BEE BOX (2024)

17/07/2024

♦️နိုင်ငံအနှံ့စစ်ရေးအရှိန်မြှင့်မှုတွေနဲ့အတူ မြို့ပြစစ်ပွဲများပါ ဖော်ဆောင်နေတာကြောင့် မြို့ပြဒေသတွေမှာ နေထိုင်ကြတဲ့အရပ်သားပြည်သူတွေအနေနဲ့ လက်နက်ငယ်တွေနဲ့ ပစ်ခတ်တိုက်ခိုက်ကြစဉ်အတွင်း ထိခိုက်မှုလျော့ပါးသက်သာစေဖို့ ကြိုတင်ပြင်ဆင်မှုတွေ ဆောင်ရွက်ထားရပါမယ်။

♦️ကျေးလက်ဒေသတွေမှာလို ဗုံးခိုကျင်းနှင့်ကတုတ်ကျင်းတွေတူးဖော်ဖို့ခက်ခဲတဲ့ မြို့ပေါ်ရပ်ကွက်တွေမှာ နေထိုင်ကြသူတွေ၊ အထပ်မြင့်အဆောက်အအုံတွေမှာ နေထိုင်ကြသူတွေအနေနဲ့ မိမိတို့နေအိမ်ဝန်းခြံများအတွင်း အရေးပေါ်ခိုလှုံရာနေရာတွေ စီမံဆောင်ရွက်ထားမယ်ဆိုရင် အန္တရာယ်ကျရောက်ချိန်မှာ အသက်အန္တရာယ်ဆုံးရှုံးရတာ၊ ထိခိုက်ဒဏ်ရာရတာတွေ သက်သာစေမှာဖြစ်ပါတယ်။

♦️ကျနော်တို့ပတ်ဝန်းကျင်မှာ ရရှိနိုင်တဲ့ပစ္စည်းတွေကို သုံးပြီး နေအိမ်ဝန်းခြံတွေထဲမှာ နည်းစနစ်တကျ အရေးပေါ်ခိုလှုံရာနေရာတွေ ဖန်တီးထားနိုင်ကြဖို့ ဆောင်ရွက်ပုံအဆင့်ဆင့်ကို ပုံတစ်ပုံချင်းစီမှာဖော်ပြပေးထားပါတယ်။ အခုလို ခက်ခဲတဲ့ကာလမှာ ချစ်ခင်ရသူတွေကိုလည်း ပြန်လည်မျှဝေပေးကြဖို့ပါ တိုက်တွန်းလိုပါတယ်။

#မြို့ပြ #စစ်ဘေးရှောင်

23/04/2024

ကျင်ဒွေးမြို့သိမ်းတို၊က်ပွဲ အရှိန်မြှင့်မယ်လို့ ကြေညာ၊ နှစ်ဖက်တို၊က်ပွဲ ပိုပြင်းထန်လာနိုင်

ဧပြီလ ၂၃ ရက် ၊ ၂၀၂၄

‘ချင်းညီနောင်’ စစ်ဆင်ရေးအမည်နဲ့ ဖော်ဆောင်နေတဲ့ ကန်ပက်လက်မြို့နယ်၊ ကျင်ဒွေးမြို့သိမ်းတို၊က်ပွဲကို အရှိန်မြှင့်မယ်လို့ ‘ချင်းညီနောင်’ က ဒီကနေ့ ပြည်သူလူထုထံ အသိပေးတဲ့ ကြေညာချက် ထုတ်ပြန်လိုက်ပါတယ်။

၂၀၂၃ ဒီဇင်ဘာလက စတင်တို၊က်ခိုက်ခဲ့တဲ့ ကျင်ဒွေးမြို့နဲ့ ပတ်သက်တဲ့ စစ်ရေးသတင်းကို အခု တရားဝင်သတင်းထုတ်ပြန်လာတာပါ။

၂၀၂၃ ဒီဇင်ဘာလက CDF နဲ့ PDF ပူးပေါင်းတပ်တို့က ကျင်ဒွေးမြို့ကိုစတင်တို၊က်ခိုက်တာဖြစ်ပြီး ၂၀၂၄ မတ်လ ၇ ရက်နေ့မှာ ‘ချင်းညီနောင်’ စစ်ဆင်ရေးအဖြစ် စတင်ဖော်ဆောင်ခဲ့တာလို့လည်း ဆိုပါတယ်။

ကျင်ဒွေးမြို့မှာ စစ်ကောင်စီက အင်အားဖြည့်တင်းမှု၊ လေကြောင်းပစ်ကူ တို၊က်ခိုက်မှုတွေ ဆက်တိုက်လုပ်နေတာကြောင့် နှစ်ဖက်ပစ်ခတ်မှု ဆက်တိုက်ဖြစ်ပွားနေတာ ၄ လဝန်းကျင်အထိ ရှိလာနေပြီး နှစ်ဖက်ထိခိုက် ဆုံးရှုံးမှုတွေရှိထားပါတယ်။

၂၀၂၄ ဧပြီလနှောင်းပိုင်းမှာလည်း စစ်ကောင်စီက အင်အား ၁၆၀ ဝန်းကျင်ကို ထပ်မံ အင်အားဖြည့်တင်းလာတာကြောင့် ကျင်ဒွေးမှာ တို၊က်ပွဲဆက်ပြင်းထန်လာနိုင်ပါတယ်။

ကျင်ဒွေးမြို့သိမ်းတို၊က်ပွဲမှာ အာရက္ခတပ်တော် (AA) က ပါဝင်တို၊က်ပွဲဖော်နေတယ်လို့လည်း ‘ချင်းညီနောင်’ ရဲ့ ဒီကနေ့ ထုတ်ပြန်ချက်မှာ ဖော်ပြပါတယ်။

ကျင်ဒွေးမြို့သိမ်းတို၊က်ပွဲ စစ်ဆင်ရေးကို နောက်မဆုတ်ဘဲ မဟာမိတ်တွေနဲ့ ပူးပေါင်းပြီး အရှိန်မြှင့်တင်သွားမယ်လို့ PDF – Zoland, CDF – Mindat, CDF – KPL, CDF – Matupi B 1, CNDF, MDF တို့ပါဝင်တဲ့ ‘ချင်းညီနောင်’ က ဒီကနေ့ ကြေညာပါတယ်။
------
ပုံစာ - ကန်ပက်လက်မြို့နယ်၊ ကျင်ဒွေးမြို့နှင့် CDF ကန်ပက်လက်တပ်ဖွဲ့ဝင်များအား တွေ့ရစဉ်။

#ကျင်ဒွေး
#စစ်ကောင်စီ #ချင်း

23/04/2024

BGF အကူအညီဖြင့် မြဝတီ ခလရ- ၂၇၅ တပ်တွင်း စစ်ကောင်စီတပ် အလံလာတင်ဟုဆို

ဧပြီလ ၂၃ ရက် ၊ ၂၀၂၄

ကရင်ပြည်နယ်၊ မြဝတီမြို့၊ ခလရ-၂၇၅ တပ်ရင်းထဲတွင် ကရင်နယ်ခြားစောင့်တပ် (BGF) အကူအညီဖြင့် စစ်ကောင်စီတပ်က အလံ လာတင်သွား ကြောင်း KNU စစ်ရေးသတင်းရင်းမြစ်ထံက သိရသည်။

ယနေ့(ဧပြီ၂၃ရက်)နေ့ခင်းပိုင်းတွင် BGF က ခလရ-၂၇၅ ထဲသို့ စစ်သား၆ဦးကို ခေါ်လာကာ အလံလာ တင်သွားခြင်းဖြစ်ကြောင်း သိရသည်။

"ဒီနေ့ BGFက စကစ၆ ယောက်ကို ခေါ်လာပြီး ၂၇၅မှာ အလံလာတင်တယ်။စကစ ၆ ယောက်က မြဝတီကို ပြန်သွားပြီး အခု BGFတွေနဲ့ ထိုင်နေပါတယ်။၂၇၅ကို ဒီက စခန်းသိမ်းပြီးနောက် ဘယ်သူမှ ရှိမနေကြတာ ကြာပြီ။ဒီနေ့က BGFက ဦးဆောင်ပြီး စကစကို ခေါ်လာပြီး အလံတင်ခြင်းကို ပြုလုပ်တယ်" ဟု ၎င်းက ပြောသည်။

ယနေ့ ညနေပိုင်းတွင် လူမှုကွန်ရက်ပေါ်၌ မြဝတီအခြေစိုက် ၂၇၅ တပ်ရင်းအတွင်း စစ်ကောင်စီတပ်က အလံလွှင့်နေသည့် ရုပ်သံ၊ တပ်မ - ၄၄ ဘက်တံဆိပ်ပါ စစ်သားတစ်ဦးနှင့် KNA/BGFမှ ဗိုလ်မှူးကြီး နိုင်မောင်ဇော်တို့ တွဲရိုက်ထားသည့်ဓာတ်ပုံနှင့် အလံလွှင့်နေသည့် စစ်သား ဓာတ်ပုံတို့ ပျံ့နှံ့ခဲ့သည်။

မြဝတီမြို့အနောက်ဘက်ရှိ ခလရ -၂၇၅ ကို ဧပြီ၁၁ရက်တွင် KNLA ပူးပေါင်းတပ်က သိမ်းပိုက်ခဲ့ခြင်း ဖြစ်ပြီး ဧပြီ၁၅ရက်တွင် ခလရ-၂၇၅ အတွင်း စစ်ကောင်စီတပ် လွှင့်ထူထားသော အလံကို ကော်ဘရာစစ် ကြောင်းက ဖြုတ်ချကာ ကရင်အမျိုးသားအလံတော် လွှင့်ထူခဲ့ခြင်းဖြစ်သည်။

ခလရ-၂၅၇တပ်မှ စစ်သား ၂၀၀ခန့်တို့သည် ဧပြီ၁၀ရက်ညက အမှတ်-၂ တံတားအနီးသို့ ထွက်ပြေးခဲ့ ခြင်းပြီး ဧပြီ၁၀ရက်ညနှင့် ဧပြီ ၂၀ရက် တို့တွင် KNLAပူးပေါင်းတပ်က ထပ်မံတိုက်ခိုက်ခဲ့ရာ စစ်သား ၃၀ထက်မနည်း သေဆုံးခဲ့ကြောင်း သိရသည်။

စစ်ကောင်စီတပ်က အလွန်အကျွံလေကြောင်းတိုက်ခိုက်မှုများ ပြုလုပ်လာသဖြင့် KNLA ပူးပေါင်းတပ်သည် ဧပြီ၂၁ရက် နံနက်ပိုင်းမှ စတင်၍ တိုက်ခိုက်မှု ရပ်နားခဲ့ကာ ယာယီဆုတ်ခွာ ထားသည်။

ဓာတ်ပုံ - လူမှုကွန်ရက် / ပုံစာ - ခလရ ၂၇၅အတွင်း အလံလွှင့်ထူနေသည့် စစ်သားများကို တွေ့ရစဉ်။

