https://www.facebook.com/109348181483993/

Manau Voice

Home
Myanmar
Myitkyina
Manau Voice

Nonprofit Organization

23/12/2024

ချီတက်လာကြကုန်ပြီ!
အလံဖြူနဲ့ အထိုင်စောင့်နေ......

22/12/2024

မြစ်ကြီးနားမြို့က ကုန်စုံဆိုင်အချို့မှာ စစ်ကောင်စီထုတ်ကုန်တွေပြန်လည်ရောင်းချနေ။

ဒီဇင်ဘာ ၊ ၂၂ ၊ ၂၀၂၄။

ကချင်ပြည်နယ် မြစ်ကြီးနားမြို့ပေါ် ရပ်ကွက်က ကုန်စုံဆိုင်တချို့မှာ စစ်ကောင်စီထုတ်ကုန် ဘီယာတွေနဲ့ ဆေးလိပ်တွေကိုပြန်လည်ရောင်းချနေကြပါတယ်။

စစ်တပ်အာဏာသိမ်းစမှာ ရောင်းချခြင်းမရှိဘဲ အခုနောက်ပိုင်းမှ ဆိုင်တချို့မှာ ပြန်လည်ရောင်းချလာကြတာပါ။

"ဒီမှာ မြန်မာဘီယာတွေရောင်းနေတာတွေ့တယ်ဗျ ၊ကျွန်တော်တို့အောက်ပိုင်းမှာဆိုလုံးဝမရောင်းတော့ဘူး၊ မရှိဘူး"လို့စစ်ကိုင်းတိုင်းထဲမှ ရွှေ့ပြောင်းလုပ်သား ကိုနေဝင်းကပြောပါတယ်။

စစ်တပ်ထုတ်ကုန်တွေဖြစ်တဲ့ မြန်မာဘီယာ ၊ မန္တလေးဘီယာ၊အာမီရမ်၊Andaman Gold ၊ Dagon ၊Black Shield ၊ Red Ruby စီးကရက်နဲ့ Premium Gold စီးကရက်အပြင် နန်းမြိုင် ကော်ဖီ၊ ရွှေဖီဦးလက်ဖက်ရည်၊ ရွှေမန်းသူ၊ ရွှေမြိုင်သူ၊ ပုသိမ်သူ၊ သန်မြန်သူ၊ ရှမ်းမလေး အမြန်ယာဉ်လိုင်းတွေအပြင်အောင်ဘာလေထီစနစ်ကိုပါ သပိတ်မှောက်ဖို့ တိုက်တွန်းထားတာပါ။

"မြန်မာဘီယာကတော့ ရောင်းနေတာကြာပြီ ၊ ရောင်းမလောက်ပဲ၊ရောက်တာနဲ့အကုန်ကုန်တယ်"လို့ မြစ်ကြီးနားမြို့ပေါ်က ကုန်စုံဆိုင်ပိုင်ရှင် မသင်းသင်း( အမည်လွှဲ ) က ပြောပါတယ်။

အခုလို စစ်တပ်ထုတ်ကုန်တွေ ပြန်လည် အရောင်းအဝယ်သွက်လာတာနဲ့ပတ်သက်ပြီး မြစ်ကြီးနားမြို့မှာ ၂၀၂၁ ခုနှစ်ကတည်းက စစ်တပ်ထုတ်ကုန်တွေကို မသုံးစွဲဖို့ တိုက်တွန်းခဲ့တဲ့ ရှတ်ဂျမ် (တော်လှန်ရေးစာစောင်) အဖွဲ့ဝင် တက်ကြွလူငယ်တဦးကလဲ အခုလိုပြောပါတယ်။

"ဒီလိုတွေဖြစ်လာတာက ကျွန်တော်တို့ပြည်သူတွေက မသိကြတာ၊ မေ့နေကြတာလည်းပါတယ်။ အဲ့လိုမျိုးဖြစ်လာစေချင်လို့ စစ်တပ်က တမင် အင်တာနက်၊ဖုန်းလိုင်းပိတ်တာလည်းပါတယ်"

" ဒီလိုမျိုး ပြည်သူတွေ မြန်မာစစ်တပ်ထုတ်ကုန်တွေ ပြန်ရောင်းဝယ်လာကြတာက ကျနော်တို့တက်ကြွလှုပ်ရှားသူတွေက အလုပ်မလုပ်ကြလို့၊ ပြည်သူကို အသိပညာဖြန့်ဝေ မှု သေချာမလုပ်နိုင်လို့ဖြစ်တယ်" လို့ သူက ပြောပါတယ်။

အဲ့ဒီအပြင် စစ်ကောင်စီထုတ်ကုန် မြန်မာဘီယာ၊ အရက် မရောင်းဖို့ ကချင်ဒေသမှာ ကြီးစိုးနေတဲ့ ကချင့်လွတ်လပ်ရေးတပ်မတော် KIO/၊KIA ကလည်း ပြန်တင်းကြပ်ဖို့လိုတယ်လို့ သူက ဆက်ပြောပါတယ်။

စစ်ကောင်စီထုတ် ကုန်ပစ္စည်းတွေကနေရတဲ့အမြတ်ငွေကြေးတွေဟာ ပြည်သူလူထုနဲ့ တော်လှန်ရေးအင်အားစုတွေရဲ့ အသက်၊ အိုးအိမ်တွေကို ဖျက်ဆီးစေနိုင်တဲ့အတွက် စစ်ကောင်စီထုတ်ကုန်တွေကို မသုံးစွဲဘဲ သပိတ်မှောက်ကြဖို့ အထွေထွေသပိတ်ပေါင်းစပ်ညှိနှိုင်းရေး အင်အားစုက တိုက်တွန်းထားပါတယ်။

စာမူတည်းဖြတ် - ဒီပါ
ဓါတ်ပုံ - MMTV

စစ်ကိုင်းတိုင်း ခင်ဦးမြို့နယ်တွင် ဒီဇင်ဘာလ ၁၅ ရက် ၂၀၂၄ ခုနှစ်၌ စစ်ကောင်စီထုတ် မြန်မာဘီယာနှင့် အက်ဒမန်ဂိုလ်း ဘီယာများအား ပြည်သူ့ကာကွယ်ရေးတပ်များက ဖျက်ဆီးနေပုံ။

27/11/2024

မြစ်ကြီးနားမြို့တွင် ဓါးဖြင့်ခုတ်ကာ ဆိုင်ကယ်လုယက်မှုဖြစ်ပွါး။

နိုဝင်ဘာ ၊ ၂၇ ၊ ၂၀၂၄။

ကချင်ပြည်နယ်၊ မြစ်ကြီးနားမြို့၊ အင်ဂျန်ဒုံရပ်ကွက် ၊ ဇေယျာမင်းဆီဆိုင်အကျော် ၊ အကင်ဆိုင်ရှေ့ မိန်းလမ်းမကြီးအပေါ်မှာ နိုဝင်ဘာလ ၂၆ ရက်နေ့ည ၈ နာရီ ၁၅ မိနစ်အချိန်လောက်မှာ ဆိုင်ကယ်လုယက်ပြီး ဓါးနဲ့ခုတ်ခဲ့တဲ့ဖြစ်စဉ် ဖြစ်ပွါးခဲ့ပါတယ်။

နိုဝင်ဘာလ ၂၆ ရက်နေ့ည ၈ နာရီကျော်အချိန် ဘက်ထရီဆိုင်ကယ်နဲ့ အင်တာနက်သုံးပြီးပြလာတဲ့ မိန်းကလေးသုံးယောက်ကို 125 ဆိုင်ကယ် ၂ စီးနဲ့ ယောက်ျားလေး ၆ ယောက်က ဆိုင်ကယ်နဲ့ဝင်တိုက်ပြီး ဆိုင်ကယ်ကို လုယူသွားခဲ့တယ်လို့ ကိုယ်တိုင်တွေ့ကြုံခဲ့ရတဲ့ နစ်နာသူမိန်းကလေးက Manau Voice ကို ပြောပါတယ်။

ဆိုင်ကယ်လုခံရချိန်မှာ အော်ဟစ်အကူအညီတောင်ခဲ့တဲ့သူ့ကို လုယက်သူတွေထဲကတယောက်က အသင့်ပါလာတဲ့ဓါးနဲ့ ခေါင်းကို ၂ ချက်ခုတ်ကာ မျက်နှာကို လက်သီးနဲ့ ၂ ချက်ထိုးပြီး ဆိုင်ကယ်လို လုယက်သွားတယ်လို့ သူကဆက်ပြောပါတယ်။

“မအော်နဲ့လို့ ပြောပြီး ဓါးနဲ့ခုတ်တာ ၊ လူငယ်တွေက ဆယ်ကျော်သက်တွေပဲ၊ ကချင်စကားနဲ့ ဗမာစကားပြောကြတာဟုတ်တယ်” လို့ နစ်နာသူ ကာယကံရှင်က ပြောပါတယ်။

အခုအချိန်မှာတော့ နစ်နာသူမိန်းကလေးက ဆရာဝန်နဲ့ဆေးကုသမှုခံယူခဲ့ပြီး အသက်အန္တရာယ် စိုးရိမ်စရာမရှိတော့ဘူးလို့ သိရပါတယ်။

ကချင်ပြည်နယ်၊ မြစ်ကြီးနားမြို့မှာ အင်တာနက်နဲ့ ဖုန်းလိုင်းတွေပြတ်တောက်နေတာ ၄ လကျော်ရှိလာခဲ့ပြီး ကုန်ဈေးနှုန်း အဆမတန်မြင့်တက်မှု ၊ လုယက်မှု၊ ခိုးမှုတွေအပြင် ရပ်ကွက်တွေထဲမှာ မူးယစ်ဆေးဝါးရောင်းချမှု၊ သုံးစွဲမှုတွေက အရင်ကထက် ပိုမိုများပြားလျက် ရှိနေပါတယ်။

သတင်း - BL ၊ နွေဦး
စာမူတည်းဖြတ် - ဒီပါ

သတင်းဓါတ်ပုံ - မြစ်ကြီးနားမြို့၊ အင်ဂျန်ဒုံရပ်ကွက် မိန်းလမ်းမကြီးအပေါ်မှာ နိုဝင်ဘာလ ၂၆ ရက်နေ့ည ၈ နာရီ ကျော် အချိန်လောက်က ဆိုင်ကယ်လုယက်ခံရပြီး ဓါးနဲ့ခုတ်ခံရခဲ့သည့် အမျိုးသမီး။

#မြစ်ကြီးနား #ဆိုင်ကယ်လုယက်ခံရ #ဓါးနှင့်ခုတ်ခံရ

23/11/2024

မြစ်ကြီးနားမြို့တွင် ဓါတ်ဆီတလီတာ ၁ သောင်းထိစျေးမြင့်တက်နေပြီး တန်းစီ၍ဝယ်ယူနေရ။

နိုဝင်ဘာ ၊ ၂၃ ၊ ၂၀၂၄။

ကချင်ပြည်နယ် ၊ မြစ်ကြီးနားမြို့မှာ စက်သုံးဆီ (92) တစ်လီတာကို ၁ သောင်းကျပ်ပေးပြီးဝယ်ယူနေရပြီး တန်းစီစနစ်နဲ့ ဝယ်ယူနေရတယ်လို့ မြစ်ကြီးနားမြို့ခံတွေဆီက သိရပါတယ်။

မြစ်ကြီးနားမြို့က စက်သုံးဆီဆိုင်ကြီး အများစုပိတ်ထားပြီး တချို့ဆိုင်တွေမှာ
မနက်ပိုင်းတစ်ပိုင်းသာ အချိန်ပိုင်းနဲ့ရောင်းချပေးနေပါတယ်။ ဒါ့ကြောင့် စက်သုံးဆီ ဝယ်ယူရခက်ခဲနေတဲ့အပြင် ပြီးခဲ့တဲ့အပတ်ကစပြီး လုံးဝဖွင့်လှစ်ခြင်းမရှိတဲ့ဆိုင်ကြီးတွေလည်း ရှိနေပါတယ်။

