https://www.facebook.com/106961691771491/

DY Soccer, Yangon (2024)

🔴ကူဒပ်စ်ကို မခေါ်ဘဲ အန်တိုနီကို ခေါ်ခဲ့တဲ့ တန်ဟက်ဂ်ကို ပီတာရှမိုက်ကယ် အံ့အားသင့်

မန်ချက်စတာယူနိုက်တက်အသင်းရဲ့ ဂန္ထဝင်ဂိုးသမား ပီတာရှမိုက်ကယ်က အေဂျက်စ်အသင်းက ကစားသမားခေါ်တာချင်းအတူတူ မိုဟာမက်ကူဒပ်စ်ကို မခေါ်ဘဲ ဘရာဇီးတောင်ပံကစားသမား အန်တိုနီ ကို ယူရို သန်း ၁၀၀နဲ့ ခေါ်ခဲ့တဲ့ နည်းပြ တန်ဟက်ဂ်ရဲ့ ဆုံးဖြတ်ချက်အပေါ် အံ့အားသင့်မဆုံးဖြစ်နေပါတယ်။ မိုဟာမက်ကူဒပ်စ်ဟာ မနေ့က မန်ချက်စတာယူနိုက်တက်နဲ့ပွဲမှာ ဝက်စ်ဟမ်းအသင်းအတွက် အနိုင်ဂိုးတစ်ဂိုးကို သွင်းပေးခဲ့သူဖြစ်ပါတယ်။ ဒီနှစ်နွေရာသီကမှ အေဂျက်စ်ကနေ ဝက်စ်ဟမ်းကို ပြောင်းခဲ့သူပါ။ အေဂျက်စ်အသင်းမှာတုန်းက နည်းပြ တန်ဟက်ဂ်ရဲ့လက်အောက်မှာ ပွဲအများဆုံး(၄၂ပွဲ)ကစားပေးခဲ့သူတစ်ဦးလည်းဖြစ်ပါတယ်။ မနေ့က မန်ယူဘက်ကို သွင်းခဲ့တဲ့ ဂိုးအပါအဝင် ဒီရာသီ ဝက်စ်ဟမ်းအသင်းရဲ့ အိမ်ကွင်းပွဲစဉ်တွေမှာ ကူဒပ်စ်ရဲ့သွင်းဂိုး ၉ ဂိုးအထိရှိခဲ့ပါပြီ။ လီဗာပူး တိုက်စစ်မှူး ဆာလာပြီးရင် ဒီရာသီ ပရီးမီးယားလိဂ်ရဲ့ အိမ်ကွင်းပွဲသွင်းဂိုးအများဆုံး ကစားသမားအဖြစ်လည်း ကူဒပ်စ် မှတ်တမ်းဝင်နေပါတယ်။ ဒီရာသီ ပြိုင်ပွဲအရပ်ရပ်မှာဆိုရင် ကူဒပ်စ်ရဲ့သွင်းဂိုးအရေအတွက်က ၁၅ ဂိုးအထိရှိနေပါတယ်။

"ဒီကောင်လေး(ကူဒပ်စ်)ရဲ့အကြောင်းက စိတ်ဝင်စားစရာပါပဲ။ တော်တော်လည်းထူးခြားမှုရှိတဲ့ ကစားသမားတစ်ဦးပါ။ ဒီကစားသမားလေတွေဟာ ဒီလောက်ကောင်းတာကို သိရက်နဲ့ ကူဒပ်စ်ကို ကျော်ပြီး အန်တိုနီကို ဘာလို့ တန်ဟက်ဂ် ခေါ်ခဲ့သလဲကို ကျွန်တော် နားမလည်နိုင်ဘူး"လို့ ပီတာရှမိုက်ကယ်က မနေ့က ဝက်စ်ဟမ်းနဲ့ပွဲအပြီးမှာ ဝေဖန်ခဲ့ပါတယ်။

ကူဒပ်စ်ဟာ ဒီဇင်ဘာလထဲ ပရီးမီးယားလိဂ်ပွဲတွေမှာ ဂိုးအများဆုံးသွင်းထားသူဖြစ်ပြီး ၄ဂိုးသွင်းခဲ့ပါတယ်။ ဒီလအတွက် ပရီးမီးယားလိဂ်တစ်လတာအကောင်းဆုံးကစားသမားဆုရဖို့လည်း ရေပန်းစားနေသူတစ်ဦးဖြစ်ပါတယ်။