စာတည်း - ML
#ကရင်ပြည် #မြဝတီ #စစ်ကောင်စီ

22/04/2024

ဟားခါးတွင် VIP ယာဉ်တန်းတိုက်ခိုက်ခံရမှု‌ကြောင့် လူကြီးတချို့ဒဏ်ရာရရှိကြောင်း စစ်ကောင်စီဝန်ခံ ၊ မြို့သစ်ရပ်ကွက်ရှိ ဘုရားကျောင်းများတွင် လူ ၅ ဦးထက်မစုရန် အမိန့်ထုတ်ပြန်

ဧပြီလ ၂၂ ရက် ၊ ၂၀၂၄

ချင်းပြည်နယ်၊ ဟားခါးမြို့၊ မြို့သစ်ရပ်ကွက်တွင် စစ်ကောင်စီ၏ VIP ယာဉ်တန်းသည် ပြီးခဲ့တဲ့ဧပြီလ ၁၂ ရက်နေ့နံနက်ပိုင်းတွင် တိုက်ခိုက်ခံခဲ့ရပြီးလူကြီးတချို့ထိခိုက်ဒဏ်ရာရရှိခဲ့တယ်လို့ စစ်ကောင်စီက ဝန်ခံလိုက်ပါတယ်။

အဆိုပါတိုက်ခိုက်မှုဖြစ်စဉ်ကြောင့် ဟားခါးမြို့၊ မြို့သစ်ရပ်ကွက်အတွင်းက မည်သည့်ဈေးဆိုင်မဆို ဖွင့်လှစ်ခြင်းမပြုရန် နှင့် ဘုရားကျောင်းတွင် လူ ၅ ဦးထက်ပို၍ စုဝေးခြင်းများမပြုလုပ်ကြဖို့ စစ်ကောင်စီက ဒီကနေ့ ဧပြီလ ၂၂၊ ၂၀၂၄ ရက်နေ့မှာအမိန့်ထုတ်ပြန်လိုက်တယ်လို့ သိရပါတယ်။

"သူတို့ဒီနေ့ မနက်ပိုင်းမှာ သူတို့ထုတ်တဲ့အမိန့်စာကို မိုက်နဲ့ တစ်လမ်းလုံးကြေငြာသွားတ‌ယ်။ မြို့သစ်ရပ်ကွက်ထဲက ဆိုင်တွေတော့အကုန်ပိတ်ကြပြီ။ "လို့ ဒေသခံတစ်ဦးက Matupi Times ကိုပြောပါတယ်။

စစ်ကောင်စီရဲ့ မော်တော်ယာဉ်တန်းကို ပြီးခဲ့တဲ့ ဧပြီလ ၁၂ ရက်နေ့ နံနက်ပိုင်း ၉း၃၀ အချိန်ခန့်တွင် ဝင်ရောက်တိုက်ခိုက်ခဲ့တယ်လို့ချင်းလဲန်းကာကွယ်ရေးတပ်-ဟားခါး(CDF-Hakha)က သတင်းထုတ်ပြန်ထားပြီး ၊ တိုက်ခိုက်မှုကြောင့် ယာဉ်ပေါ်လိုက်ပါလာတဲ့ လူမှုရေးဝန်ကြီးအပြင်းအထန်ဒဏ်ရာရရှိကာ အခြားဝန်ကြီးအချို့ထိခိုက်ဒဏ်ရာရရှိခဲ့ကြတယ်လို့ ဆိုပါတယ်။

အဆိုပါတိုက်ခိုက်မှုသည်မှန်ကန်ကြောင်း စစ်ကောင်စီ ဝန်ခံလိုက်တာဖြစ်ပြီး မြို့သစ်ရပ်ကွက်အတွင်းရှိသူများက CDF များကို လက်ခံကာ နေအိမ်များ၊ ဆိုင်ခန်းများ၊ ဘုရားကျောင်းများကို အကာကွယ်ယူပြီး ပစ်ခတ်မှုဖြစ်ပွားခဲ့တာလို့ စစ်ကောင်စီကဆိုပါတယ်။

ထုတ်ပြန်ထားသည့် အမိန့်သည် လာမည့် ဇွန်လ ၂၀ ၊ ၂၀၂၄ ရက်နေ့ထိ နောက်ထပ်အမိန့်တစုံတရာ မထုတ်ပြန်မချင်း အတည်ဖြစ်ပြီး ၊ လိုက်နာခြင်းမရှိပါက တည်ဆဲဥပဒေများနဲ့ အရေးယူဆောင်ရွက်သွားမယ်လို့ စကစရဲ့အမိန့်စာမှာ ဖော်ပြထားပါတယ်။

#ဟားခါး #ချင်း #စစ်ကောင်စီ

22/04/2024

ကလေးမြောက်ပိုင်းမှာ နေအိမ်ပေါင်း ရာချီ ဆက်တိုက် မီးရှို့ခံရ

ဧပြီလ ၂၂ ရက်၊ ၂၀၂၄

စစ်ကိုင်းတိုင်း၊ ကလေးမြို့နယ် မြောက်ပိုင်းမှာရှိတဲ့ ကျေးရွာတွေကို စစ်ကောင်စီတပ်ဖွဲ့ဝင်တွေက မီးရှို့လို့ အိမ်ခြေ ရာချီမီးလောင်သွားပါတယ်။

ကလေးမြို့နယ်မှာ အခုဧပြီလဆန်းပိုင်းကနေ စစ်ကြောင်းထိုးခံရတဲ့ ကျေးရွာတွေက နေအိမ် ၆၀၀ ထက်မနည်း မီးလောင်ပျက်စီးတာလို့ Khangthak Media က ချင်းဘာသာနဲ့ ရေးသားထားပါတယ်။

ဧပြီလ ၁၂ နဲ့ ၁၃ ရက်နေ့ကလည်း စစ်ကောင်စီတပ်ဖွဲ့က ကလေးမြို့မြောက်ပိုင်း ပျဉ်းခုံကြီးရွာကို မီးရှို့လို့ ဘုရားကျောင်း ၅ ကျောင်းအပါအဝင် လူနေအိမ်ရာချီ မီးလောင်ပျက်စီးခဲ့ပြီး ၂ ဖက်တို၊က်ပွဲတွေကြောင့် တောတောင်ထဲ အိုးအိမ်စွန့်ခွါထွက်ပြေးနေတဲ့ စစ်ဘေးရှောင်သောင်းချီရှိနေတယ်လို့ သိရပါတယ်။
------
ဓာတ်ပုံများ - [Khangthak Media, Kalay Township People's Administration]

#မီးရှို့ #ချင်း #ကလေးမြို့

22/04/2024

စစ်ကောင်စီတပ်သားအဖြစ် စစ်မှုထမ်းရန် လူငယ်များကို ဒုတိယအကြိမ်ထပ်မံမဲနှိုက်ခေါ်ယူနေ

ဧပြီလ ၂၂ ရက် ၊ ၂၀၂၄

စစ်ကောင်စီတပ်သားအဖြစ် စစ်မှုထမ်းဖို့ ပထမအပါတ်စဉ်အတွက် မတ်လ ၂၉ ရက်မှာ လူငယ် ၅၀၀၀ ကျော်ကို ခေါ်ဆောင်သွားပြီးနောက် ဒုတိယအကြိမ်အဖြစ် တပ်သားစုဆောင်းရန် မဲနှိုက်ခြင်း လူရွေးချယ်ခြင်းများပြုလုပ်လျှက်ရှိနေပြီဖြစ်တယ်လို့ သတင်းရရှိပါတယ်။

ယခုလို တပ်သားသစ်ခေါ်တာကို အသက် ၁၈ နှစ်ကနေ ၃၅ နှစ်အတွင်း ရှိ အရွယ်ရောက်လူငယ် အမျိုးသားတွေကို နာမည်စာရင်းပြုစုကာ မဲနှိုက်ခေါ်ယူနေတာလည်းဖြစ်ပါတယ်။

"ကျွန်တော်တို့ ရွာမှာ ပြီးခဲ့တဲ့ အခေါက်က ၂ ယောက် မဲနှိုက်ပြီးခေါ်သွားတယ် အခုနောက်တကြိမ် ၃ ယောက်မဲပေါက်သွားပါတယ် နာမည်စာရင်းပါတဲ့ လူငယ်တိုင်းအတွက် မိဘတွေက သွားပြီးမဲနှိုက်ရတာပါ။ ကျွန်တော့သားလေး က တော့ မဲနှိုက်တာမပေါက်လိုက်ဖူး တကယ်လို့ ပေါက်ခဲ့ရင်လည်း သူတို့လက်ထဲကို ဘယ်နည်းနဲ့မှ မထည့်လိုက်နိုင်ဘူး"လို့ ရန်ကုန်တိုင်း ကွမ်းခြံကုန်းမြို့နယ်ထဲက ရွာသား မိဘတစ်ဦးကပြောပါတယ်။

အလားတူ တွံ့တေးမြို့နယ်မှာလည်း ဧပြီ လတွင် စစ်မှုထမ်းဖို့အတွက် လူငယ် ၂ ယောက် ဒါမှမဟုတ် ၃ ယောက် ပေးရမည်ဟုပြောဆိုကာ မဲနှိုက်ရွေးချယ်နေပြီဖြစ်ကြောင်း သတင်းရရှိပါတယ်။

"တွံ့တေးမြို့နယ် ပဒံရေကျော်ကျေးရွာအုပ်စု ဥက္ကဌ ဦးဝင်းစိန်က ဧပြီ ၄ ရက်‌နေ့က ရာအိမ်မှူး ဆယ်အိမ်မှူးတွေကိုခေါ်ပြီး ကျေးရွာက အများစုဖြစ်တာကြောင့် စစ်မှုထမ်းဖို့ ၂ ယောက် ၊ မရရင် ၃ ယောက် ပေးရမယ်ပြောပြီး တအိမ်ကို တသောင်းခွဲစီထပ်ကောက်နေပါတယ်။ ရွာက အိမ်ခြေ ၉၀၀ ကျော်လောက်ရှိတယ်" လို့ ရွာသားတစ်ဦးကပြောပါတယ်။

"ပထမတုန်း ပြည်သူ့စစ်ဆိုပြီးခေါ်တယ် လူမရှိရင် အစားထိုးဖို့ ပိုက်ဆံပေးရတယ် တအိမ်ထောင်ကို ၅ သောင်းနဲ့ အထက်တွေပေးရတာ ကြောက်တော့လည်းပေးရတာပေါ့ဗျာ ဟော အခုကျ စစ်မှုထမ်းဆိုပြီး အသက် ၁၈ ကနေ ၃၅ ကြားထဲက လူငယ်တွေကိုထပ်ခေါ်တာ ဒါဒုတိယအကြိမ်ဖြစ်နေပြီဗျ ဒီကောင်တွေကြောင့် ကလေးတွေလည်း ကိုယ့်ရပ်ကိုယ့်ရွာမှာမနေရဲတော့ဘဲ တိမ်းရှောင်နေရတယ် နယ်စပ်တွေမှာလည်း တိုက်ပွဲဖြစ်နေတော့ ပိုဆိုးတာပေါ့ဗျာ"လို့ ပဲခူးတိုင်း ဒိုက်ဦးမြို့နယ်ထဲက ရွာသားတစ်ဦးကပြောဆိုပါတယ်။