"တချို့ဆိုင်သေးတွေမှာဆို တစ်လီတာကို
တစ်သောင်းနှစ်ထောင်၊တစ်သောင်းလေးထောင်လောက်တောင် ရောင်းနေကြတယ်။ နေ့စားအလုပ်သမားတွေဆို တစ်ရက်မှ တစ်သောင်းခွဲပဲရတာ မကိုက်ကြတော့ဘူး" လို့ မြစ်ကြီးနားမြို့ခံ ကိုရိုဟစ်ကူမားက Manau Voice ကို ပြောပါတယ်။

မြစ်ကြီးနားမြို့မှာ နိုဝင်ဘာ ၂၂ ရက်နေ့က နိုင်တီတူး (92) ဆီတစ်လီတာကို ၁ သောင်းကျပ်နဲ့ဝယ်ရပြီး နိုင်တီဖိုက်(95)တစ်လီတာကို တသောင်းနှစ်ထောင်ကျပ်အထိ ရောင်းချနေကြတာပါ။

နေ့စဥ်ကျောင်းအကြိုအပို့ပြုလုပ်နေရတဲ့ကျောင်းသားမိဘတွေ၊ သုံးဘီး၊ဆိုက်တွဲမောင်းနှင်သူ အနှေးယာဥ်လုပ်သားတွေနဲ့ နေ့စားအလုပ်သမားအများစုမှာ စက်သုံးဆီဝယ်မရတဲ့အခက်အခဲတွေနဲ့ရင်ဆိုင်နေရပြီး ရပ်ကွက်တွေမှာ ပုလင်းချိန်နဲ့ စက်သုံးဆီရောင်းချသူအများစုမှာလဲ စျေးနှုန်းကြီးမြင့်မှုကြောင့် ဆိုင်ပိတ်ထားကြတယ်လို့ မြို့ခံတွေဆီမှ သိရပါတယ်။

"ဆီက အများကြီးလည်းဝယ်မထားနိုင်ဘူး တစ်ရက်စာတစ်ရက်ပဲဝယ်နိုင်တော့ ကျောင်းနောက်ကျမှာစိုးလို့ စောစောသွားတန်းစီရတော့တာပေါ့" လို့ ကျောင်းသားမိဘဒေါ် ခင်လှိုင်ကပြောပါတယ်။

ကချင်ပြည်နယ်ကို အဓိက စက်သုံးဆီတင်ပို့ရာလမ်းကြောင်းဖြစ်တဲ့ ကန်ပိုက်တီနယ်စပ်ဂိတ်နဲ့ စစ်ကိုင်းတိုင်းအဝင် နန့်စီးအောင်ဂိတ်မှာလည်း ဆီကားတွေဖြတ်သန်းသွားလာခွင့် ပိတ်ထားပြီး ဆိုင်ကယ်တွေနဲ့ဆီသယ်ယူနေရကာ လမ်းခရီးသယ်ယူစားရိတ်ပိုမိုမြင့်မားလာတာကြောင့် စျေးနှုန်းကြီးမြင့်မှုတွေကို မြစ်ကြီးနားမြို့ခံ တွေက ကြုံတွေ့နေကြရပါတယ်။

စာမူတည်းဖြတ် - ဒီပါ

ပုံစာ - ကချင်ပြည်နယ်၊ မြစ်ကြီးနားမြို့မှာ ယမန်နေ့မနက် ၈ နာရီခန့်က ဆီဆိုင်တဆိုင်ရှေ့ စက်သုံးဆီဝယ်ယူဖို့ စီတန်းနေရသည့်မြင်ကွင်း။

#စက်သုံးဆီ‌ဈေးမြင့်တက် #ကချင်ပြည်နယ်

21/11/2024

ကချင်ပြည်နယ်တွင် အင်တာနက်လိုင်းနှင့်ဖုန်းလိုင်းများပြတ်တောက်နေတာ ၄ လပြည့်လာ။

နိုဝင်ဘာ ၊ ၂၁ ၊ ၂၀၂၄။

ကချင်တစ်ပြည်နယ်လုံးမှာ ဖုန်းလိုင်းနဲ့
အင်တာနက်လိုင်းများပြတ်တောက်နေတာ ဒီကနေ့ နိုဝင်ဘာလ ၂၁ ရက်နေ့မှာ လေးလပြည့်ပြီဖြစ်တယ်လို့ မြစ်ကြီးနားမြို့ခံတွေက ပြောပါတယ်။

အင်တာနက်ပြတ်တောက်မှုကြောင့် ပြည်သူတွေလဲ အခက်အခဲတွေနဲ့ ရင်ဆိုင်ကြုံတွေ့နေရတယ်လို့ မြစ်ကြီးနားမြို့မှ အနှေးယာဥ်လုပ်သား ကိုသိန်းလင်းက Manau Voice ကို အခုလိုပြောပါတယ်။

" အဓိကအခက်အခဲက သတင်းအမှားတွေပြန့်တယ်၊နောက်ပြီး မြို့ထဲကစျေးကြီးနားမှာ လုယက်မှုဖြစ်တယ်ဆိုရင်တောင် ကျွန်တော်တို့ရပ်ကွက်ထဲကလူတွေက တစ်မြို့ထဲနေပြီးမှ မသိကြဘူး။ ဖုန်းကလည်းဆက်လို့မရ၊ အဲ့လိုဖြစ်နေတာ ငွေလွှဲငွေထုတ်ကလည်းဝိုင်ဖိုင်မရတဲ့ဆိုင်ဆို အကောင့်ထဲက ငွေထုတ်လို့မရတာမျိုးလည်းရှိတယ်" လို့ ပြောပါတယ်။

ဖုန်းလိုင်းနဲ့ အင်တာနက်လိုင်းပြတ်တေ။က်ရတဲ့အကြောင်းကို မေးမြန်းစုံစမ်းရာမှာတော့

" စစ်ကိုင်းတိုင်းမှာ စစ်ကောင်စီနဲ့ KIA၊ PDF နှစ်ဖက်တိုက်ပွဲဖြစ်ပြီးလက်နက်ထိမှန်လို့ ဖုန်းလိုင်းနှင့်အင်တာနက်လိုင်းတွေ ပြတ်တောက်သွားတယ်" လို့ Wifi ကုမ္မဏီကတာဝန်ရှိသူတစ်ဦးထံမှသိရပါတယ်။

မြစ်ကြီးနားမြို့မှာ ဝိုင်ဖိုင်နဲ့အင်တာနက်အသုံးပြုခ တစ်နာရီ ငါးထောင်ကျပ်ပေးကာ အသုံးပြုနေရပြီး လိုင်းမပြတ်ခင်က K pay နဲ့ ငွေထုတ်ရင် ငွေသားတစ်သိန်းကို ၅၀၀ ကျပ်ခန့်သာပေးရပြီး အခုအခါမှာတော့ ၁၀၀၀ ကျပ်အထိပေးရကြောင်း သိရပါတယ်။

ကချင်ပြည်နယ်ရဲ့ မြို့နယ်အချို့မှာ MPT နဲ့ ATOM တာဝါတိုင်များရှိရာအနီးတစ်ဝိုက်မှာ ဖုန်းပြောလို့ရပြီး တခြား မည်သည့်ဆင်းကဒ်မှ အင်တာနက်အသုံးပြုမရတာ လေးလပြည့်လာပြီဖြစ်ပါတယ်။

စာမူတည်းဖြတ် - ဒီပါ

#မြစ်ကြီးနား

#ဖုန်းလိုင်းများပြတ်တောက်

04/11/2024

ဖားကန့်မြို့မှ စစ်ကောင်စီရဲ့ဆိုင်းတောင်အထက်တန်းကျောင်းကို KIA မှ ပြန်လည်ဖွင့်လှစ်ခွင့်ပြု။

နိုဝင်ဘာ ၊ ၄ ၊ ၂၀၂၄။

ကချင်ပြည်နယ်၊ ဖားကန့်မြို့ ၊ ကချင့်လွတ်မြောက်ရေးတပ်မတော် ( KIA ) ထိန်းချုပ်ရာ ဆိပ်မူအုပ်စု၊ ဆိုင်းတောင်ကျေးရွာမှာရှိတဲ့ စစ်ကောင်စီဖွင့်လှစ်ထားသည့် ဆိုင်းတောင် အ.ထ.က ကျောင်းကို ဒီကနေ့ နိုင်ဝင်ဘာလ ၄ ရက်နေ့ ၂၀၂၄ ခုနှစ်မှာ KIA ရဲ့ခွင့်ပြုချက်နဲ့ ပြန်လည်ဖွင့်လှစ်ခဲ့တယ်လို့ သိရပါတယ်။

စစ်ကောင်စီကဖွင့်လှစ်ထားတဲ့ ဆိုင်းတောင် အ.ထ.က ကျောင်းကို KIA ၊ KPDF နဲ့ စစ်ကောင်စီတပ်တို့ တိုက်ပွဲပြင်းထန်ခဲ့တဲ့ စက်တင်ဘာလဆန်းပိုင်းကတည်းက ပိတ်ထားခဲ့ရတာဖြစ်ပါတယ်။

“ဒီနေ့ ကျောင်းဖွင့်တယ်၊ လူဦးရေ ဆယ်ကြီးပိုင်းလောက်ရှိတယ်၊ ကျောင်းသားမိဘတွေရဲ့ တောင်းဆိုချက်ကြောင့် KIA ရဲ့ခွင့်ပြုချက်နဲ့ သုံးလပဲဖွင့်ခွင့်ပြုမယ်လို့ သိရတယ်” လို့ ဆိုင်းတောင်ကျေးရွာမှ စစ်ကောင်စီ‌တော်လှန်ရေးသမားတဦးက Manau Voice ကို ပြောပါတယ်။

ကျောင်းဖွင့်ဖို့အတွက် နိုဝင်ဘာ ၁ ရက်နေ့ကတည်းက နိုဝင်ဘာလ ၄ ရက်နေ့မှာကျောင်းဖွင့်ဖို့ စစ်ကောင်စီကျောင်းကော်မတီက ကြေငြာစာရွက်ကပ်ထားပါသေးတယ်။

“စစ်ကောင်စီကျောင်းက ဖွင့်လက်စကြီးမို့ဖွင့်ခံတာတဲ့ ၊ ကလေးတွေက ကျောင်းပိတ်ဖို့ သုံးလလောက်ပဲလိုတော့တာမို့တဲ့၊ တကယ်ဆို စစ်ကောင်စီကျောင်းကိုမတက်တဲ့ကလေးတွေဆို သုံးနှစ် ၊ လေးနှစ်ရှိနေပြီရော၊ အဲ့ဒါကိုထည့်မတွက်ဘဲ စစ်ကောင်စီကို တန်းညှိနေတယ်” လို့ Manau Voice ရဲ့ မြေပြင်သတင်းရင်းမြစ်တဦးက ပြောပါတယ်။

အခုလို စစ်ကောင်စီရဲ့ကျောင်းကို KIA က ဖွင့်ဖို့ခွင့်ပြုလိုက်တဲ့အတွက် ဖားကန့်တော်လှန်ရေးအင်အားစုနဲ့ ပညာရေး CDM အင်အားစုအားလုံးက သဘောမတူဘူးလို့ ပြောပါတယ်။

