14/07/2020
ဇယားထိပ်က ချန်ပီယံဆုအတွက် ရွှေလက်ပိုင်ရှင်များ။
မနှစ်က ဒီစီနီယာ ဂိုးသမားသုံးယောက်လုံး ကျွန်တော်တို့နဲ့အတူ ရှိခဲ့ကြတယ်။ မအောင်မြင်တဲ့ရာသီတစ်ခုကို အတူ ဖြတ်သန်းရင်းနဲ့ပေါ့။ ၂၀၁၈-၁၉ရာသီဟာ ကစားသမားတွေ၊ နည်းပြတွေ အပြောင်းအလဲနဲ့ RM အတွက် မအောင်မြင်ခဲ့ပေမဲ့၊ မနှစ်က RM ဂိုးသမားသုံးယောက်ဟာ ဒီနှစ်မှာတော့ သက်ဆိုင်ရာအသင်းတွေအတွက် အမှတ်ပေးဇယားထိပ်ရပ်တည်မှုနဲ့အတူ လက်စွမ်းပြကြပြီး ချန်ပီယံဆုတံဆိပ်များကို အသီးသီးကိုင်မြောက်ခွင့်ရကြတော့မှာဖြစ်ပါတယ်။ Courtois ဟာ ကျွန်တော်တို့နဲ့အတူ ရုန်းကန်ဖြတ်သန်းနေတာ ကျေနပ်စရာဖြစ်ပြီး၊ ရာသီစက အသင်းကို နှုတ်ဆက်ထွက်ခွာသွားတဲ့ Navas နဲ့ Casilla တို့ရဲ့ အသင်းသစ်တွေမှာ အခြေကျလက်စွမ်းပြမှုတွေက ဝမ်းသာစရာပါပဲ။ RM ဂိုးပေါက်တစ်ခုတည်းမှာ နေရာလုမဲ့အစား ပွဲထွက်တစ်နေရာသေချာတဲ့ အသင်းတွေကို ပြောင်းရွေ့သွားတဲ့ Navas နဲ့ Casilla တို့ကို Madridista Myanmar က အမြဲသတိရနေမှာပါ။
(၁) Keylor Navas
Keylor ကတော့ PSG နဲ့အတူ ပြင်သစ်အမှတ်ပေးဖလား လီဂူးဝမ်း ကို ဆွတ်ခူးခဲ့ပြီးဖြစ်ပါတယ်။ PSGဟာ ပေးဂိုး၂၄ဂိုးနဲ့ ၂၀၁၉-၂၀ လီဂူးဝမ်းအသင်းတွေထဲက ဒုတိယပေးဂိုးအနည်းဆုံး အသင်းအနေနဲ့ ချန်ပီယံဆုဆွတ်ခူး ရရှိခဲ့ပါတယ်။ Keylor ဟာ လီဂူးဝမ်းမှာ Clean Sheets ၁၁ပွဲရထားပြီး၊ သူ့အထက်မှာ ၁၂ပွဲစီ ရထားတဲ့ Rajkovic-ရိန်းစ်၊ Mandanda-မာဆေး၊ Miagnan-လိုင်လီ ၃ယောက်ရှိပါတယ်။ ရာခိုင်နှုန်းအရတွက်မယ်ဆိုရင်တော့ ၂၁ပွဲကစားပြီး၊ ၁၁ပွဲ ပေးဂိုးမရှိတဲ့ Keylorက ၅၀%ကျော်နဲ့ ထိပ်ဆုံးမှာရှိပါတယ်။ သူ့အထက် ၃ယောက်က ပေး
ဂိုးမရှိ ၁၂ပွဲအတွက် ၂၇/၂၈ ပွဲလောက်ကစားခဲ့ရတော့ ၄၅%အောက်သာရှိပါတယ်။ ကိုရိုနာဗိုင်းရပ်ကြောင့် ပြင်သစ်အစိုးရက လီဂူးဝမ်းကို ဧပြီလထဲက ရပ်နားခဲ့တာဖြစ်ပြီး တစ်ပွဲချင်းအမှတ်ခွဲဝေတွက်ချက်ပုံနဲ့ ရာသီသိမ်းခဲ့တာဖြစ်ပါတယ်။ ပွဲစဉ်အားလုံးပြီးဆုံးချိန်အထိ ကစားမယ်ဆိုရင် Keylor ဟာ ၁၁ပွဲအထိကစားဖို့ အခွင့်အရေးရှိတာကြောင့် ထိပ်ဆုံးနေရာရနိုင်ပါတယ်။ ဒါပေမဲ့လဲ ခေတ်သစ် ဘောလုံးမျက်နှာစာမှာ ချန်ပီယံလိဂ် ၃ကြိမ်ဆက်အသင်း၊ ကလပ်ကမ္ဘာ့ဖလား ၃ကြိမ်ဆက်အသင်းရဲ့ ဂိုးပေါက်ကို ကာကွယ်စောင့်ရှောက်ခဲ့တဲ့ Keylor အတွက်တော့ အောင်မြင်မှု အထွေအထူး လိုအပ်တော့မယ် မထင်တော့ပါဘူး။ ဦးကျော်ဟိန်းစကားနဲ့ ပြောရင်တော့ သူရေးခဲ့ သမိုင်းစာရွက်တွေက တစ်ရွက်ပြီး တရွက်။
(၂) Thibaut Courtois