အခုလို စစ်ကောင်စီတပ်သားအဖြစ် စစ်မှုထမ်းရန်ဟုဆိုကာ အသက် ၁၈ နှစ်မှ ၃၅ အထိ လူငယ်တွေကို ရက်ကွက် သို့မဟုတ် ကျေးရွာတခုလျင် ၂ ယောက်မှ ၃ယောက်အထိ ခေါ်ယူတာ ဒုတိယအကြိမ်မြောက်ဖြစ်ပြီး အများစုက လိုက်ပါရန် ဆန္ဒမရှိတာကြောင့် မဲနှိုက်ရွေးချယ်ကာ ဖိအားပေးခြိမ်းခြောက် ခေါ်ဆောင်ခဲ့တာဖြစ်ပြီး မဲပေါက်ပြီးထွက်ပြေးတိမ်းရှောင်သွားတဲ့လူငယ်တွေနေရာမှာတော့ အိမ်ထောင်စုအသီးသီးထံမှ ငွေကြေးကောက်ခံကာ အစားထိုးခေါ်ယူခဲ့တာတွေလည်း အများအပြားရှိခဲ့တယ်လို့ မြေပြင်သတင်းတွေအရသိရပါတယ်။

Photo- စစ်ကောင်စီ ထံစစ်မှု့ထမ်းရန် အပတ်စဥ် ၁ တပ်သားစုစောင်းစဥ်။

#စစ်ကောင်စီ #စစ်မှုထမ်း #စာရင်းကောက် #ဖမ်းစီး

22/04/2024

ပြည်သူအသက်အိုးအိမ် စိုးရိမ်ချက်ကြောင့် မြဝတီတိုက်ပွဲအတွင်း အနည်းငယ်ဆုတ်ခွာထားရကြောင်း KNU ပြော

ဧပြီလ ၂၂ ရက်၊ ၂၀၂၄

ကရင်ပြည်နယ်၊ မြဝတီမြို့၊ ထိုင်း-မြန်မာ ချစ်ကြည်ရေးအမှတ်(၂)တံတားအနီးရှိ စစ်ကောင်စီ တပ်ဖွဲ့ ဝင်များအား ကရင်အမျိုးသားလွတ်မြောက်ရေးတပ်မတော်-KNLA ပူးပေါင်းတပ်များက ဝင်ရောက် ပစ်ခတ်သည့်တိုက်ပွဲအတွင်း ပြည်သူလူထု၏အသက်အိုးအိမ် ထိခိုက်ပျက်စီးမည်ကို စိုးရိမ်သဖြင့် နောက်သို့အနည်းငယ်ဆုတ်ခွာထားရကြောင်း ကရင်အမျိုးသားအစည်းအရုံး-KNU ပြောသည်။

မြဝတီအခြေစိုက် ခြေလျင်တပ်ရင်း ခလရ-၂၇၅ မှ စစ်ကောင်စီတပ်ဖွဲ့ဝင်များအား KNLA ပူးပေါင်းတပ်မှ ဧပြီလ(၁၉)ရက်နေ့က စတင်တိုက်ခိုက်စဥ် စစ်ကောင်စီဘက်က လေကြောင်းပစ်ခတ်မှုအကြိမ်ရေ (၁၅၀)ထက်မနည်း လုပ်ဆောင်ခဲ့သည်တွင် ပြည်သူလူထုထိခိုက်သေဆုံးမှုရှိလာသဖြင့် ယမန်နေ့ မနက်ပိုင်းမှစ၍ ပူးပေါင်းတပ်ဘက်က မြို့မှ ယာယီ ဆုတ်ခွာထားခြင်းဖြစ်သည်။

KNU ပြောခွင့်ရ ပဒိုစောကလယ်စေးက “အမှတ်(၂)တံတားအောက်က စစ်ကောင်စီတပ်တွေကို တိုက်တဲ့ နေရာမှာ လောလောဆယ် ကျနော်တို့အခြေအနေအရ နောက်ကိုနည်းနည်းပြန် ဆုတ်လိုက်တဲ့သဘောရှိတယ် ။ ဘာကြောင့်လဲဆိုတော့ စစ်ကောင်စီကလေကြောင်းနဲ့ မြောက်များစွာဗုံးကြဲချတဲ့အပေါ်မှာ ပြည်သူလူထုအတွက်လည်းစိုးရိမ်မှုရှိတယ်။ ဒါကိုကျနော်တို့ပြန်လည်သုံးသပ်နိုင်ဖို့ အမှတ်(၂)တံတားနောက်ကို နည်းနည်းပြန် ဆုတ်လိုက်တဲ့သဘောပါ။”ဟု ကေအိုင်စီသို့ ပြောသည်။

KNLA ပူးပေါင်းတပ်များ ဆုတ်ခွာထားသော်လည်း စစ်တပ်ကလေယာဥ်(၂)စင်းဖြင့် ယနေ့နံနက် (၁၂)နာရီဝန်းကျင်တွင် မြေနီကုန်းရပ်ကွက်အနီးတဝိုက်သို့ ဗုံးထပ်မံကြဲချသွားသလို ယခင်နေ့ ကတိုက်ပွဲအတွင်း ဒေသခံထိခိုက်သေဆုံးမှုအပြင် KNLA ပူးပေါင်းတပ်ဘက်မှ တပ်ဖွဲ့ဝင်(၁)ဦးသေဆုံးပြီး (၂)ဦးထိခိုက်ဒဏ်ရာရရှိထားကြောင်း မြေပြင်ရှိ စစ်ရေးသတင်းအရင်းအမြစ်က ဆိုသည်။

“မနေ့ ညနေစောင်းလောက်က တော်တော်ငြိမ်သွားပြီး မနက်ကြီး (၁၂)နာရီကျော်လောက်ကျတော့ လေယာဥ်နှစ်စီးနဲ့ မြေနီကုန်းတစ်ဝိုက်ကိုလာကြဲသွားတယ်။ အခုချိန်ထိကတော့ လက်နက်ကြီးလည်း မပစ်ဘူး။ လေယာဥ်လည်း လာမဝဲတော့ဘူး ငြိမ်နေတယ်။ အရင်နေ့ကတိုက်ပွဲမှာတော့ ကျနော်တို့ရဲဘော်ဘက်က တစ်ယောက်ကျပြီး နှစ်ယောက်ထိထားတယ်။” ဟု မြဝတီမြို့ရှိ တော်လှန်ရေးတပ်ဖွဲ့ဝင်တစ်ဦးက ယနေ့တွင် ပြောသည်။

အမှတ်(၂)တံတားအနီးသို့ ဆုတ်ခွာနေသော ခလရ-၂၇၅ အကြွင်းအကျန် စစ်ကောင်စီတပ်ဖွဲ့ဝင်များနှင့် စစ်ကူတပ်များကြောင့် မြဝတီမြို့ကိုလက်မလွှတ်ရရေး KNU အနေဖြင့်ကြိုးပမ်းဆောင်ရွက်နေပြီး လုံခြုံရသည့်အနေအထားရောက်ရှိပါက အုပ်ချုပ်ရေး အကောင်အထည်ဖော်သွားမည်ဟုလည်း ဧပြီလ(၁၂)ရက်နေ့က KNU ဘက်က ကြေညာချက် ထုတ်ပြန်ထားသည်။

သို့သော် မြို့တွင်းအခြေအနေရှုပ်ထွေးနေသည့် လက်ရှိအနေအထားအရ မြို့အုပ်ချုပ်ရေးလည်ပတ်နိုင်ရန် အဆင်မပြေသေးသော်လည်း KNU အနေဖြင့် ဆက်လက်ကြိုးပမ်းဆောင်ရွက်နေသည်ဟု မြဝတီ၏ အုပ်ချုပ်ရေးဆိုင်ရာကိစ္စရပ်နှင့်ပတ်သက်၍ ပဒိုစောကလယ်စေးက ဖြည့်စွက်ပြောသည်။

“မြို့ကိုအုပ်ချုပ်နိုင်ဖို့အတွက်ကတော့အဆင်မပြေသေးပါဘူး။ ဒါပေမယ့် မြို့ကိုအုပ်ချုပ်ဖို့စီမံခန့်ခွဲဖို့ ရည်ရွယ်ချက်ရှိထားပါတယ်။ လောလောဆယ်မှာအုပ်ချုပ်ရေးဝင်လို့မရသေးဘူးဆိုပေမဲ့ ဆက်လက်ကြိုးစားဖို့ရှိနေပါတယ်” ဟု KNU ပြောခွင့်ရက ဆိုသည်။

တဖက်တွင် မြဝတီမြို့စောင့်တပ် ခလရ-၂၇၅ အား KNLA ပူးပေါင်းတပ်မှ သိမ်းပိုက်ရရှိခဲ့သော်လည်း စစ်ကောင်စီဘက်က စစ်ကူပေးရန်နှင့်မြို့ကို ပြန်လည်သိမ်းယူနိုင်ရန် ဧပြီလ(၁၁)ရက်နေ့မှစ၍ ကော့ ကရိတ်ဘက်မှ စစ်ကြောင်းအကြီးအကျယ်ထိုးစစ်ဆင်လာသလို ပူးပေါင်းတပ်ဘက်ကလည်း စစ်ကူ စစ်ကြောင်းကို ကြားဖြတ်တိုက်ခိုက်နေသဖြင့် ကော့ကရိတ်ဒေသတစ်ခွင်တွင် နှစ်ဖက်တိုက်ပွဲအကြီးအကျယ်ဖြစ်ပွားလျက်ရှိသည်။

ထို့အတူ စစ်ကူတပ်များ မြဝတီသို့မရောက်နိုင်ရေး ရှေ့တန်းစစ်မျက်နှာရှိ တော်လှန်ရေးအဖွဲ့၏ တပ်မှူးများ၊ ပါဝင်အားဖြည့်နေသော ပြည်သူ့ကာကွယ်ရေးတပ်ဖွဲ့ဝင်များဖြင့် အားသွန်ခွန်စိုက်ကြိုး ပမ်းလျက်ရှိသည့်အတွက် စစ်ကောင်စီစစ်ကူတပ်များ မြဝတီရောက်နိုင်ရန်ခဲယဥ်းဦးမည်ဖြစ်ကြောင်း KNU ဘက်က အသိပေးပြောဆိုထားသည်။

Photo: Reuters

#ဗုံးကြဲတိုက်ခိုက် #မြဝတီ #စစ်ကောင်စီ #ပြည်သူ

20/04/2024

AA ကို ဆန္ဒပြသော စစ်တွေက မွတ်ဆလင်များကို ရဲနှင့် စစ်တပ်က လုံခြုံရေးယူပေး

ဧပြီလ ၂၀ ရက် ၊ ၂၀၂၄

ယနေ့ ဧပြီလ ၂၀ ရက်နေ့ နံနက် ၈ နာရီကနေ ၉ နာရီအထိ ရခိုင်ပြည် စစ်တွေမြို့က မွတ်ဆလင် ၂၀၀ ခန့်မှာ AA အား အလိုမရှိဟု ဆန္ဒပြရာ၌ စစ်ကောင်စီ ရဲနှင့် စစ်တပ်က လုံခြုံရေးအပြည့် ယူပေးကြောင်း မျက်မြင်ဒေသခံများက ပြောသည်။