“စိုးမိုးနယ်မြေတွေမှာ KIA က KEd ကျောင်းအချို့ဖွင့်ထားပြီး၊ ဖားကန့် ပညာရေး CDM အင်အားစုတွေကလဲ စစ်ကောင်စီရဲ့ ကျောင်းမှာ သွားမတက်တဲ့ ကလေးတွေအတွက် တတ်နိုင်သလောက် ပညာသင်ကြားပေးနေတာ တွေလဲ ရှိနေပါတယ်” လို့ ဖားကန့်မြို့မှ CDM ကျောင်းဆရာမတဦးက Manau Voice ကိုပြောပါတယ်။

စစ်ကောင်စီနဲ့ KIA ၊ KPDF တို့ဖြစ်ပွါးခဲ့တဲ့တိုက်ပွဲက တလကျော်ကြာမြင့်ခဲ့ပြီး အခုအခါမှာတော့ KIA က ဖားကန့်-ယူမာ-ဆိုင်းတောင် လမ်းပိုင်းကို ပြန်လည်ဖွင့်လှစ်ပေးခဲ့ပြီး ဒေသခံတွေကို ပြန်လည်နေထိုင်ခွင့် ပြုခဲ့တယ်လို့ သိရပါတယ်။

သတင်း - နွေဦး
စာမူတည်းဖြတ် - ဒီပါ

သတင်းဓါတ်ပုံ - ဖားကန့်မြို့ ၊ ဆိပ်မူအုပ်စု ၊ စစ်ကောင်စီဖွင့်လှစ်ထားသည့် ဆိုင်းတောင်အထက်တန်ကျောင်းရှေ့တွင် ကျောင်းကော်မတီက ကျောင်းဖွင့်ရန်ကြေငြာထားသည့်ပုံ။

#ဖားကန့်

#အထက်တန်းကျောင်းဖွင့်လှစ်

27/10/2024

KIA မှ ဖမ်းဆီးထားတဲ့ ဖားကန့်သတင်းသမားနှစ်ဦး ပြန်လည်လွတ်မြောက်။

၂၈ ၊ အောက်တိုဘာ ၊ ၂၀၂၄။

ကချင်လွတ်မြောက်ရေးတပ်မတော် ( KIA ) ကဖမ်းဆီးထားတဲ့ ဖားကန့်မြို့မှ သတင်းသမားနှစ်ဦးဖြစ်တဲ့ ကိုတာလင်းမောင်နဲ့ ကိုနောင်ရိုးတို့နှစ်ဦးဟာ ဖမ်းဆီးခံရပြီး တလအကြာမှာ ပြန်လည်လွတ်မြောက်လာခဲ့ပါတယ်။

ကိုတာလင်းမောင်နဲ့ ကိုနောင်ရိုးတို့နှစ်ဦးကို ဖားကန့်မြို့နယ် KIA တပ်မဟာ ( ၉ ) တပ်ရင်း ( ၆ ) က စက်တင်ဘာလာ ၂၉ ရက်နေ့မှာ ဖမ်းဆီးထိန်းသိမ်းထားခြင်းဖြစ်ပြီး ဒီကနေ့ အောက်တိုဘာလ ၂၈ ရက်နေ့ နေ့လည် ၁၂ နာရီဝန်းကျင်မှာ ပြန်လည်လွှတ်ပေးခဲ့တာဖြစ်ပါတယ်။

"ကျွန်တော်နဲ့ ကိုတာလင်းမောင် နေကောင်း၊ကျန်းမာစွာနဲ့ ပြန်လည် လွတ်မြောက်ခဲ့ပါပြီ၊ကူညီစောင့်ရှောက်ပေးခဲ့သူအားလုံးကို ကျေးဇူးတင်ပါတယ်၊ခင်ဗျာ" လို့ ကိုနောင်ရိုးရဲ့ ဖေ့စ်ဘုတ် လူမှုကွန်ယက်စာမျက်နှာမှာ ဖော်ပြထားပါတယ်။

ဖားကန့်အလွတ်တန်းသတင်းထောက်ဖြစ်တဲ့ ကိုတာလင်းမောင်ဟာ ပြန်ကြားရေးနှင် ဆက်သွယ်ရေးဝန်ကြီးဌာန (ပြန်/ဆက်) မှ CDM ဝန်ထမ်းတဦးဖြစ်ပြီး ဖားကန့် သပိတ်ကောက်မတီအဖွဲ့ဝင်တဦးလဲဖြစ်ပါတယ်။ အဲ့ဒီအပြင် နိုင်ငံရေးအကျဉ်းသားတွေကို တဖက်တလမ်းကနေ ကူညီဆောင်ရွက်နေသူဖြစ်ပြီး ကိုနောင်ရိုးနဲ့အတူ နိုင်ငံရေးအကျဉ်းသားများ ကူညီစောင့်ရှောက်ရေးအသင်း ( AAPP ) နဲ့ လက်တွဲလုပ်ဆောင်နေသူတဦးဖြစ်ပါတယ်။

အဲ့ဒီအပြင် ကိုတာလင်းမောင်ဟာ ဖားကန့်ရဲ့ စစ်ရေးသတင်း၊ မြေပြင်သတင်းတွေနဲ့ ပြည်သူတွေအကျိုးပြုသတင်းမှန်တွေတင်ဆက်မှုကြောင့် စက်တင်ဘာလ ၈ ရက် ၊၂၀၂၃ ခုနှစ်မှာ ကားနဲ့အနောက်မှလိုက်တိုက်ခံရပြီး အသက်အန္တရာယ်မှ လွတ်မြောက်ခဲ့သူလဲ ဖြစ်ပါတယ်။

ကိုနောင်ရိုးဟာလဲ စစ်တပ်ကအာဏာသိမ်းပြီးတဲ့နောက် မတ်လ ၉ ရက်နေ့ ၂၀၂၁ ခုနှစ်မှာ ဆန္ဒပြသတင်းတွေ ၊ သတင်းဓါတ်ပုံတွေရိုက်ကူးခဲ့တာကြောင့် စစ်ကောင်စီက တနှစ်နဲ့ ခုနှစ်လခန့်ဖမ်းဆီးခံခဲ့ရသူပဲဖြစ်ပါတယ်။

မြန်မာနိုင်ငံမှာ စစ်တပ်ကအာဏာသိမ်းပြီးနောက်ပိုင်း သတင်းမီဒီယာသမားတွေကို ပစ်မှတ်ထား ဖမ်းဆီးမှုတွေလုပ်ဆောင်ခဲ့တာကြောင့် သတင်းသမားအခွင့်အရေးတွေ ဆုံးရှုံးနစ်နာနေရပါတယ်။

စစ်အာဏာသိမ်းတဲ့ သုံးနှစ်ကျော်ကာလအတွင်းမှာ စစ်တပ်ကဖမ်းဆီးတဲ့သတင်းသမား ၂၀၀ ကျော်ရှိခဲ့ပြီး ပြန်လည်လွတ်မြောက်လာသူတွေရှိသလို ဆက်လက်ဖမ်းဆီးခံထားရသူများစွာလဲ ရှိနေပါသေးတယ်။

သတင်း - နွေဦး
စာမူတည်းဖြတ် - ဒီပါ

#ဖားကန့်
#သတင်းသမားဖမ်းဆီးခံရ
#ကချင်လွတ်မြောက်ရေးတပ်မတော်

20/10/2024

ဇာတ်တူသားစားခံနေရတဲ့ ထိုင်းနိုင်ငံရောက် မြန်မာရွှေ့ပြောင်းအလုပ်သမားဘဝ
=====================

ဆောင်းပါး - နွေဦး၊ ခိုင်ဝဿန်

ထိုင်းက ကုန်တိုက်တခုမှာ အလုပ်လုပ်မယ်လို့ စိတ်ကူးခဲ့ပြီး မြန်မာနိုင်ငံကနေ တရားဝင် MOU စာချုပ်နဲ့ ရောက်လာခဲ့တဲ့ ကိုအောင်အောင်ဟာ ထင်သလိုမဖြစ်လာဘဲ သန့်စင်ခန်းထဲမှာ အိပ်ခဲ့ရပါတယ်။

“ဘေစင် ( လက်ဆေးစင် ) အောက်မှာအိပ်ရတယ်။ အခန်းက လေဝင်လေထွက်မရှိတော့ ပူလောင်နေတာပဲ၊ အဲ့ဒါကြောင့် ရှိတဲ့ပန်ကာလေးကိုပဲ အားပြုအိပ်ရတယ်။ အပြင်ထွက်အိပ်ဖို့က ခြင်ပေါ တော့အိပ်လို့မရဘူး၊ ခြင်ထောင်ဝယ်ဖို့ကလဲ အရမ်းခက်ခဲတယ်လေ။ ညဆိုအိပ်ပျော်လား မပျော်လား တောင်မသိရဘူး” လို့ ဘန်ကောက်နဲ့ မဲဆောက်မြို့အကြားမှာတည်ရှိတဲ့ ချိုင်းနက်မြို့က ဟိုတယ်တခုက အထွေထွေလုပ်သားအတွေ့အကြုံကို အသက် ၃၅ နှစ်အရွယ် ကိုအောင်အောင်က ပြန်ပြောပါတယ်။

ကိုအောင်အောင်ဟာ အလုပ်အကိုင်ရှာဖွေရေးအေဂျင်စီနဲ့ ပွဲစားတွေရဲ့ လှည့်ဖျားလိမ်လည်မှုအောက်မှာ ဒုက္ခကြုံခဲ့ရတဲ့ မြန်မာရွှေ့ပြောင်းအလုပ်သမား ၉၅ ယောက်ထဲက တဦးဖြစ်တယ်။

နှစ်ဦး နှစ်ဖက် နားလည်သဘောတူမှုစာချုပ် (Memorandum of Understanding- MOU) ဆိုတာ ထိုင်းနဲ့ မြန်မာအစိုးရအကြား ရွှေ့ပြောင်းအလုပ်သမားတွေခေါ်ယူရေးဆိုင်ရာ သဘောတူထားကြတဲ့ လုပ်ငန်းစဉ်ဖြစ်ပါတယ်။ အလုပ်ရှင်က ထိုင်းအလုပ်သမားရုံးမှာ တရားဝင်လူခေါ်ဖို့ စာရင်းတင်မယ်၊ အလုပ်အကိုင်ရှာဖွေရေး အေဂျင်စီတွေက မြန်မာသံရုံးကနေတဆင့် မြန်မာအလုပ်သမားဝန်ကြီးဌာနရဲ့ ခွင့်ပြုချက်ယူကာ အလုပ်သမားတင်ပို့မယ်ဆိုတဲ့ စနစ်ဖြစ်ပါတယ်။

အလုပ်ရှင်နဲ့ အလုပ်သမားတို့ပဲ ချိတ်ဆက်တာမဟုတ်ဘဲ တရားဝင်မှု၊ ခိုင်ခံ့မှုနဲ့ နှစ်ဘက်အခွင့်အရေးနဲ့ သဘောတူညီချက်အတွက် အလုပ်သမားအရာရှိတွေကိုသက်သေထားပြီး စာချုပ်ချုပ်ရတာဖြစ်ပါတယ်။

ကိုအောင်အောင် လုပ်ရတာကတော့ ဟိုတယ်ခန်းမက စားပွဲခုံ၊ ထိုင်ခုံတွေကို နေရာချပြင်ဆင်ရတာ၊ အိုးဆေး ပန်းကန်းဆေးလုပ်ရတာ၊ တံမြက်လှဲ၊ ကြမ်းတိုက်လုပ်ရတာနဲ့ မှန်တွေတိုက်ချွတ်ရတာ အမှိုက်ကြုံး၊ မြက်ရိတ် အစုံပါပဲ။