မနှစ်က RM ရာသီစမှာ Navas, Casilla, Courtois အပြင် လူငယ်ခြေတက်လေးတွေဖြစ်တဲ့ Luninနဲ့ Luca Zidane တို့ကြောင့် ဂိုးသမားဖောင်းပွပြီး၊ ရာသီဝက်တကြိမ် နည်းပြပြောင်းလဲမှုကြောင့် အထိုင်မကျဖြစ်ခဲ့တဲ့ RM ဂိုးသမားနေရာဟာ ယခုနှစ်တော့ အက်သလက်တီကိုရဲ့ Oblak လက်ထဲက ဇာမိုရာဆုကိုပါ မျက်စောင်းထိုးနေပြီဖြစ်ပါတယ်။ RM ခံစစ်ကပေးဂိုးအနည်းဆုံး ၂၂ဂိုးနဲ့ လာလီဂါထိပ်ဆုံးနေရာယူထားပြီး၊ Courtois က Clean sheets ၁၈ပွဲနဲ့ အကောင်းဆုံး ဂိုးသမားနေရာ ယူထားပါတယ်။ Courtois ဟာ RM နဲ့အခုမှစပြီး မှတ်တမ်းအသစ်တွေရေးထိုးမဲ့ ကစားသမားပါ။ တိုက်စစ်အားပြုတဲ့ ဆွဲဆောင်တဲ့ကစားဟန်ကိုသာ အသင်းရဲ့အမှတ်အသားထားလေ့ရှိတဲ့ RM ဟာ တိုက်စစ်ကစားသမားတွေရဲ့ ဒဏ်ရာနဲ့ ခြေစွမ်းကျမှုကြောင့် ဒီရာသီမှာ ခံစစ်စွမ်းဆောင်ရည်ကို အဓိကမှီခိုနေရပါတယ်။ Zidane ရဲ့ခံစစ်တည်ဆောက်မှုမှာ Courtois ဟာ စီးဝင်နိုင်နေပြီး အကောင်းဆုံးကာကွယ်မှုတွေ လုပ်နိုင်ပါတယ်။ ဒါတောင် လိုအပ်ချက်အနည်းငယ်နဲ့ နောက်ခံကစားသမားများကို နားလည်ချိတ်ဆက်မှု အကောင်းဆုံးအဆင့်ရောက်ဖို့အချိန်ကာလ တစ်ခုတော့ စောင့်ရမှာပါ။ Courtois ဘယ်လောက်အထိ သွားနိုင်မလဲ။ သူရှေ့က Casillas နဲ့ Navas ကတော့ လုံးဝမေ့မရအောင်ကို စွမ်းဆောင်ပြီး Courtois အတွက်တာဝန်အကြီးကြီးထားခဲ့ပြီ။
(၃) Kiko Casilla
လာဖာဘရီကာ အကယ်ဒမီထွက် စပိန်ကစားသမားပါ။ သူ့ရဲ့ RM အပေါ်ထားတဲ့ သစ္စာတရားနဲ့ ပေးဆပ်မှုက မုဒိတာပွားစရာပါပဲ။ Kiko ဟာ အခု ပရီးမီးယားလိဂ်ကို တက်လာမဲ့ လိဒ်ယူနိုက်တက်အတွက် ချန်ပီယံရှစ်အမှတ်ပေးဖလားကို ကိုင်မြောက်ခွင့်ရဖို့ စွမ်းဆောင်နေသူပါ။ တစ်ချိန်က ပရီးမီးယားလိဒ်ရဲ့ အသင်းကြီးတစ်သင်းဖြစ်တဲ့ လိဒ်ယူနိုက်တက်ဟာ တန်းဆင်းကစားနေရတာ ၁၆နှစ်လောက်ရှိနေပြီး၊ အခု Kiko တို့ကစားတဲ့အချိန်မှာ ချန်ပီယံဆုဖလားမျော်လင့်ချက်နဲ့အတူ တန်းတက်ပြီး နောက်နှစ်ပရီးမီးယားလိဒ်ကိုခြေချလာမှာပါ။ ဇယားထိပ်ကနေ ၄မှတ်ဖြတ်ထားတဲ့ လိဒ်ယူနိုက်တက်ဟာ ၃ပွဲကစားဖို့ကျန်ပါသေးတယ်။ ကျွန်တော်တို့ RM ရဲ့ချန်ပီယံမျော်လင့်ချက်နဲ့အတူ Kiko ဖလားမြောက်ခွင့်ကိုလဲ စောင့်မျော်နေပါတယ်။ Navas ရဲ့ အရံလူဖြစ်ခဲ့တဲ့ Kiko ဟာ RM အရံခုံတန်းမှာ အေးဆေးထိုင်ပြီး၊ ပွဲထွက်ကစားသမားတွေရဲ့ အောင်မြင်မှုကို ကျေနပ်စွာ မုဒိတာပွားခဲ့သူပါ။ စပိန်ဂိုးသမားတွေဖြစ်တဲ့ Casillas, Reina, Valdes တို့နဲ့ တစ်ခေတ်ထဲကျခဲ့တဲ့ Kiko ဟာ လက်ရွေးစင်အတွက် ကံဆိုးခဲ့တယ်လို့ပြောလို့ရပါတယ်။ ဒါပေမဲ့ Kikoဟာ ဘဝကိုကျေနပ် ရောင့်ရဲစွာရှင်သန်နိုင်စွမ်းရှိပြီး၊ RM အတွက် ပွဲထွက်ကစားသမားတစ်ယောက်ရဲ့ စိတ်ဓာတ်ထက် မလျော့ပဲ ရှုံးနိမ့်ခြင်း၊ အောင်မြင်ခြင်းတွေအတူတကွ မျှဝေခံစားပေးခဲ့သူပါ။ ဘာပဲဖြစ်ဖြစ် RM ရဲ့ ဒုတိယကြယ်စင်စုခေတ်က အကောင်းဆုံးလင်းလက်ပေးခဲ့တဲ့ ကြယ်တစ်ပွင့်လို့ပဲ Kiko ကိုအမြဲတမ်း အမှတ်တရသတိရနေမှာပါ။