝိတ်ဂူကြီးထဲမှာ ခြင်္သေ့ကြီး Jon Jones နဲ့ ခြင်္သေ့ငယ် Tom Aspinall ရှိနေပါတယ်။

(၃) Interim Champion

Interim Champion က Champion လောက် အဆင့်မမြင့်ဘူး။ နောက်မှပေါက်တဲ့ ရွှေကြာဆိုတော့ ချန်ပီယံအုပ်စုထဲမှာ အနိမ့်ဆုံးပါ။ ကြားဖြတ်ချန်ပီယံလို့ သုံးနှုန်းကြတယ်။ ချန်ပီယံက ပွဲပယ်ခံထားရတဲ့အချိန် တစ်နည်းအားဖြင့် ဒဏ်ရာရနေတဲ့အချိန်မှာ အဖွဲ့အစည်းက အကောင်းဆုံးဖိုက်တာတွေကို ပွဲတည်ပြီး ကြားဖြတ်ချန်ပီယံလုခိုင်းတာပါ။ လုပ်ရိုးလုပ်စဉ်အတိုင်းဆိုရင် ချန်ပီယံနဲ့ ကြားဖြတ်ချန်ပီယံက ခါးပတ်ပေါင်းစည်းပွဲထိုးကြရတယ်။ အနိုင်ရသူက အငြင်းပွားဖွယ်မရှိ ချန်ပီယံဖြစ်လာမယ်။

Dana White က ခြင်္သေ့ကြီး Jon Jones နဲ့ ခြင်္သေ့ငယ် Tom Aspinall တို့ကို ခါးပတ်ပေါင်းစည်းပွဲထိုးခိုင်းလိမ့်မယ်။ နောက်နှစ်ထဲမှာ ဖြစ်အောင်လုပ်မယ်လို့ ပရိသတ်တွေကို ကတိပေးထားဖူးတယ်။ Jon Jones က ဒေါ်လာ (၃၀) သန်းတောင်းထားတယ်လို့ သတင်းထွက်လာတယ်။ Dana White တို့ဘက်က ပေးမယ်ဆိုရင် ပေးနိုင်ပါတယ်။ ချန်ပီယံတွေရဲ့ အဆင့်အတန်းကို သိရပြီမို့ ကျေနပ်ကြမယ်လို့ မျှော်လင့်မိပါတယ်။ စာဖတ်သူတွေ ဘေးကင်းပါစေ။

Reference Source - UFC
Photo Credit - Fight Banana
ကျော်စိုးအောင် (Myanmar Fight Edition)

ဂုဏ်သိက္ခာအကြီးမားဆုံး ဘောက်ဆင်အဖွဲ့အစည်း (၄) ခုဘောက်ဆင်ကစားနည်းဟာ ဂရိခေတ်တည်းက ရှိခဲ့တယ်လို့ ယူဆရပေမယ့် ကြေးစားဘောက်ဆင်...
23/12/2024

ဂုဏ်သိက္ခာအကြီးမားဆုံး ဘောက်ဆင်အဖွဲ့အစည်း (၄) ခု

ဘောက်ဆင်ကစားနည်းဟာ ဂရိခေတ်တည်းက ရှိခဲ့တယ်လို့ ယူဆရပေမယ့် ကြေးစားဘောက်ဆင်ပွဲတွေကို ၁၈၉၁ ခုနှစ်မှသာ စတင်ခဲ့တာပါ။ အကောင်းဆုံးဘောက်ဆင်သမားကို သတ်မှတ်ဖို့ ဝိတ်တန်းအသီးသီးမှာ ချန်ပီယံရွေးချယ်ရပါတယ်။ ကစားသမားတွေရဲ့ အဆင့်အတန်းကို စနစ်တကျ သတ်မှတ်ဖို့ တာဝန်ရှိသူတွေက ဘောက်ဆင်အဖွဲ့အစည်းတွေကို (၂၀) ရာစုအစောပိုင်းမှာ တည်ထောင်ခဲ့ပါတယ်။

ဘောက်ဆင်အဖွဲ့အစည်းတွေက အများကြီးရှိပေမယ့် သက်တမ်း၊ ကစားသမားတွေရဲ့ အရည်အသွေး၊ အဂတိတရား ကင်းစင်မှုနဲ့ ပရိသတ်အားပေးမှုအပေါ် မူတည်ပြီး ဂုဏ်သိက္ခာအကြီးမားဆုံး အဖွဲ့အစည်းက (၄) ခုပဲ ရှိပါတယ်။ အဲဒါတွေက World Boxing Association (WBA) ၊ World Boxing Council (WBC) ၊ International Boxing Federation (IBF) နဲ့ World Boxing Organization (WBO) တို့ ဖြစ်ကြပါတယ်။

ဘောက်ဆင်သမားတွေက တခြားအဖွဲ့အစည်းတွေမှာ ချန်ပီယံဘွဲ့တွေ ဘယ်လောက်ပဲ ပိုင်ဆိုင်ထားပါစေ အရှိန်အဝါကြီးမားတဲ့ WBA ၊ WBC ၊ IBF နဲ့ WBO အဖွဲ့အစည်းတွေမှာ ချန်ပီယံမဖြစ်သေးဘူးဆိုရင် ကမ္ဘာ့ချန်ပီယံအဖြစ် အသိအမှတ်မပြုပါဘူး။ အဲဒီအဖွဲ့အစည်းတွေမှာ ချန်ပီယံဖြစ်မှ ကမ္ဘာ့ချန်ပီယံဂုဏ်ပုဒ်ကို ရလာမှာပါ။ ဒါဆိုရင် သူတို့တွေရဲ့ အကြောင်းတွေကို ဖတ်ကြည့်လိုက်ရအောင်။ [ဖတ်ရန် ကြာချိန် (၁၅) မိနစ်]

(၁) World Boxing Association (WBA)

World Boxing Association (WBA) ရဲ့ မူလနာမည်က National Boxing Association (NBA) ပါတဲ့။ ၁၉၂၁ ခုနှစ်မှာ တည်ထောင်ခဲ့တာပါ။ အမေရိကန်နိုင်ငံရဲ့ (၁၃) ပြည်နယ်မှာ ဘောက်ဆင်ပွဲတွေ ကျင်းပပေးတဲ့ ပြည်တွင်းအဖွဲ့အစည်းဖြစ်ပါတယ်။ နောက်ပိုင်းမှာ ဘောက်ဆင်အားကစားက လူကြိုက်များလာလို့ ကမ္ဘာ့အနှံ့ကို ထိုးဖောက်သွားမယ့် ရည်ရွယ်ချက်ကြောင့် ၁၉၆၂ ခုနှစ်မှာ World Boxing Association (WBA) ဆိုပြီး နာမည်ပြောင်းလိုက်ပါတယ်။ အဲဒီတော့ WBA အဖွဲ့အစည်းရဲ့ သက်တမ်းက (၆၂) နှစ်ရှိပြီလို့ ဆိုရမယ်။

WBA အဖွဲ့အစည်းက အဖွဲ့အစည်း (၄) ခုထဲမှာ သက်တမ်းအရင့်ဆုံးလို့ ပြောနိုင်ပါတယ်။ တခြားအဖွဲ့အစည်းတွေနဲ့ မတူတဲ့ အချက်က WBA အဖွဲ့အစည်းရဲ့ သက်ဆိုင်ရာဝိတ်တန်းမှာ ကမ္ဘာ့ချန်ပီယံ (၄) ဦးအထိ ရွေးချယ်ပါတယ်။ အဲဒါတွေက WBA Super Champion ၊ WBA Regular Champion ၊ WBA Interim Champion နဲ့ WBA Gold Champion ဆိုပြီး ခွဲထားဖူးတယ်။ WBA Regular Champion က (၁၈) လအတွင်းမှာ သတ်မှတ်ထားတဲ့ စိန်ခေါ်သူတွေကို အနိုင်ယူပြီး ချန်ပီယံဘွဲ့ကို ကာကွယ်နိုင်ခဲ့ရင် ဒါမှမဟုတ် ခါးပတ်ပေါင်းစည်းပွဲမှာ WBC ၊ IBF နဲ့ WBO အဖွဲ့အစည်းတွေက ချန်ပီယံတွေကို အနိုင်ယူခဲ့ရင် WBA Super Champion လို့ ခေါ်ပါတယ်။ ဥပမာ - Gennady Golovkin ဆိုရင် Nilson Julio Tapia ကို အလဲထိုးပြီး WBA (Regular) Middleweight Champion ဖြစ်လာတယ်။ ချန်ပီယံဘွဲ့ကို (၁၀) ကြိမ်အထိ ကာကွယ်နိုင်ခဲ့လို့ WBA (Super) Middleweight Champion ဆိုပြီး ရာထူးတိုးသွားတယ်။ လစ်လပ်သွားတဲ့ WBA (Regular) Middleweight Champion ဘွဲ့ကို တခြားကစားသမားတွေက ပြန်လုရပါတယ်။

တချို့ကစားသမားတွေက ခါးပတ်ပေါင်းစည်းပွဲ မထိုးဖူးပေမယ့် ချန်ပီယံဘွဲ့ကို (၄/၅) ကြိမ်အထိ ကာကွယ်နိုင်ရင် WBA Super Champion လို့လည်း အသိအမှတ်ပြုလိုက်တာမျိုး ရှိခဲ့ဖူးပါတယ်။ ဥပမာ - Manny Pacquiao လို အရှိန်အဝါကြီးတဲ့ ကစားသမားဆိုရင် ချန်ပီယံဘွဲ့ကို (၂) ကြိမ်ပဲ ကာကွယ်ပြီး WBA (Super) Welterweight Champion ဖြစ်သွားခဲ့တာပါ။ WBA Interim Champion ဆိုတာက ချန်ပီယံက ဒဏ်ရာရနေရင် ဒါမှမဟုတ် အကြောင်းအမျိုးမျိုးကြောင့် ကာကွယ်ပွဲတွေ မထိုးသတ်နိုင်သေးတဲ့ ကြားကာလမှာ အိမ်ရှေ့စံရွေးချယ်လိုက်တဲ့ သဘောပါ။ မကြာခင် သူ့အလှည့်ရောက်လာလိမ့်မယ်။ အခုနောက်ပိုင်းမှာ ကြားဖြတ်ချန်ပီယံမထားတော့ပါဘူး။ Gold Champion က အခုနောက်ပိုင်းမှ ရွေးချယ်လိုက်တာပါ။ သူ့ကို တခြားအဖွဲ့အစည်းတွေက အသိအမှတ်ပြုတာမျိုး သိပ်မတွေ့ရဘူး။ WBA Super Champion နဲ့ WBA Regular Champion တို့က အချင်းချင်းထိုးဖို့ မလိုဘဲ ကိုယ်ပိုင်ချန်ပီယံဘွဲ့ကိုပဲ ကာကွယ်ရပါတယ်။