“အလုပ်ဝင်မှ အလုပ်ချိန်က တနေ့ဆယ်နာရီဆိုတာသိခဲ့ရတယ်။ မနက် ၇ နာရီကနေ ညနေ ၆ နာရီထိဖြစ် ပြီး အချိန်ပိုဆင်းရတဲ့ညဆို ည ၁ နာရီခွဲထိဆင်းရတယ်။ လမ်းလျှောက်ရလွန်းတော့ ကျွန်တော့် ခြေချောင်း နှစ်ဖက်လုံးမှာ အရည်ကြည်ဖုထတယ်၊ သွေး‌ခြေဥတယ်၊ လက်ဖဝါးတွေမှာလဲ အရည်ကြည်ဖုတွေထတယ်”

ကိုအောင်အောင်အနေနဲ့ ထိုင်းကိုသွားရောက်အလုပ်လုပ်ဖို့ ရန်ကုန်မှာ ပထမဆုံးဆက်သွယ်ရမိသူကတော့ မနှင်းနှင်းခိုင်ဆိုသူဖြစ်ပြီး သူမဟာ အဆင့်ဆင့်သော ပွဲစားနဲ့ အေဂျင်စီတွေထဲက တဦးမျှသာဖြစ်ပါတယ်။

“ထိုင်းကိုသွားဖို့ ဝန်ဆောင်ခ ၃၅ သိန်း ပေးရတယ်။ အဲ့တာကို လက်ခံတဲ့သူက မနှင်းနှင်းခိုင်လက် ခံတာ၊ ပြီးတော့ ထိုင်းရောက်ရင် ဘန်ကောက်က ကုန်တိုက်တခုမှာအလုပ်လုပ်ရမှာဖြစ်ကြောင်း ၊ ရောက်တာနဲ့အလုပ်တန်းဆင်းရမှာဖြစ်ကြောင်း ၊ အဆောင်လဲငှားထားပြီးပြီဖြစ်ကြောင်း၊ အလုပ်ရတဲ့ အထိလဲ ဘာမှ ထပ်ပေးစရာမလိုကြောင်းပြောတယ်”

မနှင်းနှင်းခိုင်ကနေတဆင့် ဦးမြင့်နိုင်၊ ဦးကျော်( ခ ) ဦးရခိုင်၊ ဒေါ်ခင်ထားကြည် ( ရွှေရတနာဖြိုး ပြည်ပအလုပ်အကိုင်ရှာဖွေရေးအေဂျင်စီ )၊ ဦးခင်မောင်ဇင် ( The Super Straight Honest Group Company Limited - Oversea Employment Agency ) ကို မြန်မာပြည်တွင်းမှာ အဆင့်ဆင့်လွှဲပြောင်းချိတ်ဆက်ပေးခံရပါတယ်။

“ ရွှေရတနာဖြိုးအေဂျင်စီက ပိတ်ခံထားရတယ်ထင်တယ်။ သူ့နာမည်နဲ့ ထိုင်းကို လူပို့လို့မရတာကြောင့် ဦးခင်မောင်ဇင် ( The Super Straight Honest Group Company ) နာမည်နဲ့ပဲ ထိုင်းကို ပို့ခဲ့တာ၊ အဲ့တာကလဲ နောက်မှသိတာ။ ” လို့ ကိုအောင်အောင်က ဆိုပါတယ်။

ရွှေရတနာဖြိုး ပြည်ပအလုပ်အကိုင်ရှာဖွေရေးအေဂျင်စီ က ဩဂုတ်လ ၂၉ ရက်နေ့ ၂၀၂၄ ခုနှစ်မှာ MOU စနစ်နဲ့ အလုပ်သွင်းပေးမယ်လို့ပြောပြီး မြန်မာအလုပ်သမား အယောက် ၁၀၀ ကို ဝန်ဆောင်ခ ၅၁ သိန်းကျော်ယူကာ ထိုင်းနိုင်ငံကိုပို့ဆောင်ပေးခဲ့ပေမယ့် အယောက် ၁၀၀ လုံး အလုပ်ရရှိခြင်းမရှိဘဲ ဒုက္ခရောက်နေတယ်လို့ ခေတ်သစ်သတင်းဌာနက စက်တင်ဘာလ ၁၇ ရက်နေ့မှာ ရေးသားခဲ့ပါတယ်။

ကိုအောင်အောင်တို့လူစုကို ပင်လုံခန်းမအနီးမှာရှိတဲ့ ငုဝါလမ်းနဲ့ ဇွဲကပင် လမ်းကြား၊ စေတနာ (၃) လမ်းက ဥဩချိုအဆောင်မှာ The Super Straight Honest Group ကုမ္ပဏီက စာချုပ်ချုပ်ပါတယ်။ စာချုပ်အရ ပေါင်မုန့်စက်ရုံမှာအလုပ်လုပ်ရမယ်လို့ပါရှိပါတယ်။

“စာရွက်စာတမ်းတွေကို ဓါတ်ပုံရိုက်ခွင့်လည်းမပေးဘူး၊ သေချာဖတ်ခွင့်လည်းမပေးဘူး၊ အဲ့ဒီအချိန်မှာက ထိုင်းကိုထွက်ချင်စိတ်ပဲရှိတာ ၊ အလုပ်သမား ၉၅ ယောက်လုံးကလည်း လက်မှတ်ထိုးနေတော့ ကိုယ်လည်းထိုးရတာပေါ့၊ သူတို့ကလည်း အစိုးရက လက်မှတ်ထိုးခိုင်းလို့ထိုးခိုင်းရတာ၊ မင်းတို့မနစ်နာပါဘူးလို့ပြောတော့ အေဂျင်စီကိုယုံပြီး လက်မှတ်ထိုးခဲ့ရတာ ”

အဲဒီနောက် ဒီဇင်ဘာလ ၁၄ ရက် ၊ ၂၀၂၃ ခုနှစ်မှာ ရန်ကုန်မြို့ မြောက်ဒဂုံမြို့ နယ်ရှိ ပင်လုံခန်းမ၊ အလုပ်သမားညွှန်ကြားရေးဦးစီးဌာန၊ လုပ်သားများကျွမ်းကျင်မှုလေ့ကျင့်ရေးသင်တန်းကျောင်းမှာ အစိုးရနဲ့ အလုပ်သမားတွေကို ကိုယ်စားပြုပြီးပို့ဆောင်ပေးမယ့်အကြောင်း ကုမ္ပဏီက စာချုပ်ချုပ်ပါတယ်။

စာချုပ်ချုပ်ပြီးတာနဲ့ သုံးလအတွင်း ထိုင်းကိုထွက်ရမယ်လို့ အစောပိုင်းက အေဂျင်စီကပြောဆိုခဲ့ပေမယ့် တကယ်တန်းမှာ ခြောက်လကျော်မှ ခရီးစထွက်ရပါတယ်။ အဲဒီမှာလည်း နဂိုနှုတ်နဲ့သဘောတူညီချက်မှာ ရန်ကုန်လေဆိပ်ကနေ ထိုင်းနိုင်ငံ ဘန်ကောက်မြို့ကို တိုက်ရိုက်လေယာဉ်နဲ့ပို့ပေးမယ်ဆိုလို့ လေယာဉ်လက်မှတ်ဖိုး ၇၅၀,၀၀၀ ပေးခဲ့ရပေမယ့် ဘန်ကောက်လေယာဉ်က လက်မှတ်မရလို့ဆိုတာကြောင့် ရန်ကုန်ကနေ ကော့သောင်းကို လေယာဉ်နဲ့သွားပြီး အဲဒီကနေမှ ထိုင်းနိုင်ငံ ရနောင်းဘက်ပို့ခံခဲ့ရပါတယ်။

“ကော့သောင်းအထိ အလုပ်အကိုင်ရှာဖွေရေးအေဂျင်စီကလူပုဂ္ဂိုလ်တွေ ပါခဲ့ကြပေမဲ့ ရနောင်းအရောက်မှာတော့ လိုက်ပါလာတာမရှိတော့ပါဘူး။" လို့ ကိုအောင်အောင်က ပြောပါတယ်။

အဲဒီနေ့ ည ၇ နာရီကျော်မှာ အလုပ်သမား ၉၅ ယောက်လုံး ရနောင်းကနေ ထွက်ခွါလာတာမှာ နောက်တနေ့နံနက်မှာ ဘန်ကောက်မြို့ကိုရောက်ရှိခဲ့ပါတယ်။ ဘယ်သူမှစောင့်ဆိုင်းနေခြင်းလည်းမရှိသလို ပေါင်မုန့်စက်ရုံဆိုတာလည်းမပို့ပေးတော့ပါဘူး။ ယောင်လည်လည်ဖြစ်နေခဲ့ပြီး ရန်ကုန်ကအလုပ်အကိုင်ရှာဖွေရေးအေဂျင်စီကိုဆက်သွယ်မေးမြန်းတဲ့အခါ မြန်မာပွဲစား ကိုကိုနိုင် (ခ) အဲလစ် နဲ့ ချိတ်ပေးပြန်ပါတယ်။

ဒီလိုနဲ့အလုပ်သမားတွေဟာ ရရာအလုပ်ဝင်လုပ်ဖို့ လုံးပမ်းကြရင် တစုစီ တစစီပြန့်ကျဲကုန်ပါတော့တယ်။

ကိုအောင်အောင်ကတော့ ရန်စစ်မြို့ Golf City နားမှာ မိမိစားရိတ်နဲ့မိမိ အခန်းငှားပြီးနေထိုင်ပြီး အလုပ်မရှိဘဲ သောင်တင်နေခဲ့ရာက ပွဲစားဆက်ပေးတဲ့ ဟိုတယ်မှာအလုပ်လုပ်ဖို့ဆုံးဖြတ်ခဲ့တာဖြစ်ပါတယ်။

“စပေါ်က ခြောက်လပြည့်မှပြန်အမ်းမှာမို့ စပေါ်ရှုံးမှာပေါ့လို့ပြောတော့ (ပွဲစား) ကိုကိုနိုင်က မပူနဲ့ သူပြန်တောင်း ပေးမယ်လို့ ပြောတယ်။ ဒါပေမယ့် နှစ်လ ပြည့်ကာနီးမှ ဟိုတယ်တခုမှာ အလုပ်လုပ်ရမယ်၊ စမတ် ကြေး တယောက် ဘတ် ၂၅၀၀ ပေးရင် အလုပ်ထည့်ပေးမယ်ပြောလို့ ဘတ်လေးထောင်နဲ့ဝယ်ထားတဲ့ဖုန်း ကို ၂၅၀၀ ဘတ်နဲ့ပြန်ရောင်း ပြီး စမတ်ကြေးပေးလိုက်ရတယ်၊ အခန်းခ စပေါ်ငွေလဲရှုံးသွားတယ်၊ ပြန်မရဘူး” လို့ ကိုအောင်အောင်က ပြောပါတယ်။

အထက်မှာပြောခဲ့သလို ဟိုတယ်မှာ အလုပ်ချိန်များတာ၊ နားချိန်မရှိတာ၊ အချိန်ပိုဆင်းရပြီး အချိန်ပိုကြေး မရရှိတာတွေဖြစ်ခဲ့တဲ့နောက် နှစ်ပတ်အကြာမှာပဲ ကိုအောင်အောင် အလုပ်ကနေထွက်ခဲ့ပါတယ်။

“ကျွန်တော်တို့ အလုပ်သမားထဲကတချို့က ကျန့်အော်(သူဌေးလွဲပြောင်းစာ) နဲ့ ပတ်သက်ပြီး ထိုင်းနိုင်ငံက သံရုံးကိုတိုင်ပေမယ့် ဘာမှမလုပ် ပေးဘူး။ ဦးခင်မောင်ဇင်ကိုတိုင်တဲ့အကြောင်းပြောတော့လည်း 'တိုင်ချင်တဲ့ နေရာမှာတိုင်၊ ငါတို့က ကုမ္ပဏီက ပိတ်ခံရ တဲ့အပြင် ဘာမှမဖြစ်သွားဘူး' ပြောတယ်” လို့ ကိုအောင်အောင်ကပြေပါတယ်။