အာဏာသိမ်း စစ်ကောင်စီ၏ ဖိအားကြောင့် စစ်တွေမြို့က မွတ်ဆလင် ၂၀၀ ခန့်မှာ အာရက္ခတပ်တော် AA အား အလိုမရှိဟု ယနေ့ နံနက်တွင် ဆန္ဒထုတ်ဖော် ပြသခဲ့ကြခြင်းဖြစ်သည်။

မျက်မြင်ဒေသခံ မွတ်ဆလင်တစ်ဦးက " မွတ်ဆလင် ၂၀၀ လောက်ပါမယ်။ ဘုမေရပ်ကွက်ကနေ မီးစက်ကြီး အဝိုင်းကို ပတ်ပြီး အဝေးပြေး ကားဂိတ်ဘက် တပ်ထိန်းဂိတ်ကို လမ်းလျှောက်သွားကြပါတယ်။ AA ကို အလိုမရှိဘူးလို့ တောက်လျှောက် အော်ကြတာပေါ့နော်။ ရဲတပ်ဖွဲ့နှင့် စစ်တပ်က လမ်းတစ်လျှောက် တောက်လျှောက်ကို လုံခြုံရေးအပြည့် ယူပေးထားပါတယ်။ တခြားအရပ်သားတွေကို အနားကို လုံးကပ်ခွင့် မပေးဘူး " ဟု ပြောသည်။

မွတ်ဆလင်များ ဆန္ဒမထုတ်ဖော်မီ အချိန်အတွင်း အဆိုပါ လမ်းတစ်လျှောက်ရှိ လမ်းဘေးဈေးသည်များ၊ ကွမ်းယာဆိုင်များ၊ လူသွားလူလာများကို ပိတ်ပင် ရှင်းလင်းထားကြောင်းလည်း နောက်ထပ် မျက်မြင်ဒေသခံတစ်ဦးက ပြောသည်။

" ဆန္ဒမပြခင် နာရီပိုင်းအလိုကတည်းက ဆန္ဒပြမယ့် လမ်း မီးစက်ကြီးကနေ တပ်ထိန်းဂိတ်အထိကို ဘယ်သူမှ ဖြတ်သန်းသွားလာခွင့် မရဘူး။ ဆိုင်တွေဆိုရင်လည်း ပိတ်ခိုင်းပါတယ်။ လက္ဘရည်ဆိုင်လည်း ဖွင့်ခွင့် မရှိဘူး။ ဆန္ဒပြသူတွေဟာ ဘုမေက ထွက်ပါတယ်။ တပ်ထိန်းဂိတ်ကို သွားပါတယ်။ ပြီးတော့ ပြန်လာပြီး ဘုမေရပ်ကွက်ထဲကို ပြန်ဝင်သွားပါတယ်" ဟု ပြောသည်။

ယခု နေ့လယ် ၁၂ နာရီအထိကို စစ်တွေမြို့ထဲက တပ်ထိန်းဂိတ်ဘက်သို့ အသွားကို ရဲနှင့် စစ်တပ်က ပိတ်ပင်ထားပြီး စစ်တွေမြို့ထဲသို့ အဝင်ကိုမူ ဖွင့်ပေးထားကြောင်း စုံစမ်းသိရသည်။

အာဏာသိမ်း စစ်ကောင်စီသည် ရခိုင်ပြည်အတွင်းမှာ မွတ်ဆလင်များကို လက်နက်အားကိုးဖြင့် ခြိမ်းအကျပ်ကိုင်ပြီး AA ဆန္ဒထုတ်ကြရန် ဖိအားပေး ခိုင်းစေနေသည်။

ဘူးသီးတောင်မြို့တွင် အကြမ်းဖက်အဖွဲ့ ARSA နှင့် ARA တို့ကို စစ်သင်တန်းပေး၊ လက်နက်တပ်ဆင်ပေးနေသလို အတင်းအဓမ္မခေါ်ယူ စုဆောင်းထားသော မွတ်ဆလင်အချို့ကိုလည်း လက်နက်ကိုင်ခွင့်ပေးကာ အကြမ်းဖက်မှုကျူးလွန်ခြင်းကို ထောက်ခံအားပေးနေကြောင်း ဒေသခံများထံမှ သိရသည်။

ARSA, ARA နှင့် အကြမ်းဖက် မွတ်ဆလင်အချို့သည် ဘူးသီးတောင်မြို့တွင် ပြီးခဲ့သည့် ဧပြီလ ၁၂ ရက်နေ့ကစ၍ အရပ်သားနေအိမ်များကို မီးရှို့ဖျက်ဆီးနေသလို အပြစ်မဲ့ မွတ်ဆလင်များအပါအဝင် အရပ်သားပြည်သူများကို ဖမ်းဆီးထားကြောင်းနှင့် ဧပြီလ ၁၇ ရက်နေ့က ဘူးသီးတောင်အခြေစိုက် နိုင်ငံတကာကူအညီရေးအဖွဲ့ နယ်စည်းမခြားဆရာဝန်များ ရုံးကို မီးရှို့ဖျက်ဆီးခဲ့ကြသည်။

Western News-

#ရခိုင် #မွတ်ဆလင် #ဘူးသီးတောင် #ဆန္ဒပြ

ပုံစာ- မတ်လ ၁၉ ရက်နေ့က ဘူးသီးတောင်တွင် မွတ်ဆလင်များ ဆန္ဒပြနေသည်ကို တွေ့ရစဥ်။ ဓါတ်ပုံ- CJ

20/04/2024

မြဝတီ အမှတ်- ၂ တံတားအနီး စစ်တပ်က လေကြောင်းမှ ဗုံးကြဲ၊ ဒေသခံများ ရှောင်တိမ်းနေရ

ဧပြီလ ၂၀ ရက် ၊ ၂၀၂၄

ကရင်ပြည်နယ်၊ မြဝတီမြို့ အမှတ် (၂) ထိုင်း-မြန်မာ ချစ်ကြည်ရေးတံတားအနီးတွင် စစ်ကောင်စီတပ်က လေကြောင်းမှ ဗုံးကြဲတိုက်ခိုက်နေသဖြင့် ဒေသခံများ ထွက်ပြေးတိမ်းရှောင် နေရကြောင်း သိရသည်။

ယနေ့(ဧပြီ၂၀ရက်)နံနက် ၁နာရီ ခန့်မှ စတင်ခဲ့သည့် မြဝတီ အမှတ်- ၂ တံတား အနီး ကုန်သွယ်ရေးဝင်းအတွင်းရှိ စစ်ကောင်စီတပ်နှင့် တော်လှန်ရေးတပ်ဖွဲ့တို့၏တိုက်ပွဲသည် ယနေ့နံနက် ၉နာရီဝန်းကျင်အထိ ပြင်းထန်စွာဖြစ်ပွားခဲ့ကြောင်း မြဝတီမြို့၊ရေပူရွာသားတစ်ဦးက ပြောသည်။

"မနေ့ညကတည်းက ဗုံးသံတွေကြားနေရတာပေါ့။ဒီနေ့မနက်ကျတော့ လေယာဉ်လာပြီး ပစ်သွားတာ။လေယာဉ်နဲ့ ဗုံးကြဲတာက မြဝတီအမှတ် ၂တံတားနားကိုပါ။ရေပူရွာဘက်ကသူတွေကတော့ ထိုင်း၊မဲဆောက်ဘက်ကို မနက်အစောပိုင်းထဲက ပြေးကြတာပေါ့။ အခုမနက် ၈နာရီလောက်ကျတော့ ထိုင်းဘက်က ပေးမဝင်တော့ဘူး။စစ်သားတွေရော၊တောမောင်း(ထိုင်းလဝက)တွေရော ရောက်နေလို့ ရွာထဲမနေဘဲ ဘေးလွတ်ရာမှာ နေနေကြတာပါ။သောင်ရင်းမြစ် ကမ်းဘေးမှာ လူခွဲပြီးနေနေကြတာပေါ့" ဟု ၎င်းက ပြောသည်။

မြဝတီမြို့၊အမှတ်- ၂တံတား အနီးကို စစ်ကောင်စီတပ်က လေကြောင်းမှ ၉ကြိမ်ထက်မနည်း ဗုံးကြဲတိုက်ခိုက်ခဲ့ကြောင်း မြေပြင်ရှိ တော်လှန်ရေးတပ်ဖွဲ့ဝင်တစ်ဦးက ပြောသည်။

"လေယာဉ်က ဒီနေ့မနက် ၅နာရီထိုးခါနီးလောက်လာတာ။မနက် ၅နာရီ ၁၀မိနစ်လောက်က အမှတ် ၂တံတားနားကို လေယာဉ်နဲ့ ဗုံး ၇လုံးကြဲသွားတယ်။ပြီးတော့ ၈နာရီထိုးခါနီးလောက်မှာ ၂လုံးထပ်ကြဲတယ်။အမှတ် ၂တံတားနားကိုပဲပေါ့" ဟု ၎င်းက ပြောသည်။

ယနေ့နံနက် ၈နာရီ မိနစ်၂၀ ခန့်မှစတင်ပြီး မြဝတီမြို့ ၅ ရပ်ကွက်၊ရေပူရပ်နှင့် ဆီဆိုင်လမ်းဆုံအနီးတွင် ထိတွေ့မှုဖြစ်ပွားခဲ့ပြီး လက်နက်ငယ်များဖြင့် ပစ်ခတ်မှု မိနစ် ၂၀ကြာ ဖြစ်ပွားခဲ့ကြောင်းလည်း မြဝတီမြို့နေ အမျိုးသမီးငယ်တစ်ဦးက ပြောသည်။

"မနက် ၈နာရီကျော်လောက်က မြန်မာ တံတား- ၂ဘက်ခြမ်းကနေ လက်နက်ကြီးနဲ့ ပြန်ပစ်လို့ ဇိုက်ဇုန်၊ ၁၂ ဂိတ်နားကို လက်နက်ကြီးကျတယ်။ဗိုလ်မှုးသာထွေးလမ်းထဲကျတာ။ အမျိုးသမီးကြီး တစ်ဦးထိသွားတယ်။ အိမ်နောက်ဖေးကို ကျတာ။ဒေသခံတွေလည်း အကုန်ပြေးပြီ။၁၃ဂိတ်နဲ့ ၁၄ဂိတ်ဘက်လည်း အခြေအနေမကောင်းဘူး။ ၁၃ဂိတ်ဘက်မှာ ပြည်သူတွေ မြို့ထဲမဝင်ဖို့ လက် နက်ကိုင်တပ်ဖွဲ့တွေ ပြောဆိုနေတာမျိုးရှိတယ်။ မြဝတီမြို့ထဲကို ဝင်တဲ့ သံတံတားကို တကယ်ပိတ်လိုက်ပါပြီ" ဟု ၎င်းက ပြောသည်။