မြင်လွယ်အောင် ပြောရရင် WBA အဖွဲ့အစည်းရဲ့ ဟဲဗီးဝိတ်တန်းမှာ Oleksandr Usyk က WBA (Super) Heavyweight Champion ဖြစ်ပြီး Kubrat Pulev က WBA (Regular) Heavyweight ဖြစ်သလို Michael Hunter က WBA Gold Heavyweight Champion ဖြစ်တာမို့ ချန်ပီယံ (၃) ဦးရှိပါတယ်။ မူဝါဒအရ ချန်ပီယံအချင်းချင်းမထိုးခိုင်းပါဘူး။ ဒါပေမယ့် အမျိုးသမီးတွေမှာတော့ WBA Super Champion ဘွဲ့ မရှိပါဘူး။

WBA အဖွဲ့အစည်းက ကစားသမားတွေကို Ranking သတ်မှတ်တဲ့အခါမှာ မကောင်းသတင်းထွက်တယ်။ အဆင်ပြေတဲ့ ပွဲစီစဉ်သူတွေရဲ့ ကစားသမားတွေကို ဘက်လိုက်တယ်လို့ သိရတယ်။ တချို့ပွဲတွေမှာ အမှတ်ပေးဒိုင်တွေကို ဘက်လိုက်ဖို့ ဖိအားပေးတယ်လို့ ကြားဖူးတယ်။ ပွဲစီစဉ်သူ Bob Arum ဆိုရင် သူ့ကစားသမားကို Ranking တက်ဖို့ WBA အဖွဲ့အစည်းရဲ့ တာဝန်ရှိသူတွေကို လာဘ်ထိုးဖူးတယ်လို့ ဖွင့်ဟဖူးတယ်။ ဘောက်ဆင်အသိုင်းအဝိုင်းက WBA အဖွဲ့အစည်းကို ယုံကြည်မှုတွေ လျော့ပါးလာတဲ့အချိန်မှာ နောက်တက်လာတဲ့ အဖွဲ့အစည်းက WBC ပါပဲ။

(၂) World Boxing Council (WBC)

World Boxing Council (WBC) အဖွဲ့အစည်းက ၁၉၆၃ ခုနှစ်မှာ ဖွဲ့စည်းလိုက်လို့ သက်တမ်းက သိပ်မကွာပါဘူး။ အဖွဲ့ဝင် (၁၁) နိုင်ငံနဲ့ စလိုက်တာ အခုဆိုရင် (၁၆၁) နိုင်ငံအထိ ရှိလာပြီ။ Muhammad Ali ၊ George Foreman နဲ့ Joe Frazier တို့က WBC အဖွဲ့အစည်းရဲ့ ခေါင်းစဉ်အောက်မှာ ထိုးသတ်တယ်လို့ ပြောရမယ်။ သူတို့ နားသွားတော့လည်း Sugar Ray Leonard ၊ Roberto Duran ၊ Thomas Hearns နဲ့ Marvin Hagler တို့လို “လူဇော် (၄) ယောက် ကျော်စွာ (၄) ပါး”ကြောင့် WBC အဖွဲ့အစည်းရဲ့ အရှိန်အဝါက ကျမသွားခဲ့ဘူး။ Mike Tyson ၊ Lennox Lewis နဲ့ Vitali Klitschko တို့ခေတ်အလွန်မှာ Oscar De La Hoya ၊ Floyd Mayweather Jr ၊ Manny Pacquiao နဲ့ Canelo Alvarez တို့ခေတ်အထိပဲ ဆိုရမယ်။ ခေတ်အဆက်ဆက်မှာ အကောင်းဆုံး ကစားသမားတွေက WBC အဖွဲ့အစည်းရဲ့ အောက်မှာ ကစားသွားကြတယ်။

WBC အဖွဲ့အစည်းရဲ့ အောက်မှာ အရည်အသွေးမြင့် ဘောက်ဆင်သမားတွေ ထိုးသတ်နေတဲ့အတွက် ပြိုင်ဆိုင်မှုက သူများအဖွဲ့အစည်းတွေထက် ပိုပြင်းထန်သလို ထိုးကြေးလည်း ပိုရတယ်။ အဲဒီတော့ WBC Champion က WBA ၊ IBF နဲ့ WBO အဖွဲ့အစည်းတွေရဲ့ Champion တွေထက် အရှိန်အဝါပိုကြီးတယ်လို့ ဆိုနိုင်တယ်။ WBC အဖွဲ့အစည်းမှာ WBC Champion ၊ WBC Interim Silver Champion အပြင် WBC Diamond Champion နဲ့ WBC Eternal Champion ဆိုပြီး ခွဲထားပါသေးတယ်။

ဒီနေရာမှာ WBC အဖွဲ့အစည်းက အသစ်မိတ်ဆက်လိုက်တဲ့ WBC Franchise Champion အကြောင်းကို ရှင်းပြချင်တယ်။ ဥပမာ - Vasyl Lomachenko ဆိုရင် Luke Campbell ကို အနိုင်ယူပြီး WBC Lightweight Champion ဖြစ်သွားဖူးတယ်။ အဲဒီအချိန်မှာ WBC အဖွဲ့အစည်းက WBC Franchise Champion ဆိုပြီး အရောင်တင်ပေးလိုက်တယ်။ WBC Interim Lightweight Champion ဖြစ်တဲ့ Devin Haney က WBC Lightweight Champion ရာထူးတက်သွားခဲ့တယ်။ အဲဒီတော့ လစ်လပ်သွားတဲ့ WBC Interim Lightweight Champion ကို Ryan Garcia နဲ့ Luke Campbell တို့က ပြန်လုခဲ့ရပါတယ်။ WBC Franchise Champion ဆိုတာ ဂုဏ်ထူးဆောင်ဘွဲ့ပါပဲ။ ရှုံးသွားရင်တောင် ချန်ပီယံဘွဲ့ကို လွှဲပြောင်းစရာ မလိုဘူး။ ဘောက်ဆင်သမိုင်းမှာ Canelo Alvarez နဲ့ Vasyl Lomachenko တို့ ရခဲ့ဖူးပါတယ်။ တချို့ပွဲစီစဉ်သူတွေက WBC Franchise Champion ကိစ္စကို သဘောမကျကြဘူး။ ဥပမာ - Jermall Charlo က WBC Interim Middleweight Champion ဖြစ်နေလို့ WBC Middleweight Champion ဖြစ်တဲ့ Canelo Alvarez ကို Super Fight ထိုးရပါမယ်။ Mandatory Challenger ဆိုတော့ မဖြစ်မနေ ထိုရတော့မယ်။ မထိုးချင်ရင် Canelo Alvarez က ချန်ပီယံဘွဲ့ကို စွန့်လွှတ်ရမှာပေါ့။ အကျိုးအမြတ်ကြီးမယ့်ပွဲဆိုတော့ ပွဲစီစဉ်သူနဲ့ ကစားသမားတွေက ထိုးချင်နေကြတယ်။ အဲဒီအချိန်မှာ WBC အဖွဲ့အစည်းက WBC Franchise Champion ဆိုပြီး ရာထူးတိုးပေးလိုက်တော့ Jermall Charlo က WBC Middleweight Champion ရာထူးတက်သွားပေမယ့် ပွဲမဖြစ်လိုက်တော့ ပွဲစီစဉ်သူ Eddie Hearn က သဘောမကျတော့ဘူး။

WBC Diamond Champion က နာမည်ကျော်တွေ ထိုးသတ်တဲ့ သမိုင်းဝင်ဘောက်ဆင်ပွဲမှာ ချီးမြှင့်တဲ့ ဂုဏ်ထူးဆောင်ချန်ပီယံဘွဲ့ပါ။ သူက ရံဖန်ရံခါလောက်မှပဲ ကျင်းပပါတယ်။ Manny Pacquiao က Miguel Cotto ကို အလဲထိုးပြီး WBC Diamond Champion ဖြစ်ဖူးတဲ့ ပထမဆုံး ကစားသမားပါ။ Floyd Mayweather Jr ၊ Errol Spence Jr နဲ့ Alexander Povetkin တို့လည်း ရဖူးပါတယ်။ Eternal Champion က ကမ္ဘာ့ချန်ပီယံလုပွဲတွေမှာ ရှုံးပွဲမရှိရင် ဒါမှမဟုတ် ရှုံးပွဲမရှိဘဲ အနားယူသွားတဲ့ ဂန္ထဝင်ကစားသမားတွေကို ချီးမြှင့်တာပါ။ လူအနည်းငယ်ပဲ ရဖူးပါသေးတယ်။ ဒီခါးပတ်က ထိုးသတ်လို့ရတဲ့ အနေအထားမဟုတ်ဘဲ WBC အဖွဲ့အစည်းက စွမ်းဆောင်ရည်ကောင်းတဲ့ ကစားသမားကို ဂုဏ်ပြုလိုက်တဲ့ သဘောပါပဲ။

WBC အဖွဲ့အစည်းက ပွဲစီစဉ်သူ Don King ကို မျက်နှာသာပေးတယ်လို့ သတင်းထွက်ဖူးတယ်။ တခြားကစားသမားတွေဆိုရင် ချန်ပီယံကာကွယ်ပွဲ မထိုးတဲ့အခါမှာ ခါးပတ်ဖြုတ်ပစ်ဖူးတယ်။ ဒါပေမယ့် Don King ရဲ့ ကစားသမားကိုကျ ခါးပတ်မဖြုတ်တဲ့ သာဓကတွေ ရှိခဲ့ဖူးပါတယ်။ ချန်ပီယံတွေက စိန်ခေါ်သူကို ချက်ချင်းလက်မခံရင် ခါးပတ်ဖြုတ်ပစ်ဖူးတယ်။ ထပ်ရှင်းအောင်ရေးရရင် စိန်ခေါ်သူက Don King ရဲ့ ကစားသမားဖြစ်နေရင်ပေါ့လေ။

Leon Spinks ဆိုရင် Muhammad Ali ကို နိုင်ပြီး WBA နဲ့ WBC Heavyweight Champion ဖြစ်လာခဲ့တယ်။ အဲဒီအချိန်မှာ Don King ရဲ့ကစားသမားက Ken Norton ပါ။ ဒါပေမယ့် Leon Spinks က Ken Norton ကို မထိုးဘဲ Muhammad Ali ကိုပဲ မကျေပွဲပြန်ထိုးတော့ Leon Spinks မှာလည်း WBC Heavyweight Champion ခါးပတ်အဖြုတ်ခံလိုက်ရတယ်။ မုဒိန်းမှုကြောင့် Mike Tyson ဆိုရင်လည်း အထဲရောက်နေလို့ (၄) နှစ်အတွင်းမှာ ပွဲမထိုးဖြစ်ပါဘူး။ ဒါပေမယ့် WBC အဖွဲ့အစည်းမှာ စိန်ခေါ်သူ အဆင့် (၁) ပဲ။ ဘာဖြစ်လို့လဲဆိုတော့ Don King ရဲ့လူဖြစ်နေလို့ပဲ။ အဲဒီလို အဖြစ်အပျက်တွေ ရှိဖူးပါတယ်။

WBC အဖွဲ့အစည်းက စည်းမျဉ်းစည်းကမ်းတွေကို ပြောင်းလဲဖို့ ဝန်မလေးဘူး။ ခေတ်မမီတဲ့ စည်းကမ်းတွေကို ပြောင်းခဲ့ဖူးတယ်။ ၁၉၈၂ ခုနှစ် နိုဝင်ဘာလ (၁၃) ရက်မှာ Ray Mancini နဲ့ Kim Duk-koo တို့ဟာ WBA Lightweight Champion ပွဲမှာ (၁၅) ချီပွဲ ထိုးသတ်ခဲ့တယ်။ Kim Duk-koo ဟာ (၁၄) ချီမှာ အလဲထိုးခံလိုက်ရပြီး နိုဝင်ဘာလ (၁၈) ရက်နေ့မှာ ကွယ်လွန်သွားခဲ့တယ်။ အဲဒီပွဲက WBA အဖွဲ့အစည်းရဲ့ ခေါင်းစဉ်အောက်မှာ ကျင်းပခဲ့ပေမယ့် စည်းမျဉ်းတွေကို ပထမဆုံးပြောင်းလဲခဲ့တာ WBC အဖွဲ့အစည်းပါ။ ၁၉၈၃ ခုနှစ်မှာ (၁၅) ချီမှ (၁၂) ချီအထိ လျော့ချလိုက်တယ်။ သူ့နောက်မှ WBA နဲ့ IBF အဖွဲ့အစည်းတွေက လိုက်ပြောင်းတာပါ။ အလဲထိုးခံရတဲ့ ကစားသမားက အနည်းဆုံး (၄၅) ရက် အနားယူရမယ်လို့ သတ်မှတ်လိုက်တယ်။ WBC အဖွဲ့အစည်းက နောက်မှပေါ်ပေမယ့် အခြေအနေနဲ့ အချိန်အခါကို လိုက်ပြီး စည်းမျဉ်းစည်းကမ်းတွေကို ပြောင်းလဲရဲလို့ အအောင်မြင်ဆုံး ဖြစ်နေတာလို့ ဆိုနိုင်ပါတယ်။

(၃) International Boxing Federation (IBF)

၁၉၇၇ ခုနှစ်တည်းက အမေရိကန်နိုင်ငံမှာ ဒေသတွင်း ဘောက်ဆင်ပွဲတွေ ကျင်းပတဲ့ United States Boxing Association (USBA) အဖွဲ့အစည်းရှိတယ်။ USBA အဖွဲ့အစည်းရဲ့ ဥက္ကဌ Robert Lee က WBA အဖွဲ့အစည်းရဲ့ ဥက္ကဌရာထူးအတွက် ဝင်ပြိုင်ပေမယ့် Gilberto Mendoza ကို ရှုံးသွားခဲ့တယ်။

ကမ္ဘာ့အဆင့်မီ ဘောက်ဆင်အဖွဲ့အစည်းကို ကိုယ်တိုင်ဖွဲ့စည်းမယ်ဆိုပြီး USBA အဖွဲ့အစည်းရဲ့ ဥက္ကဌ Robert Lee က ၁၉၈၃ ခုနှစ်မှာ International Boxing Federation (IBF) ကို တည်ထောင်ခဲ့ပါတယ်။ အခုဆိုရင် (၄၁) နှစ်တောင် ရှိပါပြီ။ ၁၉၈၃ ခုနှစ် ဒီဇင်ဘာလ (၁၃) ရက်မှာ Marvin Camel က Roddy MacDonald ကို အလဲထိုးနိုင်ပြီး IBF အဖွဲ့အစည်းရဲ့ ပထမဆုံးကမ္ဘာ့ချန်ပီယံဖြစ်လာပါတယ်။ IBF အဖွဲ့အစည်းက ရှင်းပါတယ်။ ဝိတ်တန်းတစ်ခုမှာ ချန်ပီယံတစ်ယောက်ပဲ သတ်မှတ်ထားတာပါ။ IBF Super Champion ၊ IBF Regular Champion နဲ့ IBF Interim Champion တွေ ခွဲမထားဘူး။ ချန်ပီယံက စိန်ခေါ်သူကို လက်မခံရင် ခါးပတ်ဖြုတ်ခံရမယ်။ Oleksandr Usyk လည်း Daniel Dubois ကို မထိုးဘဲ Tyson Fury ကိုပဲ မကျေပွဲသွားထိုးတာ ခါးပတ်ဖြုတ်ခံရတာပါပဲ။

IBF အဖွဲ့အစည်းက Ranking သတ်မှတ်တဲ့အခါမှာ လာဘ်စားတယ်လို့ နာမည်ကြီးတယ်။ အမေရိကန်အစိုးရက ကာလရှည်စစ်ဆေးတဲ့အဆင့်ကို ရောက်သွားဖူးတယ်။ လာဘ်စားမှုကြောင့် IBF အဖွဲ့အစည်းရဲ့ ဥက္ကဌ Robert Lee လည်း ထောင် (၂၂) လကျဖူးသလို ဒဏ်ငွေ (၂၅,၀၀၀) ဒေါ်လာ ဆောင်လိုက်ရတယ်။

ပွဲစီစဉ်သူ Bob Arum က George Foreman နဲ့ Axel Schulz တို့ကို ချန်ပီယံလုပွဲကို ခွင့်ပြုပေးဖို့ Bobby Lee ကို ဒေါ်လာ (၁) သိန်း လာဘ်ပေးဖူးတယ်။ George Foreman က ချန်ပီယံဆိုပေမယ့် စိန်ခေါ်သူ Axel Schulz က အဆင့် (၉) ပဲရှိသေးတာပါ။ အဆင့်ကွာတဲ့ တွဲဆိုင်းကို ခွင့်ပြုဖို့ လာဘ်ထိုးတာပါ။ Bobby Lee က ဒေါ်လာ (၅) သိန်းတောင်းတယ်။ ဒါပေမယ့် ဒေါ်လာ (၂) သိန်းကို အရစ်ကျခွဲပေးဖို့ ဈေးတည့်သွားပါတယ်။ အဲဒီကိစ္စပေါ်သွားလို့ အကုန်ဒုက္ခရောက်ကုန်တယ်။

(၄) World Boxing Organization (WBO)

WBA အဖွဲ့အစည်းကနေ ခွဲထွက်လာကြတဲ့ လုပ်ငန်းရှင်တွေက ၁၉၈၈ ခုနှစ်မှာ World Boxing Organization (WBO) ကို တည်ထောင်ခဲ့တာပါ။ အစပိုင်းမှာ အသိအမှတ်ပြုမခံရပါဘူး။ ၂၀၀၄ ခုနှစ်မှာ WBC အဖွဲ့အစည်းက WBO အဖွဲ့အစည်းကို အသိအမှတ်ပြုခဲ့တယ်။ ခါးပတ်ပေါင်းစည်းပွဲတွေလည်း ကျင်းပပေးခဲ့တယ်။ အဲဒီနောက်မှသာ IBF နဲ့ WBA အဖွဲ့အစည်းတွေက အသိအမှတ်ပြုလာခဲ့တာပါ။ သက်တမ်း (၃၆) နှစ်ပဲရှိသေးပြီး အဖွဲ့အစည်း (၄) ခုထဲမှာ သက်တမ်းအနုဆုံးလို့ ဆိုရမယ်။

WBO အဖွဲ့အစည်းမှာ WBO Champion လို့ပဲရှိတယ်။ နောက်ပိုင်းမှသာ Interim Champion ရှိလာတာပါ။ WBO Super Champion က စွမ်းဆောင်ရည်ကောင်းတဲ့ ကစားသမားတွေကို ဂုဏ်ပြုပေးအပ်တဲ့ ဝိသေသလို့ပဲ ဆိုရမယ်။ Anthony Joshua ၊ Oleksandr Usyk နဲ့ Manny Pacquiao တို့က WBO Super Champion ဖြစ်ဖူးတယ်။

ဘောက်ဆင်အဖွဲ့အစည်းတွေက ပြိုင်ဘက်တွေလို့ ပြောရပေမယ့် အချင်းချင်းလက်တွဲထားကြတယ်။ ကစားသမားတွေကို ခါးပတ်ပေါင်းစည်းပွဲတွေမှာ ညှိနှိုင်းပြီး ထိုးသတ်စေတယ်။ အဖွဲ့အစည်း (၄) ခုလုံးမှာလည်း Minimumweight (၁၀၅ ပေါင်)၊ Light Flyweight (၁၀၈ ပေါင်)၊ Flyweight (၁၁၂ ပေါင်)၊ Super Flyweight (၁၁၅ ပေါင်)၊ Bantamweight (၁၁၈ ပေါင်)၊ Super Bantamweight (၁၂၂ ပေါင်)၊ Featherweight (၁၂၆ ပေါင်)၊ Super Featherweight (၁၃၀ ပေါင်)၊ Lightweight (၁၃၅ ပေါင်)၊ Super Lightweight (၁၄၀ ပေါင်)၊ Welterweight (၁၄၇ ပေါင်)၊ Super Welterweight (၁၅၄ ပေါင်)၊ Middleweight (၁၆၀ ပေါင်)၊ Super Middleweight (၁၆၈ ပေါင်)၊ Light Heavyweight (၁၇၅ ပေါင်)၊ Cruiserweight (၂၀၀ ပေါင်)နဲ့ Heavyweight (၂၀၀ ပေါင်နဲ့အထက်) ဆိုပြီး ဝိတ်တန်း (၁၇) ခု ခွဲခြားထားပါတယ်။ ဒါပေမယ့် IBF နဲ့ WBO အဖွဲ့အစည်းတွေက Super Welterweight ကို Junior Middleweight လို့ သုံးနှုန်းကြပါတယ်။ အခေါ်အဝေါ်ပဲ ကွဲပြားပေမယ့် ဝိတ်တန်းသတ်မှတ်ပုံက အတူတူပါပဲ။ အခုနောက်ပိုင်းမှာ Bridgerweight (၂၂၄ ပေါင်) တန်းကို WBA နဲ့ WBC အဖွဲ့အစည်းတွေက လက်ခံထားပေမယ့် IBF နဲ့ WBO အဖွဲ့အစည်းတွေက အသိအမှတ်မပြုပါဘူး။

ရေးလက်စဆိုတော့ မထူးတော့ပါဘူး၊ ဘောက်ဆင်မှာ ကမ္ဘာ့ချန်ပီယံအသုံးအနှုန်းတွေကို ရှင်းပြလိုက်ပါမယ်။ ကစားသမားက ဘောက်ဆင်အဖွဲ့အစည်း (၄) ခုလုံးရဲ့ သက်ဆိုင်ရာ ဝိတ်တန်းမှာ တစ်ပြိုင်နက်ချန်ပီယံဖြစ်ရင် Undisputed Champion လို့ ခေါ်ပါတယ်။ အငြင်းပွားဖွယ်မရှိ ချန်ပီယံလို့ ဆိုနိုင်ပြီး အမြင့်ဆုံးပါ။

ဥပမာ - Mike Tyson ၊ Evander Holyfield နဲ့ Lennox Lewis တို့က Undisputed Heavyweight Champion တွေဖြစ်ပါတယ်။ အဖွဲ့အစည်း (၂) ခု ဒါမှမဟုတ် (၂) ခုနဲ့အထက်မှာ ချန်ပီယံဖြစ်ရင် Unified Champion လို့ ခေါ်ပါတယ်။ အခုဆိုရင် Oleksandr Usyk က WBA (Super) ၊ WBC နဲ့ WBO Heavyweight Champion ဖြစ်နေလို့ Unified Champion လို့ ခေါ်ပါတယ်။

ခေတ်တစ်ခေတ်ရဲ့ အကောင်းဆုံးချန်ပီယံကို အနိုင်ယူလိုက်ရင် Lineal Champion လို့ ခေါ်ပါတယ်။ အနားယူသွားတဲ့အခါ ဒါမှမဟုတ် ရှုံးနိမ့်သွားမှသာ ချန်ပီယံဘွဲ့ကို လက်လွှတ်လိုက်ရတာပါ။ ဘယ်အဖွဲ့အစည်းကမှ သူ့ကို လာဖြုတ်လို့ မရပါဘူး။ Wladimir Klitschko ဆိုရင် WBA (Super) ၊ IBF နဲ့ WBO Heavyweight Champion ပါ။ Tyson Fury က Wladimir Klitschko ကို အနိုင်ယူပြီး WBA (Super) ၊ IBF နဲ့ WBO Heavyweight Champion ဖြစ်လာတယ်။ အကောင်းဆုံးချန်ပီယံကို အနိုင်ယူလိုက်လို့ Lineal Heavyweight Champion ဖြစ်သွားတယ်။ စိတ်ကျရောဂါကြောင့် ကာလရှည်အနားယူလိုက်လို့ WBA (Super) ၊ IBF နဲ့ WBO Heavyweight Champion ဘွဲ့တွေက ပြုတ်သွားတယ်။ ဒါပေမယ့် တရားဝင်အနားယူသေးတာ မဟုတ်သလို ဘယ်ပြိုင်ဘက်ကိုမှ မရှုံးသေးလို့ Lineal Heavyweight Champion အဖြစ် အကျုံးဝင်ဆဲပါ။ Oleksandr Usyk ကိုရှုံးမှပဲ Lineal Heavyweight Champion ပြုတ်သွားပါတယ်။ ဒီလောက်ဆိုရင် ကမ္ဘာ့ချန်ပီယံအသုံးအနှုန်းကို နားလည်လောက်ပြီထင်ပါတယ်။

ဘောက်ဆင်မှာက ဝိတ်တန်း (၁၇) ခုအထိ ရှိတယ်။ (မှတ်ချက် - Bridgerweight ထည့်ရင် (၁၈) ခုပါ) သက်ဆိုင်ရာဝိတ်တန်းမှာ Champion နဲ့ Interim Champion ဆိုပြီး အနည်းဆုံး ချန်ပီယံ (၂) ဦးပဲရှိတယ်လို့ ထားလိုက်ပါဦး။ ဝိတ်တန်းက (၁၇) ခုဆိုတော့ ကမ္ဘာ့ချန်ပီယံတွေက (၃၄) ဦးဖြစ်သွားသလို သက်ဆိုင်ရာ အဖွဲ့အစည်းက ခါးပတ် (၃၄) ခု လုပ်ရပါမယ်။ ချန်ပီယံကာကွယ်နိုင်ရင် ခါးပတ်ဆက်ပေးရတာဆိုတော့ ဘောက်ဆင်အဖွဲ့အစည်းတွေက ခါးပတ်ဖိုးမွဲသွားနိုင်ပါတယ်။ အဲဒီတော့ ဘောက်ဆင်အဖွဲ့အစည်းတွေက ချန်ပီယံလုပွဲကစားသမားတွေဆီက ပိုက်ဆံပြန်ကောက်တယ်။ အဲဒါကို Sanctioning Fees လို့ ခေါ်ပါတယ်။

ကစားသမားတွေက ထိုးကြေးရဲ့ (၃) ရာခိုင်နှုန်းကို ဘောက်ဆင်အဖွဲ့အစည်းဆီမှာ ပေးရပါတယ်။ ပွဲစီစဉ်သူကလည်း ပေးရပါတယ်။ တချို့အဖွဲ့အစည်းတွေမှာ ချန်ပီယံကို ထိုးကြေးရဲ့ (၃) ရာခိုင်နှုန်းတောင်းပြီး စိန်ခေါ်သူကို ထိုးကြေးရဲ့ (၂) ရာခိုင်နှုန်း ဆောင်ခိုင်းတာမျိုး ရှိပါတယ်။ ဒါပေမယ့် ကိုဗစ်အတွင်းမှာ ဘောက်ဆင်ပွဲတွေက ပရိသတ်မပါဘဲ ကျင်းပနေရလို့ ပွဲစီစဉ်သူနဲ့ ကစားသမားတွေက ဝင်ငွေနည်းသွားလို့ Sanctioning Fees လျှော့ချပေးမယ်လို့ WBC အဖွဲ့အစည်းက ပြောဖူးတယ်။

ဟိုးအရင်တုန်းက Anthony Joshua ဆိုရင် ဘောက်ဆင်အဖွဲ့အစည်းကို ပေးဆောင်ရတဲ့ ပမာဏက သူ့အတွက် များနေလို့ စိတ်ပျက်တယ်တဲ့။ Floyd Mayweather လည်း WBO အဖွဲ့အစည်းကို ဒေါ်လာ (၂) သိန်းပေးဖို့ ငြင်းဆန်ခဲ့ဖူးလို့ WBO Welterweight Champion ခါးပတ် အဖြုတ်ခံရဖူးတယ်။ WBC အဖွဲ့အစည်းနဲ့ Miguel Cotto တို့လည်း အလားတူဖြစ်ဖူးတယ်။ ဘောက်ဆင်အဖွဲ့အစည်းတွေက ထိုးကြေးရဲ့ (၃) ရာခိုင်နှုန်းပဲ ရတယ်ဆိုပေမယ့် Floyd Mayweather နဲ့ Conor McGregor တို့ ကစားကြတဲ့ The Money Fight မှာဆို သန်းဆယ်ချီရပါတယ်။ အဲဒါကြောင့်မို့ WBC အဖွဲ့အစည်းက အနိုင်ရသူကို ဒေါ်လာ (၁) သန်းကျော်တန်တဲ့ The Money Belt ကို ပေးနိုင်တာပါ။ Ranking သတ်မှတ်ပြီး လာဘ်စားတာလည်း ကြားပေါက်ဝင်ငွေလို့ပဲ ဆိုရမယ်။ ဒီလောက်ဆိုရင် ဘောက်ဆင်အဖွဲ့အစည်းတွေရဲ့ ငွေရှာပုံကို ရှင်းလောက်ပါပြီ။

The Ring မဂ္ဂဇင်းက ပေးအပ်တဲ့ ကမ္ဘာ့ချန်ပီယံဆုဟာ ထိပ်ဆုံးအဖွဲ့အစည်းမှာ စာရင်းမဝင်သေးပေမယ့် အရှိန်အဝါကြီးမားပါတယ်။ International Boxing Organization (IBO) အဖွဲ့အစည်းလည်း နာမည်ကျော်ပါတယ်။ ဘောက်ဆင်အဖွဲ့အစည်းဆိုတာ ကစားသမားနဲ့ ပွဲစီစဉ်သူကြားမှာ စည်းမျဉ်းစည်းကမ်းတွေနဲ့ ထိန်းညှိပေးတဲ့ ကြားနေအဖွဲ့အစည်းပါပဲ။ နိဂုံးချုပ်ပြောရရင် စင်းလုံးချောပြည့်စုံတဲ့ ဘောက်ဆင်အဖွဲ့အစည်းဆိုတာ မရှိပါဘူး။ အားနည်းချက်၊ အားသာချက်တွေက ရှိစမြဲပါပဲ။ ကစားသမားတွေရဲ့ စွမ်းဆောင်ရည်နဲ့ ပရိသတ်တွေရဲ့ စိတ်ဝင်စားမှုအပေါ် မူတည်ပြီး အဆင့်အတန်းက ကွာသွားတာပါ။ ဒီလောက်ဆိုရင် WBA ၊ WBC ၊ IBF နဲ့ WBO အဖွဲ့အစည်းတွေရဲ့ အကြောင်းကို ရိပ်စားမိပြီထင်ပါတယ်။ အချက်အလက်တွေ ပြည့်စုံရအောင် အချိန်ယူရေးသားထားတာမို့ စာဖတ်သူတွေက စိတ်ကျေနပ်မယ်လို့ ထင်ပါတယ်။ မရှင်းတာရှိရင်လည်း Comment Box မှာ မေးခဲ့ပါ။ စာဖတ်သူတွေ ဘေးကင်းပါစေ။

Reference Source - WBA ၊ WBC ၊ IBF ၊ WBO ၊ Business Insider ၊ Bleacher Report ၊ Forbes ၊ New York Times ၊ Money ၊ BBC
Photo Credit - The Sun ၊ MMA Jungle ၊ GiveMeSport ၊ Yahoo Sports
ကျော်စိုးအောင် (Myanmar Fight Edition)

တိုက်ခိုက်ရေးအားကစားမှာ AI ရဲ့ အခန်းကဏ္ဍUFC အဖွဲ့အစည်းက စာနယ်ဇင်းအဖွဲ့အဝင်တွေကို အကူညီမတောင်းဘဲ AI System သုံးပြီး Ranki...
23/12/2024

တိုက်ခိုက်ရေးအားကစားမှာ AI ရဲ့ အခန်းကဏ္ဍ

UFC အဖွဲ့အစည်းက စာနယ်ဇင်းအဖွဲ့အဝင်တွေကို အကူညီမတောင်းဘဲ AI System သုံးပြီး Ranking ခွဲမယ်လို့ Dana White က ဆိုထားပါတယ်။ ဒီသတင်းကို လက်ခံသူတွေရှိသလို ကန့်ကွက်သူတွေလည်း ရှိပါတယ်။ AI System သုံးဖို့ အချိန်ယူရဦးမှာပါ။

Mark Zuckerberg က ကူညီပေးမယ်လို့ သတင်းထွက်တယ်။ တကယ်ဆိုရင် Dana White နဲ့ Mark Zuckerberg တို့က ပုဂ္ဂိုလ်ရေးခင်မင်တယ်။ Mark Zuckerberg ကိုယ်တိုင်လည်း ပွဲလာကြည့်ဖူးတယ်။ ဒီနေရာမှာ Elon Musk လည်း အကူညီမပေးနိုင်ဘူးလားလို့ စောဒကတက်စရာရှိပါတယ်။ ဒါပေမယ့် Elon Musk က တိုက်ခိုက်ရေးအားကစားကို ဒီလောက်ဝါသနာမပါပါဘူး။

Mark Zuckerberg က နာမည်ကျော်ဖိုက်တာတွေဆီမှာတောင် လေ့ကျင့်နေတာပါ။ တိုက်ခိုက်ရေးအားကစားကို တော်တော်ဝါသနာပါတယ်။ UFC 309 ပြိုင်ပွဲမှာ သမ္မတကြီး Donald Trump လာကြည့်လို့သာ Elon Musk က လိုက်လာတာဖြစ်ပါတယ်။ ပုံမှန်ဆိုရင် Elon Musk က ပွဲလာကြည့်ခဲပါတယ်။ Mark Zuckerberg က အဲလိုမဟုတ်ပါဘူး။ မကြာခဏကို လာကြည့်နေတာပါ။

ဂုဏ်သိက္ခာအကြီးမားဆုံး ဘောက်ဆင်အဖွဲ့အစည်း (၄) ခုရှိတယ်။ အဲဒါတွေက World Boxing Association (WBA) ၊ World Boxing Council (WBC) ၊ International Boxing Federation (IBF) နဲ့ World Boxing Organization (WBO) တို့ ဖြစ်ကြပါတယ်။ ဘောက်ဆင်အဖွဲ့အစည်းတွေကို စိတ်ဝင်စားရင် ဒီမှာ bit.ly/41IuBIY ဖတ်ပါ။ WBA အဖွဲ့အစည်းက အရင်ဆုံးပေါ်တာမို့ ရှေ့ဆုံးက ထည့်ရေးတာပါ။ ဥပမာ -

"၂၀၂၄ ခုနှစ် မေလ (၁၈) ရက်မှာ Oleksandr Usyk က Tyson Fury ကို အနိုင်ယူပြီး WBA (Super) ၊ WBC ၊ IBF နဲ့ WBO Heavyweight Champion ဖြစ်လာပါတယ်"

ဂုဏ်သိက္ခာအကြီးမားဆုံး ဘောက်ဆင်အဖွဲ့အစည်းထဲမှာ နောက်ဆုံးမှအဖွဲ့ဝင်ဖြစ်တဲ့ WBO အဖွဲ့အစည်းကို နောက်ဆုံးမှရေးရပါတယ်။ သက်တမ်းကွာခြားလို့ပါပဲ။ ရေးချင်သလို ရေးတာ မဟုတ်ဘူး။ ကျွန်တော်က ဝါကျတစ်ကြောင်းကို အဲလောက်ထိ အလေးအနက်ထားပါတယ်။

ဂုဏ်သိက္ခာအကြီးမားဆုံး ဘောက်ဆင်အဖွဲ့အစည်းမှာ အကျုံးမဝင်တာက IBO အဖွဲ့အစည်းဖြစ်တယ်။ သက်တမ်းနုလို့ အကျုံးမဝင်တာလားဆိုတော့ မဟုတ်ပြန်ပါဘူး။ IBO အဖွဲ့အစည်းနဲ့ WBO အဖွဲ့အစည်းတို့က သက်တမ်းအတူတူပါ။ IBO အဖွဲ့အစည်းရဲ့ စနစ်ကြောင့်ပါ။ Computerized Ranking System သုံးပြီး ထိချက်ကို အမှတ်ပေးတာမျိုးပါ။ AI System လိုဖြစ်ပြီး လူသားတွေကို မသုံးပါဘူး။ ဘောက်ဆင်သမားအများစုက ဒီအချက်ကို သဘောမကျကြဘူး။ တခြားအဖွဲ့အစည်းတွေကလည်း လက်မခံသေးလို့သာ IBO အဖွဲ့အစည်းက ဂုဏ်သိက္ခာအကြီးမားဆုံး ဘောက်ဆင်အဖွဲ့အစည်းမှာ အကျုံးမဝင်သေးတာပါ။

Oleksandr Usyk နဲ့ Tyson Fury တို့ရဲ့ မကျေပွဲမှာ AI Judge စမ်းသုံးထားတယ်။ အနိုင်အရှုံးကို သက်ရောက်မှုမရှိစေဘဲ မြေစမ်းခရမ်းပျိုးသုံးကြည့်တာပါ။ တကယ်အဆုံးအဖြတ်ပေးတာ အမှတ်ပေးဒိုင် (၃) ဦးပါပဲ။ လူသားအမှတ်ပေးဒိုင်တွေရဲ့ အဆုံးအဖြတ်ကိုပဲ အတည်ယူထားပါတယ်။ စတုတ္ထမြောက် AI Judge က (၁၁၈ မှတ် - ၁၁၂ မှတ်) ပေးပြီး Oleksandr Usyk ကို အနိုင်ပေးထားတယ်။ Oleksandr Usyk က (၁၀) ချီနိုင်ပြီး Tyson Fury က (၂) ချီနိုင်တဲ့သဘောပါ။ လဖွတ် AI Judge လားကွာ။ လူသားဒိုင်တွေပဲ သုံးပါဟဆိုပြီး Tyson Fury က ဝေဖန်ထားပါတယ်။

ကမ္ဘာကြီးက တိုးတက်ပြောင်းလဲနေပါတယ်။ လူသားနေရာမှာ ကွန်ပျူတာစနစ်ကို ပြောင်းလဲအသုံးပြုဖို့ ကြိုးစားနေပြန်တယ်။ ဒါပေမယ့် လူသားတွေရဲ့ ဆုံးဖြတ်ချက်ကိုပဲ ပိုကြိုက်ကြပြီး နည်းပညာကို ရှေ့တန်းတင်ဖို့ လက်မခံတာလည်း တွေ့ရပါတယ်။ ရှေ့တန်းတင်ဖို့ မလွယ်သေးပေမယ့် နည်းပညာအကူအညီက လိုအပ်နေတယ်လို့ပဲ မြင်ပါတယ်။ စာဖတ်သူတွေ ဘေးကင်းပါစေ။

Reference Source - MMA Mania
Photo Credit - Getty Images
ကျော်စိုးအောင် (Myanmar Fight Edition)

ကာမသုခဓာတ်ချောင်းကွဲသွားတဲ့ Mateus Mendonca ဘရာဇီးသား Mateus Mendonca မှာလည်း ဆေးရုံတက်ပြီး ကာမသုခဓာတ်ချောင်းကို ခွဲစိတ်...
23/12/2024

ကာမသုခဓာတ်ချောင်းကွဲသွားတဲ့ Mateus Mendonca

ဘရာဇီးသား Mateus Mendonca မှာလည်း ဆေးရုံတက်ပြီး ကာမသုခဓာတ်ချောင်းကို ခွဲစိတ်လိုက်ရပါတယ်။ ဒဏ်ရာက တော်တော်ကြီးတယ်။ ဒူးတိုက်ချက်ကြောင့် ကာမသုခဓာတ်ချောင်းကွဲသွားလို့ပါ။ ဖြစ်ပုံက ဒီလို။

"ကျွန်တော်လေ ဆာအိုပေါ်လိုမြို့ကို မပြန်ခင်မှာ ကျွန်တော့်ဆရာရဲ့ Grappling Class မှာ လေ့ကျင့်တာပါ။ ဒုတိယအချီလောက်မှာ လေ့ကျင့်ဖော်ရဲ့ ဒူးက ကျွန်တော့်ရဲ့မတော်ရာနေရာကို ထိသွားတယ်။ ကျွန်တော့်မှာ နာလိုက်တာလေ။ ပူးရင်းလုံးရင်း မတော်တဆဖြစ်သွားတာပါ။ မခံနိုင်တော့လို့ ရေချိုးခန်းထဲ ပြေးသွားရတာပဲ"

"တစ်လလောက်ကြာတော့ ကျွန်တော်က မနာတော့ဘူး။ ပုံမှန်အတိုင်းပဲ လေ့ကျင့်ခန်းပြန်ဆင်းနိုင်တယ်။ ဒါပေမယ့် တစ်ခုတော့ သတိထားမိလာတယ်။ ကာမသုခဓာတ်ချောင်းမှာ အဖုလေးထွက်လာလို့ ကျွန်တော်လည်း ဆေးရုံပြေးလိုက်ရတယ်။ ဆေးရုံရောက်တော့ ဆရာဝန်က စစ်ဆေးပေးပြီး ခွဲစိတ်ဖို့အတွက် နောက်ဆေးရုံကို ချက်ချင်းပြောင်းပေးလိုက်တယ်"

ဒူးတိုက်ချက်ကြောင့် Mateus Mendonca ရဲ့ ကာမသုခဓာတ်ချောင်းက ကွဲသွားတာပါတဲ့။ ခွဲစိတ်လို့တော့ ပြီးသွားပါပြီ။ အောင်လည်း အောင်မြင်ပါတယ်။ ဘဝတူကစားသမားတွေကိုလည်း အကြံပေးထားပါသေးတယ်။ Protective Cup ကို မဖြစ်မနေဝတ်ပါတဲ့။ ဘာပဲဖြစ်ဖြစ် ကစားရင် ဝတ်ပါတဲ့။ လေ့ကျင့်ခန်းမှာလည်း Protective Cup ဝတ်ထားပါတဲ့။

DWCS ပြိုင်ပွဲမှာ ဘင်တန်ဝိတ်ဖိုက်တာ Mateus Mendonca က Ashiek Ajim ကို အလဲထိုးပြီး UFC Contract ရထားတာပါ။ UFC အဖွဲ့အစည်းမှာ Mateus Mendonca က (၃) ပွဲဆက်ရှုံးပြီး စာချုပ်လက်မဲ့ဖြစ်သွားပါပြီ။ ကာမသုခဓာတ်ချောင်းခွဲစိတ်ထားတာမို့ အခုဆိုရင် (၂) လလောက် နားရပါမယ်တဲ့။

ဖြစ်ပုံကို အကဲခတ်လိုက်ရင် ဒူးတိုက်ချက်ထိသွားတည်းက ကာမသုခဓာတ်ချောင်းက အတွင်းကြေဖြစ်သွားလောက်တယ်။ အချိန်နည်းနည်းကြာတော့မှသာ ဒဏ်ပေါ်လာတာပါ။ ခွဲစိတ်ပြီး အတွင်းသားတွေကို ဖြတ်ထုတ်လိုက်ပြီဆိုတော့ ဘာမှအန္တရာယ်မဖြစ်တော့ပါဘူး။ စာဖတ်သူတွေ ဘေးကင်းပါစေ။

Reference Source - MMA Mania
Photo Credit - Getty Images
ကျော်စိုးအောင် (Myanmar Fight Edition)

ဖွတ်ထွက်မှ တောင်ပို့မှန်း သိသလားဟိုတုန်းက လူတစ်ယောက်ဟာ နဘူးခြုံထဲက တြိဂံပုံစံ အောက်ကားအပေါ်ချွန်မြေပုံလေးကို စေတီထင်ပြီး...
22/12/2024

ဖွတ်ထွက်မှ တောင်ပို့မှန်း သိသလား

ဟိုတုန်းက လူတစ်ယောက်ဟာ နဘူးခြုံထဲက တြိဂံပုံစံ အောက်ကားအပေါ်ချွန်မြေပုံလေးကို စေတီထင်ပြီး ကန်တော့နေရှာတယ်။ နေ့စဉ်နေ့တိုင်းမှာလည်း ဆွမ်း၊ ဆီမီး၊ ရေချမ်းကပ်လှူပူဇော်တယ်။ နဘူးခြုံထဲကနေ ပေါ်တော်မူဘုရားထွက်လာပြီလို့ ရပ်ထဲရွာထဲကို ပတ်ပြောပါသတဲ့လေ။ တြိဂံပုံစံမြေပုံလေးထဲက ဖွတ်ထွက်လာတော့မှ သူကိုးကွယ်နေတာ စေတီမဟုတ်ဘဲ တောင်ပို့မှန်းသိပါသတဲ့လေ။

ဖွတ်ထွက်မှ တောင်ပို့ မှန်းသိတယ်တဲ့။ စကားပုံရဲ့ရည်ရွယ်ချက်က ဘာမှမစူးစမ်းဘဲ အထင်မကြီးကြစေဖို့ပါ။ ဆပ်ပြာကောင်းလို့ ခေါင်းပေါင်းဖြူတာလား၊ စိန်နားကပ်ရောင်ကြောင့် ပါးပြောင်တာလား ဒါကို ခွဲခြားသိထားဖို့ လိုအပ်ပါတယ်။ ထင်ပေါ်လို့ စင်တော်ကကောက်ရင် ချီးကျူးရပါမယ်။ စိုင်ကော်လို့ ခြုံပေါ်ရောက်လာတဲ့ လူတွေကို ဘုရားမှတ်ပြီး ရှိခိုးကိုးကွယ်မှုမပြုဖို့ အရေးကြီးပါတယ်။ ပတ္တမြားမှန်ရင် နွံမနစ်ပါဘူး။ ဆောင့်ကြောင့်ထိုင်တိုင်း ခြင်္သေ့မဟုတ်သလို အမောက်ထောင်တိုင်းလည်း နဂါးမဟုတ်ပါဘူး။ ဘယ်သူက အစစ်အမှန်ဆိုတာ အချိန်ကပဲ အဖြေပေးလိမ့်မယ်။ ရာဇပလ္လင်ပေါ်‌မှာ မျောက်တက်‌မိရင် ဖောင်းကားစား မောင်မောင်လို ခွေးရူးကောင်းစား တစ်မွန်းတည့်ဖြစ်ပြီး တိုင်ပတ်ရပါတယ်။

အခုနောက်ပိုင်းမှာ ONE Friday Fights ပြိုင်ပွဲကြောင့် ပရိသတ်တွေက ရိုးရာလက်ဝှေ့ကို အရင်ထက် ပိုစိတ်ဝင်စားလာတယ်။ ဒါပေမယ့် လွန်ခဲ့တဲ့ (၁၀) နှစ်လောက်က အခြေအနေကို မမီသေးပါဘူး။ အဲဒီတုန်းက ရိုးရာလက်ဝှေ့ဟာ အခုထက် ပိုစည်ကားခဲ့တယ်။ အခုစိတ်ဝင်စားတဲ့ ပရိသတ်အများစုက ဘူးသီးမှ အရီးလာတော်တဲ့ ပေါ်ပင်တွေပါ။ ဘယ်ကစားသမားက ဘယ်အဆင့်လဲဆိုတာ သူတို့မသိကြပါဘူး။ ဝါဝါမြင်တိုင်း ရွှေအစစ်လို့ ထင်နေကြပြီး ပြည်ပသွားထိုးရင် ဆရာကြီးလို့ မြင်နေတယ်။ ပြည်ပသွားထိုးတိုင်းသာ ဆရာကြီးဖြစ်နေရင် ထွန်းမင်းလတ်က ရိုးရာလက်ဝှေ့စကြဝဠာချန်ပီယံဖြစ်နေပါပြီ။ အခုတော့ ရှုံးလိုက်တဲ့ အရှုံး။ ထွန်းမင်းလတ်နဲ့ အနိုင်ဆိုတာ အမ်မီနမ်နဲ့ ဘနားနားလို တွဲမြင်ရဖို့ မလွယ်ပါဘူး။ အဆိုတော် အနိုင်ကလည်း ကွယ်လွန်ခဲ့ပြီးမို့ ထွန်းမင်းလတ်ကို အနိုင်နဲ့တွဲမြင်ရဖို့ဆိုတာ ရေသူမ စက်ဘီးစီးသလိုပါပဲ။

ပရိသတ်တွေဟာ ငှက်မသိက ဆက်ရက်ချိုးထင်၊ အချက်မသိက သမက်ကို သူခိုးထင်ဆိုသလို အမြင်အတိုင်းပဲ ဆုံးဖြတ်ကြတယ်။ စွမ်းဆောင်ရည်နဲ့ ကိုယ်ရည်ကိုယ်သွေးကို နားမလည်ကြဘူး။ ငါ့စကားနွားရလုပ်ပြီး အရည်မရ အဖတ်မရပြောနေရင် သဘောကျတယ်။ လူပြိန်းအကြိုက် ပြောနေတာလား၊ ရင်ထဲက ပြောတာလားဆိုတာ မခွဲခြားတတ်ပါဘူး။ မမြင်ဖူး၊ မူး မြစ်ထင်ဆိုသလို နိုင်ပွဲဆက်လာရင် ONE Championship မှာတောင် ချန်ပီယံဖြစ်မလေး ဘာလေး။ အမဲရိုးနှယ် ဟင်းအိုးမှ အားမနာဘဲ အားမနာလျှာမကျိုး လေကြီးမိုးကြီးလျှောက်ပြောနေရင် အလှမ်းကျယ် အလယ်လပ်သွားလိမ့်မယ်။ အရင်ဆုံး ONE Contract ရအောင်ပဲ ကြိုးစားခိုင်းပါဦး။

ONE Friday Fights ပြိုင်ပွဲမှာ ပထမဆုံးနာမည်ကြီးလာတဲ့ မြန်မာကစားသမားက ထွန်းမင်းနိုင်လေးပါပဲ။ အစောပိုင်းမှာ (၂) ပွဲဆက်နိုင်ပြီး အပိုဆုကြေးရလိုက်သေးတယ်။ လော်ဘီတွေက ကိုယ့်ငါးချဉ် ကိုယ်ချဉ်ပြီး စွတ်မြောက်ပေးကြတယ်။ ငါးပွက်ရာ ငါးစာချလိုက်ပြီး လူပြိန်းကြိုက်အောင် လျှောက်ရေးတာပါ။ ရော့တန်ကို စိန်ခေါ်ပြီး ခါးပတ်ယူပြမတဲ့။ ပြည်ပမှာ လေ့ကျင့်တာက ပြည်တွင်းထက် ပိုကောင်းပေမယ့် နဂိုရှိမှ နဂိုင်းထွက်မှာဖြစ်သလို ကျီးကန်းကို ရေချိုးပေးလို့လည်း မဖြူနိုင်ပါဘူး။ ပြောတော့ ရွှေမန်း၊ ကတော့ ချိုမိုင်မိုင်ဖြစ်လာပြီး အခုဆိုရင် ထွန်းမင်းနိုင်နဲ့ ခါးပတ်ဆိုတာ မိုင် (၅) သောင်းနဲ့ မြစ် (၅) စင်းခြားပါတယ်။ ကြက်တူရွေးက တော်တော် မယ်ဘော်ကကဲဆိုသလို လော်ဘီတွေက ပါးစပ်အရသာခံပြီး ကြမ်းပိုးလိပ်ဖြစ်အောင် တောင်စဉ်ရေမရပြောခဲ့ဖူးတာပါ။ ချိန်တော့မိုး၊ ထိုးတော့မြေကြီးဖြစ်လာရင် အကွပ်မဲ့တဲ့ကြမ်း ပရမ်းပတာဖြစ်နေဦးမှာပဲ။

အဲဒီအချိန်မှာ ကျွန်တော်ရေးမိတယ်။ ထွန်းမင်းနိုင်က ရွှေခါးပတ်ပြိုင်ပွဲဝင်ခဲ့ဖူးပေမယ့် သပြေအောင်ကို အလဲထိုးရှုံးပြီး ထွက်ခဲ့ရတဲ့အကြောင်းတွေပါ။ အဲဒါက အချက်အလက်ပဲ။ ရိုးရာလက်ဝှေ့မှာ ရဲသွေးနီ၊ ဒေါင်းဖြူနဲ့ ကျော်စွာဝင်းတို့ကို သရေကျခဲ့ဖူးတဲ့ အကြောင်းကိုလည်း ထပ်ဖြည့်ရေးခဲ့တယ်။ ထွန်းမင်းနိုင်က ရိုးရာလက်ဝှေ့မှာ တန်းရှိပေမယ့် ထိပ်တန်းအဆင့်မဟုတ်သေးဘူးဆိုတာ ပေါ်လွင်စေချင်တာပါ။ ဖင်မနိုင်ဘဲ ပဲကြီးဟင်းစားရင် ကြိုးဝိုင်းကြမ်းပြင်နဲ့ မွေ့ရာ မှားယွင်းတတ်ပါတယ်။ ဒီလောက်ရေးပြထားရင် ချက်ဆို နားခွက်က မီးတောက်ဖို့ သင့်တယ်။ အဲဒီအချိန်မှာ ထွန်းမင်းနိုင်က ကြက်ကန်း ဆန်အိုးတိုးပြီး နိုင်ပွဲဆက်နေတာမို့ အုတ်ရောရော ကျောက်ရောရောလူတွေက ဝိုင်းဆဲကြတယ်။ ပကတိအခြေအနေကို ကျွန်တော်ထောက်ပြပေးတာ လက်မခံနိုင်ကြဘူး။

အရည်လည်ရင် အနယ်ထိုင်ပြီး နိမှသောင် နောင်မှသိပြီမလား။ ကြောင်ကြာကြာ ရေမငုပ်နိုင်ပါဘူး။ အခုဆိုရင် ထွန်းမင်းနိုင်က ရှုံးလိုက် မနိုင်လိုက်ဖြစ်ပြီး ကံဆိုးမှသွားရာ မိုးလိုက်လို့ရွာဖြစ်နေပါပြီ။ ကမ္ဘာ့အဆင့်သွားမယ်ဆိုရင် ဒီလောက်အရည်အချင်းလေးက အဆင်မပြေပါဘူး။ အနည်းဆုံးတော့ မြန်မာပြည်မှာ ထိပ်တန်းဖြစ်ခါမှ တော်ကာကျမယ်။

ချိုကျိုးနားရွက်ပဲ့တွေကို အနိုင်ယူပြီး ဝါးလုံးခေါင်းထဲ လသာခဲ့ဖူးတဲ့ မြန်မာနိုင်ငံရဲ့ နံပါတ် (၁) သွေးသစ်ဝင်းလှိုင်တောင် ပြည်ပမှာ ဇီးကွက်လောက်တော့ ငှက်တိုင်းလှသလို မထော်မနန်းဖြစ်နေသေးတာ ထွန်းမင်းနိုင်ဆိုတာ အဝေးကြီးပါပဲ။ ကျွန်တော်က အဲဒါတွေကို ကြိုသိနေလို့လည်း ဟိုးအရင်တည်းက ရေးခဲ့တာပါ။ အခုလက်ရှိမှာ ထွန်းမင်းနိုင်က ဘယ်အခြေအနေလဲဆိုတာ ကျွဲပါး စောင်းတီးမလုပ်ချင်ပါဘူး။ ကြာကြာဝါးမှ ခါးမှန်းသိသွားပြီမို့ စာဖတ်သူတွေကို မိချောင်းမင်း ရေခင်းပြသလို ဖြစ်မှာလည်း စိုးရိမ်ရပါတယ်။

အချိန်ကာလက အမှန်တရားကို အဆုံးအဖြတ်ပေးသွားမယ်တဲ့။ ONE Friday Fights ပြိုင်ပွဲကို လာကစားကြတဲ့ မြန်မာလက်ဝှေ့သမားထဲမှာ သန့်ဇင်က အတွေ့အကြုံအနည်းဆုံးပါ။ ဒရာမာလုလင် မောင်သန့်ဇင် အမြင့်ဆုံးနိုင်ဖူးတဲ့ ပြိုင်ဘက်ဆိုတာက ဟိန်းထွန်းအောင်ဖြစ်ပါတယ်။ ရန်ကုန်မြို့မှာတောင် ပွဲကြီးပွဲကောင်းမထိုးဖူးသလို ပြည်နယ်ပွဲမှာလည်း နေရာမရဖူးသေးဘူး။ စောဂျွန်ကိုတောင် တော်တော်နိမ့်ပါတယ်။ အမှတ်အတိုင်းဆိုရင် သေချာပေါက်ရှုံးပါတယ်။ သန့်ဇင်ဘက်ကလည်း သူများမြှောက်ပေးတိုင်း ဖိုးချစ်ဖြစ်အောင် မကဘဲ ကိုယ့်ဝမ်းနာ ကိုယ်သာသိဖို့ လိုအပ်ပါတယ်။

ရိုးရာလက်ဝှေ့မှာတောင် မျိုးဆက်သစ်သာသာပဲ ရှိသေးတဲ့ သန့်ဇင်က ဘဝတစ်ကွေ့မှာ နာမည်ကြီးလာတယ်။ ပန်းထိမ်မတတ်ခင် ရွှေခိုးသင်ဆိုသလို ဘုရားမဖြစ်သေးရင် ရောင်ခြည်တော်လွှတ်ချင်လို့ အဆင်မပြေလှပါဘူး။ အတွေ့အကြုံနည်းသေးတာဆိုတော့ အားနေရင် အင်တာဗျူးမှာ မျက်ရည်ချူဖို့ထက် လေ့ကျင့်ကွင်းမှာ ပိုကြိုးစားခဲ့သင့်တာပါ။ ကျွန်တော်ဆိုရင် ပြည်ပအားကိုး ပုဆိန်ရိုးမလုပ်ဘဲ အမေကျော် ဒွေးတော်မလွမ်းသလို ကိုယ့်နိုင်ငံသားကိုပဲ ရင်ထဲက အားပေးနေတယ်။ ဘယ်သူက ဘယ်အဆင့်လဲဆိုတာလည်း သိနေတာပဲ။ အပွေးမြင် အပင်သိသလို အသွေးမြင် အသွင်သိပါတယ်။ ဒရာမာခင်းလွန်းရင် အသံကြောင့် ဖားသေဖြစ်တတ်ပါတယ်။

ဂေါတမမြတ်စွာဘုရားသာ သက်တော်ထင်ရှားရှိနေသေးရင် မောင်သန့်ဇင်က လူပြိန်းကြိုက်အောင် ဒရာမာလုပ်တဲ့နေရာမှာ ဧတဒဂ်ဘွဲ့တံဆိပ်ထူးရလောက်ပါတယ်။ ငွေတစ်ပဲနဲ့ ငါးကြင်းခေါင်းကိုင်လို့မရပေမယ့် ရှုံးသွားလည်း ခါချဉ်ကောင် မာန်ကြီးလို့ တောင်ကြီးဖြိုမည့်ကြံ ခါးကမသန်ဆိုပြီး နားလည်ပေးလို့ရပါတယ်။ တလွဲဆံပင်ကောင်းပြီး အကြောင်းမသိသူတွေကို လူပြိန်းကြိုက်ပြောနေတာကို နားမလည်နိုင်တာပါ။ လူ့လောကကြီးမှာမဟာကဝိ ပညာရှင်ကြီး ဂျင်းထည့်ရင်သာ မသိသာပေမယ့် ပညာမဲ့ကောင်လေး ဂျင်းထည့်ရင် ဆရာကြီး ရွှေဥဒေါင်းရေးဖူးသလို မုန့်တီဟင်းလိုပဲ အကွင်းလိုက်အကွက်လိုက် သိသာလွန်းပါတယ်။ လူပြောမသန် လူသန်မပြောဆိုသလို ဝမရှိဘဲ ဝိလုပ်ဖို့ မသင့်ပါဘူး။

အလဲထိုးရှုံးထားတဲ့ သန့်ဇင်ကို ရေနစ်သူ ဝါးကူထိုးတာ မဟုတ်သလို မြေနိမ့်ရာ လှံစိုက်တာလည်း မဟုတ်ဘဲ မပြည့်တဲ့အိုးက ဘောင်ဘင်ခတ်နေတာမို့ ဆန်ရင်းနာနာဖွတ်ပေးမိတာပါ။ တာခဲရုကို အမှတ်စဉ်ရေအောင် ထိုးနိုင်ပြီး ထန်းသီးကြွေခိုက် ကျီးနင်းခိုက်ဖြစ်တာကို ဘဝကြီးမမှတ်သင့်ဘူး။ ငိုတတ်တဲ့ကလေး နို့စို့ရဆိုသလို အခုလို အဆင်ပြေတယ်ကြားရတော့လည်း ဝမ်းသာမိတယ်။ အဲဒါက ရင်ထဲကအတိုင်း ပြောတာပါ။

သန့်ဇင်က တွေ့မရှောင်ဆိုက်မဖမ်းသင့်ဘူး။ ဖားတုလို့ ခရုခုန် အိုင်ပျက်ရုံပဲ ရှိလိမ့်မယ်။ ခွေးလှေးခုန်လို့ ဖုန်မထပါဘူး။ ဒါတွေပြောရင် ဒေါတွေပါလိမ့်မယ်။အချိန်တန်ရင် နားပိန်ကန်မှာဖြစ်သလို ကျွန်တော်ရေးတာ မှန်၊ မမှန်ဆိုတာ အချိန်က ဆုံးဖြတ်သွားပါလိမ့်မယ်။ လမ်းဆုံးရင် ရွာတွေ့ပေမယ့် ဖွတ်ထွက်မှ တောင်ပို့မှန်းသိရင် အလုပ်မဟုတ်သေးဘူး။ ကြာကြာဝါးမှ ခါးမှန်းသိဆိုသလို ကျောချမှ ဓားပြမှန်းသိရင်လည်း အချိန်နှမြောဖို့ ကောင်းပါတယ်။ စာဖတ်သူတွေ ဘေးကင်းပါစေ။

Reference Source - SCMP
Photo Credit - TMN and ONE
ကျော်စိုးအောင် (Myanmar Fight Edition)

Address

U Tun Lin Chan Street, Hledan, Kamayut Township
Yangon
11041

Opening Hours

Monday 09:00 - 18:00
Tuesday 09:00 - 18:00
Wednesday 09:00 - 18:00
Thursday 09:00 - 18:00
Friday 09:00 - 18:00
Saturday 09:00 - 18:00
Sunday 09:00 - 18:00

Telephone

+959780313367

Website

Alerts

Be the first to know and let us send you an email when Myanmar Fight Edition posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Myanmar Fight Edition:

Shortcuts

Share

Category

စာဖတ်သူအတွက် ပန်ကြားလွှာ

ကျွန်တော်က ဘောက်ဆင်၊ MMA ၊ ကစ်ဘောက်ဆင်၊ မွေထိုင်း၊ မြန်မာ့ရိုးရာလက်ဝှေ့နဲ့ ပတ်သက်တဲ့ ဆောင်းပါးတွေကို ဖတ်ရတာ အရသာတွေ့တယ်။ မြန်မာဘာသာနဲ့ ရေးထားတဲ့ Page တွေကို ရှာဖတ်ကြည့်တော့ အများစုက သတင်းရင်းမြစ် မခိုင်လုံတဲ့ အရေးအသားတွေ၊ ဝါကျဖွဲ့စည်းပုံနဲ့ သဒ္ဒါမမှန်တဲ့ စာကြောင်းတွေ၊ တစ်ဖက်ပိတ်အစွဲနဲ့ ဘက်လိုက်ရေးထားတဲ့ ဆောင်းပါးတွေအပြင် Clickbait ဆန်တဲ့ သတင်းခေါင်းစီးတွေပဲ တွေ့နေရတယ်။ သူများကို ဖောင်းထုတာ မဟုတ်ဘဲ ကိုယ်မကြိုက်တာကို ရင်ဖွင့်တဲ့သဘောပါ။ အနှစ်သာရရှိတဲ့ ဆောင်းပါးတွေကို ဇိမ်ယူပြီး ဖတ်ချင်တဲ့ ဝါသနာတူတွေအတွက် Myanmar Fight Edition ကို လုပ်ဖြစ်ခဲ့တာ။

ကစားသမားရဲ့အကြောင်းကို ရေးမယ်ဆိုရင် သူ ထိုးခဲ့တဲ့ပွဲတွေကို YouTube မှာ Download ဆွဲရတယ်။ အဲဒါက အနည်းဆုံး (၁၅,၀၀၀) ကျပ် ကုန်ပါတယ်။ ပြီးရင် မပျင်းမရိနဲ့ တစ်နေကုန် ထိုင်ကြည့်ရတယ်။ ပွဲစဉ်တိုင်းမှာ သုံးသပ်ချက်တွေ ထည့်ရေးရတယ်။ သူ့အကြောင်းတွေကို ရှာဖတ်ရတယ်၊ သူနဲ့ ပတ်သက်တဲ့ မှတ်တမ်းတွေကို YouTube မှာ လိုက်ကြည့်ရတယ်။ သတင်းရင်းမြစ် (၃၀) လောက်ကို ပေါင်းစုပြီး ရေးရတာ။ ညလုံးပေါက်ရော။ အဲဒီစာသားတွေထဲမှာ ခုနက ဗီဒီယိုကြည့်ပြီး ရေးထားတဲ့ ပွဲစဉ်သုံးသပ်ချက်တွေကို ပြန်ထည့်ရတယ်။ နားမလည်တဲ့ အကြောင်းအရာတွေကို သက်ဆိုင်ရာပညာရှင်တွေဆီမှာ ထပ်မေးရပါတယ်။

သုံးသပ်ချက်တွေ ဖတ်ပြီးတဲ့နောက်မှာ ဗီဒီယိုကြည့်ရအောင်လို့ YouTube နဲ့ လင့်ခ်ချိတ်ပေးလိုက်တယ်။ Facebook နဲ့ လင့်ခ်ချိတ်ပေးလိုက်ရင် ပိုလွယ်ပေမယ့် စာဖတ်သူတွေကို ကြည်လင်ပြတ်သားတဲ့ Full HD Resolution နဲ့ ကြည့်စေချင်လို့ပါ။ YouTube နဲ့ ဒီအတိုင်းချိတ်ပေးလိုက်ရင် လင့်ခ်တွေက ရှည်တော့ မျက်စိရှုပ်မှာစိုးလို့ Bitly နဲ့ လင့်ခ်ချုံ့လိုက်ပါတယ်။ ဆောင်းပါးနဲ့ ကိုက်ညီတဲ့ ပုံတွေကို ပြန်ရှာရတယ်။ စာဖတ်သူတွေ မျက်စိပသာဓဖြစ်အောင် ဓာတ်ပုံတွေကို Square Size နဲ့ ပြန်ပြင်ရပါတယ်။ နောက်ဆုံးမှာ စာလုံးပေါင်းသတ်ပုံကို အနည်းဆုံး (၅) ခေါက် ပြန်စစ်ပါတယ်။ ဆောင်းပါးမှာ Space ပိုနေရင်တောင် ကျွန်တော်က မကြိုက်ပါဘူး၊ အစအဆုံးပြန်ပြင်ပါတယ်။ စိတ်တိုင်းကျပြီဆိုမှ တင်လိုက်ပါတယ်။ ဆောင်းပါးတစ်ပုဒ်ဖြစ်မြောက်ဖို့က မလွယ်ပါဘူးလို့ ဆိုလိုချင်တာပါ။ မျက်ရည်ချူပြတာ မဟုတ်သလို ကြွားလုံးထုတ်တာလည်း မဟုတ်ပါဘူး။ ကာယ၊ ဉာဏစိုက်ထုတ်အားတွေကို ထည့်မပြောသေးပါဘူး။ ဖုန်းဘေလ်တင် အနည်းဆုံး (၃၀,၀၀၀) ကျပ် ကုန်မှ ဆောင်းပါးဖြစ်လာပါတယ်။ ကစားသမားအကြောင်းကို ရေးမယ်ဆိုရင် သူတို့ပွဲတွေ ပြန်ကြည့်ရလို့ ကုန်တာပါ။ အလုပ်အဆင်ပြေနေရင် မသိသာဘူးပေါ့။ Coronavirus ကြောင့် ကျွန်တော်လည်း ဝင်ငွေလျော့လာတယ်။ ဖုန်းဘေလ်နဲ့ဆိုရင် ရေရှည်မရပ်တည်နိုင်ဘူးဆိုတာ နားလည်လာမှပဲ ဝိုင်ဖိုင်တပ်လိုက်ပါတယ်။ဆောင်းပါးတွေကို ကြိုက်တယ်လို့ Comment မှာ ရေးသွားရင် အားရှိသွားပါတယ်။ အပျော်တမ်းရေးတာဆိုတော့ အကျိုးအမြတ်ခံစားခွင့် မရှိပေမယ့် ပီတိဖြစ်တာ အမှန်ပါပဲ။

အခုလည်း Video Content လုပ်ချင်နေတာ၊ ကင်မရာက စျေးကြီးလို့ လက်တွန့်နေရတယ်။ Video Editing ကိုတော့ လေ့လာလိုက်ပါဦးမယ်။ ကင်မရာဝယ်နိုင်တဲ့အချိန်မှာ အဆင်သင့်ဖြစ်အောင်လို့ပါ။ Myanmar Fight Edition မှာ ပြီးပြည့်စုံတဲ့ တင်ဆက်မှုမျိုးတွေကို မကြာခင်မှာ မြင်ရတော့မှာပါ။ ကျွန်တော့်ဘက်ကလည်း ကိုယ်စွမ်းဉာဏ်စွမ်းရှိသလောက် ပိုကောင်းအောင် ကြိုးစားသွားပါ့မယ်။ စာဖတ်သူတွေရဲ့ အမြင်တွေကို သိရအောင် Comment တွေကို သေချာဖတ်ဖြစ်ပါတယ်။ ဘောက်ဆင်၊ MMA ၊ ကစ်ဘောက်ဆင်၊ မွေထိုင်း၊ မြန်မာ့ရိုးရာလက်ဝှေ့ စတဲ့ Combat Sports ဆောင်းပါးတွေနဲ့ ပတ်သက်ပြီး အကြံပြုချက်တွေကို Message Box ဒါမှမဟုတ် Comment Box မှာ ရေးနိုင်ပါတယ်။ သာယာတဲ့ နေ့ရက်လေး ဖြစ်ပါစေ။