ရွှေ့ပြောင်းလုပ်သား ၉၅ ယောက်လုံးထွက်ပြေးသွားတဲ့အကြောင်း ထိုင်းအလုပ်ရှင်က နေရာခွဲပြီး ရဲစခန်းတွေမှာ တိုင်ချက်ဖွင့်ခံထားရတယ်လို့ ထိုင်း မြန်မာဘာသာပြန် HRDF ( Human Right and Development Foundation ) အဖွဲ့ဝင် ကိုစိုင်းက ပြောပါတယ်။

MOU စာချုပ်ပါအကန့်အသတ်အရ အလုပ်သမားက နှစ်နှစ်ပြည့်အောင် ချုပ်ဆိုထားတဲ့အလုပ်ရှင်နဲ့အလုပ်လုပ်ရပြီး ကိုယ့်သဘောနဲ့ကိုယ်အလုပ်ထွက်ခွင့်တားမြစ်ထားပါတယ်။

“လက်ရှိအချိန်မှာ အလုပ်သမားတွေ အကုန်လုံးစုပြီး ဒီလူကိုအရေးယူမယ်ဆိုရင် မရဘူးလားဆိုတော့ ရပါတယ်၊ ဒါပေမယ့် သတ်မှတ်ထားတဲ့အချိန်ကာလကျော်လွန်သွားရင် တရားမဝင်ဖြစ်နိုင်တယ်၊ တဖက်မှာလည်း တိုင်ခံထား ရတာက တပိုင်း ၊ တဖက်မှာ တရားမဝင်ဖြစ်သွားတာကတပိုင်းဆို ပြန်ပို့ခံရတာ တွေ ၊ တရားဥပဒေအရ အရေးယူနိုင်မလားဆိုတာတွေကတော့ မှန်းဆရခက်တယ်” လို့ ကိုစိုင်းက ပြောပါတယ်။

WAG မြန်မာအလုပ်သမာ ကူညီစောင့်ရှောက်ရေးအဖွဲ့ တာဝန်ခံ ကိုမုန်တိုင်းကလည်း တရားစွဲဆိုနိုင်တဲ့ပုံစံကို အခုလို့ပြောပြပါတယ်။

“နှစ်နှစ်မပြည့်ဘဲ အလုပ်ကနေထွက်မယ်ဆိုရင်တော့ ဒါအလုပ်သမားရဲ့အပြစ်။ နှစ်နှစ်မပြည့်ဘဲ ရက်ပိုင်း၊ လပိုင်းလေးပဲရောက်လာပြီး ထွက်ပြေးတာတို့ အလုပ်မရတာတို့မှန်ကန်တယ်ဆိုရင် အလုပ်သမားတွေ အကုန်စုရမယ်။ အယောက်နှစ်ဆယ်ရှိရင် နှစ်ဆယ်၊ သုံးဆယ်ရှိရင် သုံးဆယ် စုပြီးတော့ သက်ဆိုင်ရာ နယ်မြေခံ လူဝင်မှုကြီးကြပ်ရေးရုံးမှာသွားတိုင်ရင် ဒီသူဌေးက လိမ်လည်မှုနဲ့ အလုပ်သမားတွေ အကုန်လုံး ကို စာချုပ်အတိုင်းလျော်ပေးရပါတယ်” လို့ ပြောပါတယ်။

ထိုင်းနိုင်ငံမှာ ၂၀၂၄ ခုနှစ်အတွင်း မြန်မာအလုပ်သမား တရားဝင် ဝင်ရောက်လာသူ ၂.၅ သန်းကျော်ရှိပါတယ်။ ဒါပေမဲ့ အထောက်အထားမဲ့အလုပ်သမားတွေကိုပါထဲ့ပေါင်းရင် စုစုပေါင်း မြန်မာအလုပ်သမား ငါးသန်းကျော်ရှိနေတယ်လို့ အလုပ်သမားအရေး ဆောင်ရွက်သူတွေက ခန်မှန်းထားကြပါတယ်။

၂၀၂၄ ခုနှစ် ဩဂုတ်လမှာ အလုပ်ရှာဖွေရေးအေဂျင်စီ ၅၇၂ ခုရှိတယ်လို့ စစ်ကောင်စီရဲ့ အလုပ်သမားညွှန် ကြားရေးဝန်ကြီးဌာနက ထုတ်ပြန်ထားပါတယ်။ တနှစ်အတွင်း ပြည်ပ အလုပ် သမားအေဂျင်စီ ၅၀၀ နီးပါးတိုးလာတာ ဖြစ်ပါတယ်။

စစ်ကောင်စီက စက်တင်ဘာလအတွင်းမှာ ပြည်ပအလုပ်အကိုင်ဝန်ဆောင်မှုပေးတဲ့အေဂျင်စီ ၈၁ ခုကိုလဲ အရေးယူခဲ့ပါတယ်။ အရေးယူရတဲ့ အကြောင်းအရင်းကတော့ စစ်ကောင်စီအလုပ်သမားဝန် ကြီး ဌာနအနေနဲ့ မိသားစုပို့ငွေ သတ်မှတ်ရာခိုင်နှုန်းပြည့်မီအောင် ပေးပို့နိုင်ခြင်းမရှိတဲ့အတွက် ပိတ်သိမ်းရ ခြင်းဖြစ်တယ်လို့ ဖော်ပြထားပါတယ်။

စစ်ကောင်စီ အလုပ်သမားဝန်ကြီးဌာနက ဒီနှစ် ပထမ သုံးလအတွင်း ပြည်ပရောက်အလုပ်သမားတွေရဲ့ မိသားစုဆီ လွှဲပို့ငွေအထောက်အထားတွေကို လာရောက်တင်ပြဖို့ အေဂျင်စီတွေကို ညွှန်ကြားထားပါတယ်။ ပြည်ပရောက်အလုပ်သမားတွေကိုလည်း လုပ်ခလစာ ၂၅ ရာခိုင်နှုန်းကို ဘဏ်တွေကနေတဆင့် တလတကြိမ်၊ ဒါမှမဟုတ် အများဆုံး သုံးလတကြိမ် မိသားစု ဝင်တွေဆီလွှဲပေးရမယ်လို့ စက်တင်ဘာလ ၆ ရက်နေ့က ထုတ်ပြန်ထားပါသေးတယ်။ မလိုက်နာရင် နိုင်ငံကူးလက်မှတ်သက်တမ်းတိုးမပေးဘဲ ပြည်ပထွက်ခွင့်ပိတ်မယ်လို့ ဆိုပါတယ်။

မြန်မာနိုင်ငံသားတွေအနေနဲ့ ပြည်ပထွက်မှုနှုန်းကလဲ အဆမတန်မြင့်တက်လာတဲ့အကြောင်းရင်းနဲ့ပတ်သက်ပြီး “အရင်ကဆို မိဘတွေက သားသမီးတွေကို နိုင်ငံခြားမသွားစေချင်ဘူး။ အခုက သူတို့ကိုယ်တိုင်က တွန်းအားပေးတယ်။ ဘာဖြစ်လို့လဲဆိုတော့ အလုပ်လက်မဲ့နဲ့ အလုပ်အကိုင်ရှားပါမှု၊ နေ့စားလုပ်အား ခနည်းမှုက အဓိက ပြဿနာမဟုတ်ဘူး။ အခုကျတော့ နိုင်ငံရေးအရဖမ်းတယ်၊ ဆီးတယ်၊ ထောင်ချတယ်။ ဒါတွေဟာ နိုင်ငံခြားကိုသွားလုပ်ဖို့ မိဘတွေရဲ့ တွန်းအားတွေဖြစ်တယ်” ထိုင်းနိုင်ငံအခြစိုက် ပညာရေးနဲ့ ဖွံ့ဖြိုးတိုးတက်ရေး ဖောင်းဒေးရှင်း FED အမှုဆောင် ဒါရိုက်တာ ဦးထူးချစ်က Myanmar Labor News ( LMN ) နဲ့အင်တာဗျူးမှာပြောပါတယ်။

နိုင်ငံရေးပဋိပက္ခနဲ့ နေရာအနှံ့မှာဖြစ်တဲ့စစ်ပွဲတွေကြောင့် အလုပ်လက်မဲ့တိုးလာပြီး လူငယ်တွေကို စစ်မှုထမ်းဆင့်ခေါ်မှုတွေရှိနေတဲ့တိုင်းပြည်ကနေ အပြင်ထွက်ပြီး အလုပ်လုပ်ကိုင်သူတွေ များလာတာနဲ့အတူ လိမ်လည်ကြတဲ့ အလုပ်သမားအေဂျင်စီတွေလဲ ပေါများလို့ လာခဲ့ရာ အလုပ်သမားတွေမှာ “ကျားကြောက်လို့ ရှင်ကြီးကိုး၊ ရှင်ကြီး ကျားထက်ဆိုး” ကိန်းကို ဆိုက်ရောက်လို့ လာနေပါတယ်။

“ တယောက် တယောက်ကို သိန်းရှစ်ဆယ်၊ သိန်းကိုးဆယ်၊ သိန်းတရာတွေ ကုန်ကျခံပြီးတော့ ထိုင်းမှာ မှန်မှန်ကန်ကန် အလုပ်ရှိသလားဆိုပြီးတော့ တက်လာကြတယ်။ တက်လာကြတော့ အလုပ်က လုံးဝမရှိဘူး၊ မမှန်မကန် အေဂျင်စီတွေပဲတွေ့ရတယ်။ လက်ရှိသံရုံးကလည်း အေဂျင်စီတွေကို ဖိအားပေးတာ မတွေ့ရဘူး။ မမှန်မကန်တဲ့ အေဂျင်စီတွေကိုပဲ Free လွှတ်ပေးထားတာကို တွေ့ရတယ်ခင်ဗျ” လို့ WAG မြန်မာအလုပ်သမား ကူညီစောင့် ရှောက်ရေးအဖွဲ့ တာဝန်ခံ ကိုမုန်တိုင်းက ပြောပါတယ်။

MOU အလုပ်သမားတွေရဲ့ ပြဿနာတွေကို မြန်မာနိုင်ငံ သံရုံးဘက်က ထိရောက်တဲ့ ကူညီဆောင်ရွက်မှု မပေးနိုင်တဲ့အပြင် မမှန်ကန်တဲ့ အလုပ်အကိုင်အကိုင်ရှာဖွေရေး အေဂျင်စီတွေကိုပါ အရေးယူဆောင်ရွက် တာမျိုးမရှိပါဘူး။

“၂၀၂၃ ဇန်နဝါရီလက စပြီးတော့ အေဂျင်စီတွေက တောက်လျှောက်ကို လိမ်လာကြတယ်။ ဘယ်လိုလိမ်လဲဆိုရင် ဥပမာ Zin Tun Win ( ဇင်ထွန်းဝင်း ) ကုမ္ပဏီဆိုရင် ပိုက်ရုံ၊ မီးသီးရုံမှာ အလုပ်ရမယ်ဆိုပြီးတော့ စာချုပ်ချုပ်လိုပ်တယ်။ ဒါပေမယ့် အဲ့ဒီကုမ္ပဏီက လက်ရှိထိုင်းမှာ လုံးဝမရှိဘူး။ ထိုင်းထဲက ငါးသန်းသူဌေး(ထိုင်းနိုင်ငံမှာ တရားဝင် အခွန်ဆောင်ပြီး လူခေါ်ဗီဇာ ဖွင့်ထားတဲ့ ကုမ္ပဏီ)နဲ့ သူတို့က ချိတ်ဆက်တယ် ၊ ငါးသန်းသူဌေးကလည်း ဒီကအလုပ်တခုကို ပြပေးရတယ်။ ဒါပေမယ့် အလုပ်က စာရွက်ပေါ်မှာပဲ ပြပေးတာ။ မြေပြင်ပေါ်ကို ဆင်းမကြည့်တာ ၊ဒါက သံရုံးရဲ့ လုံးဝပေါ့ဆမှုတွေပေါ့၊ သူတို့က မစိစစ်ဘဲ တံဆိပ်တုံးထုပေးလိုက်တယ်၊ သံရုံးဖက်ကိုကြည့်ရင် သံရုံက လာဘ်ပေး လာဘ် ယူလုပ်ထားတဲ့ အနေအထား တွေ တွေ့ရတယ်” လို့ ကိုမုန်တိုင်းက ပြောပါတယ်။