စစ်ရှောင်ပြည်သူများသည် ကံဆင့်မြိုင်လမ်းနှင့် သစ်တစ်ပင်လမ်းဘက်မှ ဖြတ်သန်းသွားလာနေကြသလို အန်ကယ်ကြီး ကစားကွင်း အနောက်လမ်းမှ အာရှလမ်းမကြီးပေါ်သို့ ထွက်ပြေးတိမ်းရှောင်ကြသူများလည်း ရှိကြောင်း မြဝတီမြို့ရှိ MPA သတင်းရင်းမြစ်က ပြောသည်။

"မြဝတီ ပတ္တမြားဆီဆိုင် ထိပ်ကနေ ၁၂ဂိတ်၊ဝါးတော့၊ဝါးစကင်း၊၈ဂိတ်၊၁၃ဂိတ်နဲ့ ၁၄ဂိတ်အထိအကုန်ပြေးနေရတာ။ ပြည်သူအကုန်ပြောင်းရွှေ့ရတယ်။ အခုတော့ ပြည်သူတွေ ၁၄ဂိတ်နားက ငြိမ်းချမ်းရေး ဘုန်းကြီးကျောင်း ထဲကို ပြောင်းရွှေ့နေကြတယ်" ဟု ၎င်းက ပြောသည်။

ယနေ့နံနက် ၁၀နာရီ ၂၄မိနစ်အထိ မြဝတီမြို့ပေါ်တွင် စစ်ကောင်စီလေယာဉ်ပျံဝဲနေသေးကြောင်း မြဝတီမြို့ရှိ MPAသတင်းရင်းမြစ်က ပြောကြားပြီးနောက် ၎င်းနှင့် အဆက်အသွယ် ထပ်မရတော့ပေ။

အမှတ်(၁) ထိုင်း-မြန်မာ ချစ်ကြည်ရေးတံတားကို ယနေ့နံနက်ပိုင်းအထိ ဖွင့်လှစ်ထားပြီး မြဝတီမြို့မှ မဲဆောက်သို့ စစ်ရှောင်လိုသူများအနေဖြင့် လက်ဝတ်တန်ဆာများကို တပါတည်း ဝတ်ဆင်သင့်ကြောင်း ထုပ်ပိုးသယ်ဆောင်ပါက စစ်ဆေးမေးမြန်းခံရပြီး အခွန်ဆောင်ရကြောင်း မဲဆောက်မြို့သို့ ထွက်ပြေးတိမ်းရှောင်သူများထံက သိရသည်။

Photo - Prapas Rattanawannee / ပုံစာ - မြဝတီမှ မဲဆောက်မြို့သို့ ထွက်ပြေးတိမ်းရှောင်လာသည့် မြဝတီဒေသခံများအား တွေ့ရစဉ်။

စာတည်း - ML
#ကချင်ပြည် #မြဝတီ #ထိုင်း #မြန်မာ #ဗုံးကြဲတိုက်ခိုက်

20/04/2024

မြဝတီမြို့ အမှတ်(၂)ထိုင်း-မြန်မာချစ်ကြည်ရေးတံတားတွင် ယနေ့နံနက်အထိ တိုက်ပွဲပြင်းထန်

▪️စစ်ကောင်စီတပ်သားအများအပြား သေဆုံး၊ ထိုင်းဘက်ခြမ်း၌ ကျည်ကျမှုရှိ

ဧပြီလ ၂၀ ရက် ၊ ၂၀၂၄

မြဝတီမြို့ အမှတ်(၂)ထိုင်း-မြန်မာချစ်ကြည်ရေးတံတားရှိ စစ်ကောင်စီတပ်ဖွဲ့ကို ယမန်နေ့ ညက စ၍ တော်လှန်ရေးပူးပေါင်းတပ်က ဝင်ရောက်တိုက်ခိုက်ရာ တစ်ညလုံးတိုက်ပွဲပြင်းထန်ပြီး ယနေ့ နံနက် ၈နာရီအချိန်ထိ တိုက်ပွဲဖြစ်ပွားနေသည်။

ဧပြီ ၁၉ ရက် ည ၇ နာရီခန့်တွင် အမှတ်(၂) ထိုင်း-မြန်မာချစ်ကြည်ရေးတံတား စစ်ဆေးရေးဂိတ်၌ ခိုလှုံနေသော စစ်ကောင်စီတပ်ဖွဲ့ဝင်များကို တော်လှန်ရေးပူးပေါင်းတပ်က Drop Bomb ချစတင်တိုက်ခိုက်ခဲ့ရာ စစ်ကောင်စီတပ်ဖွဲ့ဝင်အများအပြားထိခိုက်သေဆုံးမှုရှိကြောင်း သိရသည်။

တိုက်ပွဲဖြစ်ပွားမှုကြောင့် ထိုင်းနိုင်ငံ မဲဆောက်မြို့ဘက်ခြမ်း၌ ကျည်ကျမှုရှိသည်ဟု ဒေသခံများက ပြောသည်။

"ကျည်ကျတယ်။ ကျည်အသေးတွေကျတယ်"ဟု အမှတ်(၂)တံတားရှိ မဲဆောက်မြို့နေ မြန်မာလုပ်သားအချို့က ပြောသည်။

"တော်လှန်ရေးအဖွဲ့တွေဝင်ချနေတာ။ တညလုံးတိုက်ပွဲပြင်းထန်နေတယ်။ စကစတွေ အတော်လေး အသေအပျောက်ရှိတယ်"ဟု မြဝတီမြို့ခံတစ်ဦးက ပြောသည်။

ယနေ့ (ဧပြီ ၂၀ရက်)နံနက်အထိ လက်နက်ကြီးပေါက်ကွဲသံများမှာ ထိုင်းနိုင်ငံ မဲဆောက်မြို့မှ အတိုင်းသားကြားနေရသည်။

စစ်ကောင်စီတပ်ဖွဲ့ဝင်များ သေဆုံးထိခိုက်မှုအရေအတွက်နှင့်ပတ်သက်၍ People’s Spring က သီးခြားအတည်ပြုချက်မရသေးဘဲ ဆက်လက်စုံစမ်းနေဆဲဖြစ်သည်။

“မြ၀တီ အခြေအနေက တံတားထိပ်နားမှာတော့ သူများ ဝင်ကျုံး(ဝင်တိုက်)ပြီ။ အခြေအနေတော့ မသိရသေးဘူးနော်။ မနေ့ကတော့ ဒရုန်းနဲ့ သွားချတာ။ ဒီမနက်တော့ ဝင်ချပြီ။ သူများ သူ့ကို ထွက်ခိုင်းတာ မထွက်တော့ သူ့ကိုရက်အကန့်အသတ် ပေးထားတာပဲ။ ပေးထားတဲ့အတိုင်း ရက်ပြည့်တဲ့အခါ လုပ်စရာရှိတာ လုပ်တာပေါ့” ဟု KNU သတင်းရင်းမြစ်က ပြောပြသည်။

တံတား အနီး စစ်ကောင်စီအင်အားက ၁၅၀ ဝန်းကျင်ရှိမည်ဟု သိရကြောင်း ၎င်းကဆိုသည်။

“ သူတို့ ကူမယ့်အဖွဲ့ဘယ်ရှိမလဲ။ ကူမယ့်အဖွဲ့မလာနိုင်ဘူး။ သူတို့ လက်နက်ချရင်ချ မချရင်တော့ အသေခံရမှာပေါ့။ထိုင်းဘက်က သူတို့ တပ်က သူတို့ချထားတယ်။ တကယ်လို့ ဝင်လာရင်တော့ အရပ်ဝတ်နဲ့ပဲ လာရမယ်ပေါ့”ဟု KNU သတင်းရင်းမြစ်က ပြောသည်။

မြဝတီမြို့စစ်ရေးအခြေအနေကို ထိုင်းလုံခြုံရေးတာဝန်ရှိသူများက အနီးကပ်စောင့်ကြည့်နေပြီး အမှတ်(၂)ထိုင်း-မြန်မာချစ်ကြည်ရေးတံတားဘက်ခြမ်းကိုလည်း CCTV မှတ်တမ်းရယူကာ အချိန်ပြည့် ကြည့်ရှုနေကြောင်း သတင်းရင်းမြစ်တစ်ဦးက ပြောသည််။

ပြီးခဲ့သည့် ဧပြီ ၁၂ ရက်ကလည်း အမှတ်(၂)ချစ်ကြည်ရေးတံတား စစ်ဆေးရေးဂိတ်၌ ခိုလှုံနေသော စစ်ကောင်စီတပ်ဖွဲ့ဝင်များကို တော်လှန်ရေးပူးပေါင်းတပ်က ဒရုန်းဖြင့် Drop Bomb များ ချတိုက်ခိုက်ခဲ့သည်။

စစ်ကောင်စီတပ်ကမူ မြဝတီမြို့ပြင်ရှိ KNU၏ KNLA ဦးဆောင်သည့် ပူးပေါင်းတပ် သိမ်းပိုက်ထားသည့် ခလရ(၂၇၅)ကို ဧပြီ ၁၁ ရက်နောက်ပိုင်း လေကြောင်းမှ တိုက်လေယာဥ်ဖြင့် ပေါင် ၅၀၀ ဗုံးများချကာ အနည်းဆုံး နှစ်ကြိမ် တိုက်ခိုက်ခဲ့သည်။

ခလရ(၂၇၅)တပ်မှ စစ်ကောင်စီတပ်သားများသည် ပြီးခဲ့သည့် ဧပြီ ၁၀ရက်ညကတည်းက အမှတ်(၂)တံတားသို့ထွက်ပြေးလာပြီး ခိုလှုံနေခြင်းဖြစ်သည်။ ထိုစစ်သားများမှာ ထိုင်းနိုင်ငံသို့လည်း ဝင်ရောက်ခွင့်မတောင်းဘဲ နောက်မှ စစ်ကူလာမည်ကို စောင့်ဆိုင်းနေကြခြင်းဖြစ်သည်။ တော်လှန်ရေးအဖွဲ့များက ၁၀ ရက်အချိန်ပေးပြီးနောက် ဧပြီ ၁၉ ရက်ညမှ စ၍ ဒရုန်းဖြင့်စတိုက်ပြီး ထိုနောက် တစ်ညလုံးတိုက်ခိုက်နေခြင်းဖြစ်သည်။ ထိုစစ်သားများစောင့်နေသော စစ်ကူစစ်ကြောင်းမှာလည်း တော်လှန်ရေးအဖွဲ့များတိုက်ခိုက်မှု
ကြောင့် ဒေါနတောင် ခြေမှာပင်ရှေ့မတိုးနိုင်ဖြစ်နေသည်။

(မြဝတီမြို့ အမှတ်(၂)ထိုင်း-မြန်မာချစ်ကြည်ရေးတံတား မဲဆောက်မြို့ဘက်ခြမ်း၌ မြင်ကွင်များ။ ဓာတ်ပုံ - PS)

#စစ်ကောင်စီ #တိုက်ခိုက် #မြဝတီ #ခလရ #၂၇၅
#ထိုင်း
#နယ်စပ် #စစ်ကူ

20/04/2024

ထိုင်းတို့ မနှစ်သက်သည့်အမည်ကို ရွေးထားသည့် စကစ ၏ စစ်ဆင်ရေး

ထိုင်းနယ်စပ် မြဝတီကို ပြန်သိမ်းနိုင်ရေးအတွက် စစ်တပ်က မီးကုန်ယမ်းကုန်တိုက်မည့် စစ်ဆင်ရေးတစ်ခုကို ပြင်ဆင်နေသည်ဟု KNU က သတိပေးထားသည်။