24/12/2023

ဒီရာသီ စီးရီးအေမှာ ပွဲစဉ်(၁၇)အပြီး လာဇီယို၊ အတ္တလန်တာ၊ နာပိုလီ၊ ရိုးမားနဲ့ ဖီအိုရင်တီးနားအသင်းတို့ကို ကျော်ပြီး အဆင့်(၄)နေရာမှာ ရပ်တည်နေတဲ့ ဘိုလော့နာအသင်းကို ဘောလုံးပရိသတ်တွေ သတိထားစပြုလာပါပြီ။ အင်တာမီလန်ကွင်းလယ်လူဟောင်း သီယာဂို မော့တာရဲ့ ဦးဆောင်မှုအောက်မှာ ဘိုလော့ဂ်နာဟာ မထင်မှတ်ရလောက်အောင် တိုးတက်လာလာပါတယ်။ ဒီလို တိုးတက်လာရာမှာ နည်းပြ သီယာဂိုမော့တာရဲ့ အခန်းကဏ္ဍနဲ့အတူ ကွင်းလယ်လူ တိုက်စစ်ကစားသမား လီဝစ်ဖာဂူဆန်ရဲ့ ခြေစွမ်းကိုလည်း မေ့ထားလို့ မရပါဘူး။

လီဝစ်ဖာဂူဆန်ဟာ အတ္တလန်တာအသင်းကို ၁-၀ နဲ့ အနိုင်ရရှိတဲ့ ပွဲစဉ်မှာ ဘိုလော့နာအသင်းအတွက် တစ်လုံးတည်းသော အနိုင်ဂိုးကို ပွဲချိန် (၈၆)မိနစ်မှာ သွင်းယူပေးခဲ့ပါတယ်။ ဒီသွင်းဂိုးကြောင့် ဖာဂူဆန်ဟာ စီးရီးအေမှာ သမိုင်းမှာ သွင်းဂိုး (၁၁)ဂိုးနဲ့ ဒင်းနစ်လောကို ကျော်ပြီး စီးရီးအေမှသွင်းဂိုးအများဆုံး စကော့တလန် ကစားသမား ဖြစ်လာခဲ့ပါတယ်။ ဒင်းနစ်လောက ၁၉၆၁-၆၂ ရာသီက တိုရီနိုအသင်းမှာ ကစားခဲ့ဖူးပြီး (၁၀)ဂိုး သွင်းခဲ့ပါတယ်။

အသက်(၂၄)နှစ်အရွယ်ရှိ ဖာဂူဆန်ဟာ ဘိုလော့နာအသင်း နည်းပြ သီယာဂို မော့တာရဲ့ ယုံကြည်အားကိုးရတဲ့ ကစားသမား တစ်ဦးဖြစ်ပြီး အတ္တလန်တာအသင်းနဲ့ ပွဲစဉ်မှာ အသင်းခေါင်းဆောင်အဖြစ် ကစားခွင့် ရရှိခဲ့ပါတယ်။ ဖာဂူဆန်ဟာ ဒီရာသီ စီးရီးအေမှာ သွင်းဂိုး (၄)ဂိုး သွင်းယူထားပြီး ဂျူဗင်တပ်စ်နဲ့ လာဇီယိုအသင်းတို့ကိုလည်း ဂိုးသွင်းခဲ့ပါတယ်။ဖာဂူဆန်ဟာ စီးရီးအေ ကလပ်အသင်းကြီးတွေရဲ့ စိတ်ဝင်စားခြင်း ခံခဲ့ရပေမယ့် မကြာသေးခင်ကပဲ ဘိုလော့နာအသင်းနဲ့ ၂၀၂၇ ခုနှစ်အထိ စာချုပ်သက်တမ်းတိုးခဲ့ပါတယ်။

ဖာဂူဆန်ဟာ ၂၀၂၂ ခုနှစ်က စကော့တလန်ကလပ် အဘာဒင်းအသင်းမှ ဘိုလော့နာအသင်းကို ပြောင်းရွေ့ကြေး ပေါင်(၃)သန်းနဲ့ ရောက်ရှိလာခဲ့သူပါ။ ပြီးခဲ့တဲ့ရာသီ ဘိုလော့နာအသင်းနဲ့အတူ စီးရီးအေမှာ (၃၂)ပွဲအထိ ကစားခွင့် ရရှိခဲ့ပြီး ဒီရာသီမှာလည်း (၁၇)ပွဲစလုံး ကစားခွင့် ရရှိထားပါတယ်။ ဒါ့အပြင် စကော့တလန် လက်ရွေးစင်အသင်း အတွက်လည်း (၁၀)ပွဲအထိ ကစားထားပြီး လာမယ့် ၂၀၂၄ ယူရိုပြိုင်ပွဲမှာ အဓိက ကစားသမားအဖြစ် ရွေးချယ်ခံရဖို့ရှိနေပါတယ်။

24/12/2023

လီဗာပူးတိုက်စစ်မှူး ဆာလာဟာ မနေ့က အာဆင်နယ်နဲ့ တစ်ဂိုးစီသရေကျခဲ့တဲ့ပွဲမှာ ရိုးရာမပျက် ဂိုးသွင်းနိုင်ခဲ့ပြန်ပါတယ်။ အာနိုးရဲ့သေသပ်လွန်းတဲ့ long ball ပေးပို့မှုကတဆင့် ဆာလာ သွင်းခဲ့တဲ့ ဒီဂိုးဟာ အာဆင်နယ်နဲ့ ပရီးမီးယားလိဂ်ပွဲတွေမှာ သူ့ရဲ့ ၁၀ ဂိုးမြောက်သွင်းဂိုးဖြစ်ခဲ့ပါတယ်။ အာဆင်နယ်နဲ့ ပွဲတွေမှာ ၁၀ ဂိုးမြောက်ဂိုးကို အခုမှ သွင်းနိုင်ခဲ့ပေမယ့် မန်စီးတီး၊ မန်ယူတို့နဲ့ပွဲတွေမှာတော့ အစောပိုင်းကတည်းက သူ့ရဲ့ ၁၀ဂိုးမြောက်ဂိုးကို သွင်းနိုင်ခဲ့တာပါ။ ဆာလာဟာ မန်ချက်စတာယူနိုက်တက်နဲ့ပွဲတွေမှာ ၁၂ ဂိုးအထိသွင်းခဲ့ပြီး မန်ချက်စတာစီးတီးနဲ့ပွဲတွေမှာတော့ ၁၁ ဂိုးသွင်းခဲ့ပါတယ်။ သူ ရင်ဆိုင်ခဲ့တဲ့ ပရီးမီးယားလိဂ်အသင်းတွေထဲမှာ မန်ချက်စတာယူနိုက်တက်ကတော့ ဆာလာအတွက် ဂိုးအသွင်းနိုင်ဆုံးပြိုင်ဘက်ဖြစ်ခဲ့ပါတယ်။

23/12/2023

🛑၀က်စ်ဟမ်းကို ရှုံးပြီးနောက် မန်ယူ နည်းပြ အပြောင်းအလဲ ဖြစ်လာနိုင်

မန်ချက်စတာယူနိုက်တက်ဟာ ဘောလုံးတစ်ရာသီအတွင်း ခရစ္စမတ်နေ့မတိုင်ခင် ပြိုင်ပွဲအရပ်ရပ် ရှုံးပွဲ ၁၃ပွဲရှိခဲ့ပြီးနောက် နည်းပြအပြောင်းအလဲလုပ်ဖွယ်ရှိတယ်လို့ သတင်းတွေ ကျယ်ကျယ်ပြန့်ပြန့် ထွက်လာပါတယ်။ မန်ချက်စတာယူနိုက်တက်ဟာ ဒီနေ့၊ ကစားတဲ့ ဝက်စ်ဟမ်းနဲ့ပွဲမှာလည်း ၂ဂိုးပြတ်နဲ့ ရှုံးခဲ့တာကြောင့် အံ့အားသင့်စရာဖြစ်သွားပါတယ်။ ဒီပွဲအပါအဝင် ပြိုင်ပွဲအရပ်ရပ် နောက်ဆုံး ၄ပွဲဆက်တိုက် တစ်ဂိုးမှမသွင်းနိုင်ခဲ့တဲ့ တိုက်စစ်ကလည်း အံ့အားသင့်စရာဖြစ်သွားပါတယ်။ မှတ်တမ်းတွေအရ မန်ချက်စတာယူနိုက်တက်ဟာ နှစ်ပေါင်း ၃၀ ကျော်အတွင်း ပထမဆုံးအကြိမ်အဖြစ် ပြိုင်ပွဲအရပ်ရပ် ၄ပွဲဆက်တိုက် ဂိုးပေါက်ပျောက်ခဲ့တယ်လို့ သိရပါတယ်။ မန်ချက်စတာယူနိုက်တက်ရဲ့တိုက်စစ်က ထက်မြက်မှု ပျောက်ဆုံးနေသလို ဒုတိယပိုင်းမှာ ရက်ရှ်ဖို့ဒ် ဝင်လာတော့လည်း မန်ချက်စတာယူနိုက်တက်ဟာ ဘာမှ မပြောင်းလဲခဲ့ပါဘူး။ ဒါကြောင့်လည်း မန်ချက်စတာယူနိုက်တက်ဟာပြိုင်ပွဲအရပ်ရပ် ၄ပွဲဆက်တိုက် ဂိုးပေါက်ပျောက်ခဲ့တာဖြစ်ပါတယ်။ ရှုံးပွဲကြောင့် မန်ချက်စတာယူနိုက်တက်မှာ နည်းပြအပြောင်းအလဲဖြစ်လာဖို့ရှိနိုင်တယ်လို့ သုံးသပ်လာကြပါတယ်။