MOU အလုပ်သမားတွေက ထိုင်းကိုရောက်လာတဲ့အခါမှာတော့ အေဂျင်စီတွေပြောသလို အလုပ်တွေက တကယ်မရှိဘဲဖြစ်နေပါတယ်။ အလုပ်ခန့်မယ့် ထိုင်းကုမ္ပဏီ လူမခေါ်နိုင်တော့တာ၊ လူမွဲစာရင်းကြေညာခံရတာဆိုတဲ့ အကြောင်းပြချက်တွေပေးပြီး ထွက်ပြေးတိမ်းရှောင်သွားကြပါတယ်။

အခုလို အေဂျင်စီတွေနဲ့ပွဲစားတွေရဲ့လိမ်လည်မှု ကိုယ်တိုင်ကိုယ်ကျ ခံစားခဲ့ရတဲ့ ကိုအောင်အောင်ကတော့ တရားမျှတရေး လိုလားနေပါတယ်။

“ကိုယ်က ဥပဒေကိုနား မလည်ခဲ့တော့ အသုံးချခံဖြစ်ခဲ့ရတယ်။ ဒါ့ကြောင့် ဒါတွေကိုရှင်းရှင်းလင်းလင်းဖြစ်အောင် လုပ်ပေးသင့်တယ်၊ ပြီးတော့ ဒီထိုင်းနိုင်ငံမှာရှိတဲ့ ရွှေ့ပြောင်းအလုပ်သမားတွေရဲ့ပြဿနာတွေ၊ ဒီဒုက္ခတွေကို ကြားကနေ အပြည့်အဝမကူညီနိုင်တောင် အသံထွက်ပေးရမယ့်အပိုင်းတွေ အများကြီးရှိ တယ်၊ ဒါကြောင့် အလုပ်သမားအရေးကို အသံများများထွက်ပေးဖို့ ထိထိရောက်ရောက် လက်တွေ့ ကွင်းဆင်းပြီးလုပ်ကိုင် ပေးဖို့အတွက် အကြံပြုတောင်းဆိုချင်တယ်”

မြန်မာလုပ်သားတွေအတွက် စစ်ကောင်စီသံရုံးက တာဝန်မယူပေးလို့ အားကိုးရာမဲ့ဖြစ်နေသူတွေအတွက် အမျိုးသားညီညွတ်ရေးအစိုးရအနေနဲ့ အလုပ်သမားအရေးအတွက် ကူညီလုပ်ဆောင်ပေးဖို့လိုလားတယ်လို့ သူကပြောပါတယ်။

02/10/2024

KIA က ဖားကန့်သတင်းထောက်နှစ်ဦးကို ဖမ်းဆီးထိန်းသိမ်းထား။

အောက်တိုဘာ ၊ ၂ ၊၂၀၂၄။

ကချင်လွတ်မြောက်ရေးတပ်မတော် KIA က ဖားကန့်သတင်းထောက် ကိုတာလင်းမောင်နဲ့ ၊ ကိုနောင်ရိုးကို စက်တင်ဘာလ ၂၉ ရက်နေ့မှာ ဖမ်းဆီးသွားတယ်လို့ သူတို့နှစ်ဦးနဲ့နီးစပ်သူ အဖွဲ့ဝင်တဦးက Manau Voice ကို ပြောပါတယ်။

"ကိုတာကိုက မနက်မှာ အိမ်ကိုလာရှာတယ်၊ သူနဲ့တော့ မတွေ့သွားဘူး၊ နေ့လည် ၁၂ နာရီလောက်မှ သူ့အသိတယောက်ကို တဖက်လှည့်နဲ့ ဖုန်းဆက်ခိုင်းပြီး ဆိုင်တဆိုင်မှာချိန်းတယ်၊ အဲ့ချိန်ကတည်းက ပြန်ရောက်မလာတော့ဘူး"
လို့ သူကပြောပါတယ်။

"ကိုနောင်ရိုးကတော့ ကိုတာဖမ်းခံရတဲ့အတွက် သတင်းသမားတွေကို ဖမ်းခွင့်မရှိဘူး ၊ အဲ့လိုသာဖမ်းရင် သူလဲ ဒီသတင်းတွေတင်ရလိမ့်မယ်လို့ပြောလို့ သူ့ကိုပါ ည ၈ နာရီလောက်မှာလာဖမ်းသွားတယ်" လို့ သူက ဆက်ပြောပါတယ်။

ဖားကန့်အလွတ်တန်းသတင်းထောက်ဖြစ်တဲ့ ကိုတာလင်းမောင်ဟာ ပြန်ကြားရေးနှင် ဆက်သွယ်ရေးဝန်ကြီးဌာန (ပြန်/ဆက်) မှ CDM ဝန်ထမ်းတဦးဖြစ်ပြီး ဖားကန့် သပိတ်ကောက်မတီအဖွဲ့ဝင်တဦးလဲဖြစ်ပါတယ်။ အဲ့ဒီအပြင် နိုင်ငံရေးအကျဉ်းသားတွေကို တဖက်တလမ်းကနေ ကူညီဆောင်ရွက်နေသူဖြစ်ပြီး ကိုနောင်ရိုးနဲ့အတူ နိုင်ငံရေးအကျဉ်းသားများ ကူညီစောင့်ရှောက်ရေးအသင်း ( AAPP ) နဲ့ လက်တွဲလုပ်ဆောင်နေသူတဦးဖြစ်ပါတယ်။

အဲ့ဒီအပြင် ကိုတာလင်းမောင်ဟာ ဖားကန့်ရဲ့ စစ်ရေးသတင်း၊ မြေပြင်သတင်းတွေနဲ့ ပြည်သူတွေအကျိုးပြုသတင်းမှန်တွေတင်ဆက်မှုကြောင့် စက်တင်ဘာလ ၈ ရက် ၊၂၀၂၃ ခုနှစ်မှာ ကားနဲ့အနောက်မှလိုက်တိုက်ခံရပြီး အသက်အန္တရာယ်မှ လွတ်မြောက်ခဲ့သူလဲ ဖြစ်ပါတယ်။

ကိုနောင်ရိုးဟာလဲ စစ်တပ်ကအာဏာသိမ်းပြီးတဲ့နောက် မတ်လ ၉ ရက်နေ့ ၂၀၂၁ ခုနှစ်မှာ ဆန္ဒပြသတင်းတွေ ၊ သတင်းဓါတ်ပုံတွေရိုက်ကူးခဲ့တာကြောင့် စစ်ကောင်စီက တနှစ်နဲ့ ခုနှစ်လခန့်ဖမ်းဆီးခံခဲ့ရသူပဲဖြစ်ပါတယ်။

"ဒီကိစ္စနဲ့ပတ်သက်ပြီး KIO ဖက်ကိုအကြောင်းကြားထားပေမယ့် သူတို့အနေနဲ့ မကြားမိဘူး ၊ စုံးစမ်းပြီးပြန်ဆက်သွယ်ပေးမယ်ပြောပေမယ့် ဒီနေ့ထိ အကြောင်းမပြန်လာသေးဘူး" လို့ ဖားကန့် သပိတ်ကော်မတီအဖွဲ့ဝင်တဦးက Manau Voice ကို ပြောပါတယ်။

အခုလို ပြည်သူအကျိုးပြုလုပ်ငန်းတွေလုပ်ဆောင်နေတဲ့ သတင်သမားနှစ်ဦးဖမ်းဆီးခံရတာကြောင့် အဖွဲ့ဝင်တွေအနေနဲ့ အသက်အန္တရာယ်ရှိနေမှာကို လွန်စွာစိုးရိမ်နေတယ်လို့လဲ သူက ဆက်ပြောပါတယ်။

မြန်မာနိုင်ငံမှာ စစ်တပ်ကအာဏာသိမ်းပြီးနောက်ပိုင်း သတင်းမီဒီယာသမားတွေကို ပစ်မှတ်ထား ဖမ်းဆီးမှုတွေလုပ်ဆောင်ခဲ့တာကြောင့် သတင်းသမားအခွင့်အရေးတွေ ဆုံးရှုံးနစ်နာနေရပါတယ်။

စစ်အာဏာသိမ်းတဲ့ သုံးနှစ်ကျော်ကာလအတွင်းမှာ စစ်တပ်ကဖမ်းဆီးတဲ့သတင်းသမား ၂၀၀ ကျော်ရှိခဲ့ပြီး ပြန်လည်လွတ်မြောက်လာသူတွေရှိသလို ဆက်လက်ဖမ်းဆီးခံထားရသူများစွာလဲ ရှိနေပါသေးတယ်။

သတင်း - နွေဦး
စာမူတည်းဖြတ် - ဒီပါ

#ဖားကန့်
#သတင်းသမားဖမ်းဆီးခံရ
#ကချင်လွတ်မြောက်ရေးတပ်မတော်

26/09/2024

စစ်ကောင်စီမှ တိုင်းရင်းသားလက်နက်ကိုင်များနှင့် PDF များအား ဆွေးနွေးရန်ဖိတ်ခေါ်မှုအပေါ် ဗိုလ်ချုပ်ဂွမ်မော်မှ မှတ်ချက်ပြု။

စက်တင်ဘာ ၊ ၂၇ ၊ ၂၀၂၄ ။

စစ်ကောင်စီက ၂၀၂၁ ခုနှစ် ဖေဖော်ဝါရီလ ၁ ရက်နေ့မှာ အရပ်သားအစိုးရကိုအာဏာသိမ်းပြီး နိုင်ငံတော်အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်နဲ့ သမ္မတဟောင်းတို့ကို ဖမ်းဆီးအကျဉ်းချခဲ့ကာ နိုင်ငံရေးပါတီတွေကို ဖျက်သိမ်းအရေးယူခဲ့တာကြောင့် ပြည်သူတွေက လက်နက်ကိုင်လမ်းစဉ်ကို ရွေးချယ်ခဲ့ကြပါတယ်။

အဲ့ဒီနောက် ဒီကနေ့ စက်တင်ဘာ ၂၆ ၊ ၂၀၂၄ ခုနှစ်ရက်စွဲနဲ့ " နိုင်ငံရေးပြဿနာကို နိုင်ငံရေးနဲ့မဖြေရှင်းဘဲ လက်နက်စွဲကိုင်အကြမ်းဖက်နည်းလမ်းကိုရွေးချယ်ခဲ့ကြတဲ့ အဖွဲ့အစည်း" လို့ဖော်ပြခဲ့ပြီး ၂၀၂၅ မှာ ရွေးကောက်ပွဲလုပ်နိုင်ဖို့ကြိုးပမ်းနေတဲ့ စစ်ကောင်စီက တိုင်းရင်းသားလက်နက်ကိုင်တွေနဲ့ PDF တွေကို အကြမ်းဖက်အဖွဲ့အစည်းလို့ထပ်မံသုံးနှုန်းကာ နိုင်ငံရေးလမ်းကြောင်းနဲ့ ဆွေးနွေးအဖြေရှာဖို့ ထုတ်ဖော်ကမ်းလှမ်းခဲ့တဲ့အပေါ် ကချင်လွတ်လပ်ရေးအဖွဲ့ KIO ဗိုလ်ချုပ်ဂွမ်မော်က မှတ်ချက်စာတစောင်ကို လူမှုကွန်ယက်မှာ ဖော်ပြလာပါတယ်။

ဗိုလ်ချုပ် ဂွမ်မော်ရဲ့ မှတ်ချက်စာမှာ

" ဘာကြောင့် အာဏာလွှဲပြောင်းယူလိုက်ရတာလဲဆိုတာကို ထုချေလွှာတင်ပြ" နဲ့ "သန်းခေါင်စာရင်းကောက်မည်ဖြစ်ကြောင်းကြေငြာသော ထုတ်ပြန်ချက်..ဖြစ်နေ။

ခေါ်ပုံ ခေါ်နည်း နဲနဲများ လိုနေသလား....လို့ပါ" လို့ ရေးသားထားပါတယ်။

စစ်ကောင်စီက မြန်မာနိုင်ငံအနှံ့ ထိန်းချုပ်ဧရိယာတွေကို လက်လွှတ်ဆုံးရှုံးနေရတဲ့အခြေအနေအတွင်း ၂၀၂၅ ခုနှစ်မှာ ရွေးကောက်ပွဲလုပ်နိုင်ဖို့ သန်းခေါင်စာရင်းကို အောက်တိုဘာလ ၁ ရက် ၊ ၂၀၂၄ ခုနှစ်မှာ စတင်ကောက်ယူနိုင်ရေး ကြိုးပမ်းနေတာပဲဖြစ်ပါတယ်။

သတင်း - နွေဦး

သတင်းဓါတ်ပုံ - စစ်ကောင်စီက နိုင်ငံရေးလမ်းကြောင်းနဲ့ ဆွေးနွေးအဖြေရှာဖို့ ထုတ်ဖော်ကမ်းလှမ်းခဲ့တဲ့အပေါ် ဗိုလ်ချုပ်ဂွမ်မော်မှ မှတ်ချက်ပြုသည့်စာ။

#ဗိုလ်ချုပ်ဂွမ်မော် #ရွေးကောက်ပွဲ

12/09/2024

နွေဦးတော်လှန်ရေးထဲက သက်တန့်ရောင်နှလုံးသား
…………………………………………………….
ဆောင်းပါး - နွေဦး

သေနတ်သံကြားလိုက်ပြီး တဒင်္ဂအတွင်းမှာပဲ ကြယ်စင် ကတ္တရာလမ်းမပေါ်ကို တုံ့ကနဲ့ လဲကျသွားပါတယ်။ အဲ့ဒီနောက် သူ့ရဲ့ဦးခေါင်းနဲ့ လမ်းမပေါ်မှာ နီစွေးစွေးသွေးတွေက စိုရွှဲလို့လာပါတယ်။ ဘေးပတ်ဝန်း ကျင်မှာကတော့ သေနတ်သံတွေ၊ အထိတ်တလန့်အော်ဟစ်သံ၊ ပြေးလွှားသံတွေနဲ့ ရုတ်ရုတ်သဲသဲ ဗြောင်းဆန်အောင် ဆူညံလို့နေပါတော့တယ်။

“ နောက်ပြန်အလှည့် ခြေခေါက်သွားလို့ လဲကျသွားပြီး ခေါင်းကွဲလို့သွေးတွေထွက်လာတာလို့ထင်တာ။ ...သေနတ်ကျည်က ခေါင်းကိုမှန်သွားတယ်။ အဲ့လိုဖြစ်တဲ့အချိန်မှာ လူကကြောင်သွားတယ်။ ပြီးမှ ကိုယ်လဲ လွတ်ရာကို ပြေးရတယ်” လို့ ကြယ်စင်ရဲ့ သူငယ်ချင်းဖြစ်သူ ရဲဘော် သောက်ဇန် ( ခ ) ကိုသျှိုင်းရဲနိုင်က သူကြုံတွေ့ခဲ့ရတဲ့အဖြစ်အပျက်ကို ပြန်ပြောပြပါတယ်။

အရင်းနှီးဆုံးသူငယ်ချင်းက အခုလိုကိုယ့်မျက်စိရှေ့မှောက်မှာပဲ ကျဆုံးသွားတဲ့အကြောင်း ပြန်ပြောပြနေတဲ့ ရဲဘော်ဇန်ရဲ့ မျက်ဝန်းထဲမှာတော့ မျက်ရည်စတချို့ ရစ်ဝဲလို့နေပြီး အသံကလည်း တုန်ခါနေပါတယ်။ တချက်ချက်ပေါ်လာတဲ့ အသက်ကို ခပ်ပြင်းပြင်းရှုသံက ရင်ထဲကနာကြင်မှုကို ထိန်းချုပ်ထားနေခဲ့ပုံပါပဲ။

မတ်လ ၃ ရက် ၂၀၂၁ ခုနှစ် မန္တလေးမြို့ ၈၄ လမ်းနဲ့ လမ်း ၃၀ ကြားမှာ စစ်အာဏာသိမ်းမှုဆန့်ကျင်ရေး အကြမ်းမဖက် ဆန္ဒပြနေတုံးမှာ စစ်ကောင်စီတပ်ကပစ်လွှတ်လိုက်တဲ့ ကျည်ဆန်အစစ်ကြောင့်
ရဲဘော်ဇန်ရဲ့ အရင်းနှီးဆုံးသူငယ်ချင်းဖြစ်တဲ့ ကြယ်စင် ( ခ ) ကျားရှီဟာ သေဆုံးခဲ့ရပါတယ်။ သူ့အသက်က ၁၉ နှစ်ပဲရှိသေးတာပါ။

ဒါပေမဲ့ ကြယ်စင့်ကိုသတ်တဲ့သူဟာ ရဲဘော်ဇန်ပါဆိုပြီး စစ်ကောင်စီလော်ဘီတွေက အွန်လိုင်းမှာ ဖြန့်ဝေပါတယ်။

" ကြယ်စင့်ကိုသတ်မှုနဲ့ ကျွန်တော့်ကိုဖမ်းဖို့ စစ်ကောင်စီကလုပ်ခဲ့တယ်။ ကျွန်တော် အဲ့ချိန်တုန်းက သေနတ်ဆိုတာ မမြင်ဖူးခဲ့ပါဘူး၊ တော်လှန်ရေးထဲရောက်မှ မြင်ဖူးတာပါ ” လို့ ရဲဘော်ဇန်က ပြောပါတယ်။

“အဲ့သတင်းကို သူငယ်ချင်းတွေကပြတော့ ငါမလုပ်ဘူးလေ၊ မင်းတို့လဲ ငါ့ဘေးမှာရှိနေတာပဲ မယုံဘူးလား၊ ငါမသတ်ဘူးနော်ဆိုပြီး အဲ့တိုင်းငြင်းပဲငြင်းနေတာ၊ ညလဲ အိပ်မပျော်ဘူး၊ စားလို့လဲ မဝင်ဘူး၊" လို့ သူက ဆက်ပြောပါတယ်။

LGBT တဦးဖြစ်တဲ့ ရဲဘော်ဇန်ဟာ အခုဆို အသက် ၂၇ နှစ်ရှိပါပြီ။

ပတ်ဝန်းကျင်မှာ ခွဲခြားဆက်ဆံမှုတွေကြောင့် ၂၀၁၇ ခုနှစ်ကတည်းက အိမ်ကနေ ထွက်လာပြီး တကိုယ်ရေရပ်တည်ခဲ့တယ်လို့ဆိုပါတယ်။

“ ငယ်တုန်းက တိုင်မှာကြိုးတုတ်ပြီး ဝိုင်ယာကြိုးနဲ့ အဖေကရိုက်တာကို ခံခဲ့ရတယ်၊ မင်းယောက်ျားမဟုတ်ဘူးလားဆိုပြီးရိုက်တယ်၊ ကျွန်တော့်ကိုရိုက်တယ်ဆိုလဲ ကြိုက်သလောက်ရိုက်၊ အဲ့ဒီကြိုးကြီးပြတ်သွားတဲ့အထိရိုက်၊ ဒါမှမဟုတ် ကျွန်တော့ ကျောက အရိုးတွေပေါ်သွားတဲ့ အထိရိုက် ကျွန်တော်က LGBT ပဲ၊ ကျွန်တော်က ဘယ်တော့မှ‌ယောက်ျားဖြစ်လာမှာ မဟုတ်ဘူး” လို့ သူက ပြောပါတယ်။

“ အဖေ ရိုက်တော့ ကျွန်တော်က ကိုယ့်ကိုကိုယ် ရပ်တည်လာနိုင်တယ်။ ဖေဖေ့ကိုတော့ကျေးဇူးတင်ပါတယ်၊ ဒါပေမယ့် ဖေဖေ့ဖက်က အမျိုးတွေကိုတော့ မကြိုက်ဘူး၊ အဲ့ဒီပါတ်ဝန်းကျင်ကိုလဲ မကြိုက်ဘူး” လို့ ဆက်ပြောပါတယ်။

အာဏာမသိမ်းခင်က အဆောင်မှာနေပြီး အလုပ်သွား၊ တခါတလေသူငယ်ချင်းတွေနဲ့လည်ပတ်တာမျိုးနဲ့ ဖြတ်သန်းခဲ့တာပါ။ ကြယ်စင့်ကိုသတ်ပါတယ်ဆိုပြီး ဖမ်းဝရမ်းထုတ်ခံရတဲ့နောက် မန္တလေးမှာဆက်နေလို့မဖြစ်တော့တာကြောင့် ကရင်ပြည်နယ်တွင်းက ကရင်အမျိုးသားအစည်းအရုံး တပ်မဟာ ( ၆ )ထိန်းချုပ်ထားရာ လေးကေ့ကော်ထဲကို စက်တင်ဘာလ ၇ ရက်နေ့ ၂၀၂၁ ခုနှစ်မှာ ရောက်ရှိခဲ့ပါတယ်။

“လေးကေ့ကော်ကိုရောက်တုန်းက လေးကေ့ကော်မှန်းမသိဘူး၊ ရောက်ပြီးနှစ်ရက်ကြာမှာ အိမ်နဲ့ဆက်သွယ်ရတော့ ၈ ရက်နေ့ညမှာ မြို့နယ်မှုးရဲ့သမီး မုဒိန်းကျင့်ခံရတယ်လို့ အမေကပြောတယ်။ အဲ့တာကို ကျွန်တော်က ကျင့်ပါတယ် ဆိုပြီးတော့ တရားထပ်စွဲတယ်၊ မြို့နယ်မှုသမီးကို ကျွန်တော် မြင်လည်း မမြင်ဖူးခဲ့ဘူး၊ ပြီးတော့ကျွန်တော်က LGBT လေ၊ ကျွန်တော်မိန်းကလေးတွေကို စိတ်လည်းမဝင်စားဘူး၊ ကြိုက်လဲမကြိုက်ဘူး၊ အဲ့တာ အိမ်ကိုလာရှာကြတယ်လို့ ပြောတယ်” လို့ပြောပါတယ်။

သူဟာ လေးကေ့ကော်နယ်ထဲမှာပဲ စစ်သင်တန်းတက်ခွင့်ရရှိခဲ့ပါတယ်။ စစ်သင်တန်းတက်တဲ့အထဲ သူအပါအဝင် LGBT ကိုးဦးရှိခဲ့ပါတယ်။

“သင်တန်းဆရာတွေက တအားချစ်စရာကောင်းတာ၊ ကျွန်တော်တို့အဖွဲ့လေးက ထူးခြားနေတာ၊ အဲ့တော့ ကျွန်တော်တို့အဖွဲ့လေးကို ရိမ်းဘိုး ( သက်တန့် ) တပ်စုလို့တောင်နာမည်ပေးထားသေးတာ၊ စာသင်ကြတဲ့အချိန် တခါတလေဆို ဆရာတို့က တကယ်ခြောက်နေကြတာလား ဆိုပြီး စတတ်တယ်၊ ဒီ ၁၇/၂၁ ရဲ့ သင်တန်းသား နှစ်ရာကျော်ထဲမှာ ကျွန်တော်တို့ ကိုးယောက်က နာမည်ကြီးပဲ” လို့ သူက ဆိုပါတယ်။

သူတို့အပတ်စဉ်အတွက် စစ်သင်တန်းပို့ချသူတွေထဲက နိုင်ငံတော်အတိုင်ပင်ခံပုဂ္ဂလ်‌ဟောင်း ဒေါ်အောင်ဆန်းစု ကြည်ရဲ့ PSO (ကိုယ်ရေးအရာရှိ )၊ CDM စစ်ဗိုလ်ကြီးတွေ၊ အမြှောက်တပ်က ဗိုလ်တွေ၊ PDF ထဲကဗိုလ်တွေ၊ KNU ထဲက ဆရာတွေလည်းပါဝင်ခဲ့ပါတယ်။

စစ်သင်တန်းဆင်းပြီးတဲ့နောက်ပိုင်း တာဝန်မှုးရာထူးနဲ့ တိုက်ပွဲတွေဝင်ခဲ့ပါတယ်။ ပထမဆုံးတိုက်ပွဲကတော့ ခီးမယ်ဝါးခီးတိုက်ပွဲပါ။

“ကျွန်တော်ရှေ့တန်းကို ပထမဆုံးစရောက်ပြီး ဗျူဟာကုန်းကိုထောက်လှမ်းတဲ့ညမှာပဲ ကျွန်တော်တို့နေရာရဲ့ မီတာ ၃၀၀ ၀န်းကျင်မှာ လေယာဉ်နဲ့ဗုံးလာကြဲလို့ အသက်ထွက်ပြီမှတ်တာ၊ သေနတ်တွေရော လက်တွေရောတုန်တာ ၊ တကိုယ်လုံးကိုအေးခဲလာတာပဲ။ ပထမဆုံးရှေ့တန်းကိုလွှတ်တဲ့နေ့၊ ပထမဆုံးသေနတ်ကိုင်တဲ့နေ့မှာပဲ ခုလိုလေယာဉ် ဗုံးကြဲခံရတာဆိုတော့ အဲ့ညမှာပဲ တော်ပြီ ပြန်တော့မယ်၊ ငါသေတော့မယ်၊ ငါသေပြီလားမသိဘူး ဆိုပြီး တညလုံး တတွတ်တွတ်နဲ့ပြောသူတာပေါ့” လို့ ရှက်ပြုံးနဲ့ ပြောပါတယ်။

အခုအချိန်အထိဆိုရင် သူ့အနေနဲ့ စစ်ကောင်စီနဲ့တိုက်တဲ့ တိုက်ပွဲပေါင်း ၂၀ ကျော်မှာ ပါဝင်ဆင်နွှဲခဲ့ပြီးဖြစ်တယ်လို့ဆိုပါတယ်။

“ပစ်ရဲတယ်၊ တိုက်ရဲတယ်၊ သေရဲတယ်ဆိုရင် သွား ၊ ရတယ် ၊ လိုအပ်ရင် လိုအပ်သလို တိုက်ရတာပဲ။ ကျွန်တော်တို့မှာက ဗျူဟာဆိုတာရှိတယ်၊ အပြင်လောကသားအနေနဲ့ကြည့်ရင်တော့ ငါကအခြောက်၊ ငါကမိန်းကလေးမို့ စစ်မတိုက်ရဘူလို့ ထင်ကောင်းထင်နိုင်တယ်၊ တကယ်တော့ စစ်တိုက်တယ်ဆိုတာ အကုန်လုံးရှေ့တန်းထွက်လို့မရ ဘူး။ နောက်ကနေပြီးတော့ ထောက်ပို့အနေနဲ့ရပ်တည်နေတာမျိုးလဲရှိရမယ်” လို့ သူက ပြောပါတယ်။

တောထဲမှာနေရင်းပဲ သူ့ထက် သုံးနှစ်ငယ်တဲ့ ရဲဘော်တဦးနဲ့ ချစ်မေတ္တာသက်ဝင်ပြီး တောထဲက ပထမဆုံး လိင်တူလက်ထပ်ပွဲလေးဖြစ်လာခဲ့ပါတယ်။

“ကျွန်တော့်ကောင်းလေးရဲ့မိဘဖက်က မင်္ဂလာဆောင်တဲ့ကုန်ကျငွေကို တာဝန်ယူပေးတယ်၊ ကျွန်တော့်ချစ်သူကလည်း တာဝန်ယူပေးတော့ မင်္ဂလာဆောင်လိုက်တယ်၊ မင်္ဂလာဆောင်တော့ အကုန်လုံးကိုဖိတ်တယ်။...ကျွန်တော်တို့ကို လက်ခံတဲ့ အကြီးပိုင်းတွေထဲက မင်္ဂလာပွဲကို တက်တယ်ခင်ဗျ၊" လို့ သူက ပြောပါတယ်။

ဇူလိုင်လ ၁၆ ရက်နေ့ ၂၀၂၃ ခုနှစ်က ကရင်ပြည်နယ်တနေရာမှာ ကျင်းပခဲ့တဲ့ မင်္ဂလာဧည့်ခံပွဲမှာ ဆိတ်သားချက်၊ အစိမ်းကြော်၊ ငရုပ်သီးကြော်၊ အသီးအနှံ၊ ကြာဇံဟင်းခါးနဲ့ ရေခဲမုန့်တွေ ကျွေးမွေးခဲ့ပါတယ်။

အမျိုးသားညီညွတ်ရေးအစိုးရ (NUG) ရဲ့ လူ့အခွင့်အရေးဆိုင်ရာဝန်ကြီးက မင်္ဂလာလက်ဖွဲ့ ငွေများ လက်ဖွဲခဲ့ပြီး မနက် ၈ နာရီကနေ မင်္ဂလာပွဲကိုစတင်ကျင်းပခဲ့တာ ည ၉ နာရီထိအထိ ပွဲဆက်ကြာခဲ့ပါတယ်။

လိင်တူလက်ထပ်ပွဲလေးကို အခုလိုကျင်းပတာ မြန်မာ့အသိုင်းအဝိုင်း မှာ လွယ်ကူနေတာတော့ မဟုတ်ခဲ့ပါဘူး။

သူတို့ချစ်သူနှစ်ဦးရဲ့ ကရင်တိုင်းရင်းသားဝတ်စုံနဲ့ မင်္ဂလာဓါတ်ပုံတချိူ့ လူမှုကွန်ရက်စာမျက်နှာမှာ ပျံ့နှံ့လာခဲ့တဲ့နောက် KNU ဒူးပလာ ယာခရိုင် တာဝန်ရှိသူတဦးက ဇူလိုင်လ ၂၁ ရက်နေ့ ၂၀၂၃ ခုနှစ်ရက်စွဲနဲ့ ကော်သူးလေရာဇဝတ်ဥပဒေနဲ့ ဆန့် ကျင်နေတာဖြစ်တာကြောင့် သူတို့နှစ်ဦးကို အသိပေး အကြောင်းကြားစာပေးပို့တာကလည်း နောက်ဆက်တွဲပျံ့နှံံခဲ့ပါတယ်။

လိင်တူလက်ထပ်မှုကိုထောက်ခံသူတွေနဲ့ ကန့်ကွက်သူတွေအကြား ဝေဖန်ပြောဆိုမှုတွေဖြစ်ခဲ့ပြီးတဲ့နောက် ရဲဘော်ဇန်တို့ချစ်သူနှစ်ဦးကတော့ လုံခြုံရေးစိုးရိမ်မှုဖြစ်ခဲ့တယ်လို့ဆိုပါတယ်။ အဲဒီနောက် NUG အစိုးရက ဝန်ကြီးရဲ့ ညွှန်ကြားရေးစခန်းကို ပြောင်းရွှေ့နေထိုင်ခဲ့ကြပါတယ်။

အခုအချိန်မှာတော့ ရဲဘော်ဇန်တို့နှစ်ဦး မင်္ဂလာနှစ်ပတ်လည်သက်တမ်း တနှစ်ကျော်ရှိလာပြီပဲဖြစ်ပါတယ်။

“သူက သဝန်တအားတိုတယ်၊ တခုက ကျွန်တော်က ဆရာ့ရဲ့ယုံကြည်ရတဲ့သူထဲမှာပါတယ်ဆိုတော့ ကျွန်တော်တာဝန်နဲ့ခရီးထွက်တဲ့အခါ သူကသဝန်တိုတယ်။ ပြီးတော့ တာဝန်ခွဲဝေတဲ့အခါလဲ သူက ကျွန်တော်နဲ့အတူမလုပ်ရရင် မရဘူး၊ ကျွန်တော်နဲ့ပဲ အတူနေချင်တယ်၊ ကျွန်တော်နဲ့ပဲ တာဝန်အတူထမ်းချင်တယ်”လို့ သူက ပြုံးပြီး ပြောပါတယ်။

တော်လှန်ရေးပြီးတဲ့အခါ ဘာလုပ်မလဲလို့မေးတဲ့အခါမှာတော့ “တော်လှန်ရေးပြီးသွားရင်တော့ ကျွန်တော့်ရည်ရွယ်ချက်က ပြန်လည်ထူထောင်ရေးကာလမှာ နိုင်ငံတော်က ကျွန်တော်တို့ကို လိုအပ်သေးတယ်ဆိုရင်တော့ နှစ်ယောက်လုံး တာဝန်ဆက်ပြီးထမ်းဆောင်မယ်ပေါ့။ တကယ်လို့ နိုင်ငံတော်က ရတယ်၊ မင်းတို့ အဆင်ပြေတဲ့ဘဝကိုရွေးချယ်ပါဆိုရင်တော့ ကျွန်တော်တို့နှစ်ယောက်လုံး အေးအေး ချမ်းချမ်းနဲ့ မိသားစုတွေနဲ့အတူ ဘဝလေးကို စိုက်ခင်းလေးတွေစိုက်၊ နွားခြံလေးတွေ ဝက်ခြံလေးတွေနဲ့ နှစ်ယောက် အတူ ဘဝကို အကောင်းဆုံးပဲဖြတ်သန်းတော့မယ်၊ ဒီက ရလာတဲ့အကျိုးအမြတ်ကိုလဲ သုံးပုံ နှစ်ပုံကို မိဘမဲ့ဂေ‌ဟာ တွေ ပျက်ဆီးသွားတဲ့နေရာမျိုးတွေမှာ ပြန်ပြီးတော့ ထောက်ပံ့လှူဒါန်းချင်တယ်၊ ဒါက ကျွန်တော်တို့နှစ်ယောက်လုံး ရဲ့စိတ်ကူးပါ” လို့ပြောပါတယ်။.

Address

Myitkyina
640271

Website

facebook.com

Alerts

Be the first to know and let us send you an email when Manau Voice posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Manau Voice:

Videos

ကချင်ပြည်နယ် ဖားကန့်မြို့ ဆိုင်းတောင်ရပ်ကွက် ( ၄ ) အပေါ်ကို စစ်ကောင်စီက တိုက်လေယာဉ်သုံးပြီး ဗုံးကြဲတိုက်ခိုက်သည့် ဗွီဒီယိုဖိုင်။ စက်တင်ဘာ ၊ ၁၂ ၊ ၂၀၂၄။ #manauvoice #ဖားကန့် #ကချင်ပြည်နယ် #ဗုံးကြဲတိုက်ခိုက် #စစ်လေယာဉ်