ဧပြီလ ၂၀ ရက် ၊ ၂၀၂၄
(Myanmar Now သတင်းဌာန၏ ဆောင်းပါး)

ကရင်တော်လှန်ရေးတပ် KNU က ဧပြီ ၁၁ ရက်နေ့တွင် မြန်မာ-ထိုင်းနယ်စပ်မြို့ မြဝတီမှ စစ်စခန်းများကို တိုက်ခိုက်သိမ်းပိုက်လိုက်ရာ ထိုစခန်းများ ပြန်ရရန် စစ်ကောင်စီက ကြီးမားသည့် စစ်ဆင်ရေးတစ်ခုဖြင့် ထိုးစစ်ဆင်ရန် ပြင်ဆင်နေသည်။

ထိုစစ်ဆင်ရေးသည် နိုင်ငံအဆင့်စစ်ဆင်ရေးဖြစ်ကြောင်း KNU က သတိပေးထားသလို၊ စစ်တပ်ကလည်း ၎င်းတို့ကျောထောက်နောက်ခံပေးထားသည့် သတင်းဌာနများမှတစ်ဆင့် မီးကုန်းယမ်းကုန်တိုက်မည့် စစ်ဆင်ရေးဟု ကြေညာထားသည်။

စစ်ဆင်ရေးအမည်ကို မြန်မာနှင့်ထိုင်းတို့အကြား နှစ်ရာချီ အကျိတ်အခဲရှိနေသည့် သမိုင်းနှင့်ချီသည့် “အောင်ဇေယျ” ဆိုသည့်အမည်ကို အံ့အားသင့်ဖွယ်ပေးခဲ့သည်။

သာမန်အားဖြင့် စစ်တပ်က သူ၏စစ်ဆင်ရေးများကို မြန်မာဘုရင်နှင့် စစ်သူကြီးများ၏ အမည်များပေးလေ့ရှိသည်မှာ မှန်ကန်သော်လည်း ထိုင်းနယ်စပ်တွင် ပေါ်ပေါက်လာမည့်စစ်ဆင်ရေးကို ထိုင်းအစိုးရငြိုငြင်လောက်သည့် အမည်ပေးခဲ့ခြင်းက ထူးဆန်းလှသည်။

အခြားတစ်ဖက်တွင်လည်း စစ်ကောင်စီလေယာဉ်များ ပိုင်နက်ထဲ ဝင်လာပါက ပစ်ချရန် ထိုင်းအစိုးရက ထိုင်းစစ်တပ်ကို အမိန့်ပေးထားသည်။ တိုက်ခိုက်ခံရမှုကြောင့် စခန်းစွန့်ကာ နယ်စပ်ကူးတံတားတစ်ခုတွင် သောင်တင်နေသည့် စစ်ကောင်စီစစ်သားများကို ယခင်ကကဲ့သို့ ၎င်းတို့နယ်မြေထဲ အဝင်မခံဘဲ တင်းခံနေသည်။

ထိုအခြေအနေများက အာဏာသိမ်းပြီးနောက် စစ်ကောင်စီကို ရှားရှားပါးပါးလူရာသွင်းသည့် ထိုင်းသည် စစ်ကောင်စီနှင့် အိုးစားကွဲလေပြီလားဆိုသည့် နောက်ဆက်တွဲမေးခွန်းများလည်း ရှိလာသည်။

သမိုင်းတစ်ပတ်ပြန်လည်လာသည့် စစ်ဗိုလ်ချုပ်များ၏ ထိုင်းမုန်းတီးရေးလှုပ်ရှားမှု

“အောင်ဇေယျ” ဆိုသည်မှာ မြန်မာတို့၏ နောက်ဆုံးမင်းဆက် ကုန်းဘောင်မင်းဆက်ကို ၁၈ ရာစုအလယ်ပိုင်းက တည်ထောင်ခဲ့သူ အလောင်းမင်းတရား၏ အမည်ရင်းဖြစ်သည်။

မုဆိုးဖိုဆိုသည့် ရွာငယ်လေး၏သူကြီး ဦးအောင်ဇေယျသည် ရွှေဘို (ယခုစစ်ကိုင်းတိုင်း) တွင် နန်းစိုက်ပြီး တစ်နိုင်ငံလုံးကို သိမ်းပိုက်ခဲ့သည်။ ထို့နောက် ထိုင်းနိုင်ငံ အယုဒ္ဓယကိုပါ သိမ်းပိုက်ရန် ချီတက်ခဲ့သည်။

အယုဒ္ဓယကို တိုက်ခိုက်ဖျက်ဆီးသည့်တပ်ကို ဦးဆောင်သူမှာ ဦးအောင်ဇေယျဖြစ်ကြောင်း ထိုင်းက မှတ်တမ်းတင်ထားရာ အောင်ဇေယျဟူသော အမည်မှာ ထိုင်းတို့ နှစ်သက်မည့်အမည် မဟုတ်ပေ။

အယုဒ္ဓယမြို့ကို မြန်မာတပ်များ မသိမ်းနိုင်ဘဲ ခက်ခက်ခဲခဲ စစ်ထိုးနေခိုက် ဦးအောင်ဇေယျ ဆုတ်ခွာစဉ် ထိုင်းမြန်မာနယ်စပ်တွင် နတ်ရွာစံသွားသော်လည်း အာဏာသိမ်း စစ်ဗိုလ်ချုပ်များအလိုကျ ရေးထားသည့် မြန်မာ့သမိုင်းစာအုပ်များတွင်မူ ဦးအောင်ဇေယျသည် ထိုင်းတို့ကို အောင်နိုင်သူအဖြစ် ပုံဖော်ခံရလေ့ရှိသည်။

၂၀၀၁ ဝန်းကျင် ထိုင်းတို့နှင့် ဆက်ဆံရေးတင်းမာချိန်တွင်လည်း မြန်မာဗိုလ်ချုပ်များက ထိုင်းမုန်းတီးရေး လှုံ့ဆော်စဉ် ဦးအောင်ဇေယျ၏အမည်ကို သုံးခဲ့ဖူးသည်။ ကျောင်းစာသင်ရိုးများ၊ ရုပ်မြင်သံကြားဇာတ်လမ်းများနှင့် သတင်းစာဆောင်းပါးများတွင် ထိုင်းမုန်းတီးရေးဆောင်းပါးများ ကာလအတန်ကြာ ထည့်သွင်းခဲ့ဖူးသည်။

ထိုဖြစ်ရပ်များအပြီး ၂၃ နှစ်ခန့်ကြာချိန်တွင် သမိုင်းတစ်ပတ်ပြန်လည်လာပြန်သည်။

မြန်မာတွင် စစ်တပ်က အာဏာပြန်သိမ်းသလို စစ်တပ်ကို ဆန့်ကျင်သူများလည်း ထိုင်းဘက်သို့ ထွက်ပြေးကြရသည်။ မြန်မာ-ထိုင်း နယ်စပ်တွင်လည်း လက်နက်ကိုင်တိုက်ပွဲများ အရှိန်ပြန်မြင့်လာသည်။ စစ်တပ်ကလည်း နည်းလမ်းဟောင်းဖြစ်သည့် ထိုင်းမုန်းတီးရေးလှုပ်ရှားမှုကို အစပြန်ဆွဲသည်။

မြဝတီကျဆုံးမှုကို စစ်တပ်က ထိုင်းတို့၏ကျူးကျော်စစ်ဟု တပ်ထဲတွင် ဝါဒဖြန့် ပုံဖော်လျှင်လည်း အံ့သြဖွယ်မဟုတ်ပေ။ မကြာသေးခင်က နိုင်ငံမြောက်ပိုင်းတွင် ၁၀၂၇ စစ်ဆင်ရေးအမည်ဖြင့် ထိုးစစ်ဆင်ခံရပြီး အကြီးအကျယ် အထိနာသွားစဉ်ကလည်း စစ်တပ်က တရုတ်ထောက်ပံ့ထားသည့် ပြည်ပကျူးကျော်စစ်ဟု ဝါဒဖြန့်ခဲ့ဖူးသည်။

အတိတ်နိမိတ်များကို ယုံကြည်ကိုးစားသည့် စစ်ကောင်စီသည် ထိုင်းနယ်စပ်အနီး စစ်ဆင်ရေးကို “အောင်ဇေယျ” ဟု အမည်ပေးခြင်းက ထိုဒေသတစ်ဝိုက် အလောင်းမင်းတရား ဦးအောင်ဇေယျ အာဏာစက်သက်ရောက်မှုကို နိမိတ်ကောင်းအဖြစ် မှတ်ယူပြီး အမည်ပေးခြင်းဖြစ်နိုင်သည်ဟု အာဏာဖီဆန်ကာ စစ်တန်းလျားကို ကျောခိုင်းထားသည့် ဗိုလ်ကြီးလင်းထက်အောင်က ဆိုသည်။

“မြန်မာစစ်သားတွေက ငါးပိစားပြီးတော့ တိုက်နိုင်တယ်။ ခြေလျင်လျှောက်ပြီး ဘန်ကောက်အထိ တက်သိမ်းနိုင်တယ်ဆိုတဲ့ အယူအဆမျိုးတွေကို (စစ်တပ်ထဲမှာ) အဆင့်ဆင့်ဝါဒဖြန့် ရိုက်သွင်းလာတာတွေရှိတယ်” ဟု ၎င်းက ဆိုသည်။

လေသံပြောင်းလာသည့် ထိုင်းအစိုးရသစ်

နယ်စပ်တစ်လျှောက်တပ်စွဲထားသည့် အာဏာသိမ်းစစ်တပ်၏ စစ်သားများအတွက် တော်လှန်ရေးအင်အားစု၏ ထိုးစစ်ကို မခုခံနိုင်တော့ပါက နယ်စပ်ဖြတ်ကျော်ထွက်ပြေးခြင်းက အထူးအဆန်းမဟုတ်တော့။ ပြီးခဲ့သည့်လများအတွင်း ဘင်္ဂလားဒေ့ရှ်၊ တရုတ်၊ အိန္ဒိယ၊ ထိုင်းတို့ထံ ထောင်နှင့်ချီသော စစ်သားများ အသက်လုပြီး နယ်စပ်ဖြတ် ထွက်ပြေးခဲ့ကြဖူးသည်။

ထိုင်းအစိုးရသည် ယခင်အချိန်များတွင် မြန်မာစစ်သားများဝင်ပြေးလာသည်ကို လက်ခံခဲ့သော်လည်း မြဝတီမှ ထွက်ပြေးလာသည့် စစ်သားများကိုမူ အဝင်မခံဘဲ တင်းခံနေသည်။

ထိုင်းက အဝင်မခံသဖြင့် မြဝတီအနောက်ဘက် ခလရ (၂၇၅) တပ်မှ ထွက်ပြေးလာသည့် စစ်ကောင်စီတပ်ဖွဲ့ဝင် ၂၀၀ ကျော်သည် ထိုင်း-မြန်မာနယ်စပ် အမှတ် (၂) ချစ်ကြည်ရေးတံတားအနီး ကုန်တင်ယာဉ်ရပ်နားဝင်းတွင် သောင်တင်နေကြသည်။ ၎င်းတို့သည် ဧပြီ ၁၂ ရက်နေ့မှ စတင်ကာ ကတုတ်ကျင်းများတူးကာ ခံစစ်ပြင်နေသည်ဟု လက်နက်ကိုင်တော်လှန်ရေးသမားတချို့က ပြောသည်။

တစ်ချိန်တည်းတွင် လက်နက်အပြည့်အစုံတပ်ထားသည့် ထိုင်းစစ်တပ်က မြဝတီတစ်ဖက်ကမ်း မဲဆောက်တွင် နေရာယူထားသည်။

မြန်မာလေတပ် ကျူးကျော်လာပါက ၅ မိနစ်အတွင်း ပြန်လည်တိုက်ခိုက်ရန် ထိုင်းနိုင်ငံကာကွယ်ရေးဝန်ကြီးက ဧပြီ ၁၁ ရက်နေ့တွင် အမိန့်ထုတ်လိုက်ကြောင်း ထိုင်းဒေသတွင်းသတင်းဌာန Khaosod English တွင် ရေးသားသည်။

အောင်ဇေယျစစ်ဆင်ရေးနှင့် ပျောက်ဆုံးနေသည့် ဒုတပ်ချုပ်

KNU ကို “ငပွေး” ဟု ကင်ပွန်းတပ်ကြသည့် စစ်တပ်ထောက်ခံသူများက အောင်ဇေယျစစ်ဆင်ရေးကို စစ်ကောင်စီတွင် ဒုတိယသြဇာအကြီးဆုံးဖြစ်သည့် ဒုဗိုလ်ချုပ်မှူးကြီးစိုးဝင်းကိုယ်တိုင် ဦးဆောင်ပြီး အစီအစဉ်များ ရေးဆွဲနေသည်ဟု ဆိုကြသည်။

မြန်မာစစ်တပ်၏ ဒုတိယအကြီးဆုံးအရာရှိလည်းဖြစ်သည့် ဗိုလ်ချုပ်စိုးဝင်းသည် ထိုင်းနယ်စပ်တစ်လျှောက်ကို စောင့်ကြည့်ရန် သူ၏တပ်များကို ပြီးခဲ့သည့်နှစ်က သတိပေးခဲ့ပြီး ထိုင်း-မြန်မာဆက်ဆံရေးကို ပြန်လည်စဉ်းစားမည်ဟုလည်း ပြောဆိုခဲ့ဖူးသည်။

ဒုစစ်ခေါင်းဆောင်က ထိုင်းတွင် စစ်အုပ်ချုပ်ရေးအဆုံးသတ်သွားသည့် ရွေးကောက်ပွဲအနိုင်ရပါတီ Move Forward ပါတီ၏ ခေါင်းဆောင် ဖိထား၏ မြန်မာ့အရေးကို ထိုင်းဘက်က ပိုမိုအာရုံစိုက်ရန် ပြောကြားအပြီး အထက်ပါအတိုင်း တုံ့ပြန်ခြင်းဖြစ်သည်ဟု ဧရာဝတီသတင်းဌာနက ရေးသားသည်။

အောင်ဇေယျစစ်ဆင်ရေးအတွက် နောက်ထပ်မေးစရာတစ်ခုမှာ ဦးဆောင်မည်ဆိုသည့် ဗိုလ်ချုပ်စိုးဝင်းအကြောင်းပင်ဖြစ်သည်။

ဗိုလ်ချုပ်စိုးဝင်းပျောက်နေသည်က သီတင်းနှစ်ပတ်ကျော်ပြီဖြစ်သည်။ သူနောက်ဆုံး လူမြင်ကွင်းရှေ့ထွက်ခဲ့သည်က ဧပြီ ၃ ရက်နေ့က ရှမ်းပြည်တောင်ပိုင်း ဗထူးတပ်မြို့တွင် ဖြစ်သည်။

သတင်းများက သူသည် ဧပြီ ၉ ရက်နေ့က မွန်ပြည်နယ် မော်လမြိုင်မြို့ရှိ အရှေ့တောင်တိုင်းစစ်ဌာနချုပ်တွင် အစည်းအဝေးလုပ်နေစဉ် ဒရုန်းဗုံးဖြင့် တိုက်ခိုက်ခံရပြီးနောက် ဒဏ်ရာရသွားသည်ဟု ဆိုကြသည်။

ထိုသတင်းကို စစ်တပ်ဘက်က အတည်ပြုခြင်းမရှိသလို ငြင်းဆန်ခြင်းလည်း မရှိပေ။

ဒုတပ်ချုပ်အတွက် စစ်တပ်ဘက်က ဘီဘီစီမြန်မာပိုင်းသတင်းဌာနမှတစ်ဆင့် ဧပြီ ၁၀ ရက်နေ့က တုံ့ပြန်သည်မှာ ‘’နိုင်ငံတော်ကာကွယ်ရေးနဲ့ လုံခြုံရေးတာဝန်တွေကို ပုံမှန်ထမ်းဆောင်နေပါတယ်’’ ဆိုသည်မျှသာဖြစ်သည်။

ထို့နောက် သင်္ကြန်တွင်းတွင် အခြားသောစစ်ဗိုလ်ချုပ်ကြီးများ ရှေ့ထွက်လာသော်လည်း ဗိုလ်ချုပ်စိုးဝင်း လူမြင်ကွင်းရှေ့ပေါ်မလာသည်က သူဒဏ်ရာရသည့်သတင်းကို ပိုမိုခိုင်မာစေခဲ့သည်။

အောင်ဇေယျစစ်ကြောင်း ဘယ်ရောက်နေပြီလဲ

မြဝတီသို့ တက်မည့် စစ်ကောင်စီ စစ်ကြောင်းသည် ကရင်ပြည်နယ် ကော့ကရိတ်မြို့အရှေ့ဘက်ရှိ ကော့နွဲ့ရွာဝန်းကျင်တွင် စခန်းချထားပြီး ဒေါနတောင်ပေါ်တက်ရန် ကြိုးပမ်းနေကြောင်း ကရင်အမျိုးသားလွတ်မြောက်ရေးတပ် (KNLA) တပ်မဟာ ၆ မှ အရာရှိများက ဆိုသည်။

စစ်ကောင်စီ၏ စစ်ကူစစ်ကြောင်းသည် ဧပြီလ ၁၃ ရက်နေ့ကတည်းက ကော့ကရိတ်မြို့အရှေ့ဘက်က ဒေါနတောင်ကို တက်ရန် ကြိုးပမ်းနေပြီး KNLA တပ်မဟာ ၆ နှင့် ပူးပေါင်းတပ်များ၏ ကြားဖြတ်တိုက်ခိုက်မှုကြောင့် သီတင်းတစ်ပတ် ကြာလာသည်အထိ ရှေ့မတိုးနိုင်ဖြစ်နေသည်။

နိုင်ငံအနှံ့ ရန်သူဝိုင်းနေသည့် စစ်ကောင်စီတပ်ဘက်က ထိခိုက်သေဆုံးမှုရှိလျှင် အွန်လိုင်းလူမှုကွန်ရက်တွင် “မုန့်ဟင်းခါး” ဟု ရေးသားတတ်ကြသည်။ အောက်မြန်မာပြည် အထူးသဖြင့် ရန်ကုန်၏ ထုံးစံမှာ နာရေးအလှူတွင် မုန့်ဟင်းခါးဖြင့် ဧည့်ခံခြင်းကြောင့် သေဆုံးမှုကို ထိုဝေါဟာရဖြင့် အစားထိုးသုံးကြခြင်း ဖြစ်သည်။

မြဝတီသို့ ရောက်ရေးအတွက် ဒေါနတောင်ကို ကျော်ဖြတ်မည့် စစ်ကောင်စီတပ်သားများသည် စိတ်ဓာတ်ပြင်းထန်၊ နယ်မြေကျွမ်းကျင်သည့် တော်လှန်ရေးအင်အားစုနှင့် ရင်ဆိုင်ရလျှင် မုန့်ဟင်းခါးဖြစ်သွားမည်ဟုလည်း ရေးသားနေကြသည်။

ကော့ကရိတ်မြောက်ပိုင်းဝန်းကျင်တွင် ပြင်းထန်သည့်တိုက်ပွဲများဖြစ်နေပြီး စစ်ကောင်စီက အတွဲလိုက်ပစ်ဒုံးများ၊ သံချပ်ကာယာဉ်များ၊ တံတားထိုးယာဉ်များကိုပါ သုံးနေသည်ဟု ကရင်တပ်များနှင့်အတူ စစ်ကောင်စီကို တိုက်ခိုက်နေသည့် ကျားဖြူစစ်ကြောင်း တပ်ရေးဌာနမှ ရဲဘော်သံချောင်းက ပြောသည်။

စစ်ဆင်ရေးအမည် အမျိုးမျိုးပေးနေသော်လည်း စစ်ကောင်စီအောက်ခြေတပ်သားများ၏ တိုက်ရည်ခိုက်ရည်သည် ပြောင်းလဲခြင်းမရှိသလို တော်လှန်ရေးတပ်များဘက်ကလည်း စစ်ကောင်စီကို တိုက်ခိုက်မည့် ဆုံးဖြတ်ချက်မှာ ပြောင်းလဲမှုမရှိဟု ရဲဘော်သံချောင်းက ဆိုသည်။

“(စစ်ဆင်ရေးအမည် ဘယ်လိုပြောင်းပြောင်း စစ်ကောင်စီအတွက်က) အရင်လည်း မုန့်ဟင်းခါး၊ အခုလည်း မုန့်ဟင်းခါးပဲ” ဟု ၎င်းက ဆိုသည်။

ပုံစာ- ၂၀၂၃ ဇန်နဝါရီက နေပြည်တော်တွင် ကျင်းပခဲ့သည့် (၈) ကြိမ်မြောက် မြန်မာ-ထိုင်း အဆင့်မြင့်အစစ်တပ်ရာရှိကြီးများအစည်းအဝေးမှ စစ်ခေါင်းဆောင်နှင့် ထိုင်းဘုရင့်တပ်မတော်ကာကွယ်ရေးဦးစီးချုပ် ဗိုလ်ချုပ် Chalermphon Srisawasdi တို့ကို တွေ့ရစဉ် (ဓာတ်ပုံ - စစ်ကောင်စီ)

#စစ်ကောင်စီ #ထိုင်း #မြဝတီ #နယ်စပ် #တိုက်ပွဲ #စစ်ကူ #တိုက်ခိုက်

19/04/2024

မြဝတီပြန်လည်ရရှိရေး စစ်ကြောင်းထိုးလာသည့် စစ်ကောင်စီတပ် နောက်ဆုံးအခြေအနေအပေါ် ကျားဖြူ စစ်ကြောင်းမှူး ဗိုလ်ကျော်သက်နှင့် မေးမြန်းချက်

ဧပြီ ၁၉ရက်၊ ၂၀၂၄ ခုနှစ်။ ကေအိုင်စီ

“ရန်သူဘက်က မြဝတီကို သွားနိုင်ဖို့ ဒီအင်အားလောက်နဲ့တော့ သူတို့ ထိုးဖောက်လို့ လွယ်ကူမှာမဟုတ်ဘူး။” ကျားဖြူစစ်ကြောင်းမှူး ဗိုလ်ကျော်သက်

တော်လှန်ရေးတပ်ဖွဲ့များ သိမ်းပိုက်ထားသော ထိုင်း-နယ်စပ် မြဝတီမြို့ကို ပြန်လည်ရရှိနိုင်ရေးအတွက် စစ်ကောင်စီဘက်မှ နိုင်ငံတော်အဆင့် စစ်ဆင်ရေးအဖြစ် သံချပ်ကားများအပါအဝင် တပ်အင်အား ၅၀၀ ခန့်ပါသည့် စစ်ကြောင်းသည် ကော့ကရိတ်မြို့ အာရှလမ်းမမှ တစ်ဆင့် မြဝတီမြို့သို့ ချီတက်ရန် ကြိုးပမ်းလျက်ရှိသည်။ အဆိုပါ စစ်ကြောင်းထိုးလာသော စစ်ကောင်စီတပ်အား တော်လှန်ရေးပူးပေါင်းတပ်ဖွဲ့ က ကြားဖြတ်တိုက်ခိုက်မှု လုပ်ဆောင်သည့်အတွက် အထိအခိုက်အကျအရှုံးများ၍ ရှေ့မတိုးနိုင်ဘဲဖြစ်နေသည်။

အဆိုပါ စစ်ကြောင်းထိုးလာသည့် စစ်ကောင်စီတပ်ဖွဲ့၏ နောက်ဆုံးအခြေအနေနှင့်ပတ်သက်၍ ကရင်အမျိုး သားလွတ်မြောက်ရေးတပ်မတော်-KNLA ပူးပေါင်းတပ်ဖွဲ့ ကျားဖြူစစ်ကြောင်းမှူး ဗိုလ်ကျော်သက်အား ကေအိုင်စီ-ကရင်သတင်းဌာနက ဆက်သွယ်မေးမြန်းထားသည်။

#မေး။ မြဝတီမြို့ကို ပြည်လည်ရရှိဖို့အတွက် ထိုးစစ်ဆင်လာတဲ့ စစ်ကောင်စီတပ် စစ်ကြောင်းရဲ့ အခု နောက်ဆုံးအခြေအနေကို ပြောပြပေးပါအုံး။
#ဖြေ။ အခုတက်လာတဲ့ စစ်ကောင်စီ စစ်ကြောင်းက ကော့ကရိတ်မြို့မှာ တစ်ဝက်ရှိတယ်။ ပြီးတော့ ကော့နွဲ၊ ရွာသစ်ကုန်းနဲ့ တတန်ကူးအကျော်မှာလည်း တစ်ဖွဲ့ရောက်နေတယ်ပေါ့နော်။ တက်လာတာက တပ်မ(၅၅)တပ်တွေလို့ သိရတယ်။ အင်အားက အယောက် ၅၀၀ လောက်ရှိမယ်။

#မေး။ အခု တက်လာတဲ့ စစ်ကောင်စီစစ်ကြောင်းကို KNLA နဲ့ တော်လှန်ရေးပူးပေါင်းတပ်ဖွဲ့ဘက်က ကြားဖြတ် တိုက်ခိုက်မှုတွေ လုပ်ဆောင်နေတဲ့ အခြေအနေနဲ့ပတ်သက်ပြီးတော့လည်း ပြောပြပေးပါ။
#ဖြေ။ မြေပြင်မှာ တိုက်ပွဲက နေ့ရောညပါ တိုက်ပွဲဖြစ်ပွားတာရှိတယ်။ ပြီးတော့ စစ်ကောင်စီဘက်က လက်နက်ကြီး ပြီးတော့ အခုရက်ပိုင်းမှာ လေယာဉ်နဲ့က တော်တော်လေးကို ပစ်ခတ်အသုံးပြုနေတာရှိတယ်။ လေယာဉ်က ပိုပြီး အသုံးပြုတိုက်ခိုက်နေတယ်။ သူတို့ အဓိက ဦးတည်လမ်းကြောင်းကတော့ ဒီအာရှလမ်းမကို အဓိက အသုံးပြု တက်လာတာဖြစ်တယ်။ အာရှလမ်းအတိုင်းတက်လာတာရှိတယ်။ ပြီးတော့ လမ်းတစ်ဖက်တစ်ချက်စီ တောလမ်းဘက် လည်းတက်လာတာတွေရှိတယ်။

ဒီဘက် (တော်လှန်ရေးတပ်ဖွဲ့)ဒရုန်းတပ်ဖွဲ့တွေ ကြားဖြတ်တိုက်ခိုက်တာက သံချပ်ကားကတော့ တစ်စီး ပျက်သွားတယ်။ စစ်ကားကြီးတွေကတော့ လေးစီးငါးစီးလောက်တော့ ပျက်စီးသွားတာရှိတယ်။ ပြီးတော့ ဒီရက်ပိုင်းမှာ တက်လာတဲ့ရန်သူတွေသေတာက အယောက် ၁၀၀ လောက်တော့ရှိသွားပြီး။ သူတို့တက်လာတာ ပထမရက်မှာက သံချပ်ကားကို ရှေ့ထားပြီးတက်လာတယ်။

#မေး။ မြဝတီကို စစ်ကောင်စီတပ် ထိုးဖောက်နိုင်ဖို့ အလားအလာက ဘယ်လိုရှိပါသလဲ။ မြေပြင်အခြေအနေနဲ့ ပထဝီအနေအထားကို အခြေခံပြီး သုံးသပ်ပေးပါအုံး။
#ဖြေ။ ရန်သူဘက်က မြဝတီကို သွားနိုင်ဖို့က ဒီအင်အားလောက်နဲ့တော့ သူတို့ ထိုးဖောက်လို့တော့ လွယ်မှာ မဟုတ်ဘူး။ သူတို့အတွက်က အခက်အခဲတော့ တော်တော်ရှိမယ်။ ပြီးတော့ ဒီဘက်မှာ ရှိနေတဲ့ စစ်ကောင်စီ တပ်လောက်နဲ့က သူတို့ ပြန်တိုက်မနိုင်တော့လို့ ရှမ်းပြည်နယ်က တပ်အင်အားကို ခေါ်လာပြီး သုံးရတယ်လို့ ပြောရမယ်။ အဓိကတော့ ဒီဘက်သူတို့အင်အားက နည်းသွားပြီး အဲလောက်မကျန်တော့လို့ ဟို ဘက်ကို စစ်ကူခေါ်လာရတာလည်းပါမယ်။

#မေး။ အခု ထိုးစစ်ဆင်လာတဲ့ စစ်ကောင်စီတပ် စစ်ကြောင်းကို အချို့သော ကရင်လက်နက်ကိုင် အဖွဲ့အစည်းတွေက လမ်းကြောင်းကူညီပေးတာတွေရှိတယ်လို့ လူမှုကွန်ရက်စာမျက်နှာတွေပေါ်မှာ သတင်းတွေ ထွက်လာတာရှိတယ်။ အဲဒါနဲ့ပတ်သက်ပြီးတော့လည်း ပြောပြပေးပါ။
#ဖြေ။ သတင်းတွေ ထွက်သလို BGF တံဆိပ်တို့၊ PC (ငြိမ်းချမ်းရေးကောင်စီ)တံဆိပ်တပ်ပြီး တက် လာတာရှိတာတွေ၊ သူတို့တွေ ကူညီပေးတာရှိတာတွေက မြေပြင်မှာတော့ အဲဒါတွေ ကျနော်တို့မတွေ့ရဘူး။ စစ်ကောင်စီကို ကူညီပေးပြီး တက်လာရင်တော့ ဘယ်သူမဆို ကျနော်တို့က ပစ်ရမှာပဲ။ ဘယ်အဖွဲ့ဆိုပြီ းပြောလို့မရဘူး။ စစ်ကောင်စီနဲ့တွဲလာရင်တော့ ပစ်ရမှာပဲလို့တော့ပြောချင်ပါတယ်။

#မေး။ အာရှလမ်းမမှာ တိုက်ပွဲပြင်းထန်လာတာ ၄၊ ၅ ရက်လောက်ရှိပြီးဆိုတော့ ဒီတိုက်ပွဲမှာ တော်လှန်ရေးပူးပေါင်းတပ်ဖွဲ့ဘက်က ဘယ်နှစ်ဖွဲ့ ပါဝင်ပူးပေါင်းတိုက်ခိုက်ပါသလဲ။
#ဖြေ။ ပြောရမယ်ဆိုရင် ဒီနယ်မြေထဲမှာရှိတဲ့ စစ်ကောင်စီကို တော်လှန်တဲ့ လက်နက်ကိုင်အားလုံးက ပါဝင် တိုက်ခိုက်ပါတယ်။ မြဝတီတက်တဲ့ အာရှလမ်းနဲ့ တောင်ပေါ်လမ်းဟောင်းကတော့ ကျနော်တို့ KNLA၊ PDFနဲ့ တော်လှန်ရေးပူးပေါင်းတပ်ဖွဲ့ရဲ့ ထိန်းချုပ်မှုအောက်မှာပဲရှိနေပါတယ်။

#မေး။ လတ်တလော အာရှလမ်းမပေါ် တိုက်ပွဲဖြစ်စဉ်နဲ့ပတ်သက်ပြီး ပြည်သူလူထုတွေကို ဘာများ အသိပေး ပြောချင်ပါသလဲ။
#ဖြေ။ သတင်းတွေက အမျိုးမျိုးတက်လာတယ်။ လူထုတွေ ကြောက်အောင်လည်း ပြောနေတာတွေရှိတယ်။ ဒါပေမယ့် ရှေ့တန်းမှာရှိနေတဲ့ ကျနော်တို့ကတော့ အသိဆုံးပါပဲ။ စစ်ကောင်စီအင်အားက အဲလောက်မှ မများပါဘူး။ အရမ်းကြီးလည်း သူတို့အင်အားမများလာပါဘူး။ လူထုတွေ အရမ်းပြီး စိုးရိမ်လွန်ပြီးမကြောက်ပါနဲ့ မြဝတီကို သူတို့ တက်ဖို့တော့မလွယ်ဘူး။ တက်ဖို့ကလည်း တော်တော်ခက်ခဲမယ်။ ကျနော်တို့ဘက်ကလည်း တတ်စွမ်းသလောက် တားဆီးတိုက်ခိုက်သွားမယ်လို့ ပြောချင်ပါတယ်။

- ကရင် သတင်းဌာမှ ကူးယူဖော်ပြသည်။

#စစ်ကောင်စီ #ကော့ကရိတ် #ပိတ်ဆို့ #တိုက်ခိုက် #ကျားဖြူ #အာရှလမ်းမ

BEE BOX

17/07/2024

23/04/2024

23/04/2024

22/04/2024

22/04/2024

22/04/2024

22/04/2024

20/04/2024

20/04/2024

20/04/2024

20/04/2024

19/04/2024

Address

Website

Alerts

Shortcuts